អត្ថបទសិក្សា ១
ចម្រៀងលេខ២ នាមលោកគឺយេហូវ៉ា
ចូរសរសើរតម្កើងព្រះយេហូវ៉ា
បទគម្ពីរប្រចាំឆ្នាំសម្រាប់ឆ្នាំ២០២៥: «ចូរសរសើរតម្កើងព្រះយេហូវ៉ាឲ្យសមនឹងនាមរបស់លោក»។—ចសព. ៩៦:៨
ចំណុចផ្ដោត
យើងនឹងរៀនអំពីរបៀបដែលយើងអាចសរសើរតម្កើងព្រះយេហូវ៉ាឲ្យសមនឹងនាមរបស់លោក។
១. តើមនុស្សជាច្រើននៅសព្វថ្ងៃនេះផ្ដោតអារម្មណ៍ទៅលើអ្វី?
តើអ្នកបានកត់សម្គាល់ទេថានៅសព្វថ្ងៃនេះ មនុស្សច្រើនតែគិតអំពីប្រយោជន៍ផ្ទាល់ខ្លួន? ជាឧទាហរណ៍ មនុស្សខ្លះប្រើបណ្ដាញសង្គមដើម្បីធ្វើឲ្យខ្លួនលេចធ្លោ និងអួតអំពីអ្វីដែលពួកគេបានសម្រេច។ ផ្ទុយទៅវិញ មានមនុស្សតិចណាស់នៅសព្វថ្ងៃនេះដែលសរសើរតម្កើងព្រះយេហូវ៉ា។ នៅក្នុងអត្ថបទនេះ យើងនឹងពិចារណាថាតើការសរសើរតម្កើងព្រះយេហូវ៉ាមានន័យយ៉ាងណា? តើអ្វីគួរជំរុញចិត្តយើងឲ្យធ្វើដូច្នោះ? យើងក៏នឹងរៀនដែរអំពីរបៀបដែលយើងអាចសរសើរតម្កើងព្រះយេហូវ៉ាឲ្យសមនឹងនាមរបស់លោក និងរបៀបដែលលោកផ្ទាល់នឹងធ្វើឲ្យនាមរបស់លោកទទួលការសរសើរតម្កើងនៅថ្ងៃអនាគតឆាប់ៗខាងមុខ។
តើការសរសើរតម្កើងព្រះយេហូវ៉ាមានន័យយ៉ាងណា?
២. តើព្រះយេហូវ៉ាបានបង្ហាញសិរីរុងរឿងរបស់លោកនៅភ្នំស៊ីណាយយ៉ាងដូចម្ដេច? (សូមមើលរូបភាពផងដែរ)
២ គម្ពីរបង្ហាញថាព្រះយេហូវ៉ាជាព្រះដ៏រុងរឿងអស្ចារ្យ។ ព្រះយេហូវ៉ាបានបង្ហាញសិរីរុងរឿងរបស់លោកតាមរបៀបដ៏អស្ចារ្យ មិនយូរក្រោយពីលោកបានរំដោះជនជាតិអ៊ីស្រាអែលឲ្យរួចពីការធ្វើជាខ្ញុំបម្រើនៅស្រុកអេហ្ស៊ីប។ សូមស្រមៃគិត ជនជាតិអ៊ីស្រាអែលរាប់លាននាក់បានមកជួបជុំគ្នានៅជើងភ្នំស៊ីណាយដើម្បីជួបព្រះរបស់ពួកគេ។ នៅលើភ្នំនោះ មានពពកក្រាស់ខ្មៅងងឹត។ ភ្លាមៗភ្នំបានញ័ររញ្ជួយយ៉ាងខ្លាំង និងមានផ្សែងខ្មួលខ្មាញ់ហុយឡើង ហើយនៅដំណាលគ្នានោះមានសំឡេងផ្គរលាន់ រន្ទះបាញ់ ព្រមទាំងសំឡេងផ្លុំស្នែងយ៉ាងខ្លាំងរន្ថាន់។ (ដច. ១៩:១៦-១៨; ២៤:១៧; ចសព. ៦៨:៨) ពេលព្រះយេហូវ៉ាធ្វើអ្វីៗទាំងនោះ ជនជាតិអ៊ីស្រាអែលច្បាស់ជានឹកអស្ចារ្យយ៉ាងខ្លាំងចំពោះឫទ្ធានុភាពរបស់លោក។
នៅភ្នំស៊ីណាយ ព្រះយេហូវ៉ាបានបង្ហាញសិរីរុងរឿងដ៏អង់អាចរបស់លោកដល់ជនជាតិអ៊ីស្រាអែល (សូមមើលវគ្គ២)
៣. តើយើងអាចសរសើរតម្កើងព្រះយេហូវ៉ាតាមរបៀបណា?
