អត្ថបទសិក្សា ៣
ចម្រៀងលេខ៣៥ «ពិចារណាឲ្យដឹងប្រាកដថាការអ្វីដែលសំខាន់ជាង»
ចូរធ្វើការសម្រេចចិត្តដែលនាំឲ្យព្រះយេហូវ៉ាពេញចិត្ត
«ការកោតខ្លាចព្រះយេហូវ៉ាជាទីចាប់ផ្ដើមនៃប្រាជ្ញា ហើយការស្គាល់ព្រះដ៏បរិសុទ្ធបំផុត នាំឲ្យមានការយល់ដឹង»។—សុភ. ៩:១០
ចំណុចផ្ដោត
របៀបប្រើចំណេះ ការយល់ដឹង និងសមត្ថភាពវែកញែកដើម្បីធ្វើការសម្រេចចិត្តឈ្លាសវៃ។
១. តើយើងទាំងអស់គ្នាមានការពិបាកអ្វី?
ជារៀងរាល់ថ្ងៃយើងត្រូវធ្វើការសម្រេចចិត្ត។ ការសម្រេចចិត្តខ្លះគឺស្រួល ដូចជាអ្វីដែលយើងនឹងបរិភោគសម្រាប់អាហារពេលព្រឹក ឬចូលគេងម៉ោងប៉ុន្មាន។ រីឯការសម្រេចចិត្តខ្លះទៀត គឺមិនសូវស្រួលទេ។ ការសម្រេចចិត្តទាំងនោះប្រហែលជាប៉ះពាល់ដល់សុខភាព សុភមង្គល មនុស្សជាទីស្រឡាញ់ ឬការគោរពប្រណិប័តន៍របស់យើង។ យើងចង់ធ្វើការសម្រេចចិត្តដែលផ្ដល់ប្រយោជន៍ដល់យើងនិងក្រុមគ្រួសាររបស់យើង។ សំខាន់បំផុត យើងសង្ឃឹមថាការសម្រេចចិត្តរបស់យើងនឹងនាំឲ្យព្រះយេហូវ៉ាពេញចិត្ត។—រ៉ូម ១២:១, ២
២. តើអ្នកអាចធ្វើអ្វីដើម្បីធ្វើការសម្រេចចិត្តដ៏ឈ្លាសវៃ?
២ អ្នកទំនងជាអាចធ្វើការសម្រេចចិត្តដ៏ឈ្លាសវៃបើអ្នក (១) រកព័ត៌មាន (២) គិតពិចារណាអំពីទស្សនៈរបស់ព្រះយេហូវ៉ាចំពោះរឿងនោះ និង(៣) ថ្លឹងថ្លែងអំពីជម្រើសផ្សេងៗ។ ក្នុងអត្ថបទនេះ យើងនឹងពិចារណាអំពីអ្វីទាំងបីនេះដែលយើងត្រូវធ្វើ។ អត្ថបទនេះក៏នឹងជួយយើងឲ្យឃើញរបៀបដែលយើងអាចបង្វឹកបង្ហាត់សមត្ថភាពវែកញែករបស់យើង។—សុភ. ២:១១
ចូររកព័ត៌មាន
៣. សូមលើកឧទាហរណ៍អំពីមូលហេតុដែលអ្នកត្រូវរកព័ត៌មានមុនធ្វើការសម្រេចចិត្ត។
៣ អ្វីដំបូងដែលអ្នកត្រូវធ្វើដើម្បីធ្វើការសម្រេចចិត្តល្អគឺរកព័ត៌មាន។ ហេតុអ្វីនោះគឺសំខាន់? សូមស្រមៃថា អ្នកជំងឺម្នាក់ដែលមានបញ្ហាសុខភាពធ្ងន់ធ្ងរទៅជួបគ្រូពេទ្យ។ តើគ្រូពេទ្យនឹងធ្វើការសម្រេចចិត្តអំពីរបៀបព្យាបាលដោយមិនធ្វើរោគវិនិច្ឆ័យ ឬមិនសួរសំណួរផ្សេងៗជាមុនសិនឬទេ? ច្បាស់ជាមិនមែនទេ។ ស្រដៀងគ្នាដែរ អ្នកនឹងធ្វើការសម្រេចចិត្តល្អជាង បើអ្នកពិចារណាព័ត៌មានដែលជាប់ទាក់ទងនឹងស្ថានភាពរបស់អ្នកជាមុនសិន។ តើអ្នកអាចធ្វើដូច្នោះយ៉ាងដូចម្ដេច?
