អត្ថបទសិក្សា ១៥
តើអ្នកមានទស្សនៈយ៉ាងណាចំពោះវាលស្រូវ?
«ចូរងើយភ្នែកមើលវាលស្រូវ ឃើញថាស្រូវនោះទុំល្មមច្រូតហើយ»។—យ៉ូន. ៤:៣៥
ចម្រៀងលេខ៦៤ ការចូលរួមប្រមូលផលដោយអំណរ
សេចក្ដីសង្ខេប *
១-២. តើលោកយេស៊ូចង់មានន័យយ៉ាងណាពេលលោកមានប្រសាសន៍នៅយ៉ូហាន ៤:៣៥, ៣៦?
លោកយេស៊ូបានធ្វើដំណើរកាត់វាលស្រូវ ដែលទំនងជាទើបតែចេញពន្លក។ (យ៉ូន. ៤:៣-៦) លោកមានប្រសាសន៍ថា៖ «ចូរងើយភ្នែកមើលវាលស្រូវ ឃើញថាស្រូវនោះទុំល្មមច្រូតហើយ»។ (សូមអាន យ៉ូហាន ៤:៣៥, ៣៦) ស្ដាប់ទៅចម្លែកពេលលោកមានប្រសាសន៍នេះ ពីព្រោះប្រហែលជានៅសល់បួនខែទៀត ទើបស្រូវនោះអាចច្រូតកាត់បាន។ ដូច្នេះ តើលោកចង់មានន័យយ៉ាងណា?
២ តាមមើលទៅ លោកយេស៊ូកំពុងមានប្រសាសន៍អំពីការប្រមូលមនុស្សមិនមែនស្រូវទេ។ សូមគិតអំពីអ្វីដែលទើបតែបានកើតឡើងមុនលោកមានប្រសាសន៍នេះ។ ទោះជាតាមធម្មតា ជនជាតិយូដាមិនទាក់ទងជាមួយនឹងជនជាតិសាម៉ារីក្ដី លោកយេស៊ូបានផ្សព្វផ្សាយដល់ស្ត្រីម្នាក់ដែលជាជនជាតិសាម៉ារី ហើយគាត់បានស្ដាប់លោក! តាមពិតទៅ កាលដែលលោកកំពុងមានប្រសាសន៍អំពីវាលស្រូវដែល«ល្មមច្រូតហើយ» នោះជនជាតិសាម៉ារីមួយក្រុមដែលបានឮអំពីលោកយេស៊ូតាមរយៈស្ត្រីនោះ កំពុងមកជួបលោកដើម្បីរៀនថែមទៀត។ (យ៉ូន. ៤:៩, ៣៩-៤២) សៀវភៅមួយដែលពន្យល់អំពីគម្ពីរ រៀបរាប់អំពីកំណត់ហេតុនេះថា៖ «ចិត្តខ្នះខ្នែងរបស់មនុស្សមួយក្រុមនោះ . . . បង្ហាញថាពួកគេគឺប្រៀបដូចជាស្រូវដែលទុំល្មមច្រូត»។
តើយើងគួរធ្វើអ្វីបើយើងមានអារម្មណ៍ថាវាលស្រូវរបស់យើង«ទុំល្មមច្រូតហើយ»? (សូមមើលវគ្គ៣)
៣. បើអ្នកមានទស្សនៈដូចលោកយេស៊ូចំពោះមនុស្ស តើអ្វីនឹងកើតឡើង?
៣ ពេលអ្នកផ្សព្វផ្សាយដំណឹងល្អដល់អ្នកឯទៀត តើអ្នកមានទស្សនៈយ៉ាងណាចំពោះពួកគេ? តើអ្នកចាត់ទុកថាពួកគេប្រៀបដូចជាស្រូវដែលទុំល្មមច្រូតឬទេ? បើអ្នកមានទស្សនៈនេះ អ្វីបីយ៉ាងនឹងកើតឡើង។ ទី១ អ្នកនឹងផ្សព្វផ្សាយកាន់តែបន្ទាន់។ ហេតុអ្វីយើងនិយាយដូច្នេះ? រដូវច្រូតកាត់គឺមានកំណត់ ហេតុនេះគ្មានពេលបង្អែបង្អង់ឡើយ។ ទី២ អ្នកនឹងសប្បាយចិត្តកាលដែលអ្នកឃើញមនុស្សឯទៀតស្ដាប់ដំណឹងល្អ។ គម្ពីរចែងថា៖ «[បណ្ដាជន]មានសេចក្ដីអំណរ . . . ក្នុងរដូវចំរូត»។ (អេ. ៩:៣) ទី៣ អ្នកនឹងមានទស្សនៈថាបុគ្គលម្នាក់ៗអាចទៅជាអ្នកកាន់តាមលោកយេស៊ូ យ៉ាងនេះអ្នកនឹងកែប្រែពាក្យផ្សាយរបស់អ្នកទៅតាមចំណាប់អារម្មណ៍របស់ពួកគេ។
៤. ក្នុងអត្ថបទនេះ តើយើងនឹងរៀនអ្វីពីសាវ័កប៉ូល?
