អត្ថបទសិក្សា ២៧
ចម្រៀងលេខ៧៣ សូមជួយយើងឲ្យមានចិត្តក្លាហាន
ចូរមានចិត្តក្លាហានដូចសេដុក
«សេដុកជាយុវជនពូកែអង់អាច»។—១ប្រ. ១២:២៨
ចំណុចផ្ដោត
របៀបដែលគំរូរបស់សេដុកអាចជួយយើងឲ្យមានចិត្តក្លាហាន។
១-២. តើសេដុកជាអ្នកណា? (ប្រវត្តិហេតុទី១ ១២:២២, ២៦-២៨)
សូមស្រមៃគិតអំពីអ្វីដែលបានកើតឡើង។ មានបុរសមួយក្រុមដែលមានគ្នាជាង៣៤០.០០០នាក់។ ពួកគេប្រមូលគ្នាដើម្បីលើកដាវីឌធ្វើជាស្ដេចលើប្រជាជាតិអ៊ីស្រាអែលទាំងមូល។ អស់រយៈពេលបីថ្ងៃ ពួកបុរសទាំងនោះស្នាក់នៅតំបន់ភ្នំដែលមានថ្មច្រើន ជិតក្រុងហេប្រុន។ ពួកគេនិយាយគ្នា សើចសប្បាយ និងច្រៀងចម្រៀងសរសើរតម្កើងព្រះយេហូវ៉ាដោយអំណរ។ (១ប្រ. ១២:៣៩) នៅក្នុងចំណោមមនុស្សមួយក្រុមធំនោះ មានបុរសវ័យក្មេងម្នាក់ឈ្មោះសេដុកដែលទំនងជាមិនលេចធ្លោទេ។ ក៏ប៉ុន្តែ ព្រះយេហូវ៉ាធ្វើឲ្យប្រាកដថាយើងដឹងថាសេដុកនៅទីនោះ។ (សូមអាន ប្រវត្តិហេតុទី១ ១២:២២, ២៦-២៨) តើសេដុកជាអ្នកណា?
២ សេដុកគឺជាសង្ឃដែលធ្វើការយ៉ាងជិតស្និទ្ធជាមួយសម្ដេចសង្ឃអាប៊ីយ៉ាថា។ សេដុកក៏ជាអ្នកមើលធ្លុះដែលអាចយល់អំពីបំណងប្រាថ្នាព្រះ ហើយដែលទទួលការយល់ធ្លុះជ្រៅយ៉ាងអស្ចារ្យ។ (២សាំ. ១៥:២៧) បណ្ដាជនទៅរកសេដុកពេលពួកគេត្រូវការយោបល់ដែលប្រកបដោយប្រាជ្ញា។ គាត់ក៏ជាបុរសអង់អាចដែរ។ យើងនឹងផ្ដោតអារម្មណ៍លើគុណសម្បត្តិនេះក្នុងអត្ថបទនេះ។
៣. (ក) ហេតុអ្វីអ្នកគោរពប្រណិប័តន៍ព្រះយេហូវ៉ាត្រូវមានចិត្តក្លាហាន? (ខ) តើយើងនឹងពិចារណាអ្វីក្នុងអត្ថបទនេះ?