៤. ស្របតាមសុភាសិត ១៨:១៣ ដើម្បីរកព័ត៌មាន តើអ្នកអាចធ្វើអ្វី? (សូមមើលរូបភាពផងដែរ)
៤ ដើម្បីរកព័ត៌មានដែលយើងចង់បាន យើងអាចសួរសំណួរ។ ជាឧទាហរណ៍ សូមស្រមៃថាអ្នកបានត្រូវអញ្ជើញឲ្យចូលរួមកម្មវិធីជួបជុំសេពគប់គ្នាមួយ។ តើអ្នកគួរចូលរួមឬទេ? បើអ្នកមិនស្គាល់ម្ចាស់កម្មវិធីឬមិនស្គាល់អ្វីដែលគាត់បានរៀបចំសម្រាប់កម្មវិធីនោះ អ្នកនឹងត្រូវសួរគាត់នូវសំណួរដូចជា៖ «តើកម្មវិធីនោះនឹងធ្វើឡើងកន្លែងណា ហើយនៅពេលណា? តើមានមនុស្សប៉ុន្មាននាក់ចូលរួម? តើអ្នកណាជាអ្នកមើលការខុសត្រូវកម្មវិធីនោះ? តើអ្នកណាខ្លះនឹងចូលរួម? តើមានគម្រោងធ្វើអ្វីខ្លះក្នុងកម្មវិធីនោះ? តើកម្មវិធីនោះមានស្រាឬទេ?»។ ចម្លើយចំពោះសំណួរទាំងនេះនឹងជួយអ្នកឲ្យធ្វើការសម្រេចចិត្តដ៏ឈ្លាសវៃ។—សូមអាន សុភាសិត ១៨:១៣
៥. តើអ្នកគួរធ្វើអ្វីក្រោយពីអ្នកស្គាល់ព័ត៌មានផ្សេងៗ?
៥ បន្ទាប់មក ក្រោយពីអ្នកស្គាល់ព័ត៌មាន សូមគិតយ៉ាងយកចិត្តទុកដាក់អំពីស្ថានភាពនោះទាំងមូល។ ជាឧទាហរណ៍ ចុះបើអ្នកដឹងថាបុគ្គលដែលចូលរួមកម្មវិធីនោះមិនមែនជាអ្នកធ្វើតាមខ្នាតតម្រារបស់ព្រះយេហូវ៉ា ឬស្គាល់ថានឹងមានស្រា ប៉ុន្តែគ្មានអ្នកណាធ្វើឲ្យប្រាកដថាអ្នកចូលរួមមិនផឹកស្រាហួសប្រមាណ? តើអ្នកគិតថាកម្មវិធីនោះប្រហែលជានឹងទៅជាការជប់លៀងសប្បាយឥតបើគិតឬទេ? (១ពេ. ៤:៣) ម្យ៉ាងទៀត តើអ្នកគួរធ្វើអ្វីបើកម្មវិធីនោះនឹងធ្វើឲ្យអ្នកខកខានចូលរួមកិច្ចប្រជុំក្រុមជំនុំ ឬមិនអាចចូលរួមក្នុងកិច្ចបម្រើផ្សាយ? ពេលអ្នកគិតអំពីព័ត៌មានទាំងអស់ដែលជាប់ទាក់ទងនឹងស្ថានភាពនោះ អ្នកនឹងកាន់តែស្រួលធ្វើការសម្រេចចិត្តល្អ។ ប៉ុន្តែ មានអ្វីមួយទៀតដែលអ្នកត្រូវធ្វើ។ អ្នកដឹងថាខ្លួនមានអារម្មណ៍ យ៉ាងណាចំពោះស្ថាននោះ តែតើព្រះយេហូវ៉ាមានអារម្មណ៍យ៉ាងណា?—សុភ. ២:៦
សូមគិតពិចារណាអំពីទស្សនៈព្រះយេហូវ៉ា
៦. យោងទៅតាមយ៉ាកុប ១:៥ ហេតុអ្វីយើងគួរអធិដ្ឋានសុំជំនួយពីព្រះយេហូវ៉ា?
