«ចូរឲ្យការស៊ូទ្រាំសម្រេចគោលបំណងរបស់វា»
«ចូរឲ្យការស៊ូទ្រាំសម្រេចគោលបំណងរបស់វា ដើម្បីឲ្យអ្នករាល់គ្នាបានពេញលក្ខណៈ គ្មានគុណវិបត្ដិ ហើយឥតខ្វះគុណសម្បត្ដិណាមួយសោះឡើយ»។—យ៉ាកុប ១:៤
ចម្រៀងលេខ: ២៤, ១៣៩
១, ២. (ក) តើយើងអាចរៀនអ្វីពីការស៊ូទ្រាំរបស់គេឌាននិងពួកបុរស៣០០នាក់របស់គាត់? (សូមមើលរូបភាពនៅដើមអត្ថបទ) (ខ) យោងទៅតាមលូកា ២១:១៩ ហេតុអ្វីការស៊ូទ្រាំគឺសំខាន់ដល់ម៉្លេះ?
សូមព្យាយាមស្រមៃគិតអំពីចម្បាំងដ៏ពិបាកនិងដែលធ្វើឲ្យអស់កម្លាំងរវាងសត្រូវរបស់ជនជាតិអ៊ីស្រាអែលនិងទាហានអ៊ីស្រាអែលដែលដឹកនាំដោយគេឌានដែលជាចៅក្រម។ ពេញមួយយប់គេឌាននិងពួកបុរសរបស់គាត់បានរត់ដេញតាមជនជាតិម៉ាឌាននិងអ្នកគាំទ្រពួកគេ។ ពួកគាត់បានរត់អស់ចម្ងាយប្រហែលជា៣២គីឡូម៉ែត្រ (២០ម៉ៃល៍)! គម្ពីរប្រាប់យើងអំពីអ្វីដែលបានកើតឡើងក្រោយមក ដោយចែងថា៖ «គេឌាននឹងពួក៣០០នាក់ដែលនៅជាមួយក៏មកដល់ទន្លេយ័រដាន់ ហើយឆ្លងទៅទាំងនឿយហត់»។ ប៉ុន្ដែពួកគាត់មិនទាន់បានទទួលជ័យជម្នះក្នុងចម្បាំងនោះទេ ហើយពួកគាត់នៅតែត្រូវច្បាំងនឹងទាហាន១៥.០០០នាក់។ សត្រូវទាំងនេះបានជិះជាន់ពួកគេអស់ជាច្រើនឆ្នាំ ដូច្នេះជនជាតិអ៊ីស្រាអែលមិនអាចឈប់តស៊ូឡើយ។ ហេតុនេះ គេឌាននិងពួកបុរសរបស់គាត់បានបន្ដរត់ដេញតាមសត្រូវរបស់ពួកគាត់ ហើយនៅទីបំផុតបានយកឈ្នះពួកគេ!—ពួកចៅហ្វាយ ៧:២២; ៨:៤, ១០, ២៨
២ យើងក៏កំពុងប្រយុទ្ធក្នុងចម្បាំងដ៏ពិបាកនិងដែលធ្វើឲ្យអស់កម្លាំងផងដែរ។ សត្រូវរបស់យើងរួមមានសាថាន ពិភពលោករបស់វា និងភាពមិនល្អឥតខ្ចោះរបស់យើង។ បងប្អូនខ្លះបានប្រយុទ្ធនឹងសត្រូវទាំងនេះអស់ជាច្រើនឆ្នាំហើយ។ ដោយមានជំនួយពីព្រះយេហូវ៉ា យើងបានយកឈ្នះការប្រយុទ្ធជាច្រើន។ ប៉ុន្ដែ យើងមិនទាន់បានទទួលជ័យជម្នះផ្ដាច់ព្រ័ត្រទេ។ ជួនកាល យើងប្រហែលជាអស់កម្លាំងនឹងការប្រយុទ្ធ ឬយើងប្រហែលជាធុញទ្រាន់នឹងរង់ចាំទីបញ្ចប់នៃរបៀបរបបពិភពលោកដ៏អាក្រក់នេះ។ លោកយេស៊ូបានព្រមានយើងថាក្នុងអំឡុងគ្រាចុងក្រោយបង្អស់ យើងនឹងមានទុក្ខលំបាកដ៏ខ្លាំងនិងការបៀតបៀនយ៉ាងឃោរឃៅ។ ប៉ុន្ដែ លោកក៏បានមានប្រសាសន៍ដែរថា បើយើងស៊ូទ្រាំ យើងអាចយកឈ្នះបាន។ (សូមអាន លូកា ២១:១៩) តើការស៊ូទ្រាំគឺជាអ្វី? តើអ្វីនឹងជួយយើងឲ្យស៊ូទ្រាំ? តើយើងអាចរៀនអ្វីពីពួកអ្នកដែលបានស៊ូទ្រាំ? ម្យ៉ាងទៀត តើយើងអាចឲ្យ«ការស៊ូទ្រាំសម្រេចគោលបំណងរបស់វា»យ៉ាងដូចម្ដេច?—យ៉ាកុប ១:៤
តើការស៊ូទ្រាំគឺជាអ្វី?
