អត្ថបទសិក្សា ១៧
ព្រះយេហូវ៉ានឹងជួយអ្នកពេលជួបបញ្ហាដែលមិនបានរំពឹងទុក
«មនុស្សសុចរិតជួបទុក្ខលំបាកជាច្រើន តែព្រះយេហូវ៉ាជួយសង្គ្រោះគាត់ឲ្យរួចផុតពីទុក្ខទាំងអស់»។—ចសព. ៣៤:១៩
ចម្រៀងលេខ៤៤ សេចក្ដីអធិដ្ឋានរបស់មនុស្សទន់ទាប
សេចក្ដីសង្ខេប a
១. តើយើងជឿជាក់អំពីអ្វី?
យើងជារាស្ត្ររបស់ព្រះយេហូវ៉ា ដូច្នេះយើងដឹងថាលោកស្រឡាញ់យើងនិងចង់ឲ្យយើងមានជីវិតល្អបំផុត។ (រ៉ូម ៨:៣៥-៣៩) យើងក៏ជឿជាក់ដែរថា គោលការណ៍គម្ពីរតែងតែផ្ដល់ប្រយោជន៍ដល់យើងពេលយើងធ្វើតាម។ (អេ. ៤៨:១៧, ១៨) ប៉ុន្តែ តើយើងគួរធ្វើយ៉ាងណាបើយើងជួបបញ្ហាដែលយើងមិនបានរំពឹងទុក?
២. តើយើងប្រហែលជាជួបបញ្ហាអ្វី ហើយតើបញ្ហាបែបនោះអាចនាំឲ្យមានសំណួរអ្វីខ្លះ?
២ អ្នកបម្រើទាំងអស់របស់ព្រះយេហូវ៉ាជួបបញ្ហាផ្សេងៗ។ ជាឧទាហរណ៍ សមាជិកណាម្នាក់ក្នុងក្រុមគ្រួសារប្រហែលជាធ្វើឲ្យយើងខកចិត្ត។ យើងប្រហែលជាធ្លាក់ខ្លួនឈឺធ្ងន់ ហើយមិនអាចធ្វើច្រើនក្នុងកិច្ចបម្រើព្រះយេហូវ៉ា។ យើងប្រហែលជារងផលប៉ះពាល់យ៉ាងធ្ងន់ធ្ងរពីមហន្តរាយធម្មជាតិ។ ឬយើងប្រហែលជាត្រូវគេបៀតបៀនដោយសារជំនឿរបស់យើង។ ពេលយើងជួបទុក្ខលំបាកបែបនេះ យើងប្រហែលជាឆ្ងល់ថា ‹ហេតុអ្វីបញ្ហានេះកើតឡើងចំពោះខ្ញុំ? តើខ្ញុំបានធ្វើអីខុស? តើព្រះយេហូវ៉ាលែងឲ្យពរខ្ញុំឬ?›។ តើអ្នកធ្លាប់មានអារម្មណ៍បែបនេះឬទេ? បើដូច្នេះ សូមកុំធ្លាក់ទឹកចិត្តឡើយ។ អ្នកបម្រើដ៏ស្មោះត្រង់ជាច្រើននាក់របស់ព្រះយេហូវ៉ាធ្លាប់មានអារម្មណ៍ស្រដៀងនឹងនេះ។—ចសព. ២២:១, ២; ហាប. ១:២, ៣
៣. តើយើងអាចរៀនអ្វីពីចម្រៀងសរសើរព្រះ ៣៤:១៩?
៣ សូមអាន ចម្រៀងសរសើរព្រះ ៣៤:១៩។ សូមកត់សម្គាល់ចំណុចសំខាន់ពីរយ៉ាងពីបទចម្រៀងសរសើរព្រះនេះគឺ៖ (១) មនុស្សសុចរិតជួបបញ្ហា។ (២) ព្រះយេហូវ៉ាជួយសង្គ្រោះយើងឲ្យរួចផុតពីទុក្ខលំបាករបស់យើង។ តើលោកជួយសង្គ្រោះយើងតាមរបៀបណា? របៀបមួយគឺលោកជួយយើងឲ្យមានទស្សនៈសមហេតុសមផលចំពោះជីវិតក្នុងពិភពលោកនេះ។ ទោះជាព្រះយេហូវ៉ាសន្យាថាយើងនឹងមានអំណរក្នុងការបម្រើលោកក្ដី លោកមិនធានាថាជីវិតយើងនឹងគ្មានទុក្ខលំបាកសោះនៅឥឡូវនេះទេ។ (អេ. ៦៦:១៤) លោកលើកទឹកចិត្តយើងឲ្យផ្ដោតអារម្មណ៍ទៅលើថ្ងៃអនាគតជាគ្រាដែលយើងនឹងមានជីវិតដែលលោកចង់ឲ្យយើងមានជារៀងរហូត។ (២កូ. ៤:១៦-១៨) ទម្រាំដល់ពេលនោះ លោកជួយយើងឲ្យបន្តបម្រើលោកពីមួយថ្ងៃទៅមួយថ្ងៃ។—បទំ. ៣:២២-២៤
៤. តើយើងនឹងពិចារណាអ្វីក្នុងអត្ថបទនេះ?
