«ចូរឲ្យមនុស្សទាំងអស់ឃើញពន្លឺរបស់អ្នក»ដើម្បីឲ្យព្រះយេហូវ៉ាទទួលការសរសើរ
«ចូរឲ្យមនុស្សទាំងអស់ឃើញពន្លឺរបស់អ្នក។ យ៉ាងនោះ ពួកគេនឹងសរសើរបិតារបស់អ្នកដែលនៅស្ថានសួគ៌»។—ម៉ាថាយ ៥:១៦
១. តើយើងមានមូលហេតុពិសេសអ្វីឲ្យសប្បាយរីករាយ?
យើងរំភើបចិត្ដណាស់ពេលដែលដឹងថាអ្នកបម្រើរបស់ព្រះកំពុងឲ្យមនុស្សឃើញពន្លឺរបស់ពួកគេ! កាលពីឆ្នាំមុន រាស្ដ្ររបស់ព្រះយេហូវ៉ាបានបង្រៀនគម្ពីរដល់មនុស្សជាង១០លាននាក់។ ម្យ៉ាងទៀត អ្នកចាប់អារម្មណ៍រាប់លាននាក់បានមកពិធីរំលឹក ហើយរៀនអំពីថ្លៃលោះដែលជាអំណោយមួយដែលបង្ហាញអំពីសេចក្ដីស្រឡាញ់របស់ព្រះយេហូវ៉ា។—យ៉ូហានទី១ ៤:៩
២, ៣. (ក) តើអ្វីមិនអាចបញ្ឈប់យើងពីការធ្វើជា«ពន្លឺដែលកំពុងភ្លឺ»ក្នុងពិភពលោកនេះ? (ខ) តើយើងនឹងពិចារណាអ្វីក្នុងអត្ថបទនេះ?
២ នៅទូទាំងពិភពលោក សាក្សីព្រះយេហូវ៉ានិយាយភាសាផ្សេងៗពីគ្នា។ ប៉ុន្ដែ នេះមិនបញ្ឈប់យើងពីការសរសើរព្រះយេហូវ៉ាដោយសាមគ្គីភាពទេ។ (ការបើកបង្ហាញ ៧:៩) មិនថាយើងនិយាយភាសាណាឬរស់នៅកន្លែងណាក៏ដោយ យើងអាចធ្វើ«ជាពន្លឺដែលកំពុងភ្លឺ»ក្នុងពិភពលោកនេះ។—ភីលីព ២:១៥
៣ កិច្ចបម្រើផ្សាយរបស់យើង សាមគ្គីភាពរបស់យើងជាគ្រិស្ដសាសនិកពិត និងការចាត់ទុកគ្រានេះថាជាគ្រាបន្ទាន់ ជាអ្វីដែលនាំឲ្យព្រះយេហូវ៉ាទទួលការសរសើរតម្កើង។ តាមរយៈអ្វីបីយ៉ាងនេះ តើយើងអាចឲ្យមនុស្សទាំងអស់ឃើញពន្លឺរបស់យើងយ៉ាងដូចម្ដេច?—សូមអាន ម៉ាថាយ ៥:១៤-១៦
ចូរជួយអ្នកឯទៀតឲ្យគោរពប្រណិប័តន៍ព្រះយេហូវ៉ា
៤, ៥. (ក) ក្រៅពីការផ្សព្វផ្សាយ តើយើងអាចឲ្យមនុស្សទាំងអស់ឃើញពន្លឺរបស់យើងយ៉ាងដូចម្ដេច? (ខ) តើមានលទ្ធផលល្អអ្វីដែលមកពីការបង្ហាញសេចក្ដីសប្បុរស? (សូមមើលរូបភាពនៅដើមអត្ថបទ)