៣ ក្នុងអំឡុងគ្រាចុងក្រោយបង្អស់នេះ សាថានព្យាយាមកាន់តែខ្លាំងជាងមុនដើម្បីបង្ខូចជំនឿរបស់យើង។ (១ពេ. ៥:៨) យើងត្រូវមានចិត្តក្លាហាន កាលដែលយើងរង់ចាំឲ្យព្រះយេហូវ៉ាបំផ្លាញសាថាននិងរបៀបរបបដ៏ទុច្ចរិតរបស់វា។ (ចសព. ៣១:២៤) សូមយើងពិចារណាអំពីរបៀបបីយ៉ាងដែលយើងអាចមានចិត្តក្លាហានដូចសេដុក។
ចូរគាំទ្ររាជាណាចក្រព្រះ
៤. ហេតុអ្វីរាស្ត្ររបស់ព្រះយេហូវ៉ាត្រូវការចិត្តក្លាហានដើម្បីគាំទ្ររាជាណាចក្រព្រះ? (សូមមើលរូបភាពផងដែរ)
៤ ក្នុងនាមជារាស្ត្ររបស់ព្រះយេហូវ៉ា យើងគាំទ្ររាជាណាចក្ររបស់ព្រះយ៉ាង អស់ពីចិត្ត ប៉ុន្តែយើងច្រើនតែត្រូវការចិត្តក្លាហានដើម្បីធ្វើដូច្នេះ។ (ម៉ាថ. ៦:៣៣) ជាឧទាហរណ៍ ក្នុងពិភពលោកដ៏ទុច្ចរិតនេះ យើងត្រូវការចិត្តក្លាហានដើម្បីរស់នៅស្របតាមខ្នាតតម្រារបស់ព្រះយេហូវ៉ា និងដើម្បីផ្សព្វផ្សាយដំណឹងល្អអំពីរាជាណាចក្រព្រះ។ (១ថែ. ២:២) ម្យ៉ាងទៀត ពិភពលោកកាន់តែបែកបាក់គ្នាដោយសាររឿងនយោបាយ ដូច្នេះយើងត្រូវការចិត្តក្លាហានដើម្បីមិនកាន់ជើងខាងណាមួយក្នុងជម្លោះឬរឿងទាំងនេះ។ (យ៉ូន. ១៨:៣៦) បងប្អូនជាច្រើនក្នុងចំណោមរាស្ត្ររបស់ព្រះយេហូវ៉ាជួបបញ្ហាលុយកាក់ រងអំពើហិង្សា ឬបានត្រូវគេចាប់ដាក់គុក ដោយសារបដិសេធមិនប្រឡូកក្នុងរឿងនយោបាយឬចូលបម្រើក្នុងយោធា។
៥. ហេតុអ្វីសេដុកត្រូវការចិត្តក្លាហានដើម្បីគាំទ្រដាវីឌ?
៥ សេដុកទៅក្រុងហេប្រុនមិនគ្រាន់តែដើម្បីអបអរការឡើងធ្វើជាស្ដេចរបស់ដាវីឌប៉ុណ្ណោះទេ ប៉ុន្តែគាត់បានទៅទីនោះទាំងមានអាវុធ ហើយប្រុងប្រៀបដើម្បីប្រយុទ្ធ។ (១ប្រ. ១២:៣៨) គាត់សុខចិត្តទៅតាមដាវីឌពេលប្រយុទ្ធ ហើយការពារជនជាតិអ៊ីស្រាអែលពីសត្រូវ។ សេដុកប្រហែលជាមិនមែនជាអ្នកប្រយុទ្ធដែលមានបទពិសោធន៍ច្រើនទេ ប៉ុន្តែគាត់ជាបុរសដ៏ក្លាហានណាស់។
៦. ស្ដីអំពីចិត្តក្លាហាន តើដាវីឌបានទុកគំរូល្អយ៉ាងណាឲ្យសេដុក? (ចម្រៀងសរសើរព្រះ ១៣៨:៣)
៦ តើសង្ឃសេដុករៀនឲ្យមានចិត្តក្លាហានពីណា? គាត់ស្គាល់បុរសជាច្រើនដែលមាំមួននិងអង់អាច។ គាត់ច្បាស់ជារៀនពីគំរូរបស់ពួកគេ។ ជាឧទាហរណ៍ គំរូរបស់ដាវីឌអំពីការ«ដឹកនាំទ័ពអ៊ីស្រាអែលចេញទៅច្បាំង»យ៉ាងក្លាហានបានជំរុញចិត្តជនជាតិអ៊ីស្រាអែលទាំងអស់ឲ្យគាំទ្រគាត់យ៉ាងអស់ពីចិត្ត។ (១ប្រ. ១១:១, ២) ដាវីឌតែងតែពឹងផ្អែកលើព្រះយេហូវ៉ាឲ្យជួយប្រយុទ្ធប្រឆាំងនឹងសត្រូវរបស់គាត់។ (ចសព. ២៨:៧; សូមអាន ចម្រៀងសរសើរព្រះ ១៣៨:៣) សេដុកក៏បានរៀនពីបុរសដ៏ក្លាហានឯទៀត ដូចជាយេហូយ៉ាដានិងកូនប្រុសរបស់គាត់បេនណាយ៉ាដែលជាអ្នកចម្បាំង រួមទាំងមេទ័ព២២នាក់ទៀតដែលជួយគាំទ្រដាវីឌ។ (១ប្រ. ១១:២២-២៥; ១២:២៦-២៨) បុរសទាំងនេះតាំងចិត្តជួយជ្រោមជ្រែងដាវីឌឲ្យធ្វើជាស្ដេច ព្រមទាំងការពារគាត់។
៧. (ក) តើយើងអាចរៀនអំពីចិត្តក្លាហានពីគំរូណាខ្លះនៅសព្វថ្ងៃនេះ? (ខ) តើអ្នករៀនអ្វីពីគំរូរបស់បងប្រុសណេស៊ីលូដូចបានត្រូវបង្ហាញក្នុងវីដេអូ?
