អត្ថបទសិក្សា ១០
ចម្រៀងលេខ១៣ គ្រិស្តជាគំរូរបស់យើង
‹ចូរមកតាមលោកយេស៊ូជាដរាប›ក្រោយពីទទួលការជ្រមុជទឹក
«បើអ្នកណាចង់មកតាមខ្ញុំ អ្នកនោះត្រូវប្រគល់ខ្លួនជូនព្រះ រួចលីបង្គោលទារុណកម្មរបស់ខ្លួនរៀងរាល់ថ្ងៃ ហើយមកតាមខ្ញុំជាដរាបចុះ»។—លូក. ៩:២៣
ចំណុចផ្ដោត
អត្ថបទនេះអាចជួយយើងទាំងអស់គ្នាឲ្យគិតអំពីអត្ថន័យនៃការប្រគល់ខ្លួនជូនព្រះ។ ជាពិសេសអត្ថបទនេះអាចជួយពួកអ្នកដែលទើបតែទទួលការជ្រមុជទឹកថ្មីៗនេះឲ្យរក្សាភាពស្មោះត្រង់។
១-២. តើជីវិតគឺល្អប្រសើរជាងយ៉ាងណាក្រោយពីទទួលការជ្រមុជទឹក?
យើងសប្បាយចិត្តពេលយើងទទួលការជ្រមុជទឹក ហើយចូលក្នុងក្រុមគ្រួសាររបស់ព្រះយេហូវ៉ា។ ពួកអ្នកដែលមានឯកសិទ្ធិនោះយល់ស្របនឹងពាក្យរបស់ដាវីឌដែលជាអ្នកតែងចម្រៀងសរសើរព្រះ ដែលនិយាយថា៖ «អ្នកណាដែល[ព្រះយេហូវ៉ា]ជ្រើសរើស ហើយនាំមកជិតដើម្បីឲ្យអាស្រ័យនៅក្នុងទីធ្លារបស់លោក អ្នកនោះមានសុភមង្គលហើយ»។—ចសព. ៦៥:៤
២ ព្រះយេហូវ៉ាមិនអនុញ្ញាតឲ្យអ្នកណាក៏ដោយចូលក្នុងក្រុមគ្រួសាររបស់លោកទេ។ ដូចយើងបានពិចារណាក្នុងអត្ថបទមុន លោកសម្រេចចិត្តចូលមកជិតពួកអ្នកដែលបង្ហាញថាពួកគេចង់មានចំណងមិត្តភាពជិតស្និទ្ធជាមួយលោក។ (យ៉ា. ៤:៨) ពេលអ្នកប្រគល់ខ្លួនជូនព្រះយេហូវ៉ា ហើយទទួលការជ្រមុជទឹក អ្នកចូលកាន់តែជិតព្រះយេហូវ៉ាតាមរបៀបពិសេស។ អ្នកអាចប្រាកដថាក្រោយពីនោះ លោកនឹង‹ចាក់ពរយ៉ាងលើសលប់មកលើអ្នករហូតដល់លែងខ្វះអ្វីទៀត›។—ម៉ាឡ. ៣:១០; យេ. ១៧:៧, ៨
៣. តើគ្រិស្តសាសនិកដែលបានប្រគល់ខ្លួនជូនព្រះនិងទទួលការជ្រមុជទឹកមានភារកិច្ចធ្ងន់ធ្ងរអ្វី? (អ្នកទូន្មាន ៥:៤, ៥)
៣ ការជ្រមុជទឹកគឺគ្រាន់តែជាទីចាប់ផ្ដើម។ ក្រោយពីអ្នកធ្វើដូច្នេះ អ្នកនឹងចង់ខំអស់ពីសមត្ថភាពដើម្បីរស់នៅស្របតាមពាក្យសម្បថរបស់អ្នកអំពីការប្រគល់ខ្លួនជូនព្រះ ទោះជាប្រឈមមុខនឹងការល្បួងឬការសាកល្បងជំនឿក្ដី។ (សូមអាន អ្នកទូន្មាន ៥:៤, ៥) ក្នុងនាមជាអ្នកកាន់តាមលោកយេស៊ូ អ្នកនឹងធ្វើតាមគំរូរបស់លោកយេស៊ូ ហើយធ្វើតាមបង្គាប់របស់លោកឲ្យបានដិតដល់បំផុតតាមដែលអាចធ្វើបាន។ (ម៉ាថ. ២៨:១៩, ២០; ១ពេ. ២:២១) អត្ថបទនេះនឹងជួយអ្នកឲ្យធ្វើដូច្នេះ។