៤ សូមយើងពិចារណាអំពីអ្វីដែលយើងអាចរៀនពីគំរូរបស់ពួកអ្នកគោរពប្រណិប័តន៍ដ៏ស្មោះត្រង់របស់ព្រះយេហូវ៉ាទាំងនៅសម័យគម្ពីរ ទាំងនៅសម័យយើង។ ដូចដែលយើងនឹងឃើញ យើងប្រហែលជាជួបបញ្ហាដែលមិនបានរំពឹងទុក្ខ។ ប៉ុន្តែ ពេលយើងពឹងផ្អែកព្រះយេហូវ៉ា លោកនឹងជួយយើងជានិច្ច។ (ចសព. ៥៥:២២) កាលដែលយើងពិចារណាអំពីគំរូទាំងនេះ សូមសួរខ្លួនថា ‹តើខ្ញុំនឹងធ្វើយ៉ាងណាក្នុងស្ថានភាពស្រដៀងនឹងនេះ? តើគំរូទាំងនេះពង្រឹងទំនុកចិត្តរបស់ខ្ញុំលើព្រះយេហូវ៉ាយ៉ាងដូចម្ដេច? តើខ្ញុំអាចទាញយកមេរៀនអ្វីខ្លះមកអនុវត្តក្នុងជីវិតខ្ញុំ?›។
នៅសម័យគម្ពីរ
អស់រយៈពេល២០ឆ្នាំ ព្រះយេហូវ៉ាបានឲ្យពរយ៉ាកុបកាលដែលគាត់ប្រឹងធ្វើការយ៉ាងខ្មឺតឲ្យអ៊ំប្រុសរបស់គាត់ឈ្មោះឡាបាន់ដែលកេងប្រវ័ញ្ចគាត់(សូមមើលវគ្គ៥)
៥. តើយ៉ាកុបជួបបញ្ហាអ្វីខ្លះដោយសារតែឡាបាន់? (សូមមើលរូបភាពនៅក្រប)
៥ អ្នកបម្រើរបស់ព្រះយេហូវ៉ានៅសម័យគម្ពីរជួបទុក្ខលំបាកដែលពួកគេមិនបានរំពឹងទុក។ សូមគិតអំពីយ៉ាកុប។ ឪពុករបស់គាត់បានបង្គាប់គាត់ឲ្យទៅយកកូនស្រីរបស់ឡាបាន់ធ្វើជាប្រពន្ធ។ ឡាបាន់ជាសាច់ញាតិដែលជាអ្នកគោរពប្រណិប័តន៍ព្រះយេហូវ៉ា ហើយឪពុកយ៉ាកុបបានពង្រឹងទំនុកចិត្តគាត់ថាព្រះយេហូវ៉ានឹងឲ្យពរគាត់ជាបរិបូរ។ (ដក. ២៨:១-៤) យ៉ាកុបបានធ្វើអ្វីដែលត្រឹមត្រូវ។ គឺគាត់បានចាកចេញពីស្រុកកាណាន ហើយធ្វើដំណើរទៅផ្ទះរបស់ឡាបាន់ដែលមានកូនស្រីពីរនាក់ឈ្មោះលេអានិងរ៉ាជែល។ យ៉ាកុបបានចាប់ចិត្តស្រឡាញ់រ៉ាជែលជាកូនស្រីប្អូនរបស់ឡាបាន់ ហើយសុខចិត្តធ្វើការ៧ឆ្នាំឲ្យឪពុកនាងដើម្បីបានរៀបការជាមួយនាង។ (ដក. ២៩:១៨) ប៉ុន្តែនេះមិនមែនជាអ្វីដែលបានកើតឡើងទេ។ ឡាបាន់បានបោកបញ្ឆោតយ៉ាកុបឲ្យរៀបការជាមួយកូនស្រីច្បងរបស់គាត់គឺលេអា។ ឡាបាន់អនុញ្ញាតឲ្យយ៉ាកុបរៀបការជាមួយរ៉ាជែលមួយសប្ដាហ៍ក្រោយមកបាន ឲ្យតែយ៉ាកុបព្រមធ្វើការឲ្យគាត់៧ឆ្នាំថែមទៀត។ (ដក. ២៩:២៥-២៧) ឡាបាន់ក៏បានកេងប្រវ័ញ្ចញើសឈាមរបស់យ៉ាកុបដែរ។ សរុបសេចក្ដី ឡាបាន់បានប្រព្រឹត្តដោយអយុត្តិធម៌ចំពោះយ៉ាកុបអស់២០ឆ្នាំ!—ដក. ៣១:៤១, ៤២
៦. តើយ៉ាកុបបានស៊ូទ្រាំនឹងបញ្ហាអ្វីទៀត?
