សំណួរពីអ្នកអាន
តើតាមរបៀបណាអត្ថបទ«សូមឲ្យនាមរបស់លោកបានបរិសុទ្ធ»ក្នុងទស្សនាវដ្ដីប៉មយាម ខែមិថុនា ឆ្នាំ២០២០បានពន្យល់ច្បាស់ជាងអំពីជំនឿរបស់យើងស្ដីអំពីនាមរបស់ព្រះយេហូវ៉ានិងសិទ្ធិគ្រប់គ្រងរបស់លោក?
ក្នុងអត្ថបទនោះ យើងបានរៀនថាមានតែរឿងដ៏សំខាន់មួយដែលជាប់ទាក់ទងនឹងមនុស្សជាតិនិងទេវតាទាំងអស់។ រឿងនោះគឺ ការធ្វើឲ្យនាមដ៏ឧត្ដមរបស់ព្រះយេហូវ៉ាបានបរិសុទ្ធ។ សិទ្ធិគ្រប់គ្រងរបស់ព្រះយេហូវ៉ា ពោលគឺរបៀបគ្រប់គ្រងរបស់លោក គឺល្អបំផុតជាផ្នែកនៃរឿងដ៏សំខាន់នោះ។ ស្រដៀងគ្នាដែរ ចិត្តស្មោះឥតងាករេរបស់មនុស្សក៏ជាផ្នែកមួយទៀតនៃរឿងដ៏សំខាន់នោះដែរ។
ហេតុអ្វីនៅឥឡូវនេះយើងបញ្ជាក់ថារឿងដ៏សំខាន់បំផុតគឺអំពីនាមរបស់ព្រះយេហូវ៉ានិងការធ្វើឲ្យនាមនោះបានបរិសុទ្ធ? សូមយើងពិចារណាមូលហេតុបី។
សាថានបានបង្កាច់បង្ខូចនាមរបស់ព្រះតាំងពីការបះបោរនៅសួនអេដែន
ទី១ សាថានបានបង្ខូចនាមឬកេរ្តិ៍ឈ្មោះរបស់ព្រះយេហូវ៉ាក្នុងសួនអេដែន។ សាថានបាននិយាយទៅអេវ៉ាថា៖ «តើព្រះពិតជាមានប្រសាសន៍ថា អ្នកមិនត្រូវបរិភោគផ្លែពីដើមឈើទាំងអស់ក្នុងសួននេះមែនឬ?»។ (ដក. ៣:១) សំណួរដែលសាថានបានសួរអេវ៉ាបង្កប់អត្ថន័យថាព្រះយេហូវ៉ាជាព្រះដ៏កំណាញ់ដែលតឹងរ៉ឹងពេកលើរាស្ត្រលោក។ រួចមក ពេលសាថានបាននិយាយផ្ទុយពីអ្វីដែលព្រះយេហូវ៉ាបានមានប្រសាសន៍ វាហាក់ដូចជាហៅព្រះយេហូវ៉ាថាអ្នកភូតកុហក។ ដូច្នេះ វាបានបង្កាច់បង្ខូចនាមរបស់ព្រះយេហូវ៉ា។ វាបានទៅជា«មេកំណាច»ដែលមានន័យថា«អ្នកបង្កាច់បង្ខូច»។ (យ៉ូន. ៨:៤៤) ដោយសារអេវ៉ាបានជឿពាក្យកុហករបស់សាថាន នាងមិនបានស្ដាប់បង្គាប់ព្រះ ហើយនេះបង្ហាញថានាងបះបោរប្រឆាំងនឹងសិទ្ធិគ្រប់គ្រងរបស់លោក។ (ដក. ៣:២-៦) រហូតដល់សព្វថ្ងៃនេះ សាថានបង្កាច់បង្ខូចនាមព្រះដោយផ្សាយពាក្យកុហកអំពីបុគ្គលិកលក្ខណៈរបស់ព្រះយេហូវ៉ា។ ពួកអ្នកដែលជឿពាក្យកុហកបែបនោះទំនងជាងាយស្រួលមិនស្ដាប់បង្គាប់ព្រះយេហូវ៉ា។ ដូច្នេះចំពោះរាស្ត្រព្រះ ការបង្កាច់បង្ខូចនាមដ៏បរិសុទ្ធរបស់ព្រះយេហូវ៉ាគឺជាអំពើអយុត្តិធម៌បំផុត។ នេះគឺជាដើមហេតុដែលបណ្ដាលឲ្យមានទុក្ខវេទនានិងអំពើទុច្ចរិតជាច្រើនក្នុងពិភពលោក។
