តើតាមរបៀបណាអ្នកអាចជួយពង្រឹងសាមគ្គីភាពរបស់យើងជាគ្រិស្ដសាសនិក?
«ដោយសារលោក អវយវៈទាំងអស់នៃរូបកាយក៏លូតលាស់ឡើង ហើយដោយសារអវយវៈនីមួយៗជាប់គ្នាយ៉ាងល្អ និងសហការគ្នា»។—អេភេសូរ ៤:១៦
ចម្រៀងលេខ: ៥៣, ១៦
១. តាំងពីដើមដំបូង តើកិច្ចការរបស់ព្រះបានបញ្ជាក់អំពីអ្វី?
តាំងពីដើមដំបូងនៃការបង្កើត ព្រះយេហូវ៉ានិងលោកយេស៊ូមានសាមគ្គីភាព។ ព្រះយេហូវ៉ាបានបង្កើតលោកយេស៊ូមុនអ្វីៗផ្សេងទៀតទាំងអស់។ ក្រោយមក លោកយេស៊ូបានធ្វើការជាមួយនឹងព្រះ ហើយ«បាននៅជិតទ្រង់ដូចជាមេជាង»។ (សុភាសិត ៨:៣០) អ្នកបម្រើរបស់ព្រះយេហូវ៉ាក៏បានសហការគ្នាដែរដើម្បីសម្រេចកិច្ចការដែលពួកគេត្រូវធ្វើ។ ជាឧទាហរណ៍ ណូអេនិងក្រុមគ្រួសាររបស់គាត់បានសង់ទូកជាមួយគ្នា។ ក្រោយមក ជនជាតិអ៊ីស្រាអែលបានធ្វើការជាមួយគ្នាដោយដំឡើងត្រសាល និងរុះរើត្រសាលនោះពីកន្លែងមួយទៅកន្លែងមួយ។ នៅវិហារ ពួកគេបានលេងភ្លេងយ៉ាងពីរោះនិងច្រៀងជាមួយគ្នាដើម្បីសរសើរព្រះយេហូវ៉ា។ រាស្ដ្ររបស់ព្រះយេហូវ៉ាអាចធ្វើអ្វីៗទាំងអស់នេះបានដោយសារពួកគេបានសហការគ្នា។—លោកុប្បត្ដិ ៦:១៤-១៦, ២២; ជនគណនា ៤:៤-៣២; របាក្សត្រទី១ ២៥:១-៨
២. (ក) តើមានអ្វីដែលគួរឲ្យកត់សម្គាល់អំពីក្រុមជំនុំគ្រិស្ដសាសនិកនៅសតវត្សរ៍ទី១? (ខ) តើយើងនឹងពិចារណាសំណួរអ្វី?
២ គ្រិស្ដសាសនិកនៅសតវត្សរ៍ទី១ក៏បានសហការគ្នាដែរ។ សាវ័កប៉ូលបានពន្យល់ថា ទោះបីជាពួកគេមានសមត្ថភាពនិងភារកិច្ចខុសៗគ្នាក៏ដោយ ពួកគេមានសាមគ្គីភាព។ ពួកគេទាំងអស់គ្នាបានធ្វើតាមបង្គាប់របស់លោកយេស៊ូគ្រិស្ដដែលជាអ្នកដឹកនាំពួកគេ។ ប៉ូលបានប្រៀបប្រដូចពួកគេទៅនឹងរូបកាយមួយដែលមានអវយវៈផ្សេងៗដែលធ្វើការជាមួយគ្នា។ (សូមអាន កូរិនថូសទី១ ១២:៤-៦, ១២) ប៉ុន្ដែ ចុះយ៉ាងណាយើងសព្វថ្ងៃនេះ? តើតាមរបៀបណាយើងអាចសហការគ្នាក្នុងកិច្ចការផ្សព្វផ្សាយ ក្នុងក្រុមជំនុំ និងក្នុងក្រុមគ្រួសារ?
ចូរសហការគ្នាក្នុងកិច្ចការផ្សព្វផ្សាយ
៣. តើសាវ័កយ៉ូហានបានឃើញអ្វីក្នុងគំនិត?
