ឪពុកម្ដាយទាំងឡាយ ចូរជួយកូនៗរបស់អ្នកឲ្យ«មានប្រាជ្ញាដើម្បីទទួលសេចក្ដីសង្គ្រោះ»
«តាំងពីអ្នកជាទារកនៅឡើយ អ្នកបានស្គាល់ឯកសារបរិសុទ្ធនានាដែលអាច ធ្វើឲ្យអ្នកមានប្រាជ្ញាដើម្បីទទួលសេចក្ដីសង្គ្រោះ»។—ធីម៉ូថេទី២ ៣:១៥
ចម្រៀងលេខ: ១, ៤១
១, ២. ហេតុអ្វីឪពុកម្ដាយខ្លះប្រហែលជាព្រួយបារម្ភពេលកូនរបស់ពួកគេចង់ប្រគល់ខ្លួនជូនព្រះយេហូវ៉ានិងទទួលការជ្រមុជទឹក?
ជារៀងរាល់ឆ្នាំសិស្សគម្ពីររាប់ពាន់នាក់បានប្រគល់ខ្លួនជូនព្រះយេហូវ៉ា ហើយបានទទួលការជ្រមុជទឹក។ ពួកគេជាច្រើននាក់ជាមនុស្សវ័យក្មេងដែលបានត្រូវចិញ្ចឹមអប់រំក្នុងសេចក្ដីពិត ហើយដែលបានជ្រើសរើសរបៀបរស់នៅដែលល្អបំផុត។ (ទំនុកតម្កើង ១:១-៣) បើអ្នកជាឪពុកម្ដាយដែលជាគ្រិស្ដសាសនិក អ្នកទំនងជាទន្ទឹងរង់ចាំថ្ងៃដែលកូនរបស់អ្នកនឹងទទួលការជ្រមុជទឹក។—សូមពិនិត្យបន្ថែម យ៉ូហានទី៣ ៤
២ ប៉ុន្ដែ អ្នកប្រហែលជានៅតែមានការព្រួយបារម្ភ។ អ្នកប្រហែលជាបានឃើញប្អូនៗវ័យក្មេងខ្លះដែលបានទទួលការជ្រមុជទឹក តែក្រោយមកបែរជាមិនច្បាស់ថាការរស់នៅសមស្របតាមខ្នាតតម្រារបស់ព្រះគឺល្អសម្រាប់ពួកគេ។ ប្អូនៗខ្លះក៏បានចាកចេញពីសេចក្ដីពិត។ ដូច្នេះ អ្នកប្រហែលជាព្រួយបារម្ភថា ក្រោយពីកូនរបស់អ្នកចាប់ផ្ដើមបម្រើព្រះយេហូវ៉ា គាត់នឹងបាត់បង់សេចក្ដីស្រឡាញ់ដែលគាត់ធ្លាប់មានចំពោះសេចក្ដីពិត។ កូនរបស់អ្នកប្រហែលជានឹងដូចគ្រិស្ដសាសនិកនៅសតវត្សរ៍ទី១ នាក្រុងអេភេសូរ។ លោកយេស៊ូបានមានប្រសាសន៍អំពីពួកគេថា៖ «អ្នកបានបាត់បង់សេចក្ដីស្រឡាញ់ដែលអ្នកធ្លាប់មានកាលពីដើមដំបូង»។ (ការបើកបង្ហាញ ២:៤) តើតាមរបៀបណាអ្នកអាចជួយកូនឲ្យរក្សាសេចក្ដីស្រឡាញ់របស់គាត់ឲ្យនៅរឹងមាំ ហើយ«ធំលូតលាស់ឲ្យបានសេចក្ដីសង្គ្រោះ»? (ពេត្រុសទី១ ២:២) យើងអាចរៀនពីគំរូរបស់ធីម៉ូថេ។
«អ្នកបានស្គាល់ឯកសារបរិសុទ្ធនានា»
៣. (ក) តើតាមរបៀបណាធីម៉ូថេបានទៅជាគ្រិស្ដសាសនិក ហើយស្ដីអំពីអ្វីដែលគាត់បានរៀន តើគាត់បានធ្វើអ្វី? (ខ) ស្ដីអំពីការរៀន តើប៉ូលបានលើកបញ្ជាក់ចំណុចបីយ៉ាងអ្វីដល់ធីម៉ូថេ?
