ការជ្រមុជទឹកគឺជាតម្រូវការដើម្បីធ្វើជាគ្រិស្ដសាសនិក
«អ្វីដែលកំពុងសង្គ្រោះអ្នករាល់គ្នាឥឡូវនេះ . . . គឺការជ្រមុជទឹក»។—ពេត្រុសទី១ ៣:២១
១, ២. (ក) តើឪពុកម្ដាយខ្លះមានអារម្មណ៍យ៉ាងណាពេលកូនរបស់ពួកគេចង់ទទួលការជ្រមុជទឹក? (ខ) ហេតុអ្វីអ្នកដែលចង់ទទួលការជ្រមុជទឹកបានត្រូវសួរថាតើពួកគេបានប្រគល់ខ្លួនជូនព្រះយេហូវ៉ាហើយឬនៅ? (សូមមើលរូបភាពនៅដើមអត្ថបទ)
ឪពុកម្ដាយរបស់ម៉ារៀសម្លឹងមើលកូនស្រីរបស់ពួកគាត់ កាលដែលនាងក្រោកឈរជាមួយនឹងអ្នកឯទៀតដែលនឹងទទួលការជ្រមុជទឹក។ អ្នកថ្លែងសុន្ទរកថាបានសួរសំណួរពីរ។ ប្អូនម៉ារៀបានឆ្លើយយ៉ាងឮៗនិងច្បាស់។ មិនយូរក្រោយពីនោះ នាងបានទទួលការជ្រមុជទឹក។
២ ឪពុកម្ដាយរបស់ប្អូនម៉ារៀមានមោទនភាពជាខ្លាំងដែលកូនស្រីរបស់ពួកគាត់បានប្រគល់ខ្លួនជូនព្រះយេហូវ៉ា ហើយបានទទួលការជ្រមុជទឹក។ ប៉ុន្ដែមុនពេលនោះ ម្ដាយរបស់ប្អូនម៉ារៀបានព្រួយបារម្ភបន្ដិច។ គាត់បានឆ្ងល់ថា ‹តើម៉ារៀនៅក្មេងពេកដើម្បីទទួលការជ្រមុជទឹកឬទេ? តើនាងពិតជាយល់អំពីសារៈសំខាន់នៃការប្រគល់ខ្លួនជូនព្រះយេហូវ៉ាឬ? តើនាងគួររង់ចាំយូរជាងដើម្បីទទួលការជ្រមុជទឹកឬទេ?›។ ឪពុកម្ដាយជាច្រើនដែលស្រឡាញ់កូន សួរខ្លួនឯងនូវសំណួរស្រដៀងនឹងនេះ ពេលដែលកូនរបស់ពួកគេប្រាប់ថាគាត់ចង់ទទួលការជ្រមុជទឹក។ (សាស្តា ៥:៥) យ៉ាងណាមិញ ការសម្រេចចិត្ដដ៏សំខាន់បំផុតដែលបុគ្គលគ្រប់រូបអាចធ្វើគឺការប្រគល់ខ្លួនជូនព្រះយេហូវ៉ានិងទទួលការជ្រមុជទឹក (សូមមើលប្រអប់ដែលមានចំណងជើងថា « តើអ្នកបានប្រគល់ខ្លួនជូនព្រះយេហូវ៉ាហើយឬនៅ?»)។
៣, ៤. (ក) តើតាមរបៀបណាសាវ័កពេត្រុសបង្រៀនយើងថាការជ្រមុជទឹកគឺសំខាន់ណាស់? (ខ) ហេតុអ្វីពេត្រុសបានប្រៀបប្រដូចការជ្រមុជទឹកទៅនឹងការដែលណូអេសង់ទូកធំ?