៣. តើការស៊ូទ្រាំគឺជាអ្វី?
៣ ក្នុងគម្ពីរ ការស៊ូទ្រាំមិនគ្រាន់តែមានន័យថាយើងទ្រាំទ្រនឹងស្ថានភាពដ៏ពិបាកប៉ុណ្ណោះទេ។ ពាក្យនេះរួមបញ្ចូលរបៀបគិតគូរនិងអារម្មណ៍របស់យើងចំពោះទុក្ខលំបាកដែលយើងមាន។ ការស៊ូទ្រាំជួយយើងឲ្យមានចិត្ដក្លាហាន ស្មោះត្រង់ និងអត់ធ្មត់។ សៀវភៅយោងមួយពន្យល់ថា ការស៊ូទ្រាំគឺជាគុណសម្បត្ដិមួយដែលជួយយើងឲ្យមានសេចក្ដីសង្ឃឹមដ៏មាំមួននិងមិនឈប់តស៊ូនៅពេលដែលយើងមានទុក្ខលំបាក។ ការស៊ូទ្រាំជួយយើងឲ្យនៅមាំមួននិងមិនរង្គោះរង្គើ សូម្បីតែពេលមានទុក្ខលំបាកដ៏ខ្លាំងបំផុតក៏ដោយ។ ម្យ៉ាងទៀត ពេលដែលយើងស៊ូទ្រាំយើងអាចធ្វើឲ្យទុក្ខលំបាកទាំងនេះទៅជាជ័យជម្នះ ហើយយើងអាចផ្ដោតអារម្មណ៍ទៅលើគោលដៅមិនមែនទៅលើការឈឺចាប់របស់យើង។
៤. ហេតុអ្វីយើងអាចនិយាយថាសេចក្ដីស្រឡាញ់ជំរុញចិត្ដយើងឲ្យស៊ូទ្រាំ?
៤ សេចក្ដីស្រឡាញ់ជំរុញចិត្ដយើងឲ្យស៊ូទ្រាំ។ (សូមអាន កូរិនថូសទី១ ១៣:៤, ៧) តើតាមរបៀបណា? សេចក្ដីស្រឡាញ់ចំពោះព្រះយេហូវ៉ាជំរុញចិត្ដយើងឲ្យស៊ូទ្រាំនឹងអ្វីណាក៏ដោយដែលលោកអនុញ្ញាតឲ្យកើតឡើង។ (លូកា ២២:៤១, ៤២) សេចក្ដីស្រឡាញ់ចំពោះបងប្អូនរួមជំនឿជួយយើងឲ្យស៊ូទ្រាំនឹងភាពមិនល្អឥតខ្ចោះរបស់ពួកគេ។ (ពេត្រុសទី១ ៤:៨) សេចក្ដីស្រឡាញ់ចំពោះគូអាពាហ៍ពិពាហ៍ជួយពង្រឹងចំណងអាពាហ៍ពិពាហ៍របស់យើង និងជួយយើងឲ្យស៊ូទ្រាំនឹង«ការលំបាកផ្សេងៗ»ដែលសូម្បីតែប្ដីប្រពន្ធដែលមានសុភមង្គលក៏ជួបប្រទះដែរ។—កូរិនថូសទី១ ៧:២៨
តើអ្វីនឹងជួយអ្នកឲ្យស៊ូទ្រាំ?
៥. ហេតុអ្វីព្រះយេហូវ៉ាជាបុគ្គលល្អបំផុតដើម្បីជួយយើងឲ្យស៊ូទ្រាំ?
៥ ចូរសុំព្រះយេហូវ៉ាផ្ដល់កម្លាំង។ ព្រះយេហូវ៉ាគឺជា«ព្រះដែលផ្ដល់សមត្ថភាពស៊ូទ្រាំនិងការសម្រាលទុក្ខ»។ (រ៉ូម ១៥:៥) លោកគឺជាបុគ្គលតែមួយគត់ដែលយល់ទាំងស្រុងអំពីអារម្មណ៍ ជីវប្រវត្ដិ និងស្ថានភាពរបស់យើង។ ដូច្នេះ លោកដឹងច្បាស់អំពីអ្វីដែលយើងត្រូវការដើម្បីស៊ូទ្រាំ។ គម្ពីរចែងថា៖ «ទ្រង់នឹងបំពេញបំណងចិត្ដនៃអស់អ្នកដែលកោតខ្លាចដល់ទ្រង់ ក៏នឹងឮពាក្យអំពាវនាវរបស់គេ ព្រមទាំងជួយសង្គ្រោះគេផង»។ (ទំនុកតម្កើង ១៤៥:១៩) ប៉ុន្ដែ តើតាមរបៀបណាព្រះនឹងតបឆ្លើយសេចក្ដីអធិដ្ឋានរបស់យើងដើម្បីផ្ដល់កម្លាំងឲ្យយើងស៊ូទ្រាំ?
