អត្ថបទសិក្សា ៤២
តើព្រះយេហូវ៉ានឹងធ្វើឲ្យអ្នកក្លាយទៅជាអ្វី?
«ព្រះ . . . កំពុងមានសកម្មភាពក្នុងអ្នករាល់គ្នា . . . ដើម្បីឲ្យអ្នករាល់គ្នាមានបំណងប្រាថ្នានិងមាន[«សមត្ថភាព»]ប្រព្រឹត្ត»។—ភី. ២:១៣; ព.ថ.
ចម្រៀងលេខ១០៤ ឫទ្ធានុភាពបរិសុទ្ធជាអំណោយពីព្រះ
សេចក្ដីសង្ខេប *
១. តើព្រះយេហូវ៉ាអាចធ្វើអ្វីដើម្បីសម្រេចគោលបំណងរបស់លោក?
ព្រះយេហូវ៉ាអាចទៅជាអ្វីណាក៏ដោយដែលចាំបាច់ដើម្បីសម្រេចគោលបំណងរបស់លោក។ ជាឧទាហរណ៍ តួនាទីមួយចំនួនរបស់ព្រះយេហូវ៉ា គឺលោកបានក្លាយទៅជាអ្នកបង្រៀន អ្នកសម្រាលទុក្ខ និងអ្នកផ្សព្វផ្សាយដំណឹងល្អជាដើម។ (អេ. ៤៨:១៧; ២កូ. ៧:៦; កាឡ. ៣:៨) ប៉ុន្តែ លោកច្រើនតែប្រើមនុស្សដើម្បីសម្រេចគោលបំណងរបស់លោក។ (ម៉ាថ. ២៤:១៤; ២៨:១៩, ២០; ២កូ. ១:៣, ៤) ព្រះយេហូវ៉ាក៏អាចផ្ដល់ឲ្យយើងម្នាក់ៗនូវប្រាជ្ញានិងកម្លាំងដែលយើងត្រូវការ ដើម្បីក្លាយទៅជាអ្វីដែលចាំបាច់ក្នុងការសម្រេចបំណងប្រាថ្នារបស់លោក។ តាមការយល់ដឹងរបស់បណ្ឌិតមួយចំនួន ឈ្មោះរបស់ព្រះយេហូវ៉ារួមបញ្ចូលអត្ថន័យនេះ។
២. (ក) ហេតុអ្វីពេលខ្លះយើងប្រហែលជាសង្ស័យថាព្រះយេហូវ៉ាមិនបានប្រើយើង? (ខ) តើយើងនឹងពិចារណាអ្វីក្នុងអត្ថបទនេះ?
២ យើងទាំងអស់គ្នាចង់ឲ្យព្រះយេហូវ៉ាប្រើយើងដើម្បីធ្វើតាមបំណងប្រាថ្នារបស់លោក ប៉ុន្តែអ្នកខ្លះប្រហែលជាសង្ស័យថាព្រះយេហូវ៉ាកំពុងប្រើពួកគេឬយ៉ាងណា។ ដោយសារអ្វី? គឺដោយសារពួកគេគិតថាអាយុ កាលៈទេសៈ ឬសមត្ថភាពរបស់ពួកគេ មិនអាចឲ្យពួកគេធ្វើច្រើនដូចដែលពួកគេចង់ធ្វើនោះទេ។ រីឯអ្នកខ្លះទៀត ប្រហែលជាគិតថាពួកគេកំពុងធ្វើគ្រប់គ្រាន់ហើយ ដូច្នេះពួកគេមិនចាំបាច់ធ្វើថែមទៀតឡើយ។ ក្នុងអត្ថបទនេះ យើងនឹងពិចារណាអំពីរបៀបដែលព្រះយេហូវ៉ាអាចផ្ដល់ឲ្យយើងម្នាក់ៗនូវអ្វីដែលយើងត្រូវការ ដើម្បីសម្រេចគោលបំណងរបស់លោក។ បន្ទាប់មក យើងនឹងពិចារណាកំណត់ហេតុក្នុងគម្ពីរអំពីរបៀបដែលព្រះយេហូវ៉ាបានធ្វើឲ្យអ្នកបម្រើរបស់លោក ទាំងបុរសទាំងស្ត្រី មានបំណងប្រាថ្នានិងមានសមត្ថភាពប្រព្រឹត្ត។ ចុងក្រោយ យើងនឹងពិចារណាអំពីរបៀបដែលយើងអាចអនុញ្ញាតឲ្យព្រះយេហូវ៉ាប្រើយើង។
របៀបដែលព្រះយេហូវ៉ាផ្ដល់អ្វីដែលយើងត្រូវការ
៣. ស្តីអំពីអ្វីដែលចែងនៅភីលីព ២:១៣ តើព្រះយេហូវ៉ាអាចជួយយើងយ៉ាងណាឲ្យមានបំណងប្រាថ្នាដើម្បីប្រព្រឹត្ត?
