អត្ថបទសិក្សា ១
«ចូរទៅបង្រៀនមនុស្ស...ឲ្យក្លាយទៅជាអ្នកកាន់តាមខ្ញុំ»
បទគម្ពីរប្រចាំឆ្នាំសម្រាប់ឆ្នាំ២០២០គឺ: «ចូរទៅបង្រៀនមនុស្ស . . . ឲ្យក្លាយទៅជាអ្នកកាន់តាមខ្ញុំ ហើយជ្រមុជទឹកឲ្យពួកគេ»។—ម៉ាថ. ២៨:១៩
ចម្រៀងលេខ៧៩ ចូរបង្រៀនពួកគេឲ្យកាន់ជំហរមាំមួន
សេចក្ដីសង្ខេប *
១-២. តើទេវតាបានប្រាប់អ្វីដល់ពួកស្ត្រីនៅទីបញ្ចុះសពរបស់លោកយេស៊ូ ហើយតើលោកយេស៊ូបង្គាប់អ្វីដល់ពួកគេ?
នៅព្រឹកព្រលឹមថ្ងៃទី១៦ ខែណែសាន ឆ្នាំ៣៣ គ.ស. ស្ត្រីមួយចំនួនដែលជាអ្នកស្រឡាញ់ព្រះបានទៅទីបញ្ចុះសពរបស់លោកយេស៊ូ។ ពួកគេបានកើតទុក្ខជាខ្លាំង។ ជាង៣៦ម៉ោងមុន គេបានបញ្ចុះសពលោកម្ចាស់យេស៊ូគ្រិស្តនៅទីនោះ។ ពេលពួកគេទៅដល់ទីបញ្ចុះសពរបស់លោកក្នុងបំណងចង់លាបគ្រឿងក្រអូបនិងប្រេងក្រអូបទៅលើសព ពួកគេភ្ញាក់ផ្អើលជាខ្លាំងដោយឃើញថាទីបញ្ចុះសពនៅទទេ! ទេវតាមួយរូបប្រាប់ស្ត្រីទាំងនោះថាលោកយេស៊ូបានត្រូវប្រោសឲ្យរស់ឡើងវិញហើយ រួចប្រាប់ទៀតថា៖ «លោកនឹងទៅស្រុកកាលីឡេមុនអ្នករាល់គ្នា ហើយអ្នកនឹងឃើញលោកនៅទីនោះ»។—ម៉ាថ. ២៨:១-៧; លូក. ២៣:៥៦; ២៤:១០
២ ក្រោយពីស្ត្រីទាំងនោះបានចេញពីទីបញ្ចុះសព លោកយេស៊ូផ្ទាល់បានជួបពួកគេ ហើយបង្គាប់ថា៖ «ចូរទៅ ហើយនាំដំណឹងប្រាប់បងប្អូនរបស់ខ្ញុំផង ដើម្បីឲ្យពួកគាត់ទៅស្រុកកាលីឡេ ហើយពួកគាត់នឹងឃើញខ្ញុំនៅទីនោះ»។ (ម៉ាថ. ២៨:១០) ក្រោយពីលោកយេស៊ូបានត្រូវប្រោសឲ្យរស់ឡើងវិញ អ្វីដំបូងដែលលោកធ្វើគឺរៀបចំការជួបជុំជាមួយនឹងអ្នកកាន់តាមលោក។ ក្នុងការជួបជុំនោះ លោកបានឲ្យការណែនាំខ្លះដ៏សំខាន់ដល់ពួកគេ។
តើលោកយេស៊ូបានឲ្យបង្គាប់ដល់អ្នកណា?
ពេលលោកយេស៊ូជួបជុំជាមួយនឹងពួកសាវ័កនិងអ្នកឯទៀតនៅតំបន់កាលីឡេបន្ទាប់ពីលោកបានត្រូវប្រោសឲ្យរស់ឡើងវិញ លោកបានបង្គាប់ពួកគេឲ្យ‹ទៅបង្រៀនមនុស្សឲ្យក្លាយទៅជាអ្នកកាន់តាមលោក› (សូមមើលវគ្គ៣-៤)
៣-៤. ហេតុអ្វីយើងអាចនិយាយថាបង្គាប់នៅម៉ាថាយ ២៨:១៩, ២០ មិនមែនសម្រាប់តែពួកសាវ័កប៉ុណ្ណោះ? (សូមមើលរូបភាពនៅក្រប)
៣ សូមអាន ម៉ាថាយ ២៨:១៦-២០។ ក្នុងការជួបជុំដែលលោកយេស៊ូបានរៀបចំ លោកបានលើកឡើងអំពីកិច្ចការសំខាន់ដែលអ្នកកាន់តាមលោកនឹងសម្រេចនៅសតវត្សរ៍ទី១ ហើយ នេះគឺដូចគ្នានឹងកិច្ចការដែលយើងកំពុងធ្វើនៅសព្វថ្ងៃនេះ។ លោកយេស៊ូបានមានប្រសាសន៍ថា៖ «ដូច្នេះ ចូរទៅបង្រៀនមនុស្សគ្រប់ជាតិសាសន៍ឲ្យក្លាយទៅជាអ្នកកាន់តាមខ្ញុំ . . . ហើយបង្រៀនពួកគេឲ្យកាន់តាមអ្វីៗទាំងអស់ដែលខ្ញុំបានបង្គាប់អ្នករាល់គ្នា»។
