សំណួរពីអ្នកអាន
ហេតុអ្វីយ៉ូសែបនិងម៉ារៀបានបន្ដនៅក្រុងបេថ្លេហិមជាជាងត្រឡប់ទៅក្រុងណាសារ៉ែតវិញក្រោយពីកំណើតលោកយេស៊ូ?
គម្ពីរមិនចែងទេ។ តែក្នុងគម្ពីរមានព័ត៌មានដ៏គួរឲ្យចាប់អារម្មណ៍ដែលប្រហែលជាជះឥទ្ធិពលលើការសម្រេចចិត្តរបស់ពួកគាត់។
ទេវតាមួយរូបបានប្រាប់ម៉ារៀថានាងនឹងមានផ្ទៃពោះ ហើយបង្កើតកូន។ ពេលទេវតានាំដំណឹងនោះមក ម៉ារៀនិងយ៉ូសែបរស់នៅក្រុងណាសារ៉ែតនាស្រុកកាលីឡេ ដែលជាស្រុកកំណើតរបស់យ៉ូសែប។ (លូក. ១:២៦-៣១; ២:៤) ក្រោយមក ពេលពួកគាត់បានមកពីស្រុកអេហ្ស៊ីបវិញ ពួកគាត់បានត្រឡប់ទៅក្រុងណាសារ៉ែត។ លោកយេស៊ូបានធំឡើងនៅទីនោះ ហើយបានត្រូវគេហៅថាអ្នកក្រុងណាសារ៉ែត។ (ម៉ាថ. ២:១៩-២៣) ហេតុនេះ ពេលយើងគិតអំពីលោកយេស៊ូ យ៉ូសែប និងម៉ារៀ យើងនឹកឃើញអំពីក្រុងណាសារ៉ែត។
ម៉ារៀមានញាតិសន្ដានម្នាក់ឈ្មោះអេលីសាបិតដែលរស់នៅស្រុកយូដា។ អេលីសាបិតជាប្រពន្ធរបស់សង្ឃម្នាក់ឈ្មោះសាការី ហើយបានទៅជាម្ដាយរបស់យ៉ូហានដែលជាអ្នកជ្រមុជទឹក។ (លូក. ១:៥, ៩, ១៣, ៣៦) ម៉ារៀបានទៅលេងអេលីសាបិតបីខែនៅស្រុកយូដា ហើយក្រោយមកបានត្រឡប់ទៅក្រុងណាសារ៉ែតវិញ។ (លូក. ១:៣៩, ៤០, ៥៦) ហេតុនេះម៉ារៀស្គាល់ទឹកដីយូដាខ្លះៗ។
ក្រោយមក យ៉ូសែបបានធ្វើតាមបង្គាប់ឲ្យ«ចុះឈ្មោះក្នុងបញ្ជី»។ ដូច្នេះ យ៉ូសែបបានធ្វើដំណើរពីក្រុងណាសារ៉ែតទៅក្រុងបេថ្លេហិមដែលជា«ស្រុកកំណើតរបស់ដាវីឌ» ហើយជាក្រុងដែលបានត្រូវប្រកាសទុកជាមុនថាជាកន្លែងដែលមេស្ស៊ីនឹងកើតមក។ (លូក. ២:៣, ៤; ១សាំ. ១៧:១៥; ២០:៦; មីកា ៥:២) បន្ទាប់ពីម៉ារៀបានសម្រាលទារកយេស៊ូនៅទីនោះ យ៉ូសែបមិនតម្រូវឲ្យនាងធ្វើដំណើរដ៏ឆ្ងាយទៅក្រុងណាសារ៉ែតវិញជាមួយនឹងទារកទេ។ ពួកគាត់បានបន្ដនៅក្រុងបេថ្លេហិម ដែលប្រហែលជាមានចម្ងាយ៩គីឡូម៉ែត្រពីក្រុងយេរូសាឡិម។ យ៉ាងនេះ ពួកគាត់ស្រួលយកកូនទៅវិហារនិងជូនគ្រឿងបូជាដែលច្បាប់តម្រូវ។—ចល. ១២:២, ៦-៨; លូក. ២:២២-២៤