៦ សូមសុំព្រះយេហូវ៉ាឲ្យជួយអ្នកយល់ទស្សនៈរបស់លោក។ ព្រះយេហូវ៉ាសន្យាថាលោកនឹងឲ្យប្រាជ្ញាដល់យើង ដើម្បីស្វែងយល់ថាការសម្រេចចិត្តណាមួយនឹងធ្វើឲ្យលោកពេញចិត្តឬមិនពេញចិត្ត។ លោកឲ្យប្រាជ្ញាបែបនោះ«ដោយចិត្តទូលាយដល់មនុស្សទាំងអស់ ហើយលោកមិនស្ដីបន្ទោសឡើយ»។—សូមអាន យ៉ាកុប ១:៥
៧. តើអ្នកអាចរៀនអំពីទស្សនៈរបស់ព្រះយេហូវ៉ាយ៉ាងដូចម្ដេច? សូមលើកឧទាហរណ៍។
៧ បន្ទាប់ពីអ្នកបានអធិដ្ឋានសុំការណែនាំពីព្រះយេហូវ៉ា សូមស្វែងយល់យ៉ាងយកចិត្តទុកដាក់ចំពោះចម្លើយរបស់លោក។ ជាឧទាហរណ៍ បើអ្នកវង្វេងផ្លូវពេលកំពុងធ្វើដំណើរ អ្នកប្រហែលជាសុំជំនួយពីអ្នកដែលរស់នៅតំបន់នោះ។ ប៉ុន្តែ តើអ្នកនឹងដើរចេញមុនគាត់មានឱកាសប្រាប់ផ្លូវឬទេ? ច្បាស់ជាមិនមែនទេ។ អ្នកនឹងស្ដាប់យ៉ាងយកចិត្តទុកដាក់ចំពោះការណែនាំរបស់គាត់។ ស្រដៀងគ្នាដែរ ក្រោយពីអ្នកសុំប្រាជ្ញាពីព្រះយេហូវ៉ា សូមព្យាយាមស្វែងយល់ចម្លើយរបស់លោក ដោយស្វែងរកច្បាប់និងគោលការណ៍គម្ពីរដែលជាប់ទាក់ទងនឹងស្ថានភាពរបស់អ្នក។ ជាឧទាហរណ៍ ពេលអ្នកសម្រេចចិត្តថាចូលរួមឬមិនចូលរួមកម្មវិធីជួបជុំសេពគប់គ្នាដូចដែល បានរៀបរាប់នៅខាងលើ អ្នកប្រហែលជាគិតពិចារណាអំពីអ្វីដែលគម្ពីរចែងអំពីការជប់លៀងសប្បាយឥតបើគិត ការសេពគប់អាក្រក់ និងសារៈសំខាន់នៃការចាត់ទុកកិច្ចការរាជាណាក្រថាសំខាន់ជាងចំណងចំណូលចិត្តផ្ទាល់ខ្លួន។—ម៉ាថ. ៦:៣៣; រ៉ូម ១៣:១៣; ១កូ. ១៥:៣៣