៤ លោកយេស៊ូចង់ឲ្យពួកអ្នកកាន់តាមលោកទាំងអស់ផ្សព្វផ្សាយ។ លោកមិនមែនបង្គាប់តែសាវ័កស្មោះត្រង់១១នាក់របស់លោកឲ្យធ្វើកិច្ចការនេះប៉ុណ្ណោះទេ។ ហេតុអ្វីយើងអាចប្រាកដអំពីរឿងនេះ? ពេលដែលលោកយេស៊ូបានឲ្យបង្គាប់នោះនៅលើភ្នំមួយក្នុងស្រុកកាលីឡេ តើមានតែសាវ័ក១១នាក់របស់លោកប៉ុណ្ណោះដែលនៅទីនោះឬ? សូមនឹកឃើញអំពីអ្វីដែលទេវតាបាននិយាយទៅកាន់ពួកស្ត្រី ដែលថា៖ «អ្នកនឹងឃើញលោកនៅ[ស្រុកកាលីឡេ]»។ ដូច្នេះ ស្ត្រីដ៏ស្មោះត្រង់ក៏ច្បាស់ជានៅទីនោះដែរ។ តែតើមានអ្នកណាទៀតឬទេ? សាវ័កប៉ូលប្រាប់ថា លោកយេស៊ូបាន«លេចមកជួបបងប្អូនជាងប្រាំរយនាក់នៅពេលតែមួយ»។ (១កូ. ១៥:៦) តើបងប្អូនទាំងនោះបានជួបជុំគ្នានៅឯណា?
៥. តើយើងរៀនអ្វីពីកូរិនថូសទី១ ១៥:៦?
៥ យើងមានហេតុឲ្យយល់ថានៅកូរិនថូសទី១ ១៥:៦ ប៉ូលបានសំដៅទៅលើការជួបជុំនៅស្រុកកាលីឡេ ដែលបានត្រូវរៀបរាប់នៅម៉ាថាយ ជំពូក២៨។ តើមានមូលហេតុអ្វីខ្លះ? ទី១ អ្នកកាន់តាមលោកយេស៊ូភាគច្រើនមកពីស្រុកកាលីឡេ។ ដូច្នេះ គឺស្រួលជាងឲ្យមានការជួបជុំជាមួយនឹងមនុស្សជាច្រើននៅលើភ្នំមួយក្នុងស្រុកកាលីឡេ ជាជាងនៅផ្ទះនាក្រុងយេរូសាឡិម។ ទី២ ក្រោយពីលោកយេស៊ូបានត្រូវប្រោសឲ្យរស់ឡើងវិញ លោកបានជួបសាវ័ក១១នាក់របស់លោករួចហើយនៅផ្ទះមួយនាក្រុងយេរូសាឡិម។ បើលោកយេស៊ូចង់បង្គាប់តែពួកសាវ័កប៉ុណ្ណោះអំពីការផ្សព្វផ្សាយនិងការបង្រៀនអ្នកឯទៀត លោកអាចធ្វើនេះបាននៅក្រុងយេរូសាឡិម ជាជាងសុំពួកគេ ព្រមទាំងស្ត្រីនិងអ្នកផ្សេងទៀតឲ្យមកជួបលោកនៅស្រុកកាលីឡេ។—លូក. ២៤:៣៣, ៣៦
៦. តើបង្គាប់របស់លោកយេស៊ូនៅម៉ាថាយ ២៨:២០ ជាប់ទាក់ទងយ៉ាងណានឹងសម័យនេះ? តើបង្គាប់នេះកំពុងសម្រេចដល់កម្រិតណានៅសព្វថ្ងៃនេះ?
៦ សូមកត់សម្គាល់អំពីមូលហេតុដ៏សំខាន់ទី៣។ បង្គាប់របស់លោកយេស៊ូ អំពីការបង្រៀនមនុស្សឲ្យក្លាយទៅជាអ្នកកាន់តាមលោកគឺមិនគ្រាន់តែសម្រាប់គ្រិស្តសាសនិកដែលរស់នៅសតវត្សរ៍ទី១ប៉ុណ្ណោះទេ។ ហេតុអ្វីយើងដឹង? ពាក្យចុងក្រោយក្នុងបង្គាប់របស់លោកយេស៊ូទៅកាន់អ្នកកាន់តាមលោក គឺថា៖ «ខ្ញុំនៅជាមួយនឹងអ្នករាល់គ្នាជារៀងរាល់ថ្ងៃ រហូតដល់គ្រាចុងបញ្ចប់នៃរបៀបរបបពិភពលោកនេះ»។ (ម៉ាថ. ២៨:២០) ប្រសាសន៍របស់លោកយេស៊ូអំពីកិច្ចការបង្រៀនអ្នកឯទៀតឲ្យក្លាយជាអ្នកកាន់តាមលោកកំពុងកើតឡើងនៅសព្វថ្ងៃនេះ។ សូមគិតទៅមើល! រាល់ឆ្នាំ មនុស្សជិត៣០០.០០០នាក់ទៅជាអ្នកកាន់តាមលោកយេស៊ូគ្រិស្ត ទទួលការជ្រមុជទឹក និងទៅជាសាក្សី ព្រះយេហូវ៉ា។ នេះពិតជាអស្ចារ្យមែន!
