ចូរឲ្យរបៀបគិតគូររបស់ព្រះចំពោះស្រាដឹកនាំអ្នក
អ្នកច្បាស់ជាឲ្យតម្លៃចំពោះអំណោយផ្សេងៗពីព្រះយេហូវ៉ា រួមទាំងចិត្តសេរីរបស់អ្នកក្នុងការសម្រេចចិត្តអំពីរបៀបដែលអ្នកអាចប្រើអំណោយទាំងនេះ។ គួរឲ្យចាប់អារម្មណ៍ គម្ពីរចាត់ទុកស្រាជាអំណោយមួយពីព្រះ ហើយថែមទាំងចែងថា៖ «អាហារនាំឲ្យសើចសប្បាយ ហើយស្រាទំពាំងបាយជូរធ្វើឲ្យជីវិតរីករាយ»។ (អទ. ១០:១៩; ចសព. ១០៤:១៥) ប៉ុន្តែ អ្នកទំនងជាបានឃើញថាមនុស្សខ្លះមានបញ្ហាក្នុងការផឹកស្រា។ ម្យ៉ាងទៀត មានទស្សនៈខុសៗគ្នានៅទូទាំងពិភពលោកអំពីការពិសាស្រា។ ដូច្នេះ តើអ្វីអាចជួយគ្រិស្តសាសនិកឲ្យធ្វើការសម្រេចចិត្តឈ្លាសវៃស្ដីអំពីការពិសាស្រា?
មិនថាយើងរស់នៅកន្លែងណាឬបានត្រូវធំឡើងក្នុងវប្បធម៌បែបណាក្ដី ការឲ្យរបៀបគិតគូររបស់ព្រះដឹកនាំរបៀបគិតគូរនិងការសម្រេចចិត្តរបស់យើង នឹងពិតជាផ្ដល់ប្រយោជន៍ដល់យើងជាយូរអង្វែង។
ដូចដែលអ្នកទំនងជាបានកត់សម្គាល់ មនុស្សជាច្រើនក្នុងពិភពលោកផឹកស្រាជារឿយៗនិងហួសប្រមាណ។ អ្នកខ្លះប្រហែលជាផឹកស្រាដោយសារនោះធ្វើឲ្យពួកគេល្ហើយចិត្ត។ អ្នកឯទៀតផឹកស្រាដើម្បីបំភ្លេចទុក្ខកង្វល់។ នៅកន្លែងខ្លះ មនុស្សគិតថាបុគ្គលដែលផឹកស្រាច្រើន គឺជាមនុស្សទាន់សម័យឬជាបុរសពិត។
ក៏ប៉ុន្តែ គ្រិស្តសាសនិកបានទទួលការណែនាំដ៏ឈ្លាសវៃពីអ្នកបង្កើតដែលប្រកបដោយសេចក្ដីស្រឡាញ់។ ជាឧទាហរណ៍ ព្រះយេហូវ៉ាបានពន្យល់ប្រាប់អំពីលទ្ធផលដ៏ខ្លោចផ្សាពីការផឹកស្រាហួសប្រមាណ។ យើងប្រហែលជាបានអានសុភាសិត ២៣:២៩-៣៥ ដែលរៀបរាប់អំពីមនុស្សស្រវឹងស្រានិងបញ្ហាខ្លះដែលមកពីអំពើនោះ។ a បងប្រុសដានីយ៉ែលដែលជាអ្នកចាស់ទុំនៅទ្វីបអឺរ៉ុប បាននឹកចាំអំពីជីវិតរបស់គាត់នៅអតីតកាល មុនពេលគាត់ទៅជាគ្រិស្តសាសនិកពិត។ គាត់និយាយថា៖ «ការផឹកស្រាហួសប្រមាណបាននាំឲ្យខ្ញុំធ្វើការសម្រេចចិត្តមិនល្អ ហើយមានបទពិសោធន៍ដ៏ឈឺចាប់ដែលបានបន្សល់ទុកឲ្យខ្ញុំនូវរបួសផ្លូវចិត្ត»។