៣ សាវ័កប៉ូលបានទៅក្រុងលីស្ត្រាជាលើកដំបូងនៅឆ្នាំ៤៧ គ.ស.។ ទំនងជាពេលនោះហើយដែលធីម៉ូថេ ដែលប្រហែលជាមានវ័យជំទង់បានរៀនអំពីសេចក្ដីបង្រៀនរបស់លោកយេស៊ូជាលើកដំបូង។ គាត់បានធ្វើតាមអ្វីដែលគាត់បានរៀន ហើយពីរឆ្នាំក្រោយមកគាត់បានចាប់ផ្ដើមធ្វើដំណើរក្នុងកិច្ចបម្រើព្រះជាមួយនឹងប៉ូល។ ប្រហែលជា១៦ឆ្នាំក្រោយមក ប៉ូលបានសរសេរទៅធីម៉ូថេថា៖ «ចូរបន្ដប្រព្រឹត្ដតាមអ្វីៗដែលអ្នកបានរៀន និងដែលបានត្រូវនាំឲ្យជឿជាក់ ដោយដឹងថាអ្នកបានរៀនអ្វីៗទាំងនោះពីអ្នកណា។ ហើយថា តាំងពីអ្នកជាទារកនៅឡើយ អ្នកបានស្គាល់ឯកសារបរិសុទ្ធនានា[បទគម្ពីរភាសាហេប្រឺ]ដែលអាចធ្វើឲ្យអ្នកមានប្រាជ្ញាដើម្បីទទួលសេចក្ដីសង្គ្រោះ តាមរយៈជំនឿដែលទាក់ទងនឹងគ្រិស្ដយេស៊ូ»។ (ធីម៉ូថេទី២ ៣:១៤, ១៥) សូមកត់សម្គាល់អ្វីដែលប៉ូលបាននិយាយអំពីធីម៉ូថេថា គាត់ (១) បានស្គាល់ឯកសារបរិសុទ្ធនានា (២) បានត្រូវនាំឲ្យជឿជាក់អ្វីៗដែលគាត់បានរៀន និង(៣) មានប្រាជ្ញាដើម្បីទទួលសេចក្ដីសង្គ្រោះ តាមរយៈជំនឿដែលទាក់ទងនឹងគ្រិស្ដយេស៊ូ។
សូម្បីតែកូនតូចៗក៏អាចរៀនអំពីព្រឹត្ដិការណ៍និងបុគ្គលក្នុងគម្ពីរដែរ
៤. តើអ្នកបានប្រើអ្វីដើម្បីបង្រៀនកូនតូចៗរបស់អ្នក? (សូមមើលរូបភាពនៅដើមអត្ថបទ)
៤ ក្នុងនាមជាឪពុកម្ដាយដែលជាគ្រិស្ដសាសនិក អ្នកចង់ឲ្យកូនរបស់អ្នកស្គាល់ឯកសារបរិសុទ្ធនានា ដែលសព្វថ្ងៃនេះរួមបញ្ចូលបទគម្ពីរភាសាហេប្រឺនិងបទគម្ពីរគ្រិស្ដសាសនិកជាភាសាក្រិច។ សូម្បីតែកូនតូចៗក៏អាចរៀនអំពីព្រឹត្ដិការណ៍និងបុគ្គលក្នុងគម្ពីរដែរ។ អង្គការរបស់ព្រះយេហូវ៉ាបានផ្ដល់សៀវភៅ សៀវភៅស្ដើង និងវីដេអូជាច្រើនដែលឪពុកម្ដាយអាចប្រើដើម្បីជួយកូនៗរបស់ពួកគេ។ ក្នុងភាសារបស់អ្នក តើមានអ្វីទាំងនេះឬទេ? កូនរបស់អ្នកត្រូវស្គាល់អំពីអ្វីដែលមាននៅក្នុងគម្ពីរដើម្បីមានចំណងមិត្ដភាពរឹងមាំជាមួយនឹងព្រះយេហូវ៉ា។
«បានត្រូវនាំឲ្យជឿជាក់»
៥. (ក) តើឃ្លាដែលថា«បានត្រូវនាំឲ្យជឿជាក់»មានន័យយ៉ាងណា? (ខ) ហេតុអ្វីយើងដឹងថាធីម៉ូថេបានត្រូវនាំឲ្យជឿជាក់ដំណឹងល្អអំពីលោកយេស៊ូ?
