អត្ថបទសិក្សា ១២
ចម្រៀងលេខ៧៧ ពន្លឺក្នុងភពងងឹត
ចូរជៀសចេញពីភាពងងឹត តែបន្ដនៅក្នុងពន្លឺ
«អ្នករាល់គ្នាធ្លាប់ជាភាពងងឹត តែឥឡូវជាពន្លឺវិញ»។—អេភ. ៥:៨
ចំណុចផ្ដោត
អ្វីដែលយើងអាចរៀនពីពាក្យងងឹតនិងពន្លឺដែលប៉ូលបានប្រើនៅអេភេសូរ ជំពូក៥។
១-២. (ក) ពេលប៉ូលសរសេរសំបុត្រទៅកាន់គ្រិស្តសាសនិកនៅក្រុងអេភេសូរ តើគាត់ស្ថិតក្នុងស្ថានភាពបែបណា ហើយហេតុអ្វីគាត់បានសរសេរទៅកាន់ពួកគេ? (ខ) តើយើងនឹងរកមើលចម្លើយចំពោះសំណួរអ្វីខ្លះ?
កាលដែលសាវ័កប៉ូលជាប់ឃុំនៅផ្ទះនាក្រុងរ៉ូម គាត់ចង់លើកទឹកចិត្តបងប្អូនរួមជំនឿ។ គាត់មិនអាចទៅជួបពួកគេដោយផ្ទាល់ទេ ដូច្នេះគាត់បានសរសេរសំបុត្រ។ សំបុត្រមួយក្នុងចំណោមសំបុត្រទាំងនោះដែលគាត់បានសរសេរទៅកាន់គ្រិស្តសាសនិកនៅក្រុងអេភេសូរ ប្រហែលជានៅឆ្នាំ៦០ឬ៦១ គ.ស.។—អេភ. ១:១; ៤:១
២ ជិត១០ឆ្នាំមុននោះ ប៉ូលបានចំណាយពេលអស់មួយរយៈនៅក្រុងអេភេសូរដើម្បីផ្សព្វផ្សាយនិងបង្រៀនដំណឹងល្អ។ (សកម្ម. ១៩:១, ៨-១០; ២០:២០, ២១) គាត់ស្រឡាញ់បងប្អូនខ្លាំងណាស់ ហើយចង់ជួយពួកគេឲ្យរក្សាភាពស្មោះត្រង់ចំពោះព្រះយេហូវ៉ា។ ប៉ុន្តែ ហេតុអ្វីគាត់បានសរសេរទៅកាន់គ្រិស្តសាសនិកដែលបានត្រូវរើសតាំងអំពីភាពងងឹតនិងពន្លឺ? តើគ្រិស្តសាសនិកទាំងអស់អាចទាញមេរៀនអ្វីពីយោបល់នេះ? សូមយើងរកចម្លើយចំពោះសំណួរទាំងនេះ។
ពីភាពងងឹតទៅពន្លឺ
៣. តើប៉ូលបានប្រើពាក្យផ្ទុយគ្នាអ្វីនៅក្នុងសំបុត្ររបស់គាត់ទៅកាន់គ្រិស្តសាសនិកនាក្រុងអេភេសូរ?
៣ ប៉ូលបានសរសេរទៅកាន់គ្រិស្តសាសនិកនៅក្រុងអេភេសូរថា៖ «អ្នករាល់គ្នាធ្លាប់ជាភាពងងឹត តែឥឡូវជាពន្លឺវិញ»។ (អេភ. ៥:៨) នៅទីនេះ ប៉ូលបានប្រើពាក្យងងឹតនិងពន្លឺដើម្បីពន្យល់អំពីស្ថានភាពផ្ទុយគ្នា។ សូមយើងពិចារណាអំពីមូលហេតុដែលប៉ូលអាចនិយាយថាគ្រិស្តសាសនិកនៅក្រុងអេភេសូរ«ធ្លាប់ជាភាពងងឹត»។
៤. តើគ្រិស្តសាសនិកនៅក្រុងអេភេសូរធ្លាប់នៅក្នុងភាពងងឹតខាងសាសនាក្នុងន័យអ្វី?
