អត្ថបទសិក្សា ២៨
ចម្រៀងលេខ១២៣ ចុះចូលដោយស្មោះក្រោមការរៀបចំរបស់ព្រះ
តើអ្នកចេះសម្គាល់សេចក្ដីពិតឬទេ?
«ចូរកាន់ជំហរមាំមួនដោយយកសេចក្ដីពិតមកក្រវាត់ចង្កេះ»។—អេភ ៦:១៤
ចំណុចផ្ដោត
បង្ហាត់បង្រៀនខ្លួនឲ្យសម្គាល់អំពីភាពខុសគ្នារវាងសេចក្ដីពិតដែលយើងរៀនពីព្រះយេហូវ៉ា និងការកុហកដែលសាថាននិងអ្នកប្រឆាំងរបស់វាលើកស្ទួយ។
១. តើអ្នកមានអារម្មណ៍យ៉ាងណាចំពោះសេចក្ដីពិត?
រាស្ត្ររបស់ព្រះយេហូវ៉ាស្រឡាញ់សេចក្ដីពិតដែលមានក្នុងបណ្ដាំរបស់ព្រះ។ ជំនឿរបស់យើងមានមូលដ្ឋានលើសេចក្ដីពិតនោះ។ (រ៉ូម ១០:១៧) យើងបានជឿជាក់ថាព្រះយេហូវ៉ាបានតាំងក្រុមជំនុំគ្រិស្តសាសនិកឡើង«ជាសសរទ្រូង និងជាកំពែងការពារសេចក្ដីពិត»។ (១ធី. ៣:១៥) ម្យ៉ាងទៀត យើងសប្បាយចិត្តចុះចូល‹ពួកអ្នកដែលនាំមុខយើង› កាលដែលពួកគេពន្យល់ប្រាប់សេចក្ដីពិតពីគម្ពីរនិងផ្ដល់ការណែនាំស្របតាមបំណងប្រាថ្នារបស់ព្រះ។—ហេ. ១៣:១៧
២. យោងទៅតាមយ៉ាកុប ៥:១៩ តើអ្វីអាចកើតឡើងចំពោះយើងក្រោយពីយើងរៀនសេចក្ដីពិត?
២ ប៉ុន្តែ ក្រោយពីយើងបានទទួលយកសេចក្ដីពិតនិងតួនាទីរបស់អង្គការព្រះក្នុងការផ្ដល់ការណែនាំដ៏គួរឲ្យទុកចិត្ត យើងនៅតែអាចត្រូវបង្វែរចេញ។ (សូមអាន យ៉ាកុប ៥:១៩) សាថានពិតជាចង់ឲ្យយើងឈប់ទុកចិត្តគម្ពីរឬការណែនាំដែលយើងទទួលពីអង្គការរបស់ព្រះ។—អេភ. ៤:១៤
៣. ហេតុអ្វីយើងត្រូវកាន់ខ្ជាប់តាមសេចក្ដីពិត? (អេភេសូរ ៦:១៣, ១៤)
៣ សូមអាន អេភេសូរ ៦:១៣, ១៤។ មិនយូរទៀត មេកំណាចនឹងប្រើការឃោសនាដ៏ខ្លាំងក្លាដើម្បីបំភាន់ប្រជាជាតិនានាឲ្យប្រឆាំងនឹងព្រះយេហូវ៉ា។ (បប. ១៦:១៣, ១៤) យើងក៏ដឹងដែរថាសាថាននឹងខំព្យាយាមកាន់តែខ្លាំងដើម្បីបំភាន់រាស្ត្ររបស់ព្រះយេហូវ៉ា។ (បប. ១២:៩) ហេតុនេះហើយ គឺជាការសំខាន់ដែលយើងបង្ហាត់បង្រៀនខ្លួនឲ្យចេះសម្គាល់ភាពខុសគ្នារវាងសេចក្ដីពិតនិងការកុហក ហើយចេះស្ដាប់តាមសេចក្ដីពិត។ (រ៉ូម ៦:១៧; ១ពេ. ១:២២) ការរួចរស់ជីវិតក្នុងអំឡុងគ្រាទុក្ខវេទនាជាខ្លាំងនឹងអាស្រ័យទៅលើអ្វីទាំងនេះ!