‹ចូរមកតាមលោកយេស៊ូជាដរាប›ទោះជាមានទុក្ខលំបាកនិងការល្បួងក្ដី
៤. តើពួកអ្នកកាន់តាមលោកយេស៊ូលី«បង្គោលទារុណកម្ម»ក្នុងន័យយ៉ាងណា? (លូកា ៩:២៣)
៤ ក្រោយពីទទួលការជ្រមុជទឹក ជីវិតរបស់អ្នកនឹងមិនមែនគ្មានបញ្ហានោះទេ។ តាមពិត លោកយេស៊ូបានបញ្ជាក់ថាពួកអ្នកកាន់តាមលោកនឹងលី«បង្គោលទារុណកម្ម» ហើយនឹងធ្វើដូច្នេះ«រៀងរាល់ថ្ងៃ»។ (សូមអាន លូកា ៩:២៣) តើលោកយេស៊ូចង់បានន័យថាពួកអ្នកកាន់តាមលោកនឹងតែងតែរងទុក្ខឬ? មិនមែនទាល់តែសោះ។ ផ្ទុយទៅវិញ លោកចង់បញ្ជាក់ថាក្រៅពីពរដែលពួកគេទទួល ពួកគេក៏នឹងជួបបញ្ហាដែរ។ បញ្ហាខ្លះទាំងនោះប្រហែលជាថែមទាំងធ្វើឲ្យឈឺចិត្ត។—២ធី. ៣:១២
៥. តើលោកយេស៊ូបានសន្យាថាពួកអ្នកដែលលះបង់នឹងទទួលពរអ្វីខ្លះ?
៥ អ្នកប្រហែលជាបានជួបការប្រឆាំងពីក្រុមគ្រួសាររួចហើយ ឬប្រហែលជាបានលះបង់ការស្វែងរកទ្រព្យសម្បត្តិដើម្បីចាត់ទុករាជាណាចក្រព្រះថាសំខាន់បំផុត។ (ម៉ាថ. ៦:៣៣) បើដូច្នេះ អ្នកអាចជឿជាក់ថាព្រះយេហូវ៉ាកត់សម្គាល់កិច្ចការដ៏ស្មោះត្រង់របស់អ្នក។ (ហេ. ៦:១០) អ្នកទំនងជាបានពិសោធថាប្រសាសន៍របស់លោកយេស៊ូជាការពិត ដែលថា៖ «អ្នកណាដែលចាកចេញពីផ្ទះ ឬបងប្អូនប្រុសស្រី ឬម្ដាយ ឬឪពុក ឬកូន ឬស្រែចម្ការ ដើម្បីខ្ញុំនិងដើម្បីដំណឹងល្អ អ្នកនោះនឹងបានទទួល១ជា១០០ក្នុងគ្រាឥឡូវនេះគឺ ផ្ទះ បងប្អូនប្រុសស្រី ម្ដាយ កូន និងស្រែចម្ការ ព្រមទាំងការបៀតបៀនផងដែរ ហើយក្នុងរបៀបរបបពិភពលោកដែលនឹងមកដល់ នឹងទទួលជីវិតដែលគ្មានទីបញ្ចប់»។ (ម៉ាក. ១០:២៩, ៣០) ពរដែលអ្នកបានទទួលគឺច្រើនជាងការលះបង់ណាក៏ដោយដែលអ្នកបានធ្វើ។—ចសព. ៣៧:៤
៦. ហេតុអ្វីអ្នកនៅតែត្រូវបន្តតយុទ្ធនឹង«សេចក្ដីប៉ងប្រាថ្នាខុសឆ្គង»ក្រោយពីទទួលការជ្រមុជទឹក?