៣ សាវ័កពេត្រុសបានប្រៀបប្រដូចការជ្រមុជទឹកទៅនឹងការដែលណូអេសង់ទូកធំ។ គាត់បាននិយាយថា៖ «ព្រឹត្ដិការណ៍នោះជានិមិត្ដរូបនៃអ្វីដែលកំពុងសង្គ្រោះអ្នករាល់គ្នាឥឡូវនេះ ពោលគឺការជ្រមុជទឹក»។ (សូមអាន ពេត្រុសទី១ ៣:២០, ២១) ទូកធំនោះផ្ដល់ភ័ស្ដុតាងច្បាស់លាស់ដល់អ្នកឯទៀតថាណូអេចង់ធ្វើតាមបំណងប្រាថ្នារបស់ព្រះយ៉ាងអស់ពីចិត្ដ។ ដោយស្មោះត្រង់ ណូអេបានធ្វើកិច្ចការដែលព្រះយេហូវ៉ាបានផ្ដល់ឲ្យគាត់។ ដោយសារជំនឿរបស់ណូអេ ព្រះយេហូវ៉ាបានសង្គ្រោះគាត់និងក្រុមគ្រួសាររបស់គាត់ក្នុងអំឡុងពេលមានទឹកជំនន់។ ដូច្នេះ តើពេត្រុសចង់បង្រៀនយើងអំពីអ្វី?
៤ ពេលមនុស្សបានឃើញទូកធំនោះ ពួកគេបានដឹងថាណូអេមានជំនឿលើព្រះ។ ពេលមនុស្សឃើញបុគ្គលណាម្នាក់ទទួលការជ្រមុជទឹក ពួកគេដឹងថាគាត់បានប្រគល់ខ្លួនជូនព្រះ ដោយសារគាត់មានជំនឿលើគ្រិស្ដដែលបានត្រូវប្រោសឲ្យរស់ឡើងវិញ។ ដូចណូអេ អ្នកដែលទទួលការជ្រមុជទឹក ស្តាប់បង្គាប់ព្រះនិងធ្វើកិច្ចការដែលលោកបានផ្ដល់ឲ្យពួកគេ។ ម្យ៉ាងទៀត ដូចព្រះយេហូវ៉ាបានសង្គ្រោះណូអេក្នុងអំឡុងពេលមានទឹកជំនន់ លោកក៏នឹងសង្គ្រោះអ្នកបម្រើដ៏ស្មោះត្រង់របស់លោកដែលបានទទួលការជ្រមុជទឹករួចហើយ ពេលលោកបំផ្លាញពិភពលោកដ៏អាក្រក់នេះ។ (ម៉ាកុស ១៣:១០; ការបើកបង្ហាញ ៧:៩, ១០) យើងអាចឃើញច្បាស់ថា គឺសំខាន់ណាស់ដែលយើងប្រគល់ខ្លួនជូនព្រះយេហូវ៉ា ហើយទទួលការជ្រមុជទឹក។ តាមពិត បើបុគ្គលណាម្នាក់បង្អែបង្អង់ទទួលការជ្រមុជទឹក គាត់អាចបាត់បង់ឱកាសរស់ជារៀងរហូត។
៥. តើយើងនឹងរៀនអ្វីខ្លះក្នុងអត្ថបទនេះ?
៥ ដោយសារឥឡូវយើងដឹងថាការជ្រមុជទឹកគឺសំខាន់ណាស់ នោះយើងត្រូវដឹងអំពីចម្លើយចំពោះសំណួរទាំងបីនេះគឺ៖ តើគម្ពីរចែងយ៉ាងណាអំពីការជ្រមុជទឹក? តើបុគ្គលម្នាក់ត្រូវធ្វើអ្វីមុនគាត់អាចទទួលការជ្រមុជទឹក? ហេតុអ្វីយើងគួរចាំជានិច្ចអំពីសារៈសំខាន់នៃការជ្រមុជទឹកពេលដែលយើងបង្រៀនកូនៗរបស់យើងឬសិស្សគម្ពីរ?
អ្វីដែលគម្ពីរចែងអំពីការជ្រមុជទឹក
៦, ៧. (ក) ហេតុអ្វីមនុស្សបានមកឯយ៉ូហានដើម្បីទទួលការជ្រមុជទឹក? (ខ) តើការជ្រមុជទឹករបស់អ្នកណាគឺខុសគ្នាពីមនុស្សឯទៀតទាំងអស់ ហើយហេតុអ្វី?