៦ យ៉ាកុបបានស៊ូទ្រាំនឹងបញ្ហាផ្សេងទៀត។ គាត់មានក្រុមគ្រួសារធំ ប៉ុន្តែកូនប្រុសៗរបស់គាត់មិនតែងតែចុះសម្រុងគ្នាទេ។ ពួកគេថែមទាំងបានលក់យ៉ូសែបដែលជាប្អូនប្រុសរបស់ពួកគេឲ្យធ្វើជាខ្ញុំបម្រើទៀតផង។ កូនប្រុសពីរនាក់របស់យ៉ាកុបគឺស៊ីម្មាននិងលេវីបានធ្វើឲ្យក្រុមគ្រួសារអាប់ឱនកិត្តិយស និងធ្វើឲ្យគេតិះដៀលនាមរបស់ព្រះយេហូវ៉ា។ បន្ថែមទៅទៀត រ៉ាជែលប្រពន្ធជាទីស្រឡាញ់របស់យ៉ាកុបបានស្លាប់កាលដែលនាងកំពុងសម្រាលកូនទី២។ មួយវិញទៀត ដោយសារមានការអត់ឃ្លានយ៉ាងធ្ងន់ធ្ងរ យ៉ាកុបត្រូវរើទៅស្រុកអេហ្ស៊ីបទាំងវ័យចាស់។—ដក. ៣៤:៣០; ៣៥:១៦-១៩; ៣៧:២៨; ៤៥:៩-១១, ២៨
៧. តើព្រះយេហូវ៉ាបានបង្ហាញយ៉ាកុបយ៉ាងណាថាលោកពេញចិត្តគាត់?
៧ ទោះជាយ៉ាកុបជួបបញ្ហាទាំងអស់នេះក្ដី គាត់មិនដែលបាត់បង់ជំនឿលើព្រះយេហូវ៉ានិងសេចក្ដីសន្យារបស់លោកទេ។ ម្យ៉ាងទៀត ព្រះយេហូវ៉ាបានបង្ហាញយ៉ាកុបថាលោកពេញចិត្តគាត់។ ជាឧទាហរណ៍ ទោះជាឡាបាន់បានបោកបញ្ឆោតយ៉ាកុបក្ដី ព្រះយេហូវ៉ាបានឲ្យទ្រព្យសម្បត្តិជាច្រើនដល់យ៉ាកុប។ ម្យ៉ាងទៀត សូមគិតថាយ៉ាកុបច្បាស់ជាមានចិត្តកតញ្ញូខ្លាំងយ៉ាងណាចំពោះព្រះយេហូវ៉ា ពេលគាត់បានជួបជុំយ៉ូសែបម្ដងទៀតជាកូនប្រុសដែលគាត់គិតថាបានស្លាប់បាត់ជាយូរមកហើយ។ ចំណងមិត្តភាពជិតស្និទ្ធរបស់យ៉ាកុបជាមួយព្រះយេហូវ៉ាបានជួយគាត់ឲ្យស៊ូទ្រាំនឹងទុក្ខលំបាករបស់គាត់។ (ដក. ៣០:៤៣; ៣២:៩, ១០; ៤៦:២៨-៣០) ពេលយើងរក្សាចំណងមិត្តភាពជិតស្និទ្ធជាមួយព្រះយេហូវ៉ា យើងក៏អាចស៊ូទ្រាំនឹងទុក្ខលំបាកដែលមិនបានរំពឹងទុកដែរ។
៨. តើស្ដេចដាវីឌចង់ធ្វើអ្វី?
៨ ស្ដេចដាវីឌមិនអាចធ្វើអ្វីទាំងអស់ដែលគាត់ចង់ធ្វើក្នុងកិច្ចបម្រើព្រះយេហូវ៉ាឡើយ។ ជាឧទាហរណ៍ ដាវីឌពិតជាចង់សង់វិហារជូនព្រះរបស់គាត់។ គាត់បានប្រាប់អំពីបំណងចិត្តរបស់គាត់ទៅអ្នកប្រកាសទំនាយណាថាន់។ ណាថាន់បានតបឆ្លើយថា៖ «សូមអ្នកធ្វើតាមបំណងចិត្តរបស់អ្នកចុះ ព្រោះព្រះពិតនៅជាមួយនឹងអ្នកហើយ»។ (១ប្រ. ១៧:១, ២) ពាក្យទាំងនោះច្បាស់ជាលើកទឹកចិត្តដាវីឌយ៉ាងខ្លាំង។ ប្រហែលជាគាត់បានចាប់ផ្ដើមរៀបផែនការធ្វើគម្រោងដ៏ធំនេះភ្លាមៗ។
៩. តើដាវីឌមានប្រតិកម្មយ៉ាងណាចំពោះដំណឹងដែលធ្វើឲ្យគាត់ខកចិត្ត?