៦ អ្នកនៅតែត្រូវតយុទ្ធនឹង«សេចក្ដីប៉ងប្រាថ្នាខុសឆ្គង»ក្រោយពីទទួលការជ្រមុជទឹក។ (១យ៉ូន. ២:១៦) នេះគឺដោយសារអ្នកនៅតែជាមនុស្សមិនល្អឥតខ្ចោះ។ ជួនកាល អ្នកប្រហែលជាមានអារម្មណ៍ស្រដៀងនឹងអារម្មណ៍របស់សាវ័កប៉ូល។ គាត់បានសរសេរថា៖ «ក្នុងចិត្តខ្ញុំ ខ្ញុំពិតជាត្រេកអរនឹងច្បាប់របស់ព្រះ។ ប៉ុន្តែ ខ្ញុំសង្កេតឃើញថាមានច្បាប់មួយទៀតក្នុងរូបកាយរបស់ខ្ញុំ ដែលកំពុងច្បាំងនឹងច្បាប់ដែលនៅក្នុងគំនិតរបស់ខ្ញុំ ហើយកំពុងនាំខ្ញុំទៅជាឈ្លើយក្រោមអំណាចច្បាប់នៃភាពខុសឆ្គង ដែលនៅក្នុងរូបកាយរបស់ខ្ញុំ»។ (រ៉ូម ៧:២២, ២៣) អ្នកប្រហែលជាធ្លាក់ទឹកចិត្តដោយសារអ្នកត្រូវតយុទ្ធនឹងសេចក្ដីប៉ងប្រាថ្នាមិនត្រឹមត្រូវ។ ប៉ុន្តែ ការគិតអំពីសេចក្ដីសន្យាដែលអ្នកបានធ្វើចំពោះព្រះយេហូវ៉ាពេលអ្នកប្រគល់ខ្លួនជូនលោក នឹងពង្រឹងការតាំងចិត្តរបស់អ្នកដើម្បីតយុទ្ធនឹងការល្បួង។ ការពិត ពាក្យសម្បថរបស់អ្នកអំពីការប្រគល់ខ្លួននឹងជួយអ្នកពេលអ្នកជួបការល្បួង។ តើតាមរបៀបណា?
៧. តើការប្រគល់ខ្លួនជូនព្រះយេហូវ៉ានឹងជួយអ្នកឲ្យរក្សាភាពស្មោះត្រង់ចំពោះលោកយ៉ាងដូចម្ដេច?
៧ ពេលអ្នកប្រគល់ខ្លួនជូនព្រះយេហូវ៉ា អ្នកលែងធ្វើតាមចិត្តខ្លួននិងគោលដៅរបស់ខ្លួនដែលនាំឲ្យព្រះយេហូវ៉ាមិនពេញចិត្តទៀត។ (ម៉ាថ. ១៦:២៤) ដូច្នេះ ពេលអ្នកជួបការល្បងល អ្នកនឹងមិនចាំបាច់ត្រូវការពេលដើម្បីសម្រេចចិត្តថាធ្វើអ្វីទេ។ អ្នកបានសម្រេចចិត្តរួចហើយថាអ្នកត្រូវធ្វើអ្វី គឺរក្សាភាពស្មោះត្រង់ចំពោះព្រះយេហូវ៉ា។ អ្នកនឹងបន្តតាំងចិត្តដើម្បីធ្វើឲ្យព្រះយេហូវ៉ាពេញចិត្ត។ តាមរបៀបនេះ អ្នកនឹងដូចយ៉ូប ទោះជាគាត់ជួបទុក្ខលំបាកដ៏ខ្លាំងក្ដី គាត់និយាយយ៉ាងមុតមាំថា៖ «ខ្ញុំនឹងមិនព្រមឲ្យអ្វីណាមកធ្វើឲ្យខ្ញុំលែងមានចិត្តស្មោះឥតងាករេចំពោះព្រះជាដាច់ខាត!»។—យ៉ូប ២៧:៥
៨. តើតាមរបៀបណាការគិតអំពីសេចក្ដីអធិដ្ឋានរបស់អ្នកពេលប្រគល់ខ្លួនជូនព្រះអាចជួយអ្នកឲ្យទប់ទល់នឹងការល្បួង?