៥ ការបង្រៀនកូនអំពីព្រឹត្ដិការណ៍និងបុគ្គលក្នុងគម្ពីរប៉ុណ្ណោះគឺមិនគ្រប់គ្រាន់ទេ។ សូមចាំថាធីម៉ូថេក៏«បានត្រូវនាំឲ្យជឿជាក់»ដែរ។ ឃ្លាភាសាក្រិចដែលប៉ូលបានប្រើនៅទីនេះ មានន័យថា«បានត្រូវធ្វើឲ្យប្រាកដថាអ្វីមួយជាការពិត»។ ធីម៉ូថេបានស្គាល់បទគម្ពីរភាសាហេប្រឺ‹តាំងពីគាត់ជាទារកនៅឡើយ› ពោលគឺតាំងពីគាត់នៅក្មេងខ្ចី។ ក្រោយមក គាត់បានជឿជាក់ថាលោកយេស៊ូជាមេស្ស៊ី។ ធីម៉ូថេមានជំនឿខ្លាំង ហើយនេះបានជំរុញចិត្ដគាត់ឲ្យទទួលការជ្រមុជទឹកនិងបម្រើជាសាសនទូតជាមួយនឹងប៉ូល។
៦. តើតាមរបៀបណាអ្នកអាចជួយកូនៗរបស់អ្នកឲ្យមានជំនឿលើបណ្ដាំរបស់ព្រះ?
៦ តើតាមរបៀបណាអ្នកអាចជួយកូនៗរបស់អ្នកឲ្យមានជំនឿដូចធីម៉ូថេ ដើម្បីពួកគេក៏នឹង«ត្រូវនាំឲ្យជឿជាក់»ដែរ? ដំបូង សូមមានចិត្ដអត់ធ្មត់។ ដើម្បីមានជំនឿរឹងមាំគឺត្រូវការពេល។ ម្យ៉ាងទៀត ទោះជាអ្នកមានជំនឿលើអ្វីមួយក្ដី នេះមិនមានន័យថាកូនរបស់អ្នកនឹងជឿដូចអ្នកដោយស្វ័យប្រវត្ដិនោះទេ។ កូនម្នាក់ៗត្រូវប្រើ«សមត្ថភាពរិះគិត»របស់ពួកគេ ដើម្បីមានជំនឿលើគម្ពីរ។ (សូមអាន រ៉ូម ១២:១) ក្នុងនាមជាឪពុកម្ដាយ អ្នកអាចធ្វើអ្វីជាច្រើនដើម្បីជួយកូនៗឲ្យពង្រឹងជំនឿរបស់ពួកគេ ជាពិសេសពេលដែលពួកគេសួរសំណួរ។ សូមពិចារណាអំពីអ្វីដែលយើងអាចរៀនពីគំរូរបស់ឪពុកម្នាក់។
៧, ៨. (ក) តើឪពុកដែលជាគ្រិស្ដសាសនិកម្នាក់បានបង្ហាញចិត្ដអត់ធ្មត់យ៉ាងដូចម្ដេចពេលគាត់បង្រៀនកូនស្រីរបស់គាត់? (ខ) តើធ្លាប់មានពេលណាមួយដែលអ្នកត្រូវមានចិត្ដអត់ធ្មត់ចំពោះកូនឬទេ? សូមរៀបរាប់។
៧ បងប្រុសថូម៉ាស់ដែលមានកូនស្រីម្នាក់អាយុ១១ឆ្នាំ បាននិយាយថាជួនកាលកូនរបស់គាត់សួរគាត់នូវសំណួរខ្លះៗដូចជា៖ «តើព្រះយេហូវ៉ាអាចប្រើការវិវត្ដន៍ដើម្បីបង្កើតជីវិតនៅលើផែនដីឬទេ?» ឬក៏«ហេតុអ្វីយើងមិនចូលរួមក្នុងកិច្ចការសង្គមដូចជាការបោះឆ្នោតជាដើម ដើម្បីខំធ្វើឲ្យជីវិតមនុស្សកាន់តែប្រសើរឡើង?»។ នៅពេលខ្លះ គាត់ត្រូវទប់ចិត្ដមិនប្រាប់កូនអំពីអ្វីដែលកូនត្រូវតែជឿ។ បងថូម៉ាស់ដឹងថាអ្វីដែលនាំឲ្យអ្នកណាម្នាក់ជឿជាក់លើសេចក្ដីពិតគឺមិនមែនដោយប្រាប់ចំៗម្ដងនោះទេ តែត្រូវលើកហេតុផលជាច្រើនម្ដងមួយៗឲ្យគាត់ពិចារណា។
