អត្ថបទសិក្សា ១៧
«ខ្ញុំហៅអ្នករាល់គ្នាថាមិត្តសម្លាញ់»
«ខ្ញុំហៅអ្នករាល់គ្នាថាមិត្តសម្លាញ់ ពីព្រោះអ្វីៗទាំងអស់ដែលខ្ញុំបានឮពីបិតារបស់ខ្ញុំ ខ្ញុំបានប្រាប់អ្នករាល់គ្នា»។—យ៉ូន. ១៥:១៥
ចម្រៀងលេខ១៣ គ្រិស្តជាគំរូរបស់យើង
សេចក្ដីសង្ខេប *
១. តើយើងអាចទៅជាមិត្តសម្លាញ់នឹងអ្នកណាម្នាក់យ៉ាងដូចម្ដេច?
ជាធម្មតា ដើម្បីធ្វើជាមិត្តសម្លាញ់របស់អ្នកណាម្នាក់ យើងត្រូវចំណាយពេលជាមួយនឹងអ្នកនោះ។ ពេលយើងប្រាប់គ្នាទៅវិញទៅមកអំពីគំនិតនិងអារម្មណ៍រៀងៗខ្លួន នោះយើងទៅជាមិត្តសម្លាញ់នឹងគ្នា។ ក៏ប៉ុន្តែ ការធ្វើជាមិត្តសម្លាញ់របស់លោកយេស៊ូគឺមិនស្រួលទេ។ ហេតុអ្វី?
២. តើការពិបាកទី១ដែលយើងជួបគឺជាអ្វី?
២ ការពិបាកទី១គឺយើងមិនបានជួបលោកយេស៊ូដោយផ្ទាល់ឡើយ។ គ្រិស្តសាសនិកជាច្រើននាក់នៅសតវត្សរ៍ទី១ ក៏មិនដែលបានជួបលោកដែរ។ ទោះជាយ៉ាងនេះក៏ដោយ សាវ័កពេត្រុសបាននិយាយថា៖ «ទោះជាអ្នករាល់គ្នាមិនដែលឃើញលោកក៏ដោយ ក៏អ្នករាល់គ្នាស្រឡាញ់លោក។ ទោះជាឥឡូវនេះអ្នករាល់គ្នាមិនឃើញលោកក៏ដោយ ក៏អ្នករាល់គ្នាបង្ហាញជំនឿលើលោក»។ (១ពេ. ១:៨) ដូច្នេះយើងអាចទៅជាមិត្តសម្លាញ់របស់លោកយេស៊ូ ដោយមិនចាំបាច់ជួបលោកដោយផ្ទាល់ទេ។
៣. តើការពិបាកទី២ដែលយើងជួបគឺជាអ្វី?
៣ ការពិបាកទី២គឺយើងមិនអាចនិយាយជាមួយនឹងលោកយេស៊ូទេ។ ពេលយើងអធិដ្ឋាន យើងនិយាយទៅកាន់ព្រះយេហូវ៉ា។ ពិតមែនថាយើងអធិដ្ឋានដោយនូវនាមរបស់លោកយេស៊ូ តែយើងមិននិយាយជាមួយនឹងលោកយេស៊ូឡើយ។ តាមពិត លោកយេស៊ូមិនចង់ឲ្យយើងអធិដ្ឋានទៅលោកទេ។ ហេតុអ្វី? ពីព្រោះសេចក្ដីអធិដ្ឋានគឺជាផ្នែកមួយនៃការគោរពប្រណិប័តន៍ ហើយមានតែព្រះយេហូវ៉ាប៉ុណ្ណោះដែលយើងគួរគោរពប្រណិប័តន៍។ (ម៉ាថ. ៤:១០) ទោះជាយ៉ាងនេះក៏ដោយ យើងអាចបង្ហាញសេចក្ដីស្រឡាញ់របស់យើងចំពោះលោកយេស៊ូ។
៤. តើការពិបាកទី៣ដែលយើងជួបគឺជាអ្វី ហើយតើយើងនឹងពិចារណាអ្វីក្នុងអត្ថបទនេះ?