៧ យើងទទួលកម្លាំងនិងចិត្តក្លាហានពេលយើងពិចារណាគំរូរបស់ពួកអ្នកដែលបានគាំទ្រការគ្រប់គ្រងរបស់ព្រះយេហូវ៉ាដោយចិត្តក្លាហាន។ លោកយេស៊ូគ្រិស្តដែលជាស្ដេចរបស់យើងបានបដិសេធយ៉ាងមុតមាំ មិនរួមចំណែកក្នុងនយោបាយនៃពិភពលោករបស់សាថានពេលលោកនៅផែនដី។ (ម៉ាថ. ៤:៨-១១; យ៉ូន. ៦:១៤, ១៥) លោកតែងតែពឹងផ្អែកព្រះយេហូវ៉ាដើម្បីទទួលកម្លាំង។ នៅសព្វថ្ងៃនេះ យើងក៏មានគំរូជាច្រើនរបស់បុរសវ័យក្មេងដែលបដិសេធមិនចូលធ្វើទាហាន ឬមិនរួមចំណែកក្នុងរឿងនយោបាយ។ យើងលើកទឹកចិត្តអ្នកឲ្យអានអំពីបទពិសោធន៍របស់ពួកគេក្នុងគេហទំព័រjw.org។ a
ចូរជួយបងប្អូនរបស់អ្នក
៨. តើពួកអ្នកចាស់ទុំត្រូវការចិត្តក្លាហាននៅពេលណាដើម្បីផ្ដល់ជំនួយដល់បងប្អូន?
៨ រាស្ត្ររបស់ព្រះយេហូវ៉ាចូលចិត្តជួយគ្នាទៅវិញទៅមក។ (២កូ. ៨:៤) ប៉ុន្តែ ពេលខ្លះត្រូវការចិត្តក្លាហានឲ្យធ្វើដូច្នេះ។ ជាឧទាហរណ៍ ពេលសង្គ្រាមផ្ទុះឡើង អ្នកចាស់ទុំក្នុងតំបន់នោះទទួលស្គាល់ថាបងប្អូនត្រូវការការលើកទឹកចិត្ត ការគាំទ្រ និងប្រហែលជារបស់របរចាំបាច់ឬជំនួយខាងការគោរពប្រណិប័តន៍។ ដោយសារពួកអ្នកចាស់ទុំស្រឡាញ់ចៀម ពួកគេប្រថុយជីវិតដើម្បីផ្ដល់អ្វីដែលបងប្អូនត្រូវការ។ (យ៉ូន. ១៥:១២, ១៣) យ៉ាងនេះ ពួកគេកំពុងធ្វើតាមគំរូរបស់សេដុកអំពីចិត្តក្លាហាន។
៩. ដូចបានត្រូវរៀបរាប់នៅសាំយូអែលទី២ ១៥:២៧-២៩ តើដាវីឌបានប្រាប់សេដុកឲ្យធ្វើអ្វី? (សូមមើលរូបភាពផងដែរ)
៩ ជីវិតរបស់ដាវីឌកំពុងស្ថិតក្នុងគ្រោះថ្នាក់។ អាប់សាឡំដែលជាកូនប្រុសរបស់គាត់ តាំងចិត្តដណ្ដើមតំណែងជាស្ដេចពីគាត់។ (២សាំ. ១៥:១២, ១៣) ដាវីឌត្រូវចាកចេញពីក្រុងយេរូសាឡិមភ្លាមៗ! គាត់បានបន្លឺសំឡេងទៅអ្នកបម្រើរបស់គាត់ថា៖ «ចូរយើងនាំគ្នាក្រោកឡើង ហើយរត់ចេញភ្លាម។ បើមិនដូច្នោះទេ គ្មានអ្នកណាម្នាក់គេចផុតពីអាប់សាឡំឡើយ!»