៤ អ្នកកាន់តាមខ្លះរបស់លោកយេស៊ូប្រហែលជាបានគិតថាជនជាតិសាម៉ារីនឹងមិនអាចទៅជាអ្នកកាន់តាមលោកឡើយ ក៏ប៉ុន្តែលោកយេស៊ូមិនបានគិតដូច្នេះទេ។ លោកបានយល់ថាពួកគេអាចទៅជាអ្នកកាន់តាមលោកបាន។ យើងក៏ត្រូវមានទស្សនៈថាមនុស្សក្នុងតំបន់ផ្សាយរបស់យើងអាចទៅជាអ្នកកាន់តាមគ្រិស្តដែរ។ សាវ័កប៉ូលបានទុកគំរូដ៏ប្រសើរសម្រាប់យើង។ តើយើងអាចរៀនអ្វីពីគាត់? ក្នុងអត្ថបទនេះ យើងនឹងពិចារណាអំពីរបៀបដែលគាត់ (១) ស្គាល់ខ្លះៗអំពីជំនឿរបស់ពួកអ្នកដែលគាត់បានផ្សព្វផ្សាយ (២) ស្គាល់ចំណាប់អារម្មណ៍របស់ពួកគេ និង(៣) មានទស្សនៈថាពួកគេអាចទៅជាអ្នកកាន់តាមលោកយេស៊ូ។
តើពួកគេជឿអ្វីខ្លះ?
៥. ហេតុអ្វីប៉ូលអាចយល់អំពីទស្សនៈរបស់អ្នកស្ដាប់គាត់នៅសាលាប្រជុំ?
៥ ប៉ូលច្រើនតែផ្សព្វផ្សាយនៅសាលាប្រជុំរបស់ជនជាតិយូដា។ ជាឧទាហរណ៍ នៅសាលាប្រជុំនាក្រុងថែស្សាឡូនិច គាត់«បានយកបទគម្ពីរមកជជែកវែកញែកជាមួយនឹង[ជនជាតិយូដា]អស់បីថ្ងៃឈប់សម្រាក»។ (សកម្ម. ១៧:១, ២) ប៉ូលទំនងជាមានអារម្មណ៍ស្រួលនៅសាលាប្រជុំ។ គាត់បានត្រូវចិញ្ចឹមអប់រំក្នុងសាសនាយូដា។ (សកម្ម. ២៦:៤, ៥) ប៉ូលយល់អំពីទស្សនៈរបស់ជនជាតិយូដា ដូច្នេះគាត់អាចផ្សព្វផ្សាយដល់ពួកគេដោយមានទំនុកចិត្ត។—ភី. ៣:៤, ៥
៦. តើមនុស្សនៅឯផ្សារនាក្រុងអាថែនខុសគ្នាយ៉ាងណាពីពួកអ្នកដែលប៉ូលបានផ្សព្វផ្សាយនៅសាលាប្រជុំ?
៦ ក្រោយពីអ្នកប្រឆាំងបានបង្ខំប៉ូលឲ្យរត់ភៀសខ្លួនទៅក្រុងថែស្សាឡូនិច ហើយបន្ទាប់មកក្រុងបេរៀ គាត់មកដល់ក្រុងអាថែន។ ម្ដងនេះទៀត «គាត់ចាប់ផ្ដើមជជែកវែកញែកជាមួយនឹងជនជាតិយូដានៅសាលាប្រជុំ ជាមួយនឹងមនុស្សឯទៀតដែលគោរពប្រណិប័តន៍ព្រះ»។ (សកម្ម. ១៧:១៧) ប៉ុន្តែពេលប៉ូលផ្សព្វផ្សាយនៅឯផ្សារ គាត់បានជួបមនុស្សប្រភេទផ្សេង។ ក្នុងចំណោមមនុស្សដែលស្ដាប់គាត់នៅទីនោះមានទស្សនវិទូនិងជនជាតិដទៃឯទៀតដែលចាត់ទុកដំណឹងរបស់ប៉ូលជា«សេចក្ដីបង្រៀនថ្មី»។ ពួកគេបាននិយាយទៅកាន់គាត់ថា៖ «អ្នកកំពុងនិយាយអំពីរឿងចម្លែកណាស់»។—សកម្ម. ១៧:១៨-២០
៧. យោងទៅតាមសកម្មភាព ១៧:២២, ២៣ តើប៉ូលបានផ្លាស់ប្ដូរពាក្យផ្សាយរបស់គាត់យ៉ាងដូចម្ដេច?
