អត្ថបទសិក្សា ៣
ចម្រៀងលេខ១២៤ ចូរមានភក្ដីភាពជានិច្ច
ព្រះយេហូវ៉ានឹងជួយអ្នកនៅគ្រាលំបាក
«[ព្រះយេហូវ៉ា]ជាទីពឹងជ្រកដ៏មានសុវត្ថិភាពសម្រាប់ខ្ញុំ ខ្ញុំគ្មានថ្ងៃរង្គោះរង្គើរហូតដល់ដួលរលំឡើយ»។—ចសព. ៦២:២
ចំណុចផ្ដោត
អ្វីដែលយើងអាចធ្វើដើម្បីទទួលប្រយោជន៍ពីជំនួយរបស់ព្រះយេហូវ៉ាក្នុងអំឡុងគ្រាលំបាក។
១-២. តើអ្នកបម្រើដ៏ស្មោះត្រង់របស់ព្រះយេហូវ៉ាប្រហែលជាជួបការពិបាកអ្វីខ្លះ?
រឿងខ្លោចផ្សាអាចផ្លាស់ប្ដូរជីវិតរបស់យើងមួយរំពេច។ ជាឧទាហរណ៍ បងប្រុសដ៏ស្មោះត្រង់ម្នាក់ឈ្មោះលូអ៊ីស a បានត្រូវរកឃើញថាមានជំងឺមហារីកដែលកម្រមាន។ គ្រូពេទ្យបានប្រាប់គាត់ថាគាត់អាចរស់បានតែប៉ុន្មានខែទៀតប៉ុណ្ណោះ។ បងស្រីម្នាក់ឈ្មោះម៉ូនីកានិងប្ដីគាត់ជាប់រវល់ក្នុងសកម្មភាពខាងកិច្ចបម្រើព្រះ។ ស្រាប់តែថ្ងៃមួយ បងម៉ូនីកាបានដឹងថាប្ដីគាត់ដែលជាអ្នកចាស់ទុំប្រព្រឹត្តអំពើខុសឆ្គងធ្ងន់ធ្ងរដោយលាក់លៀមអស់ជាយូរមកហើយ។ បងស្រីនៅលីវម្នាក់ឈ្មោះអូលីវាត្រូវជម្លៀសចេញពីផ្ទះ ដោយសារព្យុះសង្ឃរាមួយកំពុងបក់មក។ ពេលគាត់ត្រឡប់មកវិញ គាត់បានឃើញថាព្យុះនោះបានបំផ្លាញផ្ទះរបស់គាត់។ ក្នុងមួយរំពេច ជីវិតរបស់បងប្អូនទាំងបីនាក់នេះបានផ្លាស់ប្ដូរទាំងស្រុង។ តើអ្នកធ្លាប់ជួបរឿងអាក្រក់ដែលផ្លាស់ប្ដូរជីវិតរបស់អ្នកមួយរំពេចឬទេ?
២ ក្នុងនាមជាអ្នកបម្រើដ៏ស្មោះត្រង់របស់ព្រះយេហូវ៉ា យើងជួបការពិបាកនិងធ្លាក់ខ្លួនឈឺដូចមនុស្សឯទៀតដែរ។ យើងក៏ប្រហែលជាត្រូវស៊ូទ្រាំនឹងការប្រឆាំង ឬការបៀតបៀនពីពួកអ្នកដែលស្អប់រាស្ត្រព្រះ។ ទោះជាព្រះយេហូវ៉ាមិនរារាំងកុំឲ្យការពិបាកនោះកើតឡើងចំពោះយើងក្ដី លោកសន្យាថាលោកនឹងជួយយើង។ (អេ. ៤១:១០) ដោយមានជំនួយពីលោក យើងអាចរក្សាអំណរ ធ្វើការសម្រេចចិត្តល្អ និងរក្សាភក្ដីភាពចំពោះលោក ទោះជាស្ថិតក្នុងស្ថានភាពដ៏ពិបាកបំផុតក្ដី។ ក្នុងអត្ថបទនេះ យើងនឹងពិចារណាអំពីរបៀបបួនយ៉ាងដែលព្រះយេហូវ៉ាជួយយើងនៅគ្រាលំបាកក្នុងជីវិតរបស់យើង។ យើងក៏នឹងពិចារណាអំពីអ្វីដែលយើងត្រូវធ្វើដើម្បីទទួលប្រយោជន៍ពីជំនួយដែលលោកផ្ដល់ឲ្យ។
ព្រះយេហូវ៉ានឹងការពារអ្នក
៣. ពេលយើងឆ្លងកាត់រឿងខ្លោចផ្សា តើយើងប្រហែលជាពិបាកធ្វើអ្វី?