ទី២ ដើម្បីជាប្រយោជន៍ដល់អ្វីៗទាំងអស់ដែលព្រះយេហូវ៉ាបានបង្កើត លោកតាំងចិត្តជម្រះអស់ទាំងការតិះដៀលចំពោះនាមរបស់លោក។ នេះគឺជាអ្វីដ៏សំខាន់បំផុតចំពោះព្រះយេហូវ៉ា។ ហេតុនេះហើយបានជាលោកបានមានប្រសាសន៍ថា៖ «ខ្ញុំនឹងញែកនាមដ៏ឧត្ដមរបស់ខ្ញុំជាបរិសុទ្ធ»។ (អេគ. ៣៦:២៣) ម្យ៉ាងទៀត លោកយេស៊ូបានលើកបញ្ជាក់អំពីរឿងដែលគួរតែសំខាន់បំផុតក្នុងសេចក្ដីអធិដ្ឋានរបស់អ្នកបម្រើដ៏ស្មោះត្រង់របស់ព្រះយេហូវ៉ាទាំងអស់ ពេលលោកបានមានប្រសាសន៍ថា៖ «សូមឲ្យនាមរបស់លោកបានបរិសុទ្ធ»។ (ម៉ាថ. ៦:៩) គម្ពីរលើកបញ្ជាក់ម្ដងហើយម្ដងទៀតអំពីសារៈសំខាន់នៃការលើកតម្កើងនាមរបស់ព្រះយេហូវ៉ា។ សូមគិតអំពីឧទាហរណ៍ខ្លះៗដូចតទៅនេះ៖ «ចូរសរសើរតម្កើងព្រះយេហូវ៉ាឲ្យសមនឹងនាមរបស់លោក»។ (១ប្រ. ១៦:២៩; ចសព. ៩៦:៨) «ចូរច្រៀងសរសើរដល់នាមដ៏ថ្លៃថ្លារបស់លោក»។ (ចសព. ៦៦:២) «ខ្ញុំនឹងលើកតម្កើងនាមរបស់លោករហូតតទៅ»។ (ចសព. ៨៦:១២) ពេលមួយក្នុងចំណោមពេលផ្សេងៗដែលព្រះយេហូវ៉ាផ្ទាល់បានមានប្រសាសន៍ពីស្ថានសួគ៌ បានកើតឡើងនៅវិហារក្នុងក្រុងយេរូសាឡិម។ នៅពេលនោះ លោកយេស៊ូបានមានប្រសាសន៍ថា៖ «បិតាអើយ សូមលើកតម្កើងនាមរបស់លោក»។ ព្រះយេហូវ៉ាបានតបឆ្លើយថា៖ «ខ្ញុំបានលើកតម្កើងនាមរបស់ខ្ញុំ ហើយខ្ញុំនឹងលើកតម្កើងម្ដងទៀត»។—យ៉ូន. ១២:២៨ a
ទី៣ គោលបំណងរបស់ព្រះយេហូវ៉ានឹងតែងតែជាប់ទាក់ទងនឹងនាមរបស់លោក ឬកេរ្តិ៍ឈ្មោះរបស់លោក។ សូមគិតអំពីសារៈសំខាន់នៃនាមរបស់ព្រះយេហូវ៉ា ក្រោយពីមានការសាកល្បងចុងក្រោយនៅដំណាច់នៃការគ្រប់គ្រងមួយពាន់ឆ្នាំរបស់គ្រិស្ត។ តើទេវតានិងមនុស្សទាំងអស់នឹងមានអារម្មណ៍យ៉ាងណាចំពោះនាមរបស់ព្រះយេហូវ៉ានៅពេលនោះ? ដើម្បីជួយយើងឲ្យឆ្លើយសំណួរនេះ សូមយើងនឹកចាំអំពីចំណុចពីរដែលជាប់ទាក់ទងនឹងរឿងនេះ គឺចិត្តស្មោះឥតងាករេរបស់មនុស្ស និងសិទ្ធិគ្រប់គ្រងសកលលោក។ តើមនុស្សដែលបានបង្ហាញភាពស្មោះត្រង់នឹងបន្តជួបការពិបាកក្នុងការរក្សាចិត្តស្មោះឥតងាករេឬទេ? មិនមែនទេ។ ព្រោះថានៅពេលនោះ ពួកគេជាមនុស្សល្អឥតខ្ចោះ ហើយបានទទួលការសាកល្បងយ៉ាងពេញលេញ។ ពួកគេក៏បានទទួលជីវិតដែលគ្មានទីបញ្ចប់ដែរ។ តើមនុស្សនិងទេវតាត្រូវបន្ដពិគ្រោះឬថែមទាំងបែកបាក់គ្នាអំពីសិទ្ធិគ្រប់គ្រងសកលលោកឬទេ? មិនមែនទេ។ នៅពេលនោះអស់អ្នកដែលនៅស្ថានសួគ៌និងនៅផែនដីនឹងមានសាមគ្គីភាព ហើយនឹងទទួលយកការគ្រប់គ្រងរបស់ព្រះយេហូវ៉ា។ ប៉ុន្តែ ចុះយ៉ាងណាអំពីនាមរបស់ព្រះយេហូវ៉ា?