៣ នៅសតវត្សរ៍ទី១ សាវ័កយ៉ូហានបានឃើញក្នុងគំនិតអំពីទេវតា៧រូបដែលកំពុងផ្លុំត្រែ។ ពេលទេវតាទី៥ផ្លុំត្រែ យ៉ូហានបានឃើញ«ផ្កាយមួយដែលបានធ្លាក់ដល់ផែនដី»។ ផ្កាយនោះបានប្រើកូនសោដើម្បីបើកទ្វារនៃទីជ្រៅបំផុត។ ដំបូង មានផ្សែងចេញមកពីទីជ្រៅបំផុតនោះ ហើយបន្ទាប់មកសត្វកណ្ដូបមួយហ្វូងធំបានហើរចេញពីផ្សែងនោះ។ ជាជាងបង្ខូចដើមឈើ ឬរុក្ខជាតិ សត្វកណ្ដូបទាំងនោះបានធ្វើទុក្ខដល់ពួកអ្នកដែល«មិនមានត្រារបស់ព្រះនៅថ្ងាសពួកគេ»។ (ការបើកបង្ហាញ ៩:១-៤) យ៉ូហានបានយល់ថាកណ្ដូបមួយហ្វូងធំនោះអាចបង្ខូចអ្វីៗជាច្រើន ដូចដែលពួកវាបានធ្វើនៅស្រុកអេស៊ីបនាសម័យម៉ូសេ។ (និក្ខមនំ ១០:១២-១៥) កណ្ដូបដែលយ៉ូហានបានឃើញជាតំណាងគ្រិស្ដសាសនិកដែលបានត្រូវរើសតាំង។ ពួកគាត់បានផ្សព្វផ្សាយដំណឹងដែលបកអាក្រាតសាសនាមិនពិត។ ម្យ៉ាងទៀត មនុស្សរាប់លាននាក់ទៀតដែលទន្ទឹងរង់ចាំជីវិតនៅលើផែនដីបានចូលរួមជាមួយនឹងពួកគាត់ ហើយសហការគ្នាក្នុងកិច្ចការផ្សព្វផ្សាយនេះ។ កិច្ចការនេះបានជួយមនុស្សជាច្រើនឲ្យចាកចេញពីសាសនាមិនពិតដែលនៅក្រោមការគ្រប់គ្រងរបស់សាថាន។
យើងអាចផ្សព្វផ្សាយដល់មនុស្សទូទាំងពិភពលោក ដោយសារយើងសហការគ្នា
៤. តើរាស្ដ្ររបស់ព្រះត្រូវធ្វើកិច្ចការអ្វី ហើយតើពួកគេអាចធ្វើដូច្នេះបានយ៉ាងដូចម្ដេច?
៤ យើងមានភារកិច្ចផ្សព្វផ្សាយ«ដំណឹងល្អ»ដល់មនុស្សទូទាំងពិភពលោកមុនទីបញ្ចប់មកដល់។ នេះជាកិច្ចការដ៏ធំមួយ! (ម៉ាថាយ ២៤:១៤; ២៨:១៩, ២០) យើងត្រូវអញ្ជើញអស់អ្នកដែល«ស្រេក»ឲ្យមកផឹក«ទឹកដែលផ្ដល់ជីវិត» ពោលគឺ យើងត្រូវបង្រៀនអស់អ្នកដែលចង់យល់សេចក្ដីពិតក្នុងគម្ពីរ។ (ការបើកបង្ហាញ ២២:១៧) ប៉ុន្ដែ យើងអាចធ្វើដូច្នេះបាន លុះត្រាតែយើង«ជាប់គ្នាយ៉ាងល្អ»និងសហការគ្នាក្នុងក្រុមជំនុំ។—អេភេសូរ ៤:១៦
៥, ៦. តើយើងមានសាមគ្គីភាពយ៉ាងដូចម្ដេចពេលយើងផ្សព្វផ្សាយដំណឹងល្អ?
