អត្ថបទសិក្សា ៤២
ចម្រៀងលេខ១០៣ ពួកគង្វាលគឺអំណោយជាមនុស្ស
ចូរឲ្យតម្លៃ«អំណោយជាមនុស្ស»
«ពេលដែលលោកបានឡើងទៅឯទីខ្ពស់ . . . លោកបានឲ្យអំណោយជាមនុស្ស»។—អេភ. ៤:៨
ចំណុចផ្ដោត
របៀបដែលពួកអ្នកចាស់ទុំ ជំនួយការខាងកិច្ចបម្រើ និងអ្នកត្រួតពិនិត្យប្រចាំមណ្ឌលជួយយើង ព្រមទាំងរបៀបដែលយើងបង្ហាញថាយើងឲ្យតម្លៃចំពោះកិច្ចការរបស់ពួកគាត់។
១. តើលោកយេស៊ូបានផ្ដល់អំណោយអ្វីខ្លះដល់យើង?
គ្មានមនុស្សជាតិណាមានចិត្តទូលាយដូចលោកយេស៊ូទេ។ ហេតុអ្វីយើងអាចនិយាយដូច្នោះ? សូមគិតអំពីចំណុចដូចតទៅនេះ។ ពេលលោកយេស៊ូនៅផែនដី លោកមានឫទ្ធានុភាពដើម្បីធ្វើអព្ភូតហេតុ ហើយលោកតែងតែធ្វើអព្ភូតហេតុដើម្បីជួយអ្នកឯទៀត។ (លូក. ៩:១២-១៧) លោកក៏បានឲ្យអំណោយដ៏ធំធេងសម្រាប់យើងទាំងអស់គ្នា ពោលគឺជីវិតរបស់លោក។ (យ៉ូន. ១៥:១៣) សូម្បីតែក្រោយពីលោកយេស៊ូបានត្រូវប្រោសឲ្យរស់ឡើងវិញ ក៏លោកនៅតែបង្ហាញចិត្តទូលាយ គឺលោកបានសុំព្រះយេហូវ៉ាឲ្យផ្ដល់ឫទ្ធានុភាពបរិសុទ្ធដើម្បីបង្រៀននិងសម្រាលទុក្ខយើង ដូចដែលលោកបានសន្យា។ (យ៉ូន. ១៤:១៦, ១៧, កំ.ស.; ១៦:១៣) ម្យ៉ាងទៀត តាមរយៈកិច្ចប្រជុំក្រុមជំនុំ លោកយេស៊ូបង្ហាត់បង្រៀនយើង ដើម្បីយើងអាចជួយអ្នកឯទៀតនៅទូទាំងពិភពលោកឲ្យទៅជាអ្នកកាន់តាមលោក។—ម៉ាថ. ២៨:១៨-២០
២. យោងទៅតាមអេភេសូរ ៤:៧, ៨ តើ«អំណោយជាមនុស្ស»រួមបញ្ចូលអ្នកណាខ្លះ?
២ សូមគិតអំពីអំណោយផ្សេងទៀតដែលលោកយេស៊ូផ្ដល់ឲ្យយើង។ តើនោះជាអ្វី? ដូចសាវ័កប៉ូលបានសរសេរទុក អំណោយដែលលោកយេស៊ូបានផ្ដល់ឲ្យមុនលោកឡើងទៅស្ថានសួគ៌ គឺលោក«បានឲ្យអំណោយជាមនុស្ស»។ (សូមអាន អេភេសូរ ៤:៧, ៨) ប៉ូលក៏បានពន្យល់ថែមទៀតដែរថា អំណោយនេះគឺដើម្បីគាំទ្រក្រុមជំនុំ។ (អេភ. ១:២២, ២៣; ៤:១១-១៣) នៅសព្វថ្ងៃនេះ «អំណោយជាមនុស្ស»រួមមានជំនួយការខាងកិច្ចបម្រើ អ្នកចាស់ទុំ និងអ្នកត្រួតពិនិត្យប្រចាំមណ្ឌល។ a ពិតមែនថាពួកគេជាអំណោយដ៏ល្អ ប៉ុន្តែពួកគេមិនល្អឥតខ្ចោះ ហើយជួនកាលពួកគេអាចធ្វើខុស។ (យ៉ា. ៣:២) ទោះជាដូច្នោះក៏ដោយ លោកយេស៊ូបានប្រើពួកគេដើម្បីជួយយើង។ ពួកគេគឺជាអំណោយដ៏មានតម្លៃណាស់។
៣. សូមលើកឧទាហរណ៍អំពីរបៀបដែលយើងអាចគាំទ្រកិច្ចការរបស់ពួកអ្នកដែលជា«អំណោយជាមនុស្ស»។