តើគ្រិស្តសាសនិកអាចប្រើចិត្តសេរី និងជៀសវាងពីបញ្ហាដែលអាចកើតឡើងដោយសារការផឹកស្រាហួសប្រមាណយ៉ាងដូចម្ដេច? អ្វីដែលសំខាន់គឺឲ្យទស្សនៈរបស់ព្រះណែនាំរបៀបគិតគូរនិងការប្រព្រឹត្តរបស់យើង។
សូមយើងពិនិត្យពិចារណាអំពីអ្វីដែលគម្ពីរចែងអំពីស្រានិងបំណងចិត្តរបស់បុគ្គលខ្លះចំពោះការពិសាស្រា។
ខ្នាតតម្រាពីគម្ពីរ
បណ្ដាំរបស់ព្រះមិនផ្ដន្ទាទោសចំពោះការផឹកស្រាដោយចេះប្រមាណទេ។ តាមពិត គម្ពីរបង្ហាញថាការពិសាស្រាអាចធ្វើឲ្យសប្បាយ។ គម្ពីរចែងថា៖ «ចូរអ្នកទៅបរិភោគអាហារឲ្យបានសប្បាយ ហើយផឹកស្រាទំពាំងបាយជូរឲ្យបានរីករាយចុះ»។ (អទ. ៩:៧) លោកយេស៊ូបានផឹកស្រាម្ដងម្កាល ហើយអ្នកបម្រើដ៏ស្មោះត្រង់ឯទៀតរបស់ព្រះយេហូវ៉ាក៏បានធ្វើដូច្នេះដែរ។—ម៉ាថ. ២៦:២៧-២៩; លូក. ៧:៣៤; ១ធី. ៥:២៣
ប៉ុន្តែ បណ្ដាំរបស់ព្រះបង្ហាញយ៉ាងច្បាស់អំពីភាពខុសគ្នារវាងការផឹកស្រាខ្លះនិងការផឹកស្រាឲ្យស្រវឹង។ គម្ពីរចែងថា៖ «កុំស្រវឹងស្រាឡើយ»។ (អេភ. ៥:១៨) គម្ពីរថែមទាំងចែងដែរថា៖ «អ្នកប្រមឹកស្រា . . . នឹងមិនទទួលរាជាណាចក្ររបស់ព្រះជាមត៌កឡើយ»។ (១កូ. ៦:១០) គឺពិតមែន ព្រះយេហូវ៉ាផ្ដន្ទាទោសយ៉ាងខ្លាំងចំពោះការផឹកស្រាហួសប្រមាណនិងការផឹកស្រាឲ្យស្រវឹង។ ជាជាងចេះតែធ្វើតាមអ្វីដែលមនុស្សនៅជុំវិញយើងធ្វើ យើងធ្វើការសម្រេចចិត្តដែលនាំឲ្យព្រះពេញចិត្ត។
អ្នកខ្លះមានអារម្មណ៍ថាពួកគេអាចផឹកស្រាច្រើនដោយមិនស្រវឹង។ ប៉ុន្តែនេះគឺគ្រោះថ្នាក់ណាស់។ គម្ពីរបង្ហាញយ៉ាងច្បាស់ថា ការ«ញៀនស្រា»អាចនាំឲ្យបុគ្គលម្នាក់មិនថាប្រុសឬស្រី ធ្វើខុសធ្ងន់ធ្ងរនិងបង្ខូចចំណងមិត្តភាពរបស់គាត់ជាមួយព្រះយេហូវ៉ា។ (ទីត. ២:៣; សុភ. ២០:១) លោកយេស៊ូថែមទាំងបានព្រមានថា‹ការផឹកហួសប្រមាណ›អាចរារាំងបុគ្គលណាម្នាក់មិនឲ្យចូលក្នុងពិភពលោកថ្មីរបស់ព្រះ។ (លូក. ២១:៣៤-៣៦) ដូច្នេះ តើអ្វីអាចជួយគ្រិស្តសាសនិកឲ្យជៀសវាងពីបញ្ហាដែលអាចងាយកើតឡើងដោយសារការផឹកស្រា?
