សំណួរពីអ្នកអាន
ហេតុអ្វីកំណត់ហេតុក្នុងសៀវភៅម៉ាថាយនិងសៀវភៅលូកាអំពីកុមារភាពរបស់លោកយេស៊ូគឺខុសគ្នា?
កំណត់ហេតុក្នុងសៀវភៅម៉ាថាយអំពីកំណើតនិងកុមារភាពរបស់លោកយេស៊ូគឺខុសគ្នាពីកំណត់ហេតុក្នុងសៀវភៅលូកា ពីព្រោះពួកគាត់ម្នាក់ៗបានផ្ដោតទៅលើគំនិតនិងបទពិសោធន៍របស់បុគ្គលផ្សេងគ្នា។
កំណត់ហេតុក្នុងសៀវភៅម៉ាថាយផ្ដោតទៅលើព្រឹត្ដិការណ៍ដែលទាក់ទងនឹងយ៉ូសែប។ ម៉ាថាយរៀបរាប់អំពីប្រតិកម្មរបស់យ៉ូសែបពេលគាត់បានដឹងថាម៉ារៀមានផ្ទៃពោះ ពេលដែលទេវតាបានពន្យល់ក្នុងសុបិនរបស់គាត់អំពីស្ថានភាពនោះ ហើយរបៀបដែលគាត់បានធ្វើតាមការណែនាំពីទេវតានោះ។ (ម៉ាថាយ ១:១៩-២៥) សៀវភៅនោះក៏រៀបរាប់អំពីរបៀបដែលទេវតាបានព្រមានយ៉ូសែបក្នុងសុបិនមួយដោយឲ្យគាត់រត់ទៅស្រុកអេស៊ីបជាមួយនឹងក្រុមគ្រួសាររបស់គាត់ ហើយរបៀបដែលគាត់បានធ្វើតាម។ ម៉ាថាយក៏ប្រាប់យើងដែរថា ក្នុងសុបិនទេវតាបានប្រាប់យ៉ូសែបឲ្យត្រឡប់ទៅស្រុកអ៊ីស្រាអែល ហើយថាគាត់បានត្រឡប់ទៅវិញនិងបានសម្រេចចិត្ដទៅរស់នៅក្រុងណាសារ៉ែត។ (ម៉ាថាយ ២:១៣, ១៤, ១៩-២៣) នៅក្នុងជំពូកទី១និងទី២នៃសៀវភៅដំណឹងល្អដែលបានត្រូវរៀបរាប់ដោយម៉ាថាយ គាត់បានប្រើឈ្មោះយ៉ូសែប១៣ដង ប៉ុន្ដែឈ្មោះរបស់ម៉ារៀតែ៦ដងប៉ុណ្ណោះ។
ប៉ុន្ដែ កំណត់ហេតុក្នុងសៀវភៅលូកាផ្ដោតទៅលើម៉ារៀ។ សៀវភៅនោះរៀបរាប់អំពីពេលដែលទេវតាឈ្មោះកាព្រីយ៉ែលបានលេចមកជួបម៉ារៀ ពេលគាត់បានទៅលេងអេលីសាបិតដែលជាសាច់ញាតិរបស់គាត់ ហើយពាក្យសរសើររបស់គាត់ចំពោះព្រះយេហូវ៉ា។ (លូកា ១:២៦-៥៦) សៀវភៅនោះក៏រៀបរាប់អំពីអ្វីដែលស៊ីម្មានបានប្រាប់ម៉ារៀស្ដីអំពីការឈឺចាប់ដែលលោកយេស៊ូនឹងត្រូវឆ្លងកាត់នៅពេលអនាគត។ បន្ទាប់មក លូការៀបរាប់អំពីពេលដែលលោកយេស៊ូបានទៅវិហារជាមួយនឹងក្រុមគ្រួសាររបស់លោកពេលលោកមានអាយុ១២ឆ្នាំ។ សូម្បីតែក្នុងកំណត់ហេតុនេះ លូកាដកស្រង់ពាក្យរបស់ម៉ារៀមិនមែនពាក្យរបស់យ៉ូសែប ហើយប្រាប់ថាព្រឹត្ដិការណ៍ទាំងនេះមានឥទ្ធិពលយ៉ាងខ្លាំងលើម៉ារៀ។ (លូកា ២:១៩, ៣៤, ៣៥, ៤៨, ៥១) នៅក្នុងជំពូកពីរដំបូងនៃសៀវភៅដំណឹងល្អដែលបានត្រូវរៀបរាប់ដោយលូកា គាត់ប្រើឈ្មោះម៉ារៀ១៣ដង ប៉ុន្ដែឈ្មោះយ៉ូសែបតែ៤ដងប៉ុណ្ណោះ។ ដូច្នេះ ម៉ាថាយប្រាប់យើងច្រើនអំពីគំនិតនិងការប្រព្រឹត្ដរបស់យ៉ូសែប តែលូកាផ្ដោតទៅលើគំនិតនិងបទពិសោធន៍របស់ម៉ារៀ។
សៀវភៅដំណឹងល្អទាំងពីរនេះ រៀបរាប់អំពីបញ្ជីពីរផ្សេងគ្នាស្ដីអំពីវង្សត្រកូលរបស់លោកយេស៊ូ។ ម៉ាថាយសរសេរវង្សត្រកូលរបស់យ៉ូសែប ហើយបង្ហាញថាលោកយេស៊ូជាកូនចិញ្ចឹមរបស់យ៉ូសែប ដូច្នេះលោកអាចស្នងរាជរបស់ដាវីឌដោយសារលោកមានសិទ្ធិតាមច្បាប់។ ហេតុអ្វី? ពីព្រោះយ៉ូសែបជាកូនចៅរបស់ស្ដេចដាវីឌតាមរយៈសាឡូម៉ូនដែលជាកូនប្រុសរបស់ដាវីឌ។ (ម៉ាថាយ ១:៦, ១៦) ប៉ុន្ដែ លូកាសរសេរវង្សត្រកូលរបស់ម៉ារៀ ហើយបង្ហាញថាលោកយេស៊ូអាចស្នងរាជរបស់ដាវីឌដោយសារលោកមានសិទ្ធិជាកូនចៅ«ពីពូជពង្សរបស់ដាវីឌ»។ (រ៉ូម ១:៣) ហេតុអ្វី? ដោយសារម៉ារៀជាកូនចៅរបស់ស្ដេចដាវីឌតាមរយៈណាថាន់ដែលជាកូនប្រុសរបស់ដាវីឌ។ (លូកា ៣:៣១) ប៉ុន្ដែ ហេតុអ្វីលូកាមិនបានសរសេរថាម៉ារៀជាកូនស្រីរបស់ហេលីដែលជាឪពុករបស់នាង? ពីព្រោះនៅពេលនោះ តាមធម្មតាបញ្ជីជាតិដាក់បញ្ចូលតែឈ្មោះបុរសក្នុងក្រុមគ្រួសារប៉ុណ្ណោះ។ ដូច្នេះ ពេលលូកាសរសេរថាយ៉ូសែបជាកូនរបស់ហេលី មនុស្សបានយល់ថាយ៉ូសែបគឺជាកូនប្រសារបស់ហេលី។—លូកា ៣:២៣
បញ្ជីនៃវង្សត្រកូលរបស់លោកយេស៊ូក្នុងសៀវភៅដំណឹងល្អដែលបានត្រូវរៀបរាប់ដោយម៉ាថាយនិងលូកា បញ្ជាក់ថាលោកយេស៊ូគឺជាមេស្ស៊ីដែលព្រះបានសន្យា។ ដោយសារបណ្ដាជនជាទូទៅបានដឹងថាលោកយេស៊ូជាកូនចៅរបស់ស្ដេចដាវីឌ សូម្បីតែពួកផារិស៊ីនិងពួកសាឌូស៊ីមិនអាចប្រកែកថានេះមិនមែនជាការពិតទេ។ អ្វីដែលម៉ាថាយនិងលូកាបានរៀបរាប់អំពីវង្សត្រកូលរបស់លោកយេស៊ូពង្រឹងជំនឿរបស់យើង ហើយនាំឲ្យយើងជឿជាក់ថាសេចក្ដីសន្យាទាំងអស់ទៀតរបស់ព្រះពិតជានឹងបានសម្រេច។