៤. តើយើងនឹងពិចារណាអ្វីខ្លះក្នុងអត្ថបទនេះ?
៤ ក្នុងអត្ថបទនេះ យើងនឹងលើកឡើងអំពីគុណសម្បត្តិពីរដែលសំខាន់ចាំបាច់ដើម្បីជួយយើងឲ្យសម្គាល់សេចក្ដីពិតពីគម្ពីរ ហើយទទួលយកការណែនាំពីអង្គការរបស់ព្រះ។ ក្រោយមក យើងនឹងពិចារណាអំពីអ្វីបីយ៉ាងដែលយើងត្រូវធ្វើដើម្បីបន្តកាន់ខ្ជាប់តាមសេចក្ដីពិត។
គុណសម្បត្តិដែលសំខាន់ចាំបាច់ដើម្បីចេះសម្គាល់សេចក្ដីពិត
៥. តើការកោតខ្លាចព្រះយេហូវ៉ាជួយយើងឲ្យចេះសម្គាល់សេចក្ដីពិតយ៉ាងដូចម្ដេច?
៥ ការកោតខ្លាចព្រះយេហូវ៉ា។ ការគោរពកោតខ្លាចព្រះយេហូវ៉ាមានន័យថាយើងស្រឡាញ់លោកខ្លាំងដល់ម្ល៉េះបានជាយើងនឹងជៀសវាងពីការធ្វើអ្វីណាក៏ដោយដែលអាចនាំឲ្យលោកមិនពេញចិត្ត។ យើងចង់រៀនចេះសម្គាល់ភាពខុសគ្នារវាងអ្វីដែលខុសនិងអ្វីដែលត្រូវ ហើយរវាងសេចក្ដីពិតនិងអ្វីដែលមិនពិត ដើម្បីឲ្យយើងអាចទទួលការពេញចិត្តពីព្រះយេហូវ៉ា។ (សុភ. ២:៣-៦; ហេ. ៥:១៤) យើងមិនត្រូវខ្លាចមនុស្សខ្លាំងជាងស្រឡាញ់ព្រះយេហូវ៉ាទេ។ ដោយសារការព្យាយាមផ្គាប់ចិត្តមនុស្សច្រើនតែនាំឲ្យធ្វើអ្វីដែលព្រះយេហូវ៉ាមិនពេញចិត្ត។
៦. តើការខ្លាចមនុស្សបានធ្វើឲ្យមេដឹកនាំជនជាតិអ៊ីស្រាអែល១០នាក់បង្ខុសសេចក្ដីពិតយ៉ាងដូចម្ដេច?