៨ បងថូម៉ាស់ក៏ដឹងដែរថាគាត់ត្រូវមានចិត្ដអត់ធ្មត់ដើម្បីបង្រៀនកូនរបស់គាត់។ តាមពិត គ្រិស្ដសាសនិកទាំងអស់ត្រូវមានចិត្ដអត់ធ្មត់។ (កូឡុស ៣:១២) បងថូម៉ាស់ទទួលស្គាល់ថាគឺត្រូវការពេលនិងការនិយាយជាមួយនឹងកូនច្រើនដងដើម្បីជួយកូនរបស់គាត់ឲ្យមានជំនឿ។ គាត់ត្រូវវែកញែកជាមួយនឹងកូនអំពីអ្វីដែលកូនរៀនពីគម្ពីរ។ បងថូម៉ាស់និយាយថា៖ «ជាពិសេស ចំពោះចំណុចដ៏សំខាន់ ខ្ញុំនិងប្រពន្ធរបស់ខ្ញុំចង់ដឹងថាកូនរបស់យើងពិតជាជឿនូវអ្វីដែលគាត់កំពុងរៀន ហើយថានោះគឺសមហេតុផលចំពោះគាត់ឬយ៉ាងណា។ បើកូនខ្ញុំសួរ នោះជាការល្អ។ និយាយឲ្យត្រង់ទៅ បើកូនខ្ញុំមិនសួរសំណួរ ហើយស្រាប់តែទទួលយកអ្វីណាមួយ នោះនាំឲ្យខ្ញុំព្រួយបារម្ភ»។
អ្នកត្រូវមានចិត្ដអត់ធ្មត់ដើម្បីជួយកូនរបស់អ្នកឲ្យមានជំនឿលើបណ្ដាំរបស់ព្រះ
៩. តើតាមរបៀបណាអ្នកអាចជួយកូនរបស់អ្នកឲ្យមានជំនឿលើបណ្ដាំរបស់ព្រះ?
៩ ពេលឪពុកម្ដាយបង្រៀនកូនដោយចិត្ដអត់ធ្មត់ យូរៗទៅកូនរបស់ពួកគេនឹងចាប់ផ្ដើមយល់អំពី«ទទឹង បណ្ដោយ កម្ពស់ និងជម្រៅនៃសេចក្ដីពិត»។ (អេភេសូរ ៣:១៨) យើងអាចបង្រៀនពួកគេតាមរបៀបដែលស័ក្ដិសមនឹងអាយុនិងកម្រិតនៃការយល់ដឹងរបស់ពួកគេ។ កាលដែលពួកគេកាន់តែមានជំនឿទៅលើអ្វីដែលពួកគេបានរៀន នោះនឹងស្រួលជាងឲ្យពួកគេនិយាយការពារជំនឿរបស់ពួកគេនៅចំពោះមុខអ្នកឯទៀត នេះរួមបញ្ចូលសិស្សរួមថ្នាក់របស់ពួកគេផងដែរ។ (ពេត្រុសទី១ ៣:១៥) ជាឧទាហរណ៍ តើកូនរបស់អ្នកអាចប្រើគម្ពីរដើម្បីពន្យល់អំពីអ្វីដែលកើតឡើងនៅពេលមនុស្សស្លាប់ឬទេ? តើការពន្យល់នេះក្នុងគម្ពីរគឺសមហេតុផលចំពោះពួកគេឬទេ? * (សូមមើលកំណត់សម្គាល់) សូមចាំថាអ្នកត្រូវមានចិត្ដអត់ធ្មត់ដើម្បីជួយកូនរបស់អ្នកឲ្យមានជំនឿលើបណ្ដាំរបស់ព្រះ បើអ្នកធ្វើដូច្នេះ អ្នកនឹងមិនស្តាយក្រោយទេ។—ចោទិយកថា ៦:៦, ៧
គំរូរបស់អ្នកផ្ទាល់ក៏សំខាន់ផងដែរ ដើម្បីជួយកូនៗរបស់អ្នកឲ្យកាន់តែមានជំនឿ
១០. តើអ្វីគឺសំខាន់ពេលបង្រៀនកូនៗ?