ចូរពិនិត្យមើលបំណងចិត្តនិងទម្លាប់របស់អ្នក
ពេលយើងធ្វើការសម្រេចចិត្តអំពីការពិសាស្រា គឺគ្រោះថ្នាក់បើយើងធ្វើតាមអ្វីដែលមនុស្សភាគច្រើនធ្វើក្នុងវប្បធម៌របស់យើង។ ដោយឈ្លាសវៃ គ្រិស្តសាសនិកប្រព្រឹត្តអ្វីដែលនាំឲ្យព្រះពេញចិត្តស្ដីអំពីរឿងផ្សេងៗដូចជាការបរិភោគនិងការផឹក។ គម្ពីររំលឹកយើងថា៖ «ទោះជាអ្នកផឹក បរិភោគ ឬធ្វើអ្វីទៀតក៏ដោយ ចូរធ្វើអ្វីៗទាំងអស់ដើម្បីឲ្យព្រះទទួលការសរសើរតម្កើង»។ (១កូ. ១០:៣១) សូមយើងពិចារណាសំណួរនិងគោលការណ៍គម្ពីរខ្លះ៖
តើខ្ញុំផឹកស្រាដើម្បីចូលឲ្យចុះនឹងគេឬទេ? ដំណើរចាកចេញ ២៣:២ចែងថា៖ «អ្នករាល់គ្នាមិនត្រូវប្រព្រឹត្តអាក្រក់តាមមនុស្សភាគច្រើននោះទេ»។ នៅទីនេះ ព្រះយេហូវ៉ាកំពុងព្រមានជនជាតិអ៊ីស្រាអែលមិនឲ្យធ្វើតាមមនុស្សដែលលោកមិនពេញចិត្ត។ នេះក៏ជាយោបល់ល្អសម្រាប់គ្រិស្តសាសនិកនៅសព្វថ្ងៃនេះដែរ។ បើយើងឲ្យអ្នកឯទៀតមានឥទ្ធិពលទៅលើរបៀបគិតគូរនិងការសម្រេចចិត្តរបស់យើងស្ដីអំពីស្រា យើងអាចរសាត់ចេញបន្តិចម្ដងៗពីព្រះយេហូវ៉ានិងខ្នាតតម្រារបស់លោក។—រ៉ូម ១២:២
តើខ្ញុំផឹកស្រាដើម្បីបង្ហាញថាខ្ញុំខ្លាំងប៉ុណ្ណាឬទេ? នៅវប្បធម៌ខ្លះ ការផឹកស្រាច្រើននិងជាញឹកញយគឺជារឿងធម្មតា ហើយជាអ្វីដែលគេមិនប្រកាន់ទេ។ (១ពេ. ៤:៣) ប៉ុន្តែ សូមកត់សម្គាល់អំពីអ្វីដែលកូរិនថូសទី១ ១៦:១៣លើកទឹកចិត្តយើងឲ្យធ្វើ នោះគឺ៖ «ចូរដឹងខ្លួនជានិច្ច ចូរកាន់ជំហរមាំមួនក្នុងជំនឿ ចូរមានចិត្តក្លាហាន ចូរមានកម្លាំងខ្លាំងក្លាឡើង»។ តើស្រាពិតជាអាចធ្វើឲ្យបុគ្គលណាម្នាក់មានកម្លាំងខ្លាំងក្លាឬទេ? មិនមែនទេ តាមពិតគឺផ្ទុយពីនោះ។ ស្រាងាយធ្វើឲ្យសមត្ថភាពរិះគិតអន់ថយ ហើយពិបាកធ្វើការសម្រេចចិត្តល្អ។ ជាលទ្ធផល ជាជាងបង្ហាញអំពីកម្លាំងខ្លាំងក្លា ការផឹកស្រាច្រើនបង្ហាញអំពីភាពទន់ខ្សោយ។ អេសាយ ២៨:៧រៀបរាប់អំពីបុគ្គលម្នាក់ដែលវង្វេងវង្វាន់ដោយសារស្រាថា ដើរទ្រេតទ្រោត ហើយក៏ដួល។