៣ លោកយេស៊ូបានតែងតាំងបុរសទាំងនេះដើម្បីពង្រឹងក្រុមជំនុំ។ (អេភ. ៤:១២) ក៏ប៉ុន្តែ យើងទាំងអស់គ្នាក៏ត្រូវជួយគាំទ្រពួកគេឲ្យបំពេញភារកិច្ចនោះដែរ។ ជាឧទាហរណ៍ បងប្អូនខ្លះចូលរួមកិច្ចការសាងសង់សាលប្រជុំ ហើយបងប្អូនខ្លះទៀតគាំទ្រកិច្ចការនេះដោយផ្ដល់ម្ហូបអាហារ មធ្យោបាយធ្វើដំណើរ និងជួយតាមវិធីផ្សេងទៀត។ ម្យ៉ាងទៀត តាមរយៈពាក្យសម្ដីនិងការប្រព្រឹត្តរបស់យើង យើងទាំងអស់គ្នាអាចគាំទ្រជំនួយការខាងកិច្ចបម្រើ ពួកអ្នកចាស់ទុំ និងអ្នកត្រួតពិនិត្យប្រចាំមណ្ឌលឲ្យពួកគេពង្រឹងក្រុមជំនុំ។ ដើម្បីធ្វើដូច្នោះ សូមយើងពិចារណាអំពីរបៀបដែលយើងអាចទទួលប្រយោជន៍ពីអ្វីដែលពួកគេបានធ្វើ ហើយរបៀបដែលយើងអាចបង្ហាញអំណរគុណចំពោះលោកយេស៊ូផង និងចំពោះបុរសទាំងនោះផង។
ជំនួយការខាងកិច្ចបម្រើបំពេញ«កិច្ចការផ្ដល់ជំនួយ»
៤. នៅសតវត្សរ៍ទី១ តើជំនួយការខាងកិច្ចបម្រើធ្វើកិច្ចការអ្វីខ្លះ?
៤ នៅសតវត្សរ៍ទី១ បងប្អូនប្រុសខ្លះបានត្រូវតែងតាំងឲ្យធ្វើជាជំនួយការខាងកិច្ចបម្រើ។ (១ធី. ៣:៨) ពួកគេទំនងជាអ្នកដែលបំពេញ«កិច្ចការផ្ដល់ជំនួយ»ដែលប៉ូលបានលើកឡើងនៅកូរិនថូសទី១ ១២:២៨។ នៅសម័យនោះ ជំនួយការខាងកិច្ចបម្រើបំពេញកិច្ចការសំខាន់ៗ និងមានប្រយោជន៍ជាច្រើន។ ជាឧទាហរណ៍ ជំនួយការខាងកិច្ចបម្រើប្រហែលជាជួយចម្លងបទគម្ពីរ ឬទិញសម្ភារៈផ្សេងៗដែលត្រូវការដើម្បីចម្លងបទគម្ពីរ។ ដោយមានជំនួយពីពួកគេ អ្នកចាស់ទុំអាចផ្ដោតអារម្មណ៍លើការបង្រៀននិងការថែរក្សាបងប្អូនក្នុងក្រុមជំនុំ។
៥. នៅសព្វថ្ងៃនេះ តើជំនួយការខាងកិច្ចបម្រើធ្វើកិច្ចការអ្វីខ្លះ?
៥ សូមគិតអំពីកិច្ចការមួយចំនួនដែលជំនួយការខាងកិច្ចបម្រើធ្វើនៅក្នុងក្រុមជំនុំរបស់អ្នក។ (១ពេ. ៤:១០) ពួកគេប្រហែលជាទទួលភារកិច្ចឲ្យមើលការខុសត្រូវគណនីក្រុមជំនុំ រៀបចំផែនទីសម្រាប់ផ្សព្វផ្សាយ និងកុម្ម៉ង់សៀវភៅសម្រាប់ក្រុមជំនុំ។ បន្ថែមទៅទៀត ពួកគេក៏ជួយបញ្ជាឧបករណ៍សំឡេងនិងវីដេអូ បម្រើជាឆ្មាំ ឬជួយថែទាំសាលប្រជុំជាដើម។ ពេលពួកគេបំពេញកិច្ចការទាំងនេះ នោះបងប្អូនក្នុងក្រុមជំនុំងាយស្រួលផ្ចង់អារម្មណ៍លើប្រជុំ។ ម្យ៉ាងទៀត កិច្ចការរបស់ពួកគេក៏ជួយធ្វើឲ្យមានរបៀបរៀបរយក្នុងកិច្ចបម្រើផ្សាយ។ (១កូ. ១៤:៤០) ក្រៅពីកិច្ចការទាំងនេះ ជំនួយការខាងកិច្ចបម្រើខ្លះក៏មានផ្នែកនៅកិច្ចប្រជុំកិច្ចបម្រើនិងជីវិត និងថ្លែងសុន្ទរកថាសាធារណៈដែរ។ ជំនួយការខាងកិច្ចបម្រើក៏ប្រហែលជាបានត្រូវតែងតាំងឲ្យធ្វើជាជំនួយអ្នកត្រួតពិនិត្យក្រុមផ្សាយដែរ។ ជួនកាល អ្នកចាស់ទុំប្រហែលជាសុំជំនួយការខាងកិច្ចបម្រើដែលមានគុណសម្បត្តិគ្រប់គ្រាន់ឲ្យទៅសួរសុខទុក្ខបងប្អូនជាមួយគាត់ក្នុងនាមជាគង្វាល។
៦. តើបងប្អូនខ្លះបាននិយាយយ៉ាងណាអំពីអារម្មណ៍ពួកគេចំពោះកិច្ចការរបស់ជំនួយការខាងកិច្ចបម្រើ?
