ពេលគូអាពាហ៍ពិពាហ៍មើលរូបអាសអាភាស
-
«ខ្ញុំមានអារម្មណ៍ហាក់ដូចជាប្ដីខ្ញុំបានប្រព្រឹត្តអំពើផិតក្បត់ម្ដងហើយម្ដងទៀត»។
-
«ខ្ញុំមានអារម្មណ៍ថាខ្លួនមិនស្អាតគ្រប់គ្រាន់ គ្មានតម្លៃ ហើយខ្មាសគេ»។
-
«ខ្ញុំមិនអាចប្រាប់អ្នកណាទាំងអស់អំពីរឿងនេះ ហើយកើតទុក្ខតែឯង»។
-
«ខ្ញុំមានអារម្មណ៍ថាព្រះយេហូវ៉ាមិនយកចិត្តទុកដាក់ចំពោះខ្ញុំ»។
ពាក្យខាងលើបង្ហាញថាប្រពន្ធកើតទុក្ខខ្លាំងយ៉ាងណាពេលប្ដីមើលរូបអាសអាភាស។ a ម្យ៉ាងទៀត បើគាត់ធ្វើដូច្នេះក្នុងទីកំបាំងប្រហែលជាអស់ជាច្រើនខែឬច្រើនឆ្នាំ ប្រពន្ធប្រហែលជាមានអារម្មណ៍ថាគាត់មិនអាចទុកចិត្តប្ដីទៀតទេ។ ប្រពន្ធម្នាក់និយាយថា៖ «ខ្ញុំមានអារម្មណ៍ថាគឺដូចជាខ្ញុំមិនស្គាល់ប្ដីខ្ញុំទាល់តែសោះ។ តើមានអ្វីទៀតដែលគាត់កំពុងលាក់បាំងខ្ញុំ?»។
អត្ថបទនេះបានត្រូវរៀបចំសម្រាប់ប្រពន្ធដែលមានប្ដីមើលរូបអាសអាភាស។ b អត្ថបទនេះនឹងពិចារណាអំពីគោលការណ៍គម្ពីរដែលផ្ដល់ការសម្រាលទុក្ខ ពង្រឹងទំនុកចិត្តនាងថាព្រះយេហូវ៉ាគាំទ្រនាង ព្រមទាំងជួយនាងឲ្យមានសេចក្ដីសុខសាន្តក្នុងចិត្តច្រើនជាងនិងបន្តចូលទៅជិតព្រះយេហូវ៉ា។ c
តើគូដែលគ្មានកំហុសអាចធ្វើអ្វី?
ទោះជាអ្នកមិនអាចគ្រប់គ្រងអ្វីទាំងអស់ដែលប្ដីអ្នកធ្វើក្ដី មានអ្វីខ្លះដែលអ្នកអាចធ្វើដើម្បីមានសេចក្ដីសុខសាន្តច្រើនជាង។ សូមពិចារណាព័ត៌មានខាងក្រោមនេះ។
សូមកុំបន្ទោសខ្លួន។ ប្រពន្ធប្រហែលជាមានអារម្មណ៍ថាប្ដីគាត់មើលរូបអាសអាភាស ដោយសារនាងមានកំហុសណាមួយ។ បងស្រីអាល្លីស dមានអារម្មណ៍ថាគាត់មិនស្អាតគ្រប់គ្រាន់ឲ្យប្ដីពេញចិត្ត ហើយឆ្ងល់ថា ‹ហេតុអីបានជាប្ដីខ្ញុំចូលចិត្តមើលស្ត្រីផ្សេងជាជាងខ្ញុំ?›។ ប្រពន្ធខ្លះបន្ទោសខ្លួនចំពោះប្រតិកម្មរបស់ពួកគេ ដោយគិតថាពួកគេកំពុងធ្វើឲ្យស្ថានភាពនោះកាន់តែពិបាក។ បងស្រីដាញែលនិយាយថា៖«ខ្ញុំចាត់ទុកខ្លួនថាជាស្ត្រីជូរចត់ដែលកំពុងបង្ខូចអាពាហ៍ពិពាហ៍របស់យើងដោយសារខ្ញុំខឹង»។
