អត្ថបទសិក្សា ៣០
ចម្រៀងលេខ៣៦ យើងការពារចិត្ត
មេរៀនសំខាន់ពីស្ដេចស្រុកអ៊ីស្រាអែល
«អ្នករាល់គ្នានឹងឃើញម្ដងទៀតនូវភាពខុសគ្នារវាងមនុស្សសុចរិតនិងមនុស្សទុច្ចរិត ហើយរវាងអ្នកដែលបម្រើព្រះនិងអ្នកដែលមិនបម្រើព្រះ»។—ម៉ាឡ. ៣:១៨
ចំណុចផ្ដោត
ការរៀនអំពីស្ដេចស្រុកអ៊ីស្រាអែលអាចជួយយើងឲ្យដឹងអំពីអ្វីដែលយើងត្រូវធ្វើនៅសព្វថ្ងៃនេះដើម្បីឲ្យព្រះយេហូវ៉ាពេញចិត្ត។
១-២. តើគម្ពីរប្រាប់យ៉ាងណាអំពីស្ដេចខ្លះនៃស្រុកអ៊ីស្រាអែល?
គម្ពីរបានរៀបរាប់អំពីបុរសជាង៤០នាក់ដែលគ្រប់គ្រងជាស្ដេចនៅស្រុកអ៊ីស្រាអែល។ a កំណត់ហេតុផ្សេងៗទាំងនោះបានរៀបរាប់ត្រង់ៗអំពីអ្វីខ្លះដែលស្ដេចទាំងនោះបានប្រព្រឹត្ត។ ជាឧទាហរណ៍ សូម្បីតែស្ដេចល្អក៏បានប្រព្រឹត្តអាក្រក់ខ្លះដែរ។ សូមគិតអំពីស្ដេចដាវីឌ។ ព្រះយេហូវ៉ាបានមានប្រសាសន៍ថា៖ «ដាវីឌអ្នកបម្រើខ្ញុំ . . . ដើរតាមខ្ញុំយ៉ាងស្មោះអស់ពីចិត្ត។ គាត់តែងតែប្រព្រឹត្តអ្វីដែលខ្ញុំពេញចិត្តជានិច្ច»។ (១បស. ១៤:៨) ប៉ុន្តែ គាត់បានប្រព្រឹត្តអំពើប្រាសចាកសីលធម៌ខាងផ្លូវភេទជាមួយស្ត្រីដែលមានប្ដី ហើយបានរៀបផែនការធ្វើឲ្យប្ដីរបស់ស្ត្រីនោះស្លាប់នៅក្នុងសង្គ្រាម។—២សាំ. ១១:៤, ១៤, ១៥
២ ផ្ទុយទៅវិញ ស្ដេចមិនស្មោះត្រង់ជាច្រើនរូបបានធ្វើល្អខ្លះ។ សូមគិតអំពីរេហូបោម។ តាមទស្សនៈរបស់ព្រះយេហូវ៉ា គាត់«បានប្រព្រឹត្តអំពើអាក្រក់»។ (២ប្រ. ១២:១៤) ប៉ុន្តែ រេហូបោមបានធ្វើល្អខ្លះដែរ។ ជាឧទាហរណ៍ គាត់បានស្ដាប់បង្គាប់ព្រះយេហូវ៉ាពេលលោកបានប្រាប់គាត់មិនឲ្យប្រយុទ្ធនឹងកុលសម្ព័ន្ធ១០នៃអ៊ីស្រាអែល ហើយបានទុកឲ្យពួកគេជ្រើសរើសស្ដេចមួយរូបទៀត។ គាត់ក៏បានផ្ដល់ប្រយោជន៍ដល់ប្រជាជាតិរបស់គាត់ដែរ ដោយពង្រឹងក្រុងនានា។—១បស. ១២:២១-២៤; ២ប្រ. ១១:៥-១២
៣. តើមានសំណួរសំខាន់អ្វី ហើយតើយើងនឹងពិចារណាអ្វីខ្លះក្នុងអត្ថបទនេះ?
