សំណួរពីអ្នកអាន
ហេតុអ្វីការបង្ហោះសៀវភៅរបស់សាក្សីព្រះយេហូវ៉ានៅលើគេហទំព័រផ្សេងទៀត ឬបណ្ដាញគេហទំព័រសម្រាប់ទាក់ទងគ្នា គឺមិនបានត្រូវអនុញ្ញាត?
អ្នកខ្លះគិតថាដោយសារយើងស្នើផ្ដល់សៀវភៅរបស់យើងដោយឥតគិតថ្លៃ ពួកគេអាចថតចម្លង ឬបង្ហោះសៀវភៅទាំងនេះនៅលើគេហទំព័រផ្សេង ឬនៅលើបណ្ដាញគេហទំព័រសម្រាប់ទាក់ទងគ្នា។ ប៉ុន្ដែ នេះអាចបណ្ដាលឲ្យមានបញ្ហាធ្ងន់ធ្ងរ ហើយក៏ប្រឆាំងនឹងល័ក្ខខ័ណ្ឌក្នុងការប្រើប្រាស់ * (សូមមើលកំណត់សម្គាល់) របស់គេហទំព័រយើង។ ល័ក្ខខ័ណ្ឌទាំងនេះបញ្ជាក់យ៉ាងច្បាស់ថា គ្មានអ្នកណាម្នាក់បានត្រូវអនុញ្ញាតឲ្យបង្ហោះឬ«ចម្លងព័ត៌មានពីគេហទំព័រនេះទៅដាក់បញ្ចូលប្រព័ន្ធណាផ្សេងទៀត (ដូចជាគេហទំព័រ គេហទំព័រចែកចាយព័ត៌មាន ឬគេហទំព័រសម្រាប់ទាក់ទងគ្នាជាដើម)»។ ព័ត៌មានទាំងនេះរួមបញ្ចូល«គំនូរដែលបានត្រូវរក្សាសិទ្ធិ សៀវភៅជាអេឡិចត្រូនិក ចម្រៀង រូបភាព អត្ថបទ និងវីដេអូ»។ ហេតុអ្វីច្បាប់នេះបានត្រូវបង្កើតឡើង?
ព័ត៌មានទាំងអស់នៅគេហទំព័ររបស់យើងបានត្រូវរក្សាសិទ្ធិ ហើយនេះមានន័យថាបានត្រូវការពារតាមផ្លូវច្បាប់។ នេះគឺសំខាន់ដោយសារនេះការពារមិនឲ្យអ្នកណាប្រើប្រាស់តាមផ្លូវខុស។ ជួនកាល ពួកអ្នកក្បត់ជំនឿនិងអ្នកឯទៀតដែលចង់បង្ខូចកិច្ចការរបស់យើង ដាក់សៀវភៅរបស់យើងនៅលើគេហទំព័ររបស់ពួកគេដើម្បីទាក់ទាញសាក្សីព្រះយេហូវ៉ានិងអ្នកឯទៀត។ ប៉ុន្ដែ នៅលើគេហទំព័រទាំងនោះ ពួកគេក៏ដាក់ព័ត៌មានដែលធ្វើឲ្យអ្នកឯទៀតមានការសង្ស័យ។ (ទំនុកតម្កើង ២៦:៤; សុភាសិត ២២:៥) អ្នកខ្លះទៀតបានប្រើព័ត៌មានពីគេហទំព័ររបស់យើង ឬនិមិត្ដសញ្ញារបស់យើងពោលគឺjw.org ក្នុងការផ្សាយពាណិជ្ជកម្ម ក្នុងកម្មវិធីតាមគ្រឿងអេឡិចត្រូនិក និងនៅលើផលិតផលផ្សេងៗដែរ។ ប៉ុន្ដែ ដោយសារព័ត៌មានពីគេហទំព័រយើង ឬនិមិត្ដសញ្ញារបស់យើងបានត្រូវការពារតាមផ្លូវច្បាប់ យើងអាចប្ដឹងពួកគេទៅតុលាការបាន ហើយបញ្ឈប់ពួកគេពីការធ្វើដូច្នេះ។ (សុភាសិត ២៧:១២) ក៏ប៉ុន្ដែ បើយើងអនុញ្ញាតឲ្យអ្នកខ្លះ ទោះជាគាត់ជាបងប្អូនរបស់យើងក្ដី បង្ហោះឬថតចម្លងសៀវភៅទៅដាក់តាមគេហទំព័រផ្សេងទៀត ឬឲ្យពួកគេប្រើនិមិត្ដសញ្ញាjw.orgដើម្បីលក់ផលិតផលផ្សេងៗ ប្រហែលជាតុលាការនឹងមិនគាំទ្រយើងទេ។