ព្រះយេហូវ៉ាយល់ទាំងស្រុងអំពីយើង ដូច្នេះលោកដឹងច្បាស់អំពីអ្វីដែលយើងត្រូវការដើម្បីស៊ូទ្រាំ
៦. ដូចដែលបានសន្យាក្នុងគម្ពីរ តើព្រះយេហូវ៉ាអាច«រៀបចំផ្លូវចេញ»សម្រាប់យើងយ៉ាងដូចម្ដេច?
៦ ពេលយើងសុំព្រះយេហូវ៉ាជួយយើងឲ្យស៊ូទ្រាំ លោកសន្យាថាលោកនឹង«រៀបចំផ្លូវចេញ»។ (សូមអាន កូរិនថូសទី១ ១០:១៣) តើលោកធ្វើដូច្នេះយ៉ាងដូចម្ដេច? នៅពេលខ្លះ លោកប្រហែលជាបំបាត់ចោលទុក្ខលំបាករបស់យើង។ ប៉ុន្ដែក្នុងករណីភាគច្រើន លោកនឹងផ្ដល់កម្លាំងឲ្យយើងដើម្បីឲ្យយើង«ស៊ូទ្រាំនឹងការទាំងអស់ ហើយមានចិត្ដធ្ងន់ដោយអំណរ»។ (កូឡុស ១:១១) ម្យ៉ាងទៀត ដោយសារព្រះយេហូវ៉ាស្គាល់យ៉ាងច្បាស់អំពីកម្រិតរបស់យើងខាងផ្លូវចិត្ដ គំនិត និងរាងកាយ នោះលោកនឹងមិនអនុញ្ញាតឲ្យស្ថានភាពណាមួយទៅជាពិបាកយ៉ាងខ្លាំងរហូតដល់យើងមិនអាចរក្សាភាពស្មោះត្រង់ឡើយ។
៧. សូមលើកឧទាហរណ៍មួយអំពីមូលហេតុដែលយើងត្រូវការសេចក្ដីបង្រៀនដែលប្រៀបដូចជាអាហារដើម្បីស៊ូទ្រាំ។
៧ ចូរឲ្យសេចក្ដីបង្រៀនពីគម្ពីរដែលប្រៀបដូចជាអាហារពង្រឹងជំនឿរបស់អ្នក។ ហេតុអ្វីសេចក្ដីបង្រៀនដែលប្រៀបដូចជាអាហារគឺសំខាន់? ជាឧទាហរណ៍ ដើម្បីឡើងភ្នំអេវើរ៉េស បុគ្គលម្នាក់ត្រូវការ៦.០០០កាឡូរីក្នុងមួយថ្ងៃ។ នោះគឺច្រើនជាងមនុស្សធម្មតាត្រូវការឆ្ងាយណាស់។ ដើម្បីស៊ូទ្រាំនិងសម្រេចគោលដៅរបស់គាត់ អ្នកឡើងភ្នំត្រូវតែបរិភោគកាឡូរីឲ្យបានច្រើនបំផុតដែលអាចបរិភោគបាន។ ស្រដៀងគ្នាដែរ យើងត្រូវការសេចក្ដីបង្រៀនជាច្រើនដែលប្រៀបដូចជាអាហារដើម្បីស៊ូទ្រាំនិងសម្រេចគោលដៅរបស់យើង។ យើងត្រូវតាំងចិត្ដចំណាយពេលសិក្សាផ្ទាល់ខ្លួននិងចូលរួមកិច្ចប្រជុំ។ សកម្មភាពទាំងនេះនឹងផ្ដល់នូវអ្វីដែលយើងត្រូវការដើម្បីរក្សាជំនឿរបស់យើងឲ្យមាំមួន។—យ៉ូហាន ៦:២៧
៨, ៩. (ក) យោងទៅតាមយ៉ូប ២:៤, ៥ ពេលយើងជួបប្រទះនឹងទុក្ខលំបាក តើនេះរួមបញ្ចូលអ្វី? (ខ) ពេលអ្នកប្រឈមមុខនឹងទុក្ខលំបាក តើអ្នកអាចស្រមៃគិតអំពីអ្វី?