៦ យើងឃើញក្នុងគម្ពីរថា យ៉ូហានដែលជាអ្នកជ្រមុជទឹកគឺជាបុគ្គលដំបូងដែលបានជ្រមុជទឹកឲ្យអ្នកឯទៀត។ (ម៉ាថាយ ៣:១-៦) ហេតុអ្វីមនុស្សបានមកឯគាត់ដើម្បីទទួលការជ្រមុជទឹក? ពួកគេធ្វើដូច្នេះ ដើម្បីបង្ហាញថាពួកគេបានប្រែចិត្ដពីអំពើខុសឆ្គង ពោលគឺពួកគេបានសារភាពថាពួកគេមិនបានធ្វើតាមច្បាប់ម៉ូសេ ហើយស្តាយក្រោយយ៉ាងខ្លាំង។ ប៉ុន្ដែ មានមូលហេតុផ្សេងទៀតសម្រាប់ការជ្រមុជទឹកដ៏សំខាន់បំផុតដែលបានធ្វើឡើងដោយយ៉ូហាន។ យ៉ូហានមានកិត្ដិយសដ៏ខ្ពង់ខ្ពស់ក្នុងការជ្រមុជទឹកឲ្យលោកយេស៊ូ ដែលជាបុត្រដ៏ល្អឥតខ្ចោះរបស់ព្រះ។ (ម៉ាថាយ ៣:១៣-១៧) លោកយេស៊ូមិនដែលប្រព្រឹត្ដអំពើខុសឆ្គងទាល់តែសោះ។ យ៉ាងនេះ លោកមិនចាំបាច់ប្រែចិត្ដទេ។ (ពេត្រុសទី១ ២:២២) ដូច្នេះ ហេតុអ្វីលោកយេស៊ូបានទទួលការជ្រមុជទឹក? គឺដើម្បីបង្ហាញថាលោកចង់ប្រើជីវិតរបស់លោកក្នុងការធ្វើតាមបំណងប្រាថ្នារបស់ព្រះ។—ហេប្រឺ ១០:៧
៧ ក្រោយពីលោកយេស៊ូបានចាប់ផ្ដើមផ្សព្វផ្សាយ អ្នកកាន់តាមលោកបានចាប់ផ្ដើមជ្រមុជទឹកឲ្យអ្នកឯទៀត។ (យ៉ូហាន ៣:២២; ៤:១, ២) បុគ្គលទាំងនោះក៏បានទទួលការជ្រមុជទឹកដែរដោយសារពួកគេបានប្រែចិត្ដពីការបំពានច្បាប់ម៉ូសេ។ ប៉ុន្ដែ ក្រោយពីលោកយេស៊ូបានស្លាប់ ហើយបានត្រូវប្រោសឲ្យរស់ឡើងវិញ ពួកអ្នកដែលចង់ធ្វើជាអ្នកកាន់តាមលោក ត្រូវទទួលការជ្រមុជទឹកដោយមានមូលហេតុផ្សេងទៀត។
៨. (ក) ក្រោយពីលោកយេស៊ូបានត្រូវប្រោសឲ្យរស់ឡើងវិញ តើលោកបានបង្គាប់អ្វីដល់អ្នកកាន់តាមលោក? (ខ) ហេតុអ្វីគ្រិស្ដសាសនិកត្រូវទទួលការជ្រមុជទឹក?