៧ សូមអាន សកម្មភាព ១៧:២២, ២៣។ របៀបដែលប៉ូលបានផ្សព្វផ្សាយដល់ជនជាតិដទៃនៅក្រុងអាថែនគឺខុសពីរបៀបដែលគាត់ផ្សព្វផ្សាយដល់ជនជាតិយូដានៅសាលាប្រជុំ។ ប៉ូលទំនងជាបានសួរខ្លួនថា ‹តើអ្នកក្រុងអាថែននេះជឿអ្វី?›។ គាត់បានសង្កេតមើលអ្វីៗដែលនៅជុំវិញគាត់យ៉ាងយកចិត្តទុកដាក់ ហើយកត់សម្គាល់អំពីទំនៀមទម្លាប់សាសនារបស់បណ្ដាជន។ រួចមក ប៉ូលបានស្វែងរកចំណុចយល់ស្របអំពីការគោរពប្រណិប័តន៍របស់ពួកគេនិងសេចក្ដីពិតពីបទគម្ពីរ។ អ្នកអត្ថាធិប្បាយខាងគម្ពីរម្នាក់និយាយថា៖ «ក្នុងនាមជាគ្រិស្តសាសនិកជនជាតិយូដា គាត់ទទួលស្គាល់ថាបុគ្គលដែលនិយាយភាសាក្រិចមិនគោរពប្រណិប័តន៍ព្រះពិតរបស់សាសនាយូដានិងគ្រិស្តសាសនិកទេ ប៉ុន្តែគាត់ព្យាយាមបង្ហាញថាព្រះដែលគាត់ផ្សព្វផ្សាយដល់ពួកអ្នកក្រុងអាថែន មិនមែនជាព្រះអាថ៌កំបាំងឡើយ»។ ដូច្នេះ ប៉ូលសុខចិត្តផ្លាស់ប្ដូរពាក្យផ្សាយរបស់គាត់។ គាត់បានប្រាប់អ្នកក្រុងអាថែនថាដំណឹងដែលគាត់ផ្សាយគឺមកពី«ព្រះដែលគេពុំស្គាល់» ហើយដែលពួកគេកំពុងខំគោរពប្រណិប័តន៍។ ទោះជាជនជាតិដទៃមិនស្គាល់បទគម្ពីរក្ដី ប៉ូលមិនបានគិតថាពួកគេនឹងមិនអាចទៅជាគ្រិស្តសាសនិកឡើយ។ ផ្ទុយទៅវិញ គាត់បានចាត់ទុកពួកគេដូចជាស្រូវដែលទុំល្មមច្រូត ហើយគាត់បានកែប្រែពាក្យផ្សាយរបស់គាត់អំពីដំណឹងល្អ។
ចូរធ្វើតាមគំរូរបស់សាវ័កប៉ូល ដោយចេះសង្កេតមើល ប្រែប្រួលពាក្យផ្សាយរបស់អ្នក និងមានទស្សនៈថាមនុស្សឯទៀតអាចទៅជាអ្នកកាន់តាមលោកយេស៊ូ (សូមមើលវគ្គ៨, ១២, ១៨) *
៨. (ក) តើអ្វីអាចជួយអ្នកឲ្យដឹងអំពីជំនឿរបស់មនុស្សក្នុងតំបន់ផ្សាយរបស់អ្នក? (ខ) បើមានអ្នកណាម្នាក់និយាយថាគាត់មានសាសនាផ្ទាល់ខ្លួនរួចហើយ តើអ្នកអាចឆ្លើយតបយ៉ាងណា?
៨ ដូចប៉ូល ចូរចេះសង្កេតមើល។ សូមស្វែងរកអ្វីដែលអាចជួយអ្នកឲ្យដឹងអំពីជំនឿរបស់មនុស្សក្នុងតំបន់ផ្សាយរបស់អ្នក។ ជាឧទាហរណ៍ តើម្ចាស់ផ្ទះតុបតែងផ្ទះ ឬយានជំនិះរបស់គាត់យ៉ាងដូចម្ដេច? តើឈ្មោះ សម្លៀកបំពាក់ ការសម្អិតសម្អាងខ្លួន ឬសូម្បីតែរបៀបនិយាយស្ដីរបស់គាត់បង្ហាញអំពីសាសនារបស់គាត់ឬទេ? ឬមួយក៏គាត់ប្រហែលជាប្រាប់អ្នកចំៗថាគាត់មានសាសនាផ្ទាល់ខ្លួនហើយ។ ពេលម្ចាស់ផ្ទះនិយាយដូច្នេះទៅអ្នកត្រួសត្រាយពិសេសម្នាក់ឈ្មោះហ្វូធូរ៉ា គាត់តបឆ្លើយថា៖ «ខ្ញុំមកទីនេះមិនមែនដើម្បីបង្ខំបងឲ្យមានជំនឿដូចខ្ញុំទេ តែដើម្បីនិយាយជាមួយបងអំពីប្រធានបទនេះ . . . »។
៩. តើអ្នកអាចរកចំណុចយល់ស្របគ្នាអ្វីខ្លះដើម្បីនិយាយជាមួយនឹងមនុស្សដែលកាន់សាសនា?