៦ តើបងប្អូនខ្លះបាននិយាយយ៉ាងណាអំពីអារម្មណ៍ពួកគេចំពោះកិច្ចការរបស់ជំនួយការខាងកិច្ចបម្រើ? បងស្រីម្នាក់ឈ្មោះបេបឺលី bពីប្រទេសបូលីវីនិយាយថា៖ «ដោយសារជំនួយការខាងកិច្ចបម្រើធ្វើកិច្ចការផ្សេងៗដើម្បីឲ្យកិច្ចប្រជុំដំណើរការយ៉ាងល្អ ខ្ញុំអាចច្រៀង ឆ្លើយ ស្ដាប់សុន្ទរកថា ហើយអាចមើលវីដេអូនិងរូបភាព។ ពួកគេជួយការពារសុវត្ថិភាពក្នុងអំឡុងកិច្ចប្រជុំ។ មួយវិញទៀត ពួកគេក៏ជួយបងប្អូនដែលមិនអាចចូលរួមកិច្ចប្រជុំដោយផ្ទាល់ដើម្បីមើលកិច្ចប្រជុំតាមប្រព័ន្ធវីដេអូពីផ្ទះ។ ក្រោយកិច្ចប្រជុំ ពួកគេនាំមុខក្នុងការសម្អាត ជួយផ្នែកគណនី ហើយផ្គត់ផ្គង់សៀវភៅដែលយើងត្រូវការ។ ខ្ញុំអរគុណពួកគេខ្លាំងណាស់!»។ បងស្រីលែសលីដែលរស់នៅប្រទេសកូឡុំប៊ី ហើយមានប្ដីជាអ្នកចាស់ទុំនិយាយថា៖ «ជំនួយការខាងកិច្ចបម្រើធ្វើកិច្ចការផ្សេងៗ បើគ្មានពួកគេទេ ប្ដីខ្ញុំមុខជារវល់ខ្លាំងណាស់។ ខ្ញុំពិតជាឲ្យតម្លៃចំពោះចិត្តខ្នះខ្នែង និងការសុខចិត្តជួយរបស់ជំនួយការខាងកិច្ចបម្រើ»។ អ្នកក៏ច្បាស់ជាមានអារម្មណ៍ដូចនេះដែរ។—១ធី. ៣:១៣
៧. តើយើងអាចបង្ហាញអំណរគុណចំពោះជំនួយការខាងកិច្ចបម្រើយ៉ាងដូចម្ដេច? (សូមមើលរូបភាពផងដែរ)
៧ យើងឲ្យតម្លៃចំពោះកិច្ចការរបស់ជំនួយការខាងកិច្ចបម្រើ។ ប៉ុន្តែ យើងមិនគ្រាន់តែមានអារម្មណ៍ដូច្នោះប៉ុណ្ណោះទេ យើងក៏«បង្ហាញអំណរគុណ»។ (កូឡ. ៣:១៥) អ្នកចាស់ទុំម្នាក់ឈ្មោះគ្រិសស្តុបនៅប្រទេសហ្វាំងឡង់ បានបង្ហាញអំណរគុណចំពោះជំនួយការខាងកិច្ចបម្រើតាមរបៀបនេះ។ គាត់និយាយថា៖ «ខ្ញុំសរសេរបទគម្ពីរមួយ និងចំណុចដែលខ្ញុំបានទទួលការលើកទឹកចិត្តពីអ្វីដែលជំនួយការខាងកិច្ចបម្រើណាម្នាក់បានធ្វើនិងនិយាយ ឬមូលហេតុដែលខ្ញុំឲ្យតម្លៃចំពោះកិច្ចការរបស់គាត់ នៅក្នុងកាតឬតាមរយៈការផ្ញើសារ»។ បងប្រុសប៉ាស្កាល់និងបងស្រីយ៉ាអែល ដែលរស់នៅប្រទេសនូវែលកាឡេដូនី ច្រើនតែអធិដ្ឋានឲ្យជំនួយការខាងកិច្ចបម្រើ។ បងប៉ាស្កាល់ពន្យល់ថា៖ «ថ្មីៗនេះ យើងច្រើនតែអធិដ្ឋានឲ្យបងប្អូនដែលបម្រើជាជំនួយការខាងកិច្ចបម្រើ។ យើងអរគុណព្រះយេហូវ៉ាដែលមានពួកគេ ហើយយើងសុំលោកឲ្យនៅជាមួយពួកគេនិងជួយពួកគេ»។ ព្រះយេហូវ៉ាស្ដាប់សេចក្ដីអធិដ្ឋានបែបនេះ ហើយនេះនាំឲ្យក្រុមជំនុំទាំងមូលទទួលប្រយោជន៍។—២កូ. ១:១១