៩ ប៉ុន្តែ មិនយូរក្រោយមកអ្នកប្រកាសទំនាយរបស់ព្រះយេហូវ៉ានោះបានត្រឡប់មកវិញ ដោយនាំដំណឹងខកចិត្តមួយប្រាប់ដាវីឌ។ «នៅយប់នោះ» ព្រះយេហូវ៉ាបានប្រាប់ណាថាន់ថាដាវីឌនឹងមិនមែនជាអ្នកសង់វិហារទេ ផ្ទុយទៅវិញកូនប្រុសម្នាក់របស់គាត់នឹងជាអ្នកសង់។ (១ប្រ. ១៧:៣, ៤, ១១, ១២) តើដាវីឌមានប្រតិកម្មយ៉ាងណាពេលគាត់ទទួលដំណឹងនេះ? គាត់បានផ្លាស់ប្ដូរគោលដៅរបស់គាត់។ គាត់បានផ្ដោតអារម្មណ៍ទៅលើការប្រមូលទ្រព្យសម្បត្តិសម្រាប់ធ្វើគម្រោងនោះ ដែលកូនរបស់គាត់សាឡូម៉ូននឹងត្រូវការ។—១ប្រ. ២៩:១-៥
១០. តើព្រះយេហូវ៉ាបានឲ្យពរដាវីឌយ៉ាងដូចម្ដេច?
១០ ភ្លាមៗក្រោយពីប្រាប់ដាវីឌថាគាត់នឹងមិនមែនជាអ្នកសង់វិហារ ព្រះយេហូវ៉ាបានធ្វើកិច្ចព្រមព្រៀងមួយជាមួយគាត់។ ព្រះយេហូវ៉ាបានសន្យានឹងដាវីឌថាកូនចៅម្នាក់របស់គាត់នឹងគ្រប់គ្រងជារៀងរហូត។ (២សាំ. ៧:១៦) សូមស្រមៃគិតថាក្នុងពិភពលោកថ្មី ដាវីឌនឹងសប្បាយចិត្តខ្លាំងយ៉ាងណាដែលដឹងថា គាត់នៅក្រោមការគ្រប់គ្រងមួយពាន់ឆ្នាំរបស់លោកយេស៊ូជាស្ដេចដែលមកពីសែស្រឡាយគាត់! កំណត់ហេតុនេះជួយយើងឲ្យយល់ថា ទោះជាយើងមិនអាចធ្វើអ្វីទាំងអស់ដែលយើងចង់ធ្វើសម្រាប់ព្រះយេហូវ៉ាក្ដី លោកប្រហែលជាឲ្យយើងនូវពរផ្សេងទៀតដែលយើងនឹកស្មានមិនដល់។
១១. តើគ្រិស្តសាសនិកនៅសតវត្សរ៍ទី១បានទទួលពរយ៉ាងណា ទោះជារាជាណាចក្រព្រះមិនបានមកដល់នៅពេលដែលពួកគេបានរំពឹងទុកក្ដី? (សកម្មភាព ៦:៧)
១១ គ្រិស្តសាសនិកនៅសតវត្សរ៍ទី១បានជួបទុក្ខលំបាកខ្លះដែលមិនបានរំពឹងទុក។ ជាឧទាហរណ៍ ពួកគេចង់ឲ្យរាជាណាចក្រព្រះមកដល់ ប៉ុន្តែពួកគេមិនដឹងថានោះនឹងមកនៅពេលណាទេ។ (សកម្ម. ១:៦, ៧) ដូច្នេះ តើពួកគេបានធ្វើអ្វី? គឺពួកគេបានបន្តជាប់រវល់ក្នុងកិច្ចការផ្សព្វផ្សាយ។ កាលដែលដំណឹងល្អបន្តចម្រើនឡើង ពួកគេបានឃើញរបៀបដែលព្រះយេហូវ៉ាជួយពួកគេ។—សូមអាន សកម្មភាព ៦:៧
១២. តើគ្រិស្តសាសនិកនៅសតវត្សរ៍ទី១បានធ្វើអ្វីពេលមានការអត់ឃ្លាន?
១២ នៅពេលមួយ មានការអត់ឃ្លានយ៉ាងខ្លាំង«នៅទូទាំងផែនដី»។ (សកម្ម. ១១:២៨) ការអត់ឃ្លាននោះក៏មានឥទ្ធិពលលើគ្រិស្តសាសនិកនៅសតវត្សរ៍ទី១ដែរ។ សូមស្រមៃគិតថាតើពួកគេរងទុក្ខយ៉ាងណាដោយសារការអត់ឃ្លានយ៉ាងខ្លាំងនោះ។ ប្រមុខគ្រួសារច្បាស់ជាព្រួយបារម្ភថាពួកគេនឹងផ្គត់ផ្គង់អ្នកផ្ទះរបស់ពួកគេយ៉ាងដូចម្ដេច។ ចុះយ៉ាងណាប្អូនៗវ័យក្មេងដែលមានគម្រោងបង្កើនកិច្ចបម្រើផ្សាយរបស់ពួកគេ? តើពួកគេប្រហែលជាឆ្ងល់ថាពួកគេគួរពន្យារពេលធ្វើដូច្នេះឬទេ? ទោះជាគ្រិស្តសាសនិកទាំងនោះមានកាលៈទេសៈយ៉ាងណាក្ដី ពួកគេបានសម្របខ្លួន។ ពួកគេបានបន្តផ្សព្វផ្សាយតាមវិធីណាក៏ដោយដែលពួកគេអាចធ្វើបាន ហើយពួកគេសប្បាយចែករំលែកអ្វីដែលពួកគេមានជាមួយបងប្អូនរួមជំនឿនៅតំបន់យូឌា។—សកម្ម. ១១:២៩, ៣០
១៣. តើគ្រិស្តសាសនិកនៅសម័យដើមបានទទួលពរអ្វីខ្លះក្នុងអំឡុងការអត់ឃ្លាន?
