អត្ថបទសិក្សា ១១
តើអ្នកត្រៀមខ្លួនដើម្បីទទួលការជ្រមុជទឹកហើយឬនៅ?
«អ្វីដែលកំពុងសង្គ្រោះអ្នករាល់គ្នាឥឡូវនេះ . . . គឺការជ្រមុជទឹក»។—១ពេ. ៣:២១
ចម្រៀងលេខ២៨ ការចងមិត្តភាពជាមួយនឹងព្រះយេហូវ៉ា
សេចក្ដីសង្ខេប *
១. តើបុគ្គលម្នាក់គួរធ្វើអ្វីមុនចាប់ផ្ដើមសង់ផ្ទះ?
សូមស្រមៃគិតថាបុគ្គលម្នាក់សម្រេចចិត្តសង់ផ្ទះមួយ។ គាត់ដឹងថាគាត់ចង់សង់ផ្ទះប្រភេទណា។ តើគាត់គួរចេញទៅទិញសម្ភារភ្លាមៗ ហើយចាប់ផ្ដើមសង់ឬទេ? មិនមែនទេ។ មុនគាត់ចាប់ផ្ដើមសង់ គាត់ត្រូវគិតអំពីតម្លៃសង់ផ្ទះនោះ។ ហេតុអ្វី? ពីព្រោះគាត់ត្រូវដឹងថាគាត់មានលុយគ្រប់គ្រាន់ដើម្បីសង់ផ្ទះនោះឲ្យបានរួចរាល់ឬយ៉ាងណា។ បើគាត់គិតគូរអំពីការចំណាយយ៉ាងដិតដល់ទុកជាមុន នោះគាត់ទំនងជាអាចបង្ហើយការសង់ផ្ទះថ្មីរបស់គាត់ដោយជោគជ័យ។
២. យោងទៅតាមលូកា ១៤:២៧-៣០ តើអ្នកគួរគិតយ៉ាងហ្មត់ចត់អំពីអ្វីមុនទទួលការជ្រមុជទឹក?
២ តើសេចក្ដីស្រឡាញ់និងចិត្តកតញ្ញូរបស់អ្នកចំពោះព្រះយេហូវ៉ាជំរុញអ្នកឲ្យគិតអំពីការទទួលការជ្រមុជទឹកឬទេ? បើដូច្នេះ អ្នកត្រូវធ្វើការសម្រេចចិត្តស្រដៀងនឹងបុរសដែលចង់សង់ផ្ទះនោះ។ ហេតុអ្វីយើងអាចនិយាយដូច្នេះ? សូមពិចារណាអំពីប្រសាសន៍របស់លោកយេស៊ូនៅលូកា ១៤:២៧-៣០។ (សូមអាន) លោកយេស៊ូកំពុងរៀបរាប់អំពីអត្ថន័យនៃការធ្វើជាអ្នកកាន់តាមលោក។ បើយើងចង់ធ្វើជាអ្នកកាន់តាមលោក យើងត្រូវសុខចិត្តស៊ូទ្រាំនឹងការពិបាកខ្លះ ហើយលះបង់អ្វីមួយចំនួន។ (លូក ៩:២៣-២៦; ១២:៥១-៥៣) ដូច្នេះ មុនអ្នកទទួលការជ្រមុជទឹក អ្នកត្រូវគិតយ៉ាងហ្មត់ចត់អំពីអ្វីដែលអ្នកនឹងជួបប្រទះ។ យ៉ាងនេះ អ្នកនឹងត្រៀមខ្លួនបានល្អជាងដើម្បីបន្តបម្រើព្រះយ៉ាងស្មោះត្រង់ជាគ្រិស្តសាសនិកដែលបានទទួលការជ្រមុជទឹករួចហើយ។
៣. តើយើងនឹងពិចារណាអ្វីក្នុងអត្ថបទនេះ?
៣ តើការជ្រមុជទឹកដើម្បីទៅជាអ្នកកាន់តាមគ្រិស្តសាកសមនឹងការលះបង់និងការពិបាកដែលអ្នកត្រូវជួបប្រទះឬទេ? ពិតជាសាកសមមែន! ការជ្រមុជទឹកបើកឱកាសឲ្យអ្នកទទួលពរច្រើនឥតគណនានៅឥឡូវនេះនិងនៅថ្ងៃអនាគត។ សូមយើងពិចារណាសំណួរសំខាន់ខ្លះអំពីការជ្រមុជទឹក។ ការធ្វើដូច្នេះនឹងជួយអ្នកឲ្យឆ្លើយសំណួរថា «តើខ្ញុំមានគុណសម្បត្ដិគ្រប់គ្រាន់ដើម្បីទទួលការជ្រមុជទឹកឬទេ?»។
អ្វីដែលអ្នកត្រូវដឹងអំពីការប្រគល់ខ្លួនជូនព្រះនិងការជ្រមុជទឹក
៤. (ក) តើអ្វីជាការប្រគល់ខ្លួនជូនព្រះ? (ខ) តើការ«ប្រគល់ខ្លួនឲ្យព្រះ»ដែលបានត្រូវរៀបរាប់នៅម៉ាថាយ ១៦:២៤ មានន័យយ៉ាងណា?