អ្នកចាស់ទុំក្រុមជំនុំ«ខំធ្វើការយ៉ាងនឿយហត់ក្នុងចំណោមអ្នករាល់គ្នា»
៨. ហេតុអ្វីប៉ូលនិយាយថាអ្នកចាស់ទុំ«ខំធ្វើកិច្ចការយ៉ាងនឿយហត់»? (ថែស្សាឡូនិចទី១ ៥:១២, ១៣)
៨ អ្នកចាស់ទុំនៅសតវត្សរ៍ទី១ខំធ្វើការយ៉ាងនឿយហត់ដើម្បីក្រុមជំនុំ។ (សូមអាន ថែស្សាឡូនិចទី១ ៥:១២, ១៣; ១ធី. ៥:១៧) ពួកគេ«ដឹកនាំ»ក្រុមជំនុំ ដោយដឹកនាំកិច្ចប្រជុំ ហើយធ្វើការសម្រេចចិត្តជាក្រុមអ្នកចាស់ទុំ។ ពួកគេក៏«ដាស់តឿន»បងប្អូនរួមជំនឿដោយផ្ដល់យោបល់ចំៗតែដោយក្ដីស្រឡាញ់ដើម្បីការពារក្រុមជំនុំ។ (១ថែ. ២:១១, ១២; ២ធី. ៤:២) ម្យ៉ាងទៀត ពួកគេក៏ត្រូវផ្គត់ផ្គង់ក្រុមគ្រួសារនិងរក្សាចំណងចិត្តភាពរបស់ពួកគេជាមួយព្រះយេហូវ៉ាផងដែរ។—១ធី. ៣:២, ៤; ទីត. ១:៦-៩
៩. នៅសព្វថ្ងៃនេះ តើអ្នកចាស់ទុំមានភារកិច្ចអ្វីខ្លះ?
៩ អ្នកចាស់ទុំនៅសព្វថ្ងៃនេះពិតជារវល់ណាស់។ តើពួកគេមានភារកិច្ចអ្វីខ្លះ? ពួកគេជាអ្នកផ្សព្វផ្សាយដំណឹងល្អ។ (២ធី. ៤:៥) ពួកគេផ្សព្វផ្សាយយ៉ាងខ្នះខ្នែង ចាត់ចែងកិច្ចការក្នុងក្រុមជំនុំ ហើយបង្ហាត់បង្រៀនយើងអំពីរបៀបផ្សព្វផ្សាយនិងបង្រៀនយ៉ាងមានប្រសិទ្ធភាព។ ពួកគេក៏ជាអ្នកវិនិច្ឆ័យដែលមានសេចក្ដីមេត្តាករុណានិងមិនលម្អៀងដែរ។ ជាឧទាហរណ៍ ពេលមានគ្រិស្តសាសនិកណាម្នាក់ប្រព្រឹត្តអំពើខុសឆ្គងធ្ងន់ធ្ងរ អ្នកចាស់ទុំព្យាយាមជួយគាត់ឲ្យមានចំណងមិត្តភាពល្អឡើងវិញជាមួយព្រះយេហូវ៉ា។ ប៉ុន្តែទន្ទឹមនឹងនោះ អ្នកចាស់ទុំក៏ព្យាយាមរក្សាក្រុមជំនុំឲ្យមានភាពស្អាតស្អំ។ (១កូ. ៥:១២, ១៣; កាឡ. ៦:១) សំខាន់បំផុត ពួកអ្នកចាស់ទុំគឺជាគង្វាល។ (១ពេ. ៥:១-៣) ពួកគេថ្លែងសុន្ទរកថា ព្យាយាមស្គាល់បងប្អូនម្នាក់ៗក្នុងក្រុមជំនុំ និងទៅសួរសុខទុក្ខបងប្អូនក្នុងនាមជាគង្វាល។ អ្នកចាស់ទុំខ្លះក៏ជួយខាងកិច្ចការសាងសង់និងថែទាំសាលប្រជុំ រៀបចំមហាសន្និបាត បម្រើជាសមាជិកគណៈកម្មាធិការខាងសម្ព័ន្ធការពេទ្យ និងសមាជិកក្រុមដែលទទួលខុសត្រូវផ្នែកទៅជួបអ្នកជំងឺ ហើយក៏មានកិច្ចការផ្សេងទៀតជាច្រើនដែរ។ តើពួកអ្នកចាស់ទុំខំធ្វើកិច្ចការយ៉ាងនឿយហត់ទាំងនេះដើម្បីអ្នកណា? គឺដើម្បីយើង!
