តើតាមរបៀបណាគ្រឿងអេឡិចត្រូនិកមានឥទ្ធិពលទៅលើកូនៗរបស់អ្នក?
សម្រាប់មនុស្សពេញវ័យការរៀនអំពីរបៀបប្រើគ្រឿងអេឡិចត្រូនិកអាចជារឿងពិបាក។ ប៉ុន្តែ សម្រាប់ក្មេងៗវិញគ្រឿងអេឡិចត្រូនិកប្រៀបដូចជាផ្នែកមួយនៃជីវិតរបស់ពួកគេ។ នេះមានន័យថាពួកគេអាចប្រើគ្រឿងអេឡិចត្រូនិកយ៉ាងងាយស្រួលបំផុត។
ដំណាលគ្នានោះមនុស្សមួយចំនួនបានកត់សម្គាល់ថា នៅពេលដែលប្អូនៗវ័យក្មេងចំណាយពេលច្រើនទៅលើគ្រឿងអេឡិចត្រូនិកនោះអាចបណ្ដាលឲ្យពួកគេ...
-
ញៀនប្រើគ្រឿងអេឡិចត្រូនិក។
-
រងផលប៉ះពាល់ដែលមកពីការចំអកមើលងាយតាមប្រព័ន្ធអ៊ីនធឺណិត។
-
អាចឃើញរូបអាសអាភាសទោះបីជាគ្មានបំណងចង់មើលក៏ដោយ។
អ្វីដែលអ្នកត្រូវដឹង
ការញៀន
កម្មវិធីអនឡាញមួយចំនួន ជាឧទាហរណ៍ដូចជាកម្មវិធីលេងហ្គេម ធ្វើឲ្យអ្នកលេងស្រួលញៀន ហើយនេះមិនមែនជារឿងចៃដន្យទេ។ សៀវភៅមួយបានរៀបរាប់ថា៖ «កម្មវិធីដែលមាននៅក្នុងទូស័ព្ទរបស់យើងបានត្រូវរៀបចំឡើងដើម្បីធ្វើឲ្យយើងប្រើកម្មវិធីនោះគ្រប់ពេលវេលា»។ (Reclaiming Conversation) កម្មវិធីខ្លះមានការផ្សាយពាណិជ្ជកម្មដើម្បីទទួលប្រាក់ចំណេញ។ ដូច្នេះ កាលណាយើងចំណាយពេលកាន់តែយូរដើម្បីមើលកម្មវិធីនោះ នោះពួកគេទទួលប្រាក់ចំណេញកាន់តែច្រើន។
សូមគិតអំពីនេះ: តើកូនរបស់អ្នកហាក់ដូចជាចំណាយពេលច្រើនពេកទៅលើគ្រឿងអេឡិចត្រូនិកឬ? តើតាមរបៀបណាអ្នកអាចជួយពួកគេឲ្យប្រើពេលវេលាដើម្បីកើតប្រយោជន៍ច្រើនបំផុត?—អេភេសូរ ៥:១៥, ១៦
ការចំអកមើលងាយតាមអ៊ីនធឺណិត
ក្នុងប្រព័ន្ធអ៊ីនធឺណិតមនុស្សខ្លះនិយាយពាក្យគំរោះគំរើយ និងពាក្យអសុរោះដែលមិនគិតអំពីអារម្មណ៍របស់អ្នកដទៃ។ នេះជាលក្ខណៈដែលនាំឲ្យពួកគេចំអកមើលងាយអ្នកឯទៀត។
មនុស្សខ្លះដែលប្រើពាក្យសម្ដីបែបនោះចង់ឲ្យអ្នកឯទៀតចាប់អារម្មណ៍មកលើខ្លួន ឬពួកគេចង់មានមិត្តភក្តិច្រើនថែមទៀតតាមបណ្ដាញគេហទំព័រ។ ម្យ៉ាងទៀត បុគ្គលម្នាក់អាចឈឺចិត្ត ហើយគិតថាអ្នកឯទៀតចំអកមើលងាយគាត់ នៅពេលដែលគេមិនបានអញ្ជើញគាត់ឲ្យចូលរួមកម្មវិធីណាមួយ។
សូមគិតអំពីនេះ: តើកូនរបស់អ្នកប្រើពាក្យសម្ដីសមរម្យនៅលើបណ្ដាញគេហទំព័រដែរឬទេ? (អេភេសូរ ៤:៣១) តើពួកគេមានអារម្មណ៍យ៉ាងណានៅពេលដែលអ្នកឯទៀតមិនបានអញ្ជើញពួកគេឲ្យចូលរួមកម្មវិធីណាមួយ?