៣ ការពិបាក។ ពេលយើងជួបរឿងខ្លោចផ្សា យើងប្រហែលជាពិបាកគិតយ៉ាងច្បាស់និងធ្វើការសម្រេចចិត្តផ្សេងៗ។ ហេតុអ្វី? ពីព្រោះយើងប្រហែលជាក្រៀមក្រំចិត្តនិងខ្វល់ចិត្តជាខ្លាំង។ យើងអាចមានអារម្មណ៍ហាក់ដូចជាយើងកំពុងដើរឆ្លងកាត់អ័ព្ទ ហើយមិនដឹងថាត្រូវទៅទិសដៅណាទេ។ សូមកត់សម្គាល់អំពីអារម្មណ៍ដែលបងស្រីពីរនាក់នៅខាងលើមាននៅពេលដែលពួកគាត់មានទុក្ខលំបាក។ បងអូលីវានិយាយថា៖ «ក្រោយពីព្យុះសង្ឃរាបានបំផ្លាញផ្ទះរបស់ខ្ញុំ ខ្ញុំមានអារម្មណ៍ហេងហាង ហើយគិតថាបញ្ហាខ្ញុំធំពេក»។ បងម៉ូនីកានិយាយអំពីការក្បត់របស់ប្ដីគាត់ថា៖ «ខ្ញុំមិនគ្រាន់តែខកចិត្តប៉ុណ្ណោះទេ។ តែខ្ញុំក៏ឈឺចិត្តយ៉ាងខ្លាំងហាក់ដូចជាគេចាក់ខ្ញុំមួយកាំបិត។ ខ្ញុំលែងចេះធ្វើកិច្ចការប្រចាំថ្ងៃទៀត។ ខ្ញុំមិនដែលគិតថានេះអាចកើតឡើងចំពោះខ្ញុំទេ»។ តើព្រះយេហូវ៉ាសន្យាថានឹងជួយយើងយ៉ាងដូចម្ដេច ពេលយើងមានអារម្មណ៍ថាបញ្ហារបស់យើងគឺធំពេក?
៤. យោងទៅតាមភីលីព ៤:៦, ៧ តើព្រះយេហូវ៉ាសន្យាអ្វីនឹងយើង?
៤ អ្វីដែលព្រះយេហូវ៉ាធ្វើ។ លោកសន្យាថាលោកនឹងឲ្យយើងនូវអ្វីដែលគម្ពីរហៅថា៖ «សេចក្ដីសុខសាន្តរបស់ព្រះ»។ (សូមអាន ភីលីព ៤:៦, ៧) សេចក្ដីសុខសាន្តនេះសំដៅទៅលើភាពស្ងប់ស្ងាត់ក្នុងចិត្តនិងគំនិតដែលមកពីចំណងមិត្តភាពដ៏ថ្លៃវិសេសរបស់យើងជាមួយលោក។ សេចក្ដីសុខសាន្តនេះ«ហួសពីការនឹកស្មាន» ពោលគឺវាអស្ចារ្យជាងយើងគិតស្មានទៅទៀត។ ជាឧទាហរណ៍ តើអ្នកធ្លាប់អធិដ្ឋានយ៉ាងអស់ពីចិត្តទៅព្រះយេហូវ៉ា ហើយក្រោយមកបានភ្ញាក់ផ្អើលដោយឃើញថាអ្នកមានអារម្មណ៍ស្ងប់ចិត្តជាខ្លាំងឬទេ? អារម្មណ៍នេះគឺ«សេចក្ដីសុខសាន្តរបស់ព្រះ»។
៥. តើសេចក្ដីសុខសាន្តរបស់ព្រះការពារចិត្តនិងគំនិតរបស់យើងយ៉ាងដូចម្ដេច?