បើអ្នកមានអារម្មណ៍ស្រដៀងនឹងនេះ សូមដឹងថាអ្នកមិនត្រូវទទួលខុសត្រូវនឹងព្រះយេហូវ៉ាចំពោះការប្រព្រឹត្តរបស់ប្ដីទេ។ យ៉ាកុប ១:១៤ចែងថា៖ «មនុស្សម្នាក់ៗត្រូវល្បងលដោយសេចក្ដីប៉ងប្រាថ្នារបស់ខ្លួនទាក់ទាញនិងល្បួងលួងលោម»។ (រ៉ូម ១៤:១២; ភី. ២:១២) ជាជាងបន្ទោសអ្នក ព្រះយេហូវ៉ាឲ្យតម្លៃចំពោះភក្ដីភាពរបស់អ្នកនឹងលោក។—២ប្រ. ១៦:៩
គឺជាការល្អឲ្យយល់ថាការដែលប្ដីមើលរូបអាសអាភាស មិនមានន័យថាប្រពន្ធគឺមិនស្អាតគ្រប់គ្រាន់ឲ្យប្ដីពេញចិត្តទេ។ អ្នកជំនាញខាងរឿងនេះលើកបញ្ជាក់ថា ការមើលរូបអាសអាភាសនាំឲ្យមានសេចក្ដីប៉ងប្រាថ្នាខាងផ្លូវភេទដែលគ្មានស្ត្រីណាអាចបំពេញបាន។
ចូរជៀសវាងពីការព្រួយបារម្ភហួសហេតុពេក។ បងស្រីកេតរ៉ឹននិយាយថា ការព្រួយបារម្ភថាប្ដីគាត់មើលរូបអាសអាភាសបានគ្របដណ្ដប់លើជីវិតរបស់គាត់ទាំងមូល។ បងស្រីហ្វ្រានស៊ីសនិយាយថា៖ «ខ្ញុំចាប់ផ្ដើមព្រួយបារម្ភពេលណាដែលខ្ញុំបាត់ប្ដីមិនដឹងទៅណា។ ខ្ញុំព្រួយបារម្ភយ៉ាងខ្លាំងពេញមួយថ្ងៃ»។ ប្រពន្ធឯទៀតនិយាយថាពួកគេមានអារម្មណ៍អៀនខ្មាស ពេលពួកគេនៅជាមួយបងប្អូនរួមជំនឿដែលប្រហែលជាដឹងអំពីបញ្ហាដែលប្ដីរបស់ពួកគេមាន។ រីឯប្រពន្ធឯទៀតសារភាពថាពួកគេមានអារម្មណ៍ឯកោ ដោយសារពួកគេគិតថាគ្មានអ្នកណាយល់អំពីស្ថានភាពរបស់ពួកគេទេ។
អារម្មណ៍ទាំងនេះគឺធម្មតា។ ប៉ុន្តែ បើអ្នកចេះតែគិតអំពីអ្វីទាំងនេះ អ្នកនឹងកាន់តែខ្វល់ចិត្ត។ ផ្ទុយទៅវិញ សូមព្យាយាមផ្ដោតអារម្មណ៍ទៅលើចំណងមិត្តភាពរបស់អ្នកជាមួយព្រះយេហូវ៉ាវិញ។ ការធ្វើដូច្នេះនឹងជួយអ្នកឲ្យមានកម្លាំងចិត្តកាន់តែខ្លាំងឡើង។—ចសព. ៦២:២; អេភ. ៦:១០
អ្នកប្រហែលជាទទួលប្រយោជន៍ពីការអាននិងរំពឹងគិតអំពីកំណត់ហេតុគម្ពីរស្ដីអំពីស្ត្រីដែលមានទុក្ខលំបាក ដែលបានទទួលការសម្រាលទុក្ខដោយអធិដ្ឋានទៅព្រះយេហូវ៉ា។ លោកមិនតែងតែដកបញ្ហារបស់ពួកគេចេញទេ ប៉ុន្តែលោកឲ្យពួកគេមានសេចក្ដីសុខសាន្ត។ ជាឧទាហរណ៍ ហាណា«ជូរចត់ក្នុងចិត្តខ្លាំងណាស់»ចំពោះស្ថានភាពរបស់គាត់។ ប៉ុន្តែ ក្រោយពីគាត់«អធិដ្ឋានយ៉ាងយូរទៅព្រះយេហូវ៉ា» គាត់មានសេចក្ដីសុខសាន្ត ទោះជាគាត់មិនទាន់ដឹងថាស្ថានភាពរបស់គាត់នឹងទៅជាយ៉ាងណាក្ដី។—១សាំ. ១:១០, ១២, ១៨; ២កូ. ១:៣, ៤