៣ សូមអាន ភីលីព ២:១៣។ * ព្រះយេហូវ៉ាអាចធ្វើឲ្យយើងមានបំណងប្រាថ្នាដើម្បីប្រព្រឹត្ត។ តើលោកអាចធ្វើដូច្នេះយ៉ាងដូចម្ដេច? ជាឧទាហរណ៍ ប្រហែលជាយើងឮថាបុគ្គលម្នាក់ក្នុងក្រុមជំនុំរបស់យើងត្រូវការជំនួយ ឬមានអ្វីផ្សេងទៀតដែលត្រូវធ្វើ។ ឬក៏ពួកអ្នកចាស់ទុំអានសំបុត្រពីការិយាល័យសាខាអំពីសេចក្ដីត្រូវការនៅតំបន់ផ្សេងទៀត ក្រៅពីក្រុមជំនុំរបស់យើង។ នេះប្រហែលជាធ្វើឲ្យយើងសួរខ្លួនឯងថា ‹តើខ្ញុំអាចធ្វើអ្វីដើម្បីជួយ?›។ ឬយើងប្រហែលជាបានទទួលភារកិច្ចដ៏ពិបាកមួយ ប៉ុន្តែយើងឆ្ងល់ថាតើយើងអាចធ្វើបានល្អឬយ៉ាងណា។ ឬក៏ក្រោយពីអានបទគម្ពីរខ្លះ យើងប្រហែលជាឆ្ងល់ថា ‹តើខ្ញុំអាចអនុវត្តបទគម្ពីរនេះដើម្បីជួយអ្នកឯទៀតយ៉ាងដូចម្ដេច?›។ ព្រះយេហូវ៉ាមិនបង្ខំយើងឲ្យធ្វើអ្វីណាមួយឡើយ។ ប៉ុន្តែ ពេលព្រះយេហូវ៉ាឃើញថាយើងកំពុងគិតអំពីអ្វីដែលយើងអាចធ្វើបាន នោះលោកអាចជួយយើងឲ្យមានបំណងប្រាថ្នាចង់ធ្វើអ្វីដែលយើងបានគិតនោះ។
៤. តើតាមរបៀបណាព្រះយេហូវ៉ាអាចធ្វើឲ្យយើងមានសមត្ថភាពប្រព្រឹត្ត?
៤ ព្រះយេហូវ៉ាក៏អាចធ្វើឲ្យយើងមានសមត្ថភាពប្រព្រឹត្តដែរ។ (អេ. ៤០:២៩) តើតាមរបៀបណា? លោកអាចផ្ដល់សកម្មពលបរិសុទ្ធរបស់លោក ដើម្បីធ្វើឲ្យយើងកាន់តែមានសមត្ថភាព។ (និក្ខ. ៣៥:៣០-៣៥) ព្រះយេហូវ៉ាអាចប្រើអង្គការរបស់លោក ដើម្បីបង្រៀនយើងអំពីរបៀបធ្វើកិច្ចការផ្សេងៗ។ បើអ្នកមិនដឹងច្បាស់អំពីរបៀបបំពេញភារកិច្ចទេ សូមសុំជំនួយ។ ម្យ៉ាងទៀត នៅពេលណាក៏បាន អ្នកអាចសុំ«ឫទ្ធានុភាពដែលលើសពីធម្មតា»ពីបិតាដ៏សប្បុរសរបស់យើងដែលនៅស្ថានសួគ៌។ (២កូ. ៤:៧; លូក. ១១:១៣) គម្ពីរមានគំរូជាច្រើនស្តីអំពីរបៀបដែលព្រះយេហូវ៉ាបានជួយបុរសស្ត្រី ដោយធ្វើឲ្យពួកគេមានបំណងប្រាថ្នានិងមានសមត្ថភាពប្រព្រឹត្ត។ កាលដែលយើងពិចារណាអំពីគំរូខ្លះទាំងនេះ សូមគិតអំពីរបៀបដែលព្រះយេហូវ៉ាអាចប្រើអ្នកឲ្យធ្វើអ្វីដែលស្រដៀងនឹងអ្វីដែលពួកគេបានធ្វើ។
តើព្រះយេហូវ៉ាបានធ្វើឲ្យបុរសក្លាយទៅជាអ្វី?
៥. តើយើងអាចរៀនអ្វីពីរបៀបនិងពេលដែលព្រះយេហូវ៉ាបានប្រើម៉ូសេឲ្យសង្គ្រោះរាស្ត្រលោក?