ពីមុន ទេវតារបស់ព្រះបានប្រាប់ម៉ារៀថាកូនប្រុសរបស់គាត់នឹងទទួល«បល្ល័ង្ករបស់ដាវីឌ» ហើយ«នឹងគ្រប់គ្រងជាស្ដេច»។ ប្រហែលជាយ៉ូសែបនិងម៉ារៀបានគិតថាគឺគួរឲ្យកត់សម្គាល់ដែលលោកយេស៊ូបានកើតនៅស្រុកកំណើតរបស់ដាវីឌ។ (លូក. ១:៣២, ៣៣; ២:១១, ១៧) ពួកគាត់ប្រហែលជាបានគិតថាគឺជាការឈ្លាសវៃឲ្យបន្តនៅទីនោះ ហើយចាំរហូតដល់ដឹងអំពីអ្វីដែលព្រះចង់ឲ្យពួកគាត់ធ្វើបន្ទាប់មក។
យើងមិនដឹងថាពួកគាត់នៅក្រុងបេថ្លេហិមយូរប៉ុណ្ណាទេ ពេលពួកអ្នកចេះហោរាសាស្ត្របានមក។ ប៉ុន្តែនៅពេលនោះ ក្រុមគ្រួសារនោះកំពុងរស់នៅក្នុងផ្ទះមួយ ហើយពួកគាត់មាន«កូនតូច» មិនមែនទារកឡើយ។ (ម៉ាថ. ២:១១) តាមមើលទៅ ជាជាងត្រឡប់ទៅក្រុងណាសារ៉ែតវិញ ពួកគាត់បានបន្តនៅក្រុងបេថ្លេហិមយូរល្មមរហូតដល់ទៅជាកន្លែងដែលពួកគាត់រស់នៅ។
ហេរ៉ូឌបានបង្គាប់គេឲ្យសម្លាប់«ក្មេងប្រុសទាំងអស់ដែលមានអាយុចាប់ពីពីរឆ្នាំចុះ»នៅក្រុងបេថ្លេហិម។ (ម៉ាថ. ២:១៦) ដោយសារយ៉ូសែបបានទទួលការព្រមានពីព្រះអំពីរឿងនោះ គាត់និងម៉ារៀបាននាំលោកយេស៊ូគេចទៅស្រុកអេហ្ស៊ីប ហើយបាននៅទីនោះរហូតដល់ហេរ៉ូឌស្លាប់។ ក្រោយមក យ៉ូសែបបាននាំក្រុមគ្រួសាររបស់គាត់ទៅក្រុងណាសារ៉ែត។ ហេតុអ្វីពួកគាត់មិនបានត្រឡប់ទៅក្រុងបេថ្លេហិមវិញ? ពីព្រោះនៅពេលនោះ អាខេឡាសដែលជាកូនប្រុសរបស់ហេរ៉ូឌ កំពុងគ្រប់គ្រងនៅតំបន់យូឌា ហើយគាត់ជាមនុស្សកាច។ ម្យ៉ាងទៀត ទេវតាមួយរូបបានព្រមានយ៉ូសែបម្ដងទៀតមិនឲ្យទៅទីនោះ។ នៅក្រុងណាសារ៉ែត យ៉ូសែបអាចចិញ្ចឹមអប់រំលោកយេស៊ូជាអ្នកគោរពប្រណិប័តន៍ពិតរបស់ព្រះដោយសុវត្ថិភាព។—ម៉ាថ. ២:១៩-២២; ១៣:៥៥; លូក. ២:៣៩, ៥២
តាមមើលទៅ យ៉ូសែបបានស្លាប់មុនលោកយេស៊ូបើកឱកាសឲ្យមនុស្សឡើងទៅស្ថានសួគ៌។ ដូច្នេះ យ៉ូសែបនឹងត្រូវប្រោសឲ្យរស់ឡើងវិញនៅផែនដី។ មនុស្សជាច្រើននឹងអាចជួបគាត់ ហើយរៀនថែមទៀតពីគាត់អំពីមូលហេតុដែលគាត់និងម៉ារៀបានបន្តនៅក្រុងបេថ្លេហិមក្រោយពីលោកយេស៊ូកើត។