៣ ចុះយ៉ាងណាមនុស្សជាតិ? តើយើងពិតជាអាចសរសើរតម្កើងព្រះយេហូវ៉ាឬទេ? យើងអាចធ្វើបាន។ របៀបមួយដែលយើងអាចសរសើរតម្កើងព្រះយេហូវ៉ាគឺដោយប្រាប់អ្នកឯទៀតអំពីឫទ្ធានុភាពដ៏អស្ចារ្យរបស់លោក និងគុណសម្បត្តិដ៏ថ្លៃថ្លារបស់លោក។ យើងក៏សរសើរតម្កើងព្រះដែរ ពេលដែលយើងឲ្យកិត្តិយសលោកចំពោះអ្វីៗទាំងអស់ដែលលោកជួយយើងឲ្យសម្រេច។ (អេ. ២៦:១២) ស្ដេចដាវីឌគឺជាគំរូល្អមួយក្នុងការសរសើរតម្កើងព្រះយេហូវ៉ា។ ក្នុងសេចក្ដីអធិដ្ឋានមួយរបស់គាត់នៅចំពោះមុខពួកជំនុំអ៊ីស្រាអែល ដាវីឌបាននិយាយទៅព្រះថា៖ «ឱព្រះយេហូវ៉ាអើយ! លោកជាព្រះដ៏ឧត្តុង្គឧត្តម ជាព្រះដែលប្រកបដោយឫទ្ធានុភាពដ៏ខ្លាំងក្លា។ លោកមានសិរីរុងរឿងនិងកិត្តិយស ព្រោះអ្វីៗទាំងអស់ដែលនៅស្ថានសួគ៌ និងផែនដីសុទ្ធតែជារបស់លោក»។ ក្រោយដាវីឌអធិដ្ឋានចប់ «បណ្ដាជនទាំងអស់ក៏សរសើរតម្កើងព្រះយេហូវ៉ា»។—១ប្រ. ២៩:១១, ២០
៤. តើលោកយេស៊ូសរសើរតម្កើងព្រះយេហូវ៉ាយ៉ាងដូចម្ដេច?
៤ ពេលលោកយេស៊ូនៅផែនដី លោកលើកតម្កើងបិតាលោកដោយប្រាប់មនុស្សថាសមត្ថភាពធ្វើអព្ភូតហេតុគឺមកពីបិតារបស់លោក។ (ម៉ាក. ៥:១៨-២០) របៀបដែលលោកយេស៊ូនិយាយអំពីបិតារបស់លោក និងរបៀបដែលលោកប្រព្រឹត្តចំពោះអ្នកឯទៀត ក៏លើកតម្កើងព្រះយេហូវ៉ា។ នៅពេលមួយ លោកយេស៊ូបានបង្រៀននៅសាលាប្រជុំ។ ក្នុងចំណោមអ្នកស្ដាប់ មានស្ត្រីម្នាក់មានវិញ្ញាណកំណាចចូលអស់១៨ឆ្នាំ។ វិញ្ញាណកំណាចនោះបានធ្វើទុក្ខនាង ហើយធ្វើឲ្យនាងកោងខ្នងមិនអាចងើបត្រង់បាន។ នេះច្បាស់ជាធ្វើឲ្យនាងពិបាកខ្លាំងណាស់! ដោយចិត្តអាណិតអាសូរលោកយេស៊ូបានទៅជួបស្ត្រីនោះ ហើយនិយាយទៅកាន់នាងយ៉ាងសប្បុរសថា៖ «នាងអើយ នាងបានត្រូវរំដោះពីជំងឺរបស់នាងហើយ»។ ក្រោយមក លោកបានដាក់ដៃលើនាង រួចស្ត្រីនោះងើបត្រង់ភ្លាម ហើយ«ចាប់ផ្ដើមលើកតម្កើងព្រះ»ទាំងមានសុខភាពល្អនិងមានកម្លាំងឡើងវិញ! (លូក. ១៣:១០-១៣) ស្ត្រីនោះមានហេតុសរសើរតម្កើងព្រះយេហូវ៉ា ហើយយើងក៏មានហេតុធ្វើដូច្នោះដែរ។
តើអ្វីជំរុញចិត្តយើងឲ្យសរសើរតម្កើងព្រះយេហូវ៉ា?