៥ ព្រះយេហូវ៉ាបានធ្វើឲ្យម៉ូសេក្លាយទៅជាអ្នកសង្គ្រោះជនជាតិអ៊ីស្រាអែល។ ប៉ុន្តែ តើព្រះយេហូវ៉ាបានប្រើគាត់នៅពេលណា? លោកមិនបានប្រើម៉ូសេនៅពេលដែលគាត់គិតថា គាត់មានគុណសម្បត្ដិគ្រប់គ្រាន់ ក្រោយពីគាត់បានត្រូវ«អប់រំទៅតាមអស់ទាំងចំណេះវិជ្ជារបស់ជនជាតិអេស៊ីប»ទេ។ (សកម្ម. ៧:២២-២៥) ផ្ទុយទៅវិញ ព្រះយេហូវ៉ាបានប្រើម៉ូសេ ក្រោយពីលោកបានជួយគាត់ឲ្យក្លាយទៅជាបុគ្គលដែលមានចិត្តរាបទាបនិងចិត្តស្លូតបូត។ (សកម្ម. ៧:៣០, ៣៤-៣៦) ព្រះយេហូវ៉ាបានផ្ដល់ចិត្តក្លាហានដល់ម៉ូសេដើម្បីឲ្យគាត់និយាយទៅកាន់អ្នកគ្រប់គ្រងដែលមានអំណាចខ្លាំងក្លាបំផុតនៅស្រុកអេស៊ីប។ (និក្ខ. ៩:១៣-១៩) តើយើងរៀនអ្វីពីរបៀបនិងពេលដែលព្រះយេហូវ៉ាបានប្រើម៉ូសេ? ព្រះយេហូវ៉ាប្រើពួកអ្នកដែលព្យាយាមមានគុណសម្បត្ដិដូចលោក និងពឹងផ្អែកលើលោកដើម្បីទទួលកម្លាំង។—ភី. ៤:១៣
៦. តើយើងរៀនអ្វីពីរបៀបដែលព្រះយេហូវ៉ាបានប្រើបារស៊ីឡាយឲ្យជួយស្តេចដាវីឌ?
៦ រាប់រយឆ្នាំក្រោយមក ព្រះយេហូវ៉ាបានប្រើបារស៊ីឡាយឲ្យជួយស្តេចដាវីឌ។ ដាវីឌនិងបណ្ដាជនបាន«ស្រេកឃ្លាន ហើយល្វើយ» កាលដែលគាត់រត់គេចពីអាប់សាឡំមដែលជាកូនប្រុសរបស់គាត់។ នៅពេលនោះ បារស៊ីឡាយដែលជាបុរសវ័យចាស់ម្នាក់បានប្រថុយជីវិតជាមួយនឹងអ្នកឯទៀត ដើម្បីជួយដាវីឌនិងពួកអ្នកដែលនៅជាមួយគាត់។ បារស៊ីឡាយមិនបានគិតថាព្រះយេហូវ៉ាលែងប្រើគាត់ ដោយសារគាត់មានវ័យចាស់ឡើយ។ ផ្ទុយទៅវិញ ដោយចិត្តទូលាយ គាត់បានប្រើអ្វីដែលគាត់មានដើម្បីជួយបំពេញសេចក្ដីត្រូវការរបស់អ្នកបម្រើព្រះ។ (២សាំ. ១៧:២៧-២៩) តើយើងទាញមេរៀនអ្វី? ទោះជាយើងមានអាយុ ប៉ុន្មានក៏ដោយ ព្រះយេហូវ៉ាអាចប្រើយើងឲ្យបំពេញសេចក្ដីត្រូវការរបស់បងប្អូនរួមជំនឿដែលមានជីវភាពខ្វះខាត មិនថាពួកគេរស់នៅតំបន់យើងឬប្រទេសក្រៅក្ដី។ (សុភ. ៣:២៧, ២៨; ១៩:១៧) ទោះជាយើងប្រហែលជាមិនអាចជួយបងប្អូនរួមជំនឿដោយផ្ទាល់ក្ដី យើងអាចដាក់វិភាគទានសម្រាប់កិច្ចការទូទាំងពិភពលោក ដើម្បីជួយពួកគេនៅពេលណានិងកន្លែងណាដែលមានសេចក្ដីត្រូវការ។—២កូ. ៨:១៤, ១៥; ៩:១១
៧. តើព្រះយេហូវ៉ាបានប្រើស៊ីម្មានយ៉ាងដូចម្ដេច ហើយហេតុអ្វីនេះលើកទឹកចិត្តយើង?