៦ បើយើងខ្លាចមនុស្សជាងកោតខ្លាចព្រះយេហូវ៉ា យើងអាចបែរចេញពីសេចក្ដីពិត។ សូមគិតអំពីគំរូរបស់មេដឹកនាំ១២នាក់ដែលស៊ើបការណ៍នៅទឹកដីដែលព្រះយេហូវ៉ាបានសន្យាឲ្យដល់ជនជាតិអ៊ីស្រាអែល។ អ្នកស៊ើបការណ៍១០នាក់ភ័យខ្លាចជនជាតិកាណានយ៉ាងខ្លាំង ហើយអារម្មណ៍ភ័យខ្លាចនោះគឺខ្លាំងជាងសេចក្ដីស្រឡាញ់ដែលពួកគេមានចំពោះព្រះយេហូវ៉ា។ ពួកគេបានប្រាប់ជនជាតិអ៊ីស្រាអែលគ្នីគ្នាថា៖ «យើងមិនអាចឡើងទៅច្បាំងនឹងពួកអ្នកស្រុកនោះបានទេ ព្រោះពួកគេខ្លាំងជាងយើងឆ្ងាយណាស់»។ (ជប. ១៣:២៧-៣១) តាមទស្សនៈរបស់មនុស្ស ជនជាតិកាណានគឺខ្លាំងជាងជនជាតិអ៊ីស្រាអែលមែន ប៉ុន្តែដោយនិយាយថាជនជាតិអ៊ីស្រាអែលនឹងមិនអាចយកឈ្នះសត្រូវរបស់ពួកគេ គឺហាក់ដូចជាមិនគិតអំពីព្រះយេហូវ៉ា។ អ្នកស៊ើបការណ៍ទាំង១០នាក់នោះគួរផ្ដោតអារម្មណ៍ទៅលើអ្វីដែលព្រះយេហូវ៉ាចង់ឲ្យជនជាតិអ៊ីស្រាអែលធ្វើ។ ពួកគេក៏គួររំពឹងគិតអំពីអ្វីដែលលោកបានធ្វើសម្រាប់ពួកគេនៅពេលថ្មីៗកន្លងមក។ យ៉ាងនេះពួកគេអាចទទួលស្គាល់ថា ភាពខ្លាំងក្លារបស់ជនជាតិកាណានមិនអាចប្រៀបផ្ទឹមនឹងឫទ្ធានុភាពដ៏ខ្លាំងក្លាបំផុតរបស់ព្រះយេហូវ៉ាបានទេ។ ខុសពីអ្នកស៊ើបការណ៍មិនស្មោះត្រង់ទាំងនោះ យ៉ូស្វេនិងកាលែបចង់ទទួលការពេញចិត្តពីព្រះយេហូវ៉ា។ ពួកគេបានប្រាប់បណ្ដាជនថា៖ «ប្រសិនបើព្រះយេហូវ៉ាពេញចិត្តនឹងយើង លោកច្បាស់ជានាំយើងចូលក្នុងស្រុកនោះ ហើយប្រគល់ស្រុកនោះដល់យើងជាមិនខាន»។—ជប. ១៤:៦-៩
៧. តើយើងអាចធ្វើអ្វីដើម្បីកាន់តែកោតខ្លាចព្រះយេហូវ៉ា? (សូមមើលរូបភាពផងដែរ)
៧ ដើម្បីពង្រឹងការកោតខ្លាចព្រះយេហូវ៉ា យើងត្រូវផ្ដោតអារម្មណ៍លើការធ្វើឲ្យព្រះយេហូវ៉ាពេញចិត្តចំពោះការសម្រេចចិត្តទាំងអស់របស់យើង។ (ចសព. ១៦:៨) ពេលអ្នកអានកំណត់ហេតុក្នុងគម្ពីរ សូមសួរខ្លួនថា ‹បើខ្ញុំស្ថិតក្នុងស្ថានភាពនោះ តើខ្ញុំនឹងសម្រេចចិត្តបែបណា?›។ ជាឧទាហរណ៍ សូមស្រមៃគិតថាខ្លួនកំពុងស្ដាប់សេចក្ដីរាយការណ៍មិនល្អពីមេដឹកនាំជនជាតិអ៊ីស្រាអែលទាំង១០នាក់។ តើអ្នកនឹងជឿ ហើយចុះចាញ់ការខ្លាចមនុស្ស ឬតើអ្នកនឹងឲ្យសេចក្ដីស្រឡាញ់ដែលអ្នកមានចំពោះព្រះយេហូវ៉ានិងបំណងចិត្តចង់ធ្វើឲ្យលោកពេញចិត្តធ្វើឲ្យអ្នកយកឈ្នះអារម្មណ៍ភ័យខ្លាចនោះ? ជនជាតិអ៊ីស្រាអែលជំនាន់នោះទាំងអស់មិនបានកត់សម្គាល់សេចក្ដីពិតដែលយ៉ូស្វេនិងកាលែបបាននិយាយទេ។ ជាលទ្ធផល ពួកគេបានបាត់ឱកាសចូលស្រុកដែលព្រះសន្យា។—ជប. ១៤:១០, ២២, ២៣
បើអ្នកនៅទីនោះ តើអ្នកនឹងជឿអ្នកណា? (សូមមើលវគ្គ៧)
៨. តើយើងត្រូវខំប្រឹងព្យាយាមបណ្ដុះគុណសម្បត្តិអ្វី ហើយហេតុអ្វី?