៤ ការពិបាកទី៣គឺលោកយេស៊ូរស់នៅស្ថានសួគ៌ ដូច្នេះយើងមិនអាចចំណាយពេលនៅជាមួយនឹងលោកបានទេ។ ក៏ប៉ុន្តែយើងមិនចាំបាច់នៅជាមួយលោកយេស៊ូ ទើបស្គាល់លោកឡើយ។ យើងនឹងពិចារណាអ្វីបួនយ៉ាងដែលយើងអាចធ្វើដើម្បីពង្រឹងចំណងមិត្តភាពរបស់យើងជាមួយនឹងលោក។ ប៉ុន្តែមុនដំបូង សូមយើងពិចារណាអំពីមូលហេតុដែលយើងគួរមានចំណងមិត្តភាពជិតស្និទ្ធជាមួយនឹងគ្រិស្ត។
ហេតុអ្វីយើងត្រូវធ្វើជាមិត្តសម្លាញ់ របស់លោកយេស៊ូ?
៥. ហេតុអ្វីយើងត្រូវធ្វើជាមិត្តរបស់លោកយេស៊ូ? (សូមមើលផងដែរនូវប្រអប់ដែលមានចំណងជើងថា « ការមានមិត្តភាពជាមួយលោកយេស៊ូនាំឲ្យមានមិត្តភាពជាមួយព្រះយេហូវ៉ា» និង« ការមានទស្សនៈត្រឹមត្រូវចំពោះតួនាទីរបស់លោកយេស៊ូ»)
៥ យើងត្រូវធ្វើជាមិត្តរបស់លោកយេស៊ូ បើយើងចង់មានចំណងមិត្តភាពជាមួយនឹងព្រះយេហូវ៉ា។ ហេតុអ្វី? សូមគិតអំពីមូលហេតុពីរ។ មូលហេតុទី១ លោកយេស៊ូបានប្រាប់អ្នកកាន់តាមលោកថា៖ «បិតានៅស្ថានសួគ៌ស្រឡាញ់អ្នករាល់គ្នា ពីព្រោះអ្នករាល់គ្នាស្រឡាញ់ខ្ញុំ»។ (យ៉ូន. ១៦:២៧) លោកក៏បានមានប្រសាសន៍ដែរថា៖ «គ្មានអ្នកណាអាចមកឯបិតានៅស្ថានសួគ៌បានឡើយ លើកលែងតែអ្នកនោះមកតាមខ្ញុំ»។ (យ៉ូន. ១៤:៦) ការព្យាយាមធ្វើជាមិត្តសម្លាញ់របស់ព្រះយេហូវ៉ាដោយមិនបណ្ដុះចំណងមិត្តភាពជិតស្និទ្ធជាមួយនឹងលោកយេស៊ូ គឺប្រៀបដូចជាការព្យាយាមចូលក្នុងអគារ តែមិនមែនចូលតាមទ្វារ។ លោកយេស៊ូបានប្រើឧទាហរណ៍ស្រដៀងនឹងនេះពេលដែលលោកបានរៀបរាប់អំពីខ្លួនលោកថាជា«ទ្វារសម្រាប់ចៀម»។ (យ៉ូន. ១០:៧) មូលហេតុទី២ គឺលោកយេស៊ូមានគុណសម្បត្តិដូចបិតាលោកបេះបិទ។ លោកបានមានប្រសាសន៍ទៅកាន់អ្នកកាន់តាមលោកថា៖ «អ្នកណាដែលបានឃើញខ្ញុំ អ្នកនោះបានឃើញបិតាដែលនៅស្ថានសួគ៌ហើយ»។ (យ៉ូន. ១៤:៩) ហេតុនេះ របៀបដ៏សំខាន់មួយដែលយើងស្គាល់ព្រះយេហូវ៉ាគឺដោយរៀនអំពីជីវិតរបស់លោកយេស៊ូ។ កាលដែលយើងរៀនអំពីលោកយេស៊ូ សេចក្ដីស្រឡាញ់របស់យើងចំពោះលោកនឹងកើនឡើង។ ម្យ៉ាងទៀត កាលដែលយើងកាន់តែស្រឡាញ់លោកយេស៊ូ យើងនឹងកាន់តែស្រឡាញ់បិតារបស់លោក។
៦. តើអ្វីជាមូលហេតុមួយទៀតដែលយើងត្រូវមានចំណងមិត្តភាពជាមួយនឹងលោកយេស៊ូ? សូមពន្យល់។
៦ យើងត្រូវមានចំណងមិត្តភាពជាមួយនឹងលោកយេស៊ូដើម្បីទទួលចម្លើយចំពោះសេចក្ដីអធិដ្ឋានរបស់យើង។ នេះមានន័យថាយើងមិនគ្រាន់តែត្រូវនិយាយ«ដោយនូវនាមរបស់លោកយេស៊ូ»នៅចុងបញ្ចប់នៃសេចក្ដីអធិដ្ឋានរបស់យើងប៉ុណ្ណោះទេ។ យើងក៏ត្រូវដឹងអំពីរបៀបដែលព្រះយេហូវ៉ាប្រើលោកយេស៊ូក្នុងការតបឆ្លើយចំពោះសេចក្ដីអធិដ្ឋានរបស់យើងដែរ។ លោកយេស៊ូបានប្រាប់ពួកសាវ័កថា៖ «អ្វីក៏ដោយដែលអ្នករាល់គ្នាសុំដោយនូវឈ្មោះរបស់ខ្ញុំ នោះខ្ញុំនឹងធ្វើ»។ (យ៉ូន. ១៤:១៣) ទោះជាព្រះយេហូវ៉ាជាបុគ្គលដែលស្ដាប់និងតបឆ្លើយសេចក្ដីអធិដ្ឋានរបស់យើងក្ដី លោកបានប្រគល់អំណាចឲ្យលោកយេស៊ូដើម្បីធ្វើតាមការសម្រេចចិត្តរបស់លោក។ (ម៉ាថ. ២៨:១៨) យ៉ាងនេះ មុនព្រះតបឆ្លើយសេចក្ដីអធិដ្ឋានរបស់យើង លោកមើលថាតើយើងបានធ្វើតាមយោបល់ដែលលោកយេស៊ូបានឲ្យឬយ៉ាងណា។ ជាឧទាហរណ៍ លោកយេស៊ូបានមានប្រសាសន៍ថា៖ «បើអ្នកអភ័យទោសចំពោះកំហុសរបស់អ្នកឯទៀត នោះបិតារបស់អ្នកដែលនៅស្ថានសួគ៌ក៏នឹងអភ័យទោសឲ្យអ្នកដែរ។ ក៏ប៉ុន្តែ បើអ្នករាល់គ្នាមិនអភ័យទោសចំពោះកំហុសរបស់អ្នកឯទៀតទេ នោះបិតារបស់អ្នកក៏មិនអភ័យទោសចំពោះកំហុសរបស់អ្នកដែរ»។ (ម៉ាថ. ៦:១៤, ១៥) យ៉ាងនេះ គឺសំខាន់ណាស់ដែលយើងប្រព្រឹត្តចំពោះអ្នកឯទៀតដូចដែលព្រះយេហូវ៉ានិងលោកយេស៊ូប្រព្រឹត្តចំពោះយើង!
៧. តើអ្នកណាទទួលប្រយោជន៍ពីគ្រឿងបូជាលោះរបស់លោកយេស៊ូ?