១០. ហេតុអ្វីយើងឲ្យតម្លៃពួកអ្នកចាស់ទុំ?
១០ ព្រះយេហូវ៉ាបានប្រាប់ទុកជាមុនថា ពួកគង្វាលនឹងថែរក្សាយើងយ៉ាងយកចិត្តទុកដាក់។ យ៉ាងនេះ យើងនឹង«លែងតក់ស្លុតឬភ័យខ្លាចទៀត»។ (យេ. ២៣:៤) បងស្រីម្នាក់ឈ្មោះយ៉ូហេណាពីប្រទេសហ្វាំងឡង់មានអារម្មណ៍ដូចនោះពេលម្ដាយរបស់គាត់ធ្លាក់ខ្លួនឈឺធ្ងន់។ គាត់រៀបរាប់ថា៖ «ទោះជាខ្ញុំជាមនុស្សពិបាកនិយាយអារម្មណ៍ តែអ្នកចាស់ទុំម្នាក់ដែលខ្ញុំមិនសូវជិតស្និទ្ធបានអត់ធ្មត់ស្ដាប់ខ្ញុំ អធិដ្ឋានឲ្យខ្ញុំ ហើយរំលឹកខ្ញុំអំពីសេចក្ដីស្រឡាញ់ដែលព្រះយេហូវ៉ាមានចំពោះខ្ញុំ។ ខ្ញុំមិនចាំអ្វីដែលអ្នកចាស់ទុំនោះនិយាយមកកាន់ខ្ញុំនៅពេលនោះទេ។ ប៉ុន្តែ ខ្ញុំចាំថាពេលនោះខ្ញុំមានចិត្តស្ងប់។ ខ្ញុំជឿជាក់ថាព្រះយេហូវ៉ាចាត់គាត់ឲ្យមកជួយលើកទឹកចិត្តខ្ញុំនៅពេលត្រឹមត្រូវ»។ តើពួកអ្នកចាស់ទុំក្នុងក្រុមជំនុំរបស់អ្នកបានជួយអ្នកយ៉ាងដូចម្ដេច?
១១. តើយើងអាចបង្ហាញចិត្តដឹងគុណចំពោះពួកអ្នកចាស់ទុំតាមវិធីណាខ្លះ? (សូមមើលរូបភាពផងដែរ)
១១ ព្រះយេហូវ៉ាចង់ឲ្យយើងបង្ហាញចិត្តដឹងគុណយ៉ាងស្មោះចំពោះពួកអ្នកចាស់ទុំ «ដោយសារកិច្ចការដែលពួកគាត់បានធ្វើ»។ (១ថែ. ៥:១២, ១៣) បងស្រីឈ្មោះហេនរីអេតាដែលរស់នៅប្រទេសហ្វាំងឡង់និយាយថា៖ «អ្នកចាស់ទុំសុខចិត្តជួយអ្នកឯទៀត មិនមែនដោយសារពួកគេមានពេលវេលានិងកម្លាំងច្រើនជាងយើងទេ ឬថាពួកគេគ្មានបញ្ហាក្នុងជីវិតឡើយ។ ជួនកាលខ្ញុំនិយាយទៅពួកគាត់ថា៖ ‹ខ្ញុំចង់ប្រាប់បងថា បងជាអ្នកចាស់ទុំល្អណាស់›»។ បងស្រីម្នាក់ឈ្មោះសេរ៉ាពីប្រទេសតួកគីនិយាយថា៖ «ពួកអ្នកចាស់ទុំត្រូវការការលើកទឹកចិត្តដើម្បីបន្តធ្វើកិច្ចការរបស់ពួកគាត់។ ដូច្នេះ យើងអាចសរសេរកាតឲ្យពួកគាត់ អញ្ជើញពួកគាត់មកញ៉ាំបាយ ឬទៅផ្សព្វផ្សាយជាមួយពួកគាត់»។ តើអ្នកនឹកឃើញអ្នកចាស់ទុំណាម្នាក់ដែលអ្នកចង់បង្ហាញចិត្តដឹងគុណឬទេ? សូមរកវិធីដើម្បីបង្ហាញចិត្តដឹងគុណគាត់។—១កូ. ១៦:១៨
