អត្ថបទសិក្សា ២
ចម្រៀងលេខ១៣២ យើងជាសាច់ឈាមតែមួយ
ប្ដីទាំងឡាយ ចូរឲ្យកិត្តិយសដល់ប្រពន្ធរបស់អ្នក
«ចូរអ្នករាល់គ្នាដែលជាប្ដី . . . ឲ្យកិត្តិយសដល់នាង»។—១ពេ. ៣:៧
ចំណុចផ្ដោត
របៀបដែលប្ដីអាចឲ្យកិត្តិយសដល់ប្រពន្ធរបស់គាត់តាមរយៈពាក្យសម្ដីនិងការប្រព្រឹត្ត។
១. តើអ្វីជាមូលហេតុមួយដែលព្រះយេហូវ៉ាផ្ដើមឲ្យមានអាពាហ៍ពិពាហ៍?
ព្រះយេហូវ៉ាជា«ព្រះដែលមានសេចក្ដីសប្បាយ» ហើយលោកចង់ឲ្យយើងសប្បាយដែរ។ (១ធី. ១:១១) លោកបានផ្ដល់អំណោយជាច្រើនដើម្បីជួយយើងឲ្យរីករាយនឹងជីវិត។ (យ៉ា. ១:១៧) អំណោយមួយគឺអាពាហ៍ពិពាហ៍។ ពេលបុរសនិងស្ត្រីរៀបការ ពួកគេស្បថថាស្រឡាញ់ គោរព និងថ្នាក់ថ្នមគ្នាអស់ពីដួងចិត្ត។ បើពួកគេរក្សាចំណងអាពាហ៍ពិពាហ៍ឲ្យរឹងមាំ នោះពួកគេអាចមានអំណរយ៉ាងខ្លាំង។—សុភ. ៥:១៨
២. នៅសព្វថ្ងៃនេះ តើប្ដីជាច្រើនប្រព្រឹត្តយ៉ាងណាទៅលើប្រពន្ធ?
២ គួរឲ្យស្ដាយណាស់ គូអាពាហ៍ពិពាហ៍ជាច្រើនក្នុងពិភពលោកនៅសព្វថ្ងៃនេះ ភ្លេចពាក្យដែលពួកគេស្បថនៅថ្ងៃរៀបអាពាហ៍ពិពាហ៍។ ជាលទ្ធផល ពួកគេមិនមានសុភមង្គលទេ។ របាយការណ៍ថ្មីមួយពីអង្គការសុខភាពពិភពលោកបង្ហាញថា ប្ដីជាច្រើនប្រើអំពើហិង្សា ប្រមាថមើលងាយ ឬធ្វើបាបខាងផ្លូវចិត្តប្រពន្ធ។ ប្ដីដែលធ្វើទង្វើទាំងអស់នេះ ប្រហែលជាប្រព្រឹត្តដោយគោរពចំពោះប្រពន្ធនៅមុខអ្នកឯទៀត ប៉ុន្តែគាត់ប្រព្រឹត្តផ្សេងពេលនៅផ្ទះ។ ម្យ៉ាងទៀត ចំណងអាពាហ៍ពិពាហ៍ជាច្រើនមានភាពរកាំរកូស ដោយសារប្ដីមើលរូបអាសអាភាស។
៣. ហេតុអ្វីបានជាប្ដីខ្លះធ្វើបាបប្រពន្ធរបស់ពួកគេ?
៣ ហេតុអ្វីបានជាប្ដីខ្លះធ្វើបាបប្រពន្ធរបស់ពួកគេ? ពួកគេប្រហែលជាបានត្រូវចិញ្ចឹមអប់រំដោយឪពុកដែលធ្វើបាបម្ដាយ ដូច្នេះពួកគេគិតថាទង្វើបែបនោះគឺជារឿងធម្មតា។ រីឯបុរសឯទៀតធ្វើបាបប្រពន្ធរបស់ពួកគេ ដោយសារនោះជាអ្វីដែលបុរសនៅក្នុងវប្បធម៌របស់ពួកគេធ្វើជាទូទៅ។ បុរសទាំងនេះប្រហែលជាមានអារម្មណ៍ថា ពួកគេត្រូវប្រព្រឹត្តដោយគ្មានមេត្តាចំពោះប្រពន្ធ ដើម្បីឲ្យនាងទទួលស្គាល់អំណាចរបស់ប្ដី។ ចំណែកឯបុរសឯទៀត ពួកគេមិនបានត្រូវអប់រំឲ្យចេះគ្រប់គ្រងអារម្មណ៍ រួមទាំងកំហឹងរបស់ខ្លួន។ បុរសខ្លះមានទស្សនៈមិនត្រឹមត្រូវចំពោះស្ត្រីនិងការរួមភេទ ដោយសារពួកគេមើលរូបអាសអាភាសជារឿយៗ។ បន្ថែមទៅទៀត របាយការណ៍ផ្សេងៗបង្ហាញថាបញ្ហាទាំងនេះចាប់ផ្ដើមមានកាន់តែច្រើនឡើងក្នុងអំឡុងរោគរាតត្បាតជំងឺកូវីដ-១៩។ ប៉ុន្តែ គ្មានហេតុឲ្យប្ដីធ្វើបាបប្រពន្ធទេ។
៤. តើប្ដីដែលជាគ្រិស្តសាសនិកត្រូវប្រុងប្រយ័ត្នចំពោះអ្វី ហើយហេតុអ្វី?