១០ គំរូរបស់អ្នកផ្ទាល់ក៏សំខាន់ផងដែរ ដើម្បីជួយកូនៗរបស់អ្នកឲ្យកាន់តែមានជំនឿ។ បងស្រីស្ដេហ្វានីដែលជាម្ដាយដែលមានកូនបីនាក់បាននិយាយថា៖ «តាំងពីកូនៗរបស់ខ្ញុំនៅតូចនៅឡើយ ខ្ញុំបានសួរខ្លួនឯងថា ‹តើខ្ញុំនិយាយជាមួយនឹងកូនៗរបស់ខ្ញុំអំពីមូលហេតុដែលខ្ញុំជឿជាក់ថាមានព្រះយេហូវ៉ា ថាលោកមានសេចក្ដីស្រឡាញ់ ហើយថាផ្លូវរបស់លោកគឺត្រឹមត្រូវឬទេ? តើកូនរបស់ខ្ញុំអាចឃើញយ៉ាងច្បាស់ថាខ្ញុំពិតជាស្រឡាញ់ព្រះយេហូវ៉ាឬទេ?› ខ្ញុំមិនអាចរំពឹងថាកូនៗរបស់ខ្ញុំនឹងជឿជាក់នោះទេ បើខ្ញុំមិនជឿជាក់»។
«ប្រាជ្ញាដើម្បីទទួលសេចក្ដីសង្គ្រោះ»
១១, ១២. តើប្រាជ្ញាគឺជាអ្វី ហើយហេតុអ្វីយើងដឹងថានេះមិនអាស្រ័យលើអាយុរបស់បុគ្គលណាម្នាក់?
១១ យើងបានរៀនថា ធីម៉ូថេមាន (១) ចំណេះពីបទគម្ពីរ និង (២) ការជឿជាក់លើជំនឿរបស់គាត់។ ប៉ុន្ដែ ពេលដែលប៉ូលបាននិយាយថាឯកសារបរិសុទ្ធនានាអាចធ្វើឲ្យធីម៉ូថេមាន«ប្រាជ្ញាដើម្បីទទួលសេចក្ដីសង្គ្រោះ» តើគាត់ចង់មានន័យយ៉ាងណា?
១២ សៀវភៅការយល់ធ្លុះជ្រៅនឹងបទគម្ពីរ (Insight on the Scriptures) ក្បាលទី២ពន្យល់ថា ក្នុងគម្ពីរប្រាជ្ញារួមបញ្ចូល«សមត្ថភាពប្រើចំណេះនិងការយល់ដឹងដើម្បីដោះស្រាយបញ្ហា ដើម្បីជៀសវាងឬការពារខ្លួនកុំឲ្យមានគ្រោះថ្នាក់ ដើម្បីសម្រេចគោលដៅផ្សេងៗ ឬដើម្បីជូនយោបល់ដល់អ្នកឯទៀតឲ្យពួកគេអាចធ្វើដូច្នេះ។ នេះគឺផ្ទុយពីភាពល្ងង់ខ្លៅ»។ គម្ពីរចែងថា៖ «សេចក្ដីចំកួតរមែងនៅជាប់ក្នុងចិត្ដរបស់កូនក្មេង»។ (សុភាសិត ២២:១៥) ដោយសារប្រាជ្ញាគឺផ្ទុយពីភាពល្ងង់ខ្លៅ នោះប្រាជ្ញាជាសញ្ញាសម្គាល់មួយនៃភាពចាស់ទុំ។ យើងក្លាយទៅជាបុគ្គលដែលមានភាពចាស់ទុំខាងជំនឿដោយសារយើងកោតខ្លាចព្រះយេហូវ៉ា ហើយចង់ស្តាប់បង្គាប់លោក មិនគ្រាន់តែដោយសារយើងមានវ័យចាស់នោះទេ។—សូមអាន ទំនុកតម្កើង ១១១:១០
១៣. តើប្អូនៗវ័យក្មេងអាចបង្ហាញយ៉ាងណាថាពួកគេមានប្រាជ្ញាដើម្បីទទួលសេចក្ដីសង្គ្រោះ?