១៣ តើគ្រិស្តសាសនិកនៅសម័យនោះបានទទួលពរអ្វីខ្លះក្នុងអំឡុងការអត់ឃ្លាន? ពួកអ្នកដែលទទួលជំនួយបានឃើញថាព្រះយេហូវ៉ាកំពុងជួយពួកគេ។ (ម៉ាថ. ៦:៣១-៣៣) ពួកគេច្បាស់ជាមានអារម្មណ៍ជិតស្និទ្ធជាងជាមួយបងប្អូនរួមជំនឿដែលបានជួយពួកគេ។ ម្យ៉ាងទៀត ពួកអ្នកដែលជូនវិភាគទាន ឬដែលរួមចំណែកក្នុងកិច្ចការផ្ដល់ជំនួយតាមរបៀបផ្សេងទៀតមានសុភមង្គលដែលមកពីការឲ្យ។ (សកម្ម. ២០:៣៥) ព្រះយេហូវ៉ាបានឲ្យពរពួកគេទាំងអស់គ្នា កាលដែលពួកគេបានសម្របខ្លួននឹងស្ថានភាពដែលបានត្រូវផ្លាស់ប្ដូរ។
១៤. តើអ្វីបានកើតឡើងចំពោះបាណាបាសនិងសាវ័កប៉ូល ហើយតើនោះនាំឲ្យមានលទ្ធផលអ្វី? (សកម្មភាព ១៤:២១, ២២)
១៤ គ្រិស្តសាសនិកនៅសតវត្សរ៍ទី១ច្រើនតែត្រូវគេបៀតបៀន ជួនកាលនោះកើតឡើងនៅពេលដែលពួកគេនឹកស្មានមិនដល់។ សូមគិតអំពីអ្វីដែលបានកើតឡើងចំពោះបាណាបាសនិងសាវ័កប៉ូល កាលដែលពួកគាត់ផ្សព្វផ្សាយនៅក្រុងលីស្ត្រា។ ដំបូង បណ្ដាជនបានស្វាគមន៍និងស្ដាប់ពួកគាត់។ ប៉ុន្តែក្រោយមក ពួកអ្នកប្រឆាំងបាន«អុជអាលបណ្ដាជន» រួចបណ្ដាជនខ្លះទាំងនោះបានគប់ប៉ូលនឹងដុំថ្ម ហើយទុកគាត់ឲ្យស្លាប់។ (សកម្ម. ១៤:១៩) ប៉ុន្តែ បាណាបាសនិងប៉ូលបានបន្តផ្សព្វផ្សាយនៅកន្លែងផ្សេង។ តើមានលទ្ធផលអ្វី? ពួកគាត់បាន«បង្រៀនមនុស្សច្រើនគួរសម» ហើយពាក្យសម្ដីនិងគំរូរបស់ពួកគាត់បានពង្រឹងកម្លាំងបងប្អូនរួមជំនឿ។ (សូមអាន សកម្មភាព ១៤:២១, ២២) មនុស្សជាច្រើនបានទទួលប្រយោជន៍ ដោយសារបាណាបាសនិងប៉ូលមិនឈប់ផ្សព្វផ្សាយ ទោះជាពួកគាត់ត្រូវគេបៀតបៀនក្ដី។ ដរាបណាយើងមិនឈប់ព្យាមក្នុងកិច្ចការដែលព្រះយេហូវ៉ាសុំយើងឲ្យធ្វើ ដរាបនោះយើងនឹងទទួលពរ។
នៅសម័យយើង
១៥. តើអ្នករៀនអ្វីពីគំរូរបស់បងម៉ាក់មីល្លិន?