៨. ចុះយ៉ាងណាបើអ្នកត្រូវការជំនួយដើម្បីស្វែងរកព័ត៌មានដែលអ្នកត្រូវការ តើអ្នកអាចធ្វើអ្វី? (សូមមើលរូបភាពផងដែរ)
៨ ប៉ុន្តែ ជួនកាលអ្នកប្រហែលជាត្រូវការជំនួយដើម្បីរកព័ត៌មានដែលអ្នកត្រូវការ។ អ្នកប្រហែលជានឹងទទួលយោបល់ពីបងប្អូនដែលមានបទពិសោធន៍។ ទោះជាដូច្នោះក៏ដោយ អ្នកក៏នឹងទទួលប្រយោជន៍បើអ្នកធ្វើការស្រាវជ្រាវផ្ទាល់ខ្លួន។ នៅក្នុងឧបករណ៍ស្រាវជ្រាវផ្សេងៗរបស់យើងមានព័ត៌មានជាច្រើន ដូចជានៅក្នុងជំនួយស្រាវជ្រាវសម្រាប់សាក្សីព្រះយេហូវ៉ា និងបទគម្ពីរសម្រាប់ជីវិតជាគ្រិស្តសាសនិក។ សូមចាំថាគោលដៅរបស់អ្នក គឺធ្វើការសម្រេចចិត្តដែលនឹងនាំឲ្យព្រះយេហូវ៉ាពេញចិត្ត។
៩. តើយើងអាចប្រាកដយ៉ាងណាថាការសម្រេចចិត្តរបស់យើងនឹងនាំឲ្យព្រះយេហូវ៉ាពេញចិត្ត? (អេភេសូរ ៥:១៧)
៩ តើយើងអាចប្រាកដយ៉ាងណាថាការសម្រេចចិត្តរបស់យើងនឹងនាំឲ្យព្រះយេហូវ៉ាពេញចិត្ត? ដំបូង យើងត្រូវស្គាល់លោកឲ្យបានច្បាស់។ គម្ពីរចែងថា៖ «ការស្គាល់ព្រះដ៏បរិសុទ្ធបំផុត នាំឲ្យមានការយល់ដឹង»។ (សុភ. ៩:១០) មែនហើយ ការយល់ដឹងពិតប្រាកដគឺមកពីការស្គាល់គុណសម្បត្តិរបស់ព្រះយេហូវ៉ា គោលបំណងរបស់លោក និងអ្វីដែលលោកស្រឡាញ់ឬស្អប់។ សូមសួរខ្លួនអ្នកថា ‹តាមអ្វីដែលខ្ញុំដឹងអំពីព្រះយេហូវ៉ា តើខ្ញុំអាចធ្វើការសម្រេចចិត្តបែបណាដើម្បីនាំឲ្យលោកពេញចិត្ត?›។—សូមអាន អេភេសូរ ៥:១៧
១០. ហេតុអ្វីគោលការណ៍គម្ពីរគឺសំខាន់ជាងទំនៀមទម្លាប់ ក្រុមគ្រួសារ ឬវប្បធម៌?