៥. តើយើងមានមូលហេតុអ្វីដើម្បីគោរពព្រះយេហូវ៉ា?
៥ យើងសរសើរតម្កើងព្រះយេហូវ៉ាដោយសារយើងគោរពលោកយ៉ាងជ្រាលជ្រៅ។ យើងមានហេតុជាច្រើនដើម្បីគោរពលោក។ ព្រះយេហូវ៉ាជាព្រះដែលមានឫទ្ធានុភាពខ្លាំងក្លាបំផុត។ លោកមានឫទ្ធានុភាពដែលគ្មានកម្រិត។ (ចសព. ៩៦:៤-៧) ពេលយើងពិចារណាអ្វីៗដែលលោកបានបង្កើត យើងអាចឃើញប្រាជ្ញាដ៏ខ្ពង់ខ្ពស់របស់លោក។ លោកគឺជាប្រភពនៃជីវិតរបស់យើង ហើយលោកផ្ដល់អ្វីៗទាំងអស់ដែលយើងត្រូវការដើម្បីអាចមានជីវិតរស់នៅ។ (បប. ៤:១១) លោកគឺស្មោះត្រង់។ (បប. ១៥:៤) អ្វីៗទាំងអស់ដែលលោកធ្វើគឺតែងតែសម្រេច ហើយលោកតែងតែរក្សាពាក្យសន្យារបស់លោក។ (យ៉ូស. ២៣:១៤) ហេតុនេះហើយបានជាអ្នកប្រកាសទំនាយយេរេមានិយាយអំពីព្រះយេហូវ៉ាថា៖ «ក្នុងចំណោមពួកអ្នកប្រាជ្ញនៃប្រជាជាតិទាំងឡាយនិងរាជាណាចក្រនានា គ្មានអ្នកណាដូចលោកទេ»។ (យេ. ១០:៦, ៧) ពិតមែនហើយ យើងមានមូលហេតុជាច្រើនឲ្យគោរពបិតាស្ថានសួគ៌របស់យើង។ ប៉ុន្តែ យើងមិនគ្រាន់តែគោរពលោកប៉ុណ្ណោះទេ យើងក៏ស្រឡាញ់លោកដែរ។
៦. ហេតុអ្វីយើងស្រឡាញ់ព្រះយេហូវ៉ា?
៦ យើងសរសើរតម្កើងព្រះយេហូវ៉ាដោយសារយើងមានសេចក្ដីស្រឡាញ់យ៉ាងជ្រាលជ្រៅចំពោះលោក។ សូមពិចារណាគុណសម្បត្តិមួយចំនួនរបស់ព្រះយេហូវ៉ាដែលធ្វើឲ្យយើងស្រឡាញ់លោក។ លោកមានសេចក្ដីមេត្តាករុណា និងសេចក្ដីអាណិតអាសូរ។ (ចសព. ១០៣:១៣; អេ. ៤៩:១៥) លោកយល់អារម្មណ៍របស់យើង។ ពេលដែលយើងឈឺចិត្ត លោកក៏ឈឺចិត្តដែរ។ (សាក. ២:៨) លោកជួយយើងឲ្យចូលទៅជិតលោក ហើយទៅជាមិត្តរបស់លោក។ (ចសព. ២៥:១៤; សកម្ម. ១៧:២៧) ម្យ៉ាងទៀត លោកមានចិត្តរាបទាប «លោកឱនមើលមេឃនិងផែនដី ហើយលើកមនុស្សទន់ទាបឡើងពីធូលីដី»។ (ចសព. ១១៣:៦, ៧) មូលហេតុទាំងអស់នេះនាំឲ្យយើងចង់សរសើរតម្កើងព្រះដ៏អស្ចារ្យរបស់យើង មែនទេ?—ចសព. ៨៦:១២
៧. តើយើងមានឱកាសដ៏ពិសេសអ្វី?