៧ ព្រះយេហូវ៉ាបានសន្យានឹងបុរសស្មោះត្រង់វ័យចាស់ម្នាក់នៅក្រុងយេរូសាឡិមដែលមានឈ្មោះស៊ីម្មានថា គាត់នឹងមិនស្លាប់ទេ ទាល់តែបានឃើញមេស្ស៊ីសិន។ សេចក្ដីសន្យានោះច្បាស់ជាបានលើកទឹកចិត្តស៊ីម្មានខ្លាំងណាស់ ពីព្រោះគាត់បានទន្ទឹងរង់ចាំមេស្ស៊ីអស់ជាច្រើនឆ្នាំមកហើយ។ ព្រះយេហូវ៉ាបានឲ្យពរស៊ីម្មានដោយសារគាត់បានស៊ូទ្រាំនិងមានជំនឿលើលោក។ នៅថ្ងៃមួយ «សកម្មពលរបស់ព្រះ»បានបណ្ដាលឲ្យគាត់ចូលទៅក្នុងវិហារ។ នៅទីនោះ ស៊ីម្មានបានឃើញទារកយេស៊ូ ហើយព្រះយេហូវ៉ាបានប្រើគាត់ឲ្យប្រកាសទំនាយអំពីទារកនេះដែលនឹងទៅជាគ្រិស្ត។ (លូក. ២:២៥-៣៥) ទោះជាស៊ីម្មានទំនងជាបានស្លាប់មុនលោកយេស៊ូចាប់ផ្ដើមកិច្ចបម្រើផ្សាយរបស់លោកក្ដី គាត់សប្បាយចិត្តដែលព្រះយេហូវ៉ាបានប្រើគាត់តាមរបៀបនេះ។ ម្យ៉ាងទៀត គាត់នឹងទទួលអ្វីល្អជាច្រើននៅថ្ងៃអនាគត! ក្នុងពិភពលោកថ្មី បុរសដ៏ស្មោះត្រង់នេះនឹងឃើញអំពីរបៀបដែលការគ្រប់គ្រងរបស់លោកយេស៊ូនឹងធ្វើឲ្យក្រុមគ្រួសារទាំងអស់នៅផែនដីទទួលពរ។ (លោ. ២២:១៨) យើងក៏សប្បាយចិត្តចំពោះឯកសិទ្ធិណាក៏ដោយដែលព្រះយេហូវ៉ាបានផ្ដល់ឲ្យយើងក្នុងកិច្ចបម្រើលោក។
៨. តើព្រះយេហូវ៉ាអាចប្រើយើងដូចលោកបានប្រើបាណាបាសយ៉ាងដូចម្ដេច?
៨ នៅសតវត្សរ៍ទី១ គ.ស. បុរសដែលមានចិត្តទូលាយម្នាក់ឈ្មោះយ៉ូសែបបានសុខចិត្តឲ្យព្រះយេហូវ៉ាប្រើគាត់។ (សកម្ម. ៤:៣៦, ៣៧) ពួកសាវ័កបានហៅគាត់ថាបាណាបាសដែលមានន័យថា«កូននៃការសម្រាលទុក្ខ» នេះទំនងជាដោយសារគាត់ប៉ិនប្រសប់ក្នុងការសម្រាលទុក្ខអ្នកឯទៀត។ ជាឧទាហរណ៍ ក្រោយពីសុលបានទៅជាអ្នកកាន់តាមគ្រិស្ត បងប្អូនជាច្រើនមិនហ៊ានជួបគាត់ ដោយសារគាត់ធ្លាប់ជាអ្នកបៀតបៀនក្រុមជំនុំ។ ប៉ុន្តែ បាណាបាសបានសម្រាលទុក្ខនិងជួយសុល។ នេះច្បាស់ជាបានធ្វើឲ្យសុលសប្បាយចិត្តជាខ្លាំង។ (សកម្ម. ៩:២១, ២៦-២៨) ក្រោយមក ពួកអ្នកចាស់ទុំនៅក្រុងយេរូសាឡិមបានឃើញថា បងប្អូនដែលរស់នៅឆ្ងាយនៅក្រុងអាន់ទីយ៉ូកនាស្រុកស៊ីរី ត្រូវការការលើកទឹកចិត្ត។ ដូច្នេះ តើពួកគេបានចាត់អ្នកណាឲ្យទៅជួយបងប្អូនទាំងនោះ? គឺបាណាបាស! ពួកគេបានជ្រើសរើសត្រឹមត្រូវមែន។ គម្ពីរចែងថាបាណាបាសបាន«តាំងលើកទឹកចិត្តពួកគេទាំងអស់គ្នាឲ្យនៅស្មោះត្រង់នឹងលោកម្ចាស់ដោយតាំងចិត្តយ៉ាងរឹងមាំ»។ (សកម្ម. ១១:២២-២៤) ស្រដៀងគ្នាដែរ សព្វថ្ងៃនេះព្រះយេហូវ៉ាអាចជួយយើងឲ្យក្លាយទៅជា«កូននៃការសម្រាលទុក្ខ»ដល់បងប្អូនរួមជំនឿរបស់យើង។ ជាឧទាហរណ៍ លោកអាចប្រើយើងឲ្យសម្រាលទុក្ខពួកអ្នកដែលបានបាត់បង់មនុស្សជាទីស្រឡាញ់។ ឬក៏លោកប្រហែលជាជំរុញចិត្តយើងឲ្យទៅសួរសុខទុក្ខ ឬទូរស័ព្ទទៅបុគ្គលណាម្នាក់ដែលឈឺឬធ្លាក់ទឹកចិត្ត ដោយនិយាយពាក្យសម្ដីសប្បុរសប៉ុន្មានម៉ាត់។ តើអ្នកនឹងអនុញ្ញាតឲ្យព្រះយេហូវ៉ាប្រើអ្នកដូចលោកបានប្រើបាណាបាសឬទេ?—១ថែ. ៥:១៤
៩. តើយើងអាចរៀនអ្វីពីរបៀបដែលព្រះយេហូវ៉ាបានជួយបងវ៉ាស៊ីលីឲ្យទៅជាអ្នកចាស់ទុំដ៏ល្អម្នាក់?