៧. តើយើងនឹងពិចារណាអ្វីនៅឥឡូវនេះ ហើយហេតុអ្វី?
៧ មនុស្សជាច្រើនដែលសិក្សាគម្ពីររីកចម្រើនរហូតដល់ទទួលការជ្រមុជទឹក។ ក៏ប៉ុន្តែ តាមមើលទៅអ្នកខ្លះដែលសិក្សាគម្ពីរជាទៀងទាត់ជាមួយយើងមិនហ៊ានទៅជាអ្នកកាន់តាមលោកយេស៊ូទេ។ ពួកគេចូលចិត្តសិក្សាគម្ពីរ ប៉ុន្តែពួកគេមិនរីកចម្រើនរហូតដល់ទទួលការជ្រមុជទឹកឡើយ។ បើអ្នកកំពុងបង្រៀនគម្ពីរដល់អ្នកណាម្នាក់ យើងប្រាកដថាអ្នកចង់ជួយសិស្សរបស់អ្នកឲ្យធ្វើតាមអ្វីដែលគាត់រៀន ហើយទៅជាអ្នកកាន់តាមគ្រិស្ត។ ក្នុងអត្ថបទនេះ យើងនឹងពិចារណាអំពីរបៀបដែលយើងអាចជួយសិស្សឲ្យស្រឡាញ់ព្រះយេហូវ៉ានិងរីកចម្រើនក្នុងសេចក្ដីពិត។ ហេតុអ្វីយើងត្រូវពិចារណាអំពីរឿងនេះ? ពីព្រោះជួនកាលយើងប្រហែលជាត្រូវសម្រេចចិត្តថាបន្តឬក៏ឈប់បង្រៀនគម្ពីរដល់អ្នកណាម្នាក់។
ចូរព្យាយាមជួយសិស្សគម្ពីរ ឲ្យស្រឡាញ់ព្រះយេហូវ៉ា
៨. ហេតុអ្វីពេលខ្លះគឺពិបាកជួយសិស្សគម្ពីរឲ្យស្រឡាញ់ព្រះយេហូវ៉ា?
៨ ព្រះយេហូវ៉ាចង់ឲ្យមនុស្សបម្រើលោក ដោយសារពួកគេស្រឡាញ់លោក។ ដូច្នេះ គោលដៅរបស់យើងគឺជួយសិស្សគម្ពីរយើងឲ្យយល់ថាព្រះយេហូវ៉ាយកចិត្តទុកដាក់យ៉ាងខ្លាំងចំពោះពួកគេម្នាក់ៗ ហើយថាលោកស្រឡាញ់ពួកគេខ្លាំងណាស់។ យើងចង់ជួយពួកគេឲ្យយល់ថាព្រះយេហូវ៉ាជា«ឪពុកដល់ពួកកំព្រា នឹងជាចៅក្រមដល់ទំនុក. ៦៨:៥) កាលដែលសិស្សរបស់អ្នកដឹងថាព្រះស្រឡាញ់ពួកគេខ្លាំងយ៉ាងណា នោះពួកគេនឹងទំនងជាចាប់ផ្ដើមស្រឡាញ់លោកវិញដែរ។ សិស្សខ្លះប្រហែលជាពិបាកចាត់ទុកព្រះយេហូវ៉ាថាជាបិតាដែលស្រឡាញ់ពួកគេ ដោយសារឪពុករបស់ពួកគេមិនបានបង្ហាញសេចក្ដីស្រឡាញ់និងមនោសញ្ចេតនាចំពោះពួកគេឡើយ។ (២ធី. ៣:១, ៣) ដូច្នេះ ពេលដែលអ្នកបង្រៀនគម្ពីរ សូមលើកបញ្ជាក់អំពីគុណសម្បត្ដិដ៏គួរឲ្យទាក់ទាញរបស់ព្រះយេហូវ៉ា។ ចូរជួយសិស្សរបស់អ្នកឲ្យយល់ថាព្រះដែលប្រកបដោយសេចក្ដីស្រឡាញ់ចង់ឲ្យពួកគេទទួលជីវិតដែលគ្មានទីបញ្ចប់ ហើយលោកប្រុងប្រៀបជាស្រេចដើម្បីជួយពួកគេឲ្យបានជីវិតបែបនោះ។ តើយើងអាចធ្វើអ្វីទៀត?
ពួកមេម៉ាយ»។ (៩-១០. តើយើងគួរប្រើសៀវភៅណាខ្លះពេលបង្រៀនសិស្សគម្ពីរ ហើយហេតុអ្វី?
