តើព្រះនឹងធ្វើអ្វីខ្លះ?
បើអ្នកជួបការពិបាក អ្នកច្បាស់ជារំពឹងថាមិត្តល្អនឹងធ្វើអ្វីមួយដើម្បីជួយអ្នក។ ដោយយល់ដូច្នេះ អ្នកខ្លះនិយាយថាព្រះមិនមែនជាមិត្តភក្ដិទេ ដោយសារពួកគេមានអារម្មណ៍ថាព្រះមិនបានធ្វើអ្វីដើម្បីជួយពួកគេឡើយ។ តាមការពិត ព្រះមិនគ្រាន់តែបានធ្វើអ្វីជាច្រើនដើម្បីជាប្រយោជន៍ដល់យើងប៉ុណ្ណោះទេ ប៉ុន្តែលោកក៏នឹងធ្វើអ្វីមួយដើម្បីដោះស្រាយរាល់បញ្ហានិងទុក្ខវេទនាដែលយើងកំពុងជួបប្រទះនៅសព្វថ្ងៃនេះដែរ។ ដូច្នេះ តើព្រះនឹងធ្វើអ្វី?
បំបាត់អំពើអាក្រក់សព្វបែបយ៉ាង
ព្រះនឹងបំបាត់អំពើអាក្រក់សព្វបែបយ៉ាងដោយបំផ្លាញប្រភពនៃអំពើអាក្រក់ទាំងនោះ។ គម្ពីរប្រាប់អំពីប្រភពនៃអំពើអាក្រក់គឺមកពីណា ដោយចែងថា៖ «ពិភពលោកទាំងមូលនៅក្រោមអំណាចរបស់មេកំណាច»។ (យ៉ូហានទី១ ៥:១៩) ច្បាស់ណាស់ «មេកំណាច»នោះគឺជាបុគ្គលដែលលោកយេស៊ូបានហៅថា «អ្នកគ្រប់គ្រងពិភពលោកនេះ» ពោលគឺសាថាន។ (យ៉ូហាន ១២:៣១) ឥទ្ធិពលរបស់សាថានមកលើពិភពលោកគឺជាប្រភពនៃទុក្ខវេទនានិងបញ្ហាដែលមាននៅលើផែនដី។ តើព្រះនឹងធ្វើយ៉ាងណា?
មិនយូរទៀត ព្រះយេហូវ៉ានឹងចាត់បុត្ររបស់លោក គឺលោកយេស៊ូគ្រិស្តឲ្យ«បំផ្លាញចោលអ្នកដែលមានសមត្ថភាពបណ្ដាលឲ្យស្លាប់ ពោលគឺមេកំណាច»។ (ហេប្រឺ ២:១៤; យ៉ូហានទី១ ៣:៨) តាមពិត គម្ពីរបង្ហាញថាមេកំណាចផ្ទាល់ដឹងថា«វាមានពេលតែបន្តិចបន្តួច»មុនវាត្រូវបំផ្លាញ។ (ការបើកបង្ហាញ ១២:១២) ព្រះនឹងបំបាត់ចោលអំពើអាក្រក់ទាំងអស់ ព្រមទាំងអ្នកដែលប្រព្រឹត្តអំពើអាក្រក់នោះផងដែរ។—ចម្រៀងសរសើរព្រះ ៣៧:៩; សុភាសិត ២:២២
ធ្វើឲ្យផែនដីទៅជាសួនឧទ្យាន
ក្រោយពីបំបាត់ចោលអំពើអាក្រក់ទាំងអស់ពីផែនដី អ្នកបង្កើតរបស់យើងនឹងចាត់វិធានការដើម្បីសម្រេចគោលបំណងរបស់លោកដែលឲ្យមនុស្សរស់ជារៀងរហូតនៅលើផែនដី។ នៅគ្រានោះ តើយើងអាចទន្ទឹងរង់ចាំអ្វីខ្លះ?