៨ ដោយរំពឹងគិតអំពីសេចក្ដីអធិដ្ឋានពេលអ្នកប្រគល់ខ្លួនជូនព្រះយេហូវ៉ា អ្នកនឹងទទួលកម្លាំងដើម្បីទប់ទល់នឹងការល្បួង។ ជាឧទាហរណ៍ តើអ្នកនឹងចាប់ផ្ដើមចែចង់គូរបស់បុគ្គលឯទៀតឬទេ? ច្បាស់ជាមិនមែនទេ! អ្នកបានសន្យានឹងព្រះយេហូវ៉ារួចហើយថាអ្នកនឹងមិនធ្វើដូចនោះទេ។ បើអ្នកមិនអនុញ្ញាតឲ្យអារម្មណ៍មិនត្រឹមត្រូវដុះឡើង អ្នកនឹងមិនចាំបាច់ខំបំបាត់អារម្មណ៍ទាំងនោះចោលក្រោយមកទេ។ អ្នកនឹង«បែរចេញ»ពី«ផ្លូវរបស់មនុស្សទុច្ចរិត»។—សុភ. ៤:១៤, ១៥
៩. តើតាមរបៀបណាការគិតអំពីសេចក្ដីអធិដ្ឋានពេលអ្នកប្រគល់ខ្លួនជូនព្រះក៏អាចជួយអ្នកឲ្យបន្តចាត់ទុកការគោរពប្រណិប័តន៍ព្រះថាសំខាន់បំផុតក្នុងជីវិតអ្នក?
៩ ចុះបើគេស្នើសុំឲ្យអ្នកនូវការងារមួយដែលនឹងរារាំងអ្នកមិនឲ្យចូលរួមកិច្ចប្រជុំគ្រិស្តសាសនិកជាទៀងទាត់? អ្នកនឹងដឹងថាត្រូវធ្វើអ្វី។ យូរមុនគេស្នើផ្ដល់ការងារនោះឲ្យអ្នក អ្នកបានសម្រេចចិត្តរួចហើយថាមិនព្រមទទួលការងារណាដែលនឹងរារាំងអ្នកពីការចូលរួមកិច្ចប្រជុំ។ យ៉ាងនេះ អ្នកនឹងមិនចាំបាច់ទទួលយកការងារនោះសិន ហើយក្រោយមកព្យាយាមរកវិធីដើម្បីចាត់ទុកព្រះយេហូវ៉ាថាសំខាន់បំផុតនោះទេ។ ការនឹកចាំអំពីការតាំងចិត្តរបស់លោកយេស៊ូដើម្បីធ្វើឲ្យបិតារបស់លោកពេញចិត្ត នឹងជួយអ្នកឲ្យឆាប់បដិសេធយ៉ាងម៉ឺងម៉ាត់ចំពោះអ្វីណាក៏ដោយដែលអ្នកដឹងហើយថានឹងធ្វើឲ្យព្រះដែលអ្នកបានប្រគល់ខ្លួនមិនពេញចិត្ត។—ម៉ាថ. ៤:១០; យ៉ូន. ៨:២៩
១០. ក្រោយពីទទួលការជ្រមុជទឹក តើព្រះយេហូវ៉ានឹងជួយអ្នកយ៉ាងដូចម្ដេចឲ្យ‹តាមលោកយេស៊ូជាដរាប›?