កម្លាំងខ្លាំងក្លាពិតមកពីព្រះយេហូវ៉ា ហើយតម្រូវឲ្យដឹងខ្លួនជានិច្ច និងកាន់ជំហរមាំមួនក្នុងជំនឿ។ (ចសព. ១៨:៣២) យើងធ្វើដូច្នេះ ដោយប្រុងប្រយ័ត្នគេចពីគ្រោះថ្នាក់ ហើយធ្វើការសម្រេចចិត្តដែលនឹងមិនបង្ខូចចំណងមិត្តភាពរបស់យើងជាមួយព្រះយេហូវ៉ា។ លោកយេស៊ូបានបង្ហាញភាពខ្លាំងបែបនេះពេលលោកនៅផែនដី ហើយមនុស្សជាច្រើនគោរពលោក ដោយសារលោកមានចិត្តក្លាហាននិងតាំងចិត្តធ្វើអ្វីដែលត្រឹមត្រូវ។
តើខ្ញុំផឹកស្រាដើម្បីបំបាត់ទុក្ខកង្វល់ឬ? អ្នកតែងចម្រៀងសរសើរព្រះម្នាក់បានត្រូវដឹកនាំឲ្យសរសេរថា៖ «ពេលកង្វល់កង្វាយញាំញីចិត្តខ្ញុំ លោក[ព្រះយេហូវ៉ា]បានសម្រាលទុក្ខខ្ញុំ ហើយធ្វើឲ្យខ្ញុំសប្បាយចិត្តឡើងវិញ»។ (ចសព. ៩៤:១៩) បើអ្នកខ្វល់ខ្វាយអំពីអ្វីណាមួយ ចូរពឹងផ្អែកទៅលើព្រះយេហូវ៉ាឲ្យជួយអ្នក មិនមែនស្រាទេ។ របៀបល្អមួយដើម្បីជួយអ្នកឲ្យមិនសូវខ្វល់ខ្វាយ គឺដោយអធិដ្ឋានកាន់តែច្រើនទៅព្រះយេហូវ៉ា។ ម្យ៉ាងទៀត បងប្អូនជាច្រើននាក់បានឃើញថា ការស្វែងរកយោបល់ពីមិត្តភក្តិដែលមានភាពចាស់ទុំក្នុងក្រុមជំនុំគឺមានប្រយោជន៍។ តាមពិត ការផឹកស្រាដើម្បីស៊ូទ្រាំនឹងបញ្ហា អាចធ្វើឲ្យបុគ្គលណាម្នាក់មិនសូវតាំងចិត្តធ្វើអ្វីដែលត្រឹមត្រូវ។ (ហូ. ៤:១១) បងដានីយ៉ែលដែលបានត្រូវរៀបរាប់នៅខាងលើសារភាពថា៖ «ខ្ញុំធ្លាប់ខ្វល់ចិត្តនិងបន្ទោសខ្លួន ហើយបានផឹកស្រាដើម្បីរំសាយទុក្ខកង្វល់ ប៉ុន្តែនេះនាំឲ្យមានបញ្ហាច្រើនជាង ហើយខ្ញុំបាត់បង់មិត្តសម្លាញ់និងលែងឲ្យតម្លៃខ្លួនឯង»។ នៅទីបំផុត តើអ្វីបានជួយបងដានីយ៉ែល? គាត់ប្រាប់ថា៖ «ខ្ញុំយល់ថាខ្ញុំត្រូវការជំនួយពីព្រះយេហូវ៉ា មិនមែនស្រាទេ។ ពេលខ្ញុំធ្វើដូច្នេះ ខ្ញុំអាចស៊ូទ្រាំនឹងបញ្ហារបស់ខ្ញុំ ហើយយកឈ្នះវាបាន»។ តាមការពិត ព្រះយេហូវ៉ាតែងតែប្រុងប្រៀបជួយយើង ទោះជាស្ថានភាពរបស់យើងមើលទៅអស់សង្ឃឹមក្ដី។—ភី. ៤:៦, ៧; ១ពេ. ៥:៧