៨ ចិត្តរាបទាប។ ព្រះយេហូវ៉ាបើកបង្ហាញសេចក្ដីពិតដល់ពួកអ្នកដែលមានចិត្តរាបទាប។ (ម៉ាថ. ១១:២៥) យើងបានទទួលយកជំនួយដោយចិត្តរាបទាបដើម្បីរៀនសេចក្ដីពិត។ (សកម្ម. ៨:៣០, ៣១) ប៉ុន្តែ យើងត្រូវតែប្រុងប្រយ័ត្នមិនមានអំណួត។ បើយើងមានអំណួត យើងអាចចាប់ផ្ដើមគិតថាទស្សនៈផ្ទាល់ខ្លួនរបស់យើងគឺប្រកបដោយប្រាជ្ញាស្មើនឹងគោលការណ៍គម្ពីរនិងការណែនាំពីអង្គការរបស់ព្រះយេហូវ៉ា។
៩. តើយើងអាចរក្សាចិត្តរាបទាបយ៉ាងដូចម្ដេច?
៩ ដើម្បីរក្សាឲ្យមានចិត្តរាបទាប យើងត្រូវចាំថាយើងតូចតាចបើប្រៀបធៀបនឹងភាពអស្ចារ្យរបស់ព្រះយេហូវ៉ា។ (ចសព. ៨:៣, ៤) យើងក៏អាចអធិដ្ឋានសុំព្រះយេហូវ៉ាជួយយើងឲ្យកាន់តែមានចិត្តរាបទាបនិងស្រួលបង្រៀន។ ព្រះយេហូវ៉ានឹងជួយយើងឲ្យចាត់ទុកទស្សនៈរបស់លោកដែលយើងរៀនពីគម្ពីរនិងអង្គការរបស់លោកថាសំខាន់ជាងទស្សនៈរបស់ខ្លួន។ ពេលអានគម្ពីរ សូមរកមើលភ័ស្តុតាងដែលបង្ហាញថាព្រះយេហូវ៉ាស្អប់អំណួត ភាពក្រអឺតក្រទម និងក្អេងក្អាង តែលោកស្រឡាញ់ចិត្តរាបទាបវិញ។ ម្យ៉ាងទៀត សូមព្យាយាមកាន់តែខ្លាំងដើម្បីរក្សាចិត្តរាបទាប ពេលដែលអ្នកទទួលភារកិច្ចណាមួយដែលធ្វើឲ្យអ្នកមានអំណាចមួយកម្រិតឬដែលធ្វើឲ្យអ្នកឯទៀតកត់សម្គាល់អ្នក។
របៀបដែលយើងអាចកាន់ខ្ជាប់តាមសេចក្ដីពិត
១០. តើព្រះយេហូវ៉ាបានប្រើអ្នកណាដើម្បីផ្ដល់ការណែនាំដល់រាស្ត្ររបស់លោក?