៤ ភាពងងឹតខាងសាសនា។ មុនរៀនសេចក្ដីពិតនិងទៅជាគ្រិស្តសាសនិក បងប្អូននៅក្រុងអេភេសូរដែលបានទទួលសំបុត្រពីប៉ូល ធ្លាប់កាន់តាមជំនឿសាសនាមិនពិត ហើយជឿទៅលើវេទមន្ត។ ក្រុងអេភេសូរគឺជាទីតាំងនៃវិហារដ៏ល្បីរបស់ព្រះអាតេមីស ដែលនៅសម័យបុរាណបានត្រូវគេចាត់ទុកជាសំណង់ដ៏អស្ចារ្យបំផុត១ក្នុងចំណោមសំណង់ដ៏អស្ចារ្យបំផុត៧នៅទូទាំងពិភពលោក។ មនុស្សបានទៅវិហារនោះដើម្បីគោរពបូជារូបព្រះ។ ជាងចម្លាក់រកលុយបានច្រើនពីការធ្វើនិងការលក់រូបចម្លាក់នៃវិហារនោះ និងរូបចម្លាក់ព្រះនាងនៅទីនោះ។ (សកម្ម. ១៩:២៣-២៧) បន្ថែមទៅទៀត ក្រុងនោះមានឈ្មោះល្បីខាងវេទមន្ត។—សកម្ម. ១៩:១៩
៥. តើអ្នកក្រុងអេភេសូរធ្លាប់នៅក្នុងភាពងងឹតខាងសីលធម៌ក្នុងន័យអ្វី?
៥ ភាពងងឹតខាងសីលធម៌។ ក្រុងអេភេសូរល្បីខាងអំពើប្រាសចាកសីលធម៌ដ៏ស្មោកគ្រោកនិងការប្រព្រឹត្តដោយឥតកោតក្រែង។ ការសម្ដែងនៅមហោស្រពនិងកម្មវិធីសាសនារបស់ពួកគេច្រើនតែប្រើពាក្យអាសអាភាស។ (អេភ. ៥:៣) អ្នកក្រុងអេភេសូរជាច្រើននាក់«លែងស្គាល់ល្អស្គាល់អាក្រក់» ដែលមានន័យត្រង់ថា«លែងដឹងឈឺ»។ (អេភ. ៤:១៧-១៩) មុនអ្នកក្រុងអេភេសូររៀនអំពីអ្វីដែលពិតជាត្រឹមត្រូវឬអ្វីដែលពិតជាខុស សមត្ថភាពវិនិច្ឆ័យរបស់ពួកគេមិនធ្វើទុក្ខពួកគេ ឬពួកគេមិនគិតថាពួកគេត្រូវទទួលខុសត្រូវចំពោះព្រះយេហូវ៉ាឡើយ។ ដូច្នេះ ប៉ូលអាចរៀបរាប់អំពីពួកគេថា៖ «គំនិតរបស់ពួកគេងងឹតងងល់ ហើយនៅដាច់ពីជីវិតដែលមកពីព្រះ»។
៦. ហេតុអ្វីប៉ូលអាចនិយាយទៅកាន់គ្រិស្តសាសនិកនៅក្រុងអេភេសូរថាពួកគេ«ឥឡូវជាពន្លឺវិញ»?
៦ ក៏ប៉ុន្តែ អ្នកខ្លះនៅក្រុងអេភេសូរបានចាកចេញពីភាពងងឹត។ ប៉ូលបានសរសេរថាពួកគេ‹ឥឡូវជាពន្លឺវិញ ពីព្រោះពួកគេជារបស់លោកម្ចាស់›។ (អេភ. ៥:៨) ពួកគេបានទទួលយកសេចក្ដីពិតពីគម្ពីរដែលប្រៀបដូចជាពន្លឺ។ (ចសព. ១១៩:១០៥) អ្នកក្រុងអេភេសូរទាំងនេះបានលះចោលការប្រព្រឹត្តនៃសាសនាមិនពិត និងអំពើប្រាសចាកសីលធម៌។ ពួកគេបាន«យកតម្រាប់ព្រះ» ហើយខំអស់ពីសមត្ថភាពដើម្បីគោរពប្រណិប័តន៍ព្រះយេហូវ៉ានិងធ្វើឲ្យលោកពេញចិត្ត។—អេភ. ៥:១
៧. តើស្ថានភាពរបស់យើងស្រដៀងនឹងស្ថានភាពរបស់គ្រិស្តសាសនិកជាច្រើននៅក្រុងអេភេសូរតាមរបៀបណា?