៥ នៅភីលីព ៤:៧ក៏ចែងដែរថា សេចក្ដីសុខសាន្តរបស់ព្រះ«នឹងការពារចិត្តនិងសមត្ថភាពរិះគិតរបស់អ្នករាល់គ្នា»។ ពាក្យ«ការពារ»ជាភាសាដើមគឺជាពាក្យយោធាដែលបានត្រូវប្រើដើម្បីសំដៅលើទាហានដែលរក្សាការពារក្រុងឲ្យមានសុវត្ថិភាពពីការវាយប្រហារ។ បណ្ដាជននៅក្នុងក្រុងដែលមានទាហានការពារ ដេកលក់យ៉ាងមានសេចក្ដីសុខដោយដឹងថាមានអ្នកយាមនៅខ្លោងទ្វារក្រុង។ ស្រដៀងគ្នាដែរ ពេលសេចក្ដីសុខសាន្តរបស់ព្រះការពារចិត្តនិងគំនិតរបស់យើង យើងមានអារម្មណ៍ស្ងប់ដោយដឹងថាយើងមានសុវត្ថិភាព។ (ចសព. ៤:៨) ដូចក្នុងករណីរបស់ហាណា យើងនៅតែអាចមានសេចក្ដីសុខសាន្ត ទោះជាស្ថានភាពរបស់យើងមិនផ្លាស់ប្ដូរភ្លាមៗក្ដី។ (១សាំ. ១:១៦-១៨) ម្យ៉ាងទៀត ពេលយើងមានអារម្មណ៍ស្ងប់ យើងច្រើនតែងាយស្រួលជាងឲ្យគិតយ៉ាងច្បាស់ និងធ្វើការសម្រេចចិត្តដ៏ឈ្លាសវៃ។
សូមអធិដ្ឋានរហូតដល់អ្នកទទួលអារម្មណ៍ថា«សេចក្ដីសុខសាន្តរបស់ព្រះ»ការពារចិត្តនិងគំនិតរបស់អ្នក (សូមមើលវគ្គ៤-៦)
៦. តើយើងអាចធ្វើអ្វីដើម្បីទទួលសេចក្ដីសុខសាន្តរបស់ព្រះ? (សូមមើលរូបភាពផងដែរ)
៦ អ្វីដែលយើងត្រូវធ្វើ។ ពេលអ្នកពិបាកចិត្ត សូមស្រែករកការការពារ។ តើតាមរបៀបណា? សូមអធិដ្ឋានរហូតដល់អ្នកមានអារម្មណ៍ថាទទួលសេចក្ដីសុខសាន្តរបស់ព្រះ។ (លូក. ១១:៩; ១ថែ. ៥:១៧) បងលូអ៊ីសដែលបានត្រូវរៀបរាប់នៅខាងលើ បានពន្យល់អំពីរបៀបដែលគាត់និងប្រពន្ធរបស់គាត់អាណាអាចស៊ូទ្រាំ ពេលដឹងថាបងលូអ៊ីសអាចរស់បានតែប៉ុន្មានខែទៀតប៉ុណ្ណោះ។ បងលូអ៊ីសនិយាយថា៖ «នៅពេលដូចនោះគឺពិបាកណាស់ឲ្យធ្វើការសម្រេចចិត្តអំពីរឿងថែទាំសុខភាពនិងរឿងផ្សេងទៀត។ ប៉ុន្តែ យើងអាចមានសេចក្ដីសុខសាន្តក្នុងអំឡុងគ្រាដ៏ពិបាកខ្លាំងនោះ ដោយសារតែយើងបានអធិដ្ឋាន»។ បងលូអ៊ីសនិងប្រពន្ធគាត់និយាយថា ពួកគាត់បានអធិដ្ឋានយ៉ាងអស់ពីចិត្តម្ដងហើយម្ដងទៀត ដោយសុំព្រះយេហូវ៉ាឲ្យផ្ដល់ពួកគាត់នូវសេចក្ដីសុខសាន្តក្នុងចិត្ត ចិត្តស្ងប់ និងប្រាជ្ញាដើម្បីធ្វើការសម្រេចចិត្តល្អ ហើយពួកគាត់ដឹងថាលោកបានជួយមែន។ បើអ្នកកំពុងជួបបញ្ហាណាមួយ សូមតស៊ូក្នុងការអធិដ្ឋាន ហើយអ្នកនឹងពិសោធសេចក្ដីសុខសាន្តរបស់ព្រះយេហូវ៉ា កាលដែលនោះការពារចិត្តនិងគំនិតរបស់អ្នក។—រ៉ូម ១២:១២
ព្រះយេហូវ៉ានឹងធ្វើឲ្យអ្នកនឹងនរ
៧. តើយើងប្រហែលជាមានអារម្មណ៍យ៉ាងណាពេលយើងរងទុក្ខលំបាក?