៧ យើងសរសើរតម្កើងព្រះយេហូវ៉ាដោយសារយើងចង់ឲ្យអ្នកឯទៀតស្គាល់លោក។ មនុស្សជាច្រើនមិនស្គាល់សេចក្ដីពិតអំពីព្រះយេហូវ៉ាទេ។ ហេតុអ្វី? ដោយសារសាថានបានធ្វើឲ្យគំនិតរបស់ពួកគេទៅជាងងឹត ដោយផ្សាយពាក្យកុហកភូតភរយ៉ាងឃោរឃៅអំពីលោក។ (២កូ. ៤:៤) សាថានបានធ្វើឲ្យមនុស្សជឿជាក់ថាព្រះយេហូវ៉ាពេញទៅដោយកំហឹង មិនយកចិត្តទុកដាក់ចំពោះយើង និងជាដើមហេតុនៃទុក្ខវេទនាជាច្រើននៅក្នុងពិភពលោកនេះ។ ប៉ុន្តែ យើងដឹងសេចក្ដីពិតអំពីព្រះរបស់យើង! យើងមានឱកាសប្រាប់អ្នកឯទៀតថាលោកជាព្រះបែបណា ហើយជួយពួកគេឲ្យសរសើរតម្កើងលោកដែរ។ (អេ. ៤៣:១០) ចម្រៀងសរសើរព្រះ ៩៦ផ្ដោតទៅលើការសរសើរតម្កើងព្រះយេហូវ៉ា។ កាលដែលយើងពិចារណាពាក្យខ្លះក្នុងបទចម្រៀងនេះដែលសរសេរក្រោមការដឹកនាំរបស់ព្រះ សូមគិតអំពីរបៀបដែលអ្នកផ្ទាល់អាចសរសើរតម្កើងព្រះយេហូវ៉ាឲ្យសមនឹងនាមរបស់លោក។
តើតាមរបៀបណាយើងអាចសរសើរតម្កើងព្រះយេហូវ៉ាឲ្យសមនឹងនាមរបស់លោក?
៨. តើតាមរបៀបណាយើងអាចសរសើរតម្កើងព្រះយេហូវ៉ា? (ចម្រៀងសរសើរព្រះ ៩៦:១-៣)
៨ សូមអាន ចម្រៀងសរសើរព្រះ ៩៦:១-៣។ យើងអាចសរសើរតម្កើងព្រះយេហូវ៉ាតាមរយៈអ្វីដែលយើងនិយាយអំពីលោក។ នៅក្នុងខទាំងនេះ រាស្ត្ររបស់ព្រះយេហូវ៉ាបានត្រូវអញ្ជើញឲ្យ«ច្រៀងជូនព្រះយេហូវ៉ា» ឲ្យ«សរសើរនាមរបស់លោក» ឲ្យ«ប្រកាសដំណឹងល្អអំពីសេចក្ដីសង្គ្រោះរបស់លោក» និងឲ្យ«ប្រាប់ប្រជាជាតិនានាអំពីសិរីរុងរឿងរបស់លោក»។ អ្វីទាំងអស់នេះជារបៀបដែលយើងអាចសរសើរតម្កើងបិតាស្ថានសួគ៌របស់យើង។ ជនជាតិយូដាដ៏ស្មោះត្រង់ និងគ្រិស្តសាសនិកនៅសតវត្សរ៍ទី១មិនស្ទាក់ស្ទើរប្រាប់អ្នកឯទៀតអំពីអ្វីល្អទាំងអស់ដែលព្រះយេហូវ៉ាបានធ្វើចំពោះពួកគេ និងនិយាយការពារកេរ្តិ៍ឈ្មោះរបស់លោកទេ។ (ដាន. ៣:១៦-១៨; សកម្ម. ៤:២៩) តើតាមរបៀបណាយើងអាចធ្វើដូចពួកគេដែរ?
