អត្ថបទសិក្សា ៤៤
ចម្រៀងលេខ៣៣ ចូរផ្ទេរបន្ទុកទៅលើព្រះយេហូវ៉ា
ពេលរងអំពើអយុត្តិធម៌ តើត្រូវធ្វើយ៉ាងណា?
«កុំឲ្យសេចក្ដីអាក្រក់ឈ្នះអ្នកឡើយ តែចូរបន្តឈ្នះសេចក្ដីអាក្រក់ដោយសេចក្ដីល្អវិញ»។—រ៉ូម ១២:២១
ចំណុចផ្ដោត
ពេលរងអំពើអយុត្តិធម៌ តើយើងអាចធ្វើអ្វីខ្លះ ហើយធ្វើយ៉ាងណាដើម្បីកុំឲ្យរឿងកាន់តែធំ?
១-២. តើយើងទាំងអស់គ្នាប្រហែលជាធ្លាប់រងអំពើអយុត្តិធម៌អ្វីខ្លះ?
ស្ដីអំពីរឿងអយុត្តិធម៌ សូមគិតអំពីឧទាហរណ៍មួយដែលលោកយេស៊ូបានលើកឡើងអំពីស្ត្រីមេម៉ាយម្នាក់ ដែលបានអង្វរសុំចៅក្រមឲ្យរកយុត្តិធម៌ឲ្យគាត់។ ពួកអ្នកកាន់តាមលោកយេស៊ូងាយយល់ឧទាហរណ៍នោះ ព្រោះមនុស្សភាគច្រើននៅសម័យនោះរងការធ្វើបាបជាខ្លាំង។ (លូក. ១៨:១-៥) សព្វថ្ងៃនេះ យើងក៏ងាយយល់អារម្មណ៍របស់ស្ត្រីនោះដែរ ដោយសារយើងទាំងអស់គ្នាសុទ្ធតែធ្លាប់ជួបរឿងអយុត្តិធម៌ មិនថាតិចឬច្រើន។
២ ជាការធម្មតាទៅហើយដែលសព្វថ្ងៃមានការរើសអើង ភាពមិនស្មើគ្នា និងការគាបសង្កត់ ដូច្នេះមិនចម្លែកទេដែលពេលខ្លះយើងរងអំពើទាំងនោះ។ (អទ. ៥:៨) ចុះយ៉ាងណាបើបងប្អូនរួមជំនឿប្រព្រឹត្តមិនល្អឬយល់ខុសចំពោះយើង? ពេលនោះ សូមចាំថាពួកគាត់ក៏ជាមនុស្សមិនល្អឥតខ្ចោះដូចយើងដែរ។ ម្យ៉ាងទៀត ពួកគាត់មិនមែនជាអ្នកប្រឆាំងសេចក្ដីពិតទេ។ ក្នុងអត្ថបទនេះ យើងអាចរៀនច្រើនអំពីប្រតិកម្មរបស់លោកយេស៊ូពេលរងអំពើអយុត្តិធម៌ពីមនុស្សដែលប្រឆាំងសេចក្ដីពិត។ សូមគិតបើយើងអាចទ្រាំនឹងអ្នកប្រឆាំងសេចក្ដីពិតបាន ចុះទម្រាំតែបងប្អូនរួមជំនឿ យើងកាន់តែត្រូវចេះអត់ធ្មត់ចំពោះពួកគាត់ជាងនោះទៅទៀត មែនទេ? បើគិតពីព្រះយេហូវ៉ាវិញ តើលោកមានអារម្មណ៍យ៉ាងណាពេលយើងរងភាពអយុត្តិធម៌ មិនថាពីបងប្អូនរួមជំនឿឬពីអ្នកខាងក្រៅក្រុមជំនុំ? តើលោកខ្វល់ពីយើងឬទេ?