៧ ស្រដៀងគ្នាដែរ មុនយើងរៀនសេចក្ដីពិត យើងធ្លាប់នៅក្នុងភាពងងឹតខាងសាសនានិងខាងសីលធម៌។ យើងខ្លះធ្លាប់ចូលរួមបុណ្យសាសនាមិនពិត។ យើងខ្លះទៀតធ្លាប់មានរបៀបរស់នៅដែលប្រាសចាកសីលធម៌។ ប៉ុន្តែ ពេលយើងរៀនអំពីខ្នាតតម្រារបស់ព្រះយេហូវ៉ាស្ដីអំពីអ្វីដែលខុសនិងអ្វីដែលត្រូវ យើងធ្វើការកែប្រែ។ យើងចាប់ផ្ដើមមានរបៀបរស់នៅដែលស្របតាមតម្រូវការដ៏សុចរិតរបស់លោក។ ជាលទ្ធផល យើងទទួលប្រយោជន៍ជាច្រើន។ (អេ. ៤៨:១៧) ប៉ុន្តែ គឺមិនតែងតែស្រួលឲ្យជៀសឆ្ងាយពីភាពងងឹតដែលយើងបានចាកចេញ ហើយ«បន្តរស់នៅជាកូននៃពន្លឺ»ទេ។ ដូច្នេះ តើយើងអាចធ្វើអ្វី?
Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0
អ្វីដែលប៉ូលបានសរសេរទៅកាន់គ្រិស្តសាសនិកនៅក្រុងអេភេសូរគឺជាយោបល់ដែលប្រកបដោយសេចក្ដីស្រឡាញ់ដែលយើងអាចធ្វើតាមនៅសព្វថ្ងៃនេះ (សូមមើលវគ្គ៧) b
ចូរជៀសចេញពីភាពងងឹត
៨. យោងទៅតាមអេភេសូរ ៥:៣-៥ តើគ្រិស្តសាសនិកនៅក្រុងអេភេសូរត្រូវជៀសវាងពីអ្វី?
៨ សូមអាន អេភេសូរ ៥:៣-៥។ ដើម្បីជៀសឲ្យឆ្ងាយពីភាពងងឹតខាងសីលធម៌ គ្រិស្តសាសនិកនៅក្រុងអេភេសូរត្រូវបន្ដបដិសេធការប្រព្រឹត្តដែលនាំឲ្យព្រះយេហូវ៉ាមិនពេញចិត្ត។ នោះមិនគ្រាន់តែរួមបញ្ចូលអំពើប្រាសចាកសីលធម៌ខាងផ្លូវភេទប៉ុណ្ណោះទេ ប៉ុន្តែក៏រួមបញ្ចូលការនិយាយអាសអាភាសដែរ។ ប៉ូលបានរំលឹកគ្រិស្តសាសនិកនៅក្រុងអេភេសូរថាពួកគេត្រូវជៀសវាងពីអ្វីបែបនោះ បើពួកគេចង់«ទទួលមត៌កក្នុងរាជាណាចក្ររបស់គ្រិស្តនិងរបស់ព្រះ»។
៩. ហេតុអ្វីយើងគួរបដិសេធអ្វីដែលអាចនាំឲ្យយើងប្រព្រឹត្តអំពើប្រាសចាកសីលធម៌?