។ (២សាំ. ១៥:១៤) កាលដែលអ្នកបម្រើកំពុងចាកចេញ ដាវីឌយល់ថាត្រូវការឲ្យអ្នកណាម្នាក់បន្តនៅក្រុងយេរូសាឡិម ដើម្បីរាយការណ៍ប្រាប់គាត់អំពីគម្រោងរបស់អាប់សាឡំ។ ដូច្នេះ ដាវីឌបានចាត់សេដុកនិងពួកសង្ឃឯទៀតឲ្យត្រឡប់ទៅក្រុងនោះដើម្បីធ្វើជាជនបង្កប់។ (សូមអាន សាំយូអែលទី២ ១៥:២៧-២៩) ពួកគេត្រូវប្រុងប្រយ័ត្នជាខ្លាំង។ អ្វីដែលដាវីឌប្រាប់ពួកសង្ឃទាំងនោះឲ្យធ្វើ គឺជាការប្រថុយនឹងគ្រោះថ្នាក់ ហើយថែមទាំងអាចនាំឲ្យពួកគេបាត់បង់ជីវិតទៀតផង។ អាប់សាឡំគឺជាមនុស្សសាហាវឃោរឃៅ គិតតែប្រយោជន៍ខ្លួន និងក្បត់ឪពុកខ្លួន។ សូមស្រមៃគិតថាតើគាត់អាចនឹងប្រព្រឹត្តយ៉ាងណាទៅលើសេដុកនិងសង្ឃឯទៀតបើគាត់ដឹងថាពួកគេកំពុងស៊ើបការណ៍ពីគាត់ដើម្បីការពារដាវីឌ!
១០. តើសេដុកនិងអ្នកដែលរួមដៃជាមួយគាត់បានការពារដាវីឌយ៉ាងដូចម្ដេច?
១០ ដាវីឌបានសុំសេដុកនិងហ៊ូសាយដែលជាមិត្តភក្ដិដ៏ស្មោះត្រង់ម្នាក់ទៀតរបស់គាត់ឲ្យជួយក្នុងគម្រោងមួយ។ (២សាំ. ១៥:៣២-៣៧) តាមគម្រោងនោះ ហ៊ូសាយត្រូវធ្វើពុតជាអ្នកគាំទ្រអាប់សាឡំ ហើយឲ្យយោបល់គាត់អំពីរបៀបវាយប្រហារដាវីឌ ដើម្បីទុកឱកាសឲ្យដាវីឌមានពេលត្រៀមខ្លួនសម្រាប់ការវាយប្រហារនោះ។ បន្ទាប់មក ហ៊ូសាយបានប្រាប់សេដុកនិងអាប៊ីយ៉ាថាអំពីគម្រោងនោះ។ (២សាំ. ១៧:៨-១៦) ក្រោយមក បុរសទាំងពីរនាក់នោះអាចបញ្ជូនដំណឹងឲ្យដាវីឌ។ (២សាំ. ១៧:១៧) ដោយមានជំនួយពីព្រះយេហូវ៉ា សេដុកនិងសង្ឃឯទៀតបានជួយការពារដាវីឌពីគ្រោះថ្នាក់។—២សាំ. ១៧:២១, ២២
១១. តើយើងអាចមានចិត្តក្លាហានដូចសេដុកយ៉ាងដូចម្ដេចពេលផ្ដល់ជំនួយដល់បងប្អូន?
