អត្ថបទសិក្សា ៣៦
ចម្រៀងលេខ៨៩ បើអ្នកស្ដាប់បង្គាប់ អ្នកនឹងទទួលពរបវរ
«ចូរអ្នករាល់គ្នាទៅជាអ្នកដែលប្រព្រឹត្តតាមបណ្ដាំរបស់ព្រះ»
‹ចូរអ្នករាល់គ្នាទៅជាអ្នកដែលប្រព្រឹត្តតាមបណ្ដាំរបស់ព្រះ ហើយកុំគ្រាន់តែឮ›។—យ៉ា. ១:២២
ចំណុចផ្ដោត
អត្ថបទនេះនឹងជួយយើងឲ្យមានបំណងចិត្តកាន់តែខ្លាំង មិនគ្រាន់តែដើម្បីអានបណ្ដាំរបស់ព្រះជារៀងរាល់ថ្ងៃប៉ុណ្ណោះទេ ប៉ុន្តែក៏នឹងជួយយើងឲ្យគិតនិងប្រព្រឹត្តតាមអ្វីដែលយើងបានអានយ៉ាងពេញលេញ។
១-២. ហេតុអ្វីអ្នកបម្រើរបស់ព្រះយេហូវ៉ាតែងតែមានសុភមង្គល? (យ៉ាកុប ១:២២-២៥)
ព្រះយេហូវ៉ានិងបុត្រជាទីស្រឡាញ់របស់លោកចង់ឲ្យយើងសប្បាយ។ អ្នកតែងចម្រៀងសរសើរព្រះ ១១៩:២និយាយថា៖ «មានសុភមង្គលហើយ អស់អ្នកដែលធ្វើតាមសេចក្ដីរំលឹករបស់លោក គឺអ្នកដែលស្វែងរកលោកយ៉ាងអស់ពីចិត្ត»។ លោកយេស៊ូក៏បានមានប្រសាសន៍ថា៖ «គឺអស់អ្នកដែលឮបណ្ដាំរបស់ព្រះ ហើយធ្វើតាម ទើបមានសុភមង្គល!»។—លូក. ១១:២៨
២ ក្នុងនាមជាអ្នកបម្រើរបស់ព្រះយេហូវ៉ា យើងតែងតែមានសុភមង្គល។ ហេតុអ្វី? មានមូលហេតុជាច្រើន។ មូលហេតុដ៏សំខាន់មួយគឺដោយសារយើងអានបណ្ដាំរបស់ព្រះជាទៀងទាត់ និងព្យាយាមប្រព្រឹត្តតាមអ្វីដែលយើងបានរៀន។—សូមអាន យ៉ាកុប ១:២២-២៥
៣. តើយើងទទួលប្រយោជន៍យ៉ាងណាពេលយើងធ្វើតាមអ្វីដែលយើងអានក្នុងបណ្ដាំរបស់ព្រះ?
៣ យើងទទួលប្រយោជន៍ជាច្រើនពេលយើង«ទៅជាអ្នកដែលប្រព្រឹត្តតាមបណ្ដាំរបស់ព្រះ»។ ជាឧទាហរណ៍ ពេលយើងធ្វើតាមអ្វីដែលយើងរៀនពីបណ្ដាំរបស់ព្រះ យើងធ្វើឲ្យព្រះយេហូវ៉ាពេញចិត្ត ហើយនោះធ្វើឲ្យយើងសប្បាយ។ (អទ. ១២:១៣) ពេលយើងធ្វើតាមអ្វីដែលយើងបានអានពីបណ្ដាំរបស់ព្រះ យើងធ្វើឲ្យក្រុមគ្រួសាររបស់យើងមានសុភមង្គលជាង ហើយចំណងមិត្តភាពរបស់យើងជាមួយបងប្អូនរួមជំនឿក៏កាន់តែរឹងមាំដែរ។ នោះទំនងជាបានកើតឡើងក្នុងជីវិតរបស់អ្នក។ ម្យ៉ាងទៀត យើងជៀសវាងពីបញ្ហាជាច្រើនដែលមនុស្សមិនស្ដាប់បង្គាប់ព្រះយេហូវ៉ាជួបប្រទះ។ យើងពិតជាយល់ស្របនឹងពាក្យរបស់ស្ដេចដាវីឌ។ ក្រោយពីគាត់បានលើកឡើងអំពីច្បាប់ សេចក្ដីបង្គាប់ និងសេចក្ដីវិនិច្ឆ័យរបស់ព្រះយេហូវ៉ា គាត់ក៏បានបន្ថែមថា៖ «អ្នកណាដែលបន្តធ្វើតាម អ្នកនោះនឹងបានរង្វាន់ដ៏ធំ»។—ចសព. ១៩:៧-១១
៤. ហេតុអ្វីការប្រព្រឹត្តតាមបណ្ដាំរបស់ព្រះមិនតែងតែស្រួល?