៧ មានតែពួកអ្នកដែលមានចំណងមិត្តភាពជាមួយលោកយេស៊ូប៉ុណ្ណោះ ដែលនឹងទទួលប្រយោជន៍ពីគ្រឿងបូជាលោះរបស់លោក។ តើយើងដឹងយ៉ាងដូចម្ដេច? លោកយេស៊ូបានមានប្រសាសន៍ថាលោកនឹង«លះបង់ជីវិតដើម្បីមិត្តសម្លាញ់របស់ខ្លួន»។ (យ៉ូន. ១៥:១៣) បុគ្គលស្មោះត្រង់ដែលរស់នៅមុនលោកយេស៊ូមកផែនដី នឹងត្រូវរៀនអំពីលោក ហើយចាប់ផ្ដើមស្រឡាញ់លោក។ បុរសស្ត្រីដូចជាអាប្រាហាំ សារ៉ា ម៉ូសេ និងរ៉ាហាប នឹងត្រូវប្រោសឲ្យរស់ឡើងវិញ ប៉ុន្តែសូម្បីតែអ្នកបម្រើព្រះយេហូវ៉ាដ៏សុចរិតទាំងនេះនឹងត្រូវបណ្ដុះចំណងមិត្តភាពជាមួយនឹងលោកយេស៊ូដើម្បីទទួលជីវិតដែលគ្មានទីបញ្ចប់។—យ៉ូន. ១៧:៣; សកម្ម. ២៤:១៥; ហេ. ១១:៨-១២, ២៤-២៦, ៣១
៨-៩. ដូចបានពន្យល់នៅយ៉ូហាន ១៥:៤, ៥ តើចំណងមិត្តភាពរបស់យើងជាមួយនឹងលោកយេស៊ូអាចឲ្យយើងធ្វើអ្វី ហើយហេតុអ្វីនោះសំខាន់?
៨ យើងសប្បាយចិត្តរួមការងារជាមួយនឹងលោកយេស៊ូក្នុងការផ្សព្វផ្សាយនិងការបង្រៀនដំណឹងល្អអំពីរាជាណាចក្រព្រះ។ ពេលលោកយេស៊ូនៅផែនដី លោកគឺជាអ្នកបង្រៀន។ ម្យ៉ាងទៀត តាំងពីលោកត្រឡប់ទៅស្ថានសួគ៌វិញ លោកបានបន្តដឹកនាំកិច្ចការផ្សព្វផ្សាយនិងការបង្រៀនក្នុងនាមជាប្រមុខក្រុមជំនុំ។ លោកឃើញនិងឲ្យតម្លៃចំពោះការខំប្រឹងរបស់អ្នកក្នុងការជួយមនុស្សច្រើនបំផុតឲ្យស្គាល់លោកនិងបិតារបស់លោក។ តាមពិត របៀបតែមួយគត់ដែលយើងអាចបំពេញកិច្ចការនេះបាន គឺដោយមានជំនួយពីព្រះយេហូវ៉ានិងលោកយេស៊ូ។—សូមអាន យ៉ូហាន ១៥:៤, ៥
៩ បណ្ដាំរបស់ព្រះបង្រៀនយ៉ាងច្បាស់ថា ដើម្បីឲ្យព្រះយេហូវ៉ាពេញចិត្ត យើងត្រូវស្រឡាញ់លោកយេស៊ូ ហើយបន្តស្រឡាញ់លោកជានិច្ច។ ដូច្នេះ សូមយើងពិចារណាចំណុចបួនយ៉ាងដែលយើងអាចធ្វើតាមដើម្បីទៅជាមិត្តសម្លាញ់លោកយេស៊ូ។
របៀបបណ្ដុះឲ្យមានចំណងមិត្តភាពជាមួយនឹងលោកយេស៊ូ
អ្នកអាចទៅជាមិត្តសម្លាញ់របស់លោកយេស៊ូដោយ (១) ស្គាល់លោកឲ្យបានច្បាស់ជាង (២) មានរបៀបគិតគូរនិងការប្រព្រឹត្តដូចលោក (៣) គាំទ្របងប្អូនរបស់គ្រិស្ត និង(៤) ធ្វើតាមការរៀបចំរបស់ក្រុមជំនុំ (សូមមើលវគ្គ១០-១៤) *
១០. ដើម្បីមានចំណងមិត្តភាពជាមួយនឹងលោកយេស៊ូ តើយើងត្រូវធ្វើ?