៣. ពេលយើងរងភាពអយុត្តិធម៌ តើព្រះយេហូវ៉ាខ្វល់ចិត្តឬទេ ហើយហេតុអ្វី?
៣ ព្រះយេហូវ៉ាពិតជាខ្វល់ចិត្តណាស់ពេលយើងរងអំពើអយុត្តិធម៌ ព្រោះគម្ពីរចែងថា៖ «ព្រះយេហូវ៉ាស្រឡាញ់យុត្តិធម៌»។ (ចសព. ៣៧:២៨) លោកយេស៊ូពង្រឹងទំនុកចិត្តយើងថា ព្រះយេហូវ៉ានឹង«រកយុត្តិធម៌ឲ្យ[យើង]យ៉ាងឆាប់»នៅពេលត្រឹមត្រូវ។ (លូក. ១៨:៧, ៨) មិនយូរទៀត ព្រះនឹងបំបាត់ចោលអំពើអយុត្តិធម៌គ្រប់យ៉ាង ព្រមទាំងការឈឺចាប់ទាំងអស់ដែលមកពីអំពើនោះ។—ចសព. ៧២:១, ២
៤. នៅសព្វថ្ងៃនេះ តើព្រះយេហូវ៉ាផ្ដល់វិធីអ្វីខ្លះដើម្បីជួយយើងឲ្យស៊ូទ្រាំនឹងភាពអយុត្តិធម៌?
៤ ដូច្នេះ យើងត្រូវរង់ចាំព្រះយេហូវ៉ាចាត់វិធានការ។ ក្នុងអំឡុងពេលនោះ ព្រះយេហូវ៉ាមិនទុកយើងចោលទេ លោកបង្រៀនយើងអំពីអ្វីដែលយើងត្រូវធ្វើពេលរងការធ្វើបាប និងអំពីរបៀបដែលយើងអាចជៀសវាងកុំឲ្យរឿងនោះកាន់តែធំ។ លោកបានផ្ដល់ជំនួយតាមវិធីផ្សេងៗដើម្បីជួយយើងឲ្យស៊ូទ្រាំ។ (២ពេ. ៣:១៣) វិធីមួយ ព្រះយេហូវ៉ាបានឲ្យគេកត់ទុកក្នុងគម្ពីរអំពីប្រតិកម្មរបស់លោកយេស៊ូពេលត្រូវគេធ្វើបាប។ វិធីមួយទៀត ព្រះយេហូវ៉ាឲ្យគោលការណ៍គម្ពីរដែលយើងអាចធ្វើតាមពេលរងភាពអយុត្តិធម៌។
ចូរប្រយ័ត្នប្រតិកម្មរបស់អ្នកចំពោះភាពអយុត្តិធម៌
៥. ពេលយើងឈឺចិត្តដោយសារភាពអយុត្តិធម៌ ហេតុអ្វីយើងត្រូវប្រយ័ត្នមិនឲ្យអារម្មណ៍ដឹកមុខ?