៤ ប្ដីដែលជាគ្រិស្តសាសនិកត្រូវប្រុងប្រយ័ត្នកុំឲ្យមានទស្សនៈមិនត្រឹមត្រូវចំពោះស្ត្រី។ a ហេតុអ្វី? មូលហេតុមួយគឺ ដោយសារគំនិតរបស់មនុស្សច្រើនតែនាំឲ្យមានការប្រព្រឹត្ត។ សាវ័កប៉ូលបានព្រមានគ្រិស្តសាសនិកនៅក្រុងរ៉ូមដែលបានត្រូវរើសតាំងឲ្យ«ឈប់យកតម្រាប់របៀបរបបពិភពលោកនេះ»។ (រ៉ូម ១២:១, ២) ពេលប៉ូលសរសេរសំបុត្រទៅគ្រិស្តសាសនិកនៅក្រុងរ៉ូម ក្រុមជំនុំនោះបានត្រូវបង្កើតឡើងមួយរយៈពេលហើយ។ ប៉ុន្តែ ពាក្យរបស់ប៉ូលបង្ហាញឲ្យដឹងថា អ្នកខ្លះក្នុងក្រុមជំនុំនោះនៅតែទទួលឥទ្ធិពលពីវប្បធម៌ និងរបៀបគិតគូររបស់ពិភពលោក។ នេះជាមូលហេតុដែលគាត់លើកទឹកចិត្តពួកគេឲ្យកែប្រែរបៀបគិតគូរ និងការប្រព្រឹត្តរបស់ពួកគេ។ យោបល់នោះក៏សំខាន់ចំពោះគ្រិស្តសាសនិកដែលជាប្ដីនៅសព្វថ្ងៃនេះដែរ។ គួរឲ្យស្ដាយ ពួកគេខ្លះបានទទួលឥទ្ធិពលពីរបៀបគិតគូររបស់ពិភពលោក ហើយថែមទាំងបានធ្វើបាបប្រពន្ធរបស់ពួកគេ។ b តើព្រះយេហូវ៉ាតម្រូវឲ្យប្ដីប្រព្រឹត្តយ៉ាងណាចំពោះប្រពន្ធ? យើងរកឃើញចម្លើយចំពោះសំណួរនេះក្នុងបទគម្ពីរជាមូលដ្ឋានសម្រាប់អត្ថបទនេះ។
៥. យោងទៅតាមពេត្រុសទី១ ៣:៧ តើប្ដីគួរប្រព្រឹត្តយ៉ាងណាចំពោះប្រពន្ធ?