៧ ការពិបាក។ ពេលយើងឆ្លងកាត់ទុក្ខលំបាក អារម្មណ៍ គំនិត និងការប្រព្រឹត្តរបស់យើងប្រហែលជាមិនមានតុល្យភាពដូចធម្មតាទេ។ អារម្មណ៍របស់យើងប្រហែលជាប្រែប្រួលហាក់ដូចជាយោគចុះយោគឡើង។ បងអាណាដែលបានត្រូវរៀបរាប់នៅខាងលើនិយាយថា គាត់មានអារម្មណ៍ផ្សេងៗជាច្រើនក្រោយពីបងលូអ៊ីសស្លាប់។ គាត់និយាយថា៖ «ពេលខ្លះខ្ញុំតានតឹងចិត្ត ហើយចាប់ផ្ដើមអាណិតខ្លួនឯង។ ខ្ញុំក៏ខឹងដែលគាត់ទៅចោលខ្ញុំ»។ បន្ថែមទៅទៀត បងអាណាមានអារម្មណ៍ឯកោ ហើយធុញទ្រាន់ដែលគាត់ត្រូវធ្វើការសម្រេចចិត្តចំពោះរឿងដែលបងលូអ៊ីសធ្លាប់ធ្វើបានយ៉ាងល្អ។ ជួនកាល គាត់មានអារម្មណ៍ហាក់ដូចជាគាត់នៅក្នុងព្យុះកណ្ដាលសមុទ្រ។ តើព្រះយេហូវ៉ាជួយយើងយ៉ាងដូចម្ដេចពេលអារម្មណ៍របស់យើងដូចជាលិចលង់ក្នុងទឹក?
៨. ដូចបានចែងនៅចម្រៀងសរសើរព្រះ ៦២:២ តើព្រះយេហូវ៉ាពង្រឹងទំនុកចិត្តយើងអំពីអ្វី?
៨ អ្វីដែលព្រះយេហូវ៉ាធ្វើ។ លោកពង្រឹងទំនុកចិត្តយើងថាលោកនឹងធ្វើឲ្យយើងនឹងនរ។ (សូមអាន ចម្រៀងសរសើរព្រះ ៦២:២) ពេលមានព្យុះនៅសមុទ្រ កប៉ាល់ប្រហែលជាចាប់ផ្ដើមឃ្លេងឃ្លោងយ៉ាងខ្លាំង។ ដើម្បីមិនឲ្យកប៉ាល់ឃ្លេងឃ្លោង កប៉ាល់ជាច្រើនមានស្លាបទាំងសងខាងនៅបាតវា។ ស្លាបកប៉ាល់ទាំងនេះអាចជួយកាត់បន្ថយភាពឃ្លេងឃ្លោង។ យ៉ាងនេះ មនុស្សនៅលើកប៉ាល់មានសុវត្ថិភាពជាង ហើយការធ្វើដំណើររបស់ពួកគេកាន់តែស្រួល។ ប៉ុន្តែ ស្លាបកប៉ាល់ជាច្រើនដំណើរការយ៉ាងល្អបំផុតពេលដែលកប៉ាល់ទៅមុខ។ ស្រដៀងគ្នាដែរ ព្រះយេហូវ៉ានឹងធ្វើឲ្យយើងនឹងនរ កាលដែលយើងបន្តទៅមុខយ៉ាងស្មោះត្រង់ក្នុងគ្រាលំបាក។
សូមធ្វើឲ្យខ្លួនមានភាពនឹងនរដោយទទួលជំនួយពីឧបករណ៍ស្រាវជ្រាវរបស់យើង (សូមមើលវគ្គ៨-៩)
៩. តើឧបករណ៍ស្រាវជ្រាវរបស់យើងអាចជួយយើងឲ្យរក្សាភាពនឹងនរយ៉ាងដូចម្ដេច? (សូមមើលរូបភាពផងដែរ)