១០ (១) ចូរស្គាល់លោកយេស៊ូ។ យើងអាចធ្វើដូច្នេះដោយអានសៀវភៅម៉ាថាយ ម៉ាកុស លូកា និងយ៉ូហាន។ កាលដែលយើងរំពឹងគិតអំពីកំណត់ហេតុក្នុងគម្ពីរអំពីជីវិតរបស់លោកយេស៊ូ យើងស្រឡាញ់និងគោរពលោក ដោយសារលោកបានប្រព្រឹត្តដោយសប្បុរសចំពោះមនុស្សឯទៀត។ ជាឧទាហរណ៍ ទោះជាលោកជាម្ចាស់របស់ពួកគេក្ដី លោកមិនបានប្រព្រឹត្តទៅលើអ្នកកាន់តាមលោកដូចខ្ញុំបម្រើឡើយ។ ផ្ទុយទៅវិញ លោកបានប្រាប់ពួកគេអំពីគំនិតនិងអារម្មណ៍របស់លោក។ (យ៉ូន. ១៥:១៥) ពេលពួកគេកើតទុក្ខ លោកយេស៊ូក៏កើតទុក្ខដែរ ហើយយំជាមួយនឹងពួកគេ។ (យ៉ូន. ១១:៣២-៣៦) សូម្បីតែអ្នកប្រឆាំងលោកក៏ទទួលស្គាល់ថាលោកគឺជាមិត្តរបស់ពួកអ្នកដែលស្ដាប់ដំណឹងដែលលោកផ្សាយ។ (ម៉ាថ. ១១:១៩) ពេលយើងយកតម្រាប់លោកយេស៊ូក្នុងរបៀបដែលលោកប្រព្រឹត្តចំពោះអ្នកកាន់តាមលោក ចំណងមិត្តភាពរបស់យើងជាមួយនឹងអ្នកឯទៀតនឹងល្អជាង យើងស្កប់ចិត្តនិងសប្បាយចិត្តជាង ហើយយើងកាន់តែស្រឡាញ់និងគោរពលោក។
១១. តើចំណុចទី២ដែលយើងត្រូវធ្វើដើម្បីទៅជាមិត្តសម្លាញ់លោកយេស៊ូគឺជាអ្វី ហើយហេតុអ្វីនោះសំខាន់?
១១ (២) ចូរមានរបៀបគិតគូរនិងការប្រព្រឹត្តដូចលោកយេស៊ូ។ កាលដែលយើងកាន់តែស្គាល់និងមានរបៀបគិតគូរដូចលោក យើងនឹងកាន់តែមានចំណងមិត្តភាពជិតស្និទ្ធជាមួយនឹងលោក។ (១កូ. ២:១៦) តើយើងអាចយកតម្រាប់លោកយេស៊ូយ៉ាងដូចម្ដេច? សូមគិតអំពីឧទាហរណ៍មួយ។ លោកយេស៊ូបានគិតអំពីការជួយអ្នកឯទៀត ច្រើនជាងគិតអំពីការបំពេញចិត្តខ្លួនឯង។ (ម៉ាថ. ២០:២៨; រ៉ូម ១៥:១-៣) ដោយសារលោកមានចិត្តគំនិតដូចនេះ លោកជាបុគ្គលដែលលះបង់ប្រយោជន៍ខ្លួននិងចេះអភ័យទោសឲ្យអ្នកឯទៀត។ លោកមិនងាយទើសចិត្តនឹងអ្វីដែលអ្នកឯទៀតនិយាយអំពីលោកទេ។ (យ៉ូន. ១:៤៦, ៤៧) ម្យ៉ាងទៀត លោកមិនឲ្យកំហុសនៅអតីតកាលរបស់អ្នកឯទៀត មានឥទ្ធិពលទៅលើទស្សនៈរបស់លោកចំពោះពួកគេឡើយ។ (១ធី. ១:១២-១៤) លោកយេស៊ូបានមានប្រសាសន៍ថា៖ «មនុស្សគ្រប់គ្នានឹងដឹងថាអ្នករាល់គ្នាជាអ្នកកាន់តាមខ្ញុំ បើអ្នករាល់គ្នាស្រឡាញ់គ្នា»។ (យ៉ូន. ១៣:៣៥) គឺជាការល្អដែលអ្នកសួរខ្លួនថា «តើខ្ញុំកំពុងធ្វើតាមគំរូរបស់លោកយេស៊ូដោយខំអស់ពីសមត្ថភាពដើម្បីរក្សាសន្តិភាពជាមួយនឹងបងប្អូនរបស់ខ្ញុំឬទេ?»។
១២. តើចំណុចទី៣ដែលយើងត្រូវធ្វើដើម្បីទៅជាមិត្តសម្លាញ់លោកយេស៊ូគឺជាអ្វី ហើយតើយើងអាចធ្វើតាមចំណុចនេះយ៉ាងដូចម្ដេច?