៤ តាមពិត មិនតែងតែស្រួលឲ្យយើងអានបណ្ដាំរបស់ព្រះនិងធ្វើតាមអ្វីដែលយើងបានរៀននោះទេ។ ទោះបីជាយើងរវល់នឹងកិច្ចការផ្សេងៗប្រចាំថ្ងៃក្ដី យើងត្រូវលៃទុកពេលដើម្បីអាននិងសិក្សាគម្ពីរ ដើម្បីយល់អំពីអ្វីដែលព្រះយេហូវ៉ាចង់ឲ្យយើងធ្វើ។ ដូច្នេះ សូមឲ្យយើងពិនិត្យមើលយោបល់ខ្លះៗដែលអាចជួយយើងឲ្យអានគម្ពីរជាទៀងទាត់។ យើងក៏នឹងពិចារណាចំណុចមួយចំនួនដែលនឹងជួយយើងឲ្យគិតអំពីអ្វីដែលយើងអាន ហើយឃើញរបៀបផ្សេងៗដែលយើងអាចធ្វើតាមអ្វីដែលយើងរៀនពីគម្ពីរ។
ចូរលៃទុកពេលអានបណ្ដាំរបស់ព្រះ
៥. តើយើងជាប់រវល់នឹងភារកិច្ចអ្វីខ្លះ?
៥ រាស្ត្ររបស់ព្រះយេហូវ៉ាភាគច្រើនគឺរវល់ណាស់។ យើងចំណាយពេលជាច្រើនដើម្បីបំពេញភារកិច្ចផ្សេងៗដែលគម្ពីរប្រាប់ថាសំខាន់។ ជាឧទាហរណ៍ យើងភាគច្រើនធ្វើការដើម្បីផ្គត់ផ្គង់ខ្លួននិងក្រុមគ្រួសារ។ (១ធី. ៥:៨) គ្រិស្តសាសនិកជាច្រើនត្រូវមើលថែសាច់ញាតិដែលឈឺឬដែលមានវ័យចាស់។ ម្យ៉ាងទៀត យើងទាំងអស់គ្នាត្រូវចំណាយពេលដើម្បីថែរក្សាសុខភាពរបស់យើង។ ក្រៅពីភារកិច្ចទាំងនេះ យើងក៏មានភារកិច្ចក្នុងក្រុមជំនុំដែរ។ ភារកិច្ចដ៏សំខាន់មួយគឺយើងខំអស់ពីសមត្ថភាពដើម្បីផ្សព្វផ្សាយដំណឹងល្អ។ ដោយសារអ្នកមានភារកិច្ចទាំងអស់នេះ តើតាមរបៀបណាអ្នកអាចលៃពេលដើម្បីអានគម្ពីរជាទៀតទាត់ រំពឹងគិតលើអ្វីដែលអ្នកអាន និងធ្វើតាមអ្វីដែលគម្ពីរចែង?