៣ នេះនាំឲ្យមានសំណួរសំខាន់មួយថា បើស្ដេចនៃស្រុកអ៊ីស្រាអែលបានប្រព្រឹត្តទាំងល្អទាំងអាក្រក់ តើព្រះយេហូវ៉ាសម្រេចចិត្តយ៉ាងណាថាស្ដេចមួយណាស្មោះត្រង់ ហើយស្ដេចមួយណាមិនស្មោះត្រង់? ចម្លើយចំពោះសំណួរនេះនឹងជួយ យើងឲ្យយល់អំពីអ្វីដែលយើងត្រូវធ្វើដើម្បីឲ្យព្រះយេហូវ៉ាពេញចិត្ត។ យើងនឹងពិចារណាកត្តាបីយ៉ាងដែលព្រះយេហូវ៉ាទំនងជាបានយកមកថ្លឹងថ្លែងដើម្បីសម្រេចចិត្តថាស្ដេចស្រុកអ៊ីស្រាអែលណាគឺល្អឬអាក្រក់ ពោលគឺចិត្តរបស់ពួកគេ ការប្រែចិត្តរបស់ពួកគេ និងការកាន់ខ្ជាប់តាមការគោរពប្រណិប័តន៍ពិត។
ពួកគេមានចិត្តស្មោះចំពោះព្រះយេហូវ៉ា
៤. តើមានភាពខុសគ្នាអ្វីរវាងស្ដេចស្មោះត្រង់និងស្ដេចមិនស្មោះត្រង់?
៤ ស្ដេចដែលព្រះយេហូវ៉ាពេញចិត្ត បានគោរពប្រណិប័តន៍លោកដោយស្មោះអស់ពីចិត្ត។ b យេហូសាផាតដែលជាស្ដេចល្អបាន«ស្វែងរកព្រះយេហូវ៉ាយ៉ាងអស់ពីចិត្ត»។ (២ប្រ. ២២:៩) ម្យ៉ាងទៀត គម្ពីរចែងអំពីយ៉ូសៀសថា៖ «មុននោះ គ្មានស្ដេចណាដូចយ៉ូសៀស ដែលបានបែរមករកព្រះយេហូវ៉ា ដោយអស់ពីកម្លាំងកាយចិត្ត»។ (២បស. ២៣:២៥) ចុះយ៉ាងណាស្ដេចសាឡូម៉ូនដែលបានធ្វើខុសពេលគាត់មានវ័យចាស់? គម្ពីរថា គាត់«មិនស្មោះត្រង់ . . . ទាំងស្រុងទេ»។ (១បស. ១១:៤) ម្យ៉ាងវិញទៀត ស្ដីអំពីស្ដេចមិនស្មោះត្រង់មួយរូបទៀតគឺអាប៊ីយ៉ាម គម្ពីរចែងថា៖ «អាប៊ីយ៉ាមមិនស្មោះត្រង់ទាំងស្រុងចំពោះព្រះយេហូវ៉ា»។—១បស. ១៥:៣
៥. សូមពន្យល់អំពីអត្ថន័យនៃការបម្រើព្រះយេហូវ៉ាយ៉ាងស្មោះអស់ពីចិត្ត។
៥ តើការបម្រើព្រះយេហូវ៉ាយ៉ាងស្មោះអស់ពីចិត្តមានន័យយ៉ាងណា? បុគ្គលម្នាក់ដែលមានចិត្តស្មោះមិនគ្រាន់តែបម្រើព្រះដោយសារនោះជាអ្វីដែលគាត់គួរធ្វើប៉ុណ្ណោះទេ តែគាត់បម្រើព្រះយេហូវ៉ាដោយសារគាត់ស្រឡាញ់និងមានភក្ដីភាពចំពោះលោក ហើយគាត់បន្ដមានសេចក្ដីស្រឡាញ់និងភក្ដីភាពចំពោះលោកអស់មួយជីវិត។
៦. តើយើងអាចរក្សាចិត្តស្មោះយ៉ាងដូចម្ដេច? (សុភាសិត ៤:២៣; ម៉ាថាយ ៥:២៩, ៣០)
៦ តើយើងអាចយកតម្រាប់តាមស្ដេចស្មោះត្រង់និងបន្ដមានចិត្តស្មោះយ៉ាងដូចម្ដេច? គឺដោយជៀសវាងពីឥទ្ធិពលអាក្រក់។ ជាឧទាហរណ៍ ការកម្សាន្តមិនល្អ ការសេពគប់អាក្រក់ និងការគិតចង់ធ្វើជាអ្នកមាន អាចធ្វើឲ្យយើងមានចិត្តពីរ។ បើយើងកត់សម្គាល់ឃើញថាអ្វីណាមួយចាប់ផ្ដើមធ្វើឲ្យសេចក្ដីស្រឡាញ់របស់យើងចំពោះព្រះយេហូវ៉ាចុះខ្សោយ សូមចាត់វិធានការបំបាត់វាចោលភ្លាមៗ។—សូមអាន សុភាសិត ៤:២៣; ម៉ាថាយ ៥:២៩, ៣០
៧. ហេតុអ្វីគឺសំខាន់ឲ្យយើងជៀសវាងពីឥទ្ធិពលអាក្រក់?