ទាំងប្ដីទាំងប្រពន្ធប្រហែលជាត្រូវស្វែងរកជំនួយពីពួកអ្នកចាស់ទុំ
ចូរស្វែងរកការគាំទ្រពីពួកអ្នកចាស់ទុំ។ ពួកគេអាចជា«ទីបាំងពីខ្យល់ និងជាទីជ្រកពីព្យុះភ្លៀង»។ (អេ. ៣២:២) ពួកគេប្រហែលជាថែមទាំងអាចលើកឈ្មោះរបស់បងប្អូនស្រីណាម្នាក់ដែលអ្នកអាចមានអារម្មណ៍ស្រួលនិយាយជាមួយដោយអស់ពីចិត្ត ហើយដែលអាចសម្រាលទុក្ខអ្នក។—សុភ. ១៧:១៧
តើអ្នកអាចជួយគាត់ឬទេ?
តើអ្នកអាចជួយប្ដីអ្នកឲ្យយកឈ្នះទម្លាប់របស់គាត់ក្នុងការមើលរូបអាសអាភាសឬទេ? ប្រហែលជាអាច។ គម្ពីរបញ្ជាក់ថាក្នុងការដោះស្រាយបញ្ហាណាមួយឬក្នុងការតយុទ្ធប្រឆាំងនឹងសត្រូវដ៏ខ្លាំងក្លា «មានគ្នាពីរនាក់ប្រសើរជាងនៅតែឯង»។ (អទ. ៤:៩-១២) អ្នកជំនាញបានរកឃើញថាពេលប្ដីប្រពន្ធសហការគ្នា ប្ដីច្រើនតែអាចយកឈ្នះការញៀនមើលរូបអាសអាភាស ហើយប្រពន្ធអាចរៀនទុកចិត្តប្ដីឡើងវិញបាន។
ពិតមែនថា នេះនឹងអាស្រ័យលើគូរបស់អ្នកថាតើគាត់សុខចិត្តខំព្យាយាម ហើយថាតើគាត់ចង់ឈប់មើលរូបអាសអាភាសឬទេ? តើគាត់បានអង្វរសុំកម្លាំងពីព្រះយេហូវ៉ា ហើយសុំជំនួយពីពួកអ្នកចាស់ទុំឬទេ? (២កូ. ៤:៧; យ៉ា. ៥:១៤, ១៥) តើគាត់មានគម្រោងជួយខ្លួនឯងឲ្យជៀសពីការមើលរូបអាសអាភាសឬ? ជាឧទាហរណ៍ តើគាត់ដាក់កម្រិតលើការប្រើគ្រឿងអេឡិចត្រូនិករបស់គាត់ ហើយតើគាត់ជៀសវាងពីស្ថានភាពដែលអាចមានការល្បងលឬទេ? (សុភ. ២៧:១២) តើគាត់សុខចិត្តទទួលជំនួយពីអ្នក ហើយមិនលាក់អ្វីពីអ្នកឬ? បើដូច្នេះ អ្នកប្រហែលជាអាចជួយគាត់បាន។
តើតាមរបៀបណា? សូមគិតអំពីឧទាហរណ៍មួយ។ បងស្រីហ្វេលីហ្ស៊េបានរៀបការជាមួយនឹងបងប្រុសអ៊ីថានដែលបានញៀនមើលរូបអាសអាភាសពេលដែលគាត់នៅក្មេង។ បងហ្វេលីហ្ស៊េធ្វើឲ្យប្ដីនាងមានអារម្មណ៍ស្រួលនិយាយជាមួយនាងពេលដែលគាត់មានសេចក្ដីប៉ងប្រាថ្នាចង់មើលរូបអាសអាភាស។ បងអ៊ីថានពន្យល់ថា៖ «ខ្ញុំនិយាយដោយស្មោះនិងដោយឥតលាក់លៀមជាមួយប្រពន្ធខ្ញុំ។ គាត់ជួយខ្ញុំដោយសេចក្ដីស្រឡាញ់ឲ្យជៀសវាងពីការល្បួង ហើយសួរខ្ញុំជាទៀងទាត់ថា តើខ្ញុំយ៉ាងណាដែរ? គាត់ក៏ជួយខ្ញុំឲ្យដាក់កម្រិតលើការប្រើប្រាស់ប្រព័ន្ធអ៊ីនធឺណិត»។ បងហ្វេលីហ្ស៊េច្បាស់ជាឈឺចិត្ត ដោយសារបងអ៊ីថានចាប់ចិត្តនឹងរូបអាសអាភាស។ នាងនិយាយថា៖ «ប៉ុន្តែ កំហឹងនិងការឈឺចិត្តរបស់ខ្ញុំមិនជួយគាត់ឲ្យបន្តជៀសវាងពីទម្លាប់អាក្រក់នេះទេ។ ក្រោយពីយើងពិភាក្សាគ្នាអំពីការពិបាករបស់គាត់ គាត់ប្រុងប្រៀបជួយខ្ញុំឲ្យឈប់ឈឺចិត្ត»។
ការពិភាក្សាបែបនេះមិនគ្រាន់តែអាចជួយប្ដីឲ្យជៀសវាងពីការមើលរូបអាសអាភាសប៉ុណ្ណោះទេ តែក៏ជួយប្រពន្ធគាត់ឲ្យទុកចិត្តគាត់ម្ដងទៀតដែរ។ បើប្ដីសុខចិត្តប្រាប់ប្រពន្ធអំពីចំណុចខ្សោយរបស់គាត់ កន្លែងណាដែលគាត់នឹងទៅ និងអ្វីដែលគាត់កំពុងធ្វើ នោះគឺស្រួលជាងឲ្យប្រពន្ធទុកចិត្តគាត់ ព្រោះគាត់លែងលាក់បាំងអ្វីទៀតពីនាង។
តើអ្នកជឿជាក់ថាអ្នកអាចជួយប្ដីរបស់អ្នកតាមរបៀបស្រដៀងនេះឬទេ? បើដូច្នេះ អ្នកប្រហែលជាអាចអាននិងពិភាក្សាអត្ថបទនេះជាមួយគ្នា។ គោលដៅរបស់គាត់គឺឈប់មើលរូបអាសអាភាស ហើយផ្ដល់ហេតុឲ្យអ្នកទុកចិត្តគាត់។ ជាជាងខឹងអ្នកដោយសារអ្នកចង់និយាយអំពីបញ្ហានេះ គាត់គួរតែព្យាយាមយល់ថាតើបញ្ហានេះមានឥទ្ធិពលយ៉ាងណាទៅលើអ្នក។ គោលដៅរបស់អ្នកគឺជួយគាំទ្រការខំប្រឹងរបស់គាត់ ហើយផ្ដល់ឱកាសឲ្យគាត់ធ្វើឲ្យអ្នកទុកចិត្តគាត់ឡើងវិញ។ អ្នកទាំងពីរនឹងត្រូវស្វែងយល់អំពីអ្វីដែលបង្កឲ្យមនុស្សចង់មើលរូបអាសអាភាស និងរបៀបដែលអាចយកឈ្នះបញ្ហានោះ។ e
បើអ្នកខ្លាចថាអ្នកនិងគូរបស់អ្នកនឹងមិនអាចនិយាយគ្នាស្រួលបួលអំពីរឿងនេះ សូមគិតអំពីការសុំអ្នកចាស់ទុំណាម្នាក់ដែលអ្នកទាំងពីរមានអារម្មណ៍ស្រួល ឲ្យចូលរួមជាមួយសម្រាប់មួយរយៈពេលកាលដែលពិភាក្សាអំពីស្ថានភាពនោះ។ សូមយល់ថាទោះជាក្រោយពីគូអាពាហ៍ពិពាហ៍របស់អ្នកបានយកឈ្នះនឹងការញៀនមើលរូបអាសអាភាសក្ដី ប្រហែលជានឹងត្រូវការពេលយូរមុនអ្នកអាចទុកចិត្តគាត់ម្ដងទៀត។ សូមកុំឈប់ព្យាយាម។ សូមរកមើលចំណុចល្អជាងតិចតួចក្នុងចំណងអាពាហ៍ពិពាហ៍របស់អ្នក។ សូមសង្ឃឹមថាយូរៗទៅ បើអ្នកទាំងពីរមានចិត្តអត់ធ្មត់ នៅទីបំផុតអាពាហ៍ពិពាហ៍របស់អ្នកនឹងទៅជារឹងមាំម្ដងទៀត។—អទ. ៧:៨; ១កូ. ១៣:៤
ចុះបើគាត់នៅតែបន្ត?