៤ កិច្ចការផ្សព្វផ្សាយនិងការជួយមនុស្សឲ្យក្លាយទៅជាអ្នកកាន់តាមលោកយេស៊ូគឺជារបៀបដ៏សំខាន់ដែលយើងអាចឲ្យមនុស្សទាំងអស់ឃើញពន្លឺរបស់យើង។ (ម៉ាថាយ ២៨:១៩, ២០) អត្ថបទមួយក្នុងទស្សនាវដ្ដីប៉មយាម ថ្ងៃទី១ ខែមិថុនា ឆ្នាំ១៩២៥ដែលមានចំណងជើងថា «ពន្លឺក្នុងភាពងងឹត»បានរៀបរាប់ថា ក្នុងអំឡុងគ្រាចុងក្រោយបង្អស់ អ្នកណាដែលមិនទុក«ឱកាសឲ្យមនុស្សឃើញពន្លឺរបស់គាត់» អ្នកនោះមិនមែនជាមនុស្សស្មោះត្រង់នឹងលោកម្ចាស់ទេ។ បន្ទាប់មក អត្ថបទនោះក៏រៀបរាប់ដែរថា៖ «គាត់ត្រូវធ្វើដូច្នេះដោយផ្សាយដំណឹងល្អដល់មនុស្សនៅផែនដី ហើយមានរបៀបរស់នៅដែលសមស្របតាមខ្នាតតម្រាដ៏សុចរិតនៃព្រះយេហូវ៉ា»។ ក្រៅពីកិច្ចការផ្សព្វផ្សាយ ការប្រព្រឹត្ដរបស់យើងក៏នាំឲ្យព្រះយេហូវ៉ាទទួលការសរសើរតម្កើងដែរ។ មនុស្សជាច្រើនកត់សម្គាល់ពេលយើងផ្សព្វផ្សាយ។ ពេលយើងញញឹមដាក់ពួកគេ ហើយសួរសុខទុក្ខពួកគេយ៉ាងកក់ក្ដៅ នេះជួយពួកគេឲ្យមានទស្សនៈល្អចំពោះយើងនិងព្រះដែលយើងគោរពប្រណិប័តន៍។
ការផ្សព្វផ្សាយនិងការប្រព្រឹត្ដរបស់យើងនាំឲ្យព្រះយេហូវ៉ាទទួលការសរសើរតម្កើង
៥ លោកយេស៊ូបានប្រាប់អ្នកកាន់តាមលោកថា៖ «ពេលដែលអ្នកចូលទៅក្នុងផ្ទះណាមួយ ចូរជម្រាបសួរអ្នកផ្ទះនោះ ហើយជូនពរឲ្យពួកគេបានប្រកបដោយសេចក្ដីសុខ»។ (ម៉ាថាយ ១០:១២) នៅតំបន់ដែលលោកយេស៊ូបានផ្សព្វផ្សាយ មនុស្សមានទម្លាប់អញ្ជើញគេឲ្យចូលផ្ទះរបស់ខ្លួន ទោះជាពួកគេមិនធ្លាប់ស្គាល់អ្នកនោះក៏ដោយ។ សព្វថ្ងៃនេះនៅកន្លែងជាច្រើន មនុស្សមិនមានទម្លាប់នេះទៀតទេ។ មនុស្សច្រើនតែភ័យខ្លាចឬខឹងពេលពួកគេឃើញអ្នកដែលពួកគេមិនស្គាល់នៅមាត់ទ្វារផ្ទះ។ ប៉ុន្ដែបើយើងបង្ហាញភាពរួសរាយរាក់ទាក់និងសេចក្ដីសប្បុរស ពួកគេប្រហែលជាមានអារម្មណ៍ស្រួលជាង។ ពេលអ្នកចូលរួមក្នុងកិច្ចផ្សព្វផ្សាយសាធារណៈដោយប្រើរទេះដាក់តាំងសៀវភៅ តើអ្នកធ្លាប់កត់សម្គាល់ថាបើអ្នកញញឹមឬសួរសុខទុក្ខមនុស្សដោយរួសរាយរាក់ទាក់ ពួកគេមានអារម្មណ៍ស្រួលជាងក្នុងការមកយកសៀវភៅរបស់យើងឬទេ? ពួកគេប្រហែលជាថែមទាំងចង់ចាប់ផ្ដើមនិយាយជាមួយនឹងយើងទៀតផង!
