អត្ថបទសិក្សា៣៧
ចូរពឹងផ្អែកទៅលើព្រះយេហូវ៉ាដូចសាំសុន
«ឱព្រះយេហូវ៉ាជាម្ចាស់ដ៏ឧត្ដមបំផុតអើយ សូមលោកមេត្តានឹកចាំខ្ញុំផង សូមលោកផ្ដល់កម្លាំងឲ្យខ្ញុំ»។—អសក. ១៦:២៨
ចម្រៀងលេខ៣០ បិតាខ្ញុំជាព្រះនិងជាមិត្តរបស់ខ្ញុំ
សេចក្ដីសង្ខេប a
១-២. ហេតុអ្វីយើងគួរចាប់អារម្មណ៍កំណត់ហេតុអំពីសាំសុន?
តើអ្នកគិតអំពីអ្វីពេលឮឈ្មោះសាំសុន? អ្នកទំនងជាគិតអំពីបុរសម្នាក់ដែលមានកម្លាំងដ៏ខ្លាំង។ គាត់គឺខ្លាំងមហិមាមែន។ ប៉ុន្តែ សាំសុនបានធ្វើការសម្រេចចិត្តមិនល្អមួយដែលនាំឲ្យគាត់រងទុក្ខយ៉ាងខ្លាំង។ ទោះជាយ៉ាងនេះក្ដី ព្រះយេហូវ៉ាបានផ្ដោតអារម្មណ៍ទៅលើអ្វីទាំងអស់ដែលសាំសុនបានធ្វើដើម្បីបម្រើលោក ហើយលោកបានដាក់បញ្ចូលគំរូដ៏ស្មោះត្រង់របស់គាត់ក្នុងគម្ពីរដើម្បីជាប្រយោជន៍ដល់យើង។
២ ព្រះយេហូវ៉ាបានប្រើសាំសុនឲ្យសម្រេចអ្វីដ៏អស្ចារ្យដើម្បីជួយរាស្ត្រដែលលោកបានជ្រើសរើស គឺអ៊ីស្រាអែល។ ច្រើនសតវត្សរ៍ក្រោយពីសាំសុនបានស្លាប់ ព្រះយេហូវ៉ាបានដឹកនាំសាវ័កប៉ូលឲ្យដាក់បញ្ចូលឈ្មោះសាំសុនក្នុងបញ្ជីមួយដែលរៀបរាប់អំពីបុរសដែលមានជំនឿមុតមាំ។ (ហេ. ១១:៣២-៣៤) គំរូរបស់សាំសុនអាចលើកទឹកចិត្តយើង។ គាត់បានពឹងផ្អែកលើព្រះយេហូវ៉ា ទោះជាក្នុងអំឡុងស្ថានភាពពិបាកក្ដី។ សូមយើងពិចារណាអំពីរបៀបដែលយើងអាចទទួលការលើកទឹកចិត្ត ព្រមទាំងទាញមេរៀនផ្សេងទៀតពីគំរូរបស់គាត់។
សាំសុនទុកចិត្តព្រះយេហូវ៉ា
៣. តើសាំសុនបានទទួលភារកិច្ចអ្វី?