១០ ដើម្បីធ្វើឲ្យព្រះយេហូវ៉ាពេញចិត្ត ជួនកាលយើងត្រូវធ្វើអ្វីដែលនឹងនាំឲ្យបុគ្គលដែលយើងជិតស្និទ្ធខកចិត្ត។ ជាឧទាហរណ៍ ដោយមានបំណងចិត្តល្អ ឪពុកម្ដាយខ្លះព្យាយាមបង្ខិតបង្ខំកូនស្រីរបស់ពួកគេឲ្យរៀបការជាមួយបុរសអ្នកមានម្នាក់ ឬអ្នកដែលអាចជូនបណ្ណាការខ្ពស់ ទោះជាបុរសនោះមានជំនឿខ្សោយក៏ដោយ។ ពិតមែនថា ពួកគេចង់ឲ្យកូនស្រីរបស់ពួកគេមានជីវិតសុខស្រួល ប៉ុន្តែតើអ្នកណានឹងជួយនាងឲ្យមានចំណងមិត្តភាពជិតស្និទ្ធជាមួយព្រះយេហូវ៉ា? តើព្រះយេហូវ៉ាមានទស្សនៈយ៉ាងណាចំពោះរឿងនេះ? យើងអាចឃើញចម្លើយនៅម៉ាថាយ ៦:៣៣។ នៅទីនោះ លោកយេស៊ូបានដាស់តឿនគ្រិស្តសាសនិកឲ្យ‹បន្តស្វែងរករាជាណាចក្រជាមុន›។ ទោះបីជាយើងឲ្យកិត្តិយសឪពុកម្ដាយយើង និងគោរពមនុស្សក្នុងសហគមន៍របស់យើងក្ដី អ្វីដែលសំខាន់បំផុតចំពោះយើងគឺធ្វើឲ្យព្រះយេហូវ៉ាពេញចិត្ត។
ចូរថ្លឹងថ្លែងអំពីជម្រើសផ្សេងៗ
១១. តើគុណសម្បត្តិអ្វីនៅភីលីព ១:៩, ១០ នឹងជួយអ្នកឲ្យថ្លឹងថ្លែងអំពីជម្រើសរបស់អ្នក?
១១ បន្ទាប់ពីអ្នកបានគិតពិចារណាអំពីគោលការណ៍គម្ពីរដែលជាប់ទាក់ទងនឹងការសម្រេចចិត្តរបស់អ្នក អ្នកត្រូវគិតយ៉ាងយកចិត្តទុកដាក់អំពីជម្រើសផ្សេងៗ។ (សូមអាន ភីលីព ១:៩, ១០) សមត្ថភាពវែកញែកនឹងជួយអ្នកឲ្យស្វែងយល់អំពីលទ្ធផលផ្សេងៗដែលប្រហែលជានឹងកើតឡើងចំពោះជម្រើសនីមួយៗ។ ជួនកាល គឺងាយស្រួលធ្វើការសម្រេចចិត្ត។ ប៉ុន្តែ មិនមែនការសម្រេចចិត្តទាំងអស់សុទ្ធតែងាយស្រួលនោះទេ។ សមត្ថភាពវែកញែកនឹងជួយអ្នកឲ្យធ្វើការសម្រេចចិត្តដ៏ឈ្លាសវៃ សូម្បីតែអ្នកស្ថិតនៅក្នុងស្ថានភាពដែលស្មុគស្មាញក៏ដោយ។
១២-១៣. តើតាមរបៀបណាសមត្ថភាពវែកញែកអាចជួយអ្នកឲ្យធ្វើការសម្រេចចិត្តដ៏ឈ្លាសវៃស្ដីអំពីការងារ?