៦. តើតាមរបៀបណាអ្នកអាចធ្វើឲ្យប្រាកដថាអ្នកអានគម្ពីរ? (សូមមើលរូបភាពផងដែរ)
៦ ការអានគម្ពីរគឺជាអ្វីសំខាន់មួយក្នុងចំណោម«អ្វីដែលសំខាន់ជាង»ចំពោះយើងជាគ្រិស្តសាសនិក។ ដូច្នេះ យើងត្រូវចាត់ទុកថាការអានគម្ពីរជាអាទិភាព។ (ភី. ១:១០) ចម្រៀងសរសើព្រះ បទទី១ចែងអំពីមនុស្សដែលមានសុភមង្គលថា៖ «គាត់ស្រឡាញ់ច្បាប់របស់ព្រះយេហូវ៉ា គាត់រំពឹងគិតអំពីច្បាប់របស់លោកទាំងថ្ងៃទាំងយប់»។ (ចសព. ១:១, ២) នោះមានន័យថា យើងគួរចំណាយពេលអានគម្ពីរ។ តើពេលណាគឺជាពេលដ៏ល្អបំផុតដើម្បីអានគម្ពីរ? នេះគឺអាស្រ័យទៅលើយើងម្នាក់ៗ។ បើនិយាយឲ្យចំទៅ ពេលណាក៏បានដែលអ្នកគិតថា អ្នកអាចអានជាទៀងទាត់។ បងប្រុសម្នាក់ឈ្មោះវីកទ័រនិយាយថា៖ «ខ្ញុំចូលចិត្តអានគម្ពីរនៅពេលព្រឹក ទោះបីជាខ្ញុំមិនមែនជាមនុស្សដែលចូលចិត្តក្រោកពីព្រលឹមក្ដី។ ព្រោះនោះជាពេលវេលាដែលមិនសូវមានអ្វីមករំខានខ្ញុំ ហើយពេលនោះខួរក្បាលរបស់ខ្ញុំស្រឡះល្អ»។ ចុះយ៉ាងណាអ្នកវិញ? សូមសួរខ្លួនអ្នកថា ‹តើពេលណាគឺជាពេលល្អបំផុតសម្រាប់ខ្ញុំដើម្បីអានគម្ពីរ?›។
តើពេលណាជាពេលល្អបំផុតឲ្យអានគម្ពីរ? តើអ្នកអាចធ្វើដូច្នេះជាទៀងទាត់នៅពេលណា? (សូមមើលវគ្គ៦)
ចូរគិតអំពីអ្វីដែលអ្នកអាន
៧-៨. តើអ្វីប្រហែលជារារាំងយើងពីការទទួលប្រយោជន៍ច្រើនបំផុតពីអ្វីដែលយើងអាន? សូមលើកឧទាហរណ៍។
៧ តាមពិត យើងប្រហែលជាអានច្រើន តែព័ត៌មាននោះមិនសូវជ្រាបចូលក្នុងចិត្តរបស់យើង។ តើអ្នកធ្លាប់អានអ្វីមួយ ហើយក្រោយមកមិនសូវចាំអ្វីដែលអ្នកអានឬទេ? នេះបានកើតឡើងចំពោះយើងទាំងអស់គ្នា។ គួរឲ្យស្ដាយណាស់ នេះក៏អាចកើតឡើងពេលយើងអានគម្ពីរដែរ។ យើងប្រហែលជាកំណត់គោលដៅអានប៉ុន្មានជំពូកពីគម្ពីរជារៀងរាល់ថ្ងៃ។ នោះគឺគួរឲ្យសរសើរមែន។ យើងគួរកំណត់គោលដៅនិងព្យាយាមសម្រេចគោលដៅនោះ។ (១កូ. ៩:២៦) ប៉ុន្តែ យើងត្រូវធ្វើលើសពីការគ្រាន់តែអានគម្ពីរ បើយើងចង់ទទួលប្រយោជន៍ច្រើនបំផុត។
៨ សូមគិតអំពីឧទាហរណ៍នេះ។ រុក្ខជាតិត្រូវការទឹកដើម្បីរស់។ ប៉ុន្តែ បើភ្លៀងធ្លាក់មួយមេធំក្នុងរយៈពេលខ្លី ទឹកនឹងជន់ពេករហូតមិនអាចជ្រាបចូលក្នុងដីទេ។ យ៉ាងនេះ រុក្ខជាតិនឹងមិនអាចស្រូបយកទឹកបានឡើយ។ តាមធម្មតា ដីត្រូវការពេលដើម្បីស្រូបទឹកភ្លៀងដែលធ្លាក់មកតិចៗ ហើយផ្ដល់ជីវជាតិដល់រុក្ខជាតិ។ ស្រដៀងគ្នាដែរ យើងមិនគួរអានគម្ពីរលឿនពេក រហូតដល់យើងមិនមានពេលដើម្បីគិត ចងចាំ និងធ្វើតាមអ្វីដែលយើងអាន។—យ៉ា. ១:២៤
ដូចដីត្រូវការពេលឲ្យទឹកជ្រាបចូល យើងក៏ត្រូវការពេលដើម្បីរំពឹងគិតនិងធ្វើតាមអ្វីដែលយើងអានពីបណ្ដាំរបស់ព្រះ (សូមមើលវគ្គ៨)
៩. តើយើងគួរធ្វើអ្វីបើយើងឃើញថាយើងអានគម្ពីរលឿនៗ?