៣ ពេលសាំសុនកើតមក ពួកភីលីស្ទីនកំពុងគ្រប់គ្រងលើប្រជាជាតិអ៊ីស្រាអែល និងសង្កត់សង្កិនពួកគេ។ (អសក. ១៣:១) ការគ្រប់គ្រងដ៏ឃោរឃៅរបស់ពួកភីលីស្ទីនបាននាំឲ្យមានទុក្ខវេទនាជាច្រើនដល់ជនជាតិអ៊ីស្រាអែល។ ព្រះយេហូវ៉ាបានជ្រើសរើសសាំសុនឲ្យ«ជួយសង្គ្រោះជនជាតិអ៊ីស្រាអែលឲ្យរួចពីកណ្ដាប់ដៃរបស់ពួកភីលីស្ទីន»។ (អសក. ១៣:៥) ប៉ុន្តែ នោះគឺជាភារកិច្ចពិបាកមួយ! ដើម្បីសម្រេចភារកិច្ចពិបាកនេះ សាំសុនត្រូវពឹងផ្អែកលើព្រះយេហូវ៉ា។
៤. តើព្រះយេហូវ៉ាបានជួយសាំសុនយ៉ាងដូចម្ដេចឲ្យរួចពីពួកភីលីស្ទីន? (អ្នកសម្រេចក្ដី ១៥:១៤-១៦)
៤ សូមគិតអំពីឧទាហរណ៍ដែលបង្ហាញអំពីរបៀបដែលសាំសុនបានទុកចិត្តព្រះយេហូវ៉ា និងពឹងផ្អែកលើលោកឲ្យគាំទ្រ។ នៅពេលមួយ កងទ័ពភីលីស្ទីនបានមកចាប់សាំសុននៅឯលេហ៊ី ដែលទំនងជានៅទឹកដីយូដា។ ពួកបុរសពីកុលសម្ព័ន្ធយូដាភ័យខ្លាច ដូច្នេះពួកគេសម្រេចចិត្តប្រគល់សាំសុនទៅឲ្យពួកសត្រូវ។ ជនរួមជាតិរបស់សាំសុនបានយកខ្សែពួរពីរមកចងគាត់ឲ្យតឹង ហើយនាំគាត់ទៅឯពួកភីលីស្ទីន។ (អសក. ១៥:៩-១៣) ប៉ុន្តែ«ឫទ្ធានុភាពរបស់ព្រះយេហូវ៉ាមានឥទ្ធិពលលើសាំសុន» ហើយគាត់បានរួចពីចំណងខ្សែពួរនោះ។ បន្ទាប់មក គាត់«ក្រឡេកទៅឃើញឆ្អឹងថ្គាមមួយរបស់សត្វលាដែលទើបនឹងស្លាប់» រួចគាត់យកឆ្អឹងថ្គាមនោះមកសម្លាប់ពួកបុរសភីលីស្ទីនអស់១.០០០នាក់!—សូមអាន អ្នកសម្រេចក្ដី ១៥:១៤-១៦
៥. តើការដែលសាំសុនប្រើឆ្អឹងថ្គាមរបស់សត្វលាបង្ហាញយ៉ាងដូចម្ដេចថាគាត់ទុកចិត្តព្រះយេហូវ៉ា?
៥ ឆ្អឹងថ្គាមរបស់សត្វលាមិនមែនជាអាវុធដើម្បីប្រយុទ្ធទេ។ បើដូច្នេះ ហេតុអ្វីសាំសុនប្រើវា? សាំសុនច្បាស់ជាដឹងថាភាពជោគជ័យរបស់គាត់អាស្រ័យលើព្រះយេហូវ៉ា មិនមែនអាវុធណាដែលគាត់ប្រើទេ។ ពិតមែន បុរសដ៏ស្មោះត្រង់នេះបានប្រើអ្វីដែលនៅជិតខ្លួនគាត់ដើម្បីសម្រេចបំណងប្រាថ្នារបស់ព្រះយេហូវ៉ា។ សាំសុនបានយកឈ្នះពួកបុរសទាំងអស់នោះ ដោយសារគាត់បានពឹងផ្អែកលើព្រះយេហូវ៉ា។
៦. ពេលបំពេញភារកិច្ចក្នុងកិច្ចបម្រើព្រះ តើយើងអាចរៀនអ្វីពីសាំសុន?
៦ យើងក៏អាចទទួលកម្លាំងពីព្រះយេហូវ៉ាដើម្បីសម្រេចភារកិច្ចរបស់យើង ទោះជាភារកិច្ចនោះមើលទៅពិបាកខ្លាំងក្ដី។ ព្រះអាចធ្វើដូច្នេះ តាមរបៀបមួយដែលប្រហែលជានាំឲ្យយើងកោតស្ងើច។ ចូរទុកចិត្តថាព្រះយេហូវ៉ាដែលបានផ្ដល់កម្លាំងឲ្យសាំសុននឹងជួយអ្នកឲ្យធ្វើតាមបំណងប្រាថ្នារបស់លោក ដរាបណាអ្នកពឹងផ្អែកលើលោកឲ្យជួយ។—សុភ. ១៦:៣
៧. តើអ្វីបង្ហាញថាគឺសំខាន់ឲ្យយើងស្វែងរកការណែនាំពីព្រះយេហូវ៉ា?