១២ (៣) ចូរគាំទ្របងប្អូនរបស់គ្រិស្ត។ លោកយេស៊ូចាត់ទុកថាអ្វីដែលយើងធ្វើដើម្បីបងប្អូនរបស់លោកដែលបានត្រូវរើសតាំង គឺហាក់ដូចជាធ្វើដើម្បីលោក។ (ម៉ាថ. ២៥:៣៤-៤០) របៀបដ៏សំខាន់បំផុតដែលយើងគាំទ្រពួកអ្នកដែលព្រះបានរើសតាំង គឺដោយចូលរួមយ៉ាងពេញលេញក្នុងកិច្ចការផ្សព្វផ្សាយរាជាណាចក្រនិងកិច្ចការបង្រៀនអ្នកឯទៀតឲ្យទៅជាអ្នកកាន់តាមលោកយេស៊ូដែលលោកបានណែនាំអ្នកកាន់តាមលោកឲ្យធ្វើ។ (ម៉ាថ. ២៨:១៩, ២០; សកម្ម. ១០:៤២) លុះត្រាតែមានជំនួយពី«ចៀមឯទៀត» ទើបបងប្អូនរបស់គ្រិស្តអាចបំពេញកិច្ចការផ្សព្វផ្សាយដ៏អស្ចារ្យនៅទូទាំងពិភពលោក ដែលកំពុងធ្វើឡើងនៅសព្វថ្ងៃនេះ។ (យ៉ូន. ១០:១៦) បើអ្នកជាចៀមឯទៀត រាល់ពេលដែលអ្នកចូលរួមក្នុងកិច្ចការនេះ អ្នកបង្ហាញសេចក្ដីស្រឡាញ់ចំពោះបងប្អូនរបស់គ្រិស្តផងនិងលោកយេស៊ូផង។
១៣. តើយើងអាចធ្វើតាមយោបល់របស់លោកយេស៊ូដែលបានត្រូវកត់ទុកនៅលូកា ១៦:៩យ៉ាងដូចម្ដេច?
១៣ យើងក៏ធ្វើជាមិត្តសម្លាញ់របស់ព្រះយេហូវ៉ានិងលោកយេស៊ូ ដោយធ្វើវិភាគទានដើម្បីគាំទ្រកិច្ចការដែលលោកទាំងពីរកំពុងដឹកនាំ។ (សូមអាន លូកា ១៦:៩) ជាឧទាហរណ៍ យើងអាចធ្វើវិភាគទានសម្រាប់កិច្ចការទូទាំងពិភពលោក ដែលរួមបញ្ចូលវិភាគទានសម្រាប់កិច្ចការផ្សព្វផ្សាយដំណឹងល្អនៅតំបន់ដាច់ស្រយាល ការសាងសង់និងថែទាំអគារសម្រាប់ការគោរពប្រណិប័តន៍ពិត ព្រមទាំងការផ្ដល់ជំនួយដល់ពួកអ្នកដែលរងគ្រោះពីមហន្តរាយធម្មជាតិជាដើម។ យើងក៏អាចដាក់វិភាគទានដើម្បីជួយចេញថ្លៃចំណាយរបស់ក្រុមជំនុំយើង ហើយយើងអាចជួយពួកអ្នកដែលយើងដឹងថាត្រូវការជំនួយ។ (សុភ. ១៩:១៧) អ្វីទាំងនេះគឺជារបៀបដែលយើងអាចគាំទ្របងប្អូនរបស់គ្រិស្ត។
១៤. ដូចបង្ហាញនៅអេភេសូរ ៤:១៥, ១៦ តើចំណុចទី៤ដែលយើងត្រូវធ្វើដើម្បីទៅជាមិត្តសម្លាញ់លោកយេស៊ូគឺជាអ្វី?