៨ ចូរនឹកចាំអំពីភក្ដីភាពរបស់អ្នកចំពោះព្រះ។ ពេលដែលយើងជួបប្រទះនឹងទុក្ខលំបាកផ្សេងៗ យើងមិនគ្រាន់តែឈឺចាប់ប៉ុណ្ណោះទេ។ ភក្ដីភាពរបស់យើងចំពោះព្រះកំពុងត្រូវល្បងល។ របៀបដែលយើងប្រព្រឹត្ដពេលយើងមានទុក្ខលំបាកបង្ហាញថាយើងចាត់ទុកព្រះយេហូវ៉ាជាអ្នកគ្រប់គ្រងពិតប្រាកដនៃសកលលោកឬយ៉ាងណា។ តើយ៉ាងដូចម្ដេច? សាថានគឺជាសត្រូវរបស់ព្រះយេហូវ៉ាដែលប្រឆាំងការគ្រប់គ្រងរបស់លោក ហើយវាបានប្រមាថព្រះដោយនិយាយថាមនុស្សបម្រើព្រះដើម្បីតែប្រយោជន៍ផ្ទាល់ខ្លួនប៉ុណ្ណោះ។ សាថានបាននិយាយថា៖ «មនុស្សនឹងសុខចិត្ដលះបង់ទាំងអស់ចោល ដើម្បីឲ្យបានជីវិតគង់នៅ»។ បន្ទាប់មក វាបាននិយាយអំពីយ៉ូបថា៖ «ចូរទ្រង់គ្រាន់តែលូកព្រះហស្ដទៅពាល់ដល់ឆ្អឹងនឹងសាច់គាត់ចុះ នោះគាត់នឹងប្រមាថដល់ទ្រង់នៅចំពោះព្រះភក្ត្រ»។ (យ៉ូប ២:៤, ៥) តាំងពីពេលដែលសាថានបាននិយាយចោទប្រកាន់ដូច្នេះ តើវាបានកែប្រែឬទេ? ទេ! ច្រើនឆ្នាំក្រោយមក ពេលសាថានបានត្រូវបោះទម្លាក់ពីស្ថានសួគ៌ វានៅតែចោទប្រកាន់ពួកអ្នកបម្រើដ៏ស្មោះត្រង់របស់ព្រះជានិច្ច។ (ការបើកបង្ហាញ ១២:១០) សព្វថ្ងៃនេះ សាថាននៅតែចោទប្រកាន់ថាមនុស្សគោរពប្រណិប័តន៍ព្រះដើម្បីតែប្រយោជន៍ខ្លួនប៉ុណ្ណោះ។ វាពិតជាចង់ឃើញយើងបដិសេធសិទ្ធិគ្រប់គ្រងរបស់ព្រះ ហើយឈប់បម្រើលោក។
៩ ពេលអ្នកឈឺចាប់ដោយសារទុក្ខលំបាក សូមព្យាយាមស្រមៃគិតអំពីអ្វីទាំងនេះ។ សាថាននិងពួកវិញ្ញាណកំណាចនៅម្ខាង។ ពួកវាកំពុងមើលថាអ្នកនឹងប្រព្រឹត្ដយ៉ាងណា ហើយចោទថាអ្នកនឹងឈប់តស៊ូ។ នៅម្ខាងទៀត មានព្រះយេហូវ៉ា លោកយេស៊ូគ្រិស្ដដែលជាស្ដេចរបស់យើង ពួកអ្នកដែលព្រះបានរើសតាំងដែលបានត្រូវប្រោសឲ្យរស់ឡើងវិញរួចហើយ និងទេវតារាប់ពាន់រូប។ ពួកគាត់ឃើញអ្នកកំពុងតស៊ូព្យាយាម ដូច្នេះពួកគាត់កំពុងស្រែកអបអរ! ពួកគាត់សប្បាយរីករាយដោយឃើញថាអ្នកអាចស៊ូទ្រាំ ហើយរក្សាភក្ដីភាពចំពោះព្រះយេហូវ៉ា។ ក្រោយមក អ្នកឮព្រះយេហូវ៉ាមានប្រសាសន៍មកអ្នកថា៖ «កូនអើយ ចូរឲ្យឯងមានប្រាជ្ញាឡើង ហើយឲ្យចិត្ដអញបានរីករាយចុះ ដើម្បីឲ្យអញអាចតបឆ្លើយចំពោះមនុស្សដែលដៀលតិះដល់អញ»។—សុភាសិត ២៧:១១
លោកយេស៊ូបានផ្ដោតអារម្មណ៍ទៅលើរង្វាន់ដែលមកពីការស៊ូទ្រាំរបស់លោក
១០. តើតាមរបៀបណាអ្នកអាចយកតម្រាប់លោកយេស៊ូក្នុងការផ្ដោតអារម្មណ៍ទៅលើរង្វាន់ដែលមកពីការស៊ូទ្រាំ?