១៣ ប្អូនៗវ័យក្មេងដែលមានភាពចាស់ទុំមួយកម្រិតមិន«មានគំនិតរេចុះរេឡើងដូចរបស់ដែលយោលតាមរលកសមុទ្រ ឬត្រូវបក់ផាត់ទៅនេះទៅនោះ»ដោយសារសេចក្ដីប៉ងប្រាថ្នារបស់ខ្លួន ឬដោយសារឥទ្ធិពលពីមនុស្សវ័យក្មេងឯទៀតនោះទេ។ (អេភេសូរ ៤:១៤) ផ្ទុយទៅវិញ «សមត្ថភាពយល់ដឹង»របស់ពួកគេបានត្រូវ«បង្វឹកបង្ហាត់ដើម្បីសម្គាល់អ្វីដែលខុសនិងអ្វីដែលត្រូវ»។ (ហេប្រឺ ៥:១៤) ដូច្នេះ ពួកគេធ្វើការសម្រេចចិត្ដដ៏ឈ្លាសវៃ សូម្បីតែពេលដែលឪពុកម្ដាយឬមនុស្សពេញវ័យឯទៀតមិននៅជាមួយនឹងពួកគេក៏ដោយ។ (ភីលីព ២:១២) ប្រាជ្ញាបែបនេះគឺសំខាន់ចាំបាច់ដើម្បីទទួលសេចក្ដីសង្គ្រោះ។ (សូមអាន សុភាសិត ២៤:១៤) តើអ្នកអាចជួយកូនរបស់អ្នកឲ្យមានប្រាជ្ញាបែបនេះយ៉ាងដូចម្ដេច? អ្នកត្រូវធ្វើឲ្យប្រាកដថាកូនដឹងអំពីអ្វីដែលអ្នកចាត់ទុកថាសំខាន់។ តាមរយៈពាក្យសម្ដីនិងការប្រព្រឹត្ដរបស់អ្នក ពួកគេគួរឃើញថាអ្នកកំពុងព្យាយាមរស់នៅសមស្របតាមខ្នាតតម្រាក្នុងគម្ពីរ។—រ៉ូម ២:២១-២៣
ហេតុអ្វីការខំប្រឹងប្រែងរបស់ឪពុកម្ដាយគឺសំខាន់? (សូមមើលវគ្គ១៤-១៨)
១៤, ១៥. (ក) តើប្អូនៗវ័យក្មេងដែលចង់ទទួលការជ្រមុជទឹកគួរគិតអំពីអ្វី? (ខ) តើអ្នកអាចជួយកូនៗរបស់អ្នកយ៉ាងដូចម្ដេចឲ្យរំពឹងគិតអំពីពរដែលមកពីការធ្វើតាមច្បាប់របស់ព្រះយេហូវ៉ា?
១៤ ប៉ុន្ដែ ដើម្បីជួយកូនរបស់អ្នកឲ្យមានជំនឿ ការគ្រាន់តែប្រាប់ពួកគេអំពីអ្វីដែលខុសនិងអ្វីដែលត្រូវគឺមិនគ្រប់គ្រាន់ទេ។ អ្នកក៏ត្រូវជួយពួកគេឲ្យចេះវែកញែកអំពីសំណួរដូចជា៖ ‹ហេតុអ្វីគម្ពីរហាមមិនឲ្យធ្វើអ្វីដែលប្រហែលជាមើលទៅគួរឲ្យទាក់ទាញចិត្ដ? តើតាមរបៀបណាខ្ញុំអាចធ្វើឲ្យប្រាកដថាខ្នាតតម្រាក្នុងគម្ពីរតែងតែមានប្រយោជន៍សម្រាប់ខ្ញុំ?›។—អេសាយ ៤៨:១៧, ១៨
១៥ បើកូនរបស់អ្នកចង់ទទួលការជ្រមុជទឹក សូមជួយគាត់ឲ្យគិតយ៉ាងដិតដល់អំពីភារកិច្ចដែលពួកអ្នកដែលបានទទួលការជ្រមុជទឹកមាន។ តើគាត់មានអារម្មណ៍យ៉ាងណាចំពោះភារកិច្ចទាំងនេះ? តើនេះនាំឲ្យមានប្រយោជន៍អ្វីខ្លះ? តើនេះនាំឲ្យមានការពិបាកអ្វីខ្លះ? ហេតុអ្វីការទទួលការជ្រមុជទឹកនាំឲ្យទទួលប្រយោជន៍ច្រើនជាងការពិបាក? (ម៉ាកុស ១០:២៩, ៣០) ការគិតយ៉ាងដិតដល់អំពីអ្វីទាំងនេះមុនទទួលការជ្រមុជទឹក គឺសំខាន់ណាស់។ សូមជួយកូនរបស់អ្នកឲ្យរំពឹងគិតអំពីពរដែលមកពីការស្តាប់បង្គាប់និងលទ្ធផលអាក្រក់ដែលមកពីការមិនស្តាប់បង្គាប់។ យ៉ាងនេះ គាត់ទំនងជានឹងជឿថាការធ្វើតាមខ្នាតតម្រាក្នុងគម្ពីរគឺតែងតែជាអ្វីដែលល្អប្រសើរចំពោះគាត់។—ចោទិយកថា ៣០:១៩, ២០
ពេលប្អូនៗវ័យក្មេងដែលបានទទួលការជ្រមុជទឹកសង្ស័យអំពីសេចក្ដីពិត
១៦. តើឪពុកម្ដាយគួរធ្វើអ្វីបើកូនរបស់ពួកគេដែលបានទទួលការជ្រមុជទឹកចាប់ផ្ដើមមានជំនឿខ្សោយ?