៨ នៅឆ្នាំ៣៣ គ.ស. មិនយូរក្រោយពីលោកយេស៊ូបានត្រូវប្រោសឲ្យរស់ឡើងវិញ លោកបានមានប្រសាសន៍ទៅកាន់ក្រុមមនុស្សជាង៥០០នាក់ដែលមានបុរស ស្ដ្រី និងប្រហែលជាកូនក្មេងផងដែរ។ គឺប្រហែលជានៅពេលនោះដែលលោកបានមានប្រសាសន៍ថា៖ «ដូច្នេះ ចូរទៅបង្រៀនមនុស្សគ្រប់ជាតិសាសន៍ឲ្យក្លាយទៅជាអ្នកកាន់តាមខ្ញុំ ហើយជ្រមុជទឹកឲ្យពួកគេ ក្នុងនាមបិតាដែលស្ថិតនៅស្ថានសួគ៌ ក្នុងនាមបុត្ររបស់លោក និងក្នុងនាមសកម្មពលបរិសុទ្ធរបស់លោក។ ហើយបង្រៀនពួកគេឲ្យកាន់តាមអ្វីៗទាំងអស់ដែលខ្ញុំបានបង្គាប់អ្នករាល់គ្នា»។ (ម៉ាថាយ ២៨:១៩, ២០; កូរិនថូសទី១ ១៥:៦) លោកយេស៊ូបានបង្គាប់អ្នកកាន់តាមលោកឲ្យបង្រៀនអ្នកឯទៀតឲ្យក្លាយទៅជាអ្នកកាន់តាមលោក។ បុគ្គលណាម្នាក់ដែលចង់យក«នឹម»របស់លោក ឬដែលចង់ធ្វើជាអ្នកកាន់តាមលោក ត្រូវតែទទួលការជ្រមុជទឹក។ (ម៉ាថាយ ១១:២៩, ៣០) ដើម្បីបម្រើព្រះតាមរបៀបដែលលោកពេញចិត្ដ បុគ្គលម្នាក់ៗត្រូវទទួលស្គាល់តួនាទីរបស់លោកយេស៊ូក្នុងការធ្វើឲ្យគោលបំណងរបស់ព្រះបានសម្រេច។ យ៉ាងនេះ បុគ្គលនោះអាចទទួលការជ្រមុជទឹកដែលព្រះពេញចិត្ដ។ គម្ពីរផ្ដល់ភ័ស្ដុតាងជាច្រើនដែលបញ្ជាក់ថាអ្នកកាន់តាមលោកយេស៊ូនៅសម័យដើមបានដឹងអំពីសារៈសំខាន់នៃការទទួលការជ្រមុជទឹក។ ពួកគេមិនបានគិតថាពួកគេគួររង់ចាំ ហើយទទួលការជ្រមុជទឹកនៅពេលក្រោយទេ។—សកម្មភាព ២:៤១; ៩:១៨; ១៦:១៤, ១៥, ៣២, ៣៣
សូមកុំបង្អែបង្អង់ទទួលការជ្រមុជទឹក
៩, ១០. ស្ដីអំពីការជ្រមុជទឹក តើយើងអាចរៀនអ្វីពីសុលនិងបុរសជនជាតិអេចូពីម្នាក់?
៩ សូមអាន សកម្មភាព ៨:៣៥, ៣៦។ បុរសជនជាតិអេចូពីម្នាក់ដែលបានចូលសាសនាយូដា បានធ្វើដំណើរត្រឡប់ទៅផ្ទះវិញក្រោយពីគោរពប្រណិប័តន៍ព្រះនៅវិហារនាក្រុងយេរូសាឡិម។ ទេវតារបស់ព្រះយេហូវ៉ាបានចាត់ភីលីពឲ្យទៅផ្សព្វផ្សាយដល់គាត់ ហើយភីលីពបានបង្រៀនគាត់នូវ«ដំណឹងល្អអំពីលោកយេស៊ូ»។ តើបុរសជនជាតិអេចូពីនោះមានប្រតិកម្មយ៉ាងណា? គាត់បានយល់អំពីសារៈសំខាន់នៃការទទួលស្គាល់ថាលោកយេស៊ូជាលោកម្ចាស់ ហើយគាត់ចង់ធ្វើតាមអ្វីដែលព្រះយេហូវ៉ាតម្រូវឲ្យគ្រិស្ដសាសនិកធ្វើ។ ដូច្នេះ គាត់បានទទួលការជ្រមុជទឹកដោយមិនបង្អែបង្អង់ឡើយ។