១៤ (៤) ចូរគាំទ្រការរៀបចំរបស់ក្រុមជំនុំគ្រិស្តសាសនិក។ យើងកាន់តែជិតស្និទ្ធនឹងលោកយេស៊ូដែលជាប្រមុខក្រុមជំនុំ ពេលយើងសហការជាមួយនឹងពួកអ្នកដែលបានត្រូវតែងតាំងឲ្យថែរក្សាយើង។ (សូមអាន អេភេសូរ ៤:១៥, ១៦) ជាឧទាហរណ៍ សព្វថ្ងៃនេះយើងកំពុងព្យាយាមធ្វើឲ្យប្រាកដថាសាលប្រជុំទាំងអស់បានត្រូវប្រើយ៉ាងល្អបំផុត។ ដើម្បីធ្វើដូច្នេះ ក្រុមជំនុំខ្លះបានត្រូវបញ្ចូលគ្នា ហើយតំបន់ផ្សាយបានត្រូវផ្លាស់ប្ដូរ។ យ៉ាងនេះ អង្គការព្រះយេហូវ៉ាបានសន្សំសំចៃលុយច្រើនដែលបានទទួលជាវិភាគទាន។ ក៏ប៉ុន្តែ ដោយហេតុនេះ អ្នកផ្សាយខ្លះត្រូវសម្របខ្លួនទៅតាមស្ថានភាពថ្មី។ អ្នកផ្សាយដ៏ស្មោះត្រង់ទាំងនេះប្រហែលជាធ្លាប់បម្រើនៅក្រុមជំនុំមួយអស់ជាច្រើនឆ្នាំ ហើយប្រហែលជាជិតស្និទ្ធនឹងបងប្អូនក្នុងក្រុមជំនុំនោះ។ ប៉ុន្តែឥឡូវពួកគេបានត្រូវសុំឲ្យបម្រើនៅក្រុមជំនុំផ្សេង។ លោកយេស៊ូប្រាកដជាពេញចិត្តពេលលោកឃើញអ្នកកាន់តាមដ៏ស្មោះត្រង់ទាំងនេះធ្វើតាមការរៀបចំនេះ!
ចូរធ្វើជាមិត្តសម្លាញ់របស់លោកយេស៊ូជារៀងរហូត
១៥. នៅថ្ងៃអនាគត តើចំណងមិត្តភាពរបស់យើងជាមួយនឹងលោកយេស៊ូនឹងកាន់តែជិតស្និទ្ធយ៉ាងដូចម្ដេច?