១០ ចូរផ្ដោតអារម្មណ៍ទៅលើរង្វាន់។ សូមស្រមៃគិតថាអ្នកកំពុងធ្វើដំណើរ។ នៅតាមផ្លូវដែលអ្នកធ្វើដំណើរ អ្នកត្រូវចូលផ្លូវក្រោមដីដ៏វែងមួយ។ អ្នកមើលទៅគ្រប់កន្លែងសុទ្ធតែងងឹត។ ប៉ុន្ដែអ្នកដឹងថាបើអ្នកបន្ដធ្វើដំណើរទៅទីបញ្ចប់នៃផ្លូវក្រោមដីនោះ អ្នកនឹងឃើញពន្លឺម្ដងទៀត។ ជីវិតអាចប្រៀបដូចជាការធ្វើដំណើរនោះ។ អ្នកប្រហែលជាត្រូវឆ្លងកាត់គ្រាដ៏ពិបាកណាស់ ហើយអ្នកប្រហែលជាមានអារម្មណ៍ថាបញ្ហារបស់អ្នកគឺពិបាកពេក។ លោកយេស៊ូក៏អាចមានអារម្មណ៍បែបនេះដែរ។ ពេលលោកបានត្រូវព្យួរលើបង្គោលទារុណកម្ម លោកបានត្រូវគេបន្ទាបបន្ថោក ហើយលោកមានការឈឺចាប់យ៉ាងខ្លាំង។ នេះច្បាស់ជាពេលដ៏ពិបាកបំផុតក្នុងជីវិតរបស់លោក! តើអ្វីបានជួយលោកឲ្យស៊ូទ្រាំ? គម្ពីរចែងថាលោកបានសម្លឹងមើលទៅ«អំណរដែលនៅខាងមុខលោក»។ (ហេប្រឺ ១២:២, ៣) លោកយេស៊ូបានផ្ដោតអារម្មណ៍ទៅលើរង្វាន់ដែលមកពីការស៊ូទ្រាំរបស់លោក ជាពិសេសលោកនឹងមានចំណែកក្នុងការធ្វើឲ្យនាមរបស់ព្រះបានបរិសុទ្ធនិងក្នុងការគាំទ្រសិទ្ធិគ្រប់គ្រងរបស់ព្រះ។ លោកបានដឹងថាទុក្ខលំបាកដែលលោកមានគឺសម្រាប់តែមួយរយៈពេលប៉ុណ្ណោះ ហើយរង្វាន់ដែលលោកនឹងទទួលនៅស្ថានសួគ៌នឹងស្ថិតស្ថេរជារៀងរហូត។ សព្វថ្ងៃនេះ ទុក្ខលំបាកដែលអ្នកជួបប្រទះប្រហែលជាពិបាកណាស់និងធ្វើឲ្យអ្នកឈឺចាប់ ប៉ុន្ដែសូមចាំថាទុក្ខលំបាកទាំងនោះគឺសម្រាប់តែមួយរយៈពេលប៉ុណ្ណោះ។
«ពួកអ្នកដែលបានស៊ូទ្រាំ»
១១. ហេតុអ្វីយើងគួរពិចារណាបទពិសោធន៍របស់«ពួកអ្នកដែលបានស៊ូទ្រាំ»?
១១ យើងមិនមែនស៊ូទ្រាំតែម្នាក់ឯងទេ។ ដើម្បីលើកទឹកចិត្ដគ្រិស្ដសាសនិកឲ្យស៊ូទ្រាំនឹងទុក្ខលំបាកជាច្រើនដែលមកពីសាថាន សាវ័កពេត្រុសបានសរសេរថា៖ «ចូរតតាំងនឹងវា ដោយមានជំនឿមាំមួន ហើយដោយដឹងថាបងប្អូនទាំងអស់របស់អ្នករាល់គ្នាពេញពិភពលោកកំពុងឆ្លងកាត់ទុក្ខលំបាកដូចគ្នាដែរ»។ (ពេត្រុសទី១ ៥:៩) បទពិសោធន៍របស់«ពួកអ្នកដែលបានស៊ូទ្រាំ» បង្រៀនយើងអំពីរបៀបដែលយើងអាចរក្សាភាពស្មោះត្រង់ ពង្រឹងទំនុកចិត្ដរបស់យើងថាយើងអាចទទួលជោគជ័យ ហើយរំលឹកយើងថាយើងនឹងទទួលរង្វាន់ចំពោះភក្ដីភាពរបស់យើង។ (យ៉ាកុប ៥:១១) សូមយើងពិចារណាគំរូមួយចំនួន [១](សូមមើលកំណត់នៅចុងអត្ថបទ)។
១២. តើយើងរៀនអ្វីពីគំរូរបស់ចេរូប៊ីនដែលបានត្រូវដាក់នៅសួនអេដែន?