៩ តើអ្នកអាចពិចារណាប្រធានបទអ្វីខ្លះជាមួយនឹងមនុស្សដែលកាន់សាសនា? សូមព្យាយាមរកចំណុចយល់ស្រប។ ជាឧទាហរណ៍ គាត់ប្រហែលជាគោរពប្រណិប័តន៍ព្រះតែមួយ ឬគាត់ប្រហែលជាទទួលស្គាល់ថាលោកយេស៊ូជាអ្នកសង្គ្រោះមនុស្សជាតិ ឬក៏គាត់ប្រហែលជាជឿថាយើងកំពុងរស់នៅគ្រាដ៏ទុច្ចរិតដែលមិនយូរទៀតនឹងមកដល់ទីបញ្ចប់។ សូមប្រើចំណុចដែលអ្នកនិងគាត់យល់ស្របគ្នាដើម្បីទាក់ទាញចំណាប់អារម្មណ៍របស់គាត់ចំពោះដំណឹងក្នុងគម្ពីរ។
១០. តើយើងគួរព្យាយាមធ្វើអ្វី ហើយហេតុអ្វី?
១០ សូមចាំថាមនុស្សឯទៀតប្រហែលជាមិនជឿអ្វីទាំងអស់ដែលសាសនារបស់ពួកគេបង្រៀននោះទេ។ ដូច្នេះទោះជាក្រោយពីអ្នកស្គាល់ថាគាត់កាន់សាសនាអ្វីក្ដី សូមព្យាយាមស្វែងយល់អំពីអ្វីដែលគាត់ផ្ទាល់ជឿ។ បងប្រុសដាវីឌដែលជាអ្នកត្រួសត្រាយពិសេសនៅប្រទេសអូស្ត្រាលី និយាយថា៖ «សព្វថ្ងៃនេះ មនុស្សជាច្រើនលាយឡំទស្សនវិជ្ជាជាមួយនឹងជំនឿសាសនារបស់ពួកគេ»។ បងស្រីដូណាល់តានៅប្រទេសអាល់បានី និយាយថា៖ «មនុស្សខ្លះដែលយើងជួប និយាយថាពួកគេមានសាសនារបស់ខ្លួនហើយ តែក្រោយមកពួកគេសារភាពថាពួកគេមិនជឿថាមានព្រះទេ»។ មួយវិញទៀត បងប្រុសម្នាក់ដែលជាសាសនទូតនៅប្រទេសអាហ្សង់ទីន ឃើញថាមនុស្សខ្លះនិយាយថាពួកគេជឿលើព្រះបីរួមគ្នាជាព្រះតែមួយ ប៉ុន្តែតាមពិតទៅ ពួកគេប្រហែលជាមិនជឿថាបិតា បុត្រា និងសកម្មពលបរិសុទ្ធជាព្រះតែមួយឡើយ។ គាត់និយាយថា៖ «ពេលដឹងដូច្នេះ ខ្ញុំស្រួលស្វែងរកចំណុចយល់ស្របរវាងខ្ញុំនិងបុគ្គលនោះ»។ ដូច្នេះ សូមព្យាយាមស្វែងយល់អំពីអ្វីដែលមនុស្សពិតជាជឿ។ យ៉ាងនេះ ដូចប៉ូល អ្នកអាច«ធ្វើដូចមនុស្សគ្រប់ប្រភេទ»។—១កូ. ៩:១៩-២៣
តើពួកគេចាប់អារម្មណ៍អ្វី?
១១. ដូចបានចែងនៅសកម្មភាព ១៤:១៤-១៧ តើប៉ូលបានធ្វើអ្វីដើម្បីទាក់ទាញចិត្តមនុស្សនៅក្រុងលីស្ដ្រាឲ្យស្ដាប់ដំណឹងដែលគាត់ផ្សព្វផ្សាយ?