៤ តើអ្វីជាការប្រគល់ខ្លួនជូនព្រះ? មុនអ្នកអាចទទួលការជ្រមុជទឹក អ្នកត្រូវប្រគល់ខ្លួនជូនព្រះ។ ពេលអ្នកប្រគល់ខ្លួនជូនព្រះយេហូវ៉ា អ្នកអធិដ្ឋានទៅលោកយ៉ាងអស់ពីចិត្ត ហើយប្រាប់លោកថាអ្នកនឹងបម្រើលោកអស់មួយជីវិតរបស់អ្នក។ ពេលអ្នកប្រគល់ខ្លួនឲ្យព្រះ អ្នកលែងធ្វើតាមចិត្តខ្លួន ហើយនេះរួមបញ្ចូលការតាំងចិត្តមិនធ្វើតាមបំណងប្រាថ្នានិងគោលដៅផ្ទាល់ខ្លួន ហើយក៏មិនគិតពីជីវិតស្រណុកសុខស្រួលរបស់ខ្លួនដែរ។ (សូមអាន ម៉ាថាយ ១៦:២៤) យ៉ាងនេះ អ្នកជារបស់ព្រះយេហូវ៉ា ហើយនេះជាឯកសិទ្ធិដ៏អស្ចារ្យ។ (រ៉ូម ១៤:៨) អ្នកប្រាប់លោកថាចាប់ពីពេលនេះតទៅ អ្នកនឹងផ្ដោតអារម្មណ៍ទៅលើការបម្រើលោក ហើយមិនបំពេញចិត្តខ្លួនឯងឡើយ។ ការប្រគល់ខ្លួនជូនព្រះគឺជាសម្បថមួយ។ សម្បថនោះគឺជាសេចក្ដីសន្យាដ៏សំខាន់មួយដែលអ្នកធ្វើចំពោះព្រះ។ ព្រះយេហូវ៉ាមិនបង្ខំយើងឲ្យធ្វើសម្បថបែបនេះទេ។ ប៉ុន្តែពេលយើងធ្វើ លោកតម្រូវឲ្យយើងធ្វើតាមពាក្យសម្បថនោះ។—ទំនុក ១១៦:១២, ១៤
៥. តើការប្រគល់ខ្លួនជូនព្រះជាប់ទាក់ទងយ៉ាងណានឹងការជ្រមុជទឹក?
៥ តើការប្រគល់ខ្លួនជូនព្រះជាប់ទាក់ទងយ៉ាងណានឹងការជ្រមុជទឹក? ការប្រគល់ខ្លួនជូនព្រះគឺជាអ្វីដែលអ្នកធ្វើម្នាក់ឯង គឺរវាងអ្នកនិងព្រះយេហូវ៉ា។ រីឯការជ្រមុជទឹកគឺធ្វើឡើងជាសាធារណៈនៅមុខអ្នកឯទៀត ជាធម្មតានៅសន្និបាត ឬមហាសន្និបាត។ ពេលអ្នកទទួលការជ្រមុជទឹក អ្នកបង្ហាញអ្នកឯទៀតថាអ្នកបានប្រគល់ខ្លួនជូនព្រះយេហូវ៉ារួចហើយ។ * ម្ល៉ោះហើយ កាលដែលអ្នកទទួលការជ្រមុជទឹក នោះបង្ហាញដល់អ្នកឯទៀតថាអ្នកស្រឡាញ់ព្រះយេហូវ៉ាអស់ពីដួងចិត្ត អស់ពីព្រលឹង អស់ពីសមត្ថភាពរិះគិត និងអស់ពីកម្លាំងកាយរបស់អ្នក ហើយថាអ្នកតាំងចិត្តបម្រើលោកជារៀងរហូត។—ម៉ាក ១២:៣០
៦-៧. យោងទៅតាមពេត្រុសទី១ ៣:១៨-២២ តើមូលហេតុពីរយ៉ាងអ្វី ដែលការជ្រមុជទឹកគឺសំខាន់ចាំបាច់?