១២ ចេរូប៊ីនគឺជាទេវតាដែលមានឋានៈខ្ពស់។ ក្រោយពីអាដាមនិងអេវ៉ាបានប្រព្រឹត្ដអំពើខុសឆ្គង ព្រះយេហូវ៉ាបានឲ្យចេរូប៊ីនខ្លះនូវភារកិច្ចថ្មីនៅផែនដី។ ភារកិច្ចនោះគឺខុសគ្នាឆ្ងាយពីភារកិច្ចដែលពួកគាត់ធ្លាប់មាននៅស្ថានសួគ៌។ គំរូរបស់ពួកគាត់អាចបង្រៀនយើងអំពីរបៀបដែលយើងអាចស៊ូទ្រាំពេលយើងមានភារកិច្ចដ៏ពិបាក។ គម្ពីរចែងថា ព្រះយេហូវ៉ាបាន«ដាក់ចេរូប៊ីននៅខាងកើតសួនច្បារអេដែន នឹងដាវដែលជាអណ្ដាតភ្លើងរេបែរទៅគ្រប់ទិសដើម្បីនឹងរក្សាផ្លូវទៅឯដើមជីវិត»។ [២] (សូមមើលកំណត់នៅចុងអត្ថបទ) (លោកុប្បត្ដិ ៣:២៤) គម្ពីរមិនបានចែងថាចេរូប៊ីនបានត្អូញត្អែរឬគិតថាភារកិច្ចថ្មីនោះអន់ពេកសម្រាប់ពួកគាត់ឡើយ។ ពួកគាត់មិនបានធុញទ្រាន់ឬបោះបង់ភារកិច្ចនោះទេ។ ផ្ទុយទៅវិញ ពួកគាត់បាននៅជាប់នឹងភារកិច្ចរបស់ពួកគាត់រហូតដល់ភារកិច្ចនោះបានចប់ ប្រហែលជានៅសម័យទឹកជំនន់ ជាង១.៦០០ឆ្នាំក្រោយមក!
១៣. តើតាមរបៀបណាយ៉ូបអាចស៊ូទ្រាំនឹងទុក្ខលំបាករបស់គាត់?
១៣ យ៉ូបដែលជាបុរសស្មោះត្រង់។ ជួនកាលអ្នកប្រហែលជាឈឺចិត្ដ ដោយសារមិត្ដភក្ដិឬសមាជិកក្រុមគ្រួសារបាននិយាយអ្វីដែលធ្វើឲ្យអ្នកធ្លាក់ទឹកចិត្ដ។ ឬក៏ប្រហែលជាអ្នកឈឺធ្ងន់ឬរងទុក្ខដោយសារបុគ្គលជាទីស្រឡាញ់បានស្លាប់។ ទោះជាមានអ្វីកើតឡើងក៏ដោយ អ្នកអាចទទួលការសម្រាលទុក្ខពីគំរូរបស់យ៉ូប។ (យ៉ូប ១:១៨, ១៩; ២:៧, ៩; ១៩:១-៣) យ៉ូបមិនបានដឹងអំពីមូលហេតុដែលគាត់មានទុក្ខលំបាកជាច្រើននោះទេ ប៉ុន្ដែគាត់មិនបានឈប់តស៊ូឡើយ។ តើអ្វីបានជួយគាត់ឲ្យស៊ូទ្រាំ? ទី១ គាត់ស្រឡាញ់ព្រះយេហូវ៉ានិងកោតខ្លាចលោកឬចង់ធ្វើអ្វីដែលលោកពេញចិត្ដ។ (យ៉ូប ១:១) យ៉ូបចង់ធ្វើឲ្យព្រះពេញចិត្ដទាំងនៅពេលសប្បាយទាំងនៅពេលពិបាក។ ទី២ ព្រះយេហូវ៉ាបានជួយយ៉ូបឲ្យយល់អំពីឫទ្ធានុភាពរបស់លោកដោយប្រាប់គាត់អំពីអ្វីមួយចំនួនដ៏អស្ចារ្យដែលលោកបានបង្កើត។ នេះបានធ្វើឲ្យយ៉ូបកាន់តែជឿជាក់ថាព្រះយេហូវ៉ានឹងបំបាត់ទុក្ខលំបាករបស់គាត់នៅពេលត្រឹមត្រូវ។ (យ៉ូប ៤២:១, ២) នេះជាអ្វីដែលបានកើតឡើងមែន! ‹ព្រះយេហូវ៉ាទ្រង់ប្រោសឲ្យយ៉ូបរួចពីចំណងទៅ ហើយទ្រង់ប្រទានឲ្យមានលើសជាងដើម១ជា២ផង›។ យ៉ូបបាន«អាយុជាយឺនយូរ ហើយស្កប់ស្កល់នឹងជីវិតផង»។—យ៉ូប ៤២:១០, ១៧
១៤. យោងទៅតាមកូរិនថូសទី២ ១:៦ តើតាមរបៀបណាការស៊ូទ្រាំរបស់ប៉ូលបានជួយអ្នកឯទៀត?