១១ សូមអាន សកម្មភាព ១៤:១៤-១៧។ ប៉ូលបានស្វែងយល់អំពីចំណាប់អារម្មណ៍របស់អ្នកដែលស្ដាប់គាត់ ក្រោយមកគាត់បានប្រែប្រួលពាក្យផ្សាយរបស់គាត់។ ជាឧទាហរណ៍ គាត់បាននិយាយជាមួយមនុស្សមួយក្រុមនៅក្រុងលីស្ដ្រា។ ពួកគេមិនសូវស្គាល់បទគម្ពីរឬមិនស្គាល់សោះ។ ដូច្នេះ ប៉ូលបានវែកញែកតាមរបៀបដែលពួកគេអាចយល់។ គាត់បាននិយាយអំពីរដូវសម្បូរភោគផលនិងការមានជីវិតសប្បាយ។ គាត់បានប្រើពាក្យនិងឧទាហរណ៍ដែលអ្នកស្ដាប់អាចងាយយល់។
១២. តើតាមរបៀបណាអ្នកអាចស្វែងយល់អំពីចំណាប់អារម្មណ៍របស់មនុស្សម្នាក់ ហើយកែប្រែពាក្យផ្សាយរបស់អ្នក?
១២ សូមប្រើការយល់ធ្លុះជ្រៅដើម្បីដឹងអំពីចំណាប់អារម្មណ៍របស់មនុស្សក្នុងតំបន់ផ្សាយរបស់អ្នក ហើយកែប្រែពាក្យផ្សាយរបស់អ្នក។ តើអ្នកអាចស្វែងយល់យ៉ាងដូចម្ដេចអំពីចំណាប់អារម្មណ៍របស់មនុស្សម្នាក់កាលដែលអ្នកទៅជួបគាត់ ឬទៅដល់មាត់ទ្វារផ្ទះរបស់គាត់? ម្ដងទៀត សូមចេះសង្កេតមើល។ ប្រហែលជាគាត់កំពុងថែសួន អានសៀវភៅ ជួសជុលយានជំនិះ ឬធ្វើអ្វីផ្សេងទៀត។ បើសមរម្យ ប្រហែលជាអ្នកអាចចាប់ផ្ដើមការសន្ទនាដោយនិយាយអំពីអ្វីដែលគាត់កំពុងធ្វើ។ (យ៉ូន. ៤:៧) សូម្បីតែសម្លៀកបំពាក់ ក៏អាចប្រាប់អំពីជនជាតិ ការងារ ឬក្រុមកីឡាដែលបុគ្គលម្នាក់ៗចូលចិត្ត។ បងប្រុសហ្គូស្តាវ៉ូនិយាយថា៖ «ខ្ញុំបានចាប់ផ្ដើមការសន្ទនាជាមួយនឹងយុវជនអាយុ១៩ឆ្នាំម្នាក់ ដែលពាក់អាវយឺតរូបតារាចម្រៀងល្បីម្នាក់។ ខ្ញុំបានសួរគាត់អំពីអាវរបស់គាត់ ហើយយុវជននោះបានប្រាប់ខ្ញុំអំពីមូលហេតុដែលគាត់ចូលចិត្តតារាចម្រៀងនោះ។ ការសន្ទនានោះបាននាំទៅដល់ការបង្រៀនគម្ពីរ ហើយឥឡូវគាត់គឺជាបងប្អូនរួមជំនឿម្នាក់របស់យើងដែរ»។
១៣. តើអ្នកអាចស្នើសុំបង្រៀនគម្ពីរដល់អ្នកណាម្នាក់តាមរបៀបដែលទាក់ទាញចិត្តយ៉ាងដូចម្ដេច?
១៣ ពេលអ្នកស្នើសុំបង្រៀនគម្ពីរដល់អ្នកណាម្នាក់ សូមបង្ហាញគាត់អំពីរបៀបដែលការរៀនគម្ពីរនឹងជួយគាត់។ ការធ្វើដូច្នេះអាចទាក់ទាញចិត្តគាត់ឲ្យចង់រៀន។ (យ៉ូន. ៤:១៣-១៥) ជាឧទាហរណ៍ ស្ត្រីម្នាក់ដែលចាប់អារម្មណ៍បានអញ្ជើញបងស្រីផុពីឲ្យចូលក្នុងផ្ទះរបស់គាត់។ ពេលបងផុពីបានឃើញវិញ្ញាបនបត្រនៅលើជញ្ជាំងដែលបញ្ជាក់ថាស្ត្រីនោះជាសាស្ត្រាចារ្យផ្នែកអប់រំ គាត់បានលើកឡើងថាយើងក៏អប់រំមនុស្ស តាមរយៈកម្មវិធីបង្រៀនគម្ពីរនិងកិច្ចប្រជុំរបស់យើងដែរ។ ស្ត្រីនោះបានយល់ព្រមរៀនគម្ពីរ បានទៅកិច្ចប្រជុំនៅថ្ងៃបន្ទាប់ ហើយក៏ចូលរួមសន្និបាតប្រចាំមណ្ឌលមិនយូរក្រោយពីនោះ។ មួយឆ្នាំក្រោយមក គាត់បានទទួលការជ្រមុជទឹក។ សូមសួរខ្លួនអ្នកថា ‹តើមនុស្សដែលខ្ញុំត្រឡប់ទៅជួបចាប់អារម្មណ៍អំពីអ្វី? តើខ្ញុំអាចនិយាយអំពីកម្មវិធីបង្រៀនគម្ពីររបស់យើងតាមរបៀបដែលអាចទាក់ទាញចិត្តពួកគេឬទេ?›។
១៤. តើអ្នកអាចចេះបត់បែនរបៀបដែលអ្នកបង្រៀនទៅតាមសិស្សម្នាក់ៗយ៉ាងដូចម្ដេច?