៥ សូមអាន ពេត្រុសទី១ ៣:៧។ ព្រះយេហូវ៉ាបានបង្គាប់ប្ដីឲ្យកិត្តិយសដល់ប្រពន្ធ។ ការឲ្យកិត្តិយសសំដៅទៅលើរបៀបដែលយើងប្រព្រឹត្តចំពោះនរណាម្នាក់ដែលយើងគោរព។ ប្ដីដែលឲ្យកិត្តិយសប្រពន្ធនឹងប្រព្រឹត្តចំពោះនាងដោយសប្បុរស និងដោយសេចក្ដីស្រឡាញ់។ នៅក្នុងអត្ថបទនេះ យើងនឹងពិចារណាអំពីរបៀបដែលប្ដីអាចឲ្យកិត្តិយសប្រពន្ធរបស់គាត់។ ប៉ុន្តែដំបូង សូមយើងពិចារណាអំពីការប្រព្រឹត្តខ្លះដែលមិនបង្ហាញសេចក្ដីស្រឡាញ់និងការគោរពចំពោះប្រពន្ធ។
ចូរបដិសេធទង្វើដែលមិនឲ្យតម្លៃប្រពន្ធ
៦. តើព្រះយេហូវ៉ាមានអារម្មណ៍យ៉ាងណាចំពោះបុរសដែលប្រើអំពើហិង្សាទៅលើប្រពន្ធ? (កូឡុស ៣:១៩)
៦ ការប្រើអំពើហិង្សា។ ព្រះយេហូវ៉ាស្អប់អ្នកណាដែលប្រព្រឹត្តអំពើឃោរឃៅ។ (ចសព. ១១:៥) លោកផ្ដន្ទាទោសយ៉ាងចំៗចំពោះប្ដីដែលធ្វើបាបប្រពន្ធរបស់ពួកគេ។ (ម៉ាឡ. ២:១៦; សូមអាន កូឡុស ៣:១៩ និងកំណត់សម្គាល់) យោងទៅតាមពេត្រុសទី១ ៣:៧ដែលជាបទគម្ពីរជាមូលដ្ឋានសម្រាប់អត្ថបទនេះ បើប្ដីមិនប្រព្រឹត្តល្អចំពោះប្រពន្ធទេ នោះនឹងប៉ះពាល់ដល់ចំណងមិត្តភាពរបស់គាត់ជាមួយព្រះយេហូវ៉ា។ ព្រះយេហូវ៉ាក៏ប្រហែលជាថែមទាំងមិនស្ដាប់សេចក្ដីអធិដ្ឋានរបស់គាត់ទៀតផង។
៧. យោងទៅតាមអេភេសូរ ៤:៣១, ៣២ តើប្ដីត្រូវជៀសវាងពាក្យសម្ដីបែបណា? (សូមមើល«ការពន្យល់ពាក្យ»ផងដែរ)
៧ ការប្រមាថមើលងាយ។ ប្ដីខ្លះធ្វើបាបប្រពន្ធរបស់ពួកគេដោយប្រើពាក្យក្រេវក្រោធ និងពាក្យដែលបញ្ឈឺចិត្ត។ ប៉ុន្តែ ព្រះយេហូវ៉ាស្អប់«កំហឹង ចិត្តក្ដៅក្រហាយ ការស្រែកគំហក និងពាក្យប្រមាថមើលងាយ»។ c (សូមអាន អេភេសូរ ៤:៣១, ៣២) លោកឮអ្វីៗទាំងអស់។ របៀបដែលប្ដីនិយាយទៅកាន់ប្រពន្ធ មិនថានៅផ្ទះរបស់ពួកគេក្ដី គឺសំខាន់ចំពោះព្រះយេហូវ៉ា។ ប្ដីដែលនិយាយដោយគ្មានមេត្តាចំពោះប្រពន្ធ មិនគ្រាន់តែបង្ខូចចំណងអាពាហ៍ពិពាហ៍របស់គាត់ប៉ុណ្ណោះទេ តែក៏បង្ខូចចំណងមិត្តភាពរបស់គាត់ជាមួយព្រះដែរ។—យ៉ា. ១:២៦
៨. តើព្រះយេហូវ៉ាមានទស្សនៈយ៉ាងណាចំពោះរូបអាសអាភាស ហើយហេតុអ្វី?
៨ ការមើលរូបអាសអាភាស។ តើព្រះយេហូវ៉ាមានទស្សនៈយ៉ាងណាចំពោះរូបអាសអាភាស? លោកស្អប់រូបអាសអាភាស។ ដូច្នេះ ប្ដីដែលមើលរូបមិនស្អាតស្អំ បង្ខូចចំណងមិត្តភាពរបស់គាត់ជាមួយនឹងព្រះយេហូវ៉ា ហើយមិន បង្ហាញការគោរពចំពោះប្រពន្ធទេ។ d ព្រះយេហូវ៉ាតម្រូវឲ្យប្ដីរក្សាភក្ដីភាពចំពោះប្រពន្ធគាត់ មិនគ្រាន់តែតាមរយៈការប្រព្រឹត្តប៉ុណ្ណោះ តែក៏ក្នុងចិត្តគំនិតដែរ។ លោកយេស៊ូបានមានប្រសាសន៍ថា បុរសដែលសម្លឹងមើលស្ត្រីឯទៀតទាំងមានចិត្តស្រើបស្រាលបានផិតក្បត់«នៅក្នុងចិត្តរួចហើយ»។ e—ម៉ាថ. ៥:២៨, ២៩
៩. ហេតុអ្វីបានជាព្រះយេហូវ៉ាស្អប់ការរួមដំណេកដែលបន្ទាបបន្ថោកប្រពន្ធ?