៦. តើអ្វីជួយប្ដីប្រពន្ធវ័យចាស់មួយគូឲ្យនៅតែជាប់រវល់ក្នុងកិច្ចបម្រើផ្សាយ?
៦ ប្ដីប្រពន្ធវ័យចាស់មួយគូនៅប្រទេសអង់គ្លេសមិនអាចផ្សព្វផ្សាយពីផ្ទះមួយទៅផ្ទះមួយដូចដែលពួកគាត់ធ្លាប់ធ្វើពីមុនទេ ដោយសារសុខភាពរបស់ពួកគាត់មិនសូវល្អ។ ដូច្នេះ ពួកគាត់រៀបចំតុមួយដើម្បីដាក់តាំងសៀវភៅរបស់យើងនៅខាងក្រៅផ្ទះរបស់ពួកគាត់។ ពួកគាត់រស់នៅជិតសាលារៀនមួយ ដូច្នេះពួកគាត់ដាក់តាំងសៀវភៅដែលអាចទាក់ទាញចិត្ដឪពុកម្ដាយរបស់សិស្សដែលបានមកយកកូនចេញពីសាលា។ ឪពុកម្ដាយខ្លះបានយកសៀវភៅទាំងនោះ ដែលរួមបញ្ចូលសៀវភៅដែលមានចំណងជើងថា សំណួរទាំងឡាយដែលយុវជនសួរ និងចម្លើយដែលមានប្រសិទ្ធភាព ក្បាលទី១និងទី២ (Questions Young People Ask—Answers That Work)។ បងស្រីដែលជាអ្នកត្រួសត្រាយម្នាក់ច្រើនតែចូលរួមក្នុងកិច្ចផ្សព្វផ្សាយនេះជាមួយនឹងប្ដីប្រពន្ធមួយគូនោះ។ ឪពុកម្ដាយរបស់សិស្សបានកត់សម្គាល់ថាបងស្រីនោះជាមនុស្សរួសរាយរាក់ទាក់ ហើយថាប្ដីប្រពន្ធមួយគូនោះពិតជាចង់ជួយអ្នកឯទៀត។ ឪពុករបស់សិស្សម្នាក់ថែមទាំងចាប់ផ្ដើមសិក្សាគម្ពីរទៀតផង។
៧. តើអ្នកអាចជួយជនភៀសខ្លួនដែលរស់នៅក្នុងតំបន់របស់អ្នកតាមរបៀបណា?
៧ ថ្មីៗនេះ មនុស្សជាច្រើនត្រូវភៀសខ្លួនចេញពីស្រុកកំណើត ហើយឥឡូវពួកគេរស់នៅជាជនភៀសខ្លួនក្នុងប្រទេសដទៃ។ តើអ្នកអាចធ្វើអ្វីដើម្បីជួយជនភៀសខ្លួននៅក្នុងតំបន់របស់អ្នកឲ្យរៀនអំពីព្រះយេហូវ៉ា? ដំបូង អ្នកអាចរៀនអំពីរបៀបសួរសុខទុក្ខពួកគេជាភាសារបស់ពួកគេ។ បន្ថែមទៅទៀត ដោយប្រើកម្មវិធីJWភាសា (JW Language) អ្នកអាចរៀនឃ្លាខ្លះៗដែលអាចធ្វើឲ្យពួកគេចង់និយាយជាមួយនឹងអ្នក។ ក្រោយមក អ្នកអាចបង្ហាញពួកគេនូវវីដេអូនិងសៀវភៅផ្សេងៗរបស់យើងជាភាសារបស់ពួកគេនៅក្នុងគេហទំព័រjw.org។—ចោទិយកថា ១០:១៩
៨, ៩. (ក) តើកិច្ចប្រជុំកិច្ចបម្រើនិងជីវិតជួយយើងយ៉ាងដូចម្ដេច? (ខ) តើឪពុកម្ដាយអាចជួយកូនៗឆ្លើយនៅកិច្ចប្រជុំឲ្យបានល្អប្រសើរជាងតាមរបៀបណា?