១៤ សាវ័កប៉ូល។ តើអ្នកកំពុងទទួលការប្រឆាំងយ៉ាងខ្លាំង ឬថែមទាំងទទួលការបៀតបៀនឬទេ? តើអ្នកគឺជាអ្នកចាស់ទុំ ឬអ្នកត្រួតពិនិត្យប្រចាំមណ្ឌលម្នាក់ដែលមានអារម្មណ៍ថាអ្នកមានភារកិច្ចច្រើនពេកឬទេ? បើដូច្នេះ គំរូរបស់ប៉ូលអាចជួយអ្នកបាន។ ប៉ូលបានទទួលការបៀតបៀនយ៉ាងឃោរឃៅ ហើយគាត់តែងតែបារម្ភអំពីបងប្អូនក្នុងក្រុមជំនុំនានា។ (កូរិនថូសទី២ ១១:២៣-២៩) ប៉ុន្ដែប៉ូលមិនបានឈប់តស៊ូទេ ហើយគំរូរបស់គាត់បានពង្រឹងកម្លាំងចិត្ដអ្នកឯទៀត។ (សូមអាន កូរិនថូសទី២ ១:៦) ការស៊ូទ្រាំរបស់អ្នកអាចលើកទឹកចិត្ដអ្នកឯទៀតឲ្យស៊ូទ្រាំដែរ។
តើការស៊ូទ្រាំនឹង«សម្រេចគោលបំណងរបស់វា»ចំពោះអ្នកឬទេ?
១៥, ១៦. (ក) តើការស៊ូទ្រាំត្រូវសម្រេច«គោលបំណង»អ្វី? (ខ) សូមលើកឧទាហរណ៍ខ្លះអំពីរបៀបដែលយើងអាច«ឲ្យការស៊ូទ្រាំសម្រេចគោលបំណងរបស់វា»។
១៥ យ៉ាកុបដែលជាអ្នកកាន់តាមលោកយេស៊ូបានសរសេរក្រោមការដឹកនាំរបស់ព្រះថា៖ «ចូរឲ្យការស៊ូទ្រាំសម្រេចគោលបំណងរបស់វា ដើម្បីឲ្យអ្នករាល់គ្នាបានពេញលក្ខណៈ គ្មានគុណវិបត្ដិ ហើយឥតខ្វះគុណសម្បត្ដិណាមួយសោះឡើយ»។ (យ៉ាកុប ១:៤) តើតាមរបៀបណាការស៊ូទ្រាំអាចសម្រេច«គោលបំណង»របស់វាចំពោះយើង? ពេលយើងឆ្លងកាត់ទុក្ខលំបាកណាមួយ យើងប្រហែលជាកត់សម្គាល់ថាយើងត្រូវការចិត្ដអត់ធ្មត់ ចិត្ដកតញ្ញូ ឬសេចក្ដីស្រឡាញ់កាន់តែច្រើន។ កាលដែលយើងស៊ូទ្រាំនឹងទុក្ខលំបាកនោះ យើងនឹងរៀនចេះបង្ហាញគុណសម្បត្ដិទាំងនេះថែមទៀត ហើយយើងនឹងមានបុគ្គលិកលក្ខណៈជាគ្រិស្ដសាសនិកកាន់តែល្អប្រសើរឡើង។
កាលដែលយើងស៊ូទ្រាំនឹងទុក្ខលំបាក នោះយើងនឹងមានបុគ្គលិកលក្ខណៈជាគ្រិស្ដសាសនិកកាន់តែល្អប្រសើរឡើង (សូមមើលវគ្គ១៥, ១៦)
១៦ ដោយសារការស៊ូទ្រាំអាចធ្វើឲ្យយើងក្លាយទៅជាគ្រិស្ដសាសនិកដ៏ល្អជាង នោះយើងមិនចង់បំពានច្បាប់របស់ព្រះយេហូវ៉ាដើម្បីឲ្យឈប់មានទុក្ខលំបាកទេ។ ជាឧទាហរណ៍ បើអ្នកពិបាកទប់ទល់នឹងគំនិតដែលប្រាសចាកសីលធម៌ សូមកុំចុះចាញ់ការល្បួងនេះឡើយ! ចូរសុំជំនួយពីព្រះយេហូវ៉ាដើម្បីជួយអ្នកលះចោលគំនិតដែលខុសឆ្គង។ តើអ្នកមានសមាជិកក្រុមគ្រួសារដែលកំពុងប្រឆាំងអ្នកឬទេ? សូមកុំឈប់តស៊ូឡើយ! ចូរតាំងចិត្ដបន្ដបម្រើព្រះយេហូវ៉ា។ ជាលទ្ធផល អ្នកនឹងពង្រឹងទំនុកចិត្ដរបស់អ្នកទៅលើព្រះយេហូវ៉ា។ ចូរចាំថា យើងត្រូវស៊ូទ្រាំដើម្បីទទួលការពេញចិត្ដពីព្រះ។—រ៉ូម ៥:៣-៥; យ៉ាកុប ១:១២
១៧, ១៨. (ក) សូមលើកឧទាហរណ៍អំពីសារៈសំខាន់នៃការស៊ូទ្រាំរហូតដល់ទីបញ្ចប់។ (ខ) កាលដែលយើងចូលកាន់តែជិតដល់ទីបញ្ចប់ តើយើងអាចមានទំនុកចិត្ដអ្វី?