បើអ្នកផឹកស្រាម្ដងម្កាល សូមពិចារណាអំពីការផឹកស្រារបស់អ្នកដោយសួរខ្លួនអ្នកនូវសំណួរទាំងនេះ៖ ‹តើសមាជិកក្រុមគ្រួសារ ឬមិត្តជាទីស្រឡាញ់របស់ខ្ញុំណាម្នាក់បាននិយាយថាគាត់បារម្ភអំពីការផឹករបស់ខ្ញុំឬទេ?› បើដូច្នេះ នេះអាចបង្ហាញថាអ្នកចាប់ផ្ដើមមានទម្លាប់ ឬបញ្ហាណាមួយដែលអ្នកមិនដឹង។ ‹តើខ្ញុំផឹកស្រាច្រើនជាងមុនឬទេ?› បុគ្គលដែលស្ថិតក្នុងស្ថានភាពនោះប្រហែលជាមិនទាន់ញៀនស្រា តែគាត់ប្រហែលជាអាចឈានទៅជាអ្នកញៀនស្រា។ ‹តើខ្ញុំពិបាកធ្វើអារម្មណ៍ពេលខ្ញុំមិនបានផឹកស្រាអស់ប៉ុន្មានថ្ងៃឬយូរជាងនេះឬទេ?› បើដូច្នេះ ការផឹកស្រាប្រហែលជាបានទៅជាទម្លាប់ ឬធ្វើឲ្យអ្នកទៅជាញៀន។ នេះប្រហែលជាមានន័យថាអ្នកនឹងត្រូវការជំនួយពីគ្រូពេទ្យដើម្បីយកឈ្នះបញ្ហានោះ។
ដោយសារការផឹកស្រាអាចនាំឲ្យមានបញ្ហាច្រើន គ្រិស្តសាសនិកខ្លះបានសម្រេចចិត្តជៀសវាងពីការផឹកស្រាទាំងអស់។ គ្រិស្តសាសនិកឯទៀតប្រហែលជាសម្រេចចិត្តមិនផឹកស្រាដោយសារពួកគេមិនចូលចិត្តរសជាតិវា។ បើបុគ្គលណាម្នាក់ដែលអ្នកស្គាល់ធ្វើការសម្រេចចិត្តបែបនេះ អ្នកអាចបង្ហាញសេចក្ដីសប្បុរសដោយគោរពការសម្រេចចិត្តរបស់គាត់ ហើយមិនរិះគន់គាត់។
អ្នកប្រហែលជាបានឃើញថាគឺជាការឈ្លាសវៃឲ្យអ្នកដាក់កម្រិតខ្លះលើខ្លួនឯង។ គ្រិស្តសាសនិកម្នាក់ប្រហែលជាដាក់កម្រិតលើបរិមាណដែលគាត់នឹងផឹក ឬគាត់ប្រហែលជាបង្កើតច្បាប់សម្រាប់ខ្លួនឯងថា គាត់នឹងផឹកជាញឹកញាប់ប៉ុណ្ណាដូចជា ប្រហែលជាផឹកម្ដងក្នុងមួយសប្ដាហ៍ ឬផឹកដោយចេះប្រមាណក្នុងអំឡុងបរិភោគអាហារ។ បងប្អូនឯទៀតប្រហែលជាដាក់កម្រិតទៅលើប្រភេទស្រាដែលពួកគេនឹងផឹក ដូចជាស្រាទំពាំងបាយជូរឬស្រាបៀរដោយចេះប្រមាណ ប៉ុន្តែមិនមែនប្រភេទស្រាខ្លាំង សូម្បីតែពេលដាក់ក្នុងស្រាលាយឬស្រាក្រឡុកក្ដី។ នៅពេលដែលបុគ្គលម្នាក់ដាក់កម្រិតយ៉ាងច្បាស់ទៅលើការផឹកស្រា នេះនឹងស្រួលជាងឲ្យគាត់ធ្វើតាម។ ម្យ៉ាងទៀត គ្រិស្តសាសនិកដែលមានភាពចាស់ទុំមិនចាំបាច់អៀនខ្មាស បើគាត់បានធ្វើការសម្រេចចិត្តបែបនេះនិងតាំងចិត្តធ្វើតាមយ៉ាងខ្ជាប់ខ្ជួនទេ។