អ្នកអាចលើកទឹកចិត្តពួកអ្នកដែលបានត្រូវតែងតាំងក្នុងអង្គការព្រះឲ្យបន្តធ្វើកិច្ចការរបស់ពួកគេ (សូមមើលវគ្គ៧, ១១, ១៥)
អ្នកត្រួតពិនិត្យប្រចាំមណ្ឌលពង្រឹងក្រុមជំនុំ
១២. នៅសតវត្សរ៍ទី១ តើមានការរៀបចំអ្វីដើម្បីពង្រឹងក្រុមជំនុំ? (ថែស្សាឡូនិចទី១ ២:៧, ៨)
១២ លោកយេស៊ូគ្រិស្តបានឲ្យ«អំណោយជាមនុស្ស»ដើម្បីជួយក្រុមជំនុំតាមរបៀបផ្សេងទៀត។ នៅសតវត្សរ៍ទី១ ក្រោមការដឹកនាំរបស់លោក ពួកអ្នកចាស់ទុំនៅក្រុងយេរូសាឡិមចាត់ប៉ូល បាណាបាស និងអ្នកឯទៀតឲ្យធ្វើជាអ្នកធ្វើដំណើរត្រួតពិនិត្យ។ (សកម្ម. ១១:២២) ហេតុអ្វី? មូលហេតុគឺដើម្បីពង្រឹងក្រុមជំនុំ ដូចជំនួយការខាងកិច្ចបម្រើ និងអ្នកចាស់ទុំធ្វើដែរ។ (សកម្ម. ១៥:៤០, ៤១) ដើម្បីធ្វើកិច្ចការនេះ បុរសទាំងនេះសុខចិត្តធ្វើការលះបង់ជាច្រើន ជួនកាលពួកគេថែមទាំងប្រថុយជីវិតដើម្បីបង្រៀននិងលើកទឹកចិត្តអ្នកឯទៀត។—សូមអាន ថែស្សាឡូនិចទី១ ២:៧, ៨
១៣. តើអ្នកត្រួតពិនិត្យប្រចាំមណ្ឌលមានភារកិច្ចអ្វីខ្លះ?
១៣ អ្នកត្រួតពិនិត្យប្រចាំមណ្ឌលត្រូវធ្វើដំណើរច្រើន។ អ្នកខ្លះត្រូវធ្វើដំណើររាប់រយគីឡូម៉ែត្រដើម្បីទៅទស្សនកិច្ចក្រុមជំនុំផ្សេងៗ។ រាល់សប្ដាហ៍ដែលមានទស្សនកិច្ច អ្នកត្រួតពិនិត្យប្រចាំមណ្ឌលថ្លែងសុន្ទរកថាជាច្រើនដង និងទៅសួរសុខទុក្ខបងប្អូនរួមជំនឿក្នុងនាមជាគង្វាល។ មួយវិញទៀត គាត់ក៏ដឹកនាំកិច្ចប្រជុំអ្នកត្រួសត្រាយ កិច្ចប្រជុំអ្នកចាស់ទុំ និងកិច្ចប្រជុំផ្សព្វផ្សាយដែរ។ ម្យ៉ាងទៀត គាត់រៀបចំសុន្ទរកថាផ្សេងៗនិងជួយចាត់ចែងសន្និបាតប្រចាំមណ្ឌលនិងមហាសន្និបាត។ គាត់ក៏បង្រៀនសាលាអ្នកត្រួសត្រាយ និងរៀបចំកិច្ចប្រជុំពិសេសជាមួយអ្នកត្រួសត្រាយនៅក្នុងមណ្ឌលរបស់គាត់។ ក្រៅពីកិច្ចការទាំងនេះ គាត់ក៏មានកិច្ចការសំខាន់ផ្សេងទៀតដែលការិយាល័យសាខាសុំឲ្យធ្វើ។ ជួនកាល នោះជាកិច្ចការបន្ទាន់។
១៤. ហេតុអ្វីយើងឲ្យតម្លៃអ្នកត្រួតពិនិត្យប្រចាំមណ្ឌលដែលខំធ្វើការយ៉ាងនឿយហត់?