៨ ព្រះយេហូវ៉ាផ្ដល់ឲ្យយើងនូវអ្វីៗដែលយើងត្រូវការដើម្បីផ្សព្វផ្សាយដោយមានប្រសិទ្ធភាព។ ជាឧទាហរណ៍ អ្វីដែលយើងរៀននៅកិច្ចប្រជុំកិច្ចបម្រើនិងជីវិត ជួយយើងឲ្យកាន់តែមានទំនុកចិត្ដពេលធ្វើការត្រឡប់ទៅជួបនិងពេលចាប់ផ្ដើមបង្រៀនគម្ពីរ។
៩ ពេលអ្នកថ្មីមកកិច្ចប្រជុំរបស់យើង ពួកគេច្រើនតែភ្ញាក់ផ្អើលចំពោះចម្លើយរបស់កូនក្មេង។ អ្នកអាចបង្រៀនកូនរបស់អ្នកឲ្យចេះឆ្លើយអស់ពីចិត្ដ។ មនុស្សខ្លះបានត្រូវទាញនាំឲ្យចូលក្នុងសេចក្ដីពិតពេលដែលពួកគេឮចម្លើយដ៏ស្រួលយល់និងដែលបង្ហាញជំនឿដ៏ស្មោះអស់ពីចិត្ដរបស់កូនក្មេង។—កូរិនថូសទី១ ១៤:២៥
ចូរពង្រឹងសាមគ្គីភាព
១០. តើការគោរពប្រណិប័តន៍ជាក្រុមគ្រួសារអាចជួយក្រុមគ្រួសារឲ្យកាន់តែមានសាមគ្គីភាពយ៉ាងដូចម្ដេច?
១០ ព្រះយេហូវ៉ាទទួលការសរសើរតម្កើង ពេលយើងខំប្រឹងធ្វើឲ្យមានសាមគ្គីភាពនិងសន្ដិភាពក្នុងក្រុមគ្រួសាររបស់យើង។ ជាឧទាហរណ៍ បើអ្នកជាឪពុកម្ដាយ សូមរៀបចំឲ្យមានការគោរពប្រណិប័តន៍ជាក្រុមគ្រួសារជាទៀងទាត់។ ក្រុមគ្រួសារជាច្រើនមើលកម្មវិធីJWទូរទស្សន៍ជាមួយគ្នា ហើយក្រោយមកពួកគេពិគ្រោះគ្នាអំពីរបៀបដែលពួកគេអាចអនុវត្ដអ្វីដែលពួកគេបានរៀន។ សូមចាំថាការណែនាំដែលកូនក្មេងត្រូវការគឺខុសគ្នាពីការណែនាំដែលមនុស្សវ័យជំទង់ត្រូវការ។ ចូរខំអស់ពីសមត្ថភាពដើម្បីជួយសមាជិកម្នាក់ៗក្នុងក្រុមគ្រួសារឲ្យទទួលប្រយោជន៍ពីការគោរពប្រណិប័តន៍ជាក្រុមគ្រួសារ។—ទំនុកតម្កើង ១៤៨:១២, ១៣
គឺជាការល្អដែលយើងចំណាយពេលជាមួយនឹងបងប្អូនវ័យចាស់ (សូមមើលវគ្គ១១)
១១-១៣. តើយើងអាចជួយក្រុមជំនុំរបស់យើងឲ្យកាន់តែមានសាមគ្គីភាពតាមរបៀបណា?