១០ តាមការពិត ទុក្ខលំបាកនិងការល្បួងផ្ដល់ឱកាសឲ្យអ្នកបង្ហាញថាអ្នកតាំងចិត្ត‹តាមលោកយេស៊ូជាដរាប›។ កាលដែលអ្នកធ្វើដូច្នេះ អ្នកអាចជឿជាក់ថាព្រះយេហូវ៉ានឹងជួយអ្នក។ គម្ពីរចែងថា៖ «ព្រះគឺស្មោះត្រង់ ហើយលោកនឹងមិនឲ្យអ្នករាល់គ្នារងការល្បួងហួសពីសមត្ថភាពស៊ូទ្រាំរបស់អ្នករាល់គ្នាឡើយ តែលោកនឹងរៀបចំផ្លូវចេញ ដើម្បីឲ្យអ្នករាល់គ្នាអាចស៊ូទ្រាំនៅពេលជួបសេចក្ដីល្បួងនោះ»។—១កូ. ១០:១៣
របៀបតាមលោកយេស៊ូជាដរាប
១១. តើអ្វីគឺជារបៀបល្អបំផុតមួយដើម្បីតាមលោកយេស៊ូជាដរាប? (សូមមើលរូបភាពផងដែរ)
១១ លោកយេស៊ូមានចិត្តខ្នះខ្នែង ហើយលោកបានរក្សាខ្លួនឲ្យនៅជិតស្និទ្ធនឹងព្រះយេហូវ៉ាដោយការអធិដ្ឋាន។ (លូក. ៦:១២) តាមពិត របៀបល្អបំផុតមួយដែលអ្នកអាចបន្តតាមលោកយេស៊ូជាដរាបក្រោយពីទទួលការជ្រមុជទឹក គឺដោយបន្តធ្វើអ្វីដែលនឹងនាំឲ្យអ្នកចូលកាន់តែជិតព្រះយេហូវ៉ា។ គម្ពីរចែងថា៖ «អ្វីដែលយើងបានធ្វើដើម្បីឲ្យជឿនទៅមុខដល់កម្រិតនេះ ចូរយើងបន្តជឿនទៅមុខដោយធ្វើដូច្នោះតទៅទៀត»។ (ភី. ៣:១៦) ម្ដងម្កាល អ្នកនឹងឮបទពិសោធន៍របស់បងប្អូនដែលបានខំប្រឹងបង្កើនកិច្ចបម្រើរបស់ពួកគេ។ ប្រហែលជាពួកគេបានចូលសាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ ឬបានរើទៅកន្លែងដែលមានសេចក្ដីត្រូវការច្រើនជាង។ បើអ្នកអាចកំណត់គោលដៅបែបនេះ នោះជាការល្អណាស់។ រាស្ត្ររបស់ព្រះយេហូវ៉ាចង់បង្កើនកិច្ចបម្រើរបស់ពួកគេ។ (សកម្ម. ១៦:៩) ប៉ុន្តែ ចុះយ៉ាងណាបើអ្នកមិនអាចធ្វើដូច្នេះនៅឥឡូវនេះ? សូមកុំគិតថាអ្នកអន់ជាងពួកអ្នកដែលអាចធ្វើបានឡើយ។ អ្វីដ៏សំខាន់គឺថាអ្នកបន្តស៊ូទ្រាំក្នុងការរត់ប្រណាំងជាគ្រិស្តសាសនិក។ (ម៉ាថ. ១០:២២) សូមកុំមើលស្រាលតម្លៃនៃការបម្រើព្រះយេហូវ៉ាស្របតាមសមត្ថភាពនិងកាលៈទេសៈរបស់អ្នកឡើយ។ នេះគឺជារបៀបសំខាន់មួយដែលអ្នកអាចបន្តតាមលោកយេស៊ូជាដរាបក្រោយពីទទួលការជ្រមុជទឹក។—ចសព. ២៦:១
ក្រោយពីទទួលការជ្រមុជទឹក ចូរកំណត់គោលដៅណាដែលនឹងធ្វើឲ្យអ្នកចូលកាន់តែជិតព្រះយេហូវ៉ា (សូមមើលវគ្គ១១)
១២-១៣. តើអ្នកអាចធ្វើអ្វីបើចិត្តខ្នះខ្នែងរបស់អ្នកចាប់ផ្ដើមរសាយទៅ? (កូរិនថូសទី១ ៩:១៦, ១៧) (សូមមើលផងដែរនូវប្រអប់ដែលមានចំណងជើងថា « ចូរបន្តនៅក្នុងទីប្រណាំង»)