៩ អ្វីដែលយើងត្រូវធ្វើ។ ពេលអ្នកមានអារម្មណ៍ពិបាកហាក់ដូចជាព្យុះកំពុងបក់បោកមកលើអ្នក សូមខំអស់ពីសមត្ថភាពដើម្បីបន្តអធិដ្ឋាន ចូលរួមកិច្ចប្រជុំ និងផ្សព្វផ្សាយ។ ពិតមែន អ្នកប្រហែលជាមិនអាចធ្វើច្រើនដូចពីមុនទេ ប៉ុន្តែសូមចាំថាព្រះយេហូវ៉ាជាព្រះដែលសមហេតុសមផល។ (សូមពិនិត្យបន្ថែម លូកា ២១:១-៤) ម្យ៉ាងទៀត សូមលៃទុកពេលដើម្បីសិក្សាផ្ទាល់ខ្លួននិងរំពឹងគិត។ ហេតុអ្វី? តាមរយៈអង្គការរបស់លោក ព្រះយេហូវ៉ាបានផ្ដល់ព័ត៌មានល្អៗពីគម្ពីរដែលអាចជួយយើងឲ្យរក្សាភាពនឹងនរ។ ដើម្បីស្វែងរកអ្វីដែលអ្នកត្រូវការ អ្នកអាចប្រើឧបករណ៍ស្រាវជ្រាវដែលមានក្នុងភាសារបស់អ្នក ដូចជាកម្មវិធីJWបណ្ណាល័យ និងជំនួយស្រាវជ្រាវសម្រាប់សាក្សីព្រះយេហូវ៉ា។ បងម៉ូនីកាដែលបានត្រូវរៀបរាប់នៅខាងលើនិយាយថា គាត់ប្រើឧបករណ៍ស្រាវជ្រាវទាំងនេះពេលគាត់ចាប់ផ្ដើមមានអារម្មណ៍ឈឺចិត្តខ្លាំងទៅៗ។ ជាឧទាហរណ៍ គាត់បានវាយពាក្យ«កំហឹង»ក្នុងប្រអប់ស្វែងរក។ នៅពេលផ្សេងទៀត គាត់បានវាយពាក្យ«ក្បត់»ឬ«ភក្ដីភាព»ក្នុងប្រអប់ស្វែងរក ហើយក្រោយមកគាត់អានព័ត៌មាននោះរហូតដល់គាត់មានអារម្មណ៍ល្អជាង។ គាត់និយាយថា៖ «ខ្ញុំចាប់ផ្ដើមវ៉ៃអក្សរទាំងស្លន់ស្លោដោយអារម្មណ៍មិនស្រួល តែបន្ទាប់មកគឺហាក់ដូចជាព្រះយេហូវ៉ាឱបខ្ញុំយ៉ាងកក់ក្ដៅ។ កាលដែលខ្ញុំអាន ខ្ញុំបានទទួលស្គាល់ថាព្រះយេហូវ៉ាយល់អំពីអារម្មណ៍ផ្សេងៗទាំងអស់របស់ខ្ញុំ ហើយថាលោកកំពុងជួយខ្ញុំ»។ ជំនួយបែបនេះពីព្រះយេហូវ៉ាក៏អាចជួយអ្នកឲ្យរក្សាភាពនឹងនររហូតដល់អ្នកមានអារម្មណ៍ស្ងប់ជាង។—ចសព. ១១៩:១៤៣, ១៤៤
ព្រះយេហូវ៉ានឹងគាំទ្រអ្នក
១០. តើយើងប្រហែលជាមានអារម្មណ៍យ៉ាងណាក្រោយពីរឿងខ្លោចផ្សា?
១០ ការពិបាក។ ក្រោយពីរឿងខ្លោចផ្សា ប្រហែលជាមានថ្ងៃដែលយើងខ្សោយកម្លាំងកាយនិងកម្លាំងចិត្ត។ យើងប្រហែលជាមានអារម្មណ៍ដូចកីឡាករថ្លោះគ្រេចដែលធ្លាប់រត់យ៉ាងលឿន ប៉ុន្តែឥឡូវដើរខ្ញើចៗ។ យើងប្រហែលជាពិបាកធ្វើអ្វីដែលយើងធ្លាប់ស្រួលធ្វើ ឬយើងប្រហែលជាមិនចង់ធ្វើអ្វីដែលពីមុនធ្វើឲ្យយើងសប្បាយ។ ដូចអេលីយ៉ា យើងអាចមានអារម្មណ៍ថាគឺពិបាកក្រោកឡើង ហើយថាយើងគ្រាន់តែចង់ដេក។ (១បស. ១៩:៥-៧) តើព្រះយេហូវ៉ាសន្យាថានឹងធ្វើអ្វីពេលយើងខ្សោយ?