១០ គំរូមួយទៀតគឺបុរសជនជាតិយូដាម្នាក់ឈ្មោះសុល។ ប្រជាជាតិយូដាជាប្រជាជាតិមួយដែលបានប្រគល់ខ្លួនជូនព្រះ ប៉ុន្ដែព្រះយេហូវ៉ាលែងទទួលស្គាល់ជនជាតិយូដាជារាស្ដ្ររបស់លោក ដោយសារពួកគេមិនបានស្តាប់បង្គាប់លោក។ សុលបានជឿថាជនជាតិយូដានៅតែបម្រើព្រះតាមរបៀបត្រឹមត្រូវ ដូច្នេះគាត់បានបៀតបៀនគ្រិស្ដសាសនិក។ ប៉ុន្ដែនៅថ្ងៃមួយ លោកយេស៊ូដែលបានត្រូវប្រោសឲ្យរស់ឡើងវិញ ហើយដែលសុលគិតថានៅតែស្លាប់នៅឡើយ បានមានប្រសាសន៍ពីស្ថានសួគ៌ទៅកាន់សុល។ តើសុលមានប្រតិកម្មយ៉ាងណា? គាត់សប្បាយចិត្ដទទួលយកជំនួយពីអាណានាសដែលជាអ្នកកាន់តាមគ្រិស្ដ។ គម្ពីរចែងថា៖ «[សុល]បានក្រោកឡើងហើយទទួលការជ្រមុជទឹក»។ (សកម្មភាព ៩:១៧, ១៨; កាឡាទី ១:១៤) ក្រោយមក គាត់បានត្រូវគេស្គាល់ថាជាសាវ័កប៉ូល។ សូមកត់សម្គាល់ថា ពេលគាត់បានយល់ថាព្រះកំពុងប្រើលោកយេស៊ូដើម្បីធ្វើឲ្យគោលបំណងរបស់លោកបានសម្រេច សុលបានទទួលការជ្រមុជទឹកដោយមិនបង្អែបង្អង់។—សូមអាន សកម្មភាព ២២:១២-១៦
សិស្សគម្ពីរមានចិត្ដកតញ្ញូចំពោះសេចក្ដីពិតដែលពួកគេបានរៀន ហើយចង់ទទួលការជ្រមុជទឹក
១១. (ក) នៅសព្វថ្ងៃនេះ តើអ្វីជំរុញចិត្ដសិស្សគម្ពីរឲ្យទទួលការជ្រមុជទឹក? (ខ) តើយើងមានអារម្មណ៍យ៉ាងណាពេលបុគ្គលណាម្នាក់ទទួលការជ្រមុជទឹក?
១១ នេះគឺស្រដៀងគ្នាដែរចំពោះសិស្សគម្ពីរទាំងចាស់ទាំងក្មេងជាច្រើននាក់នៅសព្វថ្ងៃនេះ។ ពួកគេចង់ប្រគល់ខ្លួនជូនព្រះយេហូវ៉ា ហើយទទួលការជ្រមុជទឹក ដោយសារពួកគេស្រឡាញ់និងមានទំនុកចិត្ដទៅលើអ្វីដែលគម្ពីរចែង។ សុន្ទរកថាសម្រាប់ការជ្រមុជទឹកតែងតែជាអ្វីដ៏ពិសេសនៅឯសន្និបាតនិងមហាសន្និបាត។ សាក្សីព្រះយេហូវ៉ាសប្បាយចិត្ដពេលសិស្សគម្ពីរទទួលយកសេចក្ដីពិត ហើយសម្រេចចិត្ដទទួលការជ្រមុជទឹក។ ឪពុកម្ដាយសប្បាយចិត្ដខ្លាំងណាស់ពេលដែលកូនរបស់ពួកគេសម្រេចចិត្ដធ្វើដូច្នេះ។ ក្នុងអំឡុងឆ្នាំកិច្ចបម្រើ២០១៧ បងប្អូនថ្មីជាង២៨៤.០០០នាក់បានទទួលការជ្រមុជទឹកដើម្បីបង្ហាញថាពួកគេបានប្រគល់ជីវិតរបស់ពួកគេជូនព្រះយេហូវ៉ា។ (សកម្មភាព ១៣:៤៨) ពួកគេបានយល់ថាយ៉ាងច្បាស់ថាការទទួលការជ្រមុជទឹកគឺជាអ្វីដ៏សំខាន់ចាំបាច់ចំពោះគ្រិស្ដសាសនិក។ ប៉ុន្ដែ តើពួកគេត្រូវធ្វើអ្វីខ្លះមុនពួកគេអាចទទួលការជ្រមុជទឹក?