៩ ព្រះយេហូវ៉ាបានជួយបងប្រុសម្នាក់ឈ្មោះវ៉ាស៊ីលីឲ្យក្លាយទៅជាអ្នកចាស់ទុំដ៏ល្អម្នាក់។ ពេលបងវ៉ាស៊ីលីបានទៅជាអ្នកចាស់ទុំនៅអាយុ២៦ឆ្នាំ គាត់បានគិតថាគាត់មិនមានបទពិសោធន៍គ្រប់គ្រាន់ដើម្បីជួយបងប្អូនទេ ជាពិសេសបងប្អូនដែលកំពុងជួបការពិបាក។ ក៏ប៉ុន្តែ គាត់បានទទួលការបង្ហាត់បង្រៀនល្អពីពួកអ្នកចាស់ទុំដែលមានបទពិសោធន៍ និងពីសាលាកិច្ចបម្រើរាជាណាចក្រ។ បងវ៉ាស៊ីលីខំប្រឹងដើម្បីរីកចម្រើន។ ជាឧទាហរណ៍ គាត់បានធ្វើបញ្ជីមួយអំពីអ្វីតូចតាចដែលគាត់អាចធ្វើ។ កាលដែលគាត់សម្រេចអ្វីទាំងនោះម្ដងមួយៗ គាត់កាន់តែមានទំនុកចិត្តជាងមុន។ ឥឡូវនេះ គាត់និយាយថា៖ «អ្វីដែលធ្លាប់ធ្វើឲ្យខ្ញុំខ្លាច ឥឡូវធ្វើឲ្យខ្ញុំ
មានអំណរវិញ។ ពេលព្រះយេហូវ៉ាជួយខ្ញុំឲ្យរកឃើញបទគម្ពីរដែលត្រូវនឹងកាលៈទេសៈដើម្បីសម្រាលទុក្ខបងប្អូនក្នុងក្រុមជំនុំ នេះធ្វើឲ្យខ្ញុំស្កប់ចិត្តក្រៃលែង»។ បងប្រុសៗទាំងឡាយ បើអ្នកយកតម្រាប់បងវ៉ាស៊ីលី ដោយសុខចិត្តឲ្យព្រះយេហូវ៉ាប្រើអ្នក លោកអាចផ្ដល់សមត្ថភាពឲ្យអ្នកបំពេញភារកិច្ចច្រើនជាងក្នុងក្រុមជំនុំ។តើព្រះយេហូវ៉ាបានធ្វើឲ្យស្ត្រីក្លាយទៅជាអ្វី?
១០. តើអ័ប៊ីកែលបានធ្វើអ្វី ហើយតើអ្នករៀនអ្វីពីគំរូរបស់នាង?