១៦ តើអ្នកអាចធ្វើអ្វីបើកូនរបស់អ្នកចាប់ផ្ដើមសង្ស័យអំពីសេចក្ដីពិតក្រោយពីទទួលការជ្រមុជទឹក? ជាឧទាហរណ៍ ប្រហែលជាអ្វីៗក្នុងពិភពលោកនេះទាក់ទាញចិត្ដរបស់កូនអ្នក ឬក៏កូនរបស់អ្នកប្រហែលជាមិនប្រាកដថាការធ្វើតាមគោលការណ៍គម្ពីរគឺពិតជារបៀបរស់នៅដ៏ល្អបំផុត។ (ទំនុកតម្កើង ៧៣:១-៣, ១២, ១៣) ការប្រព្រឹត្ដរបស់អ្នកនៅពេលនោះអាចជះឥទ្ធិពលទៅលើការសម្រេចចិត្ដរបស់កូនថាគាត់នឹងបន្ដបម្រើព្រះយេហូវ៉ាឬយ៉ាងណា។ សូមព្យាយាមមិនឈ្លោះប្រកែកជាមួយនឹងកូនអំពីរឿងនេះ ទោះជាកូននៅក្មេងឬមានវ័យជំទង់ក៏ដោយ។ ផ្ទុយទៅវិញ សូមធ្វើឲ្យប្រាកដថាគាត់ដឹងថាអ្នកស្រឡាញ់គាត់ ហើយចង់ជួយគាត់។
១៧, ១៨. បើប្អូនៗវ័យក្មេងសង្ស័យអំពីសេចក្ដីពិត តើឪពុកម្ដាយរបស់គាត់អាចជួយគាត់យ៉ាងដូចម្ដេច?
១៧ ប្អូនៗវ័យក្មេងដែលបានទទួលការជ្រមុជទឹកបានប្រគល់ខ្លួនជូនព្រះយេហូវ៉ា។ នេះជាសេចក្ដីសន្យាថាយើងនឹងបម្រើនិងស្រឡាញ់លោកជាងអ្វីៗទាំងអស់។ (សូមអាន ម៉ាកុស ១២:៣០) ចំពោះព្រះយេហូវ៉ា ការប្រគល់ខ្លួនជូនលោកជាសេចក្ដីសន្យាដ៏សំខាន់មួយ ហើយយើងក៏គួរមានទស្សនៈដូចលោកដែរ។ (សាស្តា ៥:៤, ៥) សូមរំលឹកកូនរបស់អ្នកអំពីរឿងនេះ។ ប៉ុន្ដែមុនសិន សូមអាននិងសិក្សាសៀវភៅផ្សេងៗដែលអង្គការរបស់ព្រះយេហូវ៉ាបានរៀបចំសម្រាប់ឪពុកម្ដាយ។ បន្ទាប់មក តាមរបៀបដ៏សប្បុរសនិងនៅពេលត្រឹមត្រូវ សូមជួយកូនរបស់អ្នកឲ្យដឹងថាការសម្រេចចិត្ដរបស់គាត់ដើម្បីប្រគល់ខ្លួនជូនព្រះយេហូវ៉ានិងទទួលការជ្រមុជទឹកគឺជាអ្វីដ៏សំខាន់ណាស់ តែនេះនឹងនាំឲ្យគាត់ទទួលពរជាច្រើន។