១៧ យើងត្រូវស៊ូទ្រាំមិនគ្រាន់តែសម្រាប់មួយរយៈពេលប៉ុណ្ណោះទេ តែរហូតដល់ទីបញ្ចប់។ សូមស្រមៃគិតអំពីកប៉ាល់ដែលកំពុងលិចទឹក។ ដើម្បីរួចជីវិត អ្នកធ្វើដំណើរក្នុងកប៉ាល់នោះត្រូវហែលទឹករហូតដល់ឆ្នេរសមុទ្រ។ បុគ្គលដែលឈប់តស៊ូនៅពេលដែលគាត់ទើបចាប់ផ្ដើមហែលទឹកនឹងលង់ទឹក។ ដូចគ្នាដែរ បុគ្គលដែលឈប់តស៊ូពេលជិតទៅដល់ឆ្នេរសមុទ្រក៏នឹងលង់ទឹកដែរ។ បើយើងចង់រស់នៅក្នុងពិភពលោកថ្មី យើងត្រូវបន្ដស៊ូទ្រាំ។ សូមយើងមានចិត្ដគំនិតដូចសាវ័កប៉ូលដែលបាននិយាយថា៖ «យើងមិនឈប់តស៊ូឡើយ»។—កូរិនថូសទី២ ៤:១, ១៦
១៨ ដូចប៉ូល យើងជឿជាក់ទាំងស្រុងថាព្រះយេហូវ៉ានឹងជួយយើងស៊ូទ្រាំរហូតដល់ទីបញ្ចប់។ ប៉ូលបានសរសេរថា៖ «យើងកំពុងឈ្នះក្នុងការទាំងអស់នេះ ដោយសារលោកដែលបានស្រឡាញ់យើង។ ព្រោះខ្ញុំជឿជាក់ថា ទោះជាសេចក្ដីស្លាប់ ជីវិត ទេវតា ពួកអ្នកគ្រប់គ្រង អ្វីៗនៅគ្រាឥឡូវនេះ អ្វីៗនៅគ្រាខាងមុខ កម្លាំង កម្ពស់ ជម្រៅ ឬអ្វីផ្សេងទៀតដែលលោកបានបង្កើតក្ដី គ្មានអ្វីអាចធ្វើឲ្យយើងឃ្លាតចេញពីសេចក្ដីស្រឡាញ់របស់ព្រះ ដែលត្រូវសម្ដែងតាមរយៈគ្រិស្ដយេស៊ូ ជាម្ចាស់របស់យើងឡើយ»។ (រ៉ូម ៨:៣៧-៣៩) ពិតមែន នៅពេលខ្លះយើងនឹងអស់កម្លាំង។ ប៉ុន្ដែ សូមឲ្យយើងយកតម្រាប់គេឌាននិងពួកបុរសរបស់គាត់។ ពួកគាត់អស់កម្លាំង ប៉ុន្ដែមិនបានឈប់តស៊ូឡើយ។ ពួកគាត់«ចេះតែខំដេញតាមគេទៅ»!—ពួកចៅហ្វាយ ៨:៤
^ [១] (វគ្គ១១) អ្នកក៏នឹងទទួលការលើកទឹកចិត្ដដែរដោយមើលឡើងវិញអំពីការស៊ូទ្រាំរបស់រាស្ដ្រព្រះនៅសម័យយើងនេះ។ ជាឧទាហរណ៍ ទស្សនាវដ្ដីប៉មយាម ថ្ងៃទី១៥ ខែមិថុនា ឆ្នាំ២០១៥ ទំព័រ១៩-២១ និងវីដេអូដែលមានចំណងជើងថា បងប្អូនរួមជំនឿទាំងអស់របស់យើង មានបទពិសោធន៍របស់បងប្អូនយើងដ៏គួរឲ្យលើកទឹកចិត្ដ នៅប្រទេសជប៉ុន អេស្តូនី និងប្រទេសផ្សេងទៀត។
^ [២] (វគ្គ១២) គម្ពីរមិនបានចែងថាចេរូប៊ីនប៉ុន្មានរូបបានទទួលភារកិច្ចនេះទេ។