១១ បើយើងបានត្រូវសុំឲ្យជួយបងប្អូនក្នុងអំឡុងពេលដែលមានគ្រោះថ្នាក់ តើយើងអាចបង្ហាញចិត្តក្លាហានដូចសេដុកយ៉ាងដូចម្ដេច? (១) ចូរធ្វើតាមការណែនាំ។ ក្នុងស្ថានភាពបែបនេះគឺសំខាន់ដែលយើងរក្សាសាមគ្គីភាព។ សូមធ្វើតាមការណែនាំពីការិយាល័យសាខាក្នុងតំបន់របស់អ្នក។ (ហេ. ១៣:១៧) ជាទៀងទាត់ពួកអ្នកចាស់ទុំគួរពិនិត្យមើលការណែនាំអំពីរបៀបត្រៀមខ្លួនសម្រាប់គ្រោះមហន្តរាយ និងអ្វីដែលត្រូវធ្វើពេលមានមហន្តរាយ។ (១កូ. ១៤:៣៣, ៤០) (២) ចូរមានចិត្តក្លាហានតែប្រុងប្រយ័ត្ន។ (សុភ. ២២:៣) សូមគិតមុនប្រព្រឹត្ត។ ចូរកុំចេះតែប្រថុយជីវិត។ (៣) ចូរពឹងផ្អែកលើ ព្រះយេហូវ៉ា។ សូមចាំថាព្រះយេហូវ៉ាយកចិត្តទុកដាក់យ៉ាងខ្លាំងនឹងសុខុមាលភាពរបស់អ្នកនិងបងប្អូនរបស់អ្នក។ លោកអាចជួយអ្នកឲ្យផ្ដល់ជំនួយដល់បងប្អូនដោយមានសុវត្ថិភាព។
១២-១៣. តើអ្នករៀនអ្វីពីបទពិសោធន៍របស់បងវិកទ័រនិងបងវិថាលី? (សូមមើលរូបភាពផងដែរ)
១២ សូមគិតអំពីបងប្អូនរួមជំនឿពីរនាក់គឺបងប្រុសវិកទ័រនិងបងប្រុសវិថាលី ដែលបានដឹកជញ្ជូនអាហារនិងទឹកដល់បងប្អូនរួមជំនឿឯទៀតនៅប្រទេសអ៊ុយក្រែន។ បងវិកទ័រនិយាយថា៖ «យើងស្វែងរកអាហារគ្រប់ទីកន្លែង។ យើងច្រើនតែឮមនុស្សបាញ់គ្នានៅជិតយើង។ បងប្រុសម្នាក់បានបរិច្ចាគអាហារដែលគាត់បានស្ដុកទុក។ ដោយសារការបរិច្ចាគនេះ អ្នកផ្សាយជាច្រើននាក់មានអ្វីដែលពួកគេត្រូវការដើម្បីបន្ដរួចរស់ជីវិតអស់មួយគ្រា។ កាលដែលយើងកំពុងលើកអីវ៉ាន់ដាក់ចូលឡានធំរបស់យើង គ្រាប់បែកមួយប្លោងមកនៅចម្ងាយ២០ម៉ែត្រពីយើង។ ពេញមួយថ្ងៃនោះ ខ្ញុំអង្វរសុំព្រះយេហូវ៉ាផ្ដល់ចិត្តក្លាហានដែលខ្ញុំត្រូវការដើម្បីបន្ដជួយអ្នកផ្សាយ»។
១៣ បងវិថាលីនិយាយថា៖ «យើងត្រូវការចិត្តក្លាហានខ្លាំងណាស់។ ពេលធ្វើដំណើរលើកទី១ ខ្ញុំបានចំណាយពេលអស់១២ម៉ោង ហើយនៅតាមផ្លូវខ្ញុំបានអធិដ្ឋានទៅព្រះយេហូវ៉ារហូត»។ បងវិថាលីមានចិត្តក្លាហាន ប៉ុន្តែគាត់ក៏ចេះប្រុងប្រយ័ត្នដែរ។ គាត់និយាយបន្ថែមថា៖ «ខ្ញុំបន្ដសុំព្រះយេហូវ៉ានូវប្រាជ្ញានិងចិត្តសុភាពរាបទាប។ ខ្ញុំបានបើកបរតែតាមផ្លូវដែលអាជ្ញាធរអនុញ្ញាតប៉ុណ្ណោះ។ ជំនឿខ្ញុំបានរឹងមាំឡើងពេលខ្ញុំឃើញអំពីរបៀបដែលបងប្អូនយើងរួមកិច្ចការជាមួយគ្នា។ ពួកគេបានដកកម្ទេចសំណល់ពីផ្លូវ ប្រមូលទុកអាហារ សម្លៀកបំពាក់ និងរបស់របរសំខាន់ឯទៀតដាក់ចូលក្នុងឡានធំ ហើយផ្គត់ផ្គង់ខ្ញុំនិងវីកទ័រនូវអាហារនិងកន្លែងដើម្បីសម្រាកនៅតាមផ្លូវ»។
ចូររក្សាភក្ដីភាពចំពោះព្រះយេហូវ៉ា
១៤. បើបុគ្គលដែលយើងស្រឡាញ់លែងស្មោះត្រង់នឹងព្រះយេហូវ៉ា តើនោះអាចមានឥទ្ធិពលយ៉ាងណាមកលើយើង?
១៤ ទុក្ខលំបាកដ៏ពិបាកបំផុតមួយដែលយើងប្រហែលជាមាន គឺពេលសមាជិកណាម្នាក់ក្នុងក្រុមគ្រួសារឬមិត្តជិតស្និទ្ធណាម្នាក់ចាកចេញពីព្រះយេហូវ៉ា។ (ចសព. ៧៨:៤០; សុភ. ២៤:១០) អ្នកប្រហែលជាកាន់តែពិបាកស៊ូទ្រាំនឹងស្ថានភាពនោះ បើគាត់ជាបុគ្គលដែលអ្នកស្រឡាញ់ខ្លាំង។ ប្រសិនបើអ្នកមានបទពិសោធន៍ដ៏ឈឺចាប់បែបនេះ គំរូរបស់សេដុកអំពីភក្ដីភាពអាចពង្រឹងកម្លាំងអ្នក។
១៥. ហេតុអ្វីសេដុកត្រូវការចិត្តក្លាហានដើម្បីរក្សាភក្ដីភាពចំពោះព្រះយេហូវ៉ា? (បណ្ដាស្ដេចទី១ ១:៥-៨)
១៥ សេដុកបានរក្សាភក្ដីភាពចំពោះព្រះយេហូវ៉ា ពេលមិត្តភក្ដិជិតស្និទ្ធរបស់គាត់អាប៊ីយ៉ាថាលែងស្មោះត្រង់។ នេះបានកើតឡើងនៅចុងបញ្ចប់នៃការគ្រប់គ្រងរបស់ដាវីឌ។ កាលដែលដាវីឌដេកលើគ្រែជិតស្លាប់ កូនប្រុសរបស់គាត់អាដូនីយ៉ាបានព្យាយាមដណ្ដើមរាជ្យដែលព្រះយេហូវ៉ាបានសន្យាឲ្យសាឡូម៉ូន។ (១ប្រ. ២២:៩, ១០) អាប៊ីយ៉ាថាបានសម្រេចចិត្តគាំទ្រអាដូនីយ៉ា។ (សូមអាន បណ្ដាស្ដេចទី១ ១:៥-៨) ដោយធ្វើដូច្នេះ អាប៊ីយ៉ាថាមិនគ្រាន់តែលែងស្មោះត្រង់នឹងដាវីឌប៉ុណ្ណោះទេ ប៉ុន្តែក៏លែងស្មោះត្រង់ចំពោះព្រះយេហូវ៉ាដែរ! តើអ្នកអាចស្រមៃឃើញថាសេដុកសោកសៅនិងខកចិត្តយ៉ាងណាទេ? អស់រយៈពេលជាង៤០ឆ្នាំ គាត់និងអាប៊ីយ៉ាថាបានធ្វើការជាសង្ឃជាមួយគ្នាយ៉ាងជិតស្និទ្ធ។ (២សាំ. ៨:១៧) ពួកគាត់បានថែរក្សា«ហឹបនៃព្រះពិត»ជាមួយគ្នា។ (២សាំ. ១៥:២៩) នៅដើមដំបូង បុរសទាំងពីរនាក់នេះបានគាំទ្រការគ្រប់គ្រងរបស់ដាវីឌ ហើយបានធ្វើអ្វីជាច្រើនឯទៀតក្នុងកិច្ចបម្រើព្រះយេហូវ៉ា។—២សាំ. ១៩:១១-១៤
១៦. តើអ្វីប្រហែលជាបានជួយសេដុកឲ្យរក្សាភក្ដីភាព?