១០ ដាវីឌនិងពួកបុរសស្មោះត្រង់របស់គាត់បានត្រូវស្តេចសុលដេញចាប់ខ្លួន ហើយពួកគេត្រូវការជំនួយ។ ពួកបុរសរបស់ដាវីឌបានសុំអាហារបន្ដិចបន្តួចពីបុរសជនជាតិអ៊ីស្រាអែលដែលជាអ្នកមានម្នាក់ឈ្មោះណាបាល។ ពួកគេគិតថាពួកគេមានហេតុឲ្យសុំជំនួយ ដោយសារពួកគេបានការពារហ្វូងសត្វរបស់ណាបាលនៅតំបន់ស្ងាត់ជ្រងំ។ ប៉ុន្តែ ណាបាលដែលជាមនុស្សគិតតែប្រយោជន៍ផ្ទាល់ខ្លួន មិនព្រមឲ្យអ្វីសោះទៅពួកគេ។ ដាវីឌបានខឹងយ៉ាងខ្លាំងរហូតដល់គិតថានឹងសម្លាប់ណាបាលនិងពួកបុរសទាំងអស់ដែលនៅផ្ទះរបស់គាត់។ (១សាំ. ២៥:៣-១៣, ២២) ប៉ុន្តែ អ័ប៊ីកែលដែលជាប្រពន្ធរបស់ណាបាលគឺជាស្ត្រីដែលចេះពិចារណានិងមានរូបឆោមដ៏ស្រស់ស្អាត។ នាងបានក្រាបដល់ជើងរបស់ដាវីឌ ហើយដោយចិត្តក្លាហាន នាងបានពន្យល់គាត់អំពីមូលហេតុដែលគាត់មិនគួរសងសឹក ព្រោះការធ្វើដូច្នេះនឹងនាំឲ្យមានទោសឈាម។ នាងបានឲ្យយោបល់ដល់គាត់យ៉ាងសប្បុរសថាគាត់គួរទុករឿងនោះឲ្យព្រះយេហូវ៉ាដោះស្រាយ។ ពាក្យសម្ដីរបស់អ័ប៊ីកែលមានឥទ្ធិពលលើចិត្តរបស់ដាវីឌ។ គាត់បានទទួលស្គាល់ថាព្រះយេហូវ៉ាបានចាត់នាងឲ្យមក។ (១សាំ. ២៥:២៣-២៨, ៣២-៣៤) អ័ប៊ីកែលបានបណ្ដុះឲ្យមានគុណសម្បត្ដិដែលធ្វើឲ្យនាងមានប្រយោជន៍ចំពោះព្រះយេហូវ៉ា។ ស្រដៀងគ្នាដែរ ព្រះយេហូវ៉ាអាចប្រើស្ត្រីគ្រិស្តសាសនិកដែលចេះពិចារណា ឲ្យពង្រឹងក្រុមគ្រួសារនិងអ្នកឯទៀតក្នុងក្រុមជំនុំ។—សុភ. ២៤:៣; ទីត. ២:៣-៥
១១. តើកូនស្រីរបស់សាលូមបានធ្វើអ្វី? នៅសព្វថ្ងៃនេះ តើនរណាកំពុងយកតម្រាប់ពួកគេ?
១១ ច្រើនឆ្នាំក្រោយមក កូនស្រីៗរបស់សាលូមក៏នៅក្នុងចំណោមពួកអ្នកដែលព្រះយេហូវ៉ាបានប្រើ ដើម្បីសាងសង់កំពែងក្រុងយេរូសាឡិមឡើងវិញ។ (នេហ. ២:២០; ៣:១២) ទោះជាឪពុករបស់ពួកគេជាចៅហ្វាយក៏ដោយ ពួកគេសុខចិត្តធ្វើកិច្ចការពិបាកនិងដែលមានគ្រោះថ្នាក់នេះ។ (នេហ. ៤:១៥-១៨) ផ្ទុយស្រឡះពីពួកគេ ពួកបុរសដែលមានមុខមាត់ធំដុំក្នុងពួកត្កូអា«ឥតបានជួយ»ក្នុងកិច្ចការនោះសោះ! (នេហ. ៣:៥) សូមស្រមៃគិតថាកូនស្រីៗរបស់សាលូមមានអំណរយ៉ាងណាទៅ ពេលដែលកំពែងក្រុងនោះបានត្រូវសាងសង់រួចរាល់ក្នុងរយៈពេលតែ៥២ថ្ងៃប៉ុណ្ណោះ! (នេហ. ៦:១៥) នៅសម័យយើង បងស្រីៗសប្បាយចិត្តបំពេញកិច្ចបម្រើពិសេសជូនព្រះ ដោយចូលរួមសាងសង់និងថែទាំអគារដែលបានត្រូវប្រគល់ជូនព្រះយេហូវ៉ា។ យើងត្រូវការបងស្រីទាំងនេះដែលមានជំនាញ ចិត្តខ្នះខ្នែង និងភាពស្មោះត្រង់ ដើម្បីឲ្យកិច្ចការនេះសម្រេចបានជោគជ័យ។
១២. តើព្រះយេហូវ៉ាអាចប្រើយើងដូចលោកបានប្រើតាប៊ីថាយ៉ាងដូចម្ដេច?