៥ យើងប្រហែលជាកើតទុក្ខនិងឈឺចិត្តខ្លាំង ដោយសារភាពអយុត្តិធម៌។ (អទ. ៧:៧) សូម្បីតែអ្នកបម្រើស្មោះត្រង់របស់ព្រះយេហូវ៉ា ដូចជាយ៉ូបនិងហាបាគុក ក៏មានអារម្មណ៍ដូច្នេះដែរ។ (យ៉ូប ៦:២, ៣; ហាប. ១:១-៣) ប៉ុន្តែពេលនោះ យើងត្រូវប្រុងប្រយ័ត្នមិនឲ្យអារម្មណ៍ដឹកមុខឡើយ។ បើមិនដូច្នេះទេ យើងប្រហែលជាអាចប្រព្រឹត្តដោយឥតពិចារណា។
៦. តើយើងអាចទាញមេរៀនអ្វីពីការប្រព្រឹត្តរបស់អាប់សាឡំ? (សូមមើលរូបភាពផងដែរ)
៦ ជាពិសេស ពេលរឿងអយុត្តិធម៌កើតឡើងចំពោះយើងនិងមនុស្សជាទីស្រឡាញ់របស់យើង យើងមុខជាចង់សងសឹកឬដាក់ទោសជំនួសច្បាប់។ ប៉ុន្តែ បើយើងធ្វើដូច្នេះ នោះអាចនាំឲ្យរឿងកាន់តែរីកធំ។ សូមគិតអំពីអាប់សាឡំដែលជាកូនប្រុសរបស់ស្ដេចដាវីឌ។ ពេលគាត់ដឹងថាថេម៉ាដែលជាប្អូនស្រីបង្កើតរបស់គាត់ត្រូវអាំណូនដែលជាបងប្អូនម្ដាយទីទៃរំលោភ គាត់ក្ដៅចិត្តក្រៃលែង។ តាមច្បាប់ម៉ូសេ អាំណូនសមនឹងស្លាប់ពីបទរំលោភប្អូនរបស់ខ្លួនមែន! (ចល. ២០:១៧) ប៉ុន្តែ ជាជាងទុកឲ្យច្បាប់ចាត់វិធានការ អាប់សាឡំបានទៅសម្លាប់អាំណូនដោយខ្លួនឯង។ យើងអាចយល់អារម្មណ៍របស់អាប់សាឡំ តែយ៉ាងណាក៏ដោយគាត់គ្មានសិទ្ធិដោះស្រាយបញ្ហានោះដោយខ្លួនឯងឡើយ។—២សាំ. ១៣:២០-២៣, ២៨, ២៩
អាប់សាឡំបានឲ្យកំហឹងដឹកមុខគាត់ ពេលដឹងថាថេម៉ាប្អូនស្រីរបស់ខ្លួនត្រូវគេរំលោភ (សូមមើលវគ្គ៦)
៧. តើដំបូងអ្នកតែងចម្រៀងសរសើរព្រះមានអារម្មណ៍យ៉ាងណាពេលឃើញអំពើអយុត្តិធម៌?
៧ ជារឿងធម្មតាទេ ពេលយើងឃើញអ្នកធ្វើខុសរួចពីទោស យើងប្រហែលជាឆ្ងល់ថាតើយើងខំប្រឹងធ្វើរឿងត្រឹមត្រូវមានប្រយោជន៍អ្វី។ សូមគិតអំពីអ្នកតែងចម្រៀងសរសើរព្រះម្នាក់។ ពេលគាត់ឃើញមនុស្សល្អត្រូវគេធ្វើបាប តែមនុស្សអាក្រក់បែរជារស់នៅយ៉ាងសុខសប្បាយ គាត់ក៏និយាយថា៖ «មនុស្សទុច្ចរិតគឺបែបនេះហើយ ពួកគេតែងតែមានជីវិតស្រណុកសុខស្រួល»។ (ចសព. ៧៣:១២) ភាពអយុត្តិធម៌នេះធ្វើឲ្យអ្នកតែងចម្រៀងសរសើរព្រះនោះស្រងាកចិត្តជាខ្លាំង ហើយស្ទើរតែលែងជឿជាក់ថាការបម្រើព្រះយេហូវ៉ាមានប្រយោជន៍។ គាត់និយាយទៀតថា៖ «ពេលខ្ញុំព្យាយាមយល់អំពីរឿងទាំងនេះ បែរជាធ្វើឲ្យខ្ញុំពិបាកចិត្តទៅវិញ»។ (ចសព. ៧៣:១៤, ១៦) គាត់បានសារភាពថា៖ «ជើងរបស់ខ្ញុំហៀបនឹងចេញពីផ្លូវត្រឹមត្រូវ ជំហានរបស់ខ្ញុំជិតនឹងរអិលទៅ»។—ចសព. ៧៣:២
៨. តើភាពអយុត្តិធម៌ដែលបងអាល់បឺតូជួបប្រទះ ជះឥទ្ធិពលយ៉ាងណាមកលើជីវិតរបស់គាត់?