១២ សូមស្រមៃគិតអំពីស្ថានភាពនេះ។ អ្នកកំពុងស្វែងរកការងារដើម្បីផ្គត់ផ្គង់ក្រុមគ្រួសាររបស់អ្នក។ បន្ទាប់មក អ្នករកឃើញឱកាសការងារពីរ។ ដូច្នេះ អ្នកគិតអំពីព័ត៌មានផ្សេងៗដូចជា តើនោះជាការងារបែបណា មានម៉ោងធ្វើការបែបណា និងត្រូវធ្វើដំណើរយូរប៉ុណ្ណាជាដើម។ ការងារទាំងពីរនោះគឺមិនខុសពីគោលការណ៍គម្ពីរទេ។ អ្នកប្រហែលជាចូលចិត្តការងារណាមួយ ដោយសារអ្នកចូលចិត្តការងារបែបនោះ ឬ ដោយសារការងារនោះផ្ដល់ប្រាក់ខែខ្ពស់ជាង។ ប៉ុន្តែ មានអ្វីផ្សេងទៀតដែលអ្នកត្រូវគិតមុនធ្វើការសម្រេចចិត្ត។
១៣ ជាឧទាហរណ៍ តើការងារណាមួយនឹងប៉ះពាល់ដល់ការចូលរួមកិច្ចប្រជុំឬទេ? តើការងារណាមួយនឹងកាត់បន្ថយពេលវេលាដែលអ្នកត្រូវការដើម្បីជួយក្រុមគ្រួសារឲ្យមានភាពកក់ក្ដៅ មានសុភមង្គល និងចូលទៅជិតព្រះយេហូវ៉ាឬទេ? សំណួរបែបនេះនឹងជួយអ្នកឲ្យចាត់ទុក«ការអ្វីដែលសំខាន់ជាង» ពោលគឺការគោរពប្រណិប័តន៍របស់អ្នកនិងសេចក្ដីត្រូវការរបស់ក្រុមគ្រួសារអ្នកជាមុន ជាជាងការរកលុយ។ បន្ទាប់មក អ្នកអាចធ្វើការសម្រេចចិត្តដែលព្រះយេហូវ៉ានឹងផ្ដល់ពរ។
១៤. តើការប្រើសមត្ថភាពវែកញែកនិងការបង្ហាញសេចក្ដីស្រឡាញ់ជួយយើងយ៉ាងណាឲ្យជៀសវាងពីការធ្វើឲ្យអ្នកឯទៀតជំពប់ដួល?
១៤ សមត្ថភាពវែកញែកក៏ជួយយើងឲ្យចេះពិចារណាថា តើការសម្រេចចិត្តរបស់យើងអាចមានឥទ្ធិពលយ៉ាងណាទៅលើអ្នកឯទៀត ដើម្បីជួយយើងជៀសវាងពីការ«ធ្វើឲ្យអ្នកណាជំពប់ដួល»។ (ភី. ១:១០) នេះគឺសំខាន់ពេលយើងធ្វើការសម្រេចចិត្តផ្ទាល់ខ្លួន ដូចជាការស្លៀកពាក់សម្អិតសម្អាង ខ្លួន។ ជាឧទាហរណ៍ យើងប្រហែលជាចូលចិត្តម៉ូតសម្លៀកបំពាក់សម្អិតសម្អាងខ្លួនបែបណាមួយ។ ប៉ុន្តែ ចុះយ៉ាងណាបើនោះធ្វើឲ្យបុគ្គលនៅខាងក្នុងឬខាងក្រៅក្រុមជំនុំទើសចិត្ត? សមត្ថភាពវែកញែកនឹងជួយយើងឲ្យចេះគិតអំពីអារម្មណ៍របស់ពួកគេ។ សេចក្ដីស្រឡាញ់នឹងជំរុញចិត្តយើងឲ្យគិតអំពីប្រយោជន៍«អ្នកឯទៀត» ហើយមានចិត្តសុភាព។ (១កូ. ១០:២៣, ២៤, ៣២; ១ធី. ២:៩, ១០)។ ក្រោយមក យើងនឹងធ្វើការសម្រេចចិត្តដែលបង្ហាញអំពីសេចក្ដីស្រឡាញ់របស់យើង និងការគោរពចំពោះអ្នកឯទៀត។
១៥. តើអ្នកគួរគិតអំពីអ្វីមុនធ្វើការសម្រេចចិត្តដ៏សំខាន់?