១២ ចុះយ៉ាងណាបើអស់មួយរយៈពេល អ្នកមានអារម្មណ៍ថាការអធិដ្ឋានរបស់អ្នកគ្រាន់តែនិយាយរត់មាត់ ឬថាអ្នកមិនសូវមានអារម្មណ៍ក្នុងកិច្ចបម្រើផ្សាយ? ចុះបើការអានគម្ពីររបស់អ្នកមិននាំឲ្យអ្នកសប្បាយដូចកាលពីមុន? បើអ្នកមានអារម្មណ៍បែបនេះក្រោយពីទទួលការជ្រមុជទឹក សូមកុំសន្និដ្ឋានថាអ្នកបាត់បង់ឫទ្ធានុភាពពីព្រះយេហូវ៉ាឡើយ។ អ្នកជាមនុស្សមិនល្អឥតខ្ចោះ ហើយអារម្មណ៍របស់អ្នកអាចឡើងចុះ។ បើចិត្តខ្នះខ្នែងរបស់អ្នកចាប់ផ្ដើមរសាយទៅ សូមរំពឹងគិតអំពីគំរូរបស់សាវ័កប៉ូល។ ទោះជាគាត់ខំព្យាយាមយកតម្រាប់លោកយេស៊ូក្ដី គាត់ដឹងថាមានពេលខ្លះដែលគាត់មិនសូវមានចិត្តខ្នះខ្នែងធ្វើអ្វីដែលគាត់ត្រូវធ្វើ។ (សូមអាន កូរិនថូសទី១ ៩:១៦, ១៧) គាត់និយាយថា៖ «ប្រសិនបើខ្ញុំធ្វើដោយមិនស្ម័គ្រពីចិត្ត ខ្ញុំនៅតែត្រូវបំពេញភារកិច្ចនេះដែលព្រះបានផ្ញើនឹងខ្ញុំ»។ និយាយឲ្យស្រួលយល់ ប៉ូលតាំងចិត្តបំពេញកិច្ចបម្រើផ្សាយរបស់គាត់ ទោះជានៅពេលនោះគាត់មានអារម្មណ៍យ៉ាងណាក្ដី។
១៣ ស្រដៀងគ្នាដែរ សូមកុំធ្វើការសម្រេចចិត្តដោយផ្អែកតែទៅលើអារម្មណ៍របស់អ្នកប៉ុណ្ណោះឡើយ។ សូមតាំងចិត្តថាអ្នកនឹងធ្វើអ្វីដែលត្រឹមត្រូវ ទោះជាអ្នកមានអារម្មណ៍យ៉ាងណាក្ដី។ បើអ្នកបន្តធ្វើអ្វីដែលត្រឹមត្រូវ យូរៗទៅអារម្មណ៍របស់អ្នកប្រហែលជាផ្លាស់ប្ដូរ។ ទម្រាំដល់ពេលនោះ ការរក្សាទម្លាប់ល្អក្នុងការគោរពប្រណិប័តន៍ព្រះនឹងជួយអ្នកឲ្យបន្តតាមលោកយេស៊ូក្រោយពីទទួលការជ្រមុជទឹក។ ពេលបងប្អូនឃើញការស៊ូទ្រាំរបស់អ្នកក្នុងការបម្រើព្រះយេហូវ៉ា ពួកគេនឹងទទួលការលើកទឹកចិត្ត។—១ថែ. ៥:១១
«ចូរពិនិត្យពិចារណាអំពីខ្លួនឥតឈប់ . . . ចូរសឲ្យឃើញជានិច្ច»
១៤. តើអ្នកគួរពិនិត្យពិចារណាអ្វីខ្លះជាទៀងទាត់ ហើយហេតុអ្វី? (កូរិនថូសទី២ ១៣:៥)
១៤ ក្រោយពីអ្នកទទួលការជ្រមុជទឹក គឺសំខាន់ឲ្យអ្នកពិនិត្យពិចារណាអំពីខ្លួនអ្នកជាទៀងទាត់។ (សូមអាន កូរិនថូសទី២ ១៣:៥) ម្ដងម្កាល សូមពិនិត្យមើលឲ្យបានដិតដល់អំពីជីវិតរស់នៅនិងទម្លាប់របស់អ្នកដើម្បីឃើញថា តើអ្នកកំពុងអធិដ្ឋានជារៀងរាល់ថ្ងៃ អាននិងសិក្សាគម្ពីរ ចូលរួមកិច្ចប្រជុំ និងចូលរួមក្នុងកិច្ចបម្រើផ្សាយឬយ៉ាងណា? សូមព្យាយាមស្វែងរកវិធីដើម្បីមានអំណរនិងទទួលប្រយោជន៍ថែមទៀតពីសកម្មភាពទាំងនេះ។ ជាឧទាហរណ៍ សូមសួរខ្លួនអ្នកនូវសំណួរដូចជា៖ ‹តើខ្ញុំអាចពន្យល់សេចក្ដីបង្រៀនបឋមក្នុងគម្ពីរដល់អ្នកឯទៀតឬទេ? តើមានវិធីដែលខ្ញុំអាចធ្វើឲ្យកិច្ចបម្រើផ្សាយរបស់ខ្ញុំកាន់តែមានអំណរឬ? តើសេចក្ដីអធិដ្ឋានរបស់ខ្ញុំជាក់លាក់យ៉ាងណា ហើយតើសេចក្ដីអធិដ្ឋានទាំងនោះបង្ហាញថាខ្ញុំពឹងផ្អែកទាំងស្រុងទៅលើព្រះយេហូវ៉ាឬទេ? តើខ្ញុំចូលរួមកិច្ចប្រជុំគ្រិស្តសាសនិកជាទៀងទាត់ឬ? តើខ្ញុំអាចផ្ដោតអារម្មណ៍និងមានចំណែកក្នុងកិច្ចប្រជុំកាន់តែល្អប្រសើរជាងយ៉ាងដូចម្ដេច?›។
១៥-១៦. តើអ្នករៀនអ្វីពីបទពិសោធន៍របស់បងប្រុសម្នាក់អំពីការទប់ទល់នឹងការល្បួង?