១០ ចូររក្សាទំនុកចិត្តលើការណែនាំពីអង្គការរបស់ព្រះយេហូវ៉ា។ នៅអ៊ីស្រាអែលសម័យបុរាណ ព្រះយេហូវ៉ាបានប្រើម៉ូសេ រួចមកបានប្រើយ៉ូស្វេដើម្បីផ្ដល់ការណែនាំដល់រាស្ត្ររបស់លោក។ (យ៉ូស. ១:១៦, ១៧) ជនជាតិអ៊ីស្រាអែលបានទទួលពរពេលពួកគេចាត់ទុកបុរសទាំងនេះជាតំណាងព្រះយេហូវ៉ា។ រាប់រយឆ្នាំក្រោយមក ពួកសាវ័ក១២នាក់បានផ្ដល់ការណែនាំនៅពេលក្រុមជំនុំគ្រិស្តសាសនិកបានត្រូវបង្កើតឡើងជាលើកដំបូង។ (សកម្ម. ៨:១៤, ១៥) រួចមក ក្រុមនោះក៏បានរួមបញ្ចូលពួកអ្នកចាស់ទុំឯទៀតក្នុងក្រុងយេរូសាឡិមដែរ។ ដោយធ្វើតាមការណែនាំដែលបានទទួលពីពួកបុរសស្មោះត្រង់ទាំងនេះ «ជំនឿរបស់ក្រុមជំនុំនានាកាន់តែរឹងមាំ ហើយក្រុមជំនុំទាំងនោះក៏ចម្រើនឡើងជារៀងរាល់ថ្ងៃ»។ (សកម្ម. ១៦:៤, ៥) នៅសព្វថ្ងៃនេះ យើងក៏ទទួលពរដែរពេលយើងធ្វើតាមការណែនាំពីអង្គការរបស់ព្រះ។ ប៉ុន្តែ តើព្រះយេហូវ៉ានឹងមានអារម្មណ៍យ៉ាងណាបើយើងបដិសេធមិនទទួលស្គាល់ពួកអ្នកដែលព្រះយេហូវ៉ាបានតែងតាំង? យើងអាចឆ្លើយសំណួរនោះ ដោយពិចារណាអ្វីដែលបានកើតឡើងពេលជនជាតិអ៊ីស្រាអែលបានត្រូវដឹកនាំទៅស្រុកដែលព្រះបានសន្យា។
១១. នៅអ៊ីស្រាអែលសម័យបុរាណ តើអ្វីបានកើតឡើងចំពោះពួកអ្នកដែលបះបោរនឹងម៉ូសេដែលជាអ្នកនាំមុខ? (សូមមើលរូបភាពផងដែរ)
១១ នៅពេលមួយកាលដែលជនជាតិអ៊ីស្រាអែលធ្វើដំណើរទៅស្រុកសន្យា បុរសដែលមានមុខមាត់បានបះបោរប្រឆាំងម៉ូសេនិងតួនាទីដែលព្រះយេហូវ៉ាបានផ្ដល់ឲ្យគាត់។ ពួកគេបាននិយាយថា៖ «ពួកជំនុំទាំងមូលក៏បរិសុទ្ធ[មិនគ្រាន់តែម៉ូសេប៉ុណ្ណោះទេ] ហើយព្រះយេហូវ៉ាក៏នៅក្នុងចំណោមពួកគេដែរ»។ (ជប. ១៦:១-៣) ទោះជា«ពួកជំនុំទាំងមូល»គឺបរិសុទ្ធពិតមែនតាមទស្សនៈរបស់ព្រះក្ដី ព្រះយេហូវ៉ាបានជ្រើសរើសម៉ូសេឲ្យធ្វើជាអ្នកនាំមុខក្នុងចំណោមរាស្ត្ររបស់លោក។ (ជប. ១៦:២៨) តាមពិត ដោយរិះគន់ម៉ូសេ ពួកអ្នកបះបោរនោះក៏រិះគន់ព្រះយេហូវ៉ាដែរ។ ពួកគេមិនបានផ្ដោតអារម្មណ៍លើអ្វីដែលព្រះយេហូវ៉ាចង់បានទេ។ ផ្ទុយទៅវិញ ពួកគេបានផ្ដោតអារម្មណ៍លើអ្វីដែលពួកគេចង់បាន ពោលគឺអំណាចនិងមុខមាត់ច្រើនជាង។ ព្រះបានប្រហារពួកអ្នកនាំមុខក្នុងការបះបោរនោះ ព្រមទាំងពួកអ្នកគាំទ្រដែលមានចំនួនរាប់ពាន់នាក់ដែរ។ (ជប. ១៦:៣០-៣៥, ៤១, ៤៩) នៅសព្វថ្ងៃនេះ យើងអាចប្រាកដថា ព្រះយេហូវ៉ាមិនពេញចិត្តទេនឹងពួកអ្នកដែលមើលងាយការណែនាំពីអង្គការរបស់លោក។
បើអ្នកនៅទីនោះ តើអ្នកនឹងគាំទ្រអ្នកណា? (សូមមើលវគ្គ១១)
១២. ហេតុអ្វីយើងអាចរក្សាទំនុកចិត្តលើអង្គការព្រះយេហូវ៉ា?
