អត្ថបទសិក្សា ១៣
ចម្រៀងលេខ១២៧ ខ្ញុំគួរជាមនុស្សដែលព្រះពេញចិត្ត
តើអ្នកអាចប្រាកដយ៉ាងណាថាព្រះយេហូវ៉ាពេញចិត្តអ្នក?
«ខ្ញុំពេញចិត្តអ្នកណាស់»។—លូក. ៣:២២
ចំណុចផ្ដោត
របៀបដើម្បីអ្នកអាចប្រាកដថាព្រះយេហូវ៉ាពេញចិត្តអ្នក។
១. តើអ្នកបម្រើដ៏ស្មោះត្រង់របស់ព្រះយេហូវ៉ាខ្លះមានអារម្មណ៍យ៉ាងណា?
គឺគួរឲ្យលើកទឹកចិត្តដោយដឹងថាព្រះយេហូវ៉ាពេញចិត្តរាស្ត្ររបស់លោកជាក្រុម! គម្ពីរចែងថា៖ «ព្រះយេហូវ៉ាពេញចិត្តរាស្ត្ររបស់លោក»។ (ចសព. ១៤៩:៤) ប៉ុន្តែ ជួនកាលអ្នកខ្លះធ្លាក់ទឹកចិត្តជាខ្លាំងរហូតដល់ពួកគេឆ្ងល់ថា ‹តើព្រះយេហូវ៉ាពេញចិត្តខ្ញុំផ្ទាល់ឬទេ?›។ អ្នកគោរពប្រណិប័តន៍ដ៏ស្មោះត្រង់របស់ព្រះយេហូវ៉ាមួយចំនួននៅសម័យគម្ពីរ ធ្លាប់មានពេលដែលពួកគេមានអារម្មណ៍បែបនោះ។—១សាំ. ១:៦-១០; យ៉ូប ២៩:២, ៤; ចសព. ៥១:១១
២. តើព្រះយេហូវ៉ាពេញចិត្តអ្នកណា?
២ គម្ពីរបង្ហាញយ៉ាងច្បាស់ថាមនុស្សមិនល្អឥតខ្ចោះអាចទទួលការពេញចិត្តពីព្រះយេហូវ៉ា។ តើតាមរបៀបណា? យើងត្រូវបង្ហាញជំនឿទៅលើលោកយេស៊ូគ្រិស្តនិងទទួលការជ្រមុជទឹក។ (យ៉ូន. ៣:១៦) យ៉ាងនេះ យើងបង្ហាញជាសាធារណៈថាយើងបានប្រែចិត្តចំពោះការខុសឆ្គងរបស់យើង ហើយបានសន្យានឹងព្រះថាយើងនឹងធ្វើតាមបំណងប្រាថ្នារបស់លោក។ (សកម្ម. ២:៣៨; ៣:១៩) ព្រះយេហូវ៉ាសប្បាយចិត្តពេលយើងធ្វើអ្វីទាំងនេះដើម្បីបណ្ដុះចំណងមិត្តភាពជាមួយលោក។ ដរាបណាយើងខំអស់ពីសមត្ថភាពដើម្បីរស់នៅស្របតាមពាក្យសម្បថរបស់យើងក្នុងការប្រគល់ខ្លួនជូនលោក ដរាបនោះព្រះយេហូវ៉ាពេញចិត្តយើង ហើយចាត់ទុកយើងថាជាមិត្តជិតស្និទ្ធរបស់លោក។—ចសព. ២៥:១៤
៣. តើយើងនឹងពិចារណាអ្វីខ្លះនៅឥឡូវនេះ?
៣ ប៉ុន្តែ ហេតុអ្វីជួនកាលអ្នកខ្លះប្រហែលជាមានអារម្មណ៍ថាព្រះមិនពេញចិត្តពួកគេ? តើព្រះយេហូវ៉ាបង្ហាញយ៉ាងណាថាលោកពេញចិត្តយើង? ហើយតើតាមរបៀបណាគ្រិស្តសាសនិកណាម្នាក់អាចពង្រឹងការជឿជាក់របស់ខ្លួនថាព្រះពេញចិត្តគាត់?
មូលហេតុដែលអ្នកខ្លះមានអារម្មណ៍ថាព្រះយេហូវ៉ាមិនពេញចិត្តពួកគេ
៤-៥. ទោះជាយើងមានអារម្មណ៍ថាខ្លួនគ្មានតម្លៃក្ដី តើយើងអាចប្រាកដអំពីអ្វី?