១៥ អ្នកក៏គួរពិនិត្យពិចារណាខ្លួនយ៉ាងស្មោះអំពីភាពទន់ខ្សោយរបស់អ្នកដែរ។ បងប្រុសម្នាក់ឈ្មោះរ៉ូបឺតរៀបរាប់អំពីបទពិសោធន៍មួយដែលបង្ហាញអំពីចំណុចនេះ។ គាត់និយាយថា៖ «ពេលខ្ញុំមានអាយុប្រហែលជា២០ឆ្នាំ ខ្ញុំមានការងារមិនពេញពេល។ នៅថ្ងៃមួយក្រោយពីធ្វើការ នារីម្នាក់ដែលជាអ្នករួមការងារបានអញ្ជើញខ្ញុំឲ្យទៅផ្ទះរបស់នាង។ នាងនិយាយថាមានតែយើងពីរនាក់ ហើយយើងអាចធ្វើអីសប្បាយជាមួយគ្នា។ ដំបូងខ្ញុំបានរកលេសតិចតួចដើម្បីជៀសវាងប្រាប់នាងអំពីមូលហេតុពិតប្រាកដ ប៉ុន្តែនៅទីបំផុតខ្ញុំក៏បដិសេធ ហើយពន្យល់អំពីមូលហេតុ»។ បងរ៉ូបឺតបានទប់ទល់នឹងការល្បួងនោះ ហើយនោះគួរឲ្យសរសើរមែន។ ប៉ុន្តែ ក្រោយមកគាត់បានគិតអំពីអ្វីដែលបានកើតឡើង ហើយទទួលស្គាល់ថាគាត់គួរតែធ្វើឲ្យបានល្អជាងនេះ។ គាត់សារភាពថា៖ «ខ្ញុំមិនបដិសេធនារីនោះភ្លាមៗឬយ៉ាងមុតមាំ ដូចយ៉ូសែបបដិសេធប្រពន្ធរបស់ប៉ូទីផាទេ។ (ដក. ៣៩:៧-៩) តាមពិត ខ្ញុំភ្ញាក់ផ្អើលដែលខ្ញុំពិបាកបដិសេធនាងយ៉ាងណា។ រឿងនេះបានជួយខ្ញុំឲ្យឃើញថាខ្ញុំត្រូវពង្រឹងចំណងមិត្តភាពរបស់ខ្ញុំជាមួយព្រះយេហូវ៉ា»។
១៦ អ្នកប្រហែលជាទទួលប្រយោជន៍ពីការពិនិត្យពិចារណាអំពីខ្លួនដូចដែលបងរ៉ូបឺតបានធ្វើ។ ទោះជាពេលអ្នកបានយកឈ្នះការល្បួងក្ដី សូមសួរខ្លួនថា ‹តើខ្ញុំត្រូវការពេលយូរប៉ុណ្ណាដើម្បីបដិសេធ?›។ បើអ្នកឃើញថាអ្នកត្រូវរីកចម្រើន សូមកុំផ្ដន្ទាទោសខ្លួនឡើយ។ ចូរអរសប្បាយដែលឥឡូវអ្នកស្គាល់អំពីភាពទន់ខ្សោយនេះ។ សូមអធិដ្ឋានទៅព្រះយេហូវ៉ាអំពីភាពទន់ខ្សោយរបស់អ្នក ហើយធ្វើអ្វីដែលនឹងពង្រឹងការតាំងចិត្តរបស់អ្នកឲ្យស្ដាប់បង្គាប់លោក។—ចសព. ១៣៩:២៣, ២៤
១៧. តើបទពិសោធន៍របស់បងរ៉ូបឺតជាប់ទាក់ទងយ៉ាងណានឹងនាមរបស់ព្រះយេហូវ៉ា?