១២. តើសិស្សគម្ពីរត្រូវធ្វើអ្វីខ្លះមុនពួកគេអាចទទួលការជ្រមុជទឹក?
១២ មុនសិស្សគម្ពីរអាចទទួលការជ្រមុជទឹក ពួកគេត្រូវរៀនសេចក្ដីពិតអំពីព្រះ គោលបំណងរបស់លោកសម្រាប់មនុស្សជាតិនិងផែនដី ហើយអ្វីដែលលោកបានធ្វើដើម្បីសង្គ្រោះមនុស្សជាតិ។ (ធីម៉ូថេទី១ ២:៣-៦) បន្ទាប់មក ពួកគេត្រូវមានជំនឿ នេះនឹងជួយពួកគេឲ្យធ្វើតាមច្បាប់របស់ព្រះ ហើយឈប់ធ្វើអ្វីដែលលោកស្អប់។ (សកម្មភាព ៣:១៩) នេះគឺសំខាន់ ពីព្រោះព្រះយេហូវ៉ានឹងមិនទទួលយកការប្រគល់ខ្លួនរបស់បុគ្គលដែលបន្ដធ្វើអ្វីដែលលោកស្អប់ឡើយ។ (កូរិនថូសទី១ ៦:៩, ១០) បន្ថែមពីនេះទៅទៀត អ្នកដែលចង់ប្រគល់ខ្លួនជូនព្រះយេហូវ៉ា ត្រូវចូលរួមកិច្ចប្រជុំក្រុមជំនុំនិងកិច្ចការផ្សព្វផ្សាយដំណឹងល្អជាទៀងទាត់ ហើយបង្រៀនអ្នកឯទៀត។ នេះជាតម្រូវការសម្រាប់បុគ្គលគ្រប់រូបដែលចង់ធ្វើជាអ្នកកាន់តាមគ្រិស្ដ។ (សកម្មភាព ១:៨) ដំបូង សិស្សគម្ពីរត្រូវធ្វើអ្វីៗទាំងអស់នេះ។ បន្ទាប់មក គាត់អាចប្រគល់ខ្លួនជូនព្រះយេហូវ៉ាក្នុងសេចក្ដីអធិដ្ឋានផ្ទាល់ខ្លួនមួយ ហើយទទួលការជ្រមុជទឹក។
ចូរជួយសិស្សគម្ពីរឲ្យមានគោលដៅ
ពេលអ្នកបង្រៀនអ្នកឯទៀត តើអ្នកព្យាយាមរកឱកាសដើម្បីជួយពួកគេឲ្យយល់ថាការជ្រមុជទឹកគឺសំខាន់ចាំបាច់ឬទេ? (សូមមើលវគ្គ១៣)
១៣. ពេលយើងបង្រៀនអ្នកឯទៀត ហេតុអ្វីយើងត្រូវចាំថាពួកគេត្រូវទទួលការជ្រមុជទឹកដើម្បីក្លាយទៅជាគ្រិស្ដសាសនិកពិត?
១៣ ពេលយើងជួយកូនរបស់យើងនិងសិស្សគម្ពីរឯទៀតឲ្យធ្វើអ្វីៗដ៏ចាំបាច់ទាំងនេះ យើងត្រូវចាំថាពួកអ្នកដែលចង់ធ្វើជាអ្នកកាន់តាមពិតរបស់លោកយេស៊ូត្រូវទទួលការជ្រមុជទឹក។ យ៉ាងនេះ នៅពេលសមត្រឹមត្រូវ យើងនឹងមិនខ្លាចប្រាប់ពួកគេអំពីសារៈសំខាន់នៃការប្រគល់ខ្លួនជូនព្រះនិងការទទួលការជ្រមុជទឹកទេ។ យើងចង់ឲ្យកូនរបស់យើងនិងសិស្សគម្ពីរឯទៀតបន្ដរីកចម្រើន ហើយទទួលការជ្រមុជទឹក!