៦ តើពិតជាចាំបាច់ឲ្យទទួលការជ្រមុជទឹកឬទេ? សូមពិចារណាអ្វីដែលបានត្រូវចែងនៅពេត្រុសទី១ ៣:១៨-២២។ (សូមអាន) ដូចទូកធំគឺជាភ័ស្តុតាងជាក់ស្តែងដែលបង្ហាញថាណូអេមានជំនឿ នោះការជ្រមុជទឹករបស់អ្នកក៏ជាភ័ស្តុតាងដ៏ច្បាស់ថាអ្នកបានប្រគល់ខ្លួនជូនព្រះយេហូវ៉ា។ ប៉ុន្តែតើការជ្រមុជទឹកពិតជាចាំបាច់ឬទេ? ពិតជាចាំបាច់មែន។ ពេត្រុសបានពន្យល់អំពីមូលហេតុពីរយ៉ាង។ ទី១ គឺ«សង្គ្រោះអ្នក»។ ការជ្រមុជទឹកអាចសង្គ្រោះយើងបើយើងបានបង្ហាញដោយការប្រព្រឹត្តរបស់យើងថាយើងមានជំនឿលើលោកយេស៊ូ ព្រមទាំងជឿថាលោកបានស្លាប់ដើម្បីយើង បានត្រូវប្រោសឲ្យរស់ឡើងវិញទៅស្ថានសួគ៌ ហើយឥឡូវកំពុង«នៅខាងស្ដាំព្រះ»។
៧ ទី២ ការជ្រមុជទឹកនាំឲ្យមាន«សមត្ថភាពវិនិច្ឆ័យដែលមិនផ្ដន្ទាទោស»។ ពេលយើងប្រគល់ខ្លួនជូនព្រះនិងទទួលការជ្រមុជទឹក យើងចាប់ផ្ដើមមានចំណងមិត្តភាពពិសេសជាមួយនឹងលោក។ ដោយសារយើងបានប្រែចិត្តយ៉ាងស្មោះ និងមានជំនឿលើថ្លៃលោះ នោះព្រះអភ័យទោសចំពោះអំពើខុសឆ្គងរបស់យើង។ យ៉ាងនេះ យើងអាចមានសមត្ថភាពវិនិច្ឆ័យដែលមិនផ្ដន្ទាទោសនៅចំពោះលោក។
៨. តើអ្វីគួរជាមូលហេតុដែលអ្នកសម្រេចចិត្តទទួលការជ្រមុជទឹក?
៨ តើអ្វីគួរជាមូលហេតុដែលអ្នកសម្រេចចិត្តទទួលការជ្រមុជទឹក? ដោយសារអ្នកសិក្សាគម្ពីរយ៉ាងយកចិត្តទុកដាក់ នោះអ្នកបានរៀនច្រើនអំពីព្រះយេហូវ៉ា ពោលគឺគុណសម្បត្ដិរបស់លោកនិងរបៀបដែលលោកធ្វើអ្វីផ្សេងៗ។ អ្វីដែលអ្នកបានរៀនអំពីលោកធ្វើឲ្យអ្នកមានអារម្មណ៍កក់ក្ដៅ ហើយជំរុញចិត្តអ្នកឲ្យស្រឡាញ់លោកជាខ្លាំង។ សេចក្ដីស្រឡាញ់របស់អ្នកចំពោះព្រះយេហូវ៉ាត្រូវតែជាមូលហេតុចម្បងដែលអ្នកសម្រេចចិត្តទទួលការជ្រមុជទឹក។
៩. ដូចបានចែងនៅម៉ាថាយ ២៨:១៩, ២០ តើការជ្រមុជទឹកក្នុងនាមបិតាដែលស្ថិតនៅស្ថានសួគ៌ ក្នុងនាមបុត្ររបស់លោក និងក្នុងនាមសកម្មពលបរិសុទ្ធរបស់លោកមានន័យយ៉ាងណា?
៩ មូលហេតុមួយទៀតដែលអ្នកសម្រេចចិត្តទទួលការជ្រមុជទឹកគឺអ្នកបានរៀននិងជឿអ្វីដែលគម្ពីរបង្រៀន។ សូមគិតអំពីអ្វីដែលលោកយេស៊ូបានមានប្រសាសន៍ ពេលលោកបានឲ្យបង្គាប់អំពីការបង្រៀនអ្នកឯទៀតឲ្យក្លាយទៅជាអ្នកកាន់តាមលោក។ (សូមអាន ម៉ាថាយ ២៨:១៩, ២០) លោកយេស៊ូបានមានប្រសាសន៍ថា ពួកអ្នកដែលទទួលការជ្រមុជទឹកត្រូវធ្វើដូច្នេះ«ក្នុងនាមបិតាដែលស្ថិតនៅស្ថានសួគ៌ ក្នុងនាមបុត្ររបស់លោក និងក្នុងនាមសកម្មពលបរិសុទ្ធរបស់លោក»។ តើនេះមានន័យយ៉ាងណា? អ្នកត្រូវជឿអស់ពីចិត្តនូវសេចក្ដីពិតក្នុងគម្ពីរអំពីព្រះយេហូវ៉ា លោកយេស៊ូដែលជាបុត្រលោក និងសកម្មពលបរិសុទ្ធ។ សេចក្ដីបង្រៀនទាំងនេះមានឫទ្ធានុភាព ហើយអាចមានឥទ្ធិពលយ៉ាងខ្លាំងលើចិត្តរបស់អ្នក។ (ហេ. ៤:១២) សូមយើងពិចារណាឡើងវិញអំពីសេចក្ដីបង្រៀនខ្លះទាំងនោះ។
១០-១១. តើអ្នកបានរៀននិងទទួលយកសេចក្ដីពិតអ្វីអំពីបិតានៅស្ថានសួគ៌?