១៤ តើក្រុមជំនុំទទួលប្រយោជន៍យ៉ាងណាពីកិច្ចការដ៏មានតម្លៃរបស់អ្នកត្រួតពិនិត្យប្រចាំមណ្ឌល? បងប្រុសម្នាក់នៅប្រទេសតួកគីរៀបរាប់អំពីអារម្មណ៍របស់គាត់ចំពោះទស្សនកិច្ចរបស់អ្នកធ្វើដំណើរត្រួតពិនិត្យ។ គាត់និយាយថា៖ «រាល់ទស្សនកិច្ចម្ដងៗ ជំរុញចិត្តខ្ញុំឲ្យចំណាយពេលច្រើនជាងដើម្បីជួយបងប្អូន។ ខ្ញុំបានជួបអ្នកត្រួតពិនិត្យប្រចាំមណ្ឌលជាច្រើននាក់ ប៉ុន្តែខ្ញុំមិនដែលមានអារម្មណ៍ថាអ្នកត្រួតពិនិត្យណាម្នាក់រវល់ពេកឬមិនចង់និយាយជាមួយខ្ញុំនោះទេ»។ រីឯបងយ៉ូហេណាដែលបានត្រូវរៀបរាប់នៅខាងលើបានទៅផ្សព្វផ្សាយជាមួយអ្នកត្រួតពិនិត្យប្រចាំមណ្ឌល តែពេលនោះពួកគាត់មិនបានជួបអ្នកណានៅផ្ទះសោះ។ បងយ៉ូហេណានិយាយថា៖ «ទោះជាមិនបានជួបអ្នកណានៅផ្ទះក៏ដោយ ខ្ញុំនឹងចងចាំថ្ងៃនោះទុក។ នៅថ្ងៃនោះខ្ញុំបានប្រាប់អ្នកត្រួតពិនិត្យប្រចាំមណ្ឌលថា បងស្រីពីរនាក់របស់ខ្ញុំទើបតែរើចេញ ហើយខ្ញុំនឹកពួកគាត់ខ្លាំងណាស់។ គាត់ក៏លើកទឹកចិត្តខ្ញុំយ៉ាងកក់ក្ដៅ ហើយជួយខ្ញុំឲ្យយល់ថា ឥឡូវយើងប្រហែលជាមិនអាចរស់នៅជួបជុំជាមួយក្រុមគ្រួសារនិងមិត្តភក្តិទេ តែនៅក្នុងពិភពលោកថ្មី យើងនឹងមានពេលជាមួយគ្នារហូត»។ យើងជាច្រើននាក់ក៏មានអនុស្សាវរីយ៍ល្អៗស្រដៀងនឹងនេះជាមួយអ្នកត្រួតពិនិត្យប្រចាំមណ្ឌលដែរ។—សកម្ម. ២០:៣៧–២១:១
១៥. (ក) យោងទៅតាមយ៉ូហានទី៣ ៥-៨ តើយើងអាចបង្ហាញចិត្តដឹងគុណចំពោះអ្នកត្រួតពិនិត្យប្រចាំមណ្ឌលតាមរបៀបណា? (សូមមើលរូបភាពផងដែរ) (ខ) ហេតុអ្វីយើងគួរបង្ហាញអំណរគុណចំពោះប្រពន្ធរបស់បងប្អូនប្រុសដែលខំធ្វើការយ៉ាងនឿយហត់ក្នុងក្រុមជំនុំ ហើយតើយើងអាចធ្វើដូច្នេះយ៉ាងដូចម្ដេច? (សូមមើលប្រអប់ដែលមានចំណងជើងថា « ចូរនឹកចាំប្រពន្ធរបស់ពួកគេ»)
១៥ សាវ័កយ៉ូហានលើកទឹកចិត្តកៃយុសឲ្យបង្ហាញចិត្តរាក់ទាក់ដល់បងប្អូនដែលមកពង្រឹងក្រុមជំនុំ ហើយគាត់បានសុំកៃយុសឲ្យ«ផ្គត់ផ្គង់ពួកគាត់ឲ្យសមត្រឹមត្រូវតាមទស្សនៈរបស់ព្រះ»។ (សូមអាន យ៉ូហានទី៣ ៥-៨) នៅសព្វថ្ងៃនេះ របៀបមួយដែលយើងអាចធ្វើដូច្នេះ គឺដោយអញ្ជើញអ្នកត្រួតពិនិត្យប្រចាំមណ្ឌលមកបរិភោគអាហារ។ របៀបមួយទៀតគឺដោយចូលរួមក្នុងកិច្ចបម្រើផ្សាយក្នុងអំឡុងទស្សនកិច្ចរបស់គាត់។ បងលែសលីដែលបានត្រូវរៀបរាប់នៅខាងលើបង្ហាញចិត្តដឹងគុណតាមរបៀបផ្សេងទៀត។ គាត់និយាយថា៖ «ខ្ញុំអធិដ្ឋានទៅព្រះយេហូវ៉ាសុំលោកឲ្យផ្គត់ផ្គង់អ្វីដែលពួកគាត់ត្រូវការ។ ខ្ញុំនិងប្ដីខ្ញុំក៏សរសេរសំបុត្រឲ្យពួកគាត់ ប្រាប់ពួកគាត់ថាការមកទស្សនកិច្ចរបស់ពួកគាត់ជួយយើងខ្លាំងណាស់»។ សូមចាំថាអ្នកត្រួតពិនិត្យប្រចាំមណ្ឌលក៏ជួបការពិបាកនិងចេះអស់កម្លាំងដូចយើងដែរ។ ជួនកាល ពួកគេធ្លាក់ខ្លួនឈឺ ខ្វល់ខ្វាយចិត្ត និងថែមទាំងធ្លាក់ទឹកចិត្តទៀតផង។ ប្រហែលជាពាក្យសម្ដីសប្បុរសឬអំណោយតិចតួចរបស់អ្នកជាចម្លើយចំពោះសេចក្ដីអធិដ្ឋានរបស់អ្នកត្រួតពិនិត្យប្រចាំមណ្ឌល!—សុភ. ១២:២៥
យើងត្រូវការ«អំណោយជាមនុស្ស»
១៦. យោងទៅតាមសុភាសិត ៣:២៧ តើបងប្អូនប្រុសអាចសួរខ្លួនសំណួរអ្វីខ្លះ?