១១ សូម្បីតែអ្នកនៅក្មេង អ្នកក៏អាចជួយអស់អ្នកនៅក្នុងក្រុមជំនុំឲ្យមានអារម្មណ៍ថាពួកគេមានតម្លៃ។ របៀបមួយគឺដោយធ្វើជាមិត្ដភក្ដិជាមួយនឹងបងប្អូនវ័យចាស់។ សូមសួរពួកគាត់អំពីអ្វីដែលបានជួយពួកគាត់ឲ្យបន្ដបម្រើព្រះយេហូវ៉ាអស់ជាច្រើនឆ្នាំ។ អ្នកអាចរៀនមេរៀនដ៏មានតម្លៃពីពួកគាត់។ នេះនឹងលើកទឹកចិត្ដអ្នកនិងពួកគាត់ដែរ! ម្យ៉ាងទៀត មិនថាយើងជាមនុស្សវ័យក្មេងឬចាស់ក្ដី យើងអាចធ្វើឲ្យអ្នកដែលមកក្រុមជំនុំរបស់យើងមានអារម្មណ៍កក់ក្ដៅ។ យើងអាចសួរសុខទុក្ខពួកគេ ញញឹមដាក់ពួកគេ ជួយពួកគេឲ្យរកកន្លែងអង្គុយ និងណែនាំពួកគេឲ្យស្គាល់អ្នកឯទៀត។ សូមជួយពួកគេឲ្យមានអារម្មណ៍ស្រួល។
១២ បើអ្នកមានភារកិច្ចដឹកនាំកិច្ចប្រជុំសម្រាប់ផ្សព្វផ្សាយ អ្នកអាចជួយបងប្អូនវ័យចាស់ឲ្យបន្ដធ្វើឲ្យមនុស្សទាំងអស់ឃើញពន្លឺរបស់ពួកគាត់។ សូមធ្វើឲ្យប្រាកដថាពួកគាត់ទៅតំបន់ផ្សាយដែលសមរម្យសម្រាប់ពួកគាត់។ សូមរៀបចំឲ្យបងប្អូនដែលមានវ័យក្មេងជាងទៅផ្សព្វផ្សាយជាមួយនឹងពួកគាត់។ បងប្អូនវ័យចាស់និងបងប្អូនដែលមានបញ្ហាសុខភាពច្រើនតែធ្លាក់ទឹកចិត្ដដោយសារពួកគេមិនអាចផ្សព្វផ្សាយច្រើនដូចមុន។ ប៉ុន្ដែពួកគេមានអារម្មណ៍ធូរស្រាលជាងពេលពួកគេដឹងថាយើងយកចិត្ដទុកដាក់ចំពោះពួកគេ ហើយយល់អំពីស្ថានភាពរបស់ពួកគេ។ ទោះជាពួកគេមានវ័យចាស់ឬក្មេង ឬនៅក្នុងសេចក្ដីពិតយូរយ៉ាងណាក៏ដោយ សេចក្ដីសប្បុរសរបស់អ្នកអាចលើកទឹកចិត្ដពួកគេឲ្យបន្ដផ្សព្វផ្សាយយ៉ាងខ្នះខ្នែង។—លេវីវិន័យ ១៩:៣២
តើអ្នកអាចព្យាយាមស្គាល់បងប្អូនក្នុងក្រុមជំនុំរបស់អ្នកឲ្យបានច្បាស់ជាងឬទេ?