៩ ចូរប្រើសៀវភៅ«តើគម្ពីរអាចបង្រៀនយើងអំពីអ្វី?» និង«ចូររក្សាខ្លួនជាមនុស្សដែលព្រះស្រឡាញ់»។ សៀវភៅទាំងនោះបានត្រូវរៀបចំឡើងជាពិសេសដើម្បីជួយយើងបង្រៀនសិស្សឲ្យស្រឡាញ់ព្រះយេហូវ៉ា។ ជាឧទាហរណ៍ ជំពូកទី១ក្នុងសៀវភៅ មានចម្លើយចំពោះសំណួរដូចជា៖ តើព្រះយកចិត្តទុកដាក់នឹងយើងឬទេ? តើព្រះមានអារម្មណ៍យ៉ាងណាពេលមនុស្សរងទុក្ខវេទនា? តើអ្នកអាចធ្វើជាសម្លាញ់របស់ព្រះយេហូវ៉ាបានទេ? ចំណែកសៀវភៅ«ព្រះស្រឡាញ់»វិញ សៀវភៅនោះនឹងជួយសិស្សឲ្យយល់ថាការធ្វើតាមគោលការណ៍គម្ពីរអាចធ្វើឲ្យជីវិតគាត់ប្រសើរឡើង ហើយនាំឲ្យគាត់ចូលកាន់តែជិតព្រះយេហូវ៉ា។ ទោះជាអ្នកធ្លាប់បង្រៀនសៀវភៅទាំងនេះដល់អ្នកឯទៀតក្ដី សូមរៀបចំឲ្យបានល្អរាល់ដងដែលអ្នកបង្រៀនសិស្ស ដើម្បីអ្នកអាចគិតអំពីសេចក្ដីត្រូវការរបស់សិស្សម្នាក់ៗ។ បង្រៀនយើង
១០ ក៏ប៉ុន្តែ ឧបមាថាសិស្សរបស់អ្នកចាប់អារម្មណ៍ព័ត៌មាននៅក្នុងសៀវភៅផ្សេងទៀតដែលមិនបានត្រូវរួមបញ្ចូលក្នុងសៀវភៅដែលជាឧបករណ៍ដើម្បីបង្រៀនគម្ពីរ។ ប្រហែលជាអ្នកអាចលើកទឹកចិត្តគាត់ឲ្យអានសៀវភៅនោះដោយខ្លួនឯង ដើម្បីអ្នកនៅតែអាចបង្រៀនគាត់ពីសៀវភៅដែលជាឧបករណ៍ដើម្បីបង្រៀនគម្ពីរ។
ចូរចាប់ផ្ដើមបង្រៀនគម្ពីរដោយការអធិដ្ឋាន (សូមមើលវគ្គ១១)
១១. តើយើងគួរចាប់ផ្ដើមនិងបញ្ចប់ការបង្រៀនគម្ពីរដោយការអធិដ្ឋាននៅពេលណា? តើអ្នកអាចលើកឡើងអំពីរឿងនេះយ៉ាងដូចម្ដេច?
១១ ចូរចាប់ផ្ដើមបង្រៀនគម្ពីរដោយការអធិដ្ឋាន។ បើអ្នកបានចាប់ផ្ដើមបង្រៀនគម្ពីរដល់បុគ្គលណាម្នាក់ គឺជាការល្អដែលអ្នកចាប់ផ្ដើមនិងបញ្ចប់ការសិក្សាដោយអធិដ្ឋាន។ ម្យ៉ាងទៀត គឺល្អបំផុតដែលអ្នកធ្វើដូច្នេះឲ្យបានឆាប់បំផុតតាមដែលអាចធ្វើបាន។ យើងត្រូវជួយសិស្សឲ្យដឹងថា យើងអាចយល់បណ្ដាំរបស់ព្រះបានលុះត្រាតែមានជំនួយពីសកម្មពលរបស់ព្រះ។ អ្នកបង្រៀនគម្ពីរខ្លះលើកឡើងអំពីរឿងនេះ ដោយអានយ៉ាកុប ១:៥ ដែលចែងថា៖ «ប្រសិនបើក្នុងចំណោមអ្នករាល់គ្នា មានអ្នកណាម្នាក់ខ្វះប្រាជ្ញា ចូរឲ្យអ្នកនោះសុំព្រះម្ដងហើយម្ដងទៀតចុះ»។ រួចមក អ្នកបង្រៀនគម្ពីរសួរសិស្សថា៖ «តើយើងអាចសុំប្រាជ្ញាពីព្រះយ៉ាងដូចម្ដេច?»។ សិស្សទំនងជានឹងយល់ស្របថាយើងគួរអធិដ្ឋានទៅព្រះ។
១២. តើអ្នកអាចប្រើទំនុកតម្កើង ១៣៩:២-៤ដើម្បីជួយសិស្សឲ្យអធិដ្ឋានទៅព្រះយេហូវ៉ាអស់ពីចិត្តយ៉ាងដូចម្ដេច?