១០ សូមគិតអំពីកាលដែលអ្នកបានរៀនសេចក្ដីពិតអំពីបិតានៅស្ថានសួគ៌ដូចជា លោកមាន«នាមជាយេហូវ៉ា» លោកជា«ព្រះដ៏ខ្ពស់បំផុតលើផែនដីទាំងមូល» ហើយថាមានតែលោកប៉ុណ្ណោះដែលជា«ព្រះដ៏ពិត»។ (ទំនុក. ៨៣:១៨; យេ. ១០:១០) លោកគឺជាអ្នកបង្កើតយើង ហើយ«សេចក្ដីសង្គ្រោះ នោះស្រេចនៅព្រះយេហូវ៉ា»។ (ទំនុក. ៣:៨; ៣៦:៩) លោកបានរៀបចំសង្គ្រោះយើងពីភាពខុសឆ្គងនិងសេចក្ដីស្លាប់ ហើយផ្ដល់ឲ្យយើងនូវសេចក្ដីសង្ឃឹមរស់ជារៀងរហូត។ (យ៉ូន. ១៧:៣) ការដែលអ្នកបានប្រគល់ខ្លួនជូនព្រះនិងទទួលការជ្រមុជទឹក នោះបង្ហាញថាអ្នកជាសាក្សីរបស់ព្រះយេហូវ៉ា។ (អេ. ៤៣:១០-១២) យ៉ាងនេះ អ្នកនឹងចូលក្នុងក្រុមគ្រួសារដែលជាអ្នកគោរពប្រណិប័តន៍ព្រះនៅទូទាំងពិភពលោក។ ពួកគេទាំងអស់គ្នាមានមោទនភាពក្នុងការហៅដោយនាមរបស់ព្រះ ហើយប្រកាសផ្សាយអំពីនាមលោកដល់អ្នកឯទៀត។—ទំនុក. ៨៦:១២
១១ គឺជាឯកសិទ្ធិមែនដែលយើងយល់អ្វីដែលគម្ពីរបង្រៀនអំពីបិតានៅស្ថានសួគ៌! ពេលអ្នកជឿសេចក្ដីបង្រៀនដ៏ថ្លៃថ្លាទាំងនេះ ចិត្តរបស់អ្នកជំរុញអ្នកឲ្យប្រគល់ខ្លួនជូនព្រះយេហូវ៉ា ហើយទទួលការជ្រមុជទឹក។
១២-១៣. តើអ្នកបានរៀននិងទទួលយកសេចក្ដីពិតអ្វីអំពីបុត្រព្រះ?