៤ យើងខ្លះបានតយុទ្ធនឹងអារម្មណ៍ថាខ្លួនគ្មានតម្លៃតាំងពីក្មេង។ (ចសព. ៨៨:១៥) បងប្រុសម្នាក់ឈ្មោះអាឌ្រីអាននិយាយថា៖ «ខ្ញុំតែងតែមានអារម្មណ៍ថាខ្លួនគ្មានតម្លៃ។ ខ្ញុំនឹកចាំថាកាលពីខ្ញុំនៅតូច ខ្ញុំបានអធិដ្ឋានឲ្យក្រុមគ្រួសារខ្ញុំចូលក្នុងសួនឧទ្យាន ទោះជាខ្ញុំមិនប្រាកដថាខ្ញុំអាចនៅទីនោះបានឬអត់»។ បងប្រុសថូនីដែលធំឡើងក្នុងក្រុមគ្រួសារដែលមិនកាន់គ្រិស្តសាសនា និយាយថា៖ «ឪពុកម្ដាយខ្ញុំមិនដែលប្រាប់ខ្ញុំថាពួកគាត់ស្រឡាញ់ខ្ញុំ ឬមានមោទនភាពចំពោះខ្ញុំទេ។ ដល់ពេលអ៊ីចឹងទៅ ខ្ញុំមានអារម្មណ៍ថាខ្ញុំធ្វើអ្វី ក៏ពួកគាត់មិនពេញចិត្តដែរ»។
៥ បើជួនកាលយើងមានអារម្មណ៍ថាខ្លួនគ្មានតម្លៃ យើងអាចចាំថាព្រះយេហូវ៉ាផ្ទាល់បានទាញនាំយើងឲ្យមកឯលោក។ (យ៉ូន. ៦:៤៤) លោកឃើញគុណសម្បត្តិរបស់យើងដែលយើងផ្ទាល់ប្រហែលជាមិនឃើញ ហើយលោកស្គាល់ចិត្តរបស់យើង។ (១សាំ. ១៦:៧; ២ប្រ. ៦:៣០) ដូច្នេះ យើងអាចទុកចិត្តលោក ពេលលោកមានប្រសាសន៍ថាយើងមានតម្លៃ។—១យ៉ូន. ៣:១៩, ២០
៦. តើសាវ័កប៉ូលមានអារម្មណ៍យ៉ាងណាចំពោះការខុសឆ្គងរបស់គាត់នៅអតីតកាល?
៦ មុនរៀនសេចក្ដីពិត យើងខ្លះបានធ្វើអ្វីដែលប្រហែលជានៅតែនាំឲ្យយើងបន្ទោសខ្លួន។ (១ពេ. ៤:៣) សូម្បីតែគ្រិស្តសាសនិកផ្សេងទៀតដ៏ស្មោះត្រង់ ក៏តយុទ្ធប្រឆាំងនឹងទំនោរចិត្តខុសឆ្គង។ តើចិត្តរបស់អ្នកផ្ដន្ទាទោសអ្នកឬទេ? បើដូច្នេះ សូមទទួលការសម្រាលទុក្ខដោយដឹងថាអ្នកបម្រើដ៏ស្មោះត្រង់របស់ព្រះយេហូវ៉ា ក៏ធ្លាប់តយុទ្ធនឹងអារម្មណ៍ស្រដៀងនឹងនេះដែរ។ ជាឧទាហរណ៍ សាវ័កប៉ូលពិបាកចិត្តណាស់ ពេលគិតអំពីភាពមិនល្អឥតខ្ចោះរបស់គាត់។ (រ៉ូម ៧:២៤) ពិតមែនថាប៉ូលបានប្រែចិត្តចំពោះការខុសឆ្គងរបស់ខ្លួន ហើយទទួលការជ្រមុជទឹក ប៉ុន្តែគាត់បាននិយាយអំពីខ្លួនគាត់ថា៖ «ក្នុងចំណោមពួកសាវ័ក ខ្ញុំជាអ្នកតូចជាងគេ» និងជាអ្នកប្រព្រឹត្តអំពើខុសឆ្គង«ធ្ងន់ជាងគេ»។—១កូ. ១៥:៩; ១ធី. ១:១៥
៧. តើយើងគួរចាំអ្វីស្ដីអំពីការខុសឆ្គងរបស់យើងនៅអតីតកាល?