រូបអាសអាភាស
ក្នុងប្រព័ន្ធអ៊ីនធឺណិតយើងអាចឃើញអ្វីដែលអសីលធម៌យ៉ាងងាយ។ ឪពុកម្ដាយគួរដឹងថាប្រព័ន្ធការពាររូបភាពមិនត្រឹមត្រូវមិនអាចទប់ស្កាត់រូបភាពអាក្រក់ទាំងអស់បានឡើយ។ ដូច្នេះ ជួនកាលកូនរបស់អ្នកអាចឃើញរូបភាពទាំងនោះ។
ការផ្ញើឬទទួលសារក្នុងទំរង់អាសអាភាសអាចបំពានច្បាប់ក្នុងប្រទេស។ ក្នុងករណីខ្លះ អាស្រ័យទៅលើច្បាប់ក្នុងតំបន់ ឬអាយុអ្នកដែលផ្ញើឬទទួលសារបែបនោះ ពួកគេអាចជាប់ទោសពីបទចែកចាយរូបអាសអាភាស។
សូមគិតអំពីនេះ: តើតាមរបៀបណាអ្នកអាចជួយកូនរបស់អ្នកមិនឲ្យមើលឬផ្ញើរូបអាសអាភាសតាមប្រព័ន្ធអ៊ីនធឺណិត?—អេភេសូរ ៥:៣, ៤
អ្វីដែលអ្នកអាចធ្វើ
បង្ហាត់បង្រៀនកូនរបស់អ្នក
ទោះបីជាប្អូនៗវ័យក្មេងអាចប្រើគ្រឿងអេឡិចត្រូនិកយ៉ាងងាយស្រួលក្ដី ប៉ុន្តែពួកគេនៅតែត្រូវការជំនួយ។ សៀវភៅមួយបានរៀបរាប់ថា ការឲ្យទូរស័ព្ទទំនើបៗឬគ្រឿងអេឡិចត្រូនិកទៅកូន មុនពេលដែលកូនស្គាល់អំពីរបៀបប្រើប្រាស់ដោយត្រឹមត្រូវ គឺប្រៀបដូចជា«ការឲ្យកូនចូលក្នុងអាងហែលទឹកដោយមិនបង្រៀនកូនពីរបៀបហែលទឹក» (Indistractable)។
គោលការណ៍គម្ពីរ: «ចូរបង្ហាត់បង្រៀនកូនក្មេងឲ្យដើរតាមផ្លូវត្រឹមត្រូវ យ៉ាងនេះ ទោះជាគាត់មានអាយុច្រើនក៏ដោយ គាត់នឹងមិនចាកចេញពីផ្លូវនោះទេ»។—សុភាសិត ២២:៦
សូមជ្រើសរើសយោបល់ដែលអ្នកចង់ធ្វើតាម ឬសរសេរគំនិតរបស់អ្នកផ្ទាល់។
-
បង្រៀនកូនអំពីរបៀបនិយាយសមរម្យពេលទាក់ទងជាមួយនឹងបុគ្គលឯទៀតតាមប្រព័ន្ធអ៊ីនធឺណិត
-
ជួយកូនឲ្យយកឈ្នះអារម្មណ៍មិនត្រឹមត្រូវនៅពេលដែលអ្នកឯទៀតមិនអញ្ជើញគាត់ឲ្យចូលរួមកម្មវិធីណាមួយ
-
ធ្វើអ្វីតាមដែលអ្នកអាចធ្វើទៅបានដើម្បីការពារកូនអ្នកពីអ្វីដែលមិនត្រឹមត្រូវដែលមាននៅលើប្រព័ន្ធអ៊ីនធឺណិត
-
ម្ដងម្កាលសូមឆែកមើលទូរស័ព្ទកូនរបស់អ្នក
-
ដាក់កម្រិតលើពេលវេលាដែលកូនអាចប្រើគ្រឿងអេឡិចត្រូនិកប្រចាំថ្ងៃ
-
ហាមមិនឲ្យកូនយកគ្រឿងអេឡិចត្រូនិកចូលក្នុងបន្ទប់គេងនៅពេលយប់
-
ហាមមិនឲ្យប្រើគ្រឿងអេឡិចត្រូនិកពេលញ៉ាំបាយជាមួយគ្នា
លោកអ្នកក៏ប្រហែលជាចូលចិត្តដែរ
សំណួរពីយុវវ័យ
តើខ្ញុំគួរដឹងអ្វីខ្លះអំពីការផ្ញើសារក្នុងទម្រង់អាសអាភាស?
តើមានគេកំពុងបង្ខំប្អូនឲ្យផ្ញើសារក្នុងទម្រង់អាសអាភាសឬ? តើការផ្ញើសារក្នុងទម្រង់អាសអាភាសនាំមកនូវផលវិបាកអ្វីខ្លះ? តើនេះគ្រាន់តែជាការចែចង់ប៉ុណ្ណោះឬទេ?
អាពាហ៍ពិពាហ៍និងក្រុមគ្រួសារ
តើកូនខ្ញុំគួរមានទូរស័ព្ទទំនើបឬទេ?
សូមសួរសំណួរទាំងនេះដើម្បីដឹងថាអ្នកនិងកូនរបស់អ្នកមានទំនួលខុសត្រូវហើយឬនៅ។
អាពាហ៍ពិពាហ៍និងក្រុមគ្រួសារ
ចូរបង្រៀនកូនអំពីរបៀបប្រើប្រាស់ទូរស័ព្ទទំនើបដោយឈ្លាសវៃ
សូម្បីតែកូនដឹងច្រើនអំពីបច្ចេកវិទ្យាក្ដី ក៏ពួកគេត្រូវការឪពុកម្ដាយបង្រៀនពួកគេអំពីរបៀបប្រើប្រាស់ទូរស័ព្ទទំនើបដោយមានទំនួលខុសត្រូវដែរ។