៩ តើអ្នកធ្លាប់អានគម្ពីរលឿនៗតែមិនបានគិតអំពីអត្ថន័យនៃអ្វីដែលអ្នកបានអានឬទេ? បើដូច្នោះ តើអ្នកគួរធ្វើអ្វី? សូមអានយឺតជាងឬទុកពេលខ្លះក្រោយពីអានចប់ ដើម្បីអ្នកអាចគិតអំពីអ្វីដែលអ្នកអាន។ ការធ្វើដូច្នេះមិនមែនជាអ្វីពិបាកទេ។ ជាឧទាហរណ៍ អ្នកប្រហែលជាសម្រេចចិត្តចំណាយពេលច្រើនជាងទៅលើការសិក្សា ដើម្បីអ្នកអាចមានពេលរំពឹងគិតទៅលើអ្វីដែលអ្នកអាន ឬអ្នកប្រហែលជាជ្រើសរើសអានប៉ុន្មានខ ហើយប្រើពេលវេលាដែលនៅសល់ដើម្បីគិតអំពីអ្វីដែលអ្នកបានអាន។ បងវីកទ័រដែលបានត្រូវរៀបរាប់នៅខាងលើនិយាយថា៖ «ពេលខ្ញុំអានគម្ពីរ ខ្ញុំមិនសូវអានច្រើនទេ ប្រហែលមួយជំពូកប៉ុណ្ណោះ។ ដោយសារខ្ញុំអានគម្ពីរនៅពេលព្រឹក ពេញមួយថ្ងៃខ្ញុំអាចបន្តគិតអំពីអ្វីដែលខ្ញុំបានអាន»។ មិនថាអ្នកប្រើវិធីណាក៏ដោយដើម្បីអានគម្ពីរ គឺសំខាន់ដែលអ្នកអានដោយមានល្បឿនល្មម ដើម្បីអ្នកអាចទទួលប្រយោជន៍ច្រើនបំផុតពីអ្វីដែលអ្នកអាន (សូមមើលប្រអប់ដែលមានចំណងជើងថា « សំណួរដែលអាចគិតពិចារណា»)។—ចសព. ១១៩:៩៧
១០. សូមលើកឧទាហរណ៍អំពីរបៀបដែលអ្នកអាចធ្វើតាមអ្វីដែលអ្នកអាន។ (ថែស្សាឡូនិចទី១ ៥:១៧, ១៨)
១០ មិនថាអ្នកអានគម្ពីរនៅពេលណាឬអានគម្ពីរយូរប៉ុណ្ណា សូមរកមើលរបៀបដែលអ្នកអាចធ្វើតាមអ្វីដែលអ្នកអាន។ ពេលអ្នកអានបណ្ដាំរបស់ព្រះ សូមសួរខ្លួនអ្នកថា ‹តើតាមរបៀបណាខ្ញុំអាចធ្វើតាមខគម្ពីរនេះនៅឥឡូវឬនៅថ្ងៃខាងមុខ?