៨ សូមគិតអំពីបងប្រុសម្នាក់ឈ្មោះអាល់បឺតូ។ a គាត់បានត្រូវគេចោទប្រកាន់ថាលួចលុយរបស់ក្រុមជំនុំ។ នេះធ្វើឲ្យគាត់បាត់បង់ឯកសិទ្ធិ ហើយបងប្អូនជាច្រើនក្នុងក្រុមជំនុំដែលដឹងរឿងនេះ លែងគោរពគាត់ទៀត។ គាត់បានរំលឹករឿងនោះថា៖ «ខ្ញុំក្ដៅក្រហាយ ហើយខកចិត្តណាស់»។ ពេលនោះ គាត់បានបណ្ដោយឲ្យអារម្មណ៍ឈឺចាប់ប៉ះពាល់យ៉ាងខ្លាំងលើចំណងមិត្តភាពរបស់គាត់ជាមួយព្រះយេហូវ៉ា រហូតដល់គាត់អសកម្មអស់ប្រាំឆ្នាំ។ បទពិសោធន៍នេះបង្ហាញអំពីអ្វីដែលអាចកើតឡើង បើយើងធ្វើតាមចិត្តក្ដៅរបស់ខ្លួន។
ចូរយកតម្រាប់លោកយេស៊ូពេលរងភាពអយុត្តិធម៌
៩. តើលោកយេស៊ូបានស៊ូទ្រាំនឹងភាពអយុត្តិធម៌អ្វីខ្លះ? (សូមមើលរូបភាពផងដែរ)
៩ លោកយេស៊ូទុកគំរូល្អបំផុតស្ដីអំពីរបៀបស៊ូទ្រាំនឹងភាពអយុត្តិធម៌។ សូមគិតអំពីភាពអយុត្តិធម៌ដែលលោកយេស៊ូបានជួបពីសំណាក់ក្រុមគ្រួសារនិងមនុស្សឯទៀត។ ជាឧទាហរណ៍ សាច់ញាតិរបស់លោកដែលមិនមែនជាអ្នកជឿចោទប្រកាន់ថាលោកវង្វេងស្មារតី។ រីឯពួកមេដឹកនាំសាសនាចោទប្រកាន់ថាលោករួមដៃជាមួយពួកវិញ្ញាណកំណាច។ ចំណែកទាហានរ៉ូមខ្លះបានប្រមាថមើលងាយលោក វាយធ្វើបាបលោក ហើយរហូតដល់សម្លាប់លោកទៀតផង។ (ម៉ាក. ៣:២១, ២២; ១៤:៥៥; ១៥:១៦-២០, ៣៥-៣៧) ប៉ុន្តែជាជាងតបត លោកយេស៊ូបានស៊ូទ្រាំនឹងអំពើអយុត្តិធម៌ទាំងនោះ។ តើយើងរៀនអ្វីពីគំរូរបស់លោក?