៥ ដើម្បីផ្សព្វផ្សាយដល់មនុស្សឲ្យបានច្រើនបំផុត យើងត្រូវរៀបចំកិច្ចការផ្សព្វផ្សាយឲ្យមានរបៀបរៀបរយ។ ការណែនាំដែលយើងទទួលពីក្រុមជំនុំជួយយើងឲ្យធ្វើកិច្ចការនេះ។ ក្រោយពីយើងជួបជុំគ្នាសម្រាប់ផ្សព្វផ្សាយ យើងទៅប្រាប់មនុស្សអំពីដំណឹងល្អនៃរាជាណាចក្រព្រះ។ យើងក៏ស្នើផ្ដល់ឲ្យពួកគេដែរនូវសៀវភៅផ្សេងៗដែលមានមូលដ្ឋានលើគម្ពីរ។ តាមពិត យើងបានស្នើផ្ដល់សៀវភៅទាំងនោះអស់រាប់លានក្បាលនៅទូទាំងពិភពលោក។ ជួនកាល យើងបានត្រូវសុំឲ្យចូលរួមក្នុងសកម្មភាពពិសេស។ ពេលអ្នកធ្វើកិច្ចការនេះ អ្នកមានសាមគ្គីភាពជាមួយនឹងមនុស្សរាប់លាននាក់ទៀតនៅទូទាំងពិភពលោកដែលកំពុងផ្សព្វផ្សាយដំណឹងល្អនៃរាជាណាចក្រដែរ! អ្នកក៏សហការជាមួយនឹងបណ្ដាទេវតាដែលកំពុងជួយរាស្ដ្ររបស់ព្រះផ្សព្វផ្សាយដំណឹងល្អ។—ការបើកបង្ហាញ ១៤:៦
៦ យើងមានចិត្ដរំភើបណាស់ពេលអានក្នុងសៀវភៅផ្សេងៗរបស់យើងអំពីលទ្ធផលនៃកិច្ចការផ្សព្វផ្សាយទូទាំងពិភពលោក! សូមគិតផងដែរអំពីសាមគ្គីភាពដែលយើងមានជាមួយនឹងបងប្អូននៅទូទាំងពិភពលោក ពេលដែលយើងអញ្ជើញអ្នកឯទៀតឲ្យចូលរួមមហាសន្និបាតរបស់យើង។ នៅទីនោះ យើងទាំងអស់គ្នាស្តាប់ព័ត៌មានដូចគ្នា។ សុន្ទរកថា ឈុតសម្ដែង និងការសម្ដែង លើកទឹកចិត្ដយើងឲ្យបម្រើព្រះយេហូវ៉ាដោយអស់ពីចិត្ដ។ យើងក៏មានសាមគ្គីភាពជាមួយនឹងបងប្អូននៅទូទាំងពិភពលោកដែរ ពេលដែលយើងចូលរួមពិធីរំលឹកជារៀងរាល់ឆ្នាំ។ (កូរិនថូសទី១ ១១:២៣-២៦) យើងជួបជុំគ្នានៅថ្ងៃខែដូចគ្នាគឺថ្ងៃទី១៤ ខែណែសានក្រោយថ្ងៃលិច ដើម្បីបង្ហាញថាយើងមានចិត្ដកតញ្ញូចំពោះអ្វីដែលព្រះយេហូវ៉ាបានធ្វើសម្រាប់យើង និងដើម្បីធ្វើតាមបង្គាប់របស់លោកយេស៊ូ។ ម្យ៉ាងទៀត ប៉ុន្មានសប្ដាហ៍មុនពិធីរំលឹក យើងសហការគ្នាក្នុងការអញ្ជើញមនុស្សឲ្យបានច្រើនបំផុតមកចូលរួមជាមួយនឹងយើងនៅពិធីដ៏សំខាន់នេះ។
៧. ដោយសារយើងសហការគ្នា តើយើងអាចធ្វើអ្វី?