៧ បងប្អូនជាច្រើននាក់ដែលរួមចំណែកក្នុងកិច្ចការសាងសង់អគារសម្រាប់គោរពប្រណិប័តន៍បានបង្ហាញទំនុកចិត្តលើព្រះយេហូវ៉ា។ នៅអតីតកាល ជាធម្មតាបងប្អូនបានរចនាប្លង់ ហើយបានសង់សាលប្រជុំនិងអគារផ្សងទៀតភាគច្រើន របស់យើង។ ប៉ុន្តែដោយសារមានមនុស្សកាន់តែច្រើនបានទទួលការជ្រមុជទឹក អង្គការព្រះត្រូវធ្វើការផ្លាស់ប្ដូរ។ បងប្រុសៗដែលនាំមុខបានអធិដ្ឋានសុំការណែនាំពីព្រះយេហូវ៉ានិងបានសាកល្បងវិធីថ្មីៗ ដូចជាការទិញអគារនិងការកែលម្អអគារទាំងនោះ។ បងប្រុសរ៉ូបឺតដែលក្នុងប៉ុន្មានឆ្នាំថ្មីៗនេះបានចូលរួមកិច្ចការសាងសង់អគារជាច្រើនរបស់យើងនៅទូទាំងពិភពលោក និយាយថា៖ «នៅដើមដំបូងគឺមិនស្រួលឲ្យអ្នកខ្លះសម្របខ្លួនតាមវិធីថ្មីនោះទេ»។ គាត់បន្ដថា៖ «នោះគឺខុសគ្នាឆ្ងាយណាស់ពីអ្វីដែលយើងធ្លាប់ធ្វើអស់ជាច្រើនឆ្នាំ។ ប៉ុន្តែបងប្អូនសុខចិត្តសម្របខ្លួន ហើយគឺសឲ្យឃើញថាព្រះយេហូវ៉ាកំពុងឲ្យពរចំពោះការផ្លាស់ប្ដូរទាំងនោះ»។ នេះគ្រាន់តែជាឧទាហរណ៍មួយអំពីរបៀបដែលព្រះយេហូវ៉ាកំពុងដឹកនាំរាស្ត្រលោកឲ្យសម្រេចបំណងប្រាថ្នារបស់លោក។ ម្ដងម្កាល យើងទាំងអស់គ្នាគួរសួរខ្លួនថា ‹តើខ្ញុំកំពុងស្វែងរកការណែនាំពីព្រះយេហូវ៉ា ហើយបន្ដសម្របខ្លួនក្នុងកិច្ចបម្រើរបស់ខ្ញុំចំពោះលោកឬទេ?›។
សាំសុនប្រើអ្វីៗដែលព្រះយេហូវ៉ាផ្ដល់ឲ្យ
៨. នៅពេលមួយដែលសាំសុនស្រេកទឹកជាខ្លាំង តើគាត់បានធ្វើអ្វី?