លោកយេស៊ូបានទុកគំរូល្អឥតខ្ចោះស្ដីអំពីរបៀបស៊ូទ្រាំនឹងអំពើអយុត្តិធម៌ (សូមមើលវគ្គ៩-១០)
១០. តើលោកយេស៊ូបានស៊ូទ្រាំនឹងភាពអយុត្តិធម៌ដោយរបៀបណា? (ពេត្រុសទី១ ២:២១-២៣)
១០ សូមអាន ពេត្រុសទី១ ២:២១-២៣។ b ពេលយើងជួបប្រទះនឹងភាពអយុត្តិធម៌ យើងអាចធ្វើតាមគំរូល្អឥតខ្ចោះរបស់លោកយេស៊ូ។ លោកដឹងថាពេលណាគួរនៅស្ងៀម ហើយពេលណាគួរនិយាយ។ (ម៉ាថ. ២៦:៦២-៦៤) លោកមិនតែងតែតបតរាល់ពាក្យដែលគេចោទប្រកាន់លោកឡើយ។ (ម៉ាថ. ១១:១៩) សូម្បីតែពេលលោកនិយាយ ក៏លោកមិនប្រមាថឬគំរាមកំហែងពួកអ្នកដែលបៀតបៀនលោកដែរ។ លោកយេស៊ូចេះទប់ចិត្ត ព្រោះលោក«តែងតែផ្ញើខ្លួនទៅលើព្រះដែលវិនិច្ឆ័យដោយសុចរិតយុត្តិធម៌»។ លោកយេស៊ូដឹងច្បាស់ថាព្រះយេហូវ៉ាឃើញលោកកំពុងរងភាពអយុត្តិធម៌ខ្លាំងប៉ុនណា។ ដូច្នេះ លោកទុកចិត្តថាព្រះយេហូវ៉ានឹងដោះស្រាយភាពអយុត្តិធម៌ទាំងអស់នៅពេលត្រឹមត្រូវ។
១១. តើក្នុងរឿងណាខ្លះដែលយើងគួរនៅស្ងៀម ហើយក្នុងរឿងណាខ្លះដែលយើងគួរនិយាយ? (សូមមើលរូបភាពផងដែរ)
១១ យើងធ្វើតាមគំរូរបស់លោកយេស៊ូ ដោយប្រយ័ត្នពាក្យសម្ដីរបស់យើង។ ភាពអយុត្តិធម៌ខ្លះគឺតូចតាច ដូច្នេះយើងអាចមើលរំលងឬនៅស្ងៀមដើម្បីកុំឲ្យរឿងកាន់តែធំ។ (អទ. ៣:៧; យ៉ា. ១:១៩, ២០) ប៉ុន្តែ ពេលខ្លះយើងប្រហែលត្រូវនិយាយការពារនរណាម្នាក់ដែលរងភាពអយុត្តិធម៌ ឬនិយាយការពារសេចក្ដីពិត។ (សកម្ម. ៦:១, ២) ដូច្នេះ ពេលនោះយើងត្រូវព្យាយាមនិយាយដោយអារម្មណ៍ស្ងប់ និងដោយការគោរព។—១ពេ. ៣:១៥ c
ពេលយើងជួបអំពើអយុត្តិធម៌ យើងធ្វើតាមគំរូលោកយេស៊ូដោយគិតយ៉ាងដិតដល់អំពីពេលណានិងរបៀបណាដែលយើងគួរនិយាយ (សូមមើលវគ្គ១១-១២)
១២. តើយើងអាចបង្ហាញយ៉ាងដូចម្ដេចថាយើងផ្ញើខ្លួនលើ«ព្រះដែលវិនិច្ឆ័យដោយសុចរិតយុត្តិធម៌»?
១២ របៀបមួយទៀតដែលយើងយកតម្រាប់លោកយេស៊ូ គឺដោយផ្ញើខ្លួនទៅលើ«ព្រះដែលវិនិច្ឆ័យដោយសុចរិតយុត្តិធម៌»។ ពេលអ្នកឯទៀតយល់ខុសឬប្រព្រឹត្តដោយលម្អៀងមកលើយើង យើងទុកចិត្តថាព្រះយេហូវ៉ាជ្រាបការពិតអំពីរឿងនោះ ហើយលោកនឹងដោះស្រាយរឿងអយុត្តិធម៌ទាំងអស់នៅពេលត្រឹមត្រូវ។ ការដឹងដូច្នេះជួយយើងឲ្យស៊ូទ្រាំពេលរងភាពអយុត្តិធម៌។ ហេតុនេះបើយើងទុកចិត្តព្រះយេហូវ៉ា ហើយរង់ចាំលោក នោះយើងនឹងមិនខឹងងំឬស្អប់អ្នកឯទៀតទេ។ ការចងកំហឹងអាចបណ្ដាលឲ្យយើងធ្វើខុស បាត់បង់អំណរ ព្រមទាំងបំផ្លាញចំណងមិត្តភាពរបស់យើងជាមួយនឹងព្រះយេហូវ៉ាទៀតផង។—ចសព. ៣៧:៨
១៣. បើអ្នកពិបាកស៊ូទ្រាំនឹងភាពអយុត្តិធម៌ តើអ្នកអាចជឿជាក់អំពីអ្វី?