៧ កណ្ដូបមួយក្បាលមិនអាចធ្វើអ្វីច្រើនទេ ដូចគ្នាដែរយើងម្នាក់ឯងមិនអាចផ្សព្វផ្សាយដល់មនុស្សទាំងអស់បានឡើយ។ ប៉ុន្ដែ ដោយសារយើងសហការគ្នា នោះយើងអាចប្រាប់ដល់មនុស្សរាប់លាននាក់អំពីព្រះយេហូវ៉ា ហើយជួយពួកគេខ្លះឲ្យសរសើរនិងលើកតម្កើងលោក។
ចូរសហការគ្នាក្នុងក្រុមជំនុំ
៨, ៩. (ក) តើប៉ូលបានប្រើឧទាហរណ៍អ្វីដើម្បីបង្រៀនគ្រិស្ដសាសនិកឲ្យរក្សាសាមគ្គីភាព? (ខ) តើតាមរបៀបណាយើងអាចសហការគ្នាក្នុងក្រុមជំនុំ?
៨ ប៉ូលបានពន្យល់ទៅគ្រិស្ដសាសនិកនៅក្រុងអេភេសូរអំពីរបៀបដែលក្រុមជំនុំបានត្រូវរៀបចំ ហើយគាត់បាននិយាយថាសមាជិកទាំងអស់នៅក្នុងក្រុមជំនុំត្រូវ«ធំលូតលាស់ឡើង . . . ក្នុងគ្រប់ការទាំងអស់»។ (សូមអាន អេភេសូរ ៤:១៥, ១៦) ប៉ូលបានលើកឧទាហរណ៍មួយអំពីរូបកាយដើម្បីពន្យល់ថា គ្រិស្ដសាសនិកម្នាក់ៗអាចជួយក្រុមជំនុំឲ្យរក្សាសាមគ្គីភាពនិងធ្វើតាមលោកយេស៊ូដែលជាប្រមុខនៃក្រុមជំនុំ។ គាត់បាននិយាយថា អវយវៈទាំងអស់នៃរូបកាយសហការគ្នា«តាមរយៈសន្លាក់ឆ្អឹងផ្សេងៗ»។ ដូច្នេះ ទោះជាយើងក្មេងឬចាស់ មានសុខភាពល្អឬមិនមានក៏ដោយ តើយើងម្នាក់ៗគួរធ្វើអ្វី?
តើតាមរបៀបណាអ្នកអាចជួយក្រុមជំនុំឲ្យរក្សាសាមគ្គីភាព?
៩ លោកយេស៊ូបានតែងតាំងពួកអ្នកចាស់ទុំឲ្យនាំមុខក្នុងក្រុមជំនុំ ហើយលោកចង់ឲ្យយើងគោរពពួកគាត់ និងធ្វើតាមការណែនាំដែលពួកគាត់ឲ្យយើង។ (ហេប្រឺ ១៣:៧, ១៧) នេះមិនតែងតែងាយស្រួលធ្វើទេ។ ប៉ុន្ដែ យើងអាចសុំជំនួយពីព្រះយេហូវ៉ាបាន។ លោកនឹងផ្ដល់ឲ្យយើងនូវសកម្មពលបរិសុទ្ធដើម្បីជួយយើងឲ្យធ្វើតាមការណែនាំណាក៏ដោយដែលពួកអ្នកចាស់ទុំឲ្យយើង។ សូមគិតផងដែរថាយើងអាចជួយក្រុមជំនុំបានច្រើនយ៉ាងណាទៅ បើយើងមានចិត្ដរាបទាបនិងសហការជាមួយនឹងពួកអ្នកចាស់ទុំ។ ក្រុមជំនុំយើងនឹងមានសាមគ្គីភាព ហើយយើងនឹងមានសេចក្ដីស្រឡាញ់ចំពោះគ្នាទៅវិញទៅមកកាន់តែខ្លាំង។