១៥ ពួកអ្នកដែលបានត្រូវរើសតាំងដោយសកម្មពលបរិសុទ្ធមានសេចក្ដីសង្ឃឹមនៅជាមួយនឹងលោកយេស៊ូជារៀងរហូត ហើយគ្រប់គ្រងជាមួយលោកក្នុងរាជាណាចក្ររបស់ព្រះ។ ពួកគេនឹងនៅជាមួយគ្រិស្ត ក្នុងន័យថាពួកគេឃើញលោក និយាយជាមួយនឹងលោក និងចំណាយពេលជាមួយនឹងលោក។ (យ៉ូន. ១៤:២, ៣) រីឯ ពួកអ្នកដែលមានសេចក្ដីសង្ឃឹមនៅផែនដីក៏នឹងទទួលសេចក្ដីស្រឡាញ់និងការយកចិត្តទុកដាក់ពីលោកយេស៊ូដែរ។ ទោះជាពួកគេមិនឃើញលោកយេស៊ូក្ដី មិត្តភាពរបស់ពួកគេជាមួយលោកនឹងកាន់តែជិតស្និទ្ធ កាលដែលពួកគេសប្បាយនឹងជីវិតដែលព្រះយេហូវ៉ានិងលោកយេស៊ូផ្ដល់ឲ្យពួកគេ។—អេ. ៩:៦, ៧
១៦. តើការមានចំណងមិត្តភាពជាមួយនឹងលោកយេស៊ូនាំឲ្យមានប្រយោជន៍អ្វីខ្លះ?
១៦ ពេលយើងទទួលការអញ្ជើញរបស់លោកយេស៊ូឲ្យធ្វើជាមិត្តសម្លាញ់របស់លោក យើងក៏ទទួលពរជាច្រើនដែរ។ ជាឧទាហរណ៍ យើងទទួលសេចក្ដីស្រឡាញ់និងការគាំទ្រពីលោកនៅឥឡូវនេះ។ យើងមានឱកាសរស់ជារៀងរហូត ហើយសំខាន់បំផុត ចំណងមិត្តភាពរបស់យើងជាមួយនឹងលោកយេស៊ូនឹងផ្ដល់ឲ្យយើងនូវមិត្តភាពដ៏មានតម្លៃបំផុត ពោលគឺមិត្តភាពដ៏ជិតស្និទ្ធដោយផ្ទាល់ជាមួយនឹងព្រះយេហូវ៉ាដែលជាបិតារបស់លោកយេស៊ូ។ ការដែលយើងបានត្រូវហៅថាមិត្តសម្លាញ់របស់លោកយេស៊ូ គឺពិតជាកិត្តិយសដ៏ពិសេសមែន!
ចម្រៀងលេខ១៧ ចូរបង្ហាញចិត្តមេត្តាដូចគ្រិស្ត
^ វគ្គ 5 ពួកសាវ័កបាននិយាយនិងធ្វើការជាមួយនឹងលោកយេស៊ូអស់ប៉ុន្មានឆ្នាំ ដូច្នេះពួកគាត់បានទៅជាមិត្តសម្លាញ់នឹងគ្នា។ លោកយេស៊ូក៏ចង់ឲ្យយើងធ្វើជាមិត្តសម្លាញ់របស់លោកដែរ តែយើងមានការពិបាកផ្សេងៗដែលពួកសាវ័កមិនមានទេ។ ក្នុងអត្ថបទនេះ យើងនឹងពិចារណាអំពីការពិបាកខ្លះ ហើយទទួលយោបល់ដែលទាក់ទងនឹងរបៀបបណ្ដុះនិងរក្សាមិត្តភាពជិតស្និទ្ធជាមួយនឹងលោកយេស៊ូ។
^ វគ្គ 55 ការពណ៌នាអំពីរូបភាព: (១) ក្នុងអំឡុងការគោរពប្រណិប័តន៍ជាក្រុមគ្រួសារ យើងអាចសិក្សាអំពីជីវិតនិងកិច្ចបម្រើរបស់លោកយេស៊ូ។ (២) ក្នុងក្រុមជំនុំ យើងអាចខំប្រឹងធ្វើឲ្យមានសន្តិភាពជាមួយនឹងបងប្អូនរបស់យើង។ (៣) ដោយខំអស់ពីសមត្ថភាពក្នុងកិច្ចបម្រើផ្សាយ យើងអាចគាំទ្របងប្អូនរបស់គ្រិស្ត។ (៤) ពេលក្រុមជំនុំបានត្រូវបញ្ចូលគ្នា យើងអាចចុះចូលនឹងការសម្រេចចិត្តរបស់ពួកអ្នកចាស់ទុំ។