មានសេចក្ដីសុខនិងសន្តិភាពជារៀងរហូត។ «មនុស្សដែលមានចិត្តសុភាពនឹងបានផែនដីជាមត៌ក ពួកគេនឹងសប្បាយរីករាយយ៉ាងខ្លាំង ដោយសារមានសេចក្ដីសុខសាន្តជាបរិបូរ»។—ចម្រៀងសរសើរព្រះ ៣៧:១១
មានអាហារជាបរិបូរ។ «ផែនដីនឹងមានស្រូវជាបរិបូរ ចំណែកនៅតាមកំពូលភ្នំវិញនឹងមានស្រូវហៀរហូរ»។—ចម្រៀងសរសើរព្រះ ៧២:១៦
មានផ្ទះស្អាតនិងការងារដែលគាប់ចិត្ត។ «គ្រានោះ ពួកគេនឹងសង់ផ្ទះ ហើយរស់នៅក្នុងនោះ ពួកគេនឹងដាំដំណាំទំពាំងបាយជូរ ហើយក៏បរិភោគផលផ្លែពីនោះដែរ . . . ពួកគេនឹងមានអំណរយ៉ាងពេញលេញចំពោះស្នាដៃរបស់ខ្លួន»។—អេសាយ ៦៥:២១, ២២
តើអ្នកចង់ឃើញស្ថានភាពបែបនេះឬទេ? មិនយូរទៀត មនុស្សគ្រប់គ្នានឹងមានស្ថានភាពដូចនេះរាល់ថ្ងៃ។
បំបាត់ចោលជំងឺនិងសេចក្ដីស្លាប់
សព្វថ្ងៃនេះ មនុស្សទាំងអស់ឈឺហើយទីបំផុតស្លាប់ ប៉ុន្តែនេះនឹងមិនមានយូរទៀតឡើយ។ បន្តិចទៀត ព្រះនឹងជួយមនុស្សឲ្យទទួលប្រយោជន៍យ៉ាងពេញលេញពីគ្រឿងបូជាលោះរបស់លោកយេស៊ូ ដើម្បីឲ្យ«អស់អ្នកដែលបង្ហាញជំនឿលើបុត្រនោះ អាចមានជីវិតដែលគ្មានទីបញ្ចប់ ហើយមិនត្រូវបំផ្លាញឡើយ»។ (យ៉ូហាន ៣:១៦) តើនាំឲ្យមានលទ្ធផលយ៉ាងណាខ្លះ?
ជំងឺនឹងត្រូវលុបបំបាត់។ «បណ្ដាជនដែលរស់នៅក្នុងស្រុក ពួកគេនឹងមិននិយាយថា៖ ‹ខ្ញុំឈឺ›ទៀតឡើយ ព្រោះពួកគេនឹងទទួលការអភ័យទោសចំពោះកំហុសឆ្គងរបស់ខ្លួន»។—អេសាយ ៣៣:២៤
សេចក្ដីស្លាប់នឹងលែងមានទៀត។ «លោកនឹងបំផ្លាញសេចក្ដីស្លាប់ឲ្យសាបសូន្យជារៀងរហូត។ ព្រះយេហូវ៉ាជាម្ចាស់ដ៏ឧត្ដមបំផុត នឹងជូតអស់ទាំងទឹកភ្នែក ចេញពីភ្នែកមនុស្សទាំងអស់»។—អេសាយ ២៥:៨
មនុស្សនឹងរស់ជារៀងរហូត។ «អំណោយដែលព្រះផ្ដល់ឲ្យ គឺជាជីវិតដែលគ្មានទីបញ្ចប់ ដោយគ្រិស្តយេស៊ូជាម្ចាស់របស់យើង»។—រ៉ូម ៦:២៣
មនុស្សស្លាប់នឹងត្រូវប្រោសឲ្យរស់ឡើងវិញ។ «មនុស្សសុចរិតនិងមនុស្សមិនសុចរិតនឹងត្រូវប្រោសឲ្យរស់ឡើងវិញ»។ (សកម្មភាព ២៤:១៥) ពួកគេនឹងទទួលប្រយោជន៍ពីថ្លៃលោះដែលជាអំណោយពីព្រះ។
តើព្រះនឹងសម្រេចអ្វីទាំងអស់នេះតាមរបៀបណា?
