ការព្យាករណ៍អំពីអនាគត
តើអ្នកធ្លាប់ឆ្ងល់ឬទេថាអនាគតរបស់អ្នកនិងរបស់ក្រុមគ្រួសារអ្នកនឹងទៅជាយ៉ាងណា? តើនឹងទៅជាអ្នកមានសម្បូរសប្បាយឬជួបអន្តរាយ នឹងមានស្នេហាឬនៅម្នាក់ឯង? តើអ្នកនឹងមានអាយុវែងឬអាយុខ្លី? មនុស្សឆ្ងល់សំណួរទាំងនេះតាំងពីរាប់ពាន់ឆ្នាំមកហើយ។
សព្វថ្ងៃនេះ មានអ្នកជំនាញដែលសិក្សាស្រាវជ្រាវអំពីនិន្នាការពិភពលោក ដើម្បីព្យាករណ៍អំពីអនាគត។ ពិតមែន មានទំនាយជាច្រើនដែលក្លាយជាការពិត តែក៏មានខ្លះទៀតដែលមិនក្លាយជាការពិត ហើយខ្លះទៀតផ្ទុយពីការពិតទាំងស្រុង។ ជាឧទាហរណ៍ នៅឆ្នាំ១៩១២ លោកហ្គូគ្លៀម៉ូ ម៉ាខូនី ដែលជាអ្នកឆ្នៃប្រឌិតម៉ាស៊ីនទូរលេខដែលមិនប្រើខ្សែ បានព្យាករណ៍ថា៖ «នៅសម័យខាងមុខដែលមិនចាំបាច់ភ្ជាប់ខ្សែដើម្បីទាក់ទងគ្នានោះ សង្គ្រាមនឹងមិនអាចកើតឡើងទេ»។ ម្យ៉ាងទៀត នៅឆ្នាំ១៩៦២ ភ្នាក់ងារម្នាក់នៃផលិតកម្មចម្រៀង (Decca) បានជឿថានៅថ្ងៃមុខក្រុមលេងហ្គីតានឹងលែងល្បីល្បាញទៀត។
មនុស្សជាច្រើនស្វែងរកការណែនាំពីតារាសាស្ត្រនិងហោរាសាស្ត្រ ដែលមានជាទៀងទាត់ក្នុងទស្សនាវដ្ដីនិងកាសែតជាច្រើន។ អ្នកខ្លះទៀតជួបគ្រូទាយឬគ្រូមន្តអាគមដែលអះអាងថាអាចទស្សន៍ទាយអំពីអនាគត តាមរយៈការមើលសន្លឹកបៀ គន់គូរលេខ ឬមើលបាតដៃ។
មនុស្សខ្លះដែលនៅសម័យបុរាណខំស្វែងយល់អំពីអនាគតដោយជួបពួកសង្ឃដែលអះអាងថាពួកគេទទួលព័ត៌មានពីព្រះរបស់ពួកគេ។ ជាឧទាហរណ៍ គេបាននិយាយថាស្ដេចក្រូស៊ូនៃស្រុកលីឌាបានបញ្ជូនអំណោយដ៏មានតម្លៃដល់សង្ឃនៅភូមិដេហ្វី ប្រទេសក្រិក ដើម្បីឲ្យសង្ឃនោះប្រាប់ទុកជាមុនអំពីអ្វីដែលនឹងកើតឡើង បើគាត់ចេញទៅច្បាំងនឹងស្ដេចស៊ីរូសនៃស្រុកពើស៊ី។ សង្ឃនោះបាននិយាយថាស្ដេចក្រូស៊ូនឹងបំផ្លាញ«ចក្រភពដ៏ខ្លាំងក្លាមួយ» បើគាត់ច្បាំងជាមួយនឹងស៊ីរូស។ ដោយមានទំនុកចិត្តនឹងជ័យជម្នះ ស្ដេចក្រូស៊ូបានចេញទៅច្បាំង ប៉ុន្តែចក្រភពដ៏ខ្លាំងក្លាដែលបានត្រូវបំផ្លាញនោះ គឺជាចក្រភពរបស់គាត់។
អ្វីដែលគ្រូទាយនោះព្យាករណ៍គឺគ្មានប្រយោជន៍ទេ នោះមើលទៅដូចជាការពិតទោះជាខាងណាឈ្នះក្នុងសង្គ្រាមក៏ដោយ។ ស្ដេចក្រូស៊ូបានជួបអន្តរាយធំដោយសារទទួលព័ត៌មានមិនពិត។ នៅសព្វថ្ងៃនេះ តើអ្នកដែលប្រើវិធីសាស្ត្រពេញនិយមដើម្បីទស្សន៍ទាយអំពីអនាគតទទួលលទ្ធផលល្អជាងឬទេ?