១០. តើជំនួយការខាងកិច្ចបម្រើជួយក្រុមជំនុំឲ្យមានសាមគ្គីភាពយ៉ាងដូចម្ដេច? (សូមមើលរូបភាពនៅដើមអត្ថបទ)
១០ ជំនួយការខាងកិច្ចបម្រើក៏ជួយរក្សាក្រុមជំនុំឲ្យមានសាមគ្គីភាពដែរ។ ពួកគាត់ព្យាយាមជួយពួកអ្នកចាស់ទុំ ហើយយើងមានចិត្ដកតញ្ញូចំពោះអ្វីៗទាំងអស់ដែលជំនួយការខាងកិច្ចបម្រើធ្វើ។ ជាឧទាហរណ៍ ជំនួយការខាងកិច្ចបម្រើធ្វើឲ្យប្រាកដថាយើងមានសៀវភៅគ្រប់គ្រាន់ដើម្បីប្រើក្នុងកិច្ចបម្រើផ្សាយ ហើយពួកគាត់ទទួលស្វាគមន៍ពួកអ្នកដែលមកចូលរួមកិច្ចប្រជុំយើង។ ពួកគាត់ក៏ព្យាយាមជួសជុលនិងថែរក្សាសាលប្រជុំឲ្យបានស្អាត។ ពេលដែលយើងសហការជាមួយនឹងបងប្អូនប្រុសទាំងនេះ យើងមានសាមគ្គីភាពនិងបម្រើព្រះយេហូវ៉ាតាមរបៀបរៀបរយ។—សូមពិនិត្យបន្ថែម សកម្មភាព ៦:៣-៦
១១. តើបងប្អូនវ័យក្មេងអាចធ្វើអ្វីដើម្បីជួយក្រុមជំនុំឲ្យមានសាមគ្គីភាព?
១១ ពួកអ្នកចាស់ទុំខ្លះបានធ្វើការយ៉ាងនឿយហត់នៅក្នុងក្រុមជំនុំអស់រយៈពេលជាច្រើនឆ្នាំ។ ប៉ុន្ដែ ពួកគាត់ប្រហែលជាមិនអាចធ្វើច្រើនដូចពីមុនទេ ដោយសារពួកគាត់កាន់តែចាស់ទៅៗ។ បើបងប្អូនប្រុសដែលមានវ័យក្មេងជាងបានទទួលការបង្ហាត់បង្រៀន នោះពួកគេអាចជួយបំពេញភារកិច្ចច្រើនថែមទៀតក្នុងក្រុមជំនុំ។ ម្យ៉ាងទៀត ពេលដែលជំនួយការខាងកិច្ចបម្រើព្យាយាមបំពេញភារកិច្ច ពួកគាត់ប្រហែលជាអាចបម្រើជាអ្នកចាស់ទុំនៅពេលអនាគត។ (ធីម៉ូថេទី១ ៣:១, ១០) អ្នកចាស់ទុំខ្លះដែលមានវ័យក្មេងជាងបានជឿនទៅមុខរហូតដល់មានគុណសម្បត្ដិគ្រប់គ្រាន់ដើម្បីបម្រើជាអ្នកត្រួតពិនិត្យប្រចាំមណ្ឌល ហើយពួកគាត់កំពុងជួយបងប្អូននៅក្នុងក្រុមជំនុំជាច្រើន។ យើងមានចិត្ដកតញ្ញូពេលដែលបងប្អូនដែលមានវ័យក្មេងជាងសុខចិត្ដបម្រើបងប្អូនរួមជំនឿ។—សូមអាន ទំនុកតម្កើង ១១០:៣; សាស្តា ១២:១
ចូរសហការគ្នាក្នុងក្រុមគ្រួសារ
១២, ១៣. តើអ្វីអាចជួយសមាជិកទាំងអស់ក្នុងក្រុមគ្រួសារឲ្យសហការគ្នា?