ស្ថាបនារដ្ឋាភិបាលដ៏ល្អឥតខ្ចោះ
ព្រះនឹងសម្រេចគោលបំណងរបស់លោកសម្រាប់មនុស្សជាតិនិងផែនដី តាមរយៈរដ្ឋាភិបាលនៅស្ថានសួគ៌ ដោយមានលោកយេស៊ូគ្រិស្តជាអ្នកគ្រប់គ្រងដែលព្រះបានតែងតាំង។ (ចម្រៀងសរសើរព្រះ ១១០:១, ២) លោកយេស៊ូបានបង្រៀនអ្នកកាន់តាមលោកឲ្យអធិដ្ឋានអំពីរដ្ឋាភិបាលឬរាជាណាចក្រនោះ ដោយពោលថា៖ «ឱបិតារបស់យើងដែលនៅស្ថានសួគ៌អើយ . . . សូមឲ្យរាជាណាចក្ររបស់លោកបានមកដល់»។—ម៉ាថាយ ៦:៩, ១០
រាជាណាចក្រព្រះនឹងគ្រប់គ្រងមកលើផែនដី ហើយបំបាត់ចោលការឈឺចាប់និងទុក្ខវេទនាទាំងអស់ពីផែនដីនេះ។ រាជាណាចក្រនេះគឺជារដ្ឋាភិបាលល្អបំផុតដែលមនុស្សជាតិអាចមាន! នេះជាមូលហេតុដែលលោកយេស៊ូខំព្យាយាមប្រកាស«ដំណឹងល្អអំពីរាជាណាចក្រ»ក្នុងអំឡុងកិច្ចបម្រើផ្សាយរបស់លោកនៅផែនដី ហើយបានប្រាប់អ្នកកាន់តាមលោកឲ្យធ្វើដូចគ្នាដែរ។—ម៉ាថាយ ៤:២៣; ២៤:១៤
ដោយសារព្រះយេហូវ៉ាស្រឡាញ់មនុស្សដែលលោកបានបង្កើតយ៉ាងខ្លាំង នោះលោកបានសន្យាថានឹងធ្វើអ្វីដ៏អស្ចារ្យទាំងអស់នេះដើម្បីពួកគេ។ ដោយដឹងដូច្នេះ នោះច្បាស់ជាធ្វើឲ្យអ្នកចង់ស្គាល់លោកនិងចូលទៅជិតលោក មែនទេ? បើអ្នកធ្វើដូច្នេះ តើអ្នកនឹងទទួលប្រយោជន៍អ្វីខ្លះ? អត្ថបទបន្ទាប់នឹងពន្យល់បន្ថែម។
តើព្រះនឹងធ្វើអ្វីខ្លះ? ព្រះនឹងលុបបំបាត់ជំងឺនិងសេចក្ដីស្លាប់ ធ្វើឲ្យមនុស្សទាំងអស់មានសាមគ្គីភាពក្រោមរាជាណាចក្រព្រះ ហើយធ្វើឲ្យផែនដីទៅជាសួនឧទ្យាន
លោកអ្នកក៏ប្រហែលជាចូលចិត្តដែរ
ទស្សនាវដ្ដី
តើការរៀនអំពីព្រះអាចផ្ដល់ប្រយោជន៍អ្វីខ្លះដល់លោកអ្នក?
តើអ្នកដែលបណ្ដុះចំណងមិត្តភាពផ្ទាល់ជាមួយនឹងព្រះនឹងទទួលពរអ្វីខ្លះ?
សំណួរនិងចម្លើយពីគម្ពីរ
តើរាជាណាចក្ររបស់ព្រះជាអ្វី?
សូមស្វែងយល់នូវមូលហេតុដែលរាជាណាចក្ររបស់ព្រះប្រសើរជាងរដ្ឋាភិបាលទាំងអស់របស់មនុស្ស។
ទស្សនាវដ្ដី
មិនយូរទៀត ព្រះនឹងបំបាត់ចោលទុក្ខវេទនាទាំងអស់
ក៏ប៉ុន្តែ តើតាមរបៀបណាយើងដឹងថាព្រះនឹងបំបាត់ចោលទុក្ខវេទនានិងភាពអយុត្តិធម៌ទាំងអស់?