៧ បិតារបស់យើងនៅស្ថានសួគ៌សន្យាថាលោកនឹងអភ័យទោសឲ្យយើងបើយើងប្រែចិត្ត។ (ចសព. ៨៦:៥) ដូច្នេះ បើយើងពិតជាស្ដាយក្រោយចំពោះការខុសឆ្គងដែលយើងបានប្រព្រឹត្ត យើងអាចទុកចិត្តថាអ្វីដែលព្រះយេហូវ៉ាបានមានប្រសាសន៍គឺពិត ហើយថាលោកបានអភ័យទោសឲ្យយើង។—កូឡ. ២:១៣
៨-៩. តើតាមរបៀបណាយើងអាចយកឈ្នះអារម្មណ៍ថាយើងធ្វើមិនដែលគ្រប់គ្រាន់ដើម្បីឲ្យព្រះយេហូវ៉ាពេញចិត្ត?
៨ យើងទាំងអស់គ្នាចង់បម្រើព្រះយេហូវ៉ាឲ្យបានច្រើនបំផុតតាមដែលអាចធ្វើបាន។ ប៉ុន្តែ អ្នកខ្លះមានអារម្មណ៍ថាពួកគេមិនសមនឹងទទួលការពេញចិត្តពីលោក។ បងស្រីម្នាក់ឈ្មោះអាមេនដានិយាយថា៖ «តាមធម្មតា ខ្ញុំគិតថាការបម្រើព្រះយេហូវ៉ាអស់ពីសមត្ថភាពមានន័យថាខ្ញុំតែងតែត្រូវធ្វើច្រើនជាង។ ខ្ញុំច្រើនតែតម្រូវពីខ្លួនលើសពីអ្វីដែលខ្ញុំអាចធ្វើបាន។ ពេលខ្ញុំធ្វើមិនរួច ខ្ញុំសន្និដ្ឋានថាព្រះយេហូវ៉ាក៏ខកចិត្តនឹងខ្ញុំដូចដែលខ្ញុំខកចិត្តនឹងខ្លួនឯងដែរ»។
៩ តើតាមរបៀបណាយើងអាចយកឈ្នះអារម្មណ៍ថាយើងធ្វើមិនដែលគ្រប់គ្រាន់ដើម្បីឲ្យព្រះយេហូវ៉ាពេញចិត្ត? សូមចាំថាព្រះយេហូវ៉ាគឺសមហេតុសមផល ហើយលោកមិនតឹងរ៉ឹងទេ។ លោកមិនតម្រូវពីយើងលើសពីសមត្ថភាពរបស់យើងឡើយ។ លោកឲ្យតម្លៃចំពោះអ្វីណាក៏ដោយដែលយើងធ្វើ ឲ្យតែនោះអស់ពីសមត្ថភាព។ ម្យ៉ាងទៀត សូមគិតអំពីគំរូក្នុងគម្ពីរស្ដីអំពីពួកអ្នកដែលបានបម្រើព្រះយេហូវ៉ាអស់ពីចិត្ត។ ជាឧទាហរណ៍ សូមគិតអំពីប៉ូល។ គាត់បានខំប្រឹងយ៉ាងខ្លាំងអស់ជាច្រើនឆ្នាំដោយធ្វើដំណើរអស់រាប់ពាន់គីឡូម៉ែត្រនិងបង្កើតក្រុមជំនុំជាច្រើន។ ប៉ុន្តែ ពេលកាលៈទេសៈបានដាក់កម្រិតលើកិច្ចផ្សព្វផ្សាយរបស់គាត់ តើគាត់លែងទទួលការពេញចិត្តពីព្រះឬ? មិនមែនទេ។ គាត់បានបន្តធ្វើអ្វីដែលគាត់អាចធ្វើបាន ហើយព្រះយេហូវ៉ាបានឲ្យពរគាត់។ (សកម្ម. ២៨:៣០, ៣១) ស្រដៀងគ្នាដែរ អ្វីដែលយើងអាចឲ្យព្រះយេហូវ៉ាប្រហែលជាផ្លាស់ប្ដូរនៅពេលខ្លះ។ ប៉ុន្តែ អ្វីដែលសំខាន់ចំពោះលោកគឺបំណងចិត្តរបស់យើងក្នុងការបម្រើលោក។ ឥឡូវ សូមយើងពិចារណាអំពីរបៀបខ្លះដែលព្រះយេហូវ៉ាបង្ហាញថាលោកពេញចិត្តយើង។
តើព្រះយេហូវ៉ាបង្ហាញថាលោកពេញចិត្តយើងតាមរបៀបណា?
