សំណួរពីអ្នកអាន
តើអ្នកណាគឺជា«បណ្ដាទេវតាដែលលោកបានជ្រើសរើស»ដែលបានរៀបរាប់នៅធីម៉ូថេទី១ ៥:២១?
សាវ័កប៉ូលបានសរសេរទៅកាន់ធីម៉ូថេដែលជាអ្នកចាស់ទុំដូចគ្នាថា៖ «នៅចំពោះមុខព្រះនិងគ្រិស្តយេស៊ូ ព្រមទាំងបណ្ដាទេវតាដែលលោកបានជ្រើសរើស ខ្ញុំសុំបង្គាប់អ្នកជាផ្លូវការឲ្យធ្វើតាមបង្គាប់ទាំងនេះ ដោយគ្មានចិត្តប្រកាន់ឬចិត្តលម្អៀងទាល់តែសោះ»។—១ធី. ៥:២១
ដំបូង យើងអាចពិចារណាថាអ្នកណាខ្លះមិនមែនជាបណ្ដាទេវតាដែលលោកបានជ្រើសរើស។ ពួកគេច្បាស់ជាមិនមែនពួកអ្នក១៤៤.០០០នាក់ទេ។ ពេលប៉ូលសរសេរសំបុត្រទៅធីម៉ូថេ ការប្រោសឲ្យរស់ឡើងវិញទៅស្ថានសួគ៌របស់គ្រិស្តសាសនិកដែលបានត្រូវរើសតាំងមិនទាន់ចាប់ផ្ដើមទេ។ ពួកសាវ័កនិងបុគ្គលឯទៀតដែលបានត្រូវរើសតាំងមិនទាន់ទៅជាបុគ្គលវិញ្ញាណនៅឡើយទេ។ ដូច្នេះ «បណ្ដាទេវតាដែលលោកបានជ្រើសរើស»មិនអាចសំដៅទៅលើពួកគេឡើយ។—១កូ. ១៥:៥០-៥៤; ១ថែ. ៤:១៣-១៧; ១យ៉ូន. ៣:២
ម្យ៉ាងទៀត «បណ្ដាទេវតាដែលលោកបានជ្រើសរើស»ក៏មិនសំដៅទៅលើពួកទេវតាដែលមិនបានស្ដាប់បង្គាប់ព្រះនៅសម័យទឹកជំនន់ដែរ។ ពួកទេវតាទាំងនោះបានចូលខាងសាថាន ហើយក្លាយជាពួកវិញ្ញាណកំណាចដែលជាសត្រូវរបស់លោកយេស៊ូ។ (ដក. ៦:២; លូក. ៨:៣០, ៣១; ២ពេ. ២:៤) នៅថ្ងៃអនាគត ពួកវានឹងត្រូវឃុំក្នុងទីជ្រៅបំផុតអស់១.០០០ឆ្នាំ ហើយក្រោយមកនឹងត្រូវបំផ្លាញចោលជាមួយមេកំណាច។—យូ. ៦; បប. ២០:១-៣, ១០
«បណ្ដាទេវតាដែលលោកបានជ្រើសរើស»ដែលប៉ូលបានរៀបរាប់ត្រូវតែជាពួកទេវតានៅស្ថានសួគ៌ដែលគាំទ្រ«ព្រះនិងគ្រិស្តយេស៊ូ»។
មានទេវតាដ៏ស្មោះត្រង់រាប់ម៉ឺនរូប។ (ហេ. ១២:២២, ២៣) យើងមិនចាំបាច់គិតថាទេវតានីមួយៗមានភារកិច្ចដូចគ្នានៅពេលដំណាលគ្នានោះទេ។ (បប. ១៤:១៧, ១៨) សូមចាំថានៅពេលមួយ ទេវតាមួយរូបបានត្រូវសុំឲ្យសម្លាប់ពួកទាហានអាស៊ីរីចំនួន១៨៥.០០០នាក់។ (២បស. ១៩:៣៥) ទេវតាមួយចំនួនប្រហែលជាទទួលភារកិច្ចឲ្យ«ដកអ្វីៗទាំងអស់ដែលនាំឲ្យជំពប់ដួល ព្រមទាំងដកមនុស្សទាំងអស់ដែលប្រព្រឹត្តប្រឆាំងច្បាប់ ចេញពីរាជាណាចក្ររបស់លោក[យេស៊ូ]»។ (ម៉ាថ. ១៣:៣៩-៤១) ទេវតាឯទៀតប្រហែលជានឹង«ប្រមូលអ្នកដែលលោកបានរើសតាំង»ទៅស្ថានសួគ៌។ (ម៉ាថ. ២៤:៣១) រីឯទេវតាផ្សេងទៀត បានត្រូវបង្គាប់ឲ្យ‹ការពារយើងនៅគ្រប់កន្លែងដែលយើងទៅ›។—ចសព. ៩១:១១; ម៉ាថ. ១៨:១០; សូមពិនិត្យបន្ថែម ម៉ាថាយ ៤:១១; លូកា ២២:៤៣
«បណ្ដាទេវតាដែលលោកបានជ្រើសរើស»ដែលបានរៀបរាប់នៅធីម៉ូថេទី១ ៥:២១ ទំនងជាពួកទេវតាដែលមានភារកិច្ចជួយថែរក្សាក្រុមជំនុំ។ ក្នុងបរិបទនេះ ប៉ូលបានផ្ដល់យោបល់ដែលប្រកបដោយប្រាជ្ញាអំពីពួកអ្នកចាស់ទុំដែលសមនឹងទទួលការគោរពពីក្រុមជំនុំ។ ចំណែកឯអ្នកចាស់ទុំវិញ ពួកគេគួរបំពេញភារកិច្ចរបស់ខ្លួន«ដោយគ្មានចិត្តប្រកាន់ឬចិត្តលម្អៀងទាល់តែសោះ» ហើយក៏មិនគួរធ្វើការសម្រេចចិត្តដោយមិនគិតវែងឆ្ងាយទុកជាមុនឡើយ។ មូលហេតុដ៏សំខាន់មួយដែលពួកគេធ្វើតាមយោបល់របស់ប៉ូលដែលបានត្រូវសរសេរក្រោមការដឹកនាំរបស់ព្រះ គឺថាអ្វីដែលពួកគេប្រព្រឹត្តគឺ«នៅចំពោះមុខព្រះនិងគ្រិស្តយេស៊ូ ព្រមទាំងបណ្ដាទេវតាដែលលោកបានជ្រើសរើស»។ យើងឃើញច្បាស់ថាទេវតាខ្លះទទួលភារកិច្ចដែលទាក់ទងនឹងក្រុមជំនុំដូចជាផ្ដល់ការការពារ ជួយអ្នកបម្រើព្រះក្នុងកិច្ចការផ្សព្វផ្សាយ និងប្រាប់ព្រះយេហូវ៉ាអំពីអ្វីដែលពួកគេបានសង្កេតឃើញ។—ម៉ាថ. ១៨:១០; បប. ១៤:៦