៩ ការប្រព្រឹត្តដោយបន្ទាបបន្ថោកក្នុងការរួមដំណេក។ ពេលរួមដំណេក ប្ដីខ្លះព្យាយាមបង្ខិតបង្ខំប្រពន្ធរបស់ពួកគេឲ្យប្រព្រឹត្តទង្វើដែលបន្ទាបបន្ថោក និងធ្វើឲ្យនាងមានអារម្មណ៍ថាខ្លួនមិនស្អាតស្អំ ឬមិនទទួលសេចក្ដីស្រឡាញ់។ ព្រះយេហូវ៉ាស្អប់ការគិតតែប្រយោជន៍ផ្ទាល់ខ្លួន និងការមិនគិតអំពីអារម្មណ៍របស់អ្នកឯទៀត។ លោកតម្រូវឲ្យប្ដីស្រឡាញ់ ថ្នាក់ថ្នមប្រពន្ធ និងឲ្យតម្លៃចំពោះទស្សនៈរបស់នាង។ (អេភ. ៥:២៨, ២៩) ចុះយ៉ាងណា បើប្ដីដែលជាគ្រិស្តសាសនិកកំពុងធ្វើបាបប្រពន្ធ ឬប្រព្រឹត្តអ្វីដែលបន្ទាបបន្ថោកនាង ឬមើលរូបអាសអាភាស? តើតាមរបៀបណាគាត់អាចកែប្រែរបៀបគិតគូរនិងការប្រព្រឹត្តរបស់គាត់?
របៀបយកឈ្នះការប្រព្រឹត្តដែលមិនឲ្យតម្លៃប្រពន្ធ
១០. តើប្ដីអាចទទួលប្រយោជន៍យ៉ាងណាពីគំរូរបស់លោកយេស៊ូ?
១០ តើអ្វីអាចជួយប្ដីឲ្យយកឈ្នះទង្វើណាដែលធ្វើបាបនិងបន្ទាបបន្ថោកប្រពន្ធ? គាត់អាចព្យាយាមយកតម្រាប់លោកយេស៊ូ។ ទោះបីជាលោកយេស៊ូមិនដែលរៀបការក្ដី របៀបដែលលោកប្រព្រឹត្តចំពោះពួកអ្នកកាន់តាមលោកគឺជាគំរូល្អសម្រាប់ប្ដី ស្ដីអំពីរបៀបដែលគាត់គួរប្រព្រឹត្តចំពោះប្រពន្ធ។ (អេភ. ៥:២៥) ជាឧទាហរណ៍ សូមពិចារណាអំពីអ្វីដែលប្ដីអាចរៀនពីរបៀបដែលលោកយេស៊ូប្រព្រឹត្តចំពោះពួកសាវ័ករបស់លោក និងរបៀបដែលលោកនិយាយទៅកាន់ពួកគេ។
១១. តើលោកយេស៊ូប្រព្រឹត្តយ៉ាងណាចំពោះសាវ័ករបស់លោក?
១១ លោកយេស៊ូប្រព្រឹត្តទៅលើពួកសាវ័ករបស់លោកដោយសប្បុរស និងតាមរបៀបដែលលើកកិត្តិយសពួកគេ។ លោកមិនដែលប្រព្រឹត្តដោយគ្មានមេត្តា ឬគាបសង្កត់ពួកគេឡើយ។ ទោះបីជាលោកជាលោកម្ចាស់របស់ពួកគេក្ដី លោកមិនដែលប្រើអំណាចដើម្បីធ្វើឲ្យពួកគេមានអារម្មណ៍ថាខ្លួនទន់ខ្សោយ ឬធ្វើឲ្យពួកគេភ័យខ្លាចលោកឡើយ។ ផ្ទុយទៅវិញ លោកបម្រើពួកគេដោយចិត្តរាបទាប។ (យ៉ូន. ១៣:១២-១៧) លោកបានប្រាប់ពួកអ្នកកាន់តាមលោកថា៖ «[ចូរ]រៀនពីខ្ញុំចុះ ពីព្រោះខ្ញុំស្លូត ក៏មានចិត្តរាបទាបផង នោះអ្នករាល់គ្នានឹងមានកម្លាំងចិត្តឡើងវិញ»។ (ម៉ាថ. ១១:២៨-៣០) សូមកត់សម្គាល់ថា លោកយេស៊ូមានចិត្តស្លូតបូត។ បុគ្គលដែលមានចិត្តស្លូតបូតមិនមែនទន់ខ្សោយទេ។ ផ្ទុយទៅវិញ គាត់ចេះទប់ចិត្ត។ ពេលអ្នកឯទៀតធ្វើអ្វីដែលអាចនាំឲ្យគាត់ខឹង គាត់រក្សាចិត្តស្ងប់ និងចេះគ្រប់គ្រងអារម្មណ៍របស់គាត់។
១២. តើលោកយេស៊ូប្រើពាក្យសម្ដីបែបណាទៅកាន់អ្នកឯទៀត?