១៣ ជនជាតិអ៊ីស្រាអែលមានអំណរក្នុងការគោរពប្រណិប័តន៍ព្រះយេហូវ៉ាជាមួយគ្នា។ អ្នកតែងទំនុកតម្កើងបានសរសេរថា៖ «មើល ដែលបងប្អូននៅមូលជាមួយគ្នាដោយចិត្ដព្រមព្រៀង នោះជាការល្អ ហើយសមគួរយ៉ាងណាទៅ!»។ (សូមអាន ទំនុកតម្កើង ១៣៣:១, ២) គាត់បានប្រៀបប្រដូចការនៅមូលគ្នាឬការមានសាមគ្គីភាព ទៅនឹងប្រេងដែលបានត្រូវប្រើដើម្បីតែងតាំងអ្នកណាម្នាក់។ ប្រេងនោះធ្វើឲ្យស្បែកស្រស់ថ្លានិងមានក្លិនក្រអូប។ ជាលទ្ធផល អ្នកនោះមានអារម្មណ៍ស្រស់ស្រាយ។ ស្រដៀងគ្នាដែរ យើងអាចជួយបងប្អូនឲ្យមានអារម្មណ៍ស្រស់ស្រាយនិងមានកម្លាំងចិត្ដឡើងវិញ ដោយបង្ហាញចិត្ដសប្បុរសនិងភាពរួសរាយរាក់ទាក់ចំពោះពួកគេ។ នេះធ្វើឲ្យក្រុមជំនុំកាន់តែមានសាមគ្គីភាព។ តើអ្នកអាចព្យាយាមស្គាល់បងប្អូនក្នុងក្រុមជំនុំឲ្យបានច្បាស់ជាងឬទេ?—កូរិនថូសទី២ ៦:១១-១៣
១៤. តើអ្នកអាចឲ្យមនុស្សទាំងអស់ក្នុងតំបន់ដែលអ្នករស់នៅឃើញពន្លឺរបស់អ្នកយ៉ាងដូចម្ដេច?
១៤ អ្នកអាចឲ្យមនុស្សទាំងអស់ឃើញពន្លឺរបស់អ្នក ទោះជាអ្នកនៅទីណាក៏ដោយ។ ចិត្ដសប្បុរសរបស់អ្នកអាចធ្វើឲ្យអ្នកជិតខាងចង់រៀនថែមទៀតអំពីព្រះយេហូវ៉ា។ សូមសួរខ្លួនអ្នកថា ‹តើអ្នកជិតខាងរបស់ខ្ញុំគិតយ៉ាងណាអំពីខ្ញុំ? តើផ្ទះរបស់ខ្ញុំមានរបៀបរៀបរយនិងស្អាតបាតឬទេ? តើផ្ទះរបស់ខ្ញុំធ្វើឲ្យម្តុំដែលខ្ញុំរស់នៅមើលទៅស្អាតឬទេ? តើខ្ញុំជាមនុស្សដែលចេះជួយយកអាសាអ្នកជិតខាងឬទេ?›។ សូមសួរសាក្សីឯទៀតអំពីរបៀបដែលចិត្ដសប្បុរសនិងគំរូល្អរបស់ពួកគេមានឥទ្ធិពលទៅលើសាច់ញាតិ អ្នកជិតខាង អ្នករួមការងារ ឬសិស្សរួមថ្នាក់របស់ពួកគេ។—អេភេសូរ ៥:៩
ចូរចាំយាម
១៥. ហេតុអ្វីយើងត្រូវចាំយាម?
១៥ បើយើងចង់ឲ្យមនុស្សទាំងអស់បន្ដឃើញពន្លឺរបស់យើង យើងត្រូវដឹងអំពីគ្រាដែលយើងរស់នៅ។ លោកយេស៊ូបានប្រាប់អ្នកកាន់តាមលោកច្រើនដងថា៖ «ចូរចាំយាម»។ (ម៉ាថាយ ២៤:៤២; ២៥:១៣; ២៦:៤១) បើយើងគិតថាគ្រា«ទុក្ខវេទនាជាខ្លាំង»នៅយូរទៀត យើងនឹងមិនប្រើគ្រប់ឱកាសដើម្បីជួយអ្នកឯទៀតឲ្យរៀនអំពីព្រះយេហូវ៉ាទេ។ (ម៉ាថាយ ២៤:២១) យ៉ាងនេះ ពន្លឺរបស់យើងនឹងចុះខ្សោយទៅបន្ដិចម្ដងៗ ហើយប្រហែលជាថែមទាំងរលត់ទៀតផង។
១៦, ១៧. តើអ្នកអាចធ្វើអ្វីដើម្បីចាត់ទុកគ្រានេះថាជាគ្រាបន្ទាន់?