៧ យើងមិនត្រូវបណ្ដោយឲ្យខ្លួនមានចិត្តពីរទេ។ បើយើងមិនប្រយ័ត្ន យើងអាចគិតថាដោយសារយើងជាប់រវល់បម្រើព្រះយេហូវ៉ា យើងនឹងមិនទទួលឥទ្ធិពលអាក្រក់ឡើយ។ ជាឧទាហរណ៍ សូមស្រមៃគិតថាអ្នកសម្អាតផ្ទះនៅថ្ងៃដែលមានខ្យល់បក់ដីហុយយ៉ាងខ្លាំង ហើយបន្ទាប់មក អ្នកបើកបង្អួចចោល។ បើដូច្នេះ ខ្យល់នឹងបក់ធូលីដីចូលក្នុងផ្ទះពេញ។ យើងអាចប្រដូចនេះទៅនឹងចំណងមិត្តភាពរបស់យើងជាមួយនឹងព្រះយេហូវ៉ា។ យើងមិនគ្រាន់តែត្រូវធ្វើអ្វីល្អៗដែលនាំឲ្យយើងចូលកាន់តែជិតព្រះយេហូវ៉ាប៉ុណ្ណោះទេ។ ដូចយើងមិនចង់ឲ្យខ្យល់កខ្វក់ចូលក្នុងផ្ទះរបស់យើង យើងត្រូវធ្វើឲ្យប្រាកដថាយើងមិនអនុញ្ញាតឲ្យអ្វីណាក៏ដោយចូលក្នុងចិត្តយើង ដែលអាចធ្វើឲ្យសេចក្ដីស្រឡាញ់របស់យើងចំពោះព្រះយេហូវ៉ាចុះខ្សោយ។—អេភ. ២:២
ពួកគេបានប្រែចិត្តពីអំពើខុសឆ្គង
៨-៩. តើស្ដេចដាវីឌនិងស្ដេចហេសេគាមានប្រតិកម្មយ៉ាងណាពេលដែលពួកគាត់ទទួលការកែតម្រង់? (សូមមើលរូបភាព)
៨ ដូចបានត្រូវរៀបរាប់នៅខាងលើ ស្ដេចដាវីឌបានប្រព្រឹត្តអំពើខុសឆ្គងធ្ងន់ធ្ងរ។ ប៉ុន្តែ ពេលអ្នកប្រកាសទំនាយណាថាន់បានប្រាប់គាត់ថាព្រះយេហូវ៉ាមានអារម្មណ៍យ៉ាងណាចំពោះអំពើខុសឆ្គងដែលគាត់បានប្រព្រឹត្ត ដាវីឌបានប្រែចិត្តដោយចិត្តរាបទាប។ (២សាំ. ១២:១៣) ពាក្យរបស់ដាវីឌដែលបានកត់ទុកនៅចម្រៀងសរសើរព្រះ ៥១ បង្ហាញថាគាត់បានសោកស្ដាយយ៉ាងខ្លាំងចំពោះអ្វីដែលគាត់បានធ្វើ។ ដាវីឌមិនបានធ្វើពុតជាសោកស្ដាយដើម្បីបោកណាថាន់ឬជៀសវាងពីការដាក់ទោសទេ។—ចសព. ៥១:៣, ៤, ១៧, ពាក្យផ្ដើម
៩ ស្ដេចហេសេគាក៏បានប្រព្រឹត្តខុសនឹងព្រះយេហូវ៉ាដែរ។ គម្ពីរចែងថា៖ «គាត់ចាប់ផ្ដើមមានអំណួត។ ហេតុនេះ ព្រះខឹងនឹងគាត់ ព្រមទាំងពួកយូដានិងអ្នកក្រុងយេរូសាឡិមផងដែរ»។ (២ប្រ. ៣២:២៥) ហេតុអ្វីហេសេគាចាប់ផ្ដើមមានអំណួត? ប្រហែលជាដោយសារព្រះយេហូវ៉ាបានឲ្យគាត់ក្លាយជាអ្នកមាន ជួយគាត់ឲ្យទទួលជ័យជម្នះលើជនជាតិអាស៊ីរី ឬធ្វើឲ្យគាត់ជាសះស្បើយពីជំងឺដែលអាចនាំឲ្យស្លាប់។ ម្យ៉ាងទៀត ប្រហែលជាដោយសារគាត់មានអំណួត ទើបគាត់បានបង្ហាញទ្រព្យសម្បត្តិដល់ពួកបាប៊ីឡូន ហើយនេះនាំឲ្យគាត់ទទួលការកែតម្រង់ពីអ្នកប្រកាសទំនាយអេសាយ។ (២បស. ២០:១២-១៨) ប៉ុន្តែដូចដាវីឌ ហេសេគាបង្ហាញចិត្តរាបទាបដោយប្រែចិត្ត។ (២ប្រ. ៣២:២៦) នៅទីបំផុត ព្រះយេហូវ៉ាចាត់ទុកគាត់ជាស្ដេចដែលស្មោះត្រង់ដែល«តែងតែប្រព្រឹត្តអ្វីដែលព្រះយេហូវ៉ាពេញចិត្ត»។—២បស. ១៨:៣
១០. តើស្ដេចអាម៉ាស៊ាមានប្រតិកម្មយ៉ាងណាពេលទទួលការកែតម្រង់?
