តើតាមរបៀបណាគ្រឿងអេឡិចត្រូនិកមានឥទ្ធិពលទៅលើចំណងមិត្តភាពរបស់អ្នក?
មនុស្សអាចប្រាស្រ័យទាក់ទងគ្នាបានយ៉ាងងាយស្រួល តាមរយៈការផ្ញើសារ អ៊ីម៉ែល ការតេជាវីដេអូ និងបណ្ដាញគេហទំព័រទាក់ទងគ្នា ទោះបីជាពួកគេរស់នៅឆ្ងាយពីគ្នាយ៉ាងណាក៏ដោយ។ សម្រាប់ពួកគេ គ្រឿងអេឡិចត្រូនិកគឺជាអ្វីដែលមានប្រយោជន៍។
ប៉ុន្តែ មនុស្សមួយចំនួនដែលទាក់ទងជាមួយមិត្តភក្តិតាមរយៈគ្រឿងអេឡិចត្រូនិកតែប៉ុណ្ណោះប្រហែលជា...
-
មិនសូវបង្ហាញចិត្តអាណិតអាសូរចំពោះមិត្តភក្តិ
-
ធ្លាក់ទឹកចិត្តនិងមានអារម្មណ៍ឯកោ
-
គិតតែអំពីខ្លួនឯងជាជាងអ្នកឯទៀត
អ្វីដែលអ្នកត្រូវដឹង
ការអាណិតអាសូរ
ដើម្បីយល់អារម្មណ៍របស់អ្នកឯទៀត យើងត្រូវចំណាយពេលគិតអំពីគាត់។ ប៉ុន្តែ យើងប្រហែលជាពិបាកធ្វើដូច្នេះ បើយើងរវល់អានឬផ្ញើសារទៅអ្នកឯទៀត ឬមើលបណ្ដាញគេហទំព័រទាក់ទងគ្នា។
មិនយូរមិនឆាប់ គ្រឿងអេឡិចត្រូនិកអាចគ្រប់គ្រងលើអ្នក ហើយការតបឆ្លើយនឹងមិត្តភក្តិរបស់អ្នក អាចទៅជាបន្ទុកមួយ។ បើអ្នកមានសារច្រើនពេក អ្នកប្រហែលជាចង់ឆ្លើយតបនឹងសារទាំងអស់ដែលអ្នកមានភ្លាមៗ ហើយអ្នកប្រហែលជាមិនកត់សម្គាល់ថាមិត្តម្នាក់ណារបស់អ្នក ត្រូវការជំនួយឡើយ។
សូមគិតអំពីនេះ: ពេលអ្នកប្រើគ្រឿងអេឡិចត្រូនិក ដើម្បីប្រាស្រ័យទាក់ទងជាមួយមិត្តភក្តិ តើអ្នកអាចបន្តបង្ហាញចិត្តអាណិតអាសូរឬ«កើតទុក្ខជាមួយគ្នា»យ៉ាងដូចម្ដេច?—ពេត្រុសទី១ ៣:៨
ការធ្លាក់ទឹកចិត្ត
អ្នកស្រាវជ្រាវបានរកឃើញថា ក្រោយមនុស្សប្រើបណ្ដាញគេហទំព័រសម្រាប់ទាក់ទងគ្នា ពួកគេជាច្រើននាក់មានអារម្មណ៍ធ្លាក់ទឹកចិត្ត។ អ្នកស្រាវជ្រាវបានសន្និដ្ឋានថា ការមើលរូបថតដែលគេបង្ហោះអាចនាំឲ្យអ្នកមើលមាន«អារម្មណ៍ថាពួកគេមិនបានធ្វើអ្វីដែលមានន័យខ្លឹមសារសោះក្នុងជីវិត»។
បន្ថែមទៅទៀត ការមើលរូបភាពសប្បាយៗរបស់អ្នកឯទៀត អាចនាំឲ្យអ្នកមើលមានអារម្មណ៍ថាជីវិតរបស់ពួកគេគឺគួរឲ្យធុញទ្រាន់ បើប្រៀបធៀបជាមួយនឹងពួកអ្នកទាំងនោះ។ មនុស្សឯទៀតមើលទៅដូចជាសប្បាយរហូត តែជីវិតរបស់យើងគឺមិនមានអ្វីពិសេសដូចគេទេ។
សូមគិតអំពីនេះ: ពេលអ្នកប្រើបណ្ដាញគេហទំព័រសម្រាប់ទាក់ទងគ្នា តើតាមរបៀបណា អ្នកអាចជៀសវាងពីការប្រៀបធៀបខ្លួនជាមួយនឹងអ្នកទៀត?—កាឡាទី ៦:៤
គិតតែអំពីខ្លួនឯង
គ្រូម្នាក់បានកត់សម្គាល់សិស្សមួយចំនួនរបស់គាត់ថា ពួកគេគិតតែពីប្រយោជន៍ផ្ទាល់ខ្លួន ហើយពួកគេតែងតែចង់បានមិត្តភក្តិដែលផ្ដល់ប្រយោជន៍ឲ្យខ្លួនតែប៉ុណ្ណោះ។ បុគ្គលម្នាក់អាចចាត់ទុកមិត្តភក្ដិប្រៀបដូចជាកម្មវិធីក្នុងគ្រឿងអេឡិចត្រូនិក ដែលអាចបើកឬបិទនៅពេលណាក៏បាន។
សូមគិតអំពីនេះ: តើអ្វីដែលអ្នកបង្ហោះតាមអនឡាញបង្ហាញថាអ្នកចូលចិត្តការប្រកួតប្រជែង ឬផ្ដោតអារម្មណ៍ហួសហេតុពេកទៅលើខ្លួនឯងដែរឬទេ?—កាឡាទី ៥:២៦
អ្វីដែលអ្នកអាចធ្វើ
ពិចារណារបៀបដែលអ្នកប្រើគ្រឿងអេឡិចត្រូនិក
បើយើងចេះគ្រប់គ្រងគ្រឿងអេឡិចត្រូនិក នោះវានឹងជួយយើងឲ្យប្រាស្រ័យទាក់ទងជាមួយមិត្តភក្តិរបស់យើង ហើយវាក៏ជួយយើងឲ្យកាន់តែមានភាពជិតស្និទ្ធជាមួយមិត្តភក្តិរបស់យើងផងដែរ។
គោលការណ៍គម្ពីរ: «សេចក្ដីស្រឡាញ់... មិនរកប្រយោជន៍ផ្ទាល់ខ្លួន»។—កូរិនថូសទី១ ១៣:៤, ៥
សូមជ្រើសរើសយោបល់ដែលអ្នកចង់ធ្វើតាម ឬសរសេរគំនិតរបស់អ្នកផ្ទាល់។
-
ព្យាយាមនិយាយជាមួយមនុស្សផ្ទាល់ (ជាជាងតាមសារឬតាមអ៊ីម៉ែល)
-
ពេលនិយាយជាមួយអ្នកឯទៀត សូមទុកទូរស័ព្ទនៅឲ្យឆ្ងាយ (ឬបិទសំឡេង)
-
ដាក់កម្រិតលើពេលវេលាដែលអ្នកចំណាយមើលអ្វីដែលគេបង្ហោះលើបណ្ដាញគេហទំព័រ
-
ធ្វើជាមនុស្សដែលពូកែស្ដាប់
-
ទាក់ទងមិត្តភក្តិណាដែលកំពុងជួបការពិបាក