៩-១០. តើយើងរៀនអ្វីពីបទពិសោធន៍របស់បងអានជីលីណា? (សូមមើលរូបភាពផងដែរ)
៩ សូមពិចារណាបទពិសោធន៍របស់បងស្រីអានជីលីណា aដែលរស់នៅសហរដ្ឋអាម៉េរិក។ គាត់បាននិយាយការពារកេរ្តិ៍ឈ្មោះរបស់ព្រះយេហូវ៉ាដោយចិត្តក្លាហាននៅកន្លែងធ្វើការរបស់គាត់។ ដោយសារគាត់ជាបុគ្គលិកថ្មី បងអានជីលីណាបានត្រូវអញ្ជើញឲ្យចូលរួមកិច្ចប្រជុំដែលបុគ្គលិកថ្មីនិយាយណែនាំខ្លួនទៅអ្នករួមការងារ។ បងអានជីលីណាបានត្រៀមបង្ហាញរូបថតខ្លះដែលបង្ហាញអំពីអំណរដែលគាត់មានក្នុងជីវិតជាសាក្សីព្រះយេហូវ៉ា។ ប៉ុន្តែ មុនគាត់ឡើងណែនាំខ្លួន បុរសម្នាក់ដែលជាអ្នករួមការងារបានណែនាំខ្លួនរបស់គាត់ថា គាត់បានត្រូវចិញ្ចឹមអប់រំជាសាក្សីព្រះយេហូវ៉ា។ បន្ទាប់មក គាត់ចាប់ផ្ដើមនិយាយចំអកមើលងាយអំពីជំនឿរបស់យើង។ បងអានជីលីណានិយាយថា៖ «ខ្ញុំភ័យខ្លាំងណាស់។ ប៉ុន្តែខ្ញុំក៏គិតដែរថា ‹តើខ្ញុំនឹងអនុញ្ញាតឲ្យគេនិយាយកុហកអំពីព្រះយេហូវ៉ា ឬតើខ្ញុំនឹងនិយាយការពារលោក?›»។
១០ ពេលបុរសនោះនិយាយចប់ បងអានជីលីណាបានអធិដ្ឋានក្នុងចិត្តយ៉ាងខ្លី។ បន្ទាប់មក គាត់បាននិយាយយ៉ាងសប្បុរសទៅកាន់បុរសនោះថា៖ «ជីវិតរបស់ខ្ញុំស្រដៀងនឹងបង។ ខ្ញុំក៏បានត្រូវចិញ្ចឹមអប់រំជាសាក្សីព្រះយេហូវ៉ាដែរ ហើយខ្ញុំនៅតែជាសាក្សីព្រះយេហូវ៉ារហូតមកដល់សព្វថ្ងៃ»។ ទោះជាស្ថិតក្នុងស្ថានភាពដែលអាចនាំឲ្យគាត់តានតឹងក៏ដោយ បងអានជីលីណាបន្ដមានចិត្តស្ងប់ ហើយបង្ហាញរូបថតដល់អ្នករួមការងាររបស់គាត់ គឺរូបថតបង្ហាញអំពីអំណរដែលគាត់និងមិត្តភក្តិគាត់មានក្នុងការបម្រើព្រះយេហូវ៉ា។ គាត់ក៏ពន្យល់ដែរអំពីជំនឿរបស់គាត់ដោយបង្ហាញការគោរព។ (១ពេ. ៣:១៥) តើនោះមានលទ្ធផលយ៉ាងណា? ពេលដែលបងអានជីលីណានិយាយណែនាំខ្លួនចប់ បុរសនោះរសាយចិត្ត ហើយថែមទាំងទទួលស្គាល់ថាគាត់មានអនុស្សាវរីយ៍ល្អៗពេលដែលគាត់ធំឡើងជាសាក្សីព្រះយេហូវ៉ា។ បងអានជីលីណានិយាយថា៖ «ព្រះយេហូវ៉ាសមនឹងទទួលការការពារ។ គឺជាកិត្តិយសណាស់ ឲ្យនិយាយការពារនាមរបស់លោក»។ យើងក៏មានកិត្តិយសសរសើរព្រះយេហូវ៉ានិងលើកតម្កើងលោក ទោះជាពេលដែលអ្នកឯទៀតមើលងាយលោកក៏ដោយ។
យើងអាចសរសើរតម្កើងព្រះយេហូវ៉ាតាមរយៈពាក្យសម្ដី (សូមមើលវគ្គ៩-១០) b
១១. តើអ្នកគោរពប្រណិប័តន៍ពិតតាំងពីសម័យបុរាណបានធ្វើតាមគោលការណ៍នៅចម្រៀងសរសើរព្រះ ៩៦:៨យ៉ាងដូចម្ដេច?