១០ ខុសពីដាវីឌនិងហេសេគា ស្ដេចអាម៉ាស៊ានៃស្រុកយូដាបានធ្វើអ្វីដែលត្រឹមត្រូវ «តែមិនស្មោះអស់ពីចិត្តទេ»។ (២ប្រ. ២៥:២) តើគាត់បានធ្វើខុសអ្វី? ក្រោយពីព្រះយេហូវ៉ាបានជួយគាត់ឲ្យយកឈ្នះលើពួកអេដំ អាម៉ាស៊ាបានក្រាបគោរពចំពោះរូបព្រះរបស់ពួកគេ។ c ក្រោយមក ពេលអ្នកប្រកាសទំនាយរបស់ព្រះយេហូវ៉ាបាននិយាយជាមួយគាត់អំពីរឿងនេះ ស្ដេចនោះមិនចង់ស្ដាប់ទាល់តែសោះ ហើយបានដេញគាត់ចេញ។—២ប្រ. ២៥:១៤-១៦
១១. យោងទៅតាមកូរិនថូសទី២ ៧:៩, ១១ តើយើងត្រូវធ្វើអ្វីដើម្បីទទួលការអភ័យទោស? (សូមមើលរូបភាពផងដែរ)
១១ តើយើងរៀនអ្វីពីគំរូទាំងនេះ? យើងត្រូវប្រែចិត្តពីអំពើខុសឆ្គងរបស់យើង ហើយខំអស់ពីសមត្ថភាពដើម្បីជៀសវាងពីការធ្វើខុសដដែលៗ។ ចុះបើយើងទទួលឱវាទពីអ្នកចាស់ទុំក្នុងក្រុមជំនុំ ទោះជាយើងគិតថានោះមិនមែនជារឿងធ្ងន់ធ្ងរក្ដី? យើងមិនគួរមានអារម្មណ៍ថាព្រះយេហូវ៉ាមិនស្រឡាញ់យើង ឬថាអ្នកចាស់ទុំមិនចូលចិត្តយើងទេ។ សូម្បីតែស្ដេចដ៏ល្អនៃស្រុកអ៊ីស្រាអែល ក៏ត្រូវការឱវាទនិងការកែតម្រង់ដែរ។ (ហេ. ១២:៦) ពេលយើងទទួលការកែតម្រង់ យើងគួរ(១) ទទួលយកដោយចិត្តរាបទាប (២) ធ្វើការផ្លាស់ប្ដូរដែលចាំបាច់ និង(៣) បន្ដបម្រើព្រះយេហូវ៉ាឲ្យអស់ពីចិត្ត។ បើយើងប្រែចិត្តពីអំពើខុសឆ្គងរបស់យើង ព្រះយេហូវ៉ានឹងអភ័យទោសឲ្យយើង។—សូមអាន កូរិនថូសទី២ ៧:៩, ១១
ពួកគេកាន់ខ្ជាប់តាមការគោរពប្រណិប័តន៍ពិត
១២. តើស្ដេចស្មោះត្រង់និងស្ដេចមិនស្មោះត្រង់ខុសគ្នាយ៉ាងខ្លាំងត្រង់ចំណុចណា?
