អ្នកអាចមានសុភមង្គលសូម្បីតែឥឡូវនេះ
នៅថ្ងៃមួយនឹងគ្មានអ្នកណាឈឺ ទៅជាចាស់ ឬស្លាប់ឡើយ។ អ្នកអាចមានជីវិតបែបនោះដែរ! ប៉ុន្តែនៅឥឡូវនេះមនុស្សទាំងអស់មានបញ្ហានិងការពិបាកជាច្រើន។ តើមានអ្វីដែលអាចជួយអ្នកឬទេ? គម្ពីរអាចជួយអ្នកឲ្យមានជីវិតសប្បាយនិងជីវិតស្កប់ចិត្តសូម្បីតែឥឡូវនេះ។ សូមពិចារណាការពិបាកខ្លះៗក្នុងជីវិត និងរបៀបដែលគម្ពីរអាចជួយអ្នក។
ការមានជីវិតស្កប់ចិត្ត
ឱវាទពីគម្ពីរ: «ចូរមានរបៀបរស់នៅដែលប្រាសចាកការស្រឡាញ់ប្រាក់ ហើយចូរស្កប់ចិត្តនឹងអ្វីដែលអ្នករាល់គ្នាមាន»។—ហេប្រឺ ១៣:៥
នៅសព្វថ្ងៃនេះ មានអ្វីជាច្រើនក្នុងពិភពលោកដែលមនុស្សនិយាយថាយើងត្រូវតែមាន។ ប៉ុន្តែគម្ពីរចែងថាយើងអាច‹ស្កប់ចិត្តនឹងអ្វីដែលយើងមាន›។ តើតាមរបៀបណា?
កុំ«ស្រឡាញ់ប្រាក់»។ ការ«ស្រឡាញ់ប្រាក់»បាននាំឲ្យមនុស្សសុខចិត្តធ្វើអ្វីគ្រប់បែបយ៉ាង ទោះជានេះបង្ខូចសុខភាព បែកបាក់ក្រុមគ្រួសារ មិត្តភក្ដិ ខុសសីលធម៌ ឬបង្ខូចភាពថ្លៃថ្នូររបស់ខ្លួនក៏ដោយ។ (ធីម៉ូថេទី១ ៦:១០) នេះជាផលវិបាកធ្ងន់ធ្ងរណាស់! ព្រោះនៅទីបំផុត អ្នកដែលស្រឡាញ់ប្រាក់«នឹងមិនស្កប់ចិត្ត»ឡើយ។—សាស្តា ៥:១០
មនុស្សគឺសំខាន់ជាងវត្ថុទ្រព្យ។ ពិតមែនតែវត្ថុទ្រព្យផ្សេងៗមានប្រយោជន៍។ ប៉ុន្តែវត្ថុទ្រព្យមិនអាចបង្ហាញសេចក្ដីស្រឡាញ់និងចិត្តដឹងគុណចំពោះយើងបានទេ មានតែមនុស្សប៉ុណ្ណោះទើបអាចធ្វើដូច្នេះបាន។ ការមាន‹មិត្តសម្លាញ់›នឹងជួយយើងឲ្យមានជីវិតស្កប់ចិត្ត។—សុភាសិត ១៧:១៧
យើងអាចមានសុភមង្គលសូម្បីតែឥឡូវនេះដោយធ្វើតាមការណែនាំពីគម្ពីរ
ការស៊ូទ្រាំនឹងសុខភាពមិនល្អ
ឱវាទពីគម្ពីរ: «ចិត្តដែលសប្បាយជាថ្នាំយ៉ាងវិសេស»។—សុភាសិត ១៧:២២
ដូច«ថ្នាំយ៉ាងវិសេស» អំណរអាចជួយយើងស៊ូទ្រាំនឹងសុខភាពមិនល្អ។ ប៉ុន្តែតើតាមរបៀបណាយើងអាចមានអំណរពេលយើងរងទុក្ខដោយសារសុខភាពមិនល្អ?