១៦ ទោះជាអាប៊ីយ៉ាថាលែងមានភក្ដីភាពចំពោះព្រះយេហូវ៉ាដោយសម្រេចចិត្តក្បត់ដាវីឌក្ដី សេដុកបានរក្សាភក្ដីភាពចំពោះព្រះយេហូវ៉ា។ ដាវីឌដឹងថាគាត់អាចទុកចិត្តសេដុកជានិច្ច។ ពេលឧបាយកលរបស់អាដូនីយ៉ាបានត្រូវបែកធ្លាយ ដាវីឌបានជ្រើសរើសសេដុក ណាថាន់ និងបេនណាយ៉ាឲ្យចាក់ប្រេងតែងតាំងសាឡូម៉ូនជាស្ដេច។ (១បស. ១:៣២-៣៤) សេដុកច្បាស់ជាបានទទួលការលើកទឹកចិត្តពីគំរូរបស់អ្នកគោរពប្រណិប័តន៍ឯទៀតរបស់ព្រះយេហូវ៉ាដូចជាណាថាន់ ដែលបានរក្សាភក្ដីភាពចំពោះព្រះយេហូវ៉ានិងគាំទ្រស្ដេចដាវីឌដែរ។ (១បស. ១:៣៨, ៣៩) ពេលសាឡូម៉ូនបានឡើងជាស្ដេច គាត់«បានប្រគល់តំណែងរបស់អាប៊ីយ៉ាថាឲ្យដល់សេដុកជាសង្ឃ»។—១បស. ២:៣៥
១៧. តើអ្នកអាចយកតម្រាប់តាមសេដុកយ៉ាងដូចម្ដេច បើបុគ្គលដែលជិតស្និទ្ធនឹងអ្នកលែងមានភក្ដីភាពចំពោះព្រះយេហូវ៉ា?
១៧ តើអ្នកអាចយកតម្រាប់តាមសេដុកយ៉ាងដូចម្ដេច? បើបុគ្គលដែលអ្នកស្រឡាញ់សម្រេចចិត្តចាកចេញពីព្រះយេហូវ៉ា សូមបង្ហាញលោកថាអ្នកសម្រេចចិត្តរក្សាភក្ដីភាពចំពោះលោក។ (យ៉ូស. ២៤:១៥) ព្រះយេហូវ៉ានឹងផ្ដល់ឲ្យអ្នកនូវកម្លាំងនិងចិត្តក្លាហានដែលអ្នកត្រូវការ។ ចូរពឹងផ្អែកលើលោកដោយអធិដ្ឋាន និងនៅជិតស្និទ្ធនឹងអ្នកគោរពប្រណិប័តន៍ដ៏ស្មោះត្រង់ឯទៀត។ ព្រះយេហូវ៉ាឲ្យតម្លៃភក្ដីភាពរបស់អ្នក ហើយលោកនឹងឲ្យរង្វាន់អ្នកចំពោះភក្ដីភាពនោះ។—២សាំ. ២២:២៦
១៨. តើអ្នករៀនអ្វីពីបទពិសោធន៍របស់បងម៉ាកូនិងបងស៊ីដសេ?