១២ ស្ដេចដែលព្រះយេហូវ៉ាចាត់ទុកថាស្មោះត្រង់ កាន់ខ្ជាប់តាមការគោរពប្រណិប័តន៍ពិត ហើយពួកគេក៏លើកទឹកចិត្តប្រជារាស្ត្ររបស់ពួកគេឲ្យធ្វើដូច្នេះដែរ។ ពិតមែនដូចដែលយើងបានរៀន ពួកគេបានធ្វើខុសផ្សេងៗ តែពួកគេមានភក្ដីភាពផ្ដាច់មុខចំពោះព្រះយេហូវ៉ា ហើយខំព្យាយាមបំបាត់ចោលរូបព្រះនៅក្នុងស្រុក។ d
១៣. ហេតុអ្វីព្រះយេហូវ៉ាវិនិច្ឆ័យស្ដេចអាហាប់ថាមិនស្មោះត្រង់?
១៣ ចុះយ៉ាងណាស្ដេចដែលព្រះយេហូវ៉ាបានវិនិច្ឆ័យថាមិនស្មោះត្រង់? ច្បាស់ជាមិនមែនអ្វីទាំងអស់ដែលពួកគេធ្វើគឺអាក្រក់ទេ។ សូម្បីតែអាហាប់ដែលជាស្ដេចទុច្ចរិតបានស្ដាយក្រោយនិងមានចិត្តរាបទាបមួយកម្រិតចំពោះការរួមចំណែកក្នុងការសម្លាប់ណាបោត។ (១បស. ២១:២៧-២៩) គាត់ក៏បានសង់ក្រុងផ្សេងៗនិងទទួលជ័យជម្នះយ៉ាងច្រើនឲ្យប្រជាជាតិអ៊ីស្រាអែលដែរ។ (១បស. ២០:២១, ២៩; ២២:៣៩) ប៉ុន្តែអាហាប់បានធ្វើអ្វីដ៏អាក្រក់យ៉ាងខ្លាំង។ ដោយទទួលឥទ្ធិពលពីប្រពន្ធរបស់គាត់ គាត់បានលើកស្ទួយការគោរពបូជារូបព្រះ។ គាត់មិនបានប្រែចិត្តចំពោះអំពើខុសឆ្គងនោះទេ។—១បស. ២១:២៥, ២៦
១៤. (ក) ហេតុអ្វីព្រះយេហូវ៉ាចាត់ទុកស្ដេចរេហូបោមថាមិនស្មោះត្រង់? (ខ) តើស្ដេចមិនស្មោះត្រង់ភាគច្រើនបានធ្វើខុសអ្វី?
១៤ សូមគិតអំពីស្ដេចមិនស្មោះត្រង់មួយរូបទៀត គឺរេហូបោម។ ដូចបានរៀបរាប់នៅខាងលើ គាត់បានធ្វើអ្វីល្អជាច្រើនក្នុងអំឡុងការគ្រប់គ្រងរបស់គាត់។ ប៉ុន្តែ ពេលអំណាចគ្រប់គ្រងរបស់គាត់ខ្លាំងក្លាឡើង គាត់បានឈប់ធ្វើតាមច្បាប់របស់ព្រះយេហូវ៉ា ហើយបានចាប់ផ្ដើមគោរពបូជាព្រះមិនពិត។ (២ប្រ. ១២:១) ក្រោយពីនោះ គាត់បានរេចុះរេឡើងចំពោះការគោរពប្រណិប័តន៍ គឺគាត់គោរពប្រណិប័តន៍ពិតផងនិងគោរពប្រណិប័តន៍មិនពិតផង។ (១បស. ១៤:២១-២៤) មិនមែនមានតែស្ដេចរេហូបោមនិងស្ដេចអាហាប់ប៉ុណ្ណោះទេ ដែលបានបែរចេញពីការគោរពប្រណិប័តន៍ព្រះយេហូវ៉ា។ តាមការពិតស្ដេចមិនស្មោះត្រង់ភាគច្រើនបានគោរពបូជាព្រះមិនពិត ហើយលើកទឹកចិត្តអ្នកឯទៀតឲ្យធ្វើដូច្នេះដែរ។ យើងឃើញច្បាស់ថាចំពោះព្រះយេហូវ៉ា ការកាន់ខ្ជាប់តាមការគោរពប្រណិប័តន៍ពិតគឺជាកត្ដាសំខាន់ដើម្បីបង្ហាញថាស្ដេចណាល្អនិងស្ដេចណាអាក្រក់។
១៥. ហេតុអ្វីការកាន់ខ្ជាប់តាមការគោរពប្រណិប័តន៍ពិតគឺជារឿងសំខាន់ចំពោះព្រះយេហូវ៉ា?