១៥ មុនឆ្នាំ១៩១៤ រាស្ត្ររបស់ព្រះយេហូវ៉ាបានរំពឹងថាអ្វីមួយចំនួននឹងកើតឡើង។ ជាឧទាហរណ៍ សូមគិតអំពីបងប្រុសម្នាក់ឈ្មោះអាឡិចសេនដឺ ម៉ាក់មីល្លិន។ ដូចបងប្អូនជាច្រើននៅសម័យនោះ បងម៉ាក់មីល្លិនបានគិតថាមិនយូរទៀតគាត់នឹងឡើងទៅស្ថានសួគ៌។ ក្នុងសុន្ទរកថាដែលគាត់បានថ្លែងនៅខែកញ្ញា ឆ្នាំ១៩១៤ គាត់បាននិយាយថា៖ «នេះទំនងជាសុន្ទរកថាសាធារណៈចុងក្រោយរបស់ខ្ញុំ»។ តាមពិត នោះមិនមែនទេ។ បងម៉ាក់មីល្លិនបានសរសេរក្រោយមកថា៖ «ប្រហែលជាយើងខ្លះឆាប់គិតពេកថានឹងឡើងទៅស្ថានសួគ៌ភ្លាមៗ»។ គាត់បន្ថែមថា៖ «អ្វីដែលយើងត្រូវធ្វើគឺបន្តជាប់រវល់ក្នុងកិច្ចបម្រើរបស់លោកម្ចាស់»។ បងម៉ាក់មីល្លិនបានបន្តធ្វើដូច្នេះមែន។ គាត់មានចិត្តខ្នះខ្នែងក្នុងកិច្ចបម្រើផ្សាយ។ គាត់មានឯកសិទ្ធិលើកទឹកចិត្តបងប្អូនប្រុសជាច្រើននាក់ដែលជាប់គុក ដោយសារពួកគេកាន់ជំហរអព្យាក្រឹត។ ម្យ៉ាងទៀត គាត់បានចូលរួមកិច្ចប្រជុំក្រុមជំនុំជាទៀងទាត់ ទោះជានៅពេលដែលគាត់ចាស់ក្ដី។ តើបងម៉ាក់មីល្លិនបានទទួលប្រយោជន៍យ៉ាងណាពីការប្រើពេលវេលារបស់គាត់ឲ្យកើតប្រយោជន៍ កាលដែលគាត់ទន្ទឹងរង់ចាំរង្វាន់របស់គាត់? មិនយូរមុនគាត់ស្លាប់នៅឆ្នាំ១៩៦៦ គាត់បានសរសេរថា៖ «ជំនឿរបស់ខ្ញុំមិនដែលចុះខ្សោយទេ»។ នេះគឺជាចិត្តគំនិតល្អប្រសើរដែលយើងទាំងអស់គ្នាគួរមាន ជាពិសេសបើយើងបានស៊ូទ្រាំនឹងទុក្ខលំបាកយូរជាងយើងរំពឹងទុក។—ហេ. ១៣:៧
១៦. តើបងហឺបឺត ជិននីងនិងប្រពន្ធរបស់គាត់ជួបការពិបាកដែលមិនបានរំពឹងទុកអ្វី? (យ៉ាកុប ៤:១៤)
១៦ រាស្ត្ររបស់ព្រះយេហូវ៉ាជាច្រើននាក់ជួបបញ្ហាសុខភាពដែលពួកគេមិនបានរំពឹងទុក។ ជាឧទាហរណ៍ ក្នុងជីវប្រវត្តិរបស់បងប្រុសហឺបឺត ជិននីង គាត់រៀបរាប់ថាគាត់និងប្រពន្ធរបស់គាត់សប្បាយធ្វើជាសាសនទូតនៅប្រទេសហ្គាណា។ ប៉ុន្តែ ក្រោយមកគាត់មានជំងឺផ្លូវចិត្តដ៏ធ្ងន់ធ្ងរ។ បងជិននីងបានដកស្រង់ពាក្យនៅយ៉ាកុប ៤:១៤ ហើយពន្យល់ថាស្ថានភាពថ្មីរបស់គាត់គឺជា«‹ថ្ងៃស្អែក› ដែលយើងមិនបានរំពឹងទុកថាយើងនឹងជួបទេ»។ (សូមអាន) គាត់សរសេរថា៖ «យើងត្រូវទទួលស្គាល់ការពិត ដូច្នេះយើងបានចាកចេញពីប្រទេសហ្គាណានិងពីមិត្តជិតស្និទ្ធជាច្រើននាក់របស់យើង ហើយយើងបានត្រឡប់ទៅប្រទេសកាណាដាវិញ[ដើម្បីព្យាបាលជំងឺ]»។ ព្រះយេហូវ៉ាបានជួយបងជិននីងនិងប្រពន្ធរបស់គាត់ឲ្យបន្តបម្រើលោកយ៉ាងស្មោះត្រង់ ទោះជាពួកគេជួបការពិបាកនោះក្ដី។
១៧. តើបងប្អូនរួមជំនឿបានទទួលប្រយោជន៍យ៉ាងណាពីគំរូរបស់បងជិននីង?