បើប្ដីរបស់អ្នកមើលរូបអាសអាភាសម្ដងទៀតក្រោយពីជៀសវាងអស់មួយរយៈពេល តើនេះមានន័យថាគាត់មិនប្រែចិត្តឬថាគាត់នឹងមិនអាចផ្ដាច់ទម្លាប់នេះបានឬ? មិនតែងតែដូច្នេះទេ។ ជាពិសេស បើគាត់ញៀនមើលរូបអាសអាភាស គាត់ប្រហែលជាត្រូវតយុទ្ធនឹងបញ្ហានេះអស់មួយជីវិតរបស់គាត់។ គាត់ប្រហែលជាថែមទាំងនឹងមើលរូបអាសអាភាសនោះម្ដងទៀតក្រោយពីឈប់អស់ជាច្រើនឆ្នាំ។ ដើម្បីការពារមិនឲ្យនេះកើតឡើង គាត់នឹងត្រូវដាក់ព្រំដែនការពារចំពោះខ្លួនឯងថែមទៀត ហើយប្រហែលជានៅតែតឹងរ៉ឹងចំពោះខ្លួនទោះជាបញ្ហានោះមើលទៅបាត់ទៅហើយក្ដី។ (សុភ. ២៨:១៤; ម៉ាថ. ៥:២៩; ១កូ. ១០:១២) គាត់នឹងត្រូវបណ្ដុះឲ្យមាន‹គំនិតថ្មីដែលបន្តកាន់កាប់›គាត់ ហើយរៀនឲ្យ«ស្អប់អ្វីដែលអាក្រក់» ពោលគឺរូបអាសអាភាស ព្រមទាំងការប្រព្រឹត្តមិនស្អាតស្អំណាទៀតដែលជាប់ទាក់ទងនឹងនេះ ដូចជាការស្ទាបអង្អែលអវយវៈភេទរបស់ខ្លួនដើម្បីបំពេញចំណង់ផ្លូវភេទ។ (អេភ. ៤:២៣; ចសព. ៩៧:១០; រ៉ូម ១២:៩) តើគាត់សុខចិត្តខំព្យាយាមធ្វើអ្វីទាំងនោះទេ? បើដូច្នេះ គាត់ប្រហែលជាអាចនឹងផ្ដាច់ទម្លាប់នេះបាន។ f
សូមផ្ដោតអារម្មណ៍ទៅលើចំណងមិត្តភាពរបស់អ្នកជាមួយព្រះយេហូវ៉ា
ប៉ុន្តែចុះយ៉ាងណាបើគូរបស់អ្នកមិនចង់យកឈ្នះបញ្ហារបស់គាត់? ជាញឹកញយ អ្នកប្រហែលជាមានអារម្មណ៍ត្រូវគេក្បត់ ខឹង និងខកចិត្ត។ សូមស្វែងរកសេចក្ដីសុខសាន្តក្នុងចិត្ត ដោយទុករឿងនោះទៅព្រះយេហូវ៉ា។ (១ពេ. ៥:៧) សូមបន្តចូលទៅជិតព្រះយេហូវ៉ាតាមរយៈការសិក្សា ការអធិដ្ឋាន និងការរំពឹងគិត។ ពេលអ្នកធ្វើដូច្នេះ សូមមានទំនុកចិត្តថាលោកក៏ចូលមកកាន់តែជិតអ្នកដែរ។ ដូចបានចែងនៅអេសាយ ៥៧:១៥ លោកអាស្រ័យនៅជាមួយនឹងពួកអ្នកដែលមាន«ចិត្តខ្ទេចខ្ទាំនិងធ្លាក់ទឹកចិត្ត» ហើយឲ្យពួកគេមានអំណរឡើងវិញ។ សូមព្យាយាមអស់ពីសមត្ថភាពដើម្បីធ្វើជាគ្រិស្តសាសនិកដ៏ល្អ។ សូមស្វែងរកការគាំទ្រពីពួកអ្នកចាស់ទុំ។ ម្យ៉ាងទៀត សូមបន្តសង្ឃឹមថានៅថ្ងៃណាមួយប្ដីរបស់អ្នកប្រហែលជានឹងកែប្រែយ៉ាងអស់ពីចិត្ត។—រ៉ូម ២:៤; ២ពេ. ៣:៩
a ពាក្យ«រូបអាសអាភាស»សំដៅលើវីដេអូ រូបភាព សារ និងសំឡេងដែលបានត្រូវធ្វើឡើងដើម្បីឲ្យអ្នកមើល អ្នកអាន ឬអ្នកស្ដាប់មានអារម្មណ៍ស្រើបស្រាល។
b ដើម្បីស្រួលយល់ ក្នុងអត្ថបទនេះយើងនឹងចាត់ទុកប្ដីថាជាអ្នកដែលមើលរូបអាសអាភាស។ ប៉ុន្តែ គោលការណ៍ជាច្រើនដែលមានក្នុងអត្ថបទនេះនឹងផ្ដល់ប្រយោជន៍ចំពោះប្ដីដែលមានប្រពន្ធមើលរូបអាសអាភាស។
c ការមើលរូបអាសអាភាសមិនមែនជាហេតុឲ្យលែងលះគ្នាស្របតាមគម្ពីរទេ។—ម៉ាថ. ១៩:៩
d ឈ្មោះខ្លះបានត្រូវផ្លាស់ប្ដូរ។
e នៅក្នុងគេហទំព័រjw.org/km និងក្នុងសៀវភៅផ្សេងៗរបស់យើង មានព័ត៌មានដែលអាចជួយ។ ជាឧទាហរណ៍ សូមមើលអត្ថបទដែលមានចំណងជើងថា «រូបអាសអាភាសអាចបំបាក់បំបែកអាពាហ៍ពិពាហ៍របស់អ្នក»ក្នុងគេហទំព័រjw.org/km និង«អ្នកអាចយកឈ្នះការល្បួង!»ក្នុងទស្សនាវដ្ដីប៉មយាម ថ្ងៃទី១ ខែកក្កដា ឆ្នាំ២០១៤ ទំ.៧-៩ ព្រមទាំងអត្ថបទ«រូបអាសអាភាស តើមានគ្រោះថ្នាក់ឬគ្មានគ្រោះថ្នាក់?» ពីទស្សនាវដ្ដីប៉មយាម ឆ្នាំ២០១៣ (brwp១៣០៨០១)។
f ដោយសារការមើលរូបអាសអាភាសអាចធ្វើឲ្យញៀន ប្ដីប្រពន្ធខ្លះបានធ្វើការសម្រេចចិត្តផ្ទាល់ខ្លួនទៅជួបគ្រូពេទ្យជំនាញដើម្បីទទួលជំនួយបន្ថែមពីលើជំនួយពីពួកអ្នកចាស់ទុំ។
លោកអ្នកក៏ប្រហែលជាចូលចិត្តដែរ
អាពាហ៍ពិពាហ៍និងក្រុមគ្រួសារ
រូបអាសអាភាសអាចបំបាក់បំបែកអាពាហ៍ពិពាហ៍របស់អ្នក
យោបល់ទាំងនេះអាចជួយអ្នកផ្ដាច់ទម្លាប់នេះ ហើយអាចជួយពង្រឹងចំណងអាពាហ៍ពិពាហ៍របស់អ្នកឡើងវិញ។
