តើអ្នកចាំឬទេ?
តើអ្នកបានអានទស្សនាវដ្ដីប៉មយាមនៅឆ្នាំនេះដោយយកចិត្តទុកដាក់ឬទេ? សូមសាកឆ្លើយសំណួរដូចតទៅនេះ៖
តើព្រះយេហូវ៉ាបានទុកគំរូអ្វីអំពីរបៀបប្រព្រឹត្តទៅលើស្ត្រី?
លោកប្រព្រឹត្តទៅលើពួកគេដោយមិនរើសមុខ ហើយលោកមិនមែនចូលចិត្តបុរសជាងស្ត្រីទេ។ ព្រះស្ដាប់ស្ត្រី លោកចាប់អារម្មណ៍អំពីអារម្មណ៍និងការព្រួយបារម្ភរបស់ពួកគេ។ ម្យ៉ាងទៀត លោកទុកចិត្តពួកគេឲ្យធ្វើកិច្ចការរបស់លោក។—w២៤.០១ ទំ.១៥-១៦
តើតាមរបៀបណាយើងអាចធ្វើតាមអេភេសូរ ៥:៧ដែលចែងថា៖ «កុំរួមចំណែកជាមួយនឹងពួកគេ»?
សាវ័កប៉ូលបានព្រមានយើងមិនឲ្យសេពគប់ជាមួយពួកអ្នកដែលធ្វើឲ្យយើងពិបាកធ្វើតាមខ្នាតតម្រារបស់ព្រះ។ ការសេពគប់បែបនោះសំដៅទៅលើពួកអ្នកដែលយើងចំណាយពេលជាមួយដោយផ្ទាល់ ឬពួកអ្នកដែលយើងចំណាយពេលជាមួយតាមប្រព័ន្ធបណ្ដាញសង្គមសម្រាប់ទាក់ទងគ្នា។—w២៤.០៣ ទំ.២២-២៣
តើយើងត្រូវប្រុងប្រយ័ត្ននឹងរឿងមិនពិតអ្វីខ្លះ?
យើងត្រូវប្រុងប្រយ័ត្នចំពោះរឿងដែលមកពីបងប្អូនដែលមិនទាន់បានស្វែងយល់ថារឿងនោះគឺជាការពិត អ៊ីមែលដែលយើងមិនបានស្នើសុំពីមនុស្សដែលយើងមិនស្គាល់ ហើយពួកអ្នកក្បត់ជំនឿដែលធ្វើពុតជាចាប់អារម្មណ៍សេចក្ដីពិត។—w២៤.០៤ ទំ.១២
តើយើងដឹងអ្វីខ្លះ ហើយមិនដឹងអ្វីខ្លះអំពីរបៀបដែលព្រះយេហូវ៉ាវិនិច្ឆ័យស្ដេចសាឡូម៉ូន ព្រមទាំងពួកអ្នកដែលស្លាប់នៅក្នុងក្រុងសូដុមនិងក្រុងកូម៉ូរ៉ា និងសម័យទឹកជំនន់?
យើងមិនដឹងប្រាកដថាព្រះយេហូវ៉ាបានកាត់ទោសពួកគេឲ្យស្លាប់ជារៀងរហូតទេ។ ប៉ុន្តែយើងដឹងថាលោកជ្រាបអ្វីទាំងអស់ ហើយលោកមានសេចក្ដីមេត្តាករុណាយ៉ាងជ្រាលជ្រៅ។—w២៤.០៥ ទំ.៣-៤
តើការដែលព្រះយេហូវ៉ាជា«ថ្មដា»ពង្រឹងទំនុកចិត្តយើងអំពីអ្វី? (បច. ៣២:៤)
យើងអាចយកព្រះយេហូវ៉ាជាទីពឹងជ្រក។ លោកជាព្រះដែលអាចពឹងពាក់បាន ដោយសារលោកតែងតែធ្វើតាមពាក្យសន្យារបស់លោក។ លោកនឹងនរដោយសារគុណសម្បត្តិនិងគោលបំណងរបស់លោកមិនប្រែប្រួលឡើយ។—w២៤.០៦ ទំ.២៦-២៨
តើអ្វីអាចជួយអ្នកឲ្យសម្របខ្លួននឹងក្រុមជំនុំថ្មី?