១៦ ឥឡូវនេះជាងពេលមុនទៅទៀត យើងត្រូវចាំយាម។ ស្ថានភាពពិភពលោកនេះកាន់តែអាក្រក់ទៅៗ។ ប៉ុន្ដែ យើងដឹងថាទីបញ្ចប់នឹងមកដល់នៅពេលកំណត់របស់ព្រះយេហូវ៉ា។ (ម៉ាថាយ ២៤:៤២-៤៤) ទម្រាំដល់ពេលនោះ យើងត្រូវមានចិត្ដអត់ធ្មត់ ហើយផ្ដោតអារម្មណ៍ទៅលើអនាគត។ ចូរអានគម្ពីរជារៀងរាល់ថ្ងៃ ហើយបន្ដអធិដ្ឋានទៅព្រះយេហូវ៉ា។ (ពេត្រុសទី១ ៤:៧) សូមរៀនពីបងប្អូនដែលបម្រើព្រះយេហូវ៉ាអស់ជាច្រើនឆ្នាំ។ ជាឧទាហរណ៍ អ្នកអាចអាននូវជីវប្រវត្ដិរបស់បងប្អូនយើង ដូចជាអត្ថបទដែលមានចំណងជើងថា «ចាប់តោងជាយអាវសាសន៍យូដាម្នាក់អស់៧០ឆ្នាំ» ក្នុងទស្សនាវដ្ដីប៉មយាម ថ្ងៃទី១៥ ខែមេសា ឆ្នាំ២០១២ ទំព័រ១៨-២១។
១៧ ចូរបន្ដជាប់រវល់ក្នុងកិច្ចបម្រើព្រះយេហូវ៉ា។ សូមធ្វើល្អដល់មនុស្សឯទៀត ហើយសេពគប់ជាមួយនឹងបងប្អូនរួមជំនឿ។ យ៉ាងនេះអ្នកនឹងសប្បាយរីករាយ ហើយពេលវេលានឹងមើលទៅដូចជាដើរលឿន។ (អេភេសូរ ៥:១៦) ក្នុងអំឡុង១០០ឆ្នាំដែលបានកន្លងទៅនេះ អ្នកបម្រើរបស់ព្រះយេហូវ៉ាបានសម្រេចកិច្ចការជាច្រើន។ នៅសព្វថ្ងៃនេះយើងរវល់ជាងពេលមុនទៅទៀត។ កិច្ចការរបស់ព្រះយេហូវ៉ាបានរីកចម្រើនច្រើនជាងយើងបាននឹកស្មាន។ យើងកំពុងឲ្យមនុស្សទាំងអស់ឃើញពន្លឺរបស់យើង!
យើងអាចទទួលប្រយោជន៍ពីប្រាជ្ញារបស់ព្រះ ក្នុងអំឡុងពេលដែលអ្នកចាស់ទុំមកសួរសុខទុក្ខយើងក្នុងនាមជាគង្វាល (សូមមើលវគ្គ១៨, ១៩)
១៨, ១៩. តើអ្នកចាស់ទុំអាចជួយយើងយ៉ាងណាឲ្យបម្រើព្រះយេហូវ៉ាដោយខ្នះខ្នែង? សូមឲ្យឧទាហរណ៍មួយ។
១៨ ទោះជាយើងធ្វើខុសជាច្រើនដងក្ដី ព្រះយេហូវ៉ាអនុញ្ញាតឲ្យយើងបម្រើលោក។ ដើម្បីជួយយើង លោកឲ្យយើងនូវ«អំណោយជាមនុស្ស» ពោលគឺពួកអ្នកចាស់ទុំក្នុងក្រុមជំនុំ។ (សូមអាន អេភេសូរ ៤:៨, ១១, ១២) ដូច្នេះ ពេលអ្នកចាស់ទុំមកសួរសុខទុក្ខអ្នក សូមស្តាប់ពួកគាត់ដើម្បីអ្នកអាចរៀនពីប្រាជ្ញានិងយោបល់របស់ពួកគាត់។