១៤ ក្រោយពីអ្នកចាប់ផ្ដើមបង្រៀនគម្ពីរ សូមរៀបចំការបង្រៀនគម្ពីរនីមួយៗ ហើយគិតអំពីប្រវត្តិនិងចំណាប់អារម្មណ៍របស់សិស្សម្នាក់ៗ។ កាលដែលអ្នករៀបចំ សូមជ្រើសរើសបទគម្ពីរ វីដេអូ និងឧទាហរណ៍ដែលអ្នកចង់ប្រើដើម្បីពន្យល់អំពីសេចក្ដីបង្រៀនក្នុងគម្ពីរ។ សូមសួរខ្លួនអ្នកថា ‹តើអ្វីនឹងទាក់ទាញចិត្ត ហើយមានឥទ្ធិពលលើចិត្តរបស់សិស្សជាងគេ?›។ (សុភ. ១៦:២៣) នៅប្រទេសអាល់បានី ស្ត្រីម្នាក់ដែលរៀនគម្ពីរជាមួយនឹងអ្នកត្រួសត្រាយម្នាក់ឈ្មោះផ្លូរ៉ា បាននិយាយយ៉ាងដាច់អហង្ការថា៖ «ខ្ញុំមិនអាចជឿសេចក្ដីបង្រៀនអំពីការប្រោសឲ្យរស់ឡើងវិញបានទេ»។ បងស្រីផ្លូរ៉ាមិនបានព្យាយាមបង្ខំស្ត្រីនោះឲ្យជឿឡើយ។ គាត់និយាយថា៖ «ខ្ញុំបានគិតថា ដំបូងគាត់ត្រូវស្គាល់ព្រះដែលសន្យាអំពីការប្រោសឲ្យរស់ឡើងវិញ»។ ចាប់ពីពេលនោះមក រាល់ពេលបង្រៀនគម្ពីរ បងផ្លូរ៉ាបានលើកបញ្ជាក់អំពីសេចក្ដីស្រឡាញ់ ប្រាជ្ញា និងឫទ្ធានុភាពរបស់ព្រះយេហូវ៉ា។ ក្រោយមក សិស្សគម្ពីររបស់គាត់មានជំនឿទៅលើការប្រោសឲ្យរស់ឡើងវិញ។ ឥឡូវ គាត់គឺជាសាក្សីព្រះយេហូវ៉ាដ៏ខ្នះខ្នែងម្នាក់។
ចូរមានទស្សនៈថាពួកគេអាចទៅជាអ្នកកាន់តាមលោកយេស៊ូ
១៥. យោងទៅតាមសកម្មភាព ១៧:១៦-១៨ តើអ្វីខ្លះនៅស្រុកក្រិចសម័យបុរាណធ្វើឲ្យប៉ូលទើសចិត្ត ប៉ុន្តែហេតុអ្វីប៉ូលនៅតែបន្តផ្សព្វផ្សាយដល់អ្នកក្រុងអាថែន?