១១. តើព្រះយេហូវ៉ាជួយយើងតាមរបៀបអ្វីទៀត? (ចម្រៀងសរសើរព្រះ ៩៤:១៨)
១១ អ្វីដែលព្រះយេហូវ៉ាធ្វើ។ លោកសន្យាថានឹងគាំទ្រយើង។ (សូមអាន ចម្រៀងសរសើរព្រះ ៩៤:១៨) ដូចកីឡាករដែលថ្លោះគ្រេចត្រូវការការគាំទ្រដើម្បីធ្វើអ្វីផ្សេងៗ យើងប្រហែលជាត្រូវការជំនួយដើម្បីបន្តជាប់រវល់ក្នុងកិច្ចបម្រើព្រះយេហូវ៉ា។ នៅពេលនោះ ព្រះយេហូវ៉ាពង្រឹងទំនុកចិត្តយើងថា៖ «ខ្ញុំជាយេហូវ៉ាជាព្រះរបស់អ្នក ខ្ញុំនឹងស្រវាចាប់ដៃស្ដាំរបស់អ្នក ខ្ញុំនឹងនិយាយមកអ្នកថា៖ ‹កុំខ្លាចឡើយ ខ្ញុំនឹងជួយអ្នក›»។ (អេ. ៤១:១៣) ស្ដេចដាវីឌធ្លាប់ទទួលជំនួយនេះ។ ពេលប្រឈមមុខនឹងទុក្ខលំបាកនិងសត្រូវ គាត់បាននិយាយទៅព្រះយេហូវ៉ាថា៖ «ដៃស្ដាំរបស់លោកជួយទ្រទ្រង់ខ្ញុំ»។ (ចសព. ១៨:៣៥) ប៉ុន្តែ តើព្រះយេហូវ៉ាផ្ដល់ការគាំទ្រតាមរបៀបណា?
សូមព្រមទទួលការគាំទ្រពីក្រុមគ្រួសារ មិត្តភក្ដិ និងពួកអ្នកចាស់ទុំ (សូមមើលវគ្គ១១-១៣)
១២. តើព្រះយេហូវ៉ាប្រហែលជាប្រើអ្នកណាខ្លះដើម្បីជួយយើងពេលយើងខ្សោយ?
១២ ព្រះយេហូវ៉ាច្រើនតែគាំទ្រយើងដោយជំរុញចិត្តអ្នកឯទៀតឲ្យជួយយើង។ ជាឧទាហរណ៍ នៅពេលមួយ ពេលដែលដាវីឌមានអារម្មណ៍ខ្សោយ មិត្តភក្តិរបស់គាត់យ៉ូណាថានបានទៅជួបគាត់ដើម្បីពង្រឹងកម្លាំងនិងលើកទឹកចិត្តគាត់។ (១សាំ. ២៣:១៦, ១៧) ស្រដៀងគ្នាដែរ ព្រះយេហូវ៉ាជ្រើសរើសអេលីសេឲ្យផ្ដល់ជំនួយដល់អេលីយ៉ា។ (១បស. ១៩:១៦, ២១; ២បស. ២:២) សព្វថ្ងៃនេះ ព្រះយេហូវ៉ាប្រហែលជាប្រើក្រុមគ្រួសារ មិត្តភក្តិ ឬពួកអ្នកចាស់ទុំឲ្យគាំទ្រយើង។ ប៉ុន្តែពេលយើងឈឺចិត្ត យើងប្រហែលជាចង់ញែកខ្លួនពីអ្នកឯទៀត ហើយនៅតែឯង។ នេះជាប្រតិកម្មធម្មតា។ តើយើងអាចធ្វើអ្វីដើម្បីទទួលការគាំទ្រពីព្រះយេហូវ៉ា?