១២ តើអ្នកមានប្រតិកម្មយ៉ាងណាពេលអ្នកបានរៀនសេចក្ដីពិតអំពីបុត្រព្រះ? ជាឧទាហរណ៍ លោកគឺជាបុគ្គលសំខាន់បំផុតទី២ក្នុងសកលលោក។ លោកជាអ្នកលោះយើង។ លោកសុខចិត្តលះបង់ជីវិតរបស់លោកដើម្បីយើង។ ពេលយើងបង្ហាញដោយការប្រព្រឹត្តរបស់យើងថាយើងមានជំនឿលើថ្លៃលោះ នោះយើងអាចទទួលការអភ័យទោសចំពោះការខុសឆ្គងរបស់យើង បណ្ដុះចំណងមិត្តភាពជាមួយនឹងព្រះ ហើយទទួលជីវិតដែលគ្មានទីបញ្ចប់។ (យ៉ូន. ៣:១៦) លោកយេស៊ូគឺជាសម្ដេចសង្ឃរបស់យើង។ លោកចង់ជួយយើងឲ្យទទួលប្រយោជន៍ពីថ្លៃលោះ ហើយមានចំណងមិត្តភាពជិតស្និទ្ធជាមួយនឹងព្រះ។ (ហេ. ៤:១៥; ៧:២៤, ២៥) ដោយសារលោកយេស៊ូជាស្តេចនៃរាជាណាចក្រព្រះ នោះព្រះយេហូវ៉ានឹងប្រើលោកដើម្បីធ្វើឲ្យនាមព្រះបានបរិសុទ្ធ បំបាត់ចោលអំពើអាក្រក់ ហើយនាំមកនូវពរជារៀងរហូតក្នុងសួនឧទ្យានដែលនឹងមកដល់។ (ម៉ាថ. ៦:៩, ១០; បប. ១១:១៥) លោកយេស៊ូគឺជាគំរូសម្រាប់យើង។ (១ពេ. ២:២១) លោកបានទុកគំរូឲ្យយើងដោយប្រើជីវិតរបស់លោកដើម្បីធ្វើតាមបំណងប្រាថ្នារបស់ព្រះ។—យ៉ូន. ៤:៣៤
១៣ ពេលអ្នកទទួលយកអ្វីដែលគម្ពីរបង្រៀនអំពីលោកយេស៊ូ នោះអ្នកចាប់ផ្ដើមស្រឡាញ់បុត្រស្ងួនភ្ងារបស់ព្រះ។ សេចក្ដីស្រឡាញ់នោះជំរុញចិត្តអ្នកឲ្យប្រើជីវិតដើម្បីធ្វើតាមបំណងប្រាថ្នារបស់ព្រះ ដូចលោកយេស៊ូបានធ្វើ។ ជាលទ្ធផល ចិត្តរបស់អ្នកជំរុញអ្នកឲ្យប្រគល់ខ្លួនជូនព្រះយេហូវ៉ានិងទទួលការជ្រមុជទឹក។
១៤-១៥. តើអ្នកបានរៀននិងទទួលយកសេចក្ដីពិតអ្វីអំពីសកម្មពលបរិសុទ្ធ?
១៤ តើអ្នកបានគិតយ៉ាងណាពេលអ្នករៀនសេចក្ដីពិតអំពីសកម្មពលបរិសុទ្ធ? ជាឧទាហរណ៍ សកម្មពលមិនមែនជាបុគ្គលទេ តែជាឫទ្ធានុភាពរបស់ព្រះ។ ព្រះយេហូវ៉ាបានប្រើសកម្មពលបរិសុទ្ធដើម្បីដឹកនាំមនុស្សឲ្យសរសេរគម្ពីរ ហើយក៏ដើម្បីជួយយើងឲ្យយល់និងធ្វើតាមអ្វីដែលយើងអានក្នុងគម្ពីរដែរ។ (យ៉ូន. ១៤:២៦; ២ពេ. ១:២១) តាមរយៈសកម្មពលរបស់ព្រះយេហូវ៉ា លោកផ្ដល់ឲ្យយើងនូវ«ឫទ្ធានុភាពដែលលើសពីធម្មតា»។ (២កូ. ៤:៧) សកម្មពលផ្ដល់កម្លាំងឲ្យយើងដើម្បីផ្សព្វផ្សាយដំណឹងល្អ តយុទ្ធនឹងការល្បួង យកឈ្នះការធ្លាក់ទឹកចិត្ត ហើយស៊ូទ្រាំនឹងទុក្ខលំបាក។ សកម្មពលជួយយើងឲ្យបង្ហាញគុណសម្បត្ដិដ៏ប្រសើរដែលជាលក្ខណៈនៃ«ផលដែលបង្កើតដោយសកម្មពលរបស់ព្រះ»។ (កាឡ. ៥:២២) ព្រះផ្ដល់សកម្មពលរបស់លោកដោយចិត្តទូលាយដល់ពួកអ្នកដែលទុកចិត្តលោក និងដែលសុំពីលោកដោយចិត្តស្មោះ។—លូក. ១១:១៣
១៥ ការដឹងថាអ្នកគោរពប្រណិប័តន៍ព្រះយេហូវ៉ាអាចពឹងផ្អែកលើសកម្មពលបរិសុទ្ធឲ្យជួយពួកគេក្នុងការបម្រើព្រះ គឺពិតជាសម្រាលទុក្ខមែន! ពេលអ្នកទទួលយកសេចក្ដីពិតដែលអ្នកបានរៀនអំពីសកម្មពលបរិសុទ្ធ នោះនឹងជំរុញចិត្តអ្នកឲ្យប្រគល់ខ្លួនជូនព្រះ ហើយទទួលការជ្រមុជទឹក។
១៦. មកដល់ត្រឹមនេះ តើយើងបានរៀនអ្វីខ្លះ?