១៥ ហេតុអ្វីការគោរពប្រណិប័តន៍គឺជារឿងសំខាន់យ៉ាងខ្លាំងចំពោះព្រះយេហូវ៉ា? មូលហេតុមួយគឺដោយសារស្ដេចមានភារកិច្ចណែនាំរាស្ត្រព្រះក្នុងការគោរពប្រណិប័តន៍ពិត។ ម្យ៉ាងទៀត ពេលមនុស្សគោរពបូជាព្រះមិនពិត នេះធ្វើឲ្យពួកគេប្រព្រឹត្តអំពើខុសឆ្គងធ្ងន់ធ្ងរផ្សេងទៀត និងប្រព្រឹត្តយ៉ាងអាក្រក់លើអ្នកឯទៀត។ (ហូ. ៤:១, ២) បន្ថែមទៅទៀត ស្ដេចនៃស្រុកអ៊ីស្រាអែលនិងជនជាតិអ៊ីស្រាអែលបានប្រគល់ខ្លួនជូនព្រះយេហូវ៉ា។ ដូច្នេះ ពេលពួកគេមិនស្មោះត្រង់ចំពោះព្រះយេហូវ៉ា ហើយគោរពបូជាព្រះមិនពិត គម្ពីររៀបរាប់ថានេះហាក់ដូចជាពួកគេប្រព្រឹត្តអំពើផិតក្បត់។ (យេ. ៣:៨, ៩) បុគ្គលដែលប្រព្រឹត្តអំពើផិតក្បត់ ធ្វើឲ្យគូខ្លួនខ្ទេចខ្ទាំចិត្តយ៉ាង ខ្លាំង។ ស្រដៀងគ្នាដែរ អ្នកបម្រើដែលបានប្រគល់ខ្លួនជូនព្រះយេហូវ៉ារួចហើយ ដែលមិនរក្សាចិត្តស្មោះចំពោះលោកធ្វើឲ្យលោកឈឺចិត្តយ៉ាងខ្លាំង។ e—បច. ៤:២៣, ២៤
១៦. តាមទស្សនៈរបស់ព្រះយេហូវ៉ា តើអ្វីធ្វើឲ្យមនុស្សសុចរិតខុសពីមនុស្សទុច្ចរិត?
១៦ តើយើងអាចទាញមេរៀនអ្វី? យើងច្បាស់ជាត្រូវតាំងចិត្តជៀសវាងពីការគោរពប្រណិប័តន៍មិនពិត។ ប៉ុន្តែ យើងក៏ត្រូវកាន់ខ្ជាប់តាមការគោរពប្រណិប័តន៍ពិតនិងបន្ដជាប់រវល់ក្នុងកិច្ចបម្រើលោកដែរ។ អ្នកប្រកាសទំនាយម៉ាឡាគីបានពន្យល់យ៉ាងច្បាស់អំពីភាពខុសគ្នារវាងមនុស្សល្អនិងមនុស្សអាក្រក់។ គាត់បានសរសេរថា៖ «អ្នករាល់គ្នានឹងឃើញម្ដងទៀតនូវភាពខុសគ្នារវាងមនុស្សសុចរិតនិងមនុស្សទុច្ចរិត ហើយរវាងអ្នកដែលបម្រើព្រះនិងអ្នកដែលមិនបម្រើព្រះ»។ (ម៉ាឡ. ៣:១៨) ហេតុនេះ យើងមិនត្រូវអនុញ្ញាតឲ្យអ្វីណាក៏ដោយសូម្បីតែភាពមិនល្អឥតខ្ចោះនិងកំហុសរបស់យើង ធ្វើឲ្យយើងធ្លាក់ទឹកចិត្តរហូតដល់យើងឈប់បម្រើព្រះទេ។ ការឈប់បម្រើព្រះយេហូវ៉ាគឺជាអំពើខុសឆ្គងធ្ងន់ធ្ងរ។
១៧. ហេតុអ្វីយើងត្រូវប្រុងប្រយ័ត្នចំពោះការជ្រើសរើសគូអាពាហ៍ពិពាហ៍?