›។ ឧបមាថា អ្នកអានថែស្សាឡូនិចទី១ ៥:១៧, ១៨។ (សូមអាន) ក្រោយពីបានអានខទាំងពីរនេះអ្នកអាចផ្អាកបន្តិច ហើយគិតអំពីសេចក្ដីអធិដ្ឋានរបស់អ្នកថាអ្នកបានអធិដ្ឋានច្រើនប៉ុណ្ណានិងចេញពីចិត្តដល់កម្រិតណា។ អ្នកក៏អាចគិតអំពីអ្វីផ្សេងៗដែលធ្វើឲ្យអ្នកមានចិត្តកតញ្ញូ។ អ្នកប្រហែលជាសម្រេចចិត្តថានឹងអរគុណព្រះយេហូវ៉ាចំពោះអ្វីបីយ៉ាង។ សូម្បីតែអ្នកចំណាយពេលប៉ុន្មាននាទីប៉ុណ្ណោះដើម្បីគិតអំពីមេរៀនដែលអ្នករៀនពីគម្ពីរ នោះនឹងជួយអ្នកឲ្យទៅជាអ្នកដែលឮបណ្ដាំរបស់ព្រះ ហើយធ្វើតាមបណ្ដាំនោះ។ សូមគិតអំពីប្រយោជន៍ដែលអ្នកនឹងទទួលពីការរំពឹងគិតពេលអានគម្ពីរជារៀងរាល់ថ្ងៃ។ យ៉ាងនេះ អ្នកនឹងរីកចម្រើនជាអ្នកដែលប្រព្រឹត្តតាមបណ្ដាំរបស់ព្រះ។ ប៉ុន្តែ បើអ្នកឃើញថាមានអ្វីជាច្រើនដែលអ្នកត្រូវរីកចម្រើន តើអ្នកគួរធ្វើអ្វី?
ចូរកំណត់គោលដៅដែលសមហេតុសមផល
១១. ហេតុអ្វីជួនកាលអ្នកអាចមានអារម្មណ៍ធ្លាក់ទឹកចិត្ត? សូមលើកឧទាហរណ៍។
១១ ពេលអ្នកអានគម្ពីរ ហើយស្វែងរករបៀបដែលអ្នកអាចធ្វើតាមការណែនាំក្នុងគម្ពីរ ជួនកាលអ្នកប្រហែលជាមានអារម្មណ៍ធ្លាក់ទឹកចិត្ត ដោយសារអ្នកឃើញថាមានអ្វីជាច្រើនដែលអ្នកត្រូវរីកចម្រើន។ សូមគិតអំពីឧទាហរណ៍នេះ។ សូមស្រមៃគិតថា ថ្ងៃមួយអ្នកអានខគម្ពីរដែលមានយោបល់ឲ្យជៀសវាងប្រព្រឹត្តដោយលម្អៀងចំពោះអ្នកឯទៀត។ (យ៉ា. ២:១-៨) អ្នកឃើញថាអ្នកអាចរីកចម្រើនក្នុងការប្រព្រឹត្តចំពោះអ្នកឯទៀត ដូច្នេះអ្នកសម្រេចចិត្តធ្វើការផ្លាស់ប្ដូរខ្លះៗ។ នេះគឺល្អមែនទែន! ស្អែកឡើង អ្នកអានខគម្ពីរដែលបង្ហាញអំពីសារៈសំខាន់នៃការប្រុងប្រយ័ត្នអំពីអ្វីដែលអ្នកនិយាយ។ (យ៉ា. ៣:១-១២) អ្នកទទួលស្គាល់ថាពេលខ្លះអ្នកនិយាយអ្វីដែលមិនសប្បុរសឬដែលមិនលើកទឹកចិត្ត។ ដូច្នេះ អ្នកតាំងចិត្តព្យាយាមនិយាយពាក្យដែលលើកទឹកចិត្តជាង។ ខានស្អែក អ្នកអានក្នុងគម្ពីរអំពីការព្រមានមិនឲ្យធ្វើជាមិត្តរបស់ពិភពលោកនេះ។ (យ៉ា. ៤:៤-១២) អ្នកកត់សម្គាល់ថាអ្នកត្រូវប្រយ័ត្នច្រើនជាងអំពីការកម្សាន្តដែលអ្នកជ្រើសរើស។ ដូច្នេះ មកដល់ថ្ងៃទី៤ អ្នកប្រហែលជាមានអារម្មណ៍ថាមានអ្វីច្រើនពេកដែលខ្លួនត្រូវកែប្រែ។
១២. ហេតុអ្វីអ្នកមិនគួរធ្លាក់ទឹកចិត្តពេលអ្នកអានគម្ពីរ ហើយឃើញថាអ្នកត្រូវធ្វើការផ្លាស់ប្ដូរផ្សេងៗ? (សូមមើលកំណត់សម្គាល់ផងដែរ)
១២ បើអ្នកត្រូវរីកចម្រើនឬត្រូវធ្វើការផ្លាស់ប្ដូរផ្សេងៗ សូមកុំធ្លាក់ទឹកចិត្ត។ នេះបង្ហាញថាអ្នកមានចិត្តស្មោះ។ ពេលយើងអានគម្ពីរដោយមានចិត្តរាបទាប យើងនឹងស្វែងរករបៀបដែលយើងអាចរីកចម្រើន។ a សូមចាំដែរថាការបំពាក់«បុគ្គលិកលក្ខណៈថ្មី»ជាអ្វីដែលត្រូវបន្ដធ្វើជានិច្ច។ (កូឡ. ៣:១០) តើអ្វីនឹងជួយអ្នកឲ្យបន្តធ្វើជាអ្នកប្រព្រឹត្តតាមបណ្ដាំរបស់ព្រះ?
១៣. តើអ្នកអាចកំណត់គោលដៅមួយចំនួនយ៉ាងដូចម្ដេច? (សូមមើលរូបភាពផងដែរ)
១៣ ជាជាងព្យាយាមធ្វើអ្វីទាំងអស់ក្នុងពេលតែមួយ សូមកំណត់គោលដៅដែលសមហេតុសមផល។ (សុភ. ១១:២) សូមព្យាយាមធ្វើតាមយោបល់នេះ។ សូមសរសេរបញ្ជីអំពីអ្វីដែលអ្នកចង់រីកចម្រើន ហើយក្រោយមកជ្រើសរើសចំណុចមួយឬពីរដែលអ្នកត្រូវធ្វើមុនគេ ហើយទុកអ្វីផ្សេងទៀតនៅពេលក្រោយ។ ដូច្នេះ តើអ្នកគួរចាប់ផ្ដើមយ៉ាងដូចម្ដេច?
ជាជាងព្យាយាមសម្រេចអ្វីៗទាំងអស់ដែលអ្នកអានក្នុងគម្ពីរក្នុងពេលតែមួយ សូមកំណត់គោលដៅដែលសមហេតុសមផល។ ប្រហែលជាដោយផ្ដោតអារម្មណ៍លើចំណុចមួយឬពីរ។ (សូមមើលវគ្គ១៣-១៤)
១៤. តើអ្នកអាចចាប់ផ្ដើមពីគោលដៅអ្វីខ្លះ?