៨ អ្នកប្រហែលជានឹកចាំអំពីអ្វីដ៏អស្ចារ្យផ្សេងទៀតដែលសាំសុនបានធ្វើ។ គាត់បានសម្លាប់សត្វតោមួយក្បាល ហើយក្រោយមកបានសម្លាប់ពួកភីលីស្ទីន៣០នាក់នៅក្រុងអាសកាឡូនតែម្នាក់ឯង។ (អសក. ១៤:៥, ៦, ១៩) សាំសុនដឹងថាគាត់មិនអាចធ្វើអ្វីបែបនេះដោយគ្មានជំនួយពីព្រះយេហូវ៉ាទេ។ នេះសឲ្យឃើញនៅពេលមួយដែលគាត់ស្រេកទឹកជាខ្លាំងក្រោយពីសម្លាប់ពួកភីលីស្ទីន១.០០០នាក់។ តើគាត់បានធ្វើអ្វី? ជាជាងពឹងផ្អែកលើខ្លួនឯងដើម្បីស្វែងរកទឹកផឹក គាត់បានស្រែកសុំជំនួយពីព្រះយេហូវ៉ា។—អសក. ១៥:១៨
៩. តើព្រះយេហូវ៉ាបានតបឆ្លើយយ៉ាងណាចំពោះការអង្វរសុំជំនួយរបស់សាំសុន? (អ្នកសម្រេចក្ដី ១៥:១៩)
៩ ព្រះយេហូវ៉ាបានតបឆ្លើយចំពោះការស្រែកសុំជំនួយរបស់សាំសុន ដោយធ្វើអព្ភូតហេតុផ្ដល់ទឹកឲ្យគាត់។ ពេលសាំសុនផឹកទឹកនោះ «គាត់ក៏មានកម្លាំងកំហែង និងមានស្មារតីឡើងវិញ»។ (សូមអាន អ្នកសម្រេចក្ដី ១៥:១៩) តាមមើលទៅ ប្រភពទឹកដែលថ្មីនោះនៅតែមានច្រើនឆ្នាំក្រោយមកពេលដែលអ្នកប្រកាសទំនាយសាំយូអែលបានត្រូវដឹកនាំឲ្យសរសេរសៀវភៅអ្នកសម្រេចក្ដី។ ទឹកដែលហូរនោះប្រហែលជាបានរំលឹកជនជាតិអ៊ីស្រាអែលថា បើពឹងផ្អែកព្រះយេហូវ៉ា លោកនឹងជួយពួកអ្នកគោរពប្រណិប័តន៍ដ៏ស្មោះត្រង់របស់លោកនៅពេលដែលពួកគេត្រូវការ។
១០. តើការស្វែងរកជំនួយពីព្រះយេហូវ៉ារួមបញ្ចូលអ្វីខ្លះ? (សូមមើលរូបភាពផងដែរ)
១០ យើងក៏ត្រូវស្វែងរកជំនួយពីព្រះយេហូវ៉ាដែរ មិនថាយើងមានទេពកោសល្យឬសមត្ថភាពអ្វី ឬយើងបានសម្រេចអ្វីក្នុងកិច្ចបម្រើលោកក៏ដោយ។ យើងគួរទទួលយកការពិតដោយចិត្តសុភាពថាការជោគជ័យពិតប្រាកដអាចកើតឡើងបាន លុះត្រាតែយើងពឹងផ្អែកទៅលើព្រះយេហូវ៉ា។ ដូចសាំសុនមានកម្លាំងកំហែងពេលគាត់ផឹកទឹកដែលព្រះយេហូវ៉ាឲ្យ យើងនឹងមានជំនឿរឹងមាំពេលដែលយើងប្រើអ្វីទាំងអស់ដែលព្រះយេហូវ៉ាផ្ដល់ឲ្យយើង។—ម៉ាថ. ១១:២៨
១១. តើយើងអាចពឹងផ្អែកទៅលើជំនួយពីព្រះយេហូវ៉ាយ៉ាងដូចម្ដេច ហើយតើប្ដីប្រពន្ធមួយគូបានធ្វើអ្វី?