១២ យើងអាចរក្សាទំនុកចិត្តរបស់យើងលើអង្គការរបស់ព្រះយេហូវ៉ា។ ពេលដឹងច្បាស់ថាត្រូវកែតម្រូវសេចក្ដីបង្រៀនណាមួយពីគម្ពីរឬរបៀបរៀបចំនៃកិច្ចការរាជាណាចក្រ ពួកអ្នកដែលនាំមុខមិនស្ទាក់ស្ទើរដើម្បីធ្វើការកែប្រែដែលចាំបាច់ទេ។ (សុភ. ៤:១៨) ពួកគេធ្វើដូច្នេះ ដោយសារពួកគេចង់ធ្វើឲ្យព្រះយេហូវ៉ាពេញចិត្តលើសជាងអ្វីណាទាំងអស់។ ពួកគេក៏ខំប្រឹងអស់ពីសមត្ថភាពដើម្បីធ្វើការសម្រេចចិត្តដោយផ្អែកលើបណ្ដាំរបស់ព្រះដែលជាគំរូដែលរាស្ត្ររបស់ព្រះយេហូវ៉ាទាំងអស់ត្រូវធ្វើតាម។
១៣. តើអ្វីជា«គំរូនៃពាក្យដែលមានប្រយោជន៍» ហើយតើយើងត្រូវធ្វើយ៉ាងណាចំពោះអ្វីនោះ?
១៣ «ចូរកាន់ខ្ជាប់គំរូនៃពាក្យដែលមានប្រយោជន៍»។ (២ធី. ១:១៣) «គំរូនៃពាក្យដែលមានប្រយោជន៍»សំដៅលើសេចក្ដីបង្រៀនរបស់គ្រិស្តសាសនិកដែលមាននៅក្នុងគម្ពីរ។ (យ៉ូន. ១៧:១៧) សេចក្ដីបង្រៀនទាំងនេះគឺជាមូលដ្ឋាននៃអ្វីទាំងអស់ដែលយើងជឿ។ អង្គការរបស់ព្រះយេហូវ៉ាបានបង្រៀនយើងឲ្យកាន់ខ្ជាប់តាមគំរូនោះ។ ដរាបណាយើងធ្វើដូច្នេះ ដរាបនោះយើងនឹងទទួលពរ។
១៤. ហេតុអ្វីគ្រិស្តសាសនិកខ្លះលែងកាន់ខ្ជាប់តាម«គំរូនៃពាក្យដែលមានប្រយោជន៍»?