១៩ ជាឧទាហរណ៍ ប្ដីប្រពន្ធមួយគូដែលរស់នៅប្រទេសអង់គ្លេសមានការពិបាកខ្លះៗក្នុងចំណងអាពាហ៍ពិពាហ៍ ដូច្នេះពួកគេបានសុំជំនួយពីអ្នកចាស់ទុំពីរនាក់។ ប្រពន្ធនោះមានអារម្មណ៍ថាប្ដីរបស់នាងមិនបាននាំមុខក្នុងកិច្ចបម្រើព្រះយេហូវ៉ាទេ។ ប្ដីរបស់នាងមានអារម្មណ៍ថាគាត់មិនពូកែបង្រៀនទេ ហើយគាត់បានសារភាពថាគាត់មិនបានរៀបចំឲ្យមានការគោរពប្រណិប័តន៍ជាក្រុមគ្រួសារជាទៀងទាត់ឡើយ។ អ្នកចាស់ទុំបានជួយប្ដីប្រពន្ធមួយគូនោះឲ្យគិតអំពីគំរូរបស់លោកយេស៊ូ។ ពួកគាត់បានលើកទឹកចិត្ដប្ដីឲ្យធ្វើតាមគំរូរបស់លោកយេស៊ូក្នុងការយកចិត្ដទុកដាក់ចំពោះអ្នកកាន់តាមលោក។ ពួកគាត់បានលើកទឹកចិត្ដប្រពន្ធឲ្យមានចិត្ដអត់ធ្មត់នឹងប្ដីរបស់នាង។ ពួកគាត់ក៏បានផ្ដល់យោបល់ខ្លះៗអំពីរបៀបដែលប្ដីប្រពន្ធនោះអាចរៀបចំឲ្យមានការគោរពប្រណិប័តន៍ជាក្រុមគ្រួសារជាមួយនឹងកូនពីរនាក់របស់ពួកគេ។ (អេភេសូរ ៥:២១-២៩) ប្ដីនោះខំប្រឹងទៅជាប្រមុខក្រុមគ្រួសារដ៏ល្អជាង។ អ្នកចាស់ទុំបានលើកទឹកចិត្ដគាត់កុំឈប់ព្យាយាម ហើយបន្ដពឹងផ្អែកទៅលើសកម្មពលរបស់ព្រះយេហូវ៉ា។ សេចក្ដីស្រឡាញ់និងចិត្ដសប្បុរសដែលអ្នកចាស់ទុំបានបង្ហាញ ពិតជាបានជួយក្រុមគ្រួសារនោះមែន!
២០. ពេលអ្នកឲ្យមនុស្សទាំងអស់ឃើញពន្លឺរបស់អ្នក តើនេះនឹងនាំឲ្យមានលទ្ធផលអ្វី?
២០ «មានពរហើយអស់អ្នកដែលកោតខ្លាចដល់ព្រះយេហូវ៉ា ជាពួកអ្នកដែលដើរតាមផ្លូវរបស់ទ្រង់»។ (ទំនុកតម្កើង ១២៨:១) អ្នកនឹងសប្បាយរីករាយពេលអ្នកឲ្យមនុស្សទាំងអស់ឃើញពន្លឺរបស់អ្នក។ ដូច្នេះ ចូរបង្រៀនអ្នកឯទៀតអំពីព្រះ ខំអស់ពីសមត្ថភាពដើម្បីជួយក្រុមគ្រួសារនិងក្រុមជំនុំរបស់អ្នកឲ្យមានសាមគ្គីភាព ហើយចាំយាម។ អ្នកឯទៀតនឹងឃើញគំរូល្អរបស់អ្នក ហើយក៏នឹងចង់សរសើរព្រះយេហូវ៉ាដែលជាបិតារបស់យើង។—ម៉ាថាយ ៥:១៦