១១ សូមគិតអំពីគំរូរបស់បងប្រុសអាឡិកសី ជាបងប្អូនម្នាក់របស់យើងនៅប្រទេសរុស្ស៊ីដែលកំពុងស៊ូទ្រាំនឹងការបៀតបៀនដ៏ខ្លាំង។ តើអ្វីបានជួយគាត់ឲ្យស៊ូទ្រាំនឹងស្ថានភាពដ៏ពិបាកណាស់? គាត់និងប្រពន្ធគាត់មានកាលវិភាគល្អក្នុងការសិក្សាគម្ពីរនិងក្នុងការគោរពប្រណិប័តន៍ព្រះ។ គាត់និយាយថា៖ «ខ្ញុំព្យាយាមធ្វើតាមកាលវិភាគរបស់ខ្ញុំអំពីការសិក្សាផ្ទាល់ខ្លួន និងការអានគម្ពីររាល់ថ្ងៃ។ រាល់ព្រឹក ខ្ញុំនិងប្រពន្ធខ្ញុំពិគ្រោះគ្នាអំពីបទគម្ពីរប្រចាំថ្ងៃ និងអធិដ្ឋានទៅព្រះយេហូវ៉ាជាមួយគ្នា»។ តើនេះបង្រៀនយើងយ៉ាងណា? ជាជាងពឹងផ្អែកលើខ្លួនឯង យើងគួរពឹងផ្អែកទៅលើព្រះយេហូវ៉ា។ តើតាមរបៀបណា? ដោយធ្វើអ្វីៗជាទៀងទាត់ដែលពង្រឹងជំនឿរបស់យើង ដូចជាសិក្សាគម្ពីរ អធិដ្ឋាន ចូលរួមកិច្ចប្រជុំ និងផ្សព្វផ្សាយ។ យ៉ាងនេះ ព្រះយេហូវ៉ានឹងផ្ដល់ជំនួយដែល យើងត្រូវការដើម្បីបន្ដបម្រើលោក។ ព្រះបានពង្រឹងកម្លាំងសាំសុន ហើយលោកច្បាស់ជាអាចពង្រឹងកម្លាំងយើងដែរ។
សាំសុនមិនបានឈប់ព្យាយាម
១២. តើសាំសុនបានធ្វើការសម្រេចចិត្តមិនល្អអ្វី ហើយតើនោះខុសគ្នាយ៉ាងណាពីបទពិសោធន៍របស់គាត់ពីមុន?
១២ សាំសុនជាមនុស្សមិនល្អឥតខ្ចោះដូចយើងដែរ ដូច្នេះជួនកាលគាត់បានធ្វើការសម្រេចចិត្តមិនល្អ។ ជាពិសេស ការសម្រេចចិត្តមួយរបស់គាត់បាននាំឲ្យមានផលពិបាកដ៏ខ្លោចផ្សា។ ក្រោយពីសាំសុនបានបម្រើជាអ្នកសម្រេចក្ដីអស់មួយរយៈ គាត់«ធ្លាក់ក្នុងអន្លង់ស្នេហ៍នារីម្នាក់ដែលរស់នៅជិតជ្រលងសូរេក។ នាងមានឈ្មោះថាដេលីឡា»។ (អសក. ១៦:៤) មុននោះ សាំសុនធ្លាប់ភ្ជាប់ពាក្យជាមួយនឹងស្ត្រីជនជាតិភីលីស្ទីនម្នាក់ ប៉ុន្តែនោះគឺជាការផ្សំផ្គុំ«មកពីព្រះយេហូវ៉ា»ក្នុងបំណង«រកឱកាសដើម្បីចាត់ការជនជាតិភីលីស្ទីន»។ ក្រោយមក សាំសុនបានស្នាក់នៅផ្ទះរបស់ស្ត្រីពេស្យាម្នាក់នៅក្រុងកាសា នាស្រុកភីលីស្ទីន។ នៅពេលនោះ ព្រះបានធ្វើឲ្យសាំសុនមានកម្លាំងខ្លាំងក្លាដើម្បីដកទ្វារកំពែងក្រុងចេញ ដែលធ្វើឲ្យក្រុងនោះងាយវាយលុក។ (អសក. ១៤:១-៤; ១៦:១-៣) ប៉ុន្តែដេលីឡាទំនងជាជនជាតិអ៊ីស្រាអែល ដូច្នេះចំណងស្នេហារបស់សាំសុនជាមួយនឹងនាងមិនផ្ដល់ឱកាសឲ្យប្រយុទ្ធនឹងពួកភីលីស្ទីនទេ។
១៣. តើដេលីឡាបានធ្វើអ្វីលើសាំសុន?