ពេលយើងធ្វើការសម្រេចចិត្តអំពីស្រា យើងក៏ត្រូវគិតអំពីអារម្មណ៍របស់អ្នកឯទៀតដែរ។ រ៉ូម ១៤:២១ចែងថា៖ «ជាការល្អបំផុត ប្រសិនបើមិនបរិភោគសាច់ ឬផឹកស្រា ឬធ្វើអ្វីក៏ដោយដែលបណ្ដាលឲ្យបងប្អូនរបស់អ្នកជំពប់ដួល»។ តើអ្នកអាចធ្វើតាមយោបល់នេះយ៉ាងដូចម្ដេច? គឺដោយបង្ហាញសេចក្ដីស្រឡាញ់ជាបងប្អូន។ បើអ្នកគិតថាការផឹកស្រាអាចធ្វើឲ្យបុគ្គលណាម្នាក់ទើសចិត្ត សេចក្ដីស្រឡាញ់នឹងជំរុញអ្នកមិនឲ្យផឹកស្រានៅពេលនោះ មែនទេ? យ៉ាងនេះ អ្នកបង្ហាញការយកចិត្តទុកដាក់និងការគោរពចំពោះអារម្មណ៍របស់អ្នកឯទៀត ដោយគិតពីប្រយោជន៍របស់ពួកគេ មិនមែនប្រយោជន៍របស់ខ្លួន។—១កូ. ១០:២៤
ម្យ៉ាងទៀត រដ្ឋាភិបាលប្រហែលជាមានច្បាប់អំពីស្រា។ គ្រិស្តសាសនិកច្បាស់ជានឹងធ្វើតាមច្បាប់ទាំងនេះ។ ច្បាប់ទាំងនោះប្រហែលជាកំណត់អាយុសម្រាប់ផឹកស្រា ឬហាមផឹកស្រាពេលបើកបរ ឬពេលប្រើប្រាស់ម៉ាស៊ីនផ្សេងៗ។—រ៉ូម ១៣:១-៥
ព្រះយេហូវ៉ាបានឲ្យយើងនូវអំណោយដ៏អស្ចារ្យជាច្រើន រួមមានចិត្តសេរីក្នុងការសម្រេចចិត្តអំពីរបៀបដែលយើងនឹងប្រើអំណោយទាំងនោះ។ នេះរួមបញ្ចូលការសម្រេចចិត្តអំពីអ្វីដែលយើងនឹងបរិភោគនិងផឹក។ សូមឲ្យការសម្រេចចិត្តរបស់យើងបង្ហាញថាយើងឲ្យតម្លៃចំពោះចិត្តសេរីនេះ គឺដោយប្រើចិត្តសេរីដើម្បីធ្វើឲ្យបិតានៅស្ថានសួគ៌ពេញចិត្ត។
a មជ្ឈមណ្ឌលត្រួតពិនិត្យនិងបង្ការជំងឺឆ្លងរបស់សហរដ្ឋអាម៉េរិក(CDC)បានរាយការណ៍ថា ការផឹកស្រាហួសប្រមាណអាចនាំឲ្យមានហានិភ័យភ្លាមៗ ដូចជាឃាតកម្ម ការធ្វើអត្តឃាត ការរំលោភបំពានផ្លូវភេទ ការប្រើហិង្សាលើគូ ការរួមភេទដោយធ្វេសប្រហែស និងការរលូតកូន។