១២ ព្រះយេហូវ៉ាបានជំរុញចិត្តតាប៊ីថាឲ្យធ្វើ«អំពើល្អជាបរិបូរនិងធ្វើទានជាច្រើន» ជាពិសេសចំពោះស្ត្រីមេម៉ាយ។ (សកម្ម. ៩:៣៦) គាត់ជាមនុស្សដែលមានចិត្តទូលាយនិងចិត្តសប្បុរសជាខ្លាំង ដូច្នេះពេលគាត់ស្លាប់ មនុស្សជាច្រើនបានកើតទុក្ខ។ ប៉ុន្តែ ពួកគេត្រេកអរក្រៃលែងពេលដែលសាវ័កពេត្រុសបានប្រោសគាត់ឲ្យរស់ឡើងវិញ។ (សកម្ម. ៩:៣៩-៤១) តើយើងរៀនអ្វីពីតាប៊ីថា? ទោះជាយើងចាស់ឬក្មេង ប្រុសឬស្រីក៏ដោយ យើងទាំងអស់គ្នាអាចធ្វើអ្វីៗដែលមានប្រយោជន៍ដើម្បីជួយបងប្អូនរបស់យើង។—ហេ. ១៣:១៦
១៣. តើព្រះយេហូវ៉ាបានប្រើបងរូថដែលជាមនុស្សអៀនតាមរបៀបណា ហើយតើគាត់បាននិយាយយ៉ាងណា?
១៣ បងស្រីម្នាក់ឈ្មោះរូថដែលជាមនុស្សអៀន ចង់ក្លាយទៅជាសាសនទូត។ កាលដែលគាត់នៅក្មេង គាត់បានផ្សព្វផ្សាយយ៉ាងលឿនពីផ្ទះមួយទៅផ្ទះមួយ ដោយឲ្យខិត្តប័ណ្ណដល់ម្ចាស់ផ្ទះ។ គាត់បាននិយាយថា៖ «ខ្ញុំពិតជាចូលចិត្តកិច្ចការនេះណាស់»។ ក៏ប៉ុន្តែ ការនិយាយជាមួយនឹងម្ចាស់ផ្ទះនិងការប្រាប់អ្នកឯទៀតអំពី
រាជាណាចក្រព្រះគឺជាការពិបាកសម្រាប់គាត់។ ទោះជាបងរូថជាមនុស្សអៀនក៏ដោយ ពេលគាត់មានអាយុ១៨ឆ្នាំ គាត់បានទៅជាអ្នកត្រួសត្រាយពេញពេល។ នៅឆ្នាំ១៩៤៦ គាត់បានចូលសាលាគម្ពីរគីលាតនៃសមាគមប៉មយាម ហើយក្រោយមកបានបម្រើនៅកោះហាវ៉ៃនិងប្រទេសជប៉ុន។ ព្រះយេហូវ៉ាបានប្រើគាត់ឲ្យផ្សព្វផ្សាយច្រើននៅតំបន់ទាំងនោះ។ ក្រោយផ្សព្វផ្សាយអស់រយៈពេលជិត៨០ឆ្នាំ បងរូថបាននិយាយថា៖ «ព្រះយេហូវ៉ាតែងតែពង្រឹងកម្លាំងចិត្តខ្ញុំជានិច្ច។ លោកបានជួយខ្ញុំឲ្យយកឈ្នះការអៀនខ្មាស។ ខ្ញុំជឿជាក់យ៉ាងមុតមាំថាព្រះយេហូវ៉ាអាចប្រើអ្នកណាក៏បាន ឲ្យតែអ្នកនោះទុកចិត្តលើលោក»។ចូរអនុញ្ញាតឲ្យព្រះយេហូវ៉ាប្រើអ្នក
១៤. តាមរយៈកូឡុស ១:២៩ តើយើងត្រូវធ្វើអ្វីបើយើងចង់ឲ្យព្រះយេហូវ៉ាប្រើយើង?
១៤ តាំងពីសម័យបុរាណ ព្រះយេហូវ៉ាបានប្រើអ្នកបម្រើលោកតាមរបៀបផ្សេងៗ។ តើលោកនឹងធ្វើឲ្យអ្នកក្លាយទៅជាអ្វី? គឺអាស្រ័យទៅលើអ្នកសុខចិត្តខំប្រឹងព្យាយាមដល់កម្រិតណា។ (សូមអាន កូឡុស ១:២៩) បើអ្នកសុខចិត្តឲ្យព្រះយេហូវ៉ាប្រើអ្នក នោះលោកអាចធ្វើឲ្យអ្នកក្លាយទៅជាអ្នកផ្សាយដែលមានចិត្តខ្នះខ្នែង អ្នកបង្រៀនដ៏ល្អ អ្នកសម្រាលទុក្ខ អ្នកធ្វើការដែលមានជំនាញ មិត្តល្អ ឬអ្វីផ្សេងទៀតដែលលោកត្រូវការដើម្បីសម្រេចបំណងប្រាថ្នារបស់លោក។
១៥. យោងទៅតាមធីម៉ូថេទី១ ៤:១២, ១៥ តើប្អូនប្រុសវ័យក្មេងសព្វថ្ងៃនេះគួរអង្វរសុំព្រះយេហូវ៉ាឲ្យជួយពួកគេធ្វើអ្វី?