១២ តើតាមរបៀបណាយើងអាចជួយសមាជិកក្រុមគ្រួសារយើងឲ្យសហការគ្នា? ការគោរពប្រណិប័តន៍ជាក្រុមគ្រួសាររៀងរាល់សប្ដាហ៍អាចជួយយើងឲ្យសហការគ្នា។ ពេលដែលឪពុកម្ដាយនិងកូនៗចំណាយពេលជាមួយគ្នាដើម្បីរៀនអំពីព្រះយេហូវ៉ា នោះពួកគេមានសេចក្ដីស្រឡាញ់ចំពោះគ្នាទៅវិញទៅមកកាន់តែខ្លាំង។ ក្នុងអំឡុងការគោរពប្រណិប័តន៍ជាក្រុមគ្រួសារ ពួកគេអាចហាត់អ្វីដែលពួកគេនឹងនិយាយនៅក្នុងកិច្ចបម្រើផ្សាយ នេះជួយឲ្យសមាជិកទាំងអស់ក្នុងក្រុមគ្រួសាររៀបចំបានល្អប្រសើរជាង។ ម្យ៉ាងទៀត ពេលដែលក្រុមគ្រួសារឮសមាជិកម្នាក់ៗនិយាយអំពីសេចក្ដីពិតនិងឃើញថាសមាជិកទាំងអស់ស្រឡាញ់ព្រះយេហូវ៉ាហើយចង់ធ្វើឲ្យលោកពេញចិត្ដ នោះពួកគេនឹងកាន់តែមានភាពជិតស្និទ្ធនឹងគ្នា។
ពេលប្ដីប្រពន្ធស្រឡាញ់ព្រះយេហូវ៉ាហើយបម្រើលោកជាមួយគ្នា នោះពួកគាត់នឹងមានសុភមង្គល ថែមទាំងមានសាមគ្គីភាពក្នុងចំណងអាពាហ៍ពិពាហ៍
១៣ តើប្ដីនិងប្រពន្ធអាចសហការគ្នាយ៉ាងដូចម្ដេច? (ម៉ាថាយ ១៩:៦) ពេលពួកគាត់ទាំងពីរនាក់ស្រឡាញ់ព្រះយេហូវ៉ានិងបម្រើលោកជាមួយគ្នា នោះពួកគាត់នឹងមានសុភមង្គល ថែមទាំងមានសាមគ្គីភាពក្នុងចំណងអាពាហ៍ពិពាហ៍។ ពួកគាត់ក៏គួរបង្ហាញសេចក្ដីស្រឡាញ់ចំពោះគ្នាទៅវិញទៅមកដែរ ដូចអាប្រាហាំនិងសារ៉ា អ៊ីសាកនិងរេបិកា ហើយអែលកាណានិងហាណា។ (លោកុប្បត្ដិ ២៦:៨; សាំយូអែលទី១ ១:៥, ៨; ពេត្រុសទី១ ៣:៥, ៦) ពេលដែលប្ដីនិងប្រពន្ធធ្វើដូច្នេះ នោះពួកគេមានសាមគ្គីភាពនឹងគ្នាហើយចូលកាន់តែជិតព្រះយេហូវ៉ា។—សូមអាន សាស្តា ៤:១២
ការគោរពប្រណិប័តន៍ជាក្រុមគ្រួសារអាចជួយទាំងក្មេងទាំងចាស់ឲ្យកាន់តែមានភាពជិតស្និទ្ធជាមួយគ្នា (សូមមើលវគ្គ១២, ១៥)
១៤. បើប្ដីឬប្រពន្ធរបស់អ្នកមិនបម្រើព្រះយេហូវ៉ា តើអ្នកអាចធ្វើអ្វីដើម្បីរក្សាចំណងអាពាហ៍ពិពាហ៍ឲ្យរឹងមាំ?