១៣. តើយើងត្រូវធ្វើអ្វីដើម្បីទទួលការគាំទ្រពីព្រះយេហូវ៉ា? (សូមមើលរូបភាពផងដែរ)
១៣ អ្វីដែលយើងត្រូវធ្វើ។ សូមព្យាយាមយ៉ាងខ្លាំងមិនញែកខ្លួនពីអ្នកឯទៀត។ ពេលយើងញែកខ្លួនពីអ្នកឯទៀត យើងប្រហែលជាចាប់ផ្ដើមគិតតែអំពីខ្លួនឯងនិងបញ្ហាដែលយើងជួបប្រទះ។ ការគិតគូរបែបនេះ អាចមានឥទ្ធិពលលើការសម្រេចចិត្តរបស់យើង។ (សុភ. ១៨:១) ពិតមែនថា យើងទាំងអស់គ្នាត្រូវការពេលដើម្បីនៅម្នាក់ឯង ជាពិសេសពេលប្រឈមមុខនឹងស្ថានភាពដ៏គួរឲ្យខ្លោចផ្សា។ ប៉ុន្តែ បើយើងញែកខ្លួនពីអ្នកឯទៀតអស់រយៈពេលយូរ យើងអាចបដិសេធជំនួយពីមនុស្សដែលព្រះយេហូវ៉ាកំពុងប្រើដើម្បីគាំទ្រយើង។ ដូច្នេះ សូមព្រមទទួលជំនួយពីក្រុមគ្រួសារ មិត្តភក្តិ និងពួកអ្នកចាស់ទុំ។ ទោះជានៅគ្រាលំបាកគឺពិបាកឲ្យធ្វើដូច្នេះក្ដី សូមចាត់ទុកថាព្រះយេហូវ៉ាកំពុងប្រើពួកគេដើម្បីគាំទ្រអ្នក។—សុភ. ១៧:១៧; អេ. ៣២:១, ២
ព្រះយេហូវ៉ានឹងសម្រាលទុក្ខអ្នក
១៤. តើយើងប្រហែលជាជួបស្ថានភាពដ៏គួរឲ្យភ័យខ្លាចបែបណាខ្លះ?
១៤ ការពិបាក។ ពេលខ្លះ យើងប្រហែលជាភ័យខ្លាច។ ក្នុងគម្ពីរ អ្នកបម្រើដ៏ស្មោះត្រង់របស់ព្រះនិយាយអំពីពេលខ្លះដែលពួកគេតានតឹងចិត្តនិងភ័យញ័រ ដោយសារពួកសត្រូវឬមានសម្ពាធផ្សេងទៀត។ (ចសព. ១៨:៤; ៥៥:១, ៥) ស្រដៀងគ្នាដែរ យើងប្រហែលជាប្រឈមមុខនឹងការប្រឆាំងនៅសាលា នៅកន្លែងធ្វើការ ពីក្រុមគ្រួសាររបស់យើង ឬពីរដ្ឋាភិបាល។ យើងប្រហែលជាថែមទាំងប្រឈមមុខនឹងសេចក្ដីស្លាប់ ដោយសារបញ្ហាសុខភាព។ ក្នុងអំឡុងពេលបែបនេះ យើងប្រហែលជាមានអារម្មណ៍ថាត្រូវការជំនួយដូចកូនក្មេងតូច។ តើព្រះយេហូវ៉ាជួយយើងនៅគ្រាដូចនេះយ៉ាងដូចម្ដេច?
១៥. តើចម្រៀងសរសើរព្រះ ៩៤:១៩ ពង្រឹងទំនុកចិត្តយើងយ៉ាងណា?
១៥ អ្វីដែលព្រះយេហូវ៉ាធ្វើ។ លោកសម្រាលទុក្ខនិងធ្វើឲ្យយើងសប្បាយចិត្តឡើងវិញ។ (សូមអាន ចម្រៀងសរសើរព្រះ ៩៤:១៩) ចម្រៀងសរសើរព្រះនេះប្រហែលជាធ្វើឲ្យយើងគិតអំពីក្មេងស្រីម្នាក់ដែលភ័យខ្លាចនិងគេងមិនលក់ ដោយសារព្យុះភ្លៀងដ៏ខ្លាំង។ យើងអាចស្រមៃឃើញឪពុករបស់គាត់ចូលមក ហើយលើកគាត់ឱបរហូតដល់គាត់គេងលក់។ ទោះជាព្យុះភ្លៀងនោះនៅតែមាន គាត់មានអារម្មណ៍ថាខ្លួនមានសុវត្ថិភាពនិងទទួលការសម្រាលទុក្ខក្នុងរង្វង់ដៃរបស់ឪពុក។ ពេលយើងប្រឈមមុខនឹងទុក្ខលំបាកដែលធ្វើឲ្យយើងភ័យខ្លាច យើងក៏ប្រហែលជាត្រូវការបិតាដែលនៅស្ថានសួគ៌ឱបយើងក្នុងន័យធៀបរហូតដល់យើងមានអារម្មណ៍ស្ងប់ជាង។ តើយើងអាចទទួលការសម្រាលទុក្ខបែបនេះពីព្រះយេហូវ៉ាតាមរបៀបណា?