បង្ហាញចិត្តដឹងគុណ។ បើយើងចេះតែគិតអំពីបញ្ហារបស់យើង នោះ«អស់ទាំងថ្ងៃ»នឹងដូចជាអាក្រក់។ (សុភាសិត ១៥:១៥) ផ្ទុយទៅវិញ គម្ពីរចែងថា៖ «ចូរបង្ហាញអំណរគុណ»។ (កូឡុស ៣:១៥) សូមរៀនបង្ហាញចិត្តដឹងគុណចំពោះអ្វីល្អៗក្នុងជីវិត ទោះជាអ្វីនោះគឺតូចតាចក្ដី ដូចជាថ្ងៃលិចដ៏ស្រស់ស្អាត ខ្យល់បក់ល្ហើយៗ ស្នាមញញឹមរបស់មនុស្សជាទីស្រឡាញ់ អ្វីទាំងអស់នេះអាចជួយឲ្យជីវិតរបស់យើងមានន័យខ្លឹមសារ។
ជួយអ្នកឯទៀត។ ទោះជាសុខភាពរបស់យើងគឺមិនល្អក្ដី តែ«ការឲ្យគេ នោះនឹងផ្ដល់សុភមង្គលច្រើនជាងការទទួល»។ (សកម្មភាព ២០:៣៥) ពេលអ្នកឯទៀតបង្ហាញចិត្តដឹងគុណចំពោះអ្វីដែលយើងធ្វើ នោះយើងនឹងសប្បាយជាងនិងមិនគិតច្រើនពេកអំពីបញ្ហារបស់យើង។ យើងអាចធ្វើឲ្យជីវិតរបស់យើងប្រសើរជាងដោយជួយអ្នកឯទៀតឲ្យពួកគេមានជីវិតល្អប្រសើរជាង។
ការពង្រឹងចំណងអាពាហ៍ពិពាហ៍
ឱវាទពីគម្ពីរ: ចូរ«ពិចារណាឲ្យដឹងប្រាកដថាការអ្វីដែលសំខាន់ជាង»។—ភីលីព ១:១០
ប្ដីប្រពន្ធដែលចំណាយពេលតែបន្តិចបន្តួចជាមួយគ្នាអាចបង្ខូចចំណងអាពាហ៍ពិពាហ៍របស់ពួកគេ។ យ៉ាងនេះ ប្ដីនិងប្រពន្ធគួរយកចិត្តទុកដាក់នឹងចំណងអាពាហ៍ពិពាហ៍របស់ពួកគេ ដោយចាត់ទុកថានេះជាអ្វីមួយដែលសំខាន់ជាងក្នុងចំណោមអ្វីៗដែលសំខាន់ក្នុងជីវិត។
ចំណាយពេលជាមួយគ្នា។ ជាជាងទុកឲ្យអ្វីៗកើតឡើងដោយចៃដន្យ យកល្អឲ្យយើងរៀបចំគម្រោងដើម្បីអាចចំណាយពេលជាមួយគ្នា។ គម្ពីរចែងថា៖ «មានគ្នា២នាក់ នោះវិសេសជាងនៅតែឯង»។ (សាស្តា ៤:៩) ដូច្នេះ អ្នកអាចចំណាយពេលជាមួយគ្នា ដូចជាធ្វើម្ហូប ហាត់ប្រាណ ឬដើរលេងជាដើម។
បង្ហាញសេចក្ដីស្រឡាញ់របស់អ្នក។ គម្ពីរលើកទឹកចិត្តប្ដីនិងប្រពន្ធឲ្យស្រឡាញ់និងគោរពគ្នាទៅវិញទៅមក។ (អេភេសូរ ៥:២៨, ៣៣) ការញញឹមយ៉ាងកក់ក្ដៅ ការឱបដោយសេចក្ដីស្រឡាញ់ ឬការជូនអំណោយតូចមួយអាចពង្រឹងចំណងអាពាហ៍ពិពាហ៍ច្រើនណាស់។ ពិតណាស់ ប្ដីប្រពន្ធគួរបង្ហាញសេចក្ដីស្រឡាញ់ដោយរួមដំណេកតែជាមួយគូររបស់ខ្លួនប៉ុណ្ណោះ។—ហេប្រឺ ១៣:៤