៩ យើងក៏ត្រូវបន្ដតយុទ្ធនឹង«ការប្រព្រឹត្តដែលមិនកើតផលដែលជាការប្រព្រឹត្តខាងភាពងងឹត»។ (អេភ. ៥:១១) ម្ដងហើយម្ដងទៀត បទពិសោធន៍ផ្សេងៗបានបង្ហាញថាកាលដែលមនុស្សម្នាក់កាន់តែមើល ស្ដាប់ ឬនិយាយអំពីអ្វីដែលមិនស្អាតស្អំឬប្រាសចាកសីលធម៌ គាត់កាន់តែងាយស្រួលធ្វើអ្វីដែលខុស។ (ដក. ៣:៦; យ៉ា. ១:១៤, ១៥) នៅប្រទេសមួយ បងប្អូនមួយក្រុមធំបានចាប់ផ្ដើមបង្កើតក្រុមឆាតតាមអនឡាញដើម្បីជជែកឆ្លើយឆ្លងគ្នា។ ដំបូងពួកគេជាច្រើននាក់និយាយអ្វីដែលទាក់ទងនឹងការគោរពប្រណិប័តន៍ព្រះ។ ក៏ប៉ុន្តែយូរៗទៅ ពួកគេជជែកគ្នាអំពីអ្វីដែលព្រះយេហូវ៉ាមិនពេញចិត្ត។ ពួកគេចាប់ផ្ដើមនិយាយគ្នាអំពីអ្វីដែលទាក់ទងនឹងការរួមភេទ។ ក្រោយមក បងប្អូនជាច្រើននាក់ទាំងនេះបាននិយាយថា ការនិយាយមិនស្អាតស្អំទាំងនេះបាននាំឲ្យពួកគេប្រព្រឹត្តអំពើប្រាសចាកសីលធម៌ខាងផ្លូវភេទ។
១០. តើសាថានព្យាយាមបោកបញ្ឆោតយើងយ៉ាងដូចម្ដេច? (អេភេសូរ ៥:៦)
១០ ពិភពលោករបស់សាថានព្យាយាមបោកបញ្ឆោតយើងដោយធ្វើឲ្យយើងជឿថាអ្វីដែលព្រះយេហូវ៉ាចាត់ទុកថាមិនស្អាតស្អំនិងប្រាសចាកសីលធម៌គឺមិនមែនជាអ្វីដែលខុសទាល់តែសោះ។ (២ពេ. ២:១៩) នេះមិនធ្វើឲ្យយើងភ្ញាក់ផ្អើលទេ! កលល្បិចមួយរបស់សាថានដែលវាប្រើអស់រយៈពេលជាយូរមកហើយ គឺបំភាន់មនុស្សដើម្បីឲ្យពួកគេមិនអាចដឹងអ្វីដែលខុសនិងអ្វីដែលត្រូវ។ (អេ. ៥:២០; ២កូ. ៤:៤) ហេតុនេះហើយបានជាភាពយន្ត កម្មវិធីទូរទស្សន៍ និងគេហទំព័រជាច្រើនលើកស្ទួយគំនិតដែលប្រឆាំងនឹងខ្នាតតម្រាដ៏សុចរិតរបស់ព្រះយេហូវ៉ា។ សាថានកំពុងព្យាយាមបោកបញ្ឆោតយើងឲ្យគិតថាការប្រព្រឹត្តនិងរបៀបរស់នៅដែលមិនស្អាតស្អំគឺមិនគ្រាន់តែជាអ្វីដែលអាចទទួលយកបានប៉ុណ្ណោះទេ ប៉ុន្តែក៏ជាអ្វីដែលនាំឲ្យសប្បាយនិងមិននាំឲ្យឈឺចាប់ឡើយ។—សូមអាន អេភេសូរ ៥:៦
១១. តើបទពិសោធន៍របស់បងអេនចឺឡាបង្ហាញយ៉ាងណាថាយើងត្រូវធ្វើតាមយោបល់ដែលប្រកបដោយប្រាជ្ញានៅអេភេសូរ ៥:៧? (សូមមើលរូបភាពផងដែរ)
១១ សាថានចង់ឲ្យយើងសេពគប់ជាមួយមនុស្សដែលធ្វើឲ្យយើងពិបាកកាន់តាមខ្នាតតម្រារបស់ព្រះយេហូវ៉ា។ ហេតុនេះហើយបានជាប៉ូលលើកទឹកចិត្តបងប្អូននៅក្រុងអេភេសូរថា៖ «កុំរួមចំណែកជាមួយនឹងពួកគេ» ពោលគឺពួកអ្នកដែលប្រព្រឹត្តអ្វីដែលខុសតាមទស្សនៈរបស់ព្រះ។ (អេភ. ៥:៧) ក៏ប៉ុន្តែ យើងត្រូវតែប្រុងប្រយ័ត្នជាងអ្នកក្រុងអេភេសូរសម័យបុរាណទៅទៀត ដោយសារសព្វថ្ងៃនេះយើងមិនគ្រាន់តែអាចចំណាយពេលសេពគប់ដោយផ្ទាល់ជាមួយមនុស្សឯទៀតប៉ុណ្ណោះ ប៉ុន្តែក៏អាចសេពគប់តាមបណ្ដាញសង្គមទាក់ទងគ្នាដែរ។ បងស្រីម្នាក់ឈ្មោះអេនចឺឡា aដែលរស់នៅទ្វីបអាស៊ី បានឃើញថាបណ្ដាញសង្គមសម្រាប់ទាក់ទងគ្នាអាចមានគ្រោះថ្នាក់ខ្លាំងយ៉ាងណា។ បងអេនចឺឡាសារភាពថា៖ «វាអាចប្រៀបដូចជាអន្ទាក់មួយដែលធ្វើឲ្យអារម្មណ៍យើងទៅជាស្ពឹក។ ខ្ញុំបានធ្លាក់ខ្លួនដល់ចំណុចមួយដែលលែងខ្វល់ថាខ្ញុំមានមិត្តភក្ដិដែលមិនធ្វើតាមគោលការណ៍គម្ពីរ។ នៅទីបំផុត ខ្ញុំបានចាប់ផ្ដើមគិតថាការមានរបៀបរស់នៅដែលព្រះយេហូវ៉ាមិនពេញចិត្តគឺមិនអីទេ»។ ប៉ុន្តែដោយក្ដីស្រឡាញ់ ពួកអ្នកចាស់ទុំបានជួយបងអេនចឺឡាឲ្យធ្វើការកែប្រែដែលចាំបាច់។ គាត់និយាយថា៖ «ឥឡូវខ្ញុំផ្ដោតអារម្មណ៍ទៅលើព្រះយេហូវ៉ានិងរបៀបគិតគូររបស់លោក ជាជាងបណ្ដាញសង្គមសម្រាប់ទាក់ទងគ្នា»។
ការជ្រើសរើសមិត្តភក្ដិល្អអាចឲ្យយើងស្រួលជាងធ្វើតាមខ្នាតតម្រារបស់ព្រះយេហូវ៉ា (សូមមើលវគ្គ១១)
១២. តើអ្វីនឹងជួយយើងឲ្យកាន់ខ្ជាប់តាមខ្នាតតម្រារបស់ព្រះយេហូវ៉ាស្ដីអំពីអ្វីដែលខុសនិងអ្វីដែលត្រូវ?