១០. តើយើងអាចឮព្រះយេហូវ៉ាប្រាប់ថាលោកពេញចិត្តយើងយ៉ាងដូចម្ដេច? (យ៉ូហាន ១៦:២៧)
១០ តាមរយៈគម្ពីរ។ ព្រះយេហូវ៉ារកវិធីដើម្បីបង្ហាញរាស្ត្រលោកថាលោកស្រឡាញ់និងពេញចិត្តពួកគេ។ គម្ពីររៀបរាប់អំពីពេលលោកបានប្រាប់លោកយេស៊ូអស់ពីរលើកថា លោកយេស៊ូជាបុត្រជាទីស្រឡាញ់របស់លោក ជាទីពេញចិត្តលោកណាស់។ (ម៉ាថ. ៣:១៧; ១៧:៥) តើអ្នកចង់ឲ្យព្រះយេហូវ៉ាប្រាប់អ្នកថាលោកពេញចិត្តអ្នកឬទេ? ព្រះយេហូវ៉ាមិននិយាយមកកាន់យើងពីស្ថានសួគ៌ទេ។ ប៉ុន្តែលោកនិយាយមកកាន់យើងតាមរយៈបណ្ដាំរបស់លោក។ ពេលយើងអានពាក្យរបស់លោកយេស៊ូក្នុងសៀវភៅដំណឹងល្អ គឺហាក់ដូចជាយើងអាចស្ដាប់សំឡេងរបស់ព្រះយេហូវ៉ាដែលបញ្ជាក់ថាលោកពេញចិត្តយើង។ (សូមអាន យ៉ូហាន ១៦:២៧) លោកយេស៊ូបង្ហាញបុគ្គលិកលក្ខណៈដូចបិតាលោកយ៉ាងល្អឥតខ្ចោះ។ ដូច្នេះ ពេលយើងអានថាលោកយេស៊ូបានបង្ហាញការពេញចិត្តរបស់លោកចំពោះពួកអ្នកកាន់តាមដ៏ស្មោះត្រង់ដែលមិនល្អឥតខ្ចោះរបស់លោក យើងអាចស្រមៃឃើញថាព្រះយេហូវ៉ាកំពុងមានប្រសាសន៍ពាក្យទាំងនោះមកកាន់យើង។—យ៉ូន. ១៥:៩, ១៥
ព្រះយេហូវ៉ាបង្ហាញថាលោកពេញចិត្តយើងតាមរបៀបផ្សេងៗ (សូមមើលវគ្គ១០)
១១. ហេតុអ្វីការរងទុក្ខវេទនាមិនមានន័យថាយើងលែងទទួលការពេញចិត្តពីព្រះយេហូវ៉ា? (យ៉ាកុប ១:១២)
១១ តាមរយៈការប្រព្រឹត្តរបស់លោក។ ព្រះយេហូវ៉ាចង់ជួយយើងតាមរបៀបផ្សេងៗដូចជាផ្គត់ផ្គង់សេចក្ដីត្រូវការរបស់យើង។ ជួនកាល ព្រះយេហូវ៉ាប្រហែលជាអនុញ្ញាតឲ្យយើងរងទុក្ខលំបាក ដូចលោកបានអនុញ្ញាតឲ្យកើតឡើងចំពោះយ៉ូបដែលជាមនុស្សសុចរិត។ (យ៉ូប ១:៨-១១) ទុក្ខលំបាកមិនមានន័យថាយើងលែងទទួលការពេញចិត្តពីព្រះទេ។ ផ្ទុយទៅវិញ ទុក្ខលំបាកទាំងនោះផ្ដល់ឱកាសឲ្យយើងបង្ហាញព្រះយេហូវ៉ាថាយើងស្រឡាញ់និងទុកចិត្តលោកខ្លាំងយ៉ាងណា។ (សូមអាន យ៉ាកុប ១:១២) យើងនឹងទទួលការមើលថែដែលប្រកបដោយសេចក្ដីស្រឡាញ់និងការគាំទ្រពីលោក កាលដែលលោកជួយយើងឲ្យស៊ូទ្រាំ។
១២. តើយើងអាចរៀនអ្វីពីបទពិសោធន៍របស់បងឌីមីទ្រី?