១២ ចូរបង្រៀនសិស្សរបស់អ្នកអំពីរបៀបអធិដ្ឋាន។ សូមពង្រឹងទំនុកចិត្តគាត់ថាព្រះយេហូវ៉ាចង់ស្ដាប់សេចក្ដីអធិដ្ឋានដ៏ស្មោះអស់ពីចិត្តរបស់គាត់។ យើងចង់ពន្យល់គាត់ថា ក្នុងសេចក្ដីអធិដ្ឋានផ្ទាល់ខ្លួន យើងអាចប្រាប់ព្រះយេហូវ៉ាអំពីគំនិតនិងអារម្មណ៍ដែលយើងប្រហែលជាមិនចង់ប្រាប់អ្នកផ្សេងទៀត។ តាមពិត ព្រះយេហូវ៉ាស្គាល់គំនិតនិងអារម្មណ៍ដែលកប់ជ្រៅក្នុងចិត្តរបស់យើងរួចហើយ។ (សូមអាន ទំនុកតម្កើង ១៣៩:២-៤) យើងក៏អាចលើកទឹកចិត្តសិស្សរបស់យើងឲ្យសុំជំនួយពីព្រះដើម្បីកែប្រែគំនិតមិនត្រឹមត្រូវនិងលះចោលទម្លាប់អាក្រក់។ ជាឧទាហរណ៍ បុគ្គលម្នាក់ដែលរៀនគម្ពីរជាមួយយើងអស់មួយរយៈពេល ប្រហែលជានៅតែចូលចិត្តពិធីបុណ្យដែលគ្រិស្តសាសនិកមិនគួររួមចំណែក។ គាត់ដឹងថានោះគឺខុស តែគាត់នៅតែចូលចិត្តផ្នែកខ្លះនៃពិធីបុណ្យនោះ។ សូមលើកទឹកចិត្តគាត់ឲ្យប្រាប់ព្រះយេហូវ៉ាចំៗអំពីអារម្មណ៍របស់គាត់ និងអង្វរសុំលោកឲ្យជួយគាត់ស្រឡាញ់តែអ្វីដែលព្រះស្រឡាញ់ប៉ុណ្ណោះ។—ទំនុក. ៩៧:១០
ចូរអញ្ជើញសិស្សគម្ពីររបស់អ្នកឲ្យចូលរួមកិច្ចប្រជុំ (សូមមើលវគ្គ១៣)
១៣. (ក) ហេតុអ្វីយើងគួរអញ្ជើញសិស្សគម្ពីរឲ្យចូលរួមកិច្ចប្រជុំឲ្យបានឆាប់បំផុត? (ខ) តើតាមរបៀបណាយើងអាចជួយសិស្សគម្ពីរឲ្យមានអារម្មណ៍ស្រួលជាងពេលនៅសាលប្រជុំ?
១៣ ចូរអញ្ជើញសិស្សគម្ពីររបស់អ្នកឲ្យចូលរួមកិច្ចប្រជុំឲ្យបានឆាប់បំផុត។ អ្វីដែលសិស្សរបស់អ្នកឮនិងឃើញនៅកិច្ចប្រជុំគ្រិស្តសាសនិកពិត អាចមានឥទ្ធិពលលើចិត្តរបស់គាត់ ហើយអាចជួយគាត់ឲ្យរីកចម្រើន។ សូមបង្ហាញវីដេអូតើមានកម្មវិធីអ្វីខ្លះនៅសាលប្រជុំរបស់យើង? ហើយអញ្ជើញគាត់យ៉ាងកក់ក្ដៅឲ្យទៅជាមួយនឹងអ្នក។ បើអាចធ្វើបាន សូមស្នើសុំជួយយកគាត់ទៅកិច្ចប្រជុំ។ គឺជាការល្អដែលអ្នកអញ្ជើញអ្នកផ្សាយផ្សេងៗឲ្យទៅបង្រៀនគម្ពីរជាមួយអ្នក។ តាមរបៀបនេះ សិស្សគម្ពីររបស់អ្នកនឹងស្គាល់បងប្អូនផ្សេងៗក្នុងក្រុមជំនុំ ហើយគាត់ទំនងជានឹងមានអារម្មណ៍ស្រួលជាងពេលគាត់ចូលរួមកិច្ចប្រជុំរបស់យើង។
ចូរជួយសិស្សគម្ពីរឲ្យរីកចម្រើន
១៤. តើអ្វីអាចធ្វើឲ្យសិស្សគម្ពីរចង់រីកចម្រើនក្នុងការគោរពប្រណិប័តន៍ពិត?
១៤ គោលដៅរបស់យើងគឺជួយសិស្សគម្ពីររបស់យើងឲ្យរីកចម្រើនក្នុងការគោរពប្រណិប័តន៍ព្រះ។ (អេភ. ៤:១៣) ពេលបុគ្គលម្នាក់យល់ព្រមសិក្សាគម្ពីរ គាត់ប្រហែលជាចាប់អារម្មណ៍ខ្លាំងជាងគេអំពីរបៀបដែលគាត់ផ្ទាល់អាចទទួលប្រយោជន៍ពីការរៀនគម្ពីរ។ ប៉ុន្តែ កាលដែលគាត់ស្រឡាញ់ព្រះយេហូវ៉ាកាន់តែខ្លាំង នោះគាត់នឹងទំនងជាចាប់ផ្ដើមគិតអំពីរបៀបដែលគាត់អាចជួយអ្នកឯទៀត រួមទាំងបងប្អូនក្នុងក្រុមជំនុំ។ (ម៉ាថ. ២២:៣៧-៣៩) នៅពេលសមត្រឹមត្រូវ សូមកុំស្ទាក់ស្ទើរប្រាប់សិស្សរបស់អ្នកអំពីការមានឯកសិទ្ធិគាំទ្រសកម្មភាពរាជាណាចក្រព្រះ ដោយធ្វើវិភាគទាន។
ចូរបង្រៀនសិស្សគម្ពីររបស់អ្នកអំពីអ្វីដែលគួរធ្វើពេលមានបញ្ហាកើតឡើង (សូមមើលវគ្គ១៥)
១៥. តើយើងអាចជួយសិស្សគម្ពីរយ៉ាងដូចម្ដេចឲ្យធ្វើអ្វីដែលត្រឹមត្រូវពេលគាត់មានបញ្ហា?