១៦ ការសម្រេចចិត្តប្រគល់ខ្លួនជូនព្រះនិងទទួលការជ្រមុជទឹកគឺសំខាន់ណាស់។ ដូចដែលយើងបានរៀនហើយ អ្នកត្រូវសុខចិត្តស៊ូទ្រាំនឹងការពិបាកខ្លះ ព្រមទាំងធ្វើការលះបង់មួយចំនួន។ ក៏ប៉ុន្តែ ពរដែលអ្នកនឹងទទួលគឺច្រើនជាងឆ្ងាយណាស់ពីអ្វីដែលអ្នកលះបង់។ ការទទួលការជ្រមុជទឹកអាចសង្គ្រោះអ្នក ហើយនាំឲ្យអ្នកមានសមត្ថភាពវិនិច្ឆ័យដែលមិនផ្ដន្ទាទោសនៅចំពោះព្រះ។ មូលហេតុសំខាន់ចម្បងដែលអ្នកសម្រេចចិត្តទទួលការជ្រមុជទឹក ត្រូវផុសចេញពីសេចក្ដីស្រឡាញ់ដែលអ្នកមានចំពោះព្រះយេហូវ៉ា។ អ្នកក៏ត្រូវជឿអស់ពីចិត្តនូវសេចក្ដីពិតដែលអ្នកបានរៀនអំពីបិតានៅស្ថានសួគ៌ បុត្ររបស់លោក និងសកម្មពលបរិសុទ្ធ។ ក្រោយពីពិចារណាអំពីអ្វីដែលយើងបានរៀនមកដល់ត្រឹមនេះ តើអ្នកនឹងឆ្លើយយ៉ាងណាចំពោះសំណួរថា «តើខ្ញុំមានគុណសម្បត្ដិគ្រប់គ្រាន់ដើម្បីទទួលការជ្រមុជទឹកឬទេ?»។
អ្វីដែលអ្នកត្រូវធ្វើមុនទទួលការជ្រមុជទឹក
១៧. តើបុគ្គលម្នាក់ៗត្រូវធ្វើអ្វីខ្លះមុនគាត់ទទួលការជ្រមុជទឹក?
១៧ បើអ្នកមានអារម្មណ៍ថាអ្នកមានគុណសម្បត្ដិគ្រប់គ្រាន់ដើម្បីទទួលការជ្រមុជទឹក នោះអ្នកទំនងជាបានធ្វើអ្វីជាច្រើនរួចហើយដើម្បីមានចំណងមិត្តភាពល្អជាមួយនឹងព្រះយេហូវ៉ា។ * ដោយសារអ្នកបានសិក្សាគម្ពីរជាទៀងទាត់ អ្នកស្គាល់ច្រើនអំពីព្រះយេហូវ៉ានិងលោកយេស៊ូ។ អ្នកចាប់ផ្ដើមមានជំនឿ។ (ហេ. ១១:៦) អ្នកទុកចិត្តទាំងស្រុងទៅលើសេចក្ដីសន្យារបស់ព្រះយេហូវ៉ាដែលមានក្នុងគម្ពីរ ហើយអ្នកជឿជាក់ថាជំនឿរបស់អ្នកទៅលើគ្រឿងបូជារបស់លោកយេស៊ូអាចសង្គ្រោះអ្នកពីភាពខុសឆ្គងនិងសេចក្ដីស្លាប់។ អ្នកបានប្រែចិត្តពីការខុសឆ្គងរបស់អ្នក គឺអ្នកមានអារម្មណ៍សោកស្ដាយជាខ្លាំងចំពោះកំហុសដែលអ្នកបានធ្វើ ហើយអ្នកបានសុំព្រះយេហូវ៉ាអភ័យទោសឲ្យអ្នក។ អ្នកបានបែរចេញពីផ្លូវជីវិតចាស់របស់អ្នក ពោលគឺអ្នកបានលះចោលទាំងស្រុងនូវគន្លងជីវិតអាក្រក់របស់អ្នក ហើយបានចាប់ផ្ដើមមានរបៀបរស់នៅដែលធ្វើឲ្យព្រះពេញចិត្ត។ (សកម្ម. ៣:១៩) អ្នកមានចិត្តពុះកញ្ជ្រោលចង់ប្រាប់អ្នកឯទៀតអំពីជំនឿរបស់អ្នក។ អ្នកមានគុណសម្បត្ដិគ្រប់គ្រាន់ដើម្បីក្លាយទៅជាអ្នកផ្សាយដែលមិនទាន់ទទួលការជ្រមុជទឹក ហើយបានចាប់ផ្ដើមផ្សព្វផ្សាយជាមួយនឹងក្រុមជំនុំ។ (ម៉ាថ. ២៤:១៤) ព្រះយេហូវ៉ាមានមោទនភាពចំពោះអ្នកដោយសារអ្នកបានធ្វើតាមអ្វីដ៏សំខាន់ចាំបាច់ទាំងនេះ។ អ្នកបានធ្វើឲ្យលោកមានចិត្តរីករាយក្រៃលែង។—សុភ. ២៧:១១
១៨. តើអ្នកត្រូវធ្វើអ្វីទៀតមុនអ្នកអាចទទួលការជ្រមុជទឹក?