១២ សូមគិតអំពីបងប្រុសម្នាក់ឈ្មោះឌីមីទ្រីនៅទ្វីបអាស៊ី។ គាត់បានបាត់បង់ការងារ ហើយមិនអាចរកការងារអស់ជាច្រើនខែ។ ដូច្នេះ គាត់បានសម្រេចចិត្តបង្កើនកិច្ចបម្រើផ្សាយរបស់គាត់ ហើយបង្ហាញថាគាត់មានទំនុកចិត្តទៅលើព្រះយេហូវ៉ា។ ច្រើនខែកន្លងផុតទៅ គាត់នៅតែមិនអាចរកឃើញការងារ។ បន្ទាប់មក គាត់មានបញ្ហាសុខភាពដែលនាំឲ្យគាត់មិនអាចក្រោកចេញពីគ្រែបានទេ។ គាត់បានចាប់ផ្ដើមគិតថាគាត់លែងជាប្ដីឬឪពុកល្អ ហើយឆ្ងល់ថាតើព្រះយេហូវ៉ាលែងពេញចិត្តនឹងគាត់ឬយ៉ាងណា។ បន្ទាប់មក នៅល្ងាចមួយកូនស្រីរបស់គាត់បានបោះពុម្ពក្រដាសមួយដែលមានពាក្យនៅអេសាយ ៣០:១៥ ដែលថា៖ «ចូររក្សាចិត្តស្ងប់និងមានទំនុកចិត្តលើខ្ញុំ នោះអ្នករាល់គ្នានឹងមានកម្លាំងឡើងវិញ»។ នាងបានយកក្រដាសនោះទៅឲ្យបងឌីមីទ្រីដល់គ្រែ ហើយនិយាយថា៖ «ប៉ា ពេលប៉ាមានអារម្មណ៍មិនល្អ ប៉ាអាចនឹកចាំបទគម្ពីរនេះ»។ បងឌីមីទ្រីយល់ឃើញថាដោយសារព្រះយេហូវ៉ា ក្រុមគ្រួសាររបស់គាត់នៅតែមានជម្រក អាហារ និងសម្លៀកបំពាក់គ្រប់គ្រាន់។ គាត់និយាយថា៖ «អ្វីដែលខ្ញុំត្រូវធ្វើគឺរក្សាចិត្តស្ងប់ ហើយបន្តទុកចិត្តទៅលើព្រះរបស់ខ្ញុំ»។ បើអ្នកកំពុងជួបទុក្ខលំបាកស្រដៀងនឹងនេះ អ្នកអាចទុកចិត្តថាព្រះយេហូវ៉ាយកចិត្តទុកដាក់ចំពោះអ្នក ហើយនឹងជួយអ្នកឲ្យស៊ូទ្រាំ។
ព្រះយេហូវ៉ាបង្ហាញថាលោកពេញចិត្តយើងតាមរបៀបផ្សេងៗ (សូមមើលវគ្គ១២) a
១៣. តើព្រះយេហូវ៉ាប្រហែលជាប្រើអ្នកណាខ្លះដើម្បីបង្ហាញអំពីការពេញចិត្តរបស់លោកចំពោះយើង ហើយតើលោកធ្វើដូច្នេះតាមរបៀបណា?
១៣ តាមរយៈពួកអ្នកគោរពប្រណិប័តន៍គ្នីគ្នា។ ព្រះយេហូវ៉ាប្រើបងប្អូនរបស់យើងដើម្បីបង្ហាញការពេញចិត្តរបស់លោកចំពោះយើង។ ជាឧទាហរណ៍ លោកប្រហែលជាជំរុញចិត្តអ្នកឯទៀតឲ្យនិយាយពាក្យដ៏គួរឲ្យលើកទឹកចិត្តនៅចំពេល។ បងស្រីម្នាក់នៅទ្វីបអាស៊ីមានបទពិសោធន៍នេះក្នុងអំឡុងគ្រាដ៏តានតឹងចិត្តជាខ្លាំង។ គាត់បានបាត់បង់ការងារ ហើយធ្លាក់ខ្លួនឈឺធ្ងន់។ ក្រោយមក ប្ដីរបស់គាត់បានប្រព្រឹត្តអំពើខុសឆ្គងធ្ងន់ធ្ងរ ហើយលែងអាចបម្រើជាអ្នកចាស់ទុំ។ បងស្រីយើងនិយាយថា៖ «ខ្ញុំមិនយល់ថាហេតុអីរឿងទាំងនេះកំពុងកើតឡើងទេ។ ខ្ញុំគិតថាប្រហែលជាខ្ញុំបានធ្វើអ្វីមួយខុសទេដឹង បានជាព្រះយេហូវ៉ាលែងពេញចិត្តខ្ញុំ»។ បងស្រីរបស់យើងបានអង្វរសុំព្រះយេហូវ៉ាឲ្យពង្រឹងកម្លាំងគាត់ថាលោកពេញចិត្តគាត់។ តើលោកបានធ្វើដូច្នេះយ៉ាងដូចម្ដេច? គាត់និយាយថា៖ «អ្នកចាស់ទុំបានមកនិយាយពង្រឹងកម្លាំងចិត្តខ្ញុំថាព្រះយេហូវ៉ាស្រឡាញ់ខ្ញុំ»។ ក្រោយមក គាត់បានសុំជំនួយពីព្រះយេហូវ៉ាម្ដងទៀត។ គាត់ថា៖ «នៅថ្ងៃនោះឯង ខ្ញុំបានទទួលសំបុត្រមួយពីបងប្អូនមួយក្រុមក្នុងក្រុមជំនុំ។ កាលដែលខ្ញុំអានពាក្យសម្រាលទុក្ខពីពួកគេ ខ្ញុំមានអារម្មណ៍ថាព្រះយេហូវ៉ាបានស្ដាប់ខ្ញុំ»។ មែន ព្រះយេហូវ៉ាច្រើនតែបង្ហាញការពេញចិត្តរបស់លោកតាមរយៈពាក្យសប្បុរសរបស់អ្នកឯទៀត។—ចសព. ១០:១៧
ព្រះយេហូវ៉ាបង្ហាញថាលោកពេញចិត្តយើងតាមរបៀបផ្សេងៗ (សូមមើលវគ្គ១៣) b
១៤. តើព្រះយេហូវ៉ាបង្ហាញការពេញចិត្តរបស់លោកចំពោះយើងតាមរបៀបណាទៀត?
១៤ ព្រះយេហូវ៉ាក៏បង្ហាញការពេញចិត្តរបស់លោកចំពោះយើង ដោយប្រើបងប្អូនរួមជំនឿឲ្យផ្ដល់យោបល់ដល់យើងពេលយើងត្រូវការ។ ជាឧទាហរណ៍ នៅសតវត្សរ៍ទី១ព្រះយេហូវ៉ាបានដឹកនាំសាវ័កប៉ូលឲ្យសរសេរសំបុត្រ១៤ទៅកាន់បងប្អូនរួមជំនឿ។ សំបុត្រទាំងនោះរួមបញ្ចូលយោបល់ម៉ឺងម៉ាត់ តែប្រកបដោយសេចក្ដីស្រឡាញ់។ ហេតុអ្វីព្រះយេហូវ៉ាបានដឹកនាំប៉ូលឲ្យដាក់បញ្ចូលយោបល់បែបនេះ? ពីព្រោះព្រះយេហូវ៉ាជាបិតាដ៏ល្អ ហើយលោកប្រៀនប្រដៅកូន«ដែលលោកស្រឡាញ់»។ (សុភ. ៣:១១, ១២) ដូច្នេះ បើយើងទទួលយោបល់ដែលមានមូលដ្ឋានលើគម្ពីរ យើងអាចចាត់ទុកថានេះជាភ័ស្តុតាងដែលបង្ហាញថាព្រះពេញចិត្តយើង មិនមែនថាយើងលែងទទួលការពេញចិត្តពីលោកទេ។ (ហេ. ១២:៦) តើមានអ្វីផ្សេងទៀតបង្ហាញថាយើងទទួលការពេញចិត្តពីព្រះយេហូវ៉ា?
ទីសំអាងផ្សេងទៀតដែលបង្ហាញថាព្រះយេហូវ៉ាពេញចិត្តយើង
១៥. តើព្រះយេហូវ៉ាផ្ដល់ឫទ្ធានុភាពបរិសុទ្ធរបស់លោកដល់អ្នកណា ហើយហេតុអ្វីនេះអាចធ្វើឲ្យយើងមានទំនុកចិត្ត?