១៨ ជាឧទាហរណ៍ អ្នកអាចរកឃើញយោបល់ល្អនៅក្នុងទស្សនាវដ្ដីប៉មយាម ខែមេសា-មិថុនា ឆ្នាំ២០១២ ទំព័រ១៨-២១ ក្នុងអត្ថបទដែលមានចំណងជើងថា «តើអ្នកគួរធ្វើយ៉ាងណាពេលកូនសង្ស័យអំពីជំនឿសាសនារបស់អ្នក?»។ អត្ថបទនោះផ្ដល់យោបល់ឲ្យឪពុកម្ដាយដែលជាគ្រិស្ដសាសនិកឲ្យមិនគិតថាពួកគាត់ជាឪពុកម្ដាយដែលបរាជ័យឡើយ។ តែលើកទឹកចិត្ដពួកគាត់ឲ្យព្យាយាមគិតអំពីកត្ដាផ្សេងៗដែលប្រហែលជាមានឥទ្ធិពលទៅលើទស្សនៈរបស់កូនជំទង់ដោយសួរសំណួរមួយចំនួនដូចជា៖ ‹តើកូនមានអារម្មណ៍ឯកោ ហើយគ្មានមិត្ដភក្ដិក្នុងក្រុមជំនុំឬទេ? តើកូនពិបាកប្រាប់អំពីជំនឿរបស់ខ្លួនដោយសារកូនខ្វះទំនុកចិត្ដឬទេ? តើកូនមានអារម្មណ៍ថាការរស់នៅស្របតាមខ្នាតតម្រារបស់គ្រិស្ដសាសនិកគឺជាភារកិច្ចដ៏ធ្ងន់ឬទេ?›។ បន្ទាប់មក អត្ថបទនេះក៏ផ្ដល់យោបល់អំពីរបៀបដែលឪពុកម្ដាយដែលជាគ្រិស្ដសាសនិកអាចជួយកូនដែលសង្ស័យអំពីសេចក្ដីពិត។
១៩. តើតាមរបៀបណាឪពុកម្ដាយអាចជួយកូនឲ្យ«មានប្រាជ្ញាដើម្បីទទួលសេចក្ដីសង្គ្រោះ»?
១៩ ក្នុងនាមជាឪពុកម្ដាយ អ្នកមានឯកសិទ្ធិនិងភារកិច្ចដ៏សំខាន់ដើម្បីអប់រំកូនរបស់អ្នកទៅតាម«ការប្រៀនប្រដៅរបស់ព្រះយេហូវ៉ា ហើយបណ្ដុះឲ្យកូនមានគំនិតដូចលោក»។ (អេភេសូរ ៦:៤) ដូចដែលយើងបានរៀនខាងលើ នេះមានន័យថាអ្នកត្រូវបង្រៀនកូនរបស់អ្នកអំពីអ្វីដែលគម្ពីរចែង ហើយជួយពួកគេឲ្យជឿជាក់លើអ្វីដែលពួកគេរៀន។ ពេលដែលពួកគេមានជំនឿមាំមួន នេះនឹងជំរុញចិត្ដពួកគេឲ្យប្រគល់ខ្លួនជូនព្រះយេហូវ៉ា ហើយជូនលោកនូវអ្វីដែលល្អបំផុត។ សូមឲ្យបណ្ដាំរបស់ព្រះយេហូវ៉ា សកម្មពលរបស់លោក និងការខំប្រឹងប្រែងរបស់អ្នកជួយកូនៗឲ្យ«មានប្រាជ្ញាដើម្បីទទួលសេចក្ដីសង្គ្រោះ»។
^ វគ្គ 9 ជំនួយសិក្សាសម្រាប់សៀវភៅ«តើគម្ពីរអាចបង្រៀនយើងអំពីអ្វី?» គឺជាឧបករណ៍ដ៏ល្អប្រសើរដែលអាចជួយទាំងប្អូនៗវ័យក្មេងទាំងមនុស្សពេញវ័យឲ្យយល់និងពន្យល់អំពីសេចក្ដីពិតក្នុងគម្ពីរ។ ជំនួយសិក្សាទាំងនេះមានជាច្រើនភាសានៅក្នុងគេហទំព័រjw.org។ សូមចុច«សេចក្ដីបង្រៀនក្នុងគម្ពីរ» ▸ «ជំនួយសិក្សាគម្ពីរ»។