១៣ ពិតណាស់ យើងមិនអាចធ្វើតាមគំរូរបស់លោកយេស៊ូបានយ៉ាងល្អឥតខ្ចោះទេ។ ជួនកាល យើងប្រហែលជានិយាយឬប្រព្រឹត្តអ្វីដែលនាំឲ្យយើងស្ដាយក្រោយ។ (យ៉ា. ៣:២) បន្ថែមទៅទៀត ភាពអយុត្តិធម៌ខ្លះប្រហែលជាបន្សល់ឲ្យយើងនូវស្លាកស្នាមរបួសផ្លូវកាយនិងផ្លូវចិត្ត។ បើរឿងនោះបានកើតឡើងចំពោះអ្នក សូមជឿជាក់ថាព្រះយេហូវ៉ាជ្រាបអំពីអ្វីដែលអ្នកបានឆ្លងកាត់ ហើយលោកយល់អារម្មណ៍របស់អ្នក។ លោកយេស៊ូក៏យល់អារម្មណ៍របស់អ្នកដែរ ព្រោះលោកធ្លាប់រងទុក្ខយ៉ាងអយុត្តិធម៌។ (ហេ. ៤:១៥, ១៦) ក្រៅពីគំរូល្អឥតខ្ចោះរបស់លោកយេស៊ូ ព្រះយេហូវ៉ាក៏ផ្ដល់ឱវាទពីបណ្ដាំរបស់លោកដែលជួយយើងឲ្យស៊ូទ្រាំពេលត្រូវគេធ្វើបាប។ សូមពិចារណាខគម្ពីរពីរក្នុងសៀវភៅរ៉ូម។
«ចូរទុកឲ្យព្រះបង្ហាញសេចក្ដីក្រោធរបស់លោក»
១៤. តើការ«ទុកឲ្យព្រះបង្ហាញសេចក្ដីក្រោធរបស់លោក»មានន័យយ៉ាងណា? (រ៉ូម ១២:១៩)
១៤ សូមអាន រ៉ូម ១២:១៩។ សាវ័កប៉ូលបានលើកទឹកចិត្តគ្រិស្តសាសនិកថា៖ «ចូរទុកឲ្យព្រះបង្ហាញសេចក្ដីក្រោធរបស់លោក»។ តើនេះមានន័យយ៉ាងណា? នេះមានន័យថាយើងទុកឲ្យព្រះយេហូវ៉ាចាត់វិធានការចំពោះភាពអយុត្តិធម៌តាមពេលវេលានិងវិធីរបស់លោក។ បងប្រុសម្នាក់ឈ្មោះចន បានរងភាពអយុត្តិធម៌យ៉ាងខ្លាំង គាត់និយាយថា៖ «ពេលនោះ ខ្ញុំចង់សងសឹកតាមកំហឹងរបស់ខ្ញុំ។ ប៉ុន្តែរ៉ូម ១២:១៩ បានជួយខ្ញុំឲ្យរង់ចាំព្រះយេហូវ៉ាដោយចិត្តអត់ធ្មត់»។
១៥. តើការទុកឲ្យព្រះយេហូវ៉ាចាត់វិធានការមានប្រយោជន៍អ្វី?