១៥ ព្រះយេហូវ៉ាផ្ដល់ឫទ្ធានុភាពបរិសុទ្ធរបស់លោកដល់ពួកអ្នកដែលលោកពេញចិត្ត។ (ម៉ាថ. ១២:១៨) យើងអាចសួរខ្លួនថា ‹តើខ្ញុំបង្ហាញគុណសម្បត្តិណាមួយនៃផលដែលបង្កើតដោយឫទ្ធានុភាពរបស់ព្រះក្នុងជីវិតខ្ញុំឬទេ?›។ តើអ្នកកត់សម្គាល់ថាអ្នកមានចិត្តអត់ធ្មត់ជាងចំពោះអ្នកឯទៀតមុនពេលដែលអ្នកមិនទាន់បានស្គាល់ព្រះយេហូវ៉ាឬទេ? តាមការពិត កាលដែលអ្នកកាន់តែរៀនឲ្យចេះបង្ហាញផលដែលបង្កើតដោយឫទ្ធានុភាពរបស់ព្រះ អ្នកនឹងកាន់តែឃើញទីសំអាងដែលបង្ហាញថាព្រះយេហូវ៉ាពេញចិត្តអ្នក (សូមមើលប្រអប់ដែលមានចំណងជើងថា « ផលដែលបង្កើតដោយឫទ្ធានុភាពរបស់ព្រះគឺ . . . »)។
តើអ្នកអាចឃើញភ័ស្តុតាងដែលបង្ហាញថាព្រះយេហូវ៉ាពេញចិត្តអ្នកតាមរបៀបណា? (សូមមើលវគ្គ១៥)
១៦. តើព្រះយេហូវ៉ាប្រើអ្នកណាដើម្បីផ្សព្វផ្សាយដំណឹងល្អ ហើយតើនោះធ្វើឲ្យអ្នកមានអារម្មណ៍យ៉ាងណា? (ថែស្សាឡូនិចទី១ ២:៤)
១៦ ព្រះយេហូវ៉ាពេញចិត្តប្រគល់កិច្ចការផ្សាយដំណឹងល្អឲ្យពួកអ្នកដែលលោកពេញចិត្ត។ (សូមអាន ថែស្សាឡូនិចទី១ ២:៤) សូមកត់សម្គាល់អំពីប្រយោជន៍ដែលបងស្រីម្នាក់ឈ្មោះចុសលីនទទួលពីការផ្សព្វផ្សាយដំណឹងល្អដល់អ្នកឯទៀត។ នៅថ្ងៃមួយ បងចុសលីនក្រោកពីដេកទាំងមានអារម្មណ៍តានតឹងចិត្ត។ គាត់និយាយថា៖ «ខ្ញុំអស់កម្លាំង ហើយមានអារម្មណ៍ថាខ្លួនគ្មានប្រយោជន៍។ ប៉ុន្តែខ្ញុំជាអ្នកត្រួសត្រាយ ហើយថ្ងៃនោះខ្ញុំត្រូវចេញទៅផ្សព្វផ្សាយ។ ដូច្នេះខ្ញុំបានអធិដ្ឋាន ហើយចេញទៅផ្សព្វផ្សាយ»។ នៅព្រឹកនោះ បងចុសលីនបានជួបស្ត្រីសប្បុរសម្នាក់ឈ្មោះមេរីដែលព្រមរៀនគម្ពីរ។ ប៉ុន្មានខែក្រោយមក មេរីបានប្រាប់ថាគាត់កំពុងអធិដ្ឋានសុំជំនួយពីព្រះពេលបងចុសលីនគោះទ្វារផ្ទះគាត់។ ពេលគិតអំពីបទពិសោធន៍នេះ បងចុសលីននិយាយថា៖ «ខ្ញុំមានអារម្មណ៍ហាក់ដូចជាព្រះយេហូវ៉ាកំពុងប្រាប់ខ្ញុំថា ‹ខ្ញុំពេញចិត្តអ្នក›»។ ពិតមែន មិនមែនបុគ្គលគ្រប់រូបនឹងស្ដាប់ដំណឹងដែលយើងផ្សាយទេ។ ប៉ុន្តែ យើងអាចប្រាកដថាព្រះយេហូវ៉ាពេញចិត្តពេលយើងព្យាយាមអស់ពីសមត្ថភាពដើម្បីផ្សព្វផ្សាយដំណឹងល្អដល់អ្នកឯទៀត។
តើអ្នកអាចឃើញភ័ស្តុតាងដែលបង្ហាញថាព្រះយេហូវ៉ាពេញចិត្តអ្នកតាមរបៀបណា? (សូមមើលវគ្គ១៦) c