១៥ ចូរបង្រៀនសិស្សគម្ពីររបស់អ្នកអំពីអ្វីដែលគួរធ្វើពេលបញ្ហាកើតឡើង។ ឧបមាថា សិស្សគម្ពីររបស់អ្នកដែលជាអ្នកផ្សាយដែលមិនទាន់ទទួលការជ្រមុជទឹក បានប្រាប់អ្នកថាគាត់ទើសចិត្តនឹងបុគ្គលម្នាក់ក្នុងក្រុមជំនុំ។ ជាជាងកាន់ជើងខាងណាមួយ សូមពន្យល់គាត់នូវអ្វីដែលគម្ពីរចែងអំពីរឿងនោះ។ គាត់អាចអភ័យទោសឲ្យបងប្អូននោះ ហើយបំភ្លេចចោលរឿងរ៉ាវដែលបានកើតឡើង។ ឬក៏បើគាត់មិនអាចបំភ្លេចរឿងនោះបានទេ គាត់គួរទៅនិយាយជាមួយនឹងបងប្អូននោះដោយចិត្តស្លូតបូតនិងសេចក្ដីស្រឡាញ់ ក្នុងគោលបំណង«បានបងប្អូននោះមកវិញ»។ (សូមពិនិត្យបន្ថែម ម៉ាថាយ ១៨:១៥) សូមជួយសិស្សរបស់អ្នកឲ្យរៀបពាក្យដែលគាត់នឹងនិយាយ។ សូមបង្ហាញគាត់អំពីរបៀបប្រើកម្មវិធីJWបណ្ណាល័យ ជំនួយស្រាវជ្រាវសម្រាប់សាក្សី ព្រះយេហូវ៉ា និងគេហទំព័រjw.org®ដើម្បីរៀនអំពីរបៀបដោះស្រាយបញ្ហានោះ។ ប្រសិនបើគាត់រៀនអំពីរបៀបដោះស្រាយបញ្ហាជាមួយនឹងអ្នកឯទៀតមុនគាត់ទទួលការជ្រមុជទឹក នោះគាត់នឹងទំនងជាកាន់តែចេះមានទំនាក់ទំនងល្អជាមួយនឹងអ្នកឯទៀតក្នុងក្រុមជំនុំ ក្រោយពីគាត់ទទួលការជ្រមុជទឹករួចហើយ។
១៦. តើការអញ្ជើញអ្នកផ្សាយឯទៀតឲ្យទៅបង្រៀនគម្ពីរជាមួយអ្នកផ្ដល់ប្រយោជន៍អ្វីខ្លះ?
១៦ ចូរអញ្ជើញអ្នកឯទៀតក្នុងក្រុមជំនុំឲ្យទៅបង្រៀនគម្ពីរជាមួយអ្នក ហើយពេលដែលអ្នកត្រួតពិនិត្យប្រចាំមណ្ឌលមកទស្សនកិច្ចក្រុមជំនុំ ចូរអញ្ជើញគាត់ឲ្យចូលរួមដែរ។ ហេតុអ្វី? ក្រៅពីមូលហេតុដែលបានត្រូវរៀបរាប់នៅខាងលើ អ្នកផ្សាយឯទៀតប្រហែលជាអាចជួយសិស្សគម្ពីររបស់អ្នកតាមរបៀបមួយដែលអ្នកមិនអាចជួយគាត់បាន។ ឧបមាថា សិស្សរបស់អ្នកព្យាយាមផ្ដាច់បារី តែគាត់បានបរាជ័យអស់ជាច្រើនដង។ សូមអញ្ជើញសាក្សីដែលបានយកឈ្នះទម្លាប់បែបនោះក្រោយពីបានបរាជ័យអស់ជាច្រើនលើកច្រើនសារ ឲ្យចូលរួមជាមួយអ្នកក្នុងការបង្រៀនគម្ពីរនោះ។ សាក្សីនោះប្រហែលជាអាចផ្ដល់យោបល់ដ៏មានប្រយោជន៍ដែលសិស្សគម្ពីររបស់អ្នកត្រូវការ។ បើអ្នកមានអារម្មណ៍មិនស្រួលដឹកនាំការបង្រៀនគម្ពីរពេលមានបងប្អូនដែលមានបទពិសោធន៍ច្រើននៅជាមួយ សូមសុំគាត់ឲ្យដឹកនាំការបង្រៀនគម្ពីរនៅលើកនោះវិញ។ ពេលអ្នកធ្វើដូច្នេះ សិស្សគម្ពីររបស់អ្នកអាចទទួលប្រយោជន៍ពីបទពិសោធន៍របស់បងប្អូនផ្សេងៗ។ សូមចាំថា គោលដៅរបស់យើងគឺជួយសិស្សគម្ពីរឲ្យរីកចម្រើនក្នុងការគោរពប្រណិប័តន៍ព្រះ។
តើខ្ញុំគួរឈប់បង្រៀនសិស្សគម្ពីរណាម្នាក់ឬទេ?