១៧ បើអ្នកនៅលីវ ហើយគិតអំពីការរៀបការ ពាក្យរបស់ម៉ាឡាគីអាចជួយអ្នកឲ្យជ្រើសរើសគូអាពាហ៍ពិពាហ៍ត្រឹមត្រូវ។ អ្នកប្រហែលជាឃើញថាបុគ្គលម្នាក់មានគុណសម្បត្តិខ្លះ ប៉ុន្តែបើបុគ្គលនោះមិនបម្រើព្រះយេហូវ៉ា តើលោកចាត់ទុកគាត់ជាបុគ្គលសុចរិតឬទេ? (២កូ. ៦:១៤) បើអ្នករៀបការជាមួយបុគ្គលនោះ តើគាត់នឹងជួយអ្នកឲ្យរក្សាភាពស្មោះត្រង់ចំពោះព្រះយេហូវ៉ាឬទេ? សូមគិតអំពីនេះ៖ ប្រពន្ធរបស់ស្ដេចសាឡូម៉ូនប្រហែលជាមានគុណសម្បត្តិខ្លះ ប៉ុន្តែពួកគេមិនមែនជាអ្នកគោរពប្រណិប័តន៍ព្រះយេហូវ៉ាទេ ហើយបន្តិចម្ដងៗពួកគេបានបង្វែរចិត្តសាឡូម៉ូនឲ្យគោរពបូជាព្រះមិនពិត។—១បស. ១១:១, ៤
១៨. តើឪពុកម្ដាយគួរបង្រៀនអ្វីដល់កូនរបស់ពួកគេ?
១៨ ឪពុកម្ដាយទាំងឡាយ អ្នកអាចប្រើកំណត់ហេតុផ្សេងៗ អំពីបណ្ដាស្ដេចក្នុងគម្ពីរដើម្បីជួយកូនឲ្យបណ្ដុះបំណងចិត្តបម្រើព្រះយេហូវ៉ា។ សូមជួយពួកគេឲ្យយល់ថាស្ដេចដែលព្រះយេហូវ៉ាពេញចិត្តគឺជាស្ដេចដែលគោរពប្រណិប័តន៍លោក ហើយលើកទឹកចិត្តបណ្ដាជនឲ្យគោរពប្រណិប័តន៍លោកដែរ។ សូមបង្រៀនកូនតាមរយៈពាក្យសម្ដីនិងគំរូរបស់អ្នកថារឿងដែលទាក់ទងនឹងការគោរពប្រណិប័តន៍ព្រះដូចជាសិក្សាគម្ពីរ ចូលរួមកិច្ចប្រជុំ និងផ្សព្វផ្សាយគឺជារឿងសំខាន់បំផុតក្នុងជីវិត។ (ម៉ាថ. ៦:៣៣) បើមិនធ្វើដូច្នោះទេ កូនរបស់អ្នកប្រហែលជាសន្និដ្ឋានថាការធ្វើជាសាក្សីព្រះយេហូវ៉ាគ្រាន់តែជាសាសនាឪពុកម្ដាយប៉ុណ្ណោះ។ ជាលទ្ធផលពួកគេប្រហែលជាចាត់ទុកការគោរពប្រណិប័តន៍ពិតថាជារឿងបន្ទាប់បន្សំ ឬក៏ឈប់បម្រើព្រះតែម្ដង។
១៩. តើមានសេចក្ដីសង្ឃឹមអ្វីចំពោះបុគ្គលដែលឈប់បម្រើព្រះយេហូវ៉ា? (សូមមើលផងដែរនូវប្រអប់ដែលមានចំណងជើងថា « អ្នកអាចត្រឡប់មកព្រះយេហូវ៉ាវិញ!»)
១៩ បើបុគ្គលម្នាក់បានឈប់បម្រើព្រះយេហូវ៉ា តើនេះមានន័យថាគ្មានសង្ឃឹមចំពោះគាត់ឬទេ? មិនមែនទេ ដោយសារគាត់អាចប្រែចិត្ត ហើយមកគោរពប្រណិប័តន៍ព្រះយេហូវ៉ាម្ដងទៀត។ ដើម្បីធ្វើដូច្នេះ គាត់ត្រូវមានចិត្តរាបទាប ហើយទទួលយកជំនួយពីអ្នកចាស់ទុំក្នុងក្រុមជំនុំ។ (យ៉ា. ៥:១៤) ការខំប្រឹងទៅជាមិត្តរបស់ព្រះយេហូវ៉ាម្ដងទៀតគឺនាំឲ្យទទួលប្រយោជន៍ច្រើនណាស់!
២០. បើយើងយកតម្រាប់តាមស្ដេចដ៏ស្មោះត្រង់ តើព្រះយេហូវ៉ានឹងមានទស្សនៈយ៉ាងណាចំពោះយើង?