១៤ តើអ្វីអាចកើតឡើងបើយើងឈប់កាន់ខ្ជាប់តាម«គំរូនៃពាក្យដែលមានប្រយោជន៍»? សូមពិចារណាឧទាហរណ៍មួយ។ នៅសតវត្សរ៍ទី១ គ្រិស្តសាសនិកខ្លះបាននិយាយតៗគ្នាថាថ្ងៃរបស់ព្រះយេហូវ៉ាបានមកដល់។ ប្រហែលជាមានសំបុត្រមួយដែលគេគិតថាប៉ូលបានសរសេរអំពីរឿងនេះ។ ដោយមិនបានលៃពេលដើម្បីរកមើលការពិត គ្រិស្តសាសនិកខ្លះនៅក្រុងថែស្សាឡូនិចបានជឿពាក្យចចាមអារ៉ាមនោះ ហើយថែមទាំងបានប្រាប់ដល់អ្នកឯទៀតទៀតផង។ ពួកគេនឹងមិនចាញ់បោកទេ បើពួកគេនឹកចាំអំពីអ្វីដែលប៉ូលបានបង្រៀនពួកគេពេលគាត់នៅជាមួយនឹងពួកគេ។ (២ថែ. ២:១-៥) ប៉ូលបានជូនយោបល់បងប្អូនមិនឲ្យឆាប់ជឿអ្វីទាំងអស់ដែលពួកគេបានឮ។ ម្យ៉ាងទៀត ដើម្បីជួយពួកគេទៅថ្ងៃក្រោយទៀត ប៉ូលបានបញ្ចប់សំបុត្រទី២របស់គាត់ទៅគ្រិស្តសាសនិកនៅក្រុងថែស្សាឡូនិចដោយពាក្យថា៖ «ខ្ញុំ ប៉ូល សរសេរពាក្យសួរសុខទុក្ខនេះដោយផ្ទាល់ដៃ នេះជាអក្សរដែលសម្គាល់គ្រប់សំបុត្រទាំងអស់របស់ខ្ញុំ។ នេះជារបៀបដែលខ្ញុំសរសេរ»។—២ថែ ៣:១៧
១៥. តើយើងអាចការពារខ្លួនពីពាក្យកុហកដែលមើលទៅដូចជាការពិតយ៉ាងដូចម្ដេច? សូមលើកឧទាហរណ៍មួយ។ (សូមមើលរូបភាពផងដែរ)
១៥ តើយើងរៀនអ្វីពីពាក្យរបស់ប៉ូលដែលបានសរសេរទៅកាន់គ្រិស្តសាសនិកនៅក្រុងថែស្សាឡូនិច? ពេលយើងឮអ្វីមួយដែលមិនស្របនឹងអ្វីដែលយើងបានរៀនពីគម្ពីរ ឬពេលយើងឮរឿងដ៏គួរឲ្យភ្ញាក់ផ្អើល យើងត្រូវប្រើសមត្ថភាពវែកញែក។ នៅអតីតសហភាពសូវៀត សត្រូវរបស់យើងធ្លាប់ផ្ញើសំបុត្រដល់បងប្អូនដែលមើលទៅមកពីមន្ទីរចាត់ការពិភពលោក។ សំបុត្រនោះបានលើកទឹកចិត្តបងប្អូនឲ្យញែកខ្លួន ហើយបង្កើតអង្គការថ្មីមួយ។ សំបុត្រនោះមើលទៅដូចជាសំបុត្រផ្លូវការពិតមែន។ ប៉ុន្តែ បងប្អូនដ៏ស្មោះត្រង់មិនបានចាញ់បោកទេ។ ពួកគេយល់ថាពាក្យនៅក្នុងសំបុត្រនោះមិនស្របនឹងអ្វីដែលពួកគេបានរៀនឡើយ។ នៅសព្វថ្ងៃនេះ ជួនកាលសត្រូវនៃសេចក្ដីពិតប្រើអ្វីដូចជាប្រព័ន្ធអ៊ីនធឺណិតនិងបណ្ដាញសង្គម ដើម្បីព្យាយាមបំភាន់និងបំបាក់បំបែកយើង។ ជាជាង«ឲ្យការវែកញែក[របស់យើង]ងាយរង្គោះរង្គើ» យើងអាចការពារខ្លួនដោយពិចារណាថាអ្វីដែលយើងឮឬអ្វីដែលយើងអានគឺស្របនឹងសេចក្ដីពិតដែលយើងបានរៀនរួចហើយឬយ៉ាងណា។—២ថែ. ២:២; ១យ៉ូន. ៤:១
សូមកុំចាញ់បោកការភូតភរដែលមើលទៅដូចជាការពិត (សូមមើលវគ្គ១៥) a
១៦. យោងទៅតាមរ៉ូម ១៦:១៧, ១៨ តើយើងគួរធ្វើអ្វីបើអ្នកខ្លះចែកចាយព័ត៌មានប្រឆាំងសេចក្ដីពិត?