១៥ បើអ្នកកំពុងធ្វើការសម្រេចចិត្តដ៏សំខាន់មួយ សូមគិតអំពីអ្វីដែលអ្នកត្រូវធ្វើដើម្បីប្រព្រឹត្តស្របតាមការសម្រេចចិត្តនោះ។ លោកយេស៊ូបានបង្រៀនយើងឲ្យ«គិតគូរជាមុនសិន»។ (លូក. ១៤:២៨) ដូច្នេះ សូមគិតពិចារណាអំពីពេលវេលា ធនធាន និងកម្លាំងដែលអ្នកនឹងត្រូវការដើម្បីធ្វើតាមការសម្រេចចិត្តនោះ។ ក្នុងករណីខ្លះ អ្នកប្រហែលជានឹងនិយាយជាមួយក្រុមគ្រួសាររបស់អ្នកអំពីអ្វីដែលសមាជិកម្នាក់ៗត្រូវធ្វើដើម្បីគាំទ្រការសម្រេចចិត្តនោះ។ ហេតុអ្វីការគិតពិចារណាបែបនេះមានប្រយោជន៍? ដោយសារការធ្វើដូច្នេះអាចជួយអ្នកឲ្យយល់ថា ការសម្រេចចិត្តរបស់អ្នកត្រូវការការកែប្រែណាខ្លះ ឬថាការសម្រេចចិត្តផ្សេងទៀតគឺល្អជាង។ បន្ថែមទៅទៀត ពេលអ្នកឲ្យក្រុមគ្រួសាររបស់អ្នករួមចំណែកក្នុងរឿងនេះ ហើយស្ដាប់យោបល់របស់ពួកគេ នោះពួកគេនឹងកាន់តែចង់សហការជាមួយអ្នកដើម្បីធ្វើឲ្យការសម្រេចចិត្តនោះទទួលលទ្ធផលល្អ។—សុភ. ១៥:២២
ចូរធ្វើការសម្រេចចិត្តដែលនឹងនាំឲ្យទទួលលទ្ធផលល្អ
១៦. តើអ្វីនឹងជួយអ្នកឲ្យធ្វើការសម្រេចចិត្តដែលនឹងនាំឲ្យមានលទ្ធផលល្អ? (សូមមើលផងដែរនូវប្រអប់ដែលមានចំណងជើងថា « របៀបធ្វើការសម្រេចចិត្តដ៏ឈ្លាសវៃ»)
១៦ បើអ្នកបានធ្វើតាមអ្វីដែលបានត្រូវរៀបរាប់នៅខាងលើរួចហើយ អ្នកត្រៀមខ្លួនធ្វើការសម្រេចចិត្តដ៏ឈ្លាសវៃ។ អ្នកបានប្រមូលព័ត៌មាននិងពិនិត្យពិចារណាគោលការណ៍គម្ពីរដែលជួយអ្នកឲ្យធ្វើការសម្រេចចិត្តដែលនាំឲ្យព្រះយេហូវ៉ាពេញចិត្ត។ ឥឡូវ អ្នកអាចសុំព្រះយេហូវ៉ាជួយឲ្យការសម្រេចចិត្តរបស់អ្នកទទួលលទ្ធផលល្អ។
១៧. តើអ្វីជាគន្លឹះដើម្បីធ្វើការសម្រេចចិត្តល្អ?
១៧ ទោះបីជាអ្នកបានធ្វើការសម្រេចចិត្តជាច្រើនដែលទទួលបានលទ្ធផលល្អនៅអតីតកាលក្ដី សូមចាំថាគន្លឹះនៃការធ្វើការសម្រេចចិត្តល្អគឺដោយពឹងផ្អែកលើប្រាជ្ញាពីព្រះយេហូវ៉ា មិនមែនលើចំណេះ ឬបទពិសោធន៍របស់ខ្លួនទេ។ មានតែលោកប៉ុណ្ណោះដែលអាចឲ្យអ្នកនូវចំណេះ ការយល់ដឹង និងសមត្ថភាពវែកញែកដ៏ពិតដែលជាលក្ខណៈផ្សេងៗនៃប្រាជ្ញា។ (សុភ. ២:១-៥) ព្រះយេហូវ៉ាអាចជួយអ្នកឲ្យធ្វើការសម្រេចចិត្តដែលនាំឲ្យលោកពេញចិត្ត។—ចសព. ២៣:២, ៣
ចម្រៀងលេខ២៨ ការចងមិត្តភាពជាមួយនឹងព្រះយេហូវ៉ា