១៤ អ្នកប្រហែលជាសម្រេចចិត្តចាប់ផ្ដើមពីគោលដៅដែលងាយស្រួលជាងគេ ឬគោលដៅមួយដែលអ្នកត្រូវរីកចម្រើនខ្លាំងជាងគេ។ ពេលអ្នកបានសម្រេចចិត្តថាចង់សម្រេចគោលដៅណាមួយ សូមធ្វើការស្រាវជ្រាវដោយប្រើបណ្ណាល័យអ៊ីនធឺណិតរបស់ប៉មយាម ឬសៀវភៅជំនួយស្រាវជ្រាវសម្រាប់សាក្សីព្រះយេហូវ៉ា។ សូមអធិដ្ឋានអំពីគោលដៅរបស់អ្នកដោយសុំព្រះយេហូវ៉ា‹ឲ្យអ្នកមានបំណងប្រាថ្នានិងមានការប្រព្រឹត្ត›។ (ភី. ២:១៣) បន្ទាប់មកសូមព្យាយាមធ្វើតាមអ្វីដែលអ្នកបានរៀន។ ពេលអ្នកឃើញថាអ្នកអាចធ្វើការផ្លាស់ប្ដូរឬរីកចម្រើនក្នុងការបង្ហាញគុណសម្បត្តិជាគ្រិស្តសាសនិក អ្នកនឹងទទួលការលើកទឹកចិត្តឲ្យបន្តធ្វើការផ្លាស់ប្ដូរ ហើយអ្នកនឹងទំនងជាកាន់តែងាយស្រួលធ្វើការផ្លាស់ប្ដូរផ្សេងទៀត។
សូមឲ្យបណ្ដាំរបស់ព្រះ«មានឥទ្ធិពលទៅលើអ្នក»
១៥. តើរាស្ត្ររបស់ព្រះយេហូវ៉ាខុសគ្នាយ៉ាងណាពីមនុស្សជាច្រើនដែលអានគម្ពីរ? (ថែស្សាឡូនិចទី១ ២:១៣)
១៥ មនុស្សខ្លះបានអានគម្ពីរជាច្រើនដង ប៉ុន្តែតើពួកគេពិតជាជឿអ្វីដែលគម្ពីរបង្រៀនឬទេ? តើពួកគេព្យាយាមរស់នៅសមស្របតាមអ្វីដែលគម្ពីរបង្រៀន ហើយកែប្រែជីវិតរបស់ពួកគេឬទេ? គួរឲ្យស្ដាយណាស់ មនុស្សភាគច្រើនមិនធ្វើដូច្នោះទេ។ ប៉ុន្តែ រាស្ត្ររបស់ព្រះយេហូវ៉ាគឺខុសគ្នាឆ្ងាយណាស់ពីពួកគេ! ដូចគ្រិស្តសាសនិកនៅសតវត្សរ៍ទី១ យើងទទួលយកបណ្ដាំរបស់ព្រះ«តាមភាពពិតនៃបណ្ដាំនោះ»។ ម្យ៉ាងទៀត យើងខំអស់ពីសមត្ថភាពដើម្បីធ្វើតាមយោបល់ពីគម្ពីរក្នុងជីវិតរបស់យើង។—សូមអាន ថែស្សាឡូនិចទី១ ២:១៣
១៦. តើអ្វីអាចជួយយើងទៅជាអ្នកដែលប្រព្រឹត្តតាមបណ្ដាំរបស់ព្រះ?
១៦ គឺមិនតែងតែស្រួលឲ្យយើងអាននិងធ្វើតាមបណ្ដាំរបស់ព្រះទេ។ យើងប្រហែលជាពិបាកស្វែងរកពេលអានគម្ពីរ ឬយើងប្រហែលជាអានគម្ពីរលឿនពេក ហើយមិនបានគិតអំពីអ្វីដែលយើងអាន។ មួយវិញទៀត យើងប្រហែលជាធ្លាក់ទឹកចិត្តដោយសារយើងឃើញថាមានអ្វីជាច្រើនដែលយើងត្រូវកែប្រែ។ មិនថាអ្នកមានការពិបាកយ៉ាងណាក៏ដោយ ដោយមានជំនួយពីព្រះយេហូវ៉ាអ្នកអាចយកឈ្នះការពិបាកនោះបាន។ សូមតាំងចិត្តទទួលជំនួយពីលោក ហើយទៅជាអ្នកដែលប្រព្រឹត្តតាមបណ្ដាំរបស់ព្រះ មិនមែនជាអ្នកដែលឮ រួចភ្លេចទៅវិញទេ។ ច្បាស់ណាស់ កាលដែលយើងកាន់តែអានបណ្ដាំរបស់ព្រះ ហើយធ្វើតាមក្នុងជីវិតរបស់យើង យើងកាន់តែមានសុភមង្គល។—យ៉ា. ១:២៥
ចម្រៀងលេខ៩៤ ចូរថ្លែងអំណរគុណដល់ព្រះដែលបានឲ្យបណ្ដាំលោក
a សូមមើលវីដេអូដែលមានចំណងជើងថា ទស្សនៈពីមនុស្សស្រករប្អូន ការអានគម្ពីរ ក្នុងគេហទំព័រjw.org/km។