សូមឲ្យបិតារបស់អ្នកនៅស្ថានសួគ៌សម្រាលទុក្ខអ្នកតាមរយៈបទគម្ពីរ (សូមមើលវគ្គ១៥-១៦)
១៦. តើយើងអាចធ្វើអ្វីដើម្បីទទួលការសម្រាលទុក្ខពីព្រះយេហូវ៉ា? (សូមមើលរូបភាពផងដែរ)
១៦ អ្វីដែលយើងត្រូវធ្វើ។ សូមចំណាយពេលជាទៀងទាត់ជាមួយព្រះយេហូវ៉ា ដោយអធិដ្ឋានទៅលោកនិងអានបណ្ដាំលោក។ (ចសព. ៧៧:១, ១២-១៤) បើអ្នកមានទម្លាប់បែបនេះ អ្វីដំបូងដែលអ្នកនឹងទំនងជាធ្វើពេលអ្នកមានការតានតឹងចិត្ត គឺរកជំនួយពីបិតារបស់អ្នកនៅស្ថានសួគ៌។ សូមប្រាប់អំពីការភ័យខ្លាចនិងការព្រួយបារម្ភរបស់អ្នកទៅព្រះយេហូវ៉ា។ សូមឲ្យលោកនិយាយមកកាន់អ្នកនិងសម្រាលទុក្ខអ្នកតាមរយៈបទគម្ពីរ។ (ចសព. ១១៩:២៨) អ្នកប្រហែលជាឃើញថាផ្នែកខ្លះនៃគម្ពីរអាចសម្រាលទុក្ខអ្នកយ៉ាងខ្លាំងពេលភ័យខ្លាច។ ជាឧទាហរណ៍ អ្នកប្រហែលជាទទួលការលើកទឹកចិត្តពីសៀវភៅយ៉ូប ចម្រៀងសរសើរព្រះ និងសុភាសិត ព្រមទាំងពីប្រសាសន៍របស់លោកយេស៊ូនៅម៉ាថាយ ជំពូក៦។ កាលដែលអ្នកអធិដ្ឋានទៅព្រះយេហូវ៉ានិងអានបណ្ដាំលោក អ្នកនឹងទទួលការសម្រាលទុក្ខពីលោក។
១៧. តើយើងអាចមានទំនុកចិត្តអ្វី?
១៧ យើងអាចមានទំនុកចិត្តថាព្រះយេហូវ៉ានឹងជួយយើងជានិច្ចក្នុងអំឡុងគ្រាដ៏អាប់អួក្នុងជីវិតរបស់យើង។ យើងនឹងមិននៅតែឯងឡើយ។ (ចសព. ២៣:៤; ៩៤:១៤) ព្រះយេហូវ៉ាសន្យាថាលោកនឹងការពារ គាំទ្រ សម្រាលទុក្ខ និងធ្វើឲ្យយើងនឹងនរ។ អេសាយ ២៦:៣ចែងអំពីព្រះយេហូវ៉ាថា៖ «លោកនឹងការពារអស់អ្នកដែលពឹងផ្អែកលើលោកទាំងស្រុង លោកនឹងផ្ដល់សេចក្ដីសុខសាន្តដល់ពួកគេជានិច្ច ព្រោះពួកគេទុកចិត្តលោក»។ ដូច្នេះ សូមទុកចិត្តព្រះយេហូវ៉ា ហើយខំអស់ពីសមត្ថភាពដើម្បីទទួលជំនួយទាំងអស់ពីលោក។ បើអ្នកធ្វើដូច្នេះ អ្នកនឹងទទួលកម្លាំងឡើងវិញសូម្បីតែក្នុងអំឡុងគ្រាលំបាកក្ដី។
តើអ្នកនឹងឆ្លើយយ៉ាងណា?
-
តើយើងប្រហែលជាត្រូវការជំនួយពីព្រះយេហូវ៉ានៅពេលណាជាពិសេស?
-
តើព្រះយេហូវ៉ាជួយយើងតាមរបៀបបួនយ៉ាងអ្វីក្នុងអំឡុងគ្រាពិបាក?
-
តើយើងអាចធ្វើអ្វីដើម្បីទទួលជំនួយពីព្រះយេហូវ៉ា?
ចម្រៀងលេខ១២ ព្រះយេហូវ៉ាខ្លាំងក្លាមហិមា
a ឈ្មោះខ្លះបានត្រូវផ្លាស់ប្ដូរ។