១២ លោកយេស៊ូប្រើពាក្យដែលសម្រាលទុក្ខនិងលើកទឹកចិត្តអ្នកឯទៀត។ លោកមិនដែលនិយាយដោយគ្មានមេត្តាទៅកាន់ពួកអ្នកកាន់តាមរបស់លោកទេ។ (លូក. ៨:៤៧, ៤៨) សូម្បីតែពេលពួកអ្នកប្រឆាំងប្រមាថលោកនិងព្យាយាមធ្វើឲ្យលោកខឹង ក៏«លោកមិនបានប្រមាថគេវិញទេ»។ (១ពេ. ២:២១-២៣) ជួនកាល លោកយេស៊ូថែមទាំងសម្រេចចិត្តនៅស្ងៀម ជាជាងតបឆ្លើយដោយគ្មានមេត្តា។ (ម៉ាថ. ២៧:១២-១៤) នេះគឺជាគំរូដ៏ល្អណាស់សម្រាប់ប្ដីទាំងឡាយ!
១៣. ដូចដែលបានចែងនៅម៉ាថាយ ១៩:៤-៦ តើតាមរបៀបណាប្ដីអាច«នៅជាប់ជាមួយនឹងប្រពន្ធរបស់គាត់»? (សូមមើលរូបភាពផងដែរ)
១៣ លោកយេស៊ូបានបង្គាប់ប្ដីឲ្យរក្សាភក្ដីភាពចំពោះប្រពន្ធរបស់ពួកគេ។ លោកបានដកស្រង់ពាក្យរបស់បិតាលោកដែលថា ប្ដីគួរ«នៅជាប់ជាមួយនឹងប្រពន្ធរបស់គាត់»។ (សូមអាន ម៉ាថាយ ១៩:៤-៦) កិរិយាសព្ទភាសាក្រិចនៅក្នុងខនេះដែលបានត្រូវបកប្រែថា«នៅជាប់ជាមួយ» មានន័យត្រង់ថា«បិតកាវ»។ ដូច្នេះ ចំណងអាពាហ៍ពិពាហ៍រវាងប្ដីនិងប្រពន្ធគួរតែរឹងមាំយ៉ាងខ្លាំង រហូតដល់ហាក់ដូចជាបិតកាវជាប់ជាមួយ គ្នា។ បើចំណងរបស់ពួកគេបានដាច់ នោះពួកគេទាំងពីរនឹងរងទុក្ខ។ ប្ដីដែលស្រឡាញ់ប្រពន្ធយ៉ាងខ្លាំងនឹងបដិសេធមើលរូបអាសអាភាសគ្រប់បែបយ៉ាង។ គាត់នឹងបង្វែរភ្នែកចេញភ្លាមៗពី«អ្វីដែលឥតបានការ»។ (ចសព. ១១៩:៣៧) គឺហាក់ដូចជាគាត់ធ្វើកិច្ចសន្យាជាមួយនឹងភ្នែករបស់គាត់ថា ក្រៅពីប្រពន្ធរបស់ខ្លួន គាត់នឹងមិនសម្លឹងមើលស្ត្រីឯទៀតដោយមានចិត្តស្រើបស្រាលទេ។—យ៉ូប ៣១:១
១៤. តើប្ដីដែលធ្វើបាបប្រពន្ធគួរចាត់វិធានការអ្វីខ្លះដើម្បីផ្សះផ្សាចំណងមិត្តភាពរបស់គាត់ជាមួយព្រះយេហូវ៉ានិងប្រពន្ធ?