១៤. ហេតុអ្វីយើងមិនបង្ខំអ្នកណាម្នាក់ឲ្យទទួលការជ្រមុជទឹក?
១៤ គ្មានអ្នកណាម្នាក់គួរបង្ខំកូនឬសិស្សគម្ពីរឲ្យទទួលការជ្រមុជទឹកឡើយ។ ព្រះយេហូវ៉ាមិនបង្ខំអ្នកណាម្នាក់ឲ្យបម្រើលោកទេ។ (យ៉ូហានទី១ ៤:៨) ពេលយើងបង្រៀនអ្នកឯទៀត យើងត្រូវជួយពួកគេឲ្យយល់ថាគឺសំខាន់ណាស់ដែលពួកគេបណ្ដុះឲ្យមានចំណងមិត្ដភាពជាមួយនឹងព្រះយេហូវ៉ា។ ក្រោយមក បើសិស្សគម្ពីរពិតជាមានចិត្ដកតញ្ញូចំពោះការស្គាល់សេចក្ដីពិតអំពីព្រះ ហើយពិតជាចង់ធ្វើអ្វីៗទាំងអស់ដែលគ្រិស្ដសាសនិកពិតគួរធ្វើ នោះគាត់នឹងចង់ទទួលការជ្រមុជទឹក។—កូរិនថូសទី២ ៥:១៤, ១៥
១៥, ១៦. (ក) តើមានការកំណត់អាយុដើម្បីទទួលការជ្រមុជទឹកឬទេ? សូមពន្យល់។ (ខ) ហេតុអ្វីសិស្សគម្ពីរត្រូវទទួលការជ្រមុជទឹកជាសាក្សីព្រះយេហូវ៉ាម្នាក់ ទោះជាគាត់បានទទួលការជ្រមុជទឹករួចហើយក្នុងសាសនាផ្សេងក្ដី?
១៥ គ្មានការកំណត់អាយុដើម្បីទទួលការជ្រមុជទឹកទេ។ បុគ្គលគ្រប់រូបគឺខុសៗគ្នា ហើយសិស្សគម្ពីរខ្លះរីកចម្រើនលឿនជាងសិស្សគម្ពីរឯទៀត។ មនុស្សជាច្រើនទទួលការជ្រមុជទឹកពេលដែលពួកគេនៅក្មេង ហើយបន្ដរក្សាភាពស្មោះត្រង់ចំពោះព្រះយេហូវ៉ារហូតដល់ពួកគេចាស់។ អ្នកឯទៀតមានវ័យចាស់រួចទៅហើយពេលដែលពួកគេរៀនសេចក្ដីពិតពីគម្ពីរ ហើយទទួលការជ្រមុជទឹក។ អ្នកខ្លះថែមទាំងមានអាយុជាង១០០ឆ្នាំទៀតផង!