១២ យើងត្រូវប្រឆាំងនឹងទស្សនៈពិភពលោកនេះដែលថាអំពើប្រាសចាកសីលធម៌គឺទទួលយកបាន។ យើងដឹងថាអំពើនោះគឺខុស។ (អេភ. ៤:១៩, ២០) ប៉ុន្តែ គឺជាការល្អឲ្យយើងសួរខ្លួនថា ‹តើខ្ញុំជៀសវាងពីការសេពគប់ដែលមិនចាំបាច់ជាមួយអ្នករួមការងារ សិស្សរួមថ្នាក់ ឬអ្នកឯទៀតដែលមិនគោរពតាមខ្នាតតម្រាដ៏សុចរិតរបស់ព្រះយេហូវ៉ាឬទេ? តើខ្ញុំមានចិត្តក្លាហានកាន់ខ្ជាប់តាមខ្នាតតម្រារបស់ព្រះយេហូវ៉ា ទោះជាអ្នកខ្លះប្រហែលជាចាត់ទុកខ្ញុំជាមនុស្សចង្អៀតចង្អល់ឬទេ?›។ ដូចបានបញ្ជាក់នៅធីម៉ូថេទី២ ២:២០-២២ យើងក៏ប្រហែលជាត្រូវប្រុងប្រយ័ត្នពេលជ្រើសរើសមិត្តភក្ដិក្នុងក្រុមជំនុំគ្រិស្តសាសនិកដែរ។ យើងចាំថាអ្នកខ្លះប្រហែលជាមិនជួយយើងឲ្យរក្សាភាពស្មោះត្រង់ក្នុងកិច្ចបម្រើព្រះយេហូវ៉ាទេ។
ចូរ«រស់នៅជាកូននៃពន្លឺ»
១៣. តើការ«បន្តរស់នៅជាកូននៃពន្លឺ»មានន័យយ៉ាងណា? (អេភេសូរ ៥:៧-៩)
១៣ ប៉ូលបានលើកទឹកចិត្តគ្រិស្តសាសនិកនៅក្រុងអេភេសូរមិនគ្រាន់តែឲ្យបន្ដជៀសឆ្ងាយពីភាពងងឹតប៉ុណ្ណោះទេ តែក៏ឲ្យ«បន្តរស់នៅជាកូននៃពន្លឺ»ដែរ។ (សូមអាន អេភេសូរ ៥:៧-៩) តើនេះមានន័យយ៉ាងណា? គឺមានន័យថាការប្រព្រឹត្តជាគ្រិស្តសាសនិកពិតនៅគ្រប់ពេលវេលា។ របៀបមួយដើម្បីសម្រេចគោលដៅនេះគឺដោយឧស្សាហ៍អាននិងសិក្សាគម្ពីរ រួមទាំងសៀវភៅផ្សេងៗរបស់យើងដែលមានមូលដ្ឋានលើគម្ពីរ។ គឺសំខាន់ណាស់ឲ្យយើងយកចិត្តទុកដាក់យ៉ាងដិតដល់ចំពោះសេចក្ដីបង្រៀននិងគំរូរបស់លោកយេស៊ូគ្រិស្តដែលជា«ពន្លឺបំភ្លឺពិភពលោក»។—យ៉ូន. ៨:១២; សុភ. ៦:២៣
១៤. តើឫទ្ធានុភាពបរិសុទ្ធអាចជួយយើងយ៉ាងដូចម្ដេច?
១៤ យើងក៏ត្រូវការជំនួយពីឫទ្ធានុភាពបរិសុទ្ធរបស់ព្រះដើម្បីយើងអាចបន្តប្រព្រឹត្តជា«កូននៃពន្លឺ»។ ហេតុអ្វី? ពីព្រោះគឺពិបាកឲ្យរក្សាភាពស្អាតស្អំក្នុងពិភពលោកដែលប្រាសចាកសីលធម៌នេះ។ (១ថែ. ៤:៣-៥, ៧, ៨) ឫទ្ធានុភាពបរិសុទ្ធអាចជួយយើងឲ្យតយុទ្ធនឹងរបៀបគិតគូររបស់ពិភពលោកនេះ រួមមានទស្សនវិជ្ជានិងផ្នត់គំនិតដែលប្រឆាំងនឹងរបៀបគិតគូររបស់ព្រះ។ ឫទ្ធានុភាពបរិសុទ្ធក៏អាចជួយយើងឲ្យមាន‹គុណធម៌និងសេចក្ដីសុចរិតគ្រប់យ៉ាង›។—អេភ. ៥:៩
១៥. តើយើងអាចទទួលឫទ្ធានុភាពបរិសុទ្ធតាមរបៀបណាខ្លះ? (អេភេសូរ ៥:១៩, ២០)