២០ តើយើងបានទាញមេរៀនអ្វីពីស្ដេចស្រុកអ៊ីស្រាអែល? យើងអាចដូចជាស្ដេចស្មោះត្រង់ បើយើងរក្សាចិត្តស្មោះភក្ដីចំពោះព្រះយេហូវ៉ា។ សូមយើងរៀនពីកំហុសរបស់យើង ប្រែចិត្ត និងកែតម្រូវអ្វីដែលចាំបាច់។ ម្យ៉ាងទៀត សូមយើងចាំអំពីសារៈសំខាន់នៃការកាន់ខ្ជាប់តាមការគោរពប្រណិប័តន៍ព្រះពិតតែមួយ។ បើអ្នកបន្ដស្មោះត្រង់ចំពោះព្រះយេហូវ៉ា លោកនឹងចាត់ទុកអ្នកថាជាបុគ្គលដែលធ្វើអ្វីដែលលោកពេញចិត្ត។
ចម្រៀងលេខ៤៥ ការរំពឹងគិតក្នុងចិត្ត
a នៅក្នុងអត្ថបទនេះ ពាក្យ«ស្ដេចស្រុកអ៊ីស្រាអែល»សំដៅលើស្ដេចទាំងអស់ដែលគ្រប់គ្រងលើរាស្ត្ររបស់ព្រះយេហូវ៉ា មិនថាពួកគេគ្រប់គ្រងលើកុលសម្ព័ន្ធ២នៃរាជាណាចក្រយូដា កុលសម្ព័ន្ធ១០នៃរាជាណាចក្រអ៊ីស្រាអែល ឬកុលសម្ព័ន្ធទាំង១២។
b ការពន្យល់ពាក្យ៖ គម្ពីរច្រើនតែប្រើពាក្យ«ចិត្ត»ដើម្បីសំដៅលើធាតុពិតរបស់បុគ្គលម្នាក់។ នេះរួមបញ្ចូលអ្វីដែលយើងគិត បំណងប្រាថ្នា ចិត្តគំនិត និងបំណងចិត្តរបស់យើងចំពោះការធ្វើអ្វីមួយ ព្រមទាំងគោលដៅដែលយើងចង់សម្រេច។
c នៅសម័យនោះ ស្ដេចដែលមិនមែនជាជនជាតិអ៊ីស្រាអែលច្រើនតែគោរពបូជាព្រះរបស់ប្រជាជាតិដែលពួកគេបានវាយឈ្នះ។
d ស្ដេចអេសាបានប្រព្រឹត្តអំពើខុសឆ្គងធ្ងន់ធ្ងរផ្សេងៗ។ (២ប្រ. ១៦:៧, ១០) ប៉ុន្តែ គម្ពីរចែងថាគាត់បានធ្វើអ្វីដែលត្រឹមត្រូវតាមទស្សនៈរបស់ព្រះយេហូវ៉ា។ ទោះជាដំបូងគាត់មិនបានស្ដាប់តាមការកែតម្រង់ពីអ្នកប្រកាសទំនាយរបស់ព្រះយេហូវ៉ាក្ដី ប្រហែលជាក្រោយមកគាត់បានប្រែចិត្ត។ ព្រះយេហូវ៉ាឃើញចំណុចល្អរបស់គាត់ច្រើនជាងចំណុចមិនល្អ។ គួរឲ្យកត់សម្គាល់ អេសាបានគោរពប្រណិប័តន៍តែព្រះយេហូវ៉ាប៉ុណ្ណោះ ហើយព្យាយាមបំបាត់ចោលការគោរពបូជារូបព្រះក្នុងរាជាណាចក្ររបស់គាត់។—១បស. ១៥:១១-១៣; ២ប្រ. ១៤:២-៥
e គួរឲ្យកត់សម្គាល់ បញ្ញត្តិពីរដំបូងក្នុងច្បាប់ម៉ូសេបានហាមគោរពប្រណិប័តន៍អ្នកណាក៏ដោយឬអ្វីណាក៏ដោយ ក្រៅពីព្រះយេហូវ៉ា។—ដច. ២០:១-៦
f ការពណ៌នាអំពីរូបភាព៖ អ្នកចាស់ទុំវ័យក្មេងម្នាក់ប្រាប់អំពីការបារម្ភរបស់គាត់ចំពោះទម្លាប់ផឹកស្រារបស់បងប្រុសម្នាក់។ បងប្រុសម្នាក់នោះទទួលយកឱវាទនោះដោយចិត្តរាបទាប ធ្វើការផ្លាស់ប្ដូរដែលចាំបាច់ និងបន្ដបម្រើព្រះយេហូវ៉ាដោយស្មោះត្រង់។