១៤ ប្ដីដែលប្រើអំពើហិង្សា ឬប្រមាថមើលងាយប្រពន្ធត្រូវចាត់វិធានការធ្វើអ្វីផ្សេងៗដើម្បីផ្សះផ្សាចំណងមិត្តភាពរបស់គាត់ជាមួយព្រះយេហូវ៉ា និងប្រពន្ធរបស់គាត់។ តើគាត់ត្រូវធ្វើអ្វីខ្លះ? ទី១ គាត់ទទួលស្គាល់ថា គាត់ផ្ទាល់មានបញ្ហាធ្ងន់ធ្ងរ។ គ្មានអ្វីលាក់កំបាំងពីភ្នែករបស់ព្រះយេហូវ៉ាឡើយ។ (ចសព. ៤៤:២១; អទ. ១២:១៤; ហេ. ៤:១៣) ទី២ គាត់ត្រូវឈប់ធ្វើបាបប្រពន្ធ និងកែប្រែការប្រព្រឹត្តរបស់គាត់។ (សុភ. ២៨:១៣) ទី៣ គាត់ប្រាប់ប្រពន្ធនិងព្រះយេហូវ៉ាថា គាត់ស្ដាយក្រោយចំពោះទង្វើដែលបាននាំឲ្យប្រពន្ធនិងព្រះយេហូវ៉ាឈឺចិត្ត ហើយគាត់សុំការអភ័យទោស។ (សកម្ម. ៣:១៩) គាត់ក៏គួរអង្វរសុំព្រះយេហូវ៉ាដើម្បីមានបំណងចិត្តចង់កែប្រែ ហើយអង្វរសុំឲ្យលោកជួយគាត់ឲ្យគ្រប់គ្រងរបៀបគិតគូរ ពាក្យសម្ដី និងការប្រព្រឹត្តរបស់គាត់។ (ចសព. ៥១:១០-១២; ២កូ. ១០:៥; ភី. ២:១៣) ទី៤ គាត់ប្រព្រឹត្តសមស្របតាមសេចក្ដីអធិដ្ឋានរបស់គាត់ដោយរៀនឲ្យចេះស្អប់អំពើឃោរឃៅ និងពាក្យប្រមាថមើលងាយគ្រប់បែបយ៉ាង។ (ចសព. ៩៧:១០) ទី៥ គាត់ស្វែងរកជំនួយភ្លាមៗពីពួកអ្នកចាស់ទុំក្នុងក្រុមជំនុំ។ (យ៉ា. ៥:១៤-១៦) ទី៦ គាត់រៀបគម្រោងទុកជាមុនដើម្បីជួយគាត់ឲ្យជៀសចេញពីការប្រព្រឹត្តបែបនោះនៅថ្ងៃខាងមុខ។ ប្ដីដែលមើលរូបអាសអាភាសក៏គួរធ្វើតាមជំហានទាំងនេះដែរ។ ព្រះយេហូវ៉ានឹងផ្ដល់ពរចំពោះការខំប្រឹងរបស់គាត់ដើម្បីកែប្រែការប្រព្រឹត្តរបស់គាត់។ (ចសព. ៣៧:៥) ប៉ុន្តែ គឺមិនគ្រប់គ្រាន់ឲ្យប្ដីឈប់ប្រព្រឹត្តអ្វីដែលធ្វើឲ្យប្រពន្ធឈឺចិត្តប៉ុណ្ណោះទេ។ គាត់ក៏ត្រូវរៀនឲ្យចេះលើកកិត្តិយសប្រពន្ធដែរ។ តើគាត់អាចធ្វើដូច្នេះយ៉ាងដូចម្ដេច?
របៀបឲ្យកិត្តិយសដល់ប្រពន្ធរបស់អ្នក
១៥. តើប្ដីអាចបង្ហាញសេចក្ដីស្រឡាញ់ចំពោះប្រពន្ធយ៉ាងដូចម្ដេច?