១៤ គម្ពីរចែងយ៉ាងច្បាស់ថាយើងមិនគួររៀបការជាមួយនឹងបុគ្គលណាដែលមិនបម្រើព្រះយេហូវ៉ាឡើយ។ (កូរិនថូសទី២ ៦:១៤) យ៉ាងណាក្ដី បងប្អូនខ្លះបានរៀបការជាមួយនឹងបុគ្គលដែលមិនមែនជាសាក្សីព្រះយេហូវ៉ា។ ចំណែកឯបងប្អូនខ្លះបានរៀនសេចក្ដីពិតក្រោយពីពួកគាត់បានរៀបការហើយ តែគូរបស់ពួកគាត់មិនបានក្លាយទៅជាសាក្សីឡើយ។ បងប្អូនខ្លះទៀតប្រហែលជាបានរៀបការជាមួយនឹងអ្នកបម្រើព្រះយេហូវ៉ា ប៉ុន្ដែក្រោយមកប្ដីឬប្រពន្ធរបស់ពួកគាត់ចាកចេញពីក្រុមជំនុំ។ ក្នុងស្ថានភាពទាំងនេះ គ្រិស្ដសាសនិកគួរខំអស់ពីសមត្ថភាពធ្វើតាមគោលការណ៍ក្នុងគម្ពីរដើម្បីរក្សាចំណងអាពាហ៍ពិពាហ៍របស់ពួកគាត់ឲ្យរឹងមាំ។ នេះប្រហែលជាមិនតែងតែងាយស្រួលឡើយ។ ជាឧទាហរណ៍ បងម៉ារៀនិងបងដាវីឌដែលជាប្ដីគាត់ បានបម្រើព្រះយេហូវ៉ាជាមួយគ្នា។ ក្រោយមកបងដាវីឌបានឈប់ទៅកិច្ចប្រជុំ។ ប៉ុន្ដែ បងម៉ារៀនៅតែព្យាយាមធ្វើជាប្រពន្ធល្អម្នាក់ ហើយបង្ហាញគុណសម្បត្ដិជាគ្រិស្ដសាសនិក។ បងម៉ារៀក៏បានបង្រៀនកូនទាំង៦នាក់របស់គាត់អំពីព្រះយេហូវ៉ា ហើយបានបន្ដចូលរួមកិច្ចប្រជុំនិងមហាសន្និបាតដែរ។ ប៉ុន្មានឆ្នាំក្រោយមក ពេលដែលកូនៗធំពេញវ័យ ហើយបានចាកចេញពីផ្ទះអស់ បងម៉ារៀនៅតែបន្ដបម្រើព្រះយេហូវ៉ា ទោះជាស្ថានភាពនេះកាន់តែពិបាកសម្រាប់គាត់ក្ដី។ ប៉ុន្ដែ ក្រោយមក បងដាវីឌបានចាប់ផ្ដើមអានទស្សនាវដ្ដីផ្សេងៗដែលបងម៉ារៀបានទុកសម្រាប់គាត់។ នៅពេលក្រោយមក បងដាវីឌបានចាប់ផ្ដើមទៅកិច្ចប្រជុំម្ដងទៀត។ ចៅប្រុសរបស់បងដាវីឌដែលមានអាយុ៦ឆ្នាំតែងតែទុកកន្លែងអង្គុយឲ្យគាត់ ហើយបើបងដាវីឌមិនមក ក្មេងប្រុសនោះបាននិយាយទៅគាត់ថា៖ «ខ្ញុំនឹកតាពេលខ្ញុំអត់ឃើញតានៅកិច្ចប្រជុំថ្ងៃនេះ»។ នៅទីបំផុត បងដាវីឌបានត្រឡប់មកព្រះយេហូវ៉ាវិញក្រោយ២៥ឆ្នាំ ហើយគាត់និងប្រពន្ធគាត់សប្បាយរីករាយដែលឥឡូវនេះពួកគាត់បម្រើព្រះយេហូវ៉ាជាមួយគ្នាម្ដងទៀត។
១៥. តើប្ដីប្រពន្ធដែលរៀបការយូរហើយអាចជួយគូអាពាហ៍ពិពាហ៍ដែលមានវ័យក្មេងយ៉ាងដូចម្ដេច?