១១ សូមអាន ចម្រៀងសរសើរព្រះ ៩៦:៨។ យើងអាចសរសើរតម្កើងព្រះយេហូវ៉ាដោយជូនរបស់មានតម្លៃទៅលោក។ អ្នកគោរពប្រណិប័តន៍ពិតតែងតែលើកកិត្តិយសព្រះយេហូវ៉ាតាមរបៀបនេះ។ (សុភ. ៣:៩) ជាឧទាហរណ៍ ជនជាតិអ៊ីស្រាអែលជូនវិភាគទានដើម្បីសាងសង់និងថែទាំវិហារ។ (២បស. ១២:៤, ៥; ១ប្រ. ២៩:៣-៩) ពួកអ្នកកាន់តាមខ្លះរបស់លោកយេស៊ូ បាន«ប្រើធនធានរបស់ខ្លួន»ដើម្បីលោកនិងពួកសាវ័ករបស់លោកអាចមានអ្វីដែលពួកគេត្រូវការ។ (លូក. ៨:១-៣) គ្រិស្តសាសនិកនៅសតវត្សរ៍ទី១ក៏ផ្ញើជំនួយដល់បងប្អូនរួមជំនឿដែរ។ (សកម្ម. ១១:២៧-២៩) នៅសព្វថ្ងៃនេះ យើងក៏អាចសរសើរតម្កើងព្រះយេហូវ៉ាតាមរយៈការជូនវិភាគទានដោយស្ម័គ្រពីចិត្ត។
១២. តើវិភាគទានរបស់យើងអាចនាំឲ្យព្រះយេហូវ៉ាទទួលការសរសើរតម្កើងយ៉ាងដូចម្ដេច? (សូមមើលរូបភាពផងដែរ)
១២ សូមពិចារណាបទពិសោធន៍មួយដែលបង្ហាញអំពីរបៀបដែលវិភាគទានរបស់យើងនាំឲ្យព្រះយេហូវ៉ាទទួលការសរសើរតម្កើង។ របាយការណ៍មួយនៅឆ្នាំ២០២០បានរៀបរាប់អំពីគ្រោះរាំងស្ងួតដ៏យូរនៅប្រទេសស៊ីមបាវ៉េ។ មនុស្សរាប់លាននាក់ជិតស្លាប់ដោយសារខ្វះអាហារ ហើយនោះក៏រួមបញ្ចូលបងស្រីម្នាក់ឈ្មោះព្រីស្កាដែរ។ ទោះជាស្ថានភាពនោះពិបាកយ៉ាងខ្លាំងក្ដី បងព្រីស្កានៅតែទៅផ្សព្វផ្សាយនៅថ្ងៃពុធនិងថ្ងៃសុក្រជាទៀងទាត់ដូចដែលគាត់ធ្លាប់ធ្វើពីមុន ទោះជានៅរដូវភ្ជួររាស់ក្ដី។ អ្នកជិតខាងរបស់គាត់បាននិយាយចំអកមើលងាយគាត់ដោយសារគាត់ទៅផ្សព្វផ្សាយ ជាជាងធ្វើស្រែចម្ការ។ ពួកគេនិយាយថា៖ «អ្នកនឹងស្លាប់ដោយសារភាពឥតឃ្លាន»។ បងព្រីស្កាបានតបឆ្លើយទៅពួកគេទាំងមានទំនុកចិត្តថា៖ «ព្រះយេហូវ៉ាមិនដែលបោះបង់អ្នកបម្រើរបស់លោកទេ»។ មិនយូរក្រោយមក គាត់បានទទួលជំនួយពីអង្គការរបស់យើង។ បងព្រីស្កាបានទទួលម្ហូបអាហារនិងរបស់របរផ្សេងៗដែលគាត់ត្រូវការ ដោយសារវិភាគទានរបស់យើង។ អ្នកជិតខាងរបស់បងព្រីស្កាកោតស្ងើចជាខ្លាំង ហើយប្រាប់បងព្រីស្កាថា៖ «ព្រះមិនដែលបោះបង់ចោលអ្នកទេ ដូច្នេះយើងចង់រៀនថែមទៀតអំពីលោក»។ ជាលទ្ធផល អ្នកជិតខាង៧នាក់របស់គាត់បានចាប់ផ្ដើមចូលរួមកិច្ចប្រជុំ។
យើងអាចសរសើរតម្កើងព្រះយេហូវ៉ា ដោយជូនរបស់មានតម្លៃរបស់យើងដល់លោក (សូមមើលវគ្គ១២) c
១៣. តើតាមរបៀបណាការប្រព្រឹត្តរបស់យើងអាចសរសើរតម្កើងព្រះយេហូវ៉ា? (ចម្រៀងសរសើរព្រះ ៩៦:៩)