១៧ ការរៀបរាប់ដ៏ស្មោះត្រង់របស់បងជិននីងបានជួយអ្នកឯទៀតច្រើនណាស់។ បងស្រីម្នាក់បានសរសេរថា៖ «ខ្ញុំមិនដែលរំជួលចិត្តខ្លាំងដូចពេលខ្ញុំអានបទពិសោធន៍នេះទេ។ . . . ពេលខ្ញុំអានអំពីរបៀបដែលបងជិននីងត្រូវលះចោលភារកិច្ចមួយដើម្បីព្យាបាលជំងឺរបស់គាត់ នោះបានជួយខ្ញុំឲ្យមានទស្សនៈត្រឹមត្រូវចំពោះស្ថានភាពរបស់ខ្ញុំ»។ ស្រដៀងគ្នាដែរ បងប្រុសម្នាក់បានសរសេរថា៖ «ខ្ញុំត្រូវឈប់បម្រើជាអ្នកចាស់ទុំក្រោយពីធ្វើអស់១០ឆ្នាំ ដោយសារខ្ញុំមានបញ្ហាផ្លូវចិត្ត។ ខ្ញុំមានអារម្មណ៍ថាខ្ញុំជាមនុស្សបរាជ័យណាស់រហូតដល់ខ្ញុំធ្លាក់ទឹកចិត្ត ហើយច្រើនតែពិបាកអានអត្ថបទអំពីជីវប្រវត្តិ។ . . . ប៉ុន្តែការស៊ូទ្រាំរបស់បងជិននីងបានលើកទឹកចិត្តខ្ញុំ»។ នេះរំលឹកយើងថាការស៊ូទ្រាំនឹងបញ្ហាដែលយើងមិនបានរំពឹងទុកអាចលើកទឹកចិត្តអ្នកឯទៀត។ មិនថាមានអ្វីកើតឡើងដែលធ្វើឲ្យជីវិតរបស់យើងខុសពីអ្វីដែលយើងសង្ឃឹមក្ដី យើងនៅតែអាចធ្វើជាគំរូអំពីជំនឿនិងការស៊ូទ្រាំ។—១ពេ. ៥:៩
ពេលយើងពឹងផ្អែកព្រះយេហូវ៉ា បញ្ហាដែលមិនបានរំពឹងទុកអាចជួយយើងឲ្យចូលកាន់តែជិតលោក (សូមមើលវគ្គ១៨)
១៨. ដូចបង្ហាញក្នុងរូបភាព តើអ្នករៀនអ្វីពីគំរូរបស់ស្ត្រីមេម៉ាយម្នាក់នៅប្រទេសនីហ្សេរីយ៉ា?
១៨ រាស្ត្ររបស់ព្រះយេហូវ៉ាជាច្រើននាក់ទទួលឥទ្ធិពលពីការរីករាលដាលនៃជំងឺកូវីដ-១៩។ ជាឧទាហរណ៍ បងស្រីមេម៉ាយម្នាក់នៅប្រទេសនីហ្សេរីយ៉ានៅសល់អាហារនិងលុយតែបន្តិចបន្តួច។ នៅព្រឹកមួយ កូនស្រីរបស់គាត់បានសួរគាត់ថាតើពួកគេនឹងបានអ្វីបរិភោគទៀតក្រោយពីដាំបាយមួយកំប៉ុងចុងក្រោយនោះ។ បងស្រីយើងបានប្រាប់កូនរបស់គាត់ថា ក្រោយអាហារមួយពេលនេះ ពួកគេមិនមានលុយឬអាហារទៀតទេ ប៉ុន្តែពួកគេគួរយកតម្រាប់ស្ត្រីមេម៉ាយពីក្រុងសេរ៉ាផាត គឺរៀបចំអាហារចុងក្រោយរបស់ពួកគេ ហើយទុកចិត្តទាំងស្រុងទៅលើព្រះយេហូវ៉ា។ (១បស. ១៧:៨-១៦) ពួកគេមិនទាំងចាប់ផ្ដើមគិតអំពីអ្វីដែលពួកគេនឹងបរិភោគសម្រាប់បាយថ្ងៃត្រង់នៅថ្ងៃនោះផង ស្រាប់តែពួកគេបានទទួលអាហារមួយថង់ពីបងប្អូនរួមជំនឿ។ ក្នុងថង់នោះមានអាហារគ្រប់គ្រាន់សម្រាប់ពីរសប្ដាហ៍ជាង។ បងស្រីនោះនិយាយថាគាត់មិននឹកស្មានថាព្រះយេហូវ៉ាយកចិត្តទុកដាក់ស្ដាប់នូវអ្វីដែលគាត់បានប្រាប់កូនស្រីរបស់គាត់នោះទេ។ ពិតមែន ពេលយើងពឹងផ្អែកព្រះយេហូវ៉ា បញ្ហាដែលមិនបានរំពឹងទុកដែលយើងជួបក្នុងជីវិតអាចជួយយើងឲ្យចូលកាន់តែជិតលោក។—១ពេ. ៥:៦, ៧
១៩. តើបងអាឡិកសី យឺសូវបានស៊ូទ្រាំនឹងការបៀតបៀនអ្វី?
១៩ ក្នុងប៉ុន្មានឆ្នាំថ្មីៗនេះ បងប្អូនរបស់យើងជាច្រើននាក់បានស៊ូទ្រាំនឹងការបៀតបៀនដែលពួកគេប្រហែលជាមិនបាននឹកស្មាន។ សូមគិតអំពីបងប្រុសអាឡិកសី យឺសូវដែលរស់នៅប្រទេសរុស្ស៊ី។ ពេលដែលបងយឺសូវបានទទួលការជ្រមុជទឹកនៅឆ្នាំ១៩៩៤ រាស្ត្ររបស់ព្រះយេហូវ៉ានៅតំបន់នោះមានសេរីភាពមួយកម្រិត។ ប៉ុន្តែប៉ុន្មានឆ្នាំក្រោយមក ស្ថានភាពនៅប្រទេសរុស្ស៊ីបានផ្លាស់ប្ដូរ។ នៅឆ្នាំ២០២០ ផ្ទះរបស់បងយឺសូវបានត្រូវគេសម្រុកចូលនិងឆែកឆេរ ហើយទ្រព្យសម្បត្តិជាច្រើនរបស់គាត់បានត្រូវគេរឹបអូស។ ប៉ុន្មានខែក្រោយមក រដ្ឋាភិបាលបានដាក់ពាក្យបណ្ដឹងចោទប្រកាន់គាត់។ អាក្រក់ជាងនេះទៅទៀត ការចោទប្រកាន់នោះមានមូលដ្ឋានលើវីដេអូដែលបានត្រូវថតដោយបុគ្គលម្នាក់ដែលធ្វើពុតជាចាប់អារម្មណ៍រៀនគម្ពីរអស់ជាងមួយឆ្នាំ។ នោះគឺអាក្រក់មែន!