១៥ សូមអាន សកម្មភាព ១៧:១៦-១៨។ ទោះជាអ្នកក្រុងអាថែនគោរពបូជារូបព្រះ ប្រព្រឹត្តអំពើប្រាសចាកសីលធម៌ខាងផ្លូវភេទ និងជឿលើទស្សនៈវិជ្ជាក្ដី ប៉ូលមិនបានគិតថាពួកគេមិនអាចទៅជាគ្រិស្តសាសនិកទេ។ ម្យ៉ាងទៀត ថ្វីដ្បិតតែពួកគេនិយាយមើលងាយគាត់ក៏ដោយ គាត់មិនបានឈប់ផ្សព្វផ្សាយដល់ពួកគេឡើយ។ ប៉ូលផ្ទាល់បានទៅជាគ្រិស្តសាសនិក ទោះជាគាត់ធ្លាប់ជា«អ្នកប្រមាថព្រះ ជាអ្នកបៀតបៀនរាស្ត្ររបស់លោក និងជាមនុស្សព្រហើន»ក៏ដោយ។ (១ធី. ១:១៣) ដូចលោកយេស៊ូជឿថាប៉ូលអាចទៅជាអ្នកកាន់តាមម្នាក់របស់លោក នោះប៉ូលជឿថាអ្នកក្រុងអាថែនក៏អាចទៅជាអ្នកកាន់តាមលោកយេស៊ូដែរ ហើយនោះមិនធ្វើឲ្យគាត់ខកចិត្តឡើយ។—សកម្ម. ៩:១៣-១៥; ១៧:៣៤
១៦-១៧. តើអ្វីបង្ហាញថាមនុស្សគ្រប់ប្រភេទអាចទៅជាអ្នកកាន់តាមគ្រិស្ត? សូមឲ្យឧទាហរណ៍។
១៦ នៅសតវត្សរ៍ទី១ មនុស្សគ្រប់ប្រភេទបានទៅជាអ្នកកាន់តាមលោកយេស៊ូ។ ពេលប៉ូលបានសរសេរសំបុត្រទៅគ្រិស្តសាសនិកដែលនៅក្រុងកូរិនថូសនាស្រុកក្រិច គាត់បាននិយាយថាអ្នកខ្លះក្នុងក្រុមជំនុំនោះធ្លាប់ជាឧក្រិដ្ឋជន ឬមានរបៀបរស់នៅប្រាសចាកសីលធម៌។ រួចមកគាត់បានបន្ថែមថា៖ «អ្នករាល់គ្នាខ្លះធ្លាប់ជាមនុស្សបែបនោះ។ តែអ្នករាល់គ្នាបានត្រូវលាងសម្អាត»។ (១កូ. ៦:៩-១១) បើអ្នករស់នៅសម័យនោះ តើអ្នកនឹងមានទស្សនៈថាមនុស្សទាំងនោះអាចកែខ្លួនបាន ហើយទៅជាអ្នកកាន់តាមលោកយេស៊ូឬទេ?
១៧ សព្វថ្ងៃនេះ មនុស្សជាច្រើនសុខចិត្តធ្វើការកែប្រែដែលចាំបាច់ដើម្បីទៅជាអ្នកកាន់តាមលោកយេស៊ូ។ ជាឧទាហរណ៍ នៅប្រទេសអូស្ត្រាលី បងស្រីម្នាក់ឈ្មោះយូគីណាបានឃើញថាមនុស្សគ្រប់ប្រភេទអាចស្ដាប់ដំណឹងពីគម្ពីរ។ ពេលមួយនៅការិយាល័យអចលនទ្រព្យ គាត់បានកត់សម្គាល់ឃើញស្ត្រីវ័យក្មេងម្នាក់ដែលមានសាក់ជាច្រើន និងស្លៀកពាក់រយីករយាក។ បងយូគីណានិយាយថា៖ «ដំបូង ខ្ញុំស្ទាក់ស្ទើរ តែក្រោយមកខ្ញុំចាប់ផ្ដើមនិយាយជាមួយនឹងគាត់។ ខ្ញុំបានឃើញថាស្ត្រីនោះចាប់អារម្មណ៍ខ្លាំងណាស់ចំពោះបទគម្ពីររហូតដល់គាត់សាក់ទំនុកតម្កើងខ្លះលើរូបកាយរបស់គាត់!»។ ស្ត្រីនោះបានចាប់ផ្ដើមរៀនគម្ពីរ ហើយចូលរួមកិច្ចប្រជុំ។ *
១៨. ហេតុអ្វីយើងមិនគួរវិនិច្ឆ័យមនុស្សឯទៀត?
១៨ តើលោកយេស៊ូបានគិតថាវាលស្រូវទុំល្មមច្រូត ដោយសារលោកបានរំពឹងថាមនុស្សភាគច្រើននឹងតាមលោកឬ? មិនមែនទេ។ គម្ពីរបានប្រាប់ទុកជាមុនថាមនុស្សមួយចំនួនតូចនឹងមានជំនឿលើលោក។ (យ៉ូន. ១២:៣៧, ៣៨) ម្យ៉ាងទៀត លោកយេស៊ូមានសមត្ថភាពដឹងអំពីចិត្តមនុស្ស។ (ម៉ាថ. ៩:៤) ទោះជាលោកបានផ្ដោតអារម្មណ៍ទៅលើមនុស្សមួយចំនួនតូចក្ដី លោកបានផ្សព្វផ្សាយយ៉ាងខ្នះខ្នែងដល់មនុស្សទាំងអស់។ ចុះទម្រាំតែយើងដែលមិនអាចដឹងអំពីចិត្តមនុស្ស យើងច្បាស់ជាមិនគួរវិនិច្ឆ័យមនុស្សក្នុងតំបន់ផ្សាយណាមួយឬបុគ្គលណាម្នាក់ឡើយ! ផ្ទុយទៅវិញ សូមមានទស្សនៈថាមនុស្សឯទៀតអាចទៅជាអ្នកកាន់តាមលោកយេស៊ូ។ បងប្រុសម៉ាកដែលជាសាសនទូតនៅប្រទេសបួគីណាហ្វាសូ បាននិយាយថា៖ «មនុស្សដែលខ្ញុំគិតថានឹងរីកចម្រើនច្រើនតែឈប់រៀនគម្ពីរ។ តែមនុស្សដែលខ្ញុំគិតថានឹងមិនរីកចម្រើនបែរជារីកចម្រើនទៅវិញ។ ដូច្នេះខ្ញុំបានរៀនថាគឺល្អជាងទុកឲ្យសកម្មពលរបស់ព្រះយេហូវ៉ាណែនាំយើង»។
១៩. តើយើងគួរមានទស្សនៈយ៉ាងណាចំពោះមនុស្សក្នុងតំបន់ផ្សាយ?