ចូរពឹងផ្អែកលើព្រះយេហូវ៉ា។ លោកនឹងជួយអ្នកដូចដែលលោកធ្លាប់ជួយអ្នកបម្រើរបស់លោកនៅអតីតកាល។ ចូរជៀសវាងពីការប្រៀបធៀបក្រុមជំនុំថ្មីទៅនឹងក្រុមជំនុំចាស់។ ចូរជាប់រវល់ក្នុងក្រុមជំនុំថ្មី ហើយចូរព្យាយាមបង្កើតមិត្តភាពថ្មី។—w២៤.០៧ ទំ.២៦-២៨
តើមានមេរៀនអ្វីក្នុងរឿងប្រៀបប្រដូចបីនៅម៉ាថាយ ជំពូកទី២៥?
រឿងប្រៀបប្រដូចអំពីចៀមនិងពពែលើកបញ្ជាក់អំពីភាពស្មោះត្រង់និងភក្ដីភាព។ រឿងប្រៀបប្រដូចអំពីស្ត្រីក្រមុំបរិសុទ្ធដែលចេះពិចារណា និងស្ត្រីក្រមុំបរិសុទ្ធដែលមិនចេះពិចារណាលើកបញ្ជាក់អំពីការត្រៀមខ្លួន ហើយចាំយាម។ ម្យ៉ាងទៀត រឿងប្រៀបប្រដូចអំពីថាលិន លើកបញ្ជាក់អំពីសារៈសំខាន់នៃការធ្វើជាមនុស្សឧស្សាហ៍ និងមានចិត្តខ្នះខ្នែង។—w២៤.០៩ ទំ.២០-២៤
តើសាលនៃវិហាររបស់សាឡូម៉ូនមានកម្ពស់ប៉ុន្មាន?
នៅប្រវត្តិហេតុទី២ ៣:៤ ឯកសារបុរាណខ្លះចែងអំពីកម្ពស់សាលថា នោះគឺ«១២០»ហត្ថ ដែលស្មើនឹងកម្ពស់៥៣ម៉ែត្រ។ ប៉ុន្តែ ឯកសារបុរាណផ្សេងទៀតដែលគួរឲ្យទុកចិត្ត ចែងថា«២០ហត្ថ»ដែលស្មើនឹងកម្ពស់៩ម៉ែត្រ ហើយនេះមើលទៅស៊ីគ្នានឹងកម្រាស់នៃជញ្ជាំងវិហារ។—w២៤.១០ ទំ.៣១
តើពាក្យជំនួយការខាងកិច្ចបម្រើត្រូវមាន«ប្រពន្ធតែមួយ»មានន័យយ៉ាងណា? (១ធី. ៣:១២)
នេះមានន័យថាគាត់រៀបការជាមួយស្ត្រីតែម្នាក់ និងមិនគួរប្រព្រឹត្តអំពើប្រាសចាកសីលធម៌ខាងផ្លូវភេទទេ។ បន្ថែមទៅទៀត គាត់មិនគួរបង្ហាញចំណាប់អារម្មណ៍ក្នុងន័យស្នេហាទៅលើស្ត្រីឯទៀត។—w២៤.១១ ទំ.១៩
ហេតុអ្វីយើងអាចនិយាយថាយ៉ូហាន ៦:៥៣ មិនមែនពន្យល់អំពីអ្វីដែលកើតឡើងនៅពិធីអាហារល្ងាចរបស់លោកម្ចាស់?
យ៉ូហាន ៦:៥៣ចែងថា ត្រូវបរិភោគសាច់និងផឹកឈាមរបស់លោកយេស៊ូ។ លោកយេស៊ូមានប្រសាសន៍នេះនៅឆ្នាំ៣២ គ.ស. នៅស្រុកកាលីឡេដល់ជនជាតិយូដាដែលនៅតែត្រូវបង្ហាញជំនឿលើលោក។ រីឯពិធីអាហារល្ងាចរបស់លោកម្ចាស់បានត្រូវធ្វើឡើងមួយឆ្នាំក្រោយមកនៅក្រុងយេរូសាឡិម។ នៅទីនោះ លោកយេស៊ូនិយាយជាមួយពួកអ្នកដែលនឹងគ្រប់គ្រងជាមួយលោកនៅស្ថានសួគ៌។—w២៤.១២ ទំ.១០-១១