១៣ ដេលីឡាព្រមទទួលលុយជាច្រើនពីពួកភីលីស្ទីន ដើម្បីក្បត់នឹងសាំសុន។ ប្រហែលជាសាំសុនស្រឡាញ់នាងខ្លាំងណាស់បានជាគាត់មិនកត់សម្គាល់អ្វីដែលដេលីឡាចង់ធ្វើទេ។ ដេលីឡាបានបង្ខំសាំសុនម្ដងហើយម្ដងទៀតឲ្យប្រាប់នាងអំពីមូលហេតុដែលគាត់មានកម្លាំងខ្លាំងមហិមា ហើយទីបំផុតសាំសុនបានប្រាប់នាង។ គួរឲ្យស្ដាយ សាំសុនបានអនុញ្ញាតឲ្យខ្លួនគាត់ធ្លាក់ចូលក្នុងស្ថានភាពមួយដែលនាំឲ្យគាត់បាត់បង់កម្លាំង ហើយលែងទទួលការពេញចិត្តពីព្រះយេហូវ៉ាអស់មួយរយៈពេល។—អសក. ១៦:១៦-២០
១៤. តើសាំសុនបានរងផលពិបាកអ្វីដោយសារគាត់បានទុកចិត្តដេលីឡា?
១៤ សាំសុនបានរងទុក្ខលំបាកដោយសារគាត់ទុកចិត្តដេលីឡាជាជាងព្រះយេហូវ៉ា។ ពួកភីលីស្ទីនបានចាប់សាំសុន ហើយធ្វើឲ្យគាត់ខ្វាក់ភ្នែក។ គាត់បានត្រូវគេចាប់ដាក់គុកក្នុងក្រុងកាសា ជាក្រុងដែលគាត់ធ្លាប់ធ្វើឲ្យគេអាម៉ាស់មុខ ហើយគេឲ្យគាត់ធ្វើជាខ្ញុំបម្រើដែលបង្វិលត្បាល់កិនគ្រាប់ធញ្ញជាតិ។ បន្ទាប់មក ពួកភីលីស្ទីនបាននាំគាត់ទៅកន្លែងពិធីជប់លៀងមួយរបស់ពួកគេ។ នៅទីនោះ ពួកគេបានជូនគ្រឿងបូជាសន្ធឹកសន្ធាប់ដល់ដាកុនជាព្រះរបស់ពួកគេដែលជាព្រះមិនពិត ហាក់ដូចជាព្រះនោះបានប្រគល់សាំសុនមកក្នុងកណ្ដាប់ដៃរបស់ពួកគេ។ ពួកគេបាននាំសាំសុនចេញពីគុកទៅកន្លែងពិធីជប់លៀងដើម្បី«បានសើចសប្បាយ» ក្នុងបំណងសើចចំអកគាត់។—អសក. ១៦:២១-២៥
១៥. តើតាមរបៀបណាសាំសុនបានបង្ហាញថាគាត់ពឹងផ្អែកព្រះយេហូវ៉ាម្ដងទៀត? (អ្នកសម្រេចក្ដី ១៦:២៨-៣០) (សូមមើលរូបភាពនៅក្រប)
១៥ សាំសុនបានធ្វើខុសដ៏ធ្ងន់ធ្ងរ ប៉ុន្តែគាត់មិនឈប់ព្យាយាមទេ។ គាត់បានស្វែងរកឱកាសបំពេញភារកិច្ចដែលព្រះបានផ្ដល់ឲ្យដើម្បីប្រយុទ្ធនឹងពួកភីលីស្ទីន។ (សូមអាន អ្នកសម្រេចក្ដី ១៦:២៨-៣០) សាំសុនបានអង្វរព្រះយេហូវ៉ាថា៖ ‹សូមលោកឲ្យខ្ញុំសងសឹកពួកភីលីស្ទីន›។ ព្រះពិតបានតបឆ្លើយចំពោះការអង្វរសុំរបស់សាំសុន ហើយបានធ្វើឲ្យគាត់មានកម្លាំងដ៏ពិសេសឡើងវិញ។ ជាលទ្ធផល សាំសុនបានសម្លាប់ពួកភីលីស្ទីននៅលើកនេះច្រើនជាងគាត់ធ្លាប់សម្លាប់ពីមុន។
១៦. តើយើងអាចរៀនអ្វីពីកំហុសរបស់សាំសុន?