១៧. តើអ្នករៀនអ្វីពីពាក្យរបស់បងវីកគីអំពីថ្លៃលោះ? (ចម្រៀងសរសើរព្រះ ៥:១២)
១៧ ព្រះយេហូវ៉ាប្រើថ្លៃលោះដើម្បីជាប្រយោជន៍ដល់ពួកអ្នកដែលលោកពេញចិត្ត។ (១ធី. ២:៥, ៦) ប៉ុន្តែ ចុះយ៉ាងណាបើយើងនៅតែមិនមានអារម្មណ៍ថាព្រះយេហូវ៉ាពេញចិត្តយើង ទោះជាយើងមានជំនឿលើថ្លៃលោះ ហើយបានទទួលការជ្រមុជទឹកហើយក្ដី? សូមចាំថាយើងមិនតែងតែអាចទុកចិត្តអារម្មណ៍របស់យើងបានទេ តែយើងអាចទុកចិត្តព្រះយេហូវ៉ា។ លោកចាត់ទុកពួកអ្នកដែលមានជំនឿលើថ្លៃលោះថាជាមនុស្សសុចរិត ហើយសន្យាថានឹងឲ្យពរពួកគេ។ (សូមអាន ចម្រៀងសរសើរព្រះ ៥:១២; រ៉ូម ៣:២៦) ការរំពឹងគិតអំពីថ្លៃលោះបានជួយបងស្រីវីកគី។ នៅថ្ងៃមួយ ក្រោយពីគិតយ៉ាងជ្រាលជ្រៅអំពីថ្លៃលោះ គាត់ទទួលស្គាល់ថា៖ «ព្រះយេហូវ៉ាបានអត់ធ្មត់ចំពោះខ្ញុំជាយូរមកហើយ . . . ប៉ុន្តែគឺហាក់ដូចជាខ្ញុំកំពុងប្រាប់លោកថា ‹សេចក្ដីស្រឡាញ់របស់លោកគឺមិនគ្រប់គ្រាន់ចំពោះខ្ញុំទេ។ គ្រឿងបូជាលោះរបស់បុត្រលោកគឺមិនអាចលោះខ្ញុំបានឡើយ›»។ ដោយរំពឹងគិតអំពីអំណោយជាថ្លៃលោះនេះ គាត់ចាប់ផ្ដើមមានអារម្មណ៍ថាព្រះយេហូវ៉ាស្រឡាញ់គាត់។ យើងក៏នឹងមានអារម្មណ៍ថាព្រះយេហូវ៉ាស្រឡាញ់យើង ហើយដឹងថាលោកពេញចិត្តយើងកាលដែលយើងរំពឹងគិតអំពីថ្លៃលោះ។
តើអ្នកអាចឃើញភ័ស្តុតាងដែលបង្ហាញថាព្រះយេហូវ៉ាពេញចិត្តអ្នកតាមរបៀបណា? (សូមមើលវគ្គ១៧)
១៨. តើយើងអាចប្រាកដអំពីអ្វីបើយើងបន្តស្រឡាញ់បិតារបស់យើងនៅស្ថានសួគ៌?
១៨ ទោះជាយើងខំព្យាយាមធ្វើតាមយោបល់ខាងលើក្ដី ជួនកាលយើងប្រហែលជាធ្លាក់ទឹកចិត្ត ហើយឆ្ងល់ថាតើយើងទទួលការពេញចិត្តពីព្រះយេហូវ៉ាឬយ៉ាងណា។ បើនេះកើតឡើង សូមចាំថាលោកពេញចិត្ត«អ្នកដែលរក្សាសេចក្ដីស្រឡាញ់ចំពោះលោក»។ (យ៉ា. ១:១២) ដូច្នេះ សូមបន្តចូលទៅជិតព្រះយេហូវ៉ា ហើយកត់សម្គាល់អំពីរបៀបផ្សេងៗដែលលោកបង្ហាញថាលោកពេញចិត្តអ្នក។ សូមចាំជានិច្ចថាព្រះយេហូវ៉ា«មិននៅឆ្ងាយពីយើងម្នាក់ៗទេ»។—សកម្ម. ១៧:២៧
តើអ្នកនឹងឆ្លើយយ៉ាងណា?
-
ហេតុអ្វីអ្នកខ្លះប្រហែលជាមានអារម្មណ៍ថាព្រះយេហូវ៉ាមិនពេញចិត្តពួកគេ?
-
តើព្រះយេហូវ៉ាបង្ហាញថាលោកពេញចិត្តយើងតាមរបៀបណាខ្លះ?
-
ហេតុអ្វីយើងអាចប្រាកដថាយើងទទួលការពេញចិត្តពីព្រះ?
ចម្រៀងលេខ៨៨ សូមឲ្យខ្ញុំស្គាល់ផ្លូវរបស់លោក