១៧-១៨. តើអ្នកគួរពិចារណាអំពីអ្វីពេលត្រូវសម្រេចចិត្តថាគួរឬមិនគួរឈប់បង្រៀនគម្ពីរដល់អ្នកណាម្នាក់?
១៧ បើសិស្សគម្ពីររបស់អ្នកមិនរីកចម្រើន អ្នកនឹងត្រូវសួរខ្លួនអ្នកថា ‹តើខ្ញុំគួរឈប់បង្រៀនគម្ពីរដល់គាត់ឬទេ?› មុនអ្នកធ្វើការសម្រេចចិត្តនេះ អ្នកគួរគិតអំពីសមត្ថភាពរបស់សិស្សគម្ពីរនោះ។ សិស្សគម្ពីរខ្លះរីកចម្រើនយឺតជាងសិស្សគម្ពីរឯទៀត។ សូមសួរខ្លួនអ្នកថា ‹តើសិស្សគម្ពីររបស់ខ្ញុំរីកចម្រើនសមស្របតាមស្ថានភាពរបស់គាត់ឬទេ?› ‹តើគាត់ចាប់ផ្ដើម«កាន់តាម» ឬអនុវត្តអ្វីដែលគាត់កំពុងរៀនឬទេ?›។ (ម៉ាថ. ២៨:២០) សិស្សគម្ពីរណាម្នាក់ប្រហែលជារីកចម្រើនយឺត ប៉ុន្តែគាត់គួររីកចម្រើនបន្ដិចម្ដងៗ។
១៨ ចុះយ៉ាងណាបើបុគ្គលម្នាក់ដែលសិក្សាគម្ពីរអស់មួយរយៈពេល មើលទៅមិនសូវឲ្យតម្លៃចំពោះការសិក្សា? សូមស្រមៃគិតអំពីរឿងដូចតទៅនេះ៖ សិស្សគម្ពីររបស់អ្នកបានសិក្សាចប់សៀវភៅបង្រៀនយើង ហើយប្រហែលជាថែមទាំងចាប់ផ្ដើមរៀនសៀវភៅ«ព្រះស្រឡាញ់» ប៉ុន្តែគាត់មិនទាន់បានចូលរួមកិច្ចប្រជុំម្ដងសោះ សូម្បីតែពិធីរំលឹកក៏មិនបានចូលរួមដែរ! ម្យ៉ាងទៀត គាត់ច្រើនតែខកខានរៀនគម្ពីរដោយព្រោះមូលហេតុដែលមិនសំខាន់។ ក្នុងករណីនេះ អ្នកគួរនិយាយត្រង់ៗជាមួយគាត់។១៩. តើអ្នកអាចនិយាយអ្វីទៅបុគ្គលដែលមើលទៅមិនឲ្យតម្លៃចំពោះការសិក្សាគម្ពីរ ហើយតើអ្នកត្រូវគិតពិចារណាអំពីអ្វី?
១៩ អ្នកអាចចាប់ផ្ដើមដោយសួរគាត់ថា ‹តើបងគិតថាអ្វីជាការពិបាកបំផុតឲ្យបងទៅជាសាក្សី ព្រះយេហូវ៉ា?›។ សិស្សគម្ពីរនោះប្រហែលជាឆ្លើយថា ‹ខ្ញុំចូលចិត្តរៀនគម្ពីរ តែខ្ញុំនឹងមិនទៅជាសាក្សី ព្រះយេហូវ៉ាទេ!›។ បើគាត់មានទស្សនៈបែបនេះក្រោយពីគាត់បានសិក្សាអស់មួយរយៈពេលហើយ តើចាំបាច់ឲ្យយើងបន្តបង្រៀនគាត់ទៀតឬទេ? ឬក៏មួយទៀត ក្រោយសួរសំណួរនោះ សិស្សគម្ពីររបស់អ្នកប្រហែលជាប្រាប់អ្នកជាលើកដំបូងអំពីមូលហេតុដែលគាត់មិនបានរីកចម្រើន។ ជាឧទាហរណ៍ គាត់ប្រហែលជាមានអារម្មណ៍ថាគាត់នឹងមិនអាចផ្សព្វផ្សាយពីផ្ទះមួយទៅផ្ទះមួយបានទេ។ ពេលអ្នកដឹងអំពីអារម្មណ៍របស់គាត់ នោះអ្នកអាចយល់ច្បាស់ជាងអំពីរបៀបជួយគាត់។
ចូរកុំចំណាយពេលបង្រៀនគម្ពីរដល់បុគ្គលណាដែលមិនរីកចម្រើន (សូមមើលវគ្គ២០)
២០. តើសកម្មភាព ១៣:៤៨អាចជួយយើងយ៉ាងណាឲ្យសម្រេចចិត្តថាយើងគួរឬមិនគួរបន្តបង្រៀនគម្ពីរដល់អ្នកណាម្នាក់?