១៥ ចុះយ៉ាងណាបើអ្នកជាប្អូនប្រុសវ័យក្មេងដែលជិតពេញវ័យ? ក្រុមជំនុំត្រូវការបងប្អូនប្រុសៗជាច្រើនដែលមានកម្លាំងខ្លាំងឲ្យទទួលភារកិច្ចថែមទៀត ដោយធ្វើជាជំនួយការខាងកិច្ចបម្រើ។ នៅក្រុមជំនុំជាច្រើនមានជំនួយការខាងកិច្ចបម្រើតិចជាងអ្នកចាស់ទុំ។ បើអ្នកជាប្អូនប្រុសវ័យក្មេង តើប្អូនអាចសុខចិត្តធ្វើថែមទៀតក្នុងក្រុមជំនុំឬទេ? ប្អូនប្រុសខ្លះនិយាយថា៖ «សម្រាប់ខ្ញុំ គ្រាន់តែធ្វើជាអ្នកផ្សាយធម្មតាគឺគ្រប់គ្រាន់ហើយ»។ បើអ្នកមានអារម្មណ៍ដូច្នេះ សូមអង្វរសុំព្រះយេហូវ៉ាជួយអ្នកឲ្យមានបំណងប្រាថ្នាដើម្បីមានគុណសម្បត្ដិគ្រប់គ្រាន់ធ្វើជាជំនួយការខាងកិច្ចបម្រើ ហើយឲ្យអ្នកមានសមត្ថភាពធ្វើអ្វីទាំងអស់ដែលអ្នកអាចធ្វើបានដើម្បីបម្រើលោក។ (សាស្ដ. ១២:១) យើងត្រូវការជំនួយពីអ្នក!—សូមអាន ធីម៉ូថេទី១ ៤:១២, ១៥
១៦. តើយើងគួរសុំអ្វីពីព្រះយេហូវ៉ា ហើយហេតុអ្វី?
១៦ ព្រះយេហូវ៉ាអាចធ្វើឲ្យអ្នកក្លាយទៅជាអ្វីណាក៏ដោយដែលលោកត្រូវការ ដើម្បីសម្រេចបំណងប្រាថ្នារបស់លោក។ ដូច្នេះ សូមសុំលោកផ្ដល់ឲ្យអ្នកមានបំណងប្រាថ្នាដើម្បីធ្វើកិច្ចការរបស់លោក ហើយសុំលោកផ្ដល់ឲ្យអ្នកមានសមត្ថភាពដែលអ្នកត្រូវការ។ ទោះជាអ្នកមានវ័យចាស់ឬក្មេងក្ដី សូមប្រើកម្លាំង ពេលវេលា ធនធាន និងសមត្ថភាពរបស់អ្នកដើម្បីលើកតម្កើងព្រះយេហូវ៉ានៅឥឡូវនេះ។ (សាស្ដ. ៩:១០) ពេលអ្នកមានឱកាសពិសេសដើម្បីធ្វើច្រើនជាងក្នុងកិច្ចបម្រើព្រះយេហូវ៉ា សូមកុំឆាប់បដិសេធដោយសារអ្នកគិតថាអ្នកមិនអាចធ្វើបានឡើយ។ យើងមានឯកសិទ្ធិធ្វើអ្វីដែលយើងអាចធ្វើបាន ដើម្បីលើកកិត្ដិយសបិតារបស់យើងដែលប្រកបដោយសេចក្ដីស្រឡាញ់។ លោកសមនឹងទទួលកិត្ដិយសពីយើង!
ចម្រៀងលេខ១២៧ ខ្ញុំគួរជាមនុស្សដែលព្រះពេញចិត្ត
^ វគ្គ 5 តើអ្នកគិតថាអ្នកអាចបម្រើព្រះយេហូវ៉ាច្រើនជាងឬទេ? តើអ្នកឆ្ងល់ថាអ្នកនៅតែមានប្រយោជន៍ចំពោះលោកឬទេ? ឬក៏តើអ្នកមានអារម្មណ៍ថាអ្នកមិនចាំបាច់ធ្វើច្រើនជាងដើម្បីបម្រើព្រះយេហូវ៉ាតាមរបៀបដែលលោកពេញចិត្តឬទេ? ក្នុងអត្ថបទនេះ យើងនឹងពិចារណាអំពីរបៀបផ្សេងៗដែលព្រះយេហូវ៉ាអាចឲ្យអ្នកមានបំណងប្រាថ្នានិងមានសមត្ថភាពដើម្បីក្លាយទៅជាអ្វីដែលចាំបាច់ក្នុងការសម្រេចគោលបំណងរបស់លោក។
^ វគ្គ 3 ទោះជាប៉ូលបានសរសេរសំបុត្រទៅកាន់គ្រិស្តសាសនិកដែលរស់នៅសតវត្សរ៍ទី១ក្ដី ពាក្យរបស់គាត់ជាប់ទាក់ទងនឹងអ្នកបម្រើទាំងអស់របស់ព្រះយេហូវ៉ា។