១៣ សូមអាន ចម្រៀងសរសើរព្រះ ៩៦:៩។ យើងអាចសរសើរតម្កើងព្រះយេហូវ៉ាតាមរយៈការប្រព្រឹត្តរបស់យើង។ ពួកសង្ឃដែលបម្រើនៅត្រសាល ឬនៅក្នុងវិហាររបស់ព្រះយេហូវ៉ានៅសម័យក្រោយមកត្រូវតែស្អាតស្អំ។ (ដច. ៤០:៣០-៣២) ប៉ុន្តែ អ្វីដែលសំខាន់ជាងការស្អាតស្អំខាងរូបកាយ គឺការស្អាតស្អំខាងការប្រព្រឹត្ត។ (ចសព. ២៤:៣, ៤; ១ពេ. ១:១៥, ១៦) យើងត្រូវខំព្យាយាមដោះ«បុគ្គលិកលក្ខណៈចាស់»ចេញ ពោលគឺចិត្តគំនិតនិងការប្រព្រឹត្តដែលមិនស្អាតស្អំ ហើយបំពាក់ខ្លួនដោយ«បុគ្គលិកលក្ខណៈថ្មី» ពោលគឺរបៀបគិតគូរនិងការប្រព្រឹត្តដែលបង្ហាញអំពីគុណសម្បត្តិដ៏ថ្លៃថ្លារបស់ព្រះយេហូវ៉ា។ (កូឡ. ៣:៩, ១០) ដោយមានជំនួយពីព្រះយេហូវ៉ា សូម្បីតែបុគ្គលដែលបានប្រព្រឹត្តអំពើអាក្រក់យ៉ាងខ្លាំង ក៏អាចកែប្រែបាន ហើយបំពាក់ខ្លួនដោយបុគ្គលិកលក្ខណៈថ្មី។
១៤. តើអ្នករៀនអ្វីពីបទពិសោធន៍របស់បងចាក? (សូមមើលរូបភាពផងដែរ)
១៤ សូមគិតអំពីបទពិសោធន៍របស់បងចាកដែលធ្លាប់ជាបុរសឃោរឃៅនិងបង្កគ្រោះថ្នាក់។ គាត់មានរហស្សនាមថាវិញ្ញាណកំណាច។ ដោយសារអំពើឧក្រិដ្ឋកម្ម បងចាកបានត្រូវកាត់ទោសប្រហារជីវិត។ ប៉ុន្តែ ក្នុងអំឡុងពេលរង់ចាំថ្ងៃប្រហារជីវិត បងចាកយល់ព្រមសិក្សាគម្ពីរជាមួយបងប្រុសម្នាក់ដែលមកលេងគុក។ ទោះបីជាបងចាកធ្លាប់ធ្វើអំពើអាក្រក់ជាច្រើនក៏ដោយ គាត់បានផ្លាស់ប្ដូរ ហើយក្រោយមកគាត់បានទទួលការជ្រមុជទឹកជាសាក្សីព្រះយេហូវ៉ា។ បងចាកបានផ្លាស់ប្ដូរខ្លាំងដល់ម្ល៉េះ រហូតដល់អ្នកយាមគុកខ្លះរលីងរលោងទឹកភ្នែក ពេលនិយាយលាគាត់នៅថ្ងៃដែលគាត់ត្រូវគេប្រហារជីវិត។ ទាហានម្នាក់ដែលធ្វើការក្នុងគុកនោះនិយាយថា៖ «ពីមុន ចាកគឺជាអ្នកទោសដែលអាក្រក់បំផុតនៅទីនេះ។ ឥឡូវ គាត់នៅក្នុងចំណោមអ្នកទោសដែលល្អបំផុត»។ សប្តាហ៍ក្រោយពីបងចាកបានត្រូវគេប្រហារជីវិត បងប្រុសៗដែលបានត្រឡប់មកដឹកនាំកិច្ចប្រជុំប្រចាំសប្តាហ៍នៅគុក បានជួបអ្នកទោសម្នាក់ដែលចូលរួមកិច្ចប្រជុំជាលើកដំបូង។ តើអ្វីជំរុញចិត្តគាត់ឲ្យចូលរួម? គាត់កោតស្ងើចដែលបងចាកបានកែប្រែការប្រព្រឹត្តរបស់គាត់ ហើយចង់ដឹងអំពីអ្វីដែលគាត់ត្រូវធ្វើដើម្បីគោរពប្រណិប័តន៍ព្រះយេហូវ៉ា។ ពិតណាស់ ការប្រព្រឹត្តរបស់យើងអាចសរសើរតម្កើងបិតារបស់យើងនៅស្ថានសួគ៌!—១ពេ. ២:១២
យើងអាចសរសើរតម្កើងព្រះយេហូវ៉ាតាមរយៈការប្រព្រឹត្តរបស់យើង (សូមមើលវគ្គ១៤) d
តើព្រះយេហូវ៉ានឹងលើកតម្កើងនាមរបស់លោកយ៉ាងដូចម្ដេចនៅថ្ងៃអនាគតឆាប់ៗខាងមុខ?