១៦ ទោះជាសាំសុនបានរងទុក្ខលំបាកដោយសារកំហុសរបស់គាត់ក្ដី គាត់មិនបានឈប់ព្យាយាមធ្វើតាមបំណងប្រាថ្នារបស់ព្រះយេហូវ៉ាទេ។ ទោះជាយើងធ្វើខុសនិងត្រូវកែតម្រង់ឬបាត់បង់ឯកសិទ្ធិណាមួយក្ដី យើងមិនត្រូវឈប់ព្យាយាមឡើយ។ សូមចាំថាព្រះយេហូវ៉ាបម្រុងតែនឹងអភ័យទោសឲ្យយើង។ (ចសព. ១០៣:៨-១០) មិនថាយើងធ្វើខុសក្ដី ព្រះយេហូវ៉ាអាចផ្ដល់កម្លាំងឲ្យយើងដើម្បីធ្វើតាមបំណងប្រាថ្នារបស់លោក ដូចលោកបានធ្វើចំពោះសាំសុន។
១៧-១៨. ហេតុអ្វីបទពិសោធន៍របស់បងម៉ៃឃឺលលើកទឹកចិត្តអ្នក? (សូមមើលរូបភាពផងដែរ)
១៧ សូមគិតអំពីគំរូរបស់បងប្រុសវ័យក្មេងម្នាក់ឈ្មោះម៉ៃឃឺល។ គាត់ជាប់រវល់ក្នុងកិច្ចបម្រើព្រះយេហូវ៉ា ដោយបម្រើជាជំនួយការខាងកិច្ចបម្រើ និងជាអ្នកត្រួសត្រាយពេញពេល។ ប៉ុន្តែគួរឲ្យស្ដាយ គាត់បានធ្វើខុសដែលនាំឲ្យគាត់បាត់បង់ឯកសិទ្ធិក្នុងក្រុមជំនុំ។ គាត់និយាយថា៖ «រហូតដល់ពេលនោះ ខ្ញុំជាប់រវល់ក្នុងកិច្ចបម្រើព្រះយេហូវ៉ា តែខ្ញុំស្រាប់តែមានអារម្មណ៍ហាក់ដូចជាខ្ញុំទាល់ច្រក។ ខ្ញុំមិនដែលគិតថាព្រះយេហូវ៉ានឹងបោះបង់ចោលខ្ញុំទេ ប៉ុន្តែខ្ញុំបានឆ្ងល់ថាតើចំណង មិត្តភាពរបស់ខ្ញុំជាមួយលោកនឹងមានដូចមុនម្ដងទៀតឬយ៉ាងណា ឬថាតើខ្ញុំនឹងអាចបម្រើលោកក្នុងក្រុមជំនុំឲ្យបានពេញលេញដូចដែលខ្ញុំធ្លាប់ធ្វើឬទេ?»។
១៨ គួរឲ្យសរសើរមែន បងម៉ៃឃឺលមិនបានឈប់ព្យាយាមទេ។ គាត់បន្ថែមថា៖ «ខ្ញុំបានផ្ដោតអារម្មណ៍ទៅលើការផ្សះផ្សាចំណងមិត្តភាពរបស់ខ្ញុំជាមួយព្រះយេហូវ៉ាដោយអធិដ្ឋានទៅលោកយ៉ាងអស់ពីចិត្ត សិក្សានិងរំពឹងគិតជារឿយៗ»។ យូរៗទៅ បងម៉ៃឃឺលបានទទួលឯកសិទ្ធិឡើងវិញក្នុងក្រុមជំនុំ។ ឥឡូវ គាត់បម្រើជាអ្នកចាស់ទុំនិងជាអ្នកត្រួសត្រាយពេញពេល។ គាត់និយាយថា៖ «ការគាំទ្រនិងការលើកទឹកចិត្តដែលខ្ញុំបានទទួល ជាពិសេសពីពួកអ្នកចាស់ទុំបានជួយខ្ញុំឲ្យទទួលស្គាល់ថាព្រះយេហូវ៉ានៅតែស្រឡាញ់ខ្ញុំ។ ខ្ញុំអាចបម្រើម្ដងទៀតក្នុងក្រុមជំនុំដោយមានសមត្ថភាពវិនិច្ឆ័យដែលមិនផ្ដន្ទាទោស។ បទពិសោធន៍នេះបានបង្រៀនខ្ញុំថា ព្រះយេហូវ៉ានឹងអភ័យទោសឲ្យអ្នកណាក៏ដោយដែលប្រែចិត្តយ៉ាងស្មោះ»។ យើងអាចមានទំនុកចិត្តថាព្រះយេហូវ៉ានឹងប្រើយើង និងឲ្យពរយើងផងដែរ ទោះជាយើងបានធ្វើខុសក្ដី ឲ្យតែយើងខំអស់ពីសមត្ថភាពដើម្បីកែតម្រង់ផ្លូវរបស់យើង ហើយបន្ដពឹងផ្អែកលើលោក។—ចសព. ៨៦:៥; សុភ. ២៨:១៣
១៩. តើគំរូរបស់សាំសុនបានពង្រឹងកម្លាំងអ្នកយ៉ាងដូចម្ដេច?