១៥ របៀបមួយដែលយើងអាចទទួលឫទ្ធានុភាពបរិសុទ្ធគឺដោយអធិដ្ឋានសុំ។ លោកយេស៊ូបានមានប្រសាសន៍ថាព្រះយេហូវ៉ានឹង«ផ្ដល់ឫទ្ធានុភាពបរិសុទ្ធរបស់លោកដល់អ្នកដែលសុំពីលោក»។ (លូក. ១១:១៣) ម្យ៉ាងទៀត ពេលយើងរួមគ្នាសរសើរព្រះយេហូវ៉ានៅកិច្ចប្រជុំគ្រិស្តសាសនិក យើងក៏ទទួលឫទ្ធានុភាពបរិសុទ្ធដែរ។ (សូមអាន អេភេសូរ ៥:១៩, ២០) ឥទ្ធិពលល្អដែលឫទ្ធានុភាពបរិសុទ្ធរបស់ព្រះមានមកលើយើងនឹងជួយយើងឲ្យរស់នៅតាមរបៀបដែលព្រះពេញចិត្ត។
១៦. តើអ្វីនឹងជួយយើងឲ្យធ្វើការសម្រេចចិត្តឈ្លាសវៃ? (អេភេសូរ ៥:១០, ១៧)
១៦ ពេលយើងត្រូវធ្វើការសម្រេចចិត្តដ៏សំខាន់ យើងត្រូវ«ខំព្យាយាមយល់អំពីបំណងប្រាថ្នារបស់ព្រះយេហូវ៉ា» ហើយក្រោយមកប្រព្រឹត្តស្របតាមបំណងប្រាថ្នាលោក។ (សូមអាន អេភេសូរ ៥:១០, ១៧) ដោយស្វែងរកគោលការណ៍គម្ពីរដែលត្រូវនឹងស្ថានភាពរបស់យើង យើងកំពុងព្យាយាមស្វែងយល់អំពីរបៀបគិតគូររបស់ព្រះទៅលើរឿងនោះ។ យ៉ាងនេះ កាលដែលយើងធ្វើតាមគោលការណ៍របស់លោក យើងទំនងជានឹងធ្វើការសម្រេចចិត្តល្អ។
១៧. តើយើងអាចប្រើពេលវេលារបស់យើងដោយឈ្លាសវៃយ៉ាងដូចម្ដេច? (អេភេសូរ ៥:១៥, ១៦) (សូមមើលរូបភាពផងដែរ)
១៧ ប៉ូលក៏ឲ្យយោបល់ដល់គ្រិស្តសាសនិកនៅក្រុងអេភេសូរឲ្យប្រើពេលវេលារបស់ពួកគេដោយឈ្លាសវៃ។ (សូមអាន អេភេសូរ ៥:១៥, ១៦) «មេកំណាច»សាថានដែលជាសត្រូវរបស់យើងចង់ឲ្យយើងជាប់រវល់ជាមួយនឹងរបៀបរបបពិភពលោកនេះ រហូតដល់យើងគ្មានពេលសម្រាប់កិច្ចបម្រើព្រះ។ (១យ៉ូន. ៥:១៩) គឺងាយស្រួលឲ្យគ្រិស្តសាសនិកណាម្នាក់ចាប់ផ្ដើមផ្ដោតអារម្មណ៍ទៅលើវត្ថុទ្រព្យ ការអប់រំ ឬការងារ ជាជាងទៅលើរបៀបផ្សេងៗដែលគាត់អាចបម្រើព្រះយេហូវ៉ា។ បើគាត់ធ្វើដូច្នេះ គាត់នឹងបង្ហាញថាគាត់កំពុងចាប់ផ្ដើមមានរបៀបគិតគូរដូចមនុស្សក្នុងពិភពលោក។ អ្វីទាំងនេះប្រហែលជាមិនខុសទេ ប៉ុន្តែវាមិនគួរជាអ្វីដែលសំខាន់បំផុតក្នុងជីវិតរបស់យើងឡើយ។ ដើម្បីរស់នៅជា«កូននៃពន្លឺ» យើងត្រូវ«ប្រើគ្រប់ឱកាសឲ្យកើតប្រយោជន៍ច្រើនបំផុត» ដោយផ្ដោតអារម្មណ៍ទៅលើអ្វីដែលពិតជាសំខាន់។
គ្រិស្តសាសនិកនៅក្រុងអេភេសូរបានត្រូវលើកទឹកចិត្តឲ្យប្រើពេលវេលាយ៉ាងឈ្លាសវៃ (សូមមើលវគ្គ១៧)
១៨. តើបងដាណឺលបានធ្វើអ្វីដើម្បីប្រើពេលវេលាឲ្យកើតប្រយោជន៍ច្រើនជាង?