១៦ ស្ដ្រីម្នាក់ដែលបានសិក្សាគម្ពីរ បានទទួលការជ្រមុជទឹករួចហើយនៅសាសនាមួយចំនួន។ ហេតុនេះហើយ គាត់បានសួរអ្នកបង្រៀនគម្ពីរថាតើពិតជាចាំបាច់ឲ្យគាត់ទទួលការជ្រមុជទឹកម្ដងទៀតឬទេ? អ្នកបង្រៀនគម្ពីរបានបង្ហាញគាត់នូវខគម្ពីរមួយចំនួនដែលមានចម្លើយចំពោះសំណួររបស់គាត់។ ពេលដែលស្ដ្រីនោះបានយល់អំពីតម្រូវការក្នុងគម្ពីរអំពីរឿងនេះ គាត់បានទទួលការជ្រមុជទឹក ទោះជាគាត់មានអាយុជិត៨០ឆ្នាំក្ដី។ តើយើងរៀនអ្វីពីគំរូនេះ? ព្រះយេហូវ៉ានឹងព្រមទទួលការជ្រមុជទឹករបស់យើង លុះត្រាតែយើងស្គាល់សេចក្ដីពិតអំពីបំណងប្រាថ្នារបស់លោក។ ដូច្នេះ ទោះជាយើងបានទទួលការជ្រមុជទឹកក្នុងសាសនាផ្សេងទៀតក៏ដោយ យើងនៅតែត្រូវទទួលការជ្រមុជទឹកជាសាក្សីព្រះយេហូវ៉ាម្នាក់។—សូមអាន សកម្មភាព ១៩:៣-៥
១៧. តើបុគ្គលម្នាក់គួរគិតអំពីអ្វីនៅថ្ងៃដែលគាត់ទទួលការជ្រមុជទឹក?
១៧ ថ្ងៃដែលបុគ្គលម្នាក់ទទួលការជ្រមុជទឹកគឺជាថ្ងៃដ៏សប្បាយរីករាយណាស់។ នៅពេលនោះក៏សំខាន់ដែលគាត់គិតឲ្យបានដិតដល់អំពីការប្រគល់ខ្លួនជូនព្រះនិងការជ្រមុជទឹករួមបញ្ចូលអ្វីខ្លះ។ ការធ្វើអ្វីៗទាំងអស់ដែលគ្រិស្ដសាសនិកពិតត្រូវធ្វើ គឺតម្រូវឲ្យខំប្រឹងយ៉ាងខ្លាំង។ អ្នកកាន់តាមលោកយេស៊ូត្រូវ«រស់ដើម្បីលោកដែលបានស្លាប់ ហើយដែលបានត្រូវប្រោសឲ្យរស់ឡើងវិញ មិនមែនរស់ដើម្បីខ្លួនឯងទៀតទេ»។—កូរិនថូសទី២ ៥:១៥; ម៉ាថាយ ១៦:២៤
១៨. តើយើងនឹងពិចារណាសំណួរអ្វីខ្លះនៅអត្ថបទបន្ទាប់?
១៨ ដូចដែលយើងបានរៀននៅអត្ថបទនេះ ការសម្រេចចិត្ដធ្វើជាគ្រិស្ដសាសនិកពិតម្នាក់គឺជាអ្វីដ៏សំខាន់ណាស់។ នេះគឺជាមូលហេតុដែលម្ដាយរបស់ម៉ារៀបានសួរខ្លួនគាត់នូវសំណួរដូចដែលបានរៀបរាប់នៅដើមអត្ថបទ។ បើអ្នកជាឪពុកម្ដាយ អ្នកប្រហែលជាបានសួរខ្លួនអ្នកថា ‹តើកូនរបស់ខ្ញុំពិតជាមានអាយុនិងគុណសម្បត្ដិគ្រប់គ្រាន់ដើម្បីទទួលការជ្រមុជទឹកឬទេ? តើកូនរបស់ខ្ញុំស្គាល់ព្រះយេហូវ៉ាគ្រប់គ្រាន់ដើម្បីប្រគល់ខ្លួនជូនលោកឬទេ? តើកូនរបស់ខ្ញុំគួរទទួលការអប់រំខ្ពស់និងមានការងារល្អមុននឹងទទួលការជ្រមុជទឹកឬទេ? ចុះយ៉ាងណាបើកូនរបស់ខ្ញុំប្រព្រឹត្ដអំពើខុសឆ្គងធ្ងន់ធ្ងរក្រោយពីទទួលការជ្រមុជទឹក?›។ យើងនឹងពិចារណាសំណួរទាំងនេះនៅអត្ថបទបន្ទាប់ ហើយយើងនឹងរៀនអំពីរបៀបដែលឪពុកម្ដាយអាចមានទស្សនៈត្រឹមត្រូវចំពោះការជ្រមុជទឹក។