២០. តើបងយឺសូវបានពង្រឹងចំណងមិត្តភាពរបស់គាត់ជាមួយព្រះយេហូវ៉ាយ៉ាងដូចម្ដេច?
២០ តើការបៀតបៀនដែលបងយឺសូវបានជួបនាំឲ្យមានលទ្ធផលល្អឬទេ? គឺមាន។ ចំណងមិត្តភាពរបស់គាត់ជាមួយព្រះយេហូវ៉ាកាន់តែរឹងមាំឡើង។ គាត់និយាយថា៖ «ខ្ញុំនិងប្រពន្ធខ្ញុំអធិដ្ឋានជាមួយគ្នាញឹកញាប់ជាង។ ខ្ញុំទទួលស្គាល់ថាខ្ញុំនឹងមិនអាចស៊ូទ្រាំនឹងស្ថានភាពនេះបានទេ បើគ្មានជំនួយពីព្រះយេហូវ៉ា»។ គាត់បន្ថែមថា៖ «ការសិក្សាផ្ទាល់ខ្លួនជួយខ្ញុំឲ្យយកឈ្នះការធ្លាក់ទឹកចិត្ត។ ខ្ញុំរំពឹងគិតអំពីគំរូរបស់អ្នកបម្រើដ៏ស្មោះត្រង់នៅអតីតកាល។ មានកំណត់ហេតុជាច្រើនក្នុងគម្ពីរដែលបញ្ជាក់ថាការរក្សាចិត្តស្ងប់និងការបង្ហាញទំនុកចិត្តទៅលើព្រះយេហូវ៉ាគឺសំខាន់ណាស់»។
២១. តើយើងបានរៀនអ្វីក្នុងអត្ថបទនេះ?
២១ តើយើងបានរៀនអ្វីក្នុងអត្ថបទនេះ? ជីវិតក្នុងរបៀបរបបពិភពនេះគឺមិនទៀងទេ។ ទោះជាយ៉ាងនេះក៏ដោយ ព្រះយេហូវ៉ាតែងតែជួយអ្នកបម្រើរបស់លោកពេលពួកគេពឹងផ្អែកលើលោក។ បទគម្ពីរដែលជាមូលដ្ឋាននៃអត្ថបទនេះចែងថា៖ «មនុស្សសុចរិតជួបទុក្ខលំបាកជាច្រើន តែព្រះយេហូវ៉ាជួយសង្គ្រោះគាត់ឲ្យរួចផុតពីទុក្ខទាំងអស់»។ (ចសព. ៣៤:១៩) សូមឲ្យយើងបន្តផ្ដោតអារម្មណ៍ទៅលើឫទ្ធានុភាពរបស់ព្រះយេហូវ៉ាដើម្បីជួយយើង មិនមែនទៅលើទុក្ខលំបាករបស់យើងឡើយ។ យ៉ាងនេះ ដូចសាវ័កប៉ូល យើងអាចនិយាយថា៖ «ខ្ញុំមានកម្លាំងសម្រាប់អ្វីៗទាំងអស់ ដោយសារលោកដែលផ្ដល់កម្លាំងឲ្យខ្ញុំ»។—ភី. ៤:១៣
ចម្រៀងលេខ៣៨ លោកនឹងធ្វើឲ្យអ្នកខ្លាំងក្លា
a ទោះជាជួនកាលយើងជួបបញ្ហាដែលយើងមិនបានរំពឹងទុកនៅសព្វថ្ងៃនេះក្ដី យើងអាចប្រាកដថាព្រះយេហូវ៉ានឹងគាំទ្រពួកអ្នកគោរពប្រណិប័តន៍ដ៏ស្មោះត្រង់របស់លោក។ តើព្រះយេហូវ៉ាបានជួយអ្នកបម្រើលោកនៅអតីតកាលយ៉ាងដូចម្ដេច? តើលោកកំពុងជួយយើងនៅសព្វថ្ងៃនេះតាមរបៀបណា? ការពិចារណាគំរូពីសម័យគម្ពីរនិងសម័យយើងនឹងពង្រឹងការជឿជាក់របស់យើងថា បើយើងពឹងផ្អែកព្រះយេហូវ៉ា នោះលោកនឹងជួយយើងដែរ។