១៦ ចូររក្សាសាមគ្គីភាពជាមួយនឹងពួកអ្នកដែលមានភក្ដីភាពចំពោះព្រះយេហូវ៉ា។ ព្រះចង់ឲ្យយើងមានសាមគ្គីភាពក្នុងការគោរពប្រណិប័តន៍របស់យើង។ យើងនឹងរក្សាសាមគ្គីភាពបាន ដរាបណាយើងកាន់ខ្ជាប់តាមសេចក្ដីពិត។ អ្នកណាដែលចែកចាយព័ត៌មានបង្ខុសសេចក្ដីពិតបណ្ដាលឲ្យបែកបាក់គ្នាក្នុងក្រុមជំនុំ។ ដូច្នេះ ព្រះព្រមានយើងឲ្យ«ជៀសចេញពីអ្នកទាំងនោះ»។ បើមិនដូច្នោះទេ យើងផ្ទាល់អាចបែរចេញពីសេចក្ដីពិត។—សូមអាន រ៉ូម ១៦:១៧, ១៨
១៧. តើការចេះសម្គាល់និងកាន់ខ្ជាប់តាមសេចក្ដីពិតយ៉ាងមុតមាំនាំឲ្យយើងទទួលប្រយោជន៍យ៉ាងណា?
១៧ ពេលយើងចេះសម្គាល់សេចក្ដីពិតនិងកាន់ខ្ជាប់សេចក្ដីពិតនោះយ៉ាងមុតមាំ នោះយើងនឹងនៅជិតស្និទ្ធជាមួយនឹងព្រះយេហូវ៉ា ហើយរក្សាជំនឿមាំមួន។ (អេភ. ៤:១៥, ១៦) យើងនឹងមិនចាញ់បោកការឃោសនានិងសេចក្ដីបង្រៀនមិនពិតរបស់សាថានទេ ហើយយើងនឹងបន្តនៅក្រោមការថែទាំរបស់ព្រះយេហូវ៉ាដោយមានសុវត្ថិភាពក្នុងអំឡុងគ្រាទុក្ខវេទនាជាខ្លាំង។ សូមកាន់ខ្ជាប់យ៉ាងមុតមាំនូវអ្វីដែលពិត «ហើយព្រះនៃសេចក្ដីសុខសាន្តនឹងនៅជាមួយនឹងអ្នក»។—ភី. ៤:៨, ៩
ចម្រៀងលេខ១២២ ចូរពង្រឹងជំហរឲ្យមាំមួនឡើង!
a ការពណ៌នាអំពីរូបភាព៖ ការសម្ដែងអំពីអ្វីដែលបានកើតឡើងច្រើនឆ្នាំមុន។ បងប្អូននៅសហភាពសូវៀតបានទទួលសំបុត្រដែលមើលទៅហាក់ដូចជាមកពីមន្ទីរចាត់ការពិភពលោក តែតាមការពិតគឺមកពីសត្រូវរបស់យើង។ នៅសព្វថ្ងៃនេះ សត្រូវរបស់យើងប្រហែលជាប្រើប្រព័ន្ធអ៊ីនធឺណិតដើម្បីចែកចាយព័ត៌មានមិនត្រឹមត្រូវអំពីអង្គការព្រះយេហូវ៉ា។