១៩ ក្នុងអត្ថបទនេះ យើងបានពិចារណាអំពីព្រឹត្តិការណ៍ដ៏គួរឲ្យរំភើបចិត្តមួយចំនួនដែលបានកើតឡើងក្នុងជីវិតរបស់សាំសុន។ គាត់មិនមែនជាមនុស្សល្អឥតខ្ចោះទេ ប៉ុន្តែគាត់មិនបានឈប់ព្យាយាមបម្រើព្រះយេហូវ៉ា ទោះជាក្រោយពីគាត់បានធ្វើខុសក្នុងរឿងដេលីឡាក្ដី។ ចំណែកព្រះយេហូវ៉ា លោកមិនបោះបង់ចោលសាំសុនទេ។ ព្រះបានប្រើសាំសុនម្ដងទៀតឲ្យសម្រេចការយ៉ាងធំ។ ព្រះយេហូវ៉ានៅតែចាត់ទុកគាត់ជាបុរសម្នាក់ដែលមានជំនឿមុតមាំ ដោយរួមបញ្ចូលគាត់ក្នុងបញ្ជីពួកអ្នកស្មោះត្រង់នៅក្នុងហេប្រឺ ជំពូក១១។ គួរឲ្យលើកទឹកចិត្តមែនដោយដឹងថាយើងបម្រើបិតានៅស្ថានសួគ៌ដែលប្រកបដោយសេចក្ដីស្រឡាញ់ដែលចង់ពង្រឹងកម្លាំងយើង ជាពិសេសពេលយើងខ្សោយ! ដូច្នេះដូចសាំសុន សូមយើងអង្វរសុំព្រះយេហូវ៉ាថា៖ «សូមលោកមេត្តានឹកចាំខ្ញុំផង សូមលោកផ្ដល់កម្លាំងឲ្យខ្ញុំ»។—អសក. ១៦:២៨
ចម្រៀងលេខ៣ ព្រះជាកម្លាំង ជាសេចក្ដីសង្ឃឹម និងជាទីពឹងរបស់យើង
a សាំសុនគឺជាឈ្មោះរបស់បុគ្គលក្នុងគម្ពីរដែលមនុស្សជាច្រើនស្គាល់ សូម្បីតែមនុស្សដែលមិនសូវមានចំណេះខាងគម្ពីរក៏ស្គាល់គាត់ដែរ។ រឿងរបស់គាត់បានត្រូវរៀបរាប់ក្នុងរឿងល្ខោន បទចម្រៀង និងភាពយន្ត។ ប៉ុន្តែ ជីវិតគាត់មិនគ្រាន់តែជារឿងដែលគួរឲ្យចាប់អារម្មណ៍ប៉ុណ្ណោះ តែក៏មានមេរៀនជាច្រើនដែលយើងអាចរៀនពីបុរសដែលមានជំនឿដ៏ខ្លាំងនេះ។