១៨ មុនអ្នកអាចទទួលការជ្រមុជទឹក មានអ្វីមួយចំនួនទៀតដែលអ្នកត្រូវធ្វើ។ ដូចដែលយើងបានរៀននៅដើមអត្ថបទនេះ អ្នកត្រូវប្រគល់ខ្លួនជូនព្រះ។ សូមអធិដ្ឋានអស់ពីចិត្តទៅលោកពេលអ្នកនៅម្នាក់ឯង ហើយសន្យានឹងលោកថាអ្នកនឹងប្រើជីវិតរបស់អ្នកដើម្បីធ្វើតាមបំណងប្រាថ្នារបស់លោក។ (១ពេ. ៤:២) រួចមក សូមប្រាប់អ្នកចាត់ចែងកិច្ចការពួកអ្នកចាស់ទុំឲ្យដឹងថាអ្នកចង់ទទួលការជ្រមុជទឹក។ គាត់នឹងសុំអ្នកចាស់ទុំខ្លះឲ្យជួបអ្នក។ សូមកុំភ័យព្រួយអំពីការជួបពួកគេឡើយ ពីព្រោះបងប្រុសជាទីស្រឡាញ់ទាំងនេះស្គាល់អ្នករួចហើយ និងស្រឡាញ់អ្នក។ ពួកគេនឹងពិចារណាជាមួយនឹងអ្នកអំពីសេចក្ដីបង្រៀនបឋមក្នុងគម្ពីរដែលអ្នកបានរៀន។ ពួកគេចង់ធ្វើឲ្យប្រាកដថាអ្នកយល់សេចក្ដីបង្រៀនទាំងនោះ ហើយថាអ្នកយល់អំពីសារៈសំខាន់នៃការប្រគល់ខ្លួនជូនព្រះនិងការទទួលការជ្រមុជទឹក។ បើពួកគេយល់ស្របថាអ្នកមានគុណសម្បត្ដិគ្រប់គ្រាន់ ពួកគេនឹងប្រាប់អ្នកថាអ្នកអាចទទួលការជ្រមុជទឹកនៅសន្និបាតឬមហាសន្និបាតដែលនឹងមកដល់។
អ្វីដែលអ្នកត្រូវធ្វើក្រោយពីអ្នកទទួលការជ្រមុជទឹក
១៩-២០. តើអ្នកនឹងត្រូវធ្វើអ្វីខ្លះក្រោយពីអ្នកទទួលការជ្រមុជទឹក ហើយតើអ្នកអាចធ្វើដូច្នេះយ៉ាងដូចម្ដេច?
១៩ ក្រោយពីអ្នកទទួលការជ្រមុជទឹក តើអ្នកនឹងត្រូវធ្វើអ្វី? * សូមចាំថាការប្រគល់ខ្លួនជូនព្រះយេហូវ៉ាគឺជាពាក្យសម្បថមួយ ហើយថាលោកតម្រូវឲ្យអ្នកធ្វើតាមពាក្យសម្បថនោះ។ ដូច្នេះ ក្រោយពីអ្នកបានទទួលការជ្រមុជទឹក អ្នកត្រូវធ្វើតាមសេចក្ដីសន្យាដែលអ្នកបានធ្វើពេលអ្នកបានប្រគល់ខ្លួនជូនព្រះ។ តើអ្នកអាចធ្វើដូច្នេះយ៉ាងដូចម្ដេច?