១៧ មានអ្វីមួយទៀតដែលយើងរៀនពីបទពិសោធន៍របស់បងរ៉ូបឺត។ គាត់បន្តថា៖ «ក្រោយពីខ្ញុំបដិសេធមិនទៅជាមួយអ្នករួមការងាររបស់ខ្ញុំ នាងនិយាយថា‹បងបានយកឈ្នះការសាកល្បងហើយ!›។ ខ្ញុំបានសួរនាងថាតើនាងចង់មានន័យយ៉ាងណា។ នាងបានពន្យល់ថាមិត្តភក្ដិម្នាក់របស់នាងដែលធ្លាប់ជាសាក្សីបានប្រាប់នាងថាសាក្សីវ័យក្មេងទាំងអស់លួចលាក់ធ្វើអ្វីដែលមិនត្រឹមត្រូវបើពួកគេមានឱកាស។ ដូច្នេះ នាងបានប្រាប់មិត្តភក្តិរបស់នាងថានាងនឹងសាកល្បងថាតើខ្ញុំដូចនោះឬអត់។ នៅពេលនោះ ខ្ញុំពិតជាសប្បាយចិត្តណាស់ដែលខ្ញុំបានលើកកិត្តិយសនាមរបស់ព្រះយេហូវ៉ា»។
១៨. តើអ្នកតាំងចិត្តធ្វើអ្វីក្រោយពីទទួលការជ្រមុជទឹក? (សូមមើលផងដែរនូវប្រអប់ដែលមានចំណងជើងថា « អត្ថបទតភាគដែលប្អូននឹងចូលចិត្ត»)
១៨ ពេលអ្នកប្រគល់ខ្លួនជូនព្រះយេហូវ៉ា ហើយទទួលការជ្រមុជទឹក អ្នកបង្ហាញថាអ្នកចង់ធ្វើឲ្យនាមរបស់លោកបានបរិសុទ្ធ មិនថាមានអ្វីកើតឡើងក៏ដោយ។ ម្យ៉ាងទៀត អ្នកអាចប្រាកដថាព្រះយេហូវ៉ាដឹងអំពីទុក្ខលំបាកដែលអ្នកជួបប្រទះនិងការល្បួងដែលអ្នកទប់ទល់។ លោកនឹងឲ្យពរចំពោះការខំប្រឹងរបស់អ្នកដើម្បីរក្សាភាពស្មោះត្រង់។ សូមទុកចិត្តថាតាមរយៈឫទ្ធានុភាពបរិសុទ្ធរបស់លោក លោកអាចផ្ដល់កម្លាំងឲ្យអ្នកធ្វើដូច្នេះ។ (លូក. ១១:១១-១៣) ដោយមានជំនួយពីព្រះយេហូវ៉ា អ្នកនឹងអាចតាមលោកយេស៊ូជាដរាបក្រោយពីទទួលការជ្រមុជទឹក។
តើអ្នកនឹងឆ្លើយយ៉ាងណា?
-
តើតាមរបៀបណាគ្រិស្តសាសនិក‹លីបង្គោលទារុណកម្មរៀងរាល់ថ្ងៃ›?
-
តើអ្នកអាចធ្វើអ្វីដើម្បី‹តាមលោកយេស៊ូជាដរាប›ក្រោយពីទទួលការជ្រមុជទឹក?
-
តើការគិតអំពីសេចក្ដីអធិដ្ឋានពេលប្រគល់ខ្លួនជូនព្រះអាចជួយអ្នកយ៉ាងដូចម្ដេចឲ្យរក្សាភាពស្មោះត្រង់?
ចម្រៀងលេខ៨៩ បើអ្នកស្ដាប់បង្គាប់ អ្នកនឹងទទួលពរបវរ