១៨ សូមគិតអំពីគំរូរបស់បងម៉ាកូនិងប្រពន្ធរបស់គាត់បងស៊ីដសេ។ ពួកគាត់មានកូនស្រីពេញវ័យពីរនាក់ដែលបានចាកចេញពីសេចក្ដីពិត។ បងម៉ាកូនិយាយថា៖ «តាំងពីថ្ងៃដែលកូនកើតមក យើងស្រឡាញ់ពួកគេខ្លាំងណាស់។ យើងធ្វើអ្វីណាក៏ដោយដើម្បីការពារពួកគេពីការរងផលវិបាក។ ដូច្នេះ ពេលពួកគេសម្រេចចិត្តចាកចេញពីព្រះយេហូវ៉ា យើងឈឺចិត្តណាស់»។ គាត់បន្ដថា៖ «ប៉ុន្តែ ព្រះយេហូវ៉ានៅក្បែរយើង។ លោកធ្វើឲ្យប្រាកដថាពេលខ្ញុំខ្សោយ ប្រពន្ធខ្ញុំរឹងមាំ ហើយពេលគាត់ខ្សោយ ខ្ញុំរឹងមាំ»។ បងស៊ីដសេបន្ថែមថា៖ «យើងនឹងមិនអាចស៊ូទ្រាំបានទេ បើព្រះយេហូវ៉ាមិនផ្ដល់កម្លាំងដែលយើងត្រូវការ។ ខ្ញុំកើតទុក្ខណាស់ ហើយមានអារម្មណ៍ថាកូនស្រីខ្ញុំឈប់បម្រើព្រះយេហូវ៉ាគឺជាកំហុសខ្ញុំ ដូច្នេះខ្ញុំបានប្រាប់ព្រះយេហូវ៉ាអំពីអារម្មណ៍របស់ខ្ញុំ។ មិនយូរក្រោយមក បងស្រីម្នាក់ដែលខ្ញុំខានជួបអស់ជាច្រើនឆ្នាំបានមកជួបខ្ញុំ ដាក់ដៃលើស្មាខ្ញុំ សម្លឹងមើលភ្នែកខ្ញុំ រួចនិយាយថា៖ ‹សូមចាំណា៎ស៊ីដសេ នេះមិនមែនជាកំហុសរបស់ប្អូនទេ!›។ ដោយមានជំនួយពីព្រះយេហូវ៉ា ខ្ញុំអាចរក្សាអំណររបស់ខ្ញុំក្នុងការបម្រើលោក»។
១៩. តើអ្នកតាំងចិត្តធ្វើអ្វី?
១៩ ព្រះយេហូវ៉ាចង់ឲ្យពួកអ្នកគោរពប្រណិប័តន៍លោកទាំងអស់មានចិត្តក្លាហានដូចសេដុក។ (២ធី. ១:៧) ក៏ប៉ុន្តែ លោកមិនចង់ឲ្យយើងពឹងផ្អែកលើកម្លាំងរបស់ខ្លួនទេ។ លោកចង់ឲ្យយើងពឹងផ្អែកលើលោក។ ដូច្នេះ ពេលអ្នកឃើញថាខ្លួនស្ថិតក្នុងស្ថានភាពមួយដែលត្រូវការចិត្តក្លាហាន សូមរកជំនួយពីព្រះយេហូវ៉ា។ អ្នកអាចប្រាកដថាលោកនឹងធ្វើឲ្យអ្នកមានចិត្តក្លាហានដូចសេដុក!—១ពេ. ៥:១០
ចម្រៀងលេខ១២៦ ត្រូវដឹងខ្លួន រឹងមាំ ហើយខ្លាំងក្លា
a សូមទស្សនាវីដេអូដែលមានចំណងជើងថា មូលហេតុដែលគ្រិស្តសាសនិកពិតត្រូវមានចិត្តក្លាហាន ដើម្បីរក្សាអព្យាក្រឹតភាពនៅគេហទំព័រjw.org/km។