១៥ សូមបង្ហាញប្រពន្ធថាអ្នកស្រឡាញ់នាង។ បងប្អូនប្រុសខ្លះដែលមានអាពាហ៍ពិពាហ៍ដែលមានសុភមង្គល មានទម្លាប់ ធ្វើអ្វីល្អមួយជារៀងរាល់ថ្ងៃ ដែលបង្ហាញថាគាត់ស្រឡាញ់ប្រពន្ធខ្លាំងណាស់។ (១យ៉ូន. ៣:១៨) ប្ដីប្រហែលជាបង្ហាញមនោសញ្ចេតនាយ៉ាងជ្រាលជ្រៅចំពោះប្រពន្ធតាមរបៀបតូចតាចផ្សេងៗដូចជា កាន់ដៃនាងឬឱបនាងយ៉ាងកក់ក្ដៅ។ គាត់អាចផ្ញើសារ ហើយប្រាប់ប្រពន្ធថា«បងនឹកអូន» ឬសួរប្រពន្ធថា«ថ្ងៃនេះអូនយ៉ាងម៉េចដែរ?»។ គាត់អាចបង្ហាញសេចក្ដីស្រឡាញ់ចំពោះប្រពន្ធដោយសរសេរកាត ហើយប្រាប់ថាគាត់ស្រឡាញ់ប្រពន្ធខ្លាំងយ៉ាងណា។ ពេលប្ដីធ្វើអ្វីទាំងអស់នេះ គាត់ឲ្យកិត្តិយសដល់ប្រពន្ធ ហើយពង្រឹងចំណងអាពាហ៍ពិពាហ៍របស់ពួកគេ។
១៦. ហេតុអ្វីប្ដីគួរសរសើរប្រពន្ធ?
១៦ សូមប្រាប់ប្រពន្ធថានាងមានតម្លៃចំពោះអ្នក។ ប្ដីដែលឲ្យកិត្តិយសដល់ប្រពន្ធពង្រឹងកម្លាំង និងលើកទឹកចិត្តនាង។ របៀបមួយដែលគាត់ធ្វើដូច្នោះ គឺដោយមិនភ្លេចបង្ហាញអំណរគុណសម្រាប់អ្វីទាំងអស់ដែលនាងធ្វើដើម្បីគាំទ្រគាត់។ (កូឡ. ៣:១៥) ពេលប្ដីសរសើរប្រពន្ធដោយស្មោះ គាត់ធ្វើឲ្យនាងមានអារម្មណ៍កក់ក្ដៅ។ ប្រពន្ធនឹងមានអារម្មណ៍ថានាងបានទទួលសេចក្ដីស្រឡាញ់ កិត្តិយស និងភាពកក់ក្ដៅ។—សុភ. ៣១:២៨
១៧. តើប្ដីអាចបង្ហាញការគោរពចំពោះប្រពន្ធយ៉ាងដូចម្ដេច?
១៧ សូមប្រព្រឹត្តដោយសប្បុរសនិងដោយការគោរពទៅលើប្រពន្ធ។ ប្ដីដែលស្រឡាញ់ប្រពន្ធឲ្យតម្លៃ និងថ្នាក់ថ្នមនាងអស់ពីដួងចិត្ត។ គាត់ចាត់ទុកនាងថាជាអំណោយដ៏ថ្លៃវិសេសពីព្រះយេហូវ៉ា។ (សុភ. ១៨:២២; ៣១:១០) ជាលទ្ធផល គាត់ប្រព្រឹត្តទៅកាន់នាងដោយសប្បុរសនិងដោយការគោរព ហើយនេះរួមបញ្ចូលពេលពួកគេរួមដំណេកជាមួយគ្នា។ ក្នុងការរួមដំណេក គាត់នឹងមិនបង្ខំនាងឲ្យធ្វើអ្វីណាក៏ដោយដែលធ្វើឲ្យនាងមានអារម្មណ៍មិនស្រួល ដែលបន្ទាបបន្ថោកនាង ឬធ្វើឲ្យសមត្ថភាពវិនិច្ឆ័យរបស់នាងផ្ដន្ទាទោសឡើយ។ f ប្ដីក៏នឹងព្យាយាមរក្សាសមត្ថភាពវិនិច្ឆ័យដែលមិនផ្ដន្ទាទោសនៅចំពោះមុខព្រះយេហូវ៉ាដែរ។—សកម្ម. ២៤:១៦
១៨. តើប្ដីគួរតាំងចិត្តធ្វើអ្វី? (សូមមើលផងដែរនូវប្រអប់ដែលមានចំណងជើងថា « របៀបបួនយ៉ាងដើម្បីទៅជាប្ដីដែលបង្ហាញការគោរព»)