១៥. តើតាមរបៀបណាព្រះយេហូវ៉ានឹងលើកតម្កើងនាមរបស់លោកទាំងស្រុងនៅថ្ងៃអនាគតឆាប់ៗខាងមុខ? (ចម្រៀងសរសើរព្រះ ៩៦:១០-១៣)
១៥ សូមអាន ចម្រៀងសរសើរព្រះ ៩៦:១០-១៣។ ប៉ុន្មានខចុងក្រោយនៃចម្រៀងសរសើរព្រះ ៩៦រៀបរាប់អំពីព្រះយេហូវ៉ាថាជាអ្នកវិនិច្ឆ័យដ៏សុចរិតនិងជាស្ដេច។ តើព្រះយេហូវ៉ានឹងលើកតម្កើងនាមរបស់លោកយ៉ាងដូចម្ដេចនៅថ្ងៃអនាគតឆាប់ៗខាងមុខ? គឺតាមរយៈការវិនិច្ឆ័យរបស់លោក។ មិនយូរទៀត ព្រះយេហូវ៉ានឹងបំផ្លាញបាប៊ីឡូនដ៏ខ្លាំងក្លា ដោយសារសាសនាមិនពិតបានធ្វើអ្វីអាក្រក់និងបង្រៀនសេចក្ដីភូតភរដ៏សាហាវអំពីលោក។ (បប. ១៧:៥, ១៦; ១៩:១, ២) បុគ្គលខ្លះដែលឃើញការបំផ្លាញនៃបាប៊ីឡូនដ៏ខ្លាំងក្លា ប្រហែលជានឹងចូលរួមការគោរពប្រណិប័តន៍ពិតជាមួយយើង។ នៅទីបំផុត នៅសង្គ្រាមអាម៉ាគេដូន ព្រះយេហូវ៉ានឹងបំផ្លាញចោលរបៀបរបបពិភពលោករបស់សាថានទាំងមូលដោយបំផ្លាញអស់អ្នកដែលប្រឆាំងលោកនិងប្រមាថនាមរបស់លោក។ ប៉ុន្តែ លោកនឹងសង្គ្រោះអស់អ្នកដែលស្រឡាញ់និងស្ដាប់បង្គាប់លោក ហើយចង់សរសើរតម្កើងលោក។ (ម៉ាក. ៨:៣៨; ២ថែ. ១:៦-១០) ក្រោយពីការសាកល្បងចុងក្រោយនៅដំណាច់នៃការគ្រប់គ្រង១.០០០ឆ្នាំរបស់លោកយេស៊ូគ្រិស្ត ព្រះយេហូវ៉ានឹងធ្វើឲ្យនាមរបស់លោកបានបរិសុទ្ធ។ (បប. ២០:៧-១០) នៅពេលនោះ «ផែនដីនឹងពេញទៅដោយចំណេះអំពីសិរីរុងរឿងរបស់ព្រះយេហូវ៉ា ដូចជាទឹកពេញពាសសមុទ្រដែរ»។—ហាប. ២:១៤
១៦. តើអ្នកតាំងចិត្តធ្វើអ្វី? (សូមមើលរូបភាពផងដែរ)
១៦ យើងពិតជានឹងអរសប្បាយពេលគ្រប់គ្នាសរសើរតម្កើងព្រះយេហូវ៉ាឲ្យសមនឹងនាមរបស់លោក! ប៉ុន្តែ សូម្បីតែឥឡូវ ក៏យើងអាចខំអស់ពីសមត្ថភាពដើម្បីនិយាយអំពីព្រះរបស់យើង និងប្រព្រឹត្តតាមរបៀបដែលសរសើរតម្កើងលោក។ ដើម្បីជួយយើងឲ្យផ្ដោតអារម្មណ៍លើភារកិច្ចដ៏សំខាន់នេះ គណៈអភិបាលបានជ្រើសរើសចម្រៀងសរសើរព្រះ ៩៦:៨ជាបទគម្ពីរប្រចាំឆ្នាំសម្រាប់ឆ្នាំ២០២៥ដែលថា៖ «ចូរសរសើរតម្កើងព្រះយេហូវ៉ាឲ្យសមនឹងនាមរបស់លោក»។
នៅទីបំផុត បុគ្គលគ្រប់រូបនឹងសរសើរតម្កើងព្រះយេហូវ៉ាឲ្យសមនឹងនាមរបស់លោក! (សូមមើលវគ្គ១៦)
ចម្រៀងលេខ១២ ព្រះយេហូវ៉ាខ្លាំងក្លាមហិមា
a ឈ្មោះខ្លះបានត្រូវផ្លាស់ប្ដូរ។