១៦ នៅទូទាំងពិភពលោក យើងត្រូវការបងប្អូនប្រុសថែមទៀតឲ្យធ្វើជា«អំណោយជាមនុស្ស»។ បើអ្នកជាបងប្អូនប្រុសដែលទទួលការជ្រមុជទឹករួចហើយ តើអ្នក«មានកម្លាំងអាចជួយ»ឬទេ? (សូមអាន សុភាសិត ៣:២៧) តើអ្នកខំព្យាយាមដើម្បីទៅជាជំនួយការខាងកិច្ចបម្រើឬទេ? ចុះបើអ្នកជាជំនួយការខាងកិច្ចបម្រើរួចហើយ តើអ្នកព្យាយាមទៅជាអ្នកចាស់ទុំឬទេ? c តើអ្នកអាចធ្វើការកែប្រែក្នុងជីវិតដើម្បីអ្នកអាចដាក់ពាក្យចូលសាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះឬទេ? សាលានោះនឹងបង្ហាត់បង្រៀនអ្នក ហើយបើកឱកាសឲ្យអ្នកអាចបំពេញកិច្ចការច្រើនជាង។ បើអ្នកមានអារម្មណ៍ថាអ្នកមិនមានគុណសម្បត្តិគ្រប់គ្រាន់ដើម្បីធ្វើអ្វីទាំងនេះ សូមអធិដ្ឋានទៅព្រះយេហូវ៉ា។ សូមសុំឫទ្ធានុភាពបរិសុទ្ធពីលោកដើម្បីជួយអ្នកឲ្យបំពេញភារកិច្ចណាក៏ដោយដែលអ្នកទទួល។—លូក. ១១:១៣; សកម្ម. ២០:២៨
១៧. តើ«អំណោយជាមនុស្ស»បង្ហាញយ៉ាងណាអំពីលោកយេស៊ូគ្រិស្តដែលជាស្ដេចរបស់យើង?
១៧ បងប្អូនប្រុសដែលលោកយេស៊ូបានតែងតាំងឲ្យធ្វើជា«អំណោយជាមនុស្ស»គឺជាភ័ស្តុតាងដែលបង្ហាញថា លោកកំពុងនាំមុខយើងក្នុងអំឡុងគ្រាចុងក្រោយបង្អស់នេះ។ (ម៉ាថ. ២៨:២០) អ្នកច្បាស់ជាសប្បាយចិត្តដែលស្ដេចរបស់យើងជាបុគ្គលដែលពោរពេញដោយក្ដីស្រឡាញ់ សប្បុរស យកចិត្តទុកដាក់ និងផ្ដល់បងប្អូនប្រុសដែលមានគុណសម្បត្តិគ្រប់គ្រាន់ឲ្យផ្ដល់អ្វីដែលយើងត្រូវការ មែនទេ? ដូច្នេះ សូមរកវិធីដើម្បីបង្ហាញចិត្តដឹងគុណចំពោះបងប្អូនប្រុសដែលធ្វើការយ៉ាងនឿយហត់ទាំងនេះ។ សូមកុំភ្លេចអរគុណព្រះយេហូវ៉ា ដោយសារលោកផ្ដល់«គ្រប់ទាំងរបស់ល្អនិងអំណោយដ៏ល្អឥតខ្ចោះ»។—យ៉ា. ១:១៧
ចម្រៀងលេខ៩៩ បងប្អូនដ៏ច្រើនអនេករបស់យើង
a អំណោយជាមនុស្សទាំងនេះរួមបញ្ចូលសមាជិកគណៈអភិបាល ជំនួយការនៃគណៈអភិបាល សមាជិកគណៈកម្មាធិការការិយាល័យសាខា និងបងប្អូនប្រុសដែលមានភារកិច្ចផ្សេងទៀតក៏ជា«អំណោយជាមនុស្ស»ដែរ។
b ឈ្មោះខ្លះបានត្រូវផ្លាស់ប្ដូរ។
c ដើម្បីបានព័ត៌មានអំពីរបៀបមានគុណសម្បត្តិគ្រប់គ្រាន់ទៅជាជំនួយការខាងកិច្ចបម្រើឬអ្នកចាស់ទុំ សូមមើលអត្ថបទដែលមានចំណងជើងថា «បងប្អូនប្រុស តើអ្នកកំពុងព្យាយាមឲ្យបានមុខងារជាជំនួយការខាងកិច្ចបម្រើឬទេ?» និង«បងប្អូនប្រុស តើអ្នកកំពុងព្យាយាមបម្រើជាអ្នកចាស់ទុំឬទេ?» ក្នុងទស្សនាវដ្ដីប៉មយាម ខែវិច្ឆិកា ឆ្នាំ២០២៤។