១៩ ដំបូង ប្រហែលជាមើលទៅមិនសូវមានមនុស្សច្រើនក្នុងតំបន់ផ្សាយដែលប្រៀបដូចជាស្រូវដែលទុំល្មមច្រូតទេ។ ប៉ុន្តែសូមចាំអ្វីដែលលោកយេស៊ូបានមានប្រសាសន៍ទៅកាន់ពួកអ្នកកាន់តាមលោក ដែលថាវាលស្រូវទុំល្មមច្រូតហើយ។ មនុស្សអាចកែប្រែ ហើយទៅជាអ្នកកាន់តាមគ្រិស្ត។ ម្យ៉ាងទៀត ព្រះយេហូវ៉ាក៏ចាត់ទុកពួកគេថាជា«ទីគាប់ចិត្ត»។ (ហាក. ២:៧) បើយើងមានទស្សនៈដូចព្រះយេហូវ៉ានិងលោកយេស៊ូ យើងនឹងស្វែងយល់អំពីប្រវត្តិនិងចំណាប់អារម្មណ៍របស់ពួកគេ។ យ៉ាងនេះ យើងនឹងមានទស្សនៈថាពួកគេអាចទៅជាបងប្អូនរួមជំនឿរបស់យើងនៅថ្ងៃណាមួយ។
ចម្រៀងលេខ៥៧ ចូរផ្សព្វផ្សាយដល់មនុស្សគ្រប់ប្រភេទ
^ វគ្គ 5 តើទស្សនៈរបស់យើងចំពោះមនុស្សក្នុងតំបន់ផ្សាយអាចមានឥទ្ធិពលយ៉ាងណាទៅលើរបៀបដែលយើងផ្សព្វផ្សាយនិងបង្រៀន? ក្នុងអត្ថបទនេះ យើងនឹងពិចារណាអំពីទស្សនៈរបស់លោកយេស៊ូនិងសាវ័កប៉ូលចំពោះអ្នកស្ដាប់ ព្រមទាំងអំពីរបៀបដែលយើងអាចយកតម្រាប់ពួកគាត់ដោយគិតអំពីជំនឿ និងចំណាប់អារម្មណ៍របស់ពួកអ្នកដែលយើងជួប ហើយយល់ថាមនុស្សទាំងនេះអាចទៅជាអ្នកកាន់តាមលោកយេស៊ូ។
^ វគ្គ 17 អត្ថបទតភាគ«គម្ពីរជួយមនុស្សឲ្យកែប្រែជីវិត»រៀបរាប់ថែមទៀតអំពីបទពិសោធន៍របស់មនុស្សដែលបានកែប្រែជីវិត។ មកដល់ត្រឹមឆ្នាំ២០១៧ អត្ថបទទាំងនោះមានក្នុងទស្សនាវដ្ដីប៉មយាម ហើយឥឡូវនៅតែបន្តចេញផ្សាយតាមគេហទំព័រ jw.org®។ សូមចុច«អំពីយើង»▸«បទពិសោធន៍»។
^ វគ្គ 57 ការពណ៌នាអំពីរូបភាព: កាលដែលប្ដីប្រពន្ធមួយគូផ្សព្វផ្សាយពីផ្ទះមួយទៅផ្ទះមួយ ពួកគេសង្កេតឃើញ (១) ផ្ទះមានរបៀបរៀបរយនិងតុបតែងដោយផ្កា (២) ផ្ទះរបស់ក្រុមគ្រួសារដែលមានកូនតូច (៣) ផ្ទះដែលមិនមានរបៀបរៀបរយទាំងក្នុងទាំងក្រៅ ហើយ(៤) ផ្ទះរបស់អ្នកដែលកាន់សាសនា។ ក្នុងចំណោមផ្ទះទាំងនេះ តើអ្នកនឹងរកមនុស្សដែលអាចទៅជាអ្នកកាន់តាមលោកយេស៊ូនៅឯណា?