១៥ ពេលយើងរង់ចាំឲ្យព្រះយេហូវ៉ាចាត់វិធានការ យើងមិនសូវខកចិត្តឬតានតឹងចិត្តខ្លាំងពេកទេ។ ព្រះយេហូវ៉ាចង់ជួយយើង លោកហាក់បីដូចជាមានប្រសាសន៍មកកាន់យើងថា៖ ‹ទុករឿងអយុត្តិធម៌នេះឲ្យខ្ញុំ ចាំខ្ញុំដោះស្រាយឲ្យ›។ បើយើងទុកចិត្តសេចក្ដីសន្យារបស់ព្រះយេហូវ៉ាដែលថា«ខ្ញុំនឹងសងគេវិញ» នោះយើងនឹងលែងខ្វល់អំពីរឿងនោះទៀត ហើយមានទំនុកចិត្តថាលោកនឹងចាត់វិធានការតាមវិធីដ៏ល្អបំផុត។ នេះជាអ្វីដែលបានជួយបងចន ហើយគាត់បាននិយាយតទៀតថា៖ «ខ្ញុំសុខចិត្តរង់ចាំព្រះយេហូវ៉ា ព្រោះខ្ញុំជឿជាក់ថាលោកនឹងដោះស្រាយរឿងនោះបានល្អជាងខ្ញុំឆ្ងាយណាស់»។
«ចូរបន្តឈ្នះសេចក្ដីអាក្រក់ដោយសេចក្ដីល្អ»
១៦-១៧. តើយើងត្រូវធ្វើអ្វីដើម្បី«បន្តឈ្នះសេចក្ដីអាក្រក់ដោយសេចក្ដីល្អ» ហើយហេតុអ្វីនេះមានប្រយោជន៍? (រ៉ូម ១២:២១)
១៦ សូមអាន រ៉ូម ១២:២១។ បន្ថែមទៀត ប៉ូលបានដាស់តឿនគ្រិស្តសាសនិកឲ្យ«បន្តឈ្នះសេចក្ដីអាក្រក់ដោយសេចក្ដីល្អ»។ ស្ដីអំពីចំណុចនេះ លោកយេស៊ូបានមានប្រសាសន៍ក្នុងសុន្ទរកថានៅលើភ្នំថា៖ «ចូរបន្តស្រឡាញ់សត្រូវរបស់អ្នក ហើយអធិដ្ឋានឲ្យអ្នកដែលបៀតបៀនអ្នក»។ (ម៉ាថ. ៥:៤៤) លោកមិនគ្រាន់តែនិយាយ តែលោកក៏បានធ្វើតាមដែរ។ យើងទំនងជាគិតអំពីពេលលោកយេស៊ូរងការឈឺចាប់ ដោយត្រូវពួកទាហានរ៉ូមដំដែកគោលលោកភ្ជាប់នឹងបង្គោល។ លោកឈឺចាប់ខ្លាំងដល់ម្ល៉េះ បានជាយើងមិនអាចយល់អំពីទំហំនៃការឈឺចាប់របស់លោកឡើយ។
១៧ ទោះជាលោកយេស៊ូរងភាពអយុត្តិធម៌ច្រើនយ៉ាងណាក្ដី លោកមិនបានសុំព្រះយេហូវ៉ាឲ្យដាក់ទោសពួកទាហានដែលធ្វើបាបលោកទេ។ ផ្ទុយទៅវិញ លោកបានអធិដ្ឋានថា៖ «បិតាអើយ សូមអភ័យទោសឲ្យពួកគេ ព្រោះពួកគេមិនដឹងថាខ្លួនកំពុងធ្វើអ្វីឡើយ»។ (លូក. ២៣:៣៤) ស្រដៀងគ្នាដែរ ពេលយើងអធិដ្ឋានឲ្យអ្នកដែលធ្វើបាបយើង នេះជួយយើងឲ្យបន្ធូរកំហឹងនិងមិនសូវឈឺចិត្តខ្លាំងពេក ព្រមទាំងជួយយើងឲ្យមានទស្សនៈល្អជាងចំពោះគាត់។
១៨. តើសេចក្ដីអធិដ្ឋានបានជួយបងអាល់បឺតូនិងបងចនឲ្យស៊ូទ្រាំនឹងភាពអយុត្តិធម៌យ៉ាងដូចម្ដេច?
