តើអ្វីអាចជួយអ្នកឲ្យសិក្សាផ្ទាល់ខ្លួនជាទៀងទាត់?
តើអ្នកពិបាកសិក្សាផ្ទាល់ខ្លួនរាល់សប្ដាហ៍ឬទេ? ជួនកាល តើអ្នកមានអារម្មណ៍ធុញទ្រាន់ក្នុងការសិក្សាឬទេ? ពេលខ្លះ យើងទាំងអស់គ្នាគឺដូច្នេះ។ ប៉ុន្តែ សូមគិតអំពីអ្វីផ្សេងទៀតដែលអ្នកធ្វើជាទៀងទាត់ ដូចជាងូតទឹកជាដើម។ តាមធម្មតា អ្នកត្រូវចំណាយពេលនិងកម្លាំងដើម្បីងូតទឹក តែក្រោយពីងូតរួច អ្នកមានអារម្មណ៍ស្រស់ស្រាយ។ ស្រដៀងគ្នាដែរ ការសិក្សាគម្ពីរប្រៀបដូចជាការ«សម្អាតជាមួយនឹងទឹកដែលជាបណ្ដាំរបស់ព្រះ» នាំឲ្យមានអារម្មណ៍ស្រស់ស្រាយនិងទទួលកម្លាំងចិត្ត។ (អេភ. ៥:២៦) ដូច្នេះ សូមពិចារណាយោបល់ខ្លះ៖
រៀបកាលវិភាគ។ ការសិក្សាផ្ទាល់ខ្លួននៅក្នុងចំណោម«អ្វីដែលសំខាន់ជាង» ហើយនេះគឺជាអ្វីដែលគ្រិស្តសាសនិកត្រូវធ្វើ។ (ភី. ១:១០) ដើម្បីជួយអ្នកឲ្យធ្វើតាមកាលវិភាគ អ្នកអាចដាក់វានៅកន្លែងណាដែលងាយមើលឃើញ ដូចជាលើក្ដារខៀន ឬភ្ជាប់លើទ្វារទូរទឹកកក។ មួយទៀត អ្នកអាចដាក់ម៉ោងរោទ៍រំលឹកថាតិចទៀតដល់ម៉ោងសិក្សា។
ចេះប្រែប្រួលតាមសេចក្ដីត្រូវការរបស់ខ្លួន។ អ្នកខ្លះអាចផ្ចង់អារម្មណ៍សិក្សាបានយូរ តែអ្នកខ្លះមិនបានយូរទេ ចុះអ្នកវិញ? អ្នកច្បាស់ជាដឹងថាខ្លួនគឺមួយណា។ ដូច្នេះ អ្នកអាចបត់បែនតាមនោះ។ បើអ្នកមិនមានអារម្មណ៍សិក្សាតាមកាលវិភាគរបស់ខ្លួនទេ អ្នកអាចព្យាយាមសិក្សាត្រឹមតែ១០នាទីក៏បាន។ ពិតមែនថាអ្នកសិក្សាក្នុងរយៈពេលខ្លី តែយ៉ាងហោចណាស់ល្អជាងមិនបានសិក្សាសោះ។ ម្យ៉ាងទៀត អ្នកប្រហែលជាឃើញថាក្រោយសិក្សាអស់១០នាទី អ្នកចាប់ផ្ដើមជក់ចិត្តរហូតដល់ចង់សិក្សាតទៀត។—ភី. ២:១៣
ជ្រើសរើសប្រធានបទទុកជាមុន។ បើដល់ម៉ោងសិក្សា ហើយទើបរកនឹកថារៀនអ្វី អ្នកប្រហែលជាមិនបាន«ប្រើគ្រប់ឱកាសឲ្យកើតប្រយោជន៍ច្រើនបំផុត»ទេ។ (អេភ. ៥:១៦) ដូច្នេះ អ្នកគួរធ្វើបញ្ជីមួយអំពីប្រធានបទដែលអ្នកចង់សិក្សា។ មួយវិញទៀត ពេលអ្នកមានចម្ងល់ណាមួយ អ្នកក៏អាចសរសេរទុកក្នុងបញ្ជីដែរ។ ក្រោយសិក្សាចប់ អ្នកប្រហែលជាអាចបន្ថែមព័ត៌មានផ្សេងទៀតដែលអ្នកចង់សិក្សាចូលទៅក្នុងបញ្ជីនោះ។
ចេះបត់បែន។ អ្វីសំខាន់បំផុតគឺសិក្សាផ្ទាល់ខ្លួនឲ្យបានជាប់លាប់រាល់សប្ដាហ៍។ បើថ្ងៃនោះអ្នករវល់ឬមានបញ្ហាបន្ទាន់ណាមួយ សូមដូរថ្ងៃនិងម៉ោងសិក្សា រយៈពេលសិក្សា ឬប្រធានបទសិក្សា។
បើអ្នកសិក្សាផ្ទាល់ខ្លួនជាទៀងទាត់ អ្នកនឹងទទួលប្រយោជន៍ជាច្រើន ដូចជាចូលកាន់តែជិតព្រះយេហូវ៉ា មានការប្រព្រឹត្តដោយឈ្លាសវៃ និងទទួលកម្លាំងចិត្ត។—យ៉ូស. ១:៨