១៨ ចូររកឱកាសបម្រើព្រះយេហូវ៉ាឲ្យបានច្រើនជាង។ នេះជាអ្វីដែលបងប្រុសដាណឺលដែលរស់នៅប្រទេសអាហ្វ្រិកខាងត្បូងបានធ្វើ។ គាត់និយាយថា៖ «ខ្ញុំបានពិនិត្យមើលស្ថានភាពរបស់ខ្ញុំ ហើយអង្វរសុំព្រះយេហូវ៉ាឲ្យជួយខ្ញុំមានប្រសិទ្ធភាពជាងក្នុងកិច្ចបម្រើផ្សាយ។ ខ្ញុំបានអធិដ្ឋានសុំឲ្យមានការងារដែលនឹងផ្ដល់ពេលច្រើនជាងដល់ខ្ញុំដើម្បីផ្សព្វផ្សាយ។ ដោយមានជំនួយពីព្រះយេហូវ៉ា ខ្ញុំបានរកឃើញការងារដ៏សមរម្យមួយ។ ក្រោយមក ខ្ញុំនិងប្រពន្ធខ្ញុំបានចាប់ផ្ដើមកិច្ចបម្រើពេញពេលជាមួយគ្នា»។
១៩. តើយើងអាច«បន្ដរស់នៅជាកូននៃពន្លឺ»យ៉ាងដូចម្ដេច?
១៩ សំបុត្ររបស់ប៉ូលទៅកាន់គ្រិស្តសាសនិកនៅក្រុងអេភេសូរច្បាស់ជាបានជួយពួកគេក្នុងគន្លងជីវិតរបស់ពួកគេជាគ្រិស្តសាសនិក។ យោបល់នោះពីព្រះយេហូវ៉ាក៏អាចជួយយើងដែរ។ ដូចយើងបានរៀន នោះអាចជួយយើងឲ្យជ្រើសរើសការកម្សាន្តនិងការសេពគប់ដ៏ឈ្លាសវៃ ហើយក៏អាចជំរុញចិត្តយើងឲ្យបន្ដសិក្សាបណ្ដាំព្រះជាទៀងទាត់ ដើម្បីឲ្យពន្លឺនៃសេចក្ដីពិតអាចបន្ដដឹកនាំរាល់ការប្រព្រឹត្តរបស់យើង។ ម្យ៉ាងទៀត យោបល់នោះលើកបញ្ជាក់អំពីសារៈសំខាន់នៃឫទ្ធានុភាពបរិសុទ្ធដែលអាចជួយយើងឲ្យបណ្ដុះគុណសម្បត្តិផ្សេងៗ។ ការធ្វើតាមអ្វីដែលប៉ូលបានសរសេរអាចជួយយើងឲ្យធ្វើការសម្រេចចិត្តឈ្លាសវៃដែលស្របតាមរបៀបគិតគូររបស់ព្រះយេហូវ៉ា។ ដោយធ្វើអ្វីទាំងនេះ យើងនឹងអាចជៀសចេញពីភាពងងឹតនៃពិភពលោកនេះ ហើយបន្ដនៅក្នុងពន្លឺ!
តើអ្នកនឹងឆ្លើយយ៉ាងណា?
-
នៅអេភេសូរ ៥:៨ តើ«ភាពងងឹត»និង«ពន្លឺ»សំដៅទៅលើអ្វី?
-
តើយើងអាចជៀសវាងពី«ភាពងងឹត»យ៉ាងដូចម្ដេច?
-
តើយើងអាច«បន្តរស់នៅជាកូននៃពន្លឺ»តាមរបៀបណា?
ចម្រៀងលេខ៩៥ ពន្លឺសេចក្ដីពិតកាន់តែភ្លឺឡើង
a ឈ្មោះខ្លះបានត្រូវផ្លាស់ប្ដូរ។
b ការពណ៌នាអំពីរូបភាព៖ រូបភាពនេះជាឯកសារបុរាណមួយនៃសំបុត្ររបស់សាវ័កប៉ូលទៅកាន់គ្រិស្តសាសនិកនៅក្រុងអេភេសូរ។