១៨ សេចក្ដីអធិដ្ឋានបានជួយបងអាល់បឺតូនិងបងចនឲ្យស៊ូទ្រាំនឹងភាពអយុត្តិធម៌ដែលពួកគាត់បានជួប។ បងអាល់បឺតូនិយាយថា៖ «ខ្ញុំបានអធិដ្ឋានឲ្យបងប្អូនដែលប្រព្រឹត្តចំពោះខ្ញុំដោយអយុត្តិធម៌។ ខ្ញុំក៏បានសុំព្រះយេហូវ៉ាជាច្រើនដងឲ្យជួយខ្ញុំឈប់គិតអំពីរឿងអយុត្តិធម៌នោះទៀត»។ គួរឲ្យសប្បាយរីករាយមែន បងអាល់បឺតូបានត្រឡប់មកបម្រើព្រះយេហូវ៉ាយ៉ាងស្មោះត្រង់ម្ដងទៀត។ ចំណែកបងចនវិញ គាត់និយាយថា៖ «អស់ជាច្រើនដង ខ្ញុំបានអធិដ្ឋានឲ្យបងប្អូនដែលធ្វើឲ្យខ្ញុំឈឺចិត្ត ហើយសុំលោកជួយខ្ញុំឲ្យអភ័យទោសគាត់។ យូរៗទៅ លោកបានជួយខ្ញុំឲ្យឈប់ខឹង និងឈប់វិនិច្ឆ័យគាត់ទៀត។ មិនត្រឹមតែប៉ុណ្ណោះ ការអធិដ្ឋានក៏បានជួយខ្ញុំឲ្យមានសេចក្ដីសុខសាន្តក្នុងចិត្តផងដែរ»។
១៩. ទម្រាំតែរបៀបរបបពិភពលោកនេះមកដល់ទីបញ្ចប់ តើយើងត្រូវធ្វើអ្វីខ្លះ? (ពេត្រុសទី១ ៣:៨, ៩)
១៩ ទម្រាំតែរបៀបរបបពិភពលោកនេះមកដល់ទីបញ្ចប់ យើងមិនដឹងថាយើងនឹងជួបប្រទះភាពអយុត្តិធម៌អ្វីខ្លះទេ។ ប៉ុន្តែ មិនថាយើងជួបរឿងអយុត្តិធម៌បែបណាក៏ដោយ យើងត្រូវបន្តអធិដ្ឋានសុំជំនួយពីព្រះយេហូវ៉ា ធ្វើតាមគំរូរបស់លោកយេស៊ូ និងបន្តធ្វើតាមគោលការណ៍គម្ពីរជានិច្ច។ បើយើងធ្វើដូច្នោះ យើងអាចប្រាកដថាព្រះយេហូវ៉ានឹងឲ្យពរយើង។—សូមអាន ពេត្រុសទី១ ៣:៨, ៩
ចម្រៀងលេខ៣៨ លោកនឹងធ្វើឲ្យអ្នកខ្លាំងក្លា
a ឈ្មោះខ្លះបានត្រូវផ្លាស់ប្ដូរ។
b នៅពេត្រុសទី១ ជំពូកទី២និង៣ ពេត្រុសបានលើកឡើងអំពីស្ថានភាពរបស់គ្រិស្តសាសនិកមួយចំនួនដែលប្រឈមមុខនឹងភាពអយុត្តិធម៌ពីសំណាក់ម្ចាស់ដ៏កាចសាហាវឬប្ដីដែលមិនមែនជាអ្នកជឿ។—១ពេ. ២:១៨-២០; ៣:១-៦, ៨, ៩