២០ ចូរបន្តនៅជិតស្និទ្ធនឹងក្រុមជំនុំរបស់អ្នក។ កាលដែលអ្នកបានទទួលការជ្រមុជទឹកទៅជាគ្រិស្តសាសនិក នោះអ្នកទៅជាបងប្អូនម្នាក់ក្នុងចំណោម«បងប្អូនរួមជំនឿ»។ (១ពេ. ២:១៧) បងប្អូនក្នុងក្រុមជំនុំរបស់អ្នកគឺប្រៀបដូចជាក្រុមគ្រួសារ។ ដោយចូលរួមកិច្ចប្រជុំជាទៀងទាត់ អ្នកនឹងពង្រឹងចំណងមិត្តភាពរបស់អ្នកជាមួយនឹងពួកគេ។ សូមអាននិងរំពឹងគិតអំពីបណ្ដាំរបស់ព្រះជារៀងរាល់ថ្ងៃ។ (ទំនុក. ១:១, ២) ក្រោយពីអានប៉ុន្មានខពីគម្ពីរ សូមលៃទុកពេលដើម្បីគិតយ៉ាងជ្រាលជ្រៅអំពីអ្វីដែលអ្នកបានអាន។ យ៉ាងនេះ ព័ត៌មានក្នុងគម្ពីរនឹងជ្រាបចូលក្នុងចិត្តរបស់អ្នក។ សូម«អធិដ្ឋានជានិច្ច»។ (ម៉ាថ. ២៦:៤១) សេចក្ដីអធិដ្ឋានដ៏ស្មោះអស់ពីចិត្តរបស់អ្នកនឹងធ្វើឲ្យអ្នកចូលកាន់តែជិតព្រះយេហូវ៉ា។ ‹ចូរបន្តស្វែងរករាជាណាចក្ររបស់ព្រះជាមុន›។ (ម៉ាថ. ៦:៣៣) អ្នកអាចធ្វើដូច្នេះបាន ដោយចាត់ទុកកិច្ចការផ្សព្វផ្សាយជាអ្វីដ៏សំខាន់មួយក្នុងជីវិតរបស់អ្នក។ ដោយផ្សព្វផ្សាយជាទៀងទាត់ អ្នកនឹងរក្សាជំនឿរបស់អ្នកឲ្យមាំមួន ហើយអ្នកអាចជួយអ្នកឯទៀតឲ្យដើរនៅលើផ្លូវដែលនាំទៅដល់ជីវិតដែលគ្មានទីបញ្ចប់។—១ធី. ៤:១៦
២១. តើការជ្រមុជទឹកនឹងបើកឱកាសឲ្យអ្នកទទួលអ្វី?
២១ ការសម្រេចចិត្តប្រគល់ខ្លួនជូនព្រះយេហូវ៉ានិងទទួលការជ្រមុជទឹកគឺជាការសម្រេចចិត្តដ៏សំខាន់បំផុតដែលអ្នកនឹងធ្វើក្នុងជីវិត។ គឺពិតមែនដែលអ្នកត្រូវស៊ូទ្រាំនឹងការពិបាកខ្លះ និងលះបង់អ្វីមួយចំនួន។ ប៉ុន្តែ តើនោះសាកសមនឹងអ្វីដែលអ្នកលះបង់ឬទេ? ពិតប្រាកដណាស់! ការពិបាកណាក៏ដោយដែលអ្នកជួបប្រទះក្នុងពិភពលោកនេះ គឺ«មានតែមួយរយៈពេលខ្លីហើយក៏ស្រាល»។ (២កូ. ៤:១៧) ប៉ុន្តែ ការជ្រមុជទឹកនឹងបើកឱកាសឲ្យអ្នកមានជីវិតដ៏ស្កប់ចិត្តនៅឥឡូវនេះ ព្រមទាំងទទួល«ជីវិតដ៏ពិតប្រាកដ»នៅថ្ងៃអនាគត។ (១ធី. ៦:១៩) ដូច្នេះ សូមគិតយ៉ាងដិតដល់ ហើយអធិដ្ឋានអំពីចម្លើយរបស់អ្នកចំពោះសំណួរដែលថា «តើខ្ញុំមានគុណសម្បត្ដិគ្រប់គ្រាន់ដើម្បីទទួលការជ្រមុជទឹកឬទេ?»។
ចម្រៀងលេខ៥០ ខ្ញុំអធិដ្ឋានប្រគល់ខ្លួនជូនព្រះ
^ វគ្គ 5 តើអ្នកកំពុងគិតអំពីការទទួលការជ្រមុជទឹកឬទេ? បើដូច្នេះ អត្ថបទនេះបានត្រូវរៀបចំឡើងជាពិសេសសម្រាប់អ្នក។ យើងនឹងពិចារណាសំណួរសំខាន់មួយចំនួនអំពីប្រធានបទនេះ។ ចម្លើយរបស់អ្នកនឹងជួយអ្នកឲ្យសម្រេចចិត្តថាអ្នកមានគុណសម្បត្ដិគ្រប់គ្រាន់ដើម្បីទទួលការជ្រមុជទឹកហើយឬនៅ។
^ វគ្គ 5 សូមមើលប្រអប់ដែលមានចំណងជើងថា « សំណួរពីរដែលនឹងត្រូវឆ្លើយនៅថ្ងៃដែលអ្នកទទួលការជ្រមុជទឹក»។
^ វគ្គ 19 បើអ្នកមិនទាន់សិក្សាចប់នូវសៀវភៅតើគម្ពីរអាចបង្រៀនយើងអំពីអ្វី? និង«ចូររក្សាខ្លួនជាមនុស្សដែលព្រះស្រឡាញ់» អ្នកគួរបន្តសិក្សាសៀវភៅទាំងពីរនេះជាមួយនឹងអ្នកបង្រៀនគម្ពីររបស់អ្នករហូតដល់ចប់។