ការថតចម្លងសៀវភៅរបស់យើងពីគេហទំព័រផ្សេងពីjw.orgអាចមានគ្រោះថ្នាក់។ ព្រះយេហូវ៉ាផ្ដល់សេចក្ដីបង្រៀនដែលប្រៀបដូចជាអាហារតាមរយៈ«ខ្ញុំបម្រើដ៏ស្មោះត្រង់ហើយចេះពិចារណា»តែប៉ុណ្ណោះ។ (ម៉ាថាយ ២៤:៤៥) ដើម្បីផ្ដល់សេចក្ដីបង្រៀន «ខ្ញុំបម្រើ»នោះប្រើតែគេហទំព័រផ្លូវការរបស់អង្គការយើងប៉ុណ្ណោះ ពោលគឺwww.pr418.com tv.pr418.com និងwol.pr418.com។ ម្យ៉ាងទៀត យើងមានតែកម្មវិធីផ្លូវការបីប៉ុណ្ណោះសម្រាប់ទូរស័ព្ទនិងកុំព្យូទ័របន្ទះស្ដើង ពោលគឺJWភាសា (JW Language®) JWបណ្ណាល័យ (JW Library®) និងJWបណ្ណាល័យភាសាសញ្ញា (JW Library Sign Language®)។ គ្មានការផ្សាយពាណិជ្ជកម្មឬអ្វីណាពីពិភពលោករបស់សាថាននៅគេហទំព័រនិងតាមកម្មវិធីទាំងនេះទេ។ ប៉ុន្ដែ បើយើងថតចម្លងសៀវភៅរបស់យើងពីគេហទំព័រឬកម្មវិធីផ្សេងទៀត យើងមិនអាចប្រាកដថាសៀវភៅទាំងនេះមិនបានត្រូវផ្លាស់ប្ដូរឡើយ។—ទំនុកតម្កើង ១៨:២៦; ១៩:៨
បន្ថែមទៅទៀត បើយើងបង្ហោះព័ត៌មានពីគេហទំព័ររបស់យើងនៅលើគេហទំព័រផ្សេងទៀតដែលមនុស្សអាចដាក់យោបល់ នេះអាចបើកឱកាសឲ្យពួកអ្នកក្បត់ជំនឿនិងអ្នកឯទៀត រិះគន់អង្គការរបស់ព្រះយេហូវ៉ា។ បងប្អូនខ្លះឈ្លោះប្រកែកគ្នាជាមួយនឹងមនុស្សបែបនោះ ហើយនេះកាន់តែធ្វើឲ្យព្រះយេហូវ៉ាអាប់ឱនកិត្ដិយស។ ការសន្ទនាបែបនេះតាមប្រព័ន្ធអ៊ីនធឺណិតគឺមិនមែនជាវិធីត្រឹមត្រូវដើម្បីកែតម្រូវទស្សនៈរបស់អ្នកណាម្នាក់និងជួយគាត់ឲ្យយល់សេចក្ដីពិតទេ។ (ធីម៉ូថេទី១ ៦:៣-៥; ធីម៉ូថេទី២ ២:២៣-២៥) ម្យ៉ាងទៀត មនុស្សខ្លះបង្កើតគេហទំព័រនិងគណនីតាមបណ្ដាញគេហទំព័រសម្រាប់ទាក់ទងគ្នាដែលមើលទៅដូចជាមកពីអង្គការរបស់ព្រះ ឬពីបងប្រុសៗដែលជាសមាជិកគណៈអភិបាល។ ប៉ុន្ដែអ្វីទាំងនេះគឺក្លែងក្លាយ។ សមាជិកនីមួយៗនៃគណៈអភិបាលមិនមានគេទំព័រផ្ទាល់ខ្លួន ហើយក៏មិនមានគណនីណាក៏ដោយតាមបណ្ដាញគេហទំព័រសម្រាប់ទាក់ទងគ្នាដែរ។
យើងគាំទ្រការផ្សព្វផ្សាយ«ដំណឹងល្អ» ពេលយើងណែនាំមនុស្សឲ្យចូលគេហទំព័រjw.org។ (ម៉ាថាយ ២៤:១៤) គេហទំព័រនិងកម្មវិធីរបស់យើងកាន់តែល្អទៅៗ។ យើងចង់ឲ្យមនុស្សទាំងអស់ទទួលប្រយោជន៍ពីអ្វីទាំងនេះ។ ដូច្នេះ យើងបានត្រូវអនុញ្ញាតឲ្យផ្ញើអ៊ីមែល ឬផ្ញើព័ត៌មានដែលអាចចុចភ្ជាប់ទៅគេហទំព័ររបស់យើង។ តាមរបៀបនេះ យើងណែនាំអ្នកឯទៀតឲ្យស្គាល់វិធីតែមួយគត់ដែលព្រះយេហូវ៉ាប្រើដើម្បីផ្ដល់សេចក្ដីបង្រៀនដែលប្រៀបដូចជាអាហារ គឺតាមរយៈ«ខ្ញុំបម្រើដ៏ស្មោះត្រង់ហើយចេះពិចារណា»។
^ វគ្គ 1 អ្នកអាចរកឃើញល័ក្ខខ័ណ្ឌក្នុងការប្រើប្រាស់ បើអ្នកចុចលើពាក្យដែលថា«ល័ក្ខខ័ណ្ឌក្នុងការប្រើប្រាស់»នៅខាងក្រោមទំព័រដើមនៃគេហទំព័រjw.org។ ច្បាប់ទាំងនេះគឺសម្រាប់អ្វីៗទាំងអស់ដែលមាននៅគេហទំព័ររបស់យើង។