២០ គួរឲ្យស្ដាយ សិស្សគម្ពីរខ្លះគឺប្រៀបដូចជាជនជាតិអ៊ីស្រាអែលនៅសម័យរបស់អេសេគាល។ ព្រះយេហូវ៉ាបានប្រាប់អេសេគាលអំពីពួកគេថា៖ «មើល! គេរាប់ឯងទុកដូចជាបទចំរៀងដ៏ពីរោះនៃមនុស្សមានសំឡេងល្អ ហើយចេះលេងភ្លេងយ៉ាងប្រសប់ប៉ុណ្ណោះ។ ដ្បិតគេស្ដាប់អស់ទាំងពាក្យរបស់ឯង ប៉ុន្តែមិនប្រព្រឹត្តតាមទេ»។ (អេស. ៣៣:៣២) យើងប្រហែលជាពិបាកប្រាប់បុគ្គលណាម្នាក់ថាយើងនឹងឈប់បង្រៀនគម្ពីរដល់គាត់។ ប៉ុន្តែ «នៅសល់ពេលវេលាតែបន្ដិចទេ»។ (១កូ. ៧:២៩) ជាជាងចំណាយពេលថែមទៀតទៅលើសិស្សគម្ពីរដែលមិនរីកចម្រើន យើងគួរព្យាយាមស្វែងរកបុគ្គលដែលបង្ហាញថាគាត់«មានចិត្តគំនិតត្រឹមត្រូវឲ្យបានជីវិតដែលគ្មានទីបញ្ចប់»។—សូមអាន សកម្មភាព ១៣:៤៨
ប្រហែលជាមានអ្នកឯទៀតក្នុងតំបន់ផ្សាយរបស់អ្នកដែលកំពុងអធិដ្ឋានសុំជំនួយ (សូមមើលវគ្គ២០)
២១. តើបទគម្ពីរប្រចាំឆ្នាំសម្រាប់ឆ្នាំ ២០២០គឺជាអ្វី ហើយហេតុអ្វីនេះគឺសមត្រឹមត្រូវ?
២១ ក្នុងអំឡុងឆ្នាំ ២០២០ បទគម្ពីរប្រចាំឆ្នាំរបស់យើងនឹងជួយយើងឲ្យគិតអំពីរបៀបដែលយើងអាចកាន់តែមានភាពប៉ិនប្រសប់ក្នុងកិច្ចការបង្រៀនអ្នកឯទៀតឲ្យទៅជាអ្នកកាន់តាមលោកយេស៊ូ។ បទគម្ពីរប្រចាំឆ្នាំរបស់យើងបានត្រូវដកស្រង់ពីពាក្យខ្លះដែលលោកយេស៊ូបានមានប្រសាសន៍ក្នុងអំឡុងការជួបជុំដ៏សំខាន់លើភ្នំមួយនៅស្រុកកាលីឡេ ដែលថា៖ «ចូរទៅបង្រៀនមនុស្ស . . . ឲ្យក្លាយទៅជាអ្នកកាន់តាមខ្ញុំ ហើយជ្រមុជទឹកឲ្យពួកគេ»។—ម៉ាថ. ២៨:១៩
សូមឲ្យយើងតាំងចិត្តបង្កើនភាពប៉ិនប្រសប់ក្នុងកិច្ចការបង្រៀនអ្នកឯទៀតឲ្យទៅជាអ្នកកាន់តាមលោកយេស៊ូ និងការជួយសិស្សគម្ពីររបស់យើងឲ្យទទួលការជ្រមុជទឹក (សូមមើលវគ្គ២១)
ចម្រៀងលេខ៧០ ចូរស្វែងរកអ្នកណាដែលទទួលអ្នកជាភ្ញៀវ
^ វគ្គ 5 បទគម្ពីរប្រចាំឆ្នាំរបស់យើងសម្រាប់ឆ្នាំ ២០២០ លើកទឹកចិត្តយើងឲ្យ‹បង្រៀនមនុស្សឲ្យក្លាយទៅជាអ្នកកាន់តាមលោកយេស៊ូ›។ អ្នកបម្រើទាំងអស់របស់ព្រះយេហូវ៉ាត្រូវធ្វើតាមបង្គាប់នេះ។ តើតាមរបៀបណាយើងអាចជំរុញចិត្តសិស្សគម្ពីររបស់យើងឲ្យក្លាយទៅជាអ្នកកាន់តាមគ្រិស្ត? ក្នុងអត្ថបទនេះ យើងនឹងឃើញអំពីរបៀបដែលយើងអាចជួយសិស្សគម្ពីររបស់យើងឲ្យចូលកាន់តែជិតព្រះយេហូវ៉ា។ យើងក៏នឹងពិចារណាអំពីរបៀបសម្រេចចិត្តថាតើយើងគួរឬមិនគួរឈប់បង្រៀនគម្ពីរដល់អ្នកណាម្នាក់។
^ វគ្គ 18 សូមមើលវីដេអូរបៀបឈប់បង្រៀនសិស្សគម្ពីរដែលមិនរីកចម្រើននៅJWទូរទស្សន៍។