១៥ សាថានខំបំផ្លាញក្រុមគ្រួសារនៅសព្វថ្ងៃនេះ។ នេះជាមូលហេតុមួយដែលប្ដីនិងប្រពន្ធដែលជាអ្នកបម្រើព្រះយេហូវ៉ាត្រូវសហការគ្នា។ ទោះជាអ្នកបានរៀបការយូរហើយក្ដី សូមគិតអំពីអ្វីដែលអ្នកអាចនិយាយ ឬធ្វើដើម្បីពង្រឹងចំណងអាពាហ៍ពិពាហ៍របស់អ្នក។ បើអ្នកជាប្ដីប្រពន្ធដែលបានរៀបការយូរហើយ នោះអ្នកអាចធ្វើជាគំរូល្អដល់ប្ដីប្រពន្ធដែលមានវ័យក្មេង។ ប្រហែលជាអ្នកអាចអញ្ជើញពួកគេឲ្យចូលរួមការគោរពប្រណិប័តន៍ជាក្រុមគ្រួសារជាមួយអ្នក។ យ៉ាងនេះ ពួកគេនឹងឃើញថា ទោះជាប្ដីប្រពន្ធបានរៀបការយូរហើយក្ដី ពួកគេនៅតែត្រូវបង្ហាញសេចក្ដីស្រឡាញ់ចំពោះគ្នាទៅវិញទៅមកនិងមានសាមគ្គីភាពនឹងគ្នា។—ទីតុស ២:៣-៧
«ចូរយើងឡើងទៅឯភ្នំនៃព្រះយេហូវ៉ា»
១៦, ១៧. តើរាស្ដ្ររបស់ព្រះដែលមានសាមគ្គីភាពកំពុងទន្ទឹងរង់ចាំអ្វី?
១៦ ពេលដែលជនជាតិអ៊ីស្រាអែលទៅចូលរួមបុណ្យផ្សេងៗនៅក្រុងយេរូសាឡិម ពួកគេបានសហការគ្នា។ ពួកគេបានរៀបចំអ្វីៗទាំងអស់ដែលពួកគេត្រូវការសម្រាប់ធ្វើដំណើរ។ បន្ទាប់មក ពួកគេបានធ្វើដំណើរជាមួយគ្នានិងជួយគ្នាទៅវិញទៅមក។ នៅឯវិហារ ពួកគេទាំងអស់គ្នាបានសរសើរតម្កើងព្រះយេហូវ៉ា ហើយគោរពប្រណិប័តន៍លោកជាមួយគ្នា។ (លូកា ២:៤១-៤៤) សព្វថ្ងៃនេះ កាលដែលយើងត្រៀមខ្លួនដើម្បីរស់នៅក្នុងពិភពលោកថ្មី យើងត្រូវមានសាមគ្គីភាព ហើយខំអស់ពីសមត្ថភាពដើម្បីសហការគ្នា។ តើអ្នកអាចធ្វើដូច្នេះកាន់តែច្រើនថែមទៀតឬទេ?
១៧ មនុស្សនៅក្នុងពិភពលោកនេះមិនយល់ស្របគ្នា ហើយថែមទាំងឈ្លោះគ្នាអំពីរឿងជាច្រើន។ ប៉ុន្ដែ យើងមានអំណរគុណដោយសារព្រះយេហូវ៉ាបានជួយយើងឲ្យមានសន្ដិភាពនិងឲ្យយើងយល់អំពីសេចក្ដីពិត! រាស្ដ្ររបស់ព្រះយេហូវ៉ានៅទូទាំងពិភពលោកកំពុងគោរពប្រណិប័តន៍លោកតាមរបៀបដែលលោកពេញចិត្ដ។ ជាពិសេសនៅគ្រាចុងក្រោយបង្អស់នេះ រាស្ដ្ររបស់ព្រះយេហូវ៉ាមានសាមគ្គីភាពខ្លាំងជាងពេលមុនៗទៅទៀត។ ដូចអេសាយនិងមីកាបានប្រកាសទុកជាមុន យើងនឹងឡើងទៅ«ឯភ្នំនៃព្រះយេហូវ៉ា»ជាមួយគ្នា។ (អេសាយ ២:២-៤; សូមអាន មីកា ៤:២-៤) នៅពេលអនាគត យើងនឹងមានអំណរយ៉ាងខ្លាំង ពេលដែលមនុស្សទាំងអស់នៅផែនដី«ជាប់គ្នាយ៉ាងល្អ»និងសហការគ្នាដើម្បីគោរពប្រណិប័តន៍ព្រះយេហូវ៉ា!