១៨ ប្ដីទាំងឡាយ អ្នកអាចប្រាកដថាព្រះយេហូវ៉ាឃើញនិងឲ្យតម្លៃចំពោះការខំប្រឹងរបស់អ្នកក្នុងការឲ្យកិត្តិយសដល់ប្រពន្ធតាមរយៈការប្រព្រឹត្ត និងពាក្យសម្ដីទាំងអស់របស់អ្នក។ សូមតាំងចិត្តឲ្យកិត្តិយសដល់ប្រពន្ធដោយជៀសវាងពីការប្រព្រឹត្តណាដែលអាចធ្វើឲ្យនាងឈឺចិត្ត តែប្រព្រឹត្តដោយសប្បុរស ដោយគោរព និងដោយបង្ហាញសេចក្ដីស្រឡាញ់ចំពោះនាង។ ដោយធ្វើដូច្នោះ អ្នកបង្ហាញប្រពន្ធថាអ្នកស្រឡាញ់និងឲ្យតម្លៃនាង។ ចូរឲ្យកិត្តិយសដល់ប្រពន្ធរបស់អ្នក ហើយអ្នកនឹងការពារចំណងដែលសំខាន់បំផុត ពោលគឺចំណងមិត្តភាពរបស់អ្នកជាមួយព្រះយេហូវ៉ា។—ចសព. ២៥:១៤
ចម្រៀងលេខ១៣១ «គូដែលព្រះបានផ្សំផ្គុំ»
a ប្ដីនឹងទទួលប្រយោជន៍ពីការអានអត្ថបទដែលមានចំណងជើងថា «តើអ្នកប្រព្រឹត្តទៅលើស្ត្រីដូចព្រះយេហូវ៉ាឬទេ?» ក្នុងទស្សនាវដ្ដីប៉មយាម ខែមករា ឆ្នាំ២០២៤។
b បើអ្នកត្រូវគូអាពាហ៍ពិពាហ៍ធ្វើបាប អ្នកនឹងទទួលជំនួយពីការអានអត្ថបទដែលមានចំណងជើងថា «ជំនួយសម្រាប់ជនរងគ្រោះដោយសារអំពើហិង្សាក្នុងគ្រួសារ»។ ដើម្បីមើលអត្ថបទនេះ សូមចូលគេហទំព័រjw.org/km ឬកម្មវិធីJWបណ្ណាល័យ។ សូមចុច«អត្ថបទតភាគ» រួច«ប្រធានបទឯទៀត»។
c ការពន្យល់ពាក្យ៖ «ពាក្យប្រមាថមើលងាយ» រួមបញ្ចូលការប្រើពាក្យអសុរោះដើម្បីបន្ទាបបន្ថោកអ្នកឯទៀត ហើយការរិះគន់ឥតឈប់ឈរ។ ដូច្នេះ អ្វីក៏ដោយដែលប្ដីនិយាយទៅកាន់ប្រពន្ធដើម្បីបញ្ឈឺចិត្ត ឬដៀលត្មះនាងគឺជាពាក្យប្រមាថមើលងាយ។
d សូមមើលអត្ថបទដែលមានចំណងជើងថា «រូបអាសអាភាសអាចបំបាក់បំបែកអាពាហ៍ពិពាហ៍របស់អ្នក» នៅគេហទំព័រjw.org/km ឬនៅកម្មវិធីJWបណ្ណាល័យ។
e ប្រពន្ធដែលមានប្ដីមើលរូបអាសអាភាសនឹងទទួលប្រយោជន៍ពីការអានអត្ថបទដែលមានចំណងជើងថា «ពេលគូអាពាហ៍ពិពាហ៍មើលរូបអាសអាភាស» ក្នុងទស្សនាវដ្ដីប៉មយាម ខែសីហា ឆ្នាំ២០២៣។
f គម្ពីរមិនបានចែងអំពីអ្វីដែលស្អាតស្អំ និងអ្វីដែលមិនស្អាតស្អំពេលប្ដីប្រពន្ធរួមដំណេកជាមួយគ្នាឡើយ។ គូអាពាហ៍ពិពាហ៍ដែលជាគ្រិស្តសាសនិកត្រូវធ្វើការសម្រេចចិត្តដែលបង្ហាញថាពួកគេតាំងចិត្តឲ្យកិត្តិយសដល់ព្រះយេហូវ៉ា និងបំពេញចិត្តគ្នាទៅវិញទៅមក ព្រមទាំងរក្សាសមត្ថភាពវិនិច្ឆ័យដែលមិនផ្ដន្ទាទោស។ តាមធម្មតា គូអាពាហ៍ពិពាហ៍នឹងមិននិយាយអំពីរឿងផ្ទាល់ខ្លួនបែបនេះជាមួយអ្នកឯទៀតឡើយ។
g ការពណ៌នាអំពីរូបភាព៖ អ្នករួមការងារដែលមិនមែនជាសាក្សី ព្យាយាមបង្ខំបងប្រុសម្នាក់ឲ្យមើលទស្សនាវដ្ដីអាសអាភាស។