នៅពេលនោះ នាមរបស់ព្រះយេហូវ៉ាបានបរិសុទ្ធរួចហើយ គ្មានការបង្កាច់បង្ខូចទាល់តែសោះ។ ប៉ុន្តែ នាមរបស់ព្រះយេហូវ៉ានឹងបន្តធ្វើជាអ្វីដ៏សំខាន់បំផុតចំពោះអ្នកបម្រើទាំងអស់របស់លោកនៅស្ថានសួគ៌និងនៅផែនដី។ ហេតុអ្វី? ពីព្រោះពួកគេនឹងឃើញព្រះយេហូវ៉ាបន្តធ្វើអ្វីដ៏អស្ចារ្យ។ សូមគិតអំពីនេះ ដោយសារលោកយេស៊ូនឹងប្រគល់គ្រប់ទាំងអំណាចទៅព្រះយេហូវ៉ាវិញដោយចិត្តរាបទាប ព្រះនឹង«ធ្វើជាអ្វីៗទាំងអស់ដល់បុគ្គលគ្រប់រូប»។ (១កូ. ១៥:២៨) ក្រោយពីនោះ មនុស្សនៅលើផែនដីនឹងមាន«សេរីភាពដ៏រុងរឿងជាកូនព្រះ»។ (រ៉ូម ៨:២១) ម្យ៉ាងទៀត ព្រះយេហូវ៉ានឹងសម្រេចគោលបំណងរបស់លោកក្នុងការបង្រួបបង្រួមកូនរបស់លោកនៅស្ថានសួគ៌និងនៅផែនដីឲ្យទៅជាក្រុមគ្រួសារតែមួយ។—អេភ. ១:១០
តើអ្វីទាំងអស់នេះនឹងមានឥទ្ធិពលយ៉ាងណាលើក្រុមគ្រួសាររបស់ព្រះយេហូវ៉ានៅស្ថានសួគ៌និងនៅផែនដី? យើងច្បាស់ជានឹងនៅតែមានបំណងចិត្តយ៉ាងខ្លាំងដើម្បីសរសើរនាមដ៏ពីរោះរបស់ព្រះយេហូវ៉ា។ ដាវីឌដែលជាអ្នកតែងចម្រៀងសរសើរព្រះបានសរសេរក្រោមការដឹកនាំរបស់លោកថា៖ «សូមឲ្យព្រះយេហូវ៉ា . . . បានទទួលការសរសើរតម្កើង . . . សូមឲ្យនាមដ៏ឧត្តុង្គឧត្តមរបស់លោកទទួលការលើកតម្កើងជារៀងរហូត»។ (ចសព. ៧២:១៨, ១៩) យើងនឹងបន្តរកហេតុថ្មីដ៏គួរឲ្យរំភើបចិត្តដើម្បីធ្វើដូច្នេះរហូតតទៅ។
នាមរបស់ព្រះយេហូវ៉ាជាតំណាងអ្វីទាំងអស់អំពីលោក។ ពេលយើងគិតអំពីនាមរបស់លោក យើងនឹកឃើញអំពីសេចក្ដីស្រឡាញ់របស់លោក។ (១យ៉ូន. ៤:៨) យើងនឹងតែងតែនឹកចាំថា សេចក្ដីស្រឡាញ់បានជំរុញចិត្តព្រះយេហូវ៉ាឲ្យបង្កើតយើង ហើយថាលោកបានផ្ដល់គ្រឿងបូជាលោះព្រោះស្រឡាញ់ ព្រមទាំងនឹកចាំជានិច្ចថាការគ្រប់គ្រងរបស់លោកគឺប្រកបដោយភាពសុចរិតនិងសេចក្ដីស្រឡាញ់។ ប៉ុន្តែ យើងក៏នឹងបន្តទទួលសេចក្ដីស្រឡាញ់ពីលោកជារៀងរហូតដែរ។ យើងនឹងចូលកាន់តែជិតលោកជាបិតារបស់យើង ហើយច្រៀងសរសើរតម្កើងនាមដ៏រុងរឿងរបស់លោកជាដរាបតទៅ។—ចសព. ៧៣:២៨
a គម្ពីរក៏បង្ហាញដែរថាព្រះយេហូវ៉ាធ្វើអ្វីផ្សេងៗ«ដើម្បីនាមរបស់លោក»។ ជាឧទាហរណ៍ លោកដឹកនាំរាស្ត្ររបស់លោក ជួយពួកគេ សង្គ្រោះពួកគេ អភ័យទោសឲ្យពួកគេ និងរក្សាការពារជីវិតពួកគេ។ លោកធ្វើអ្វីទាំងអស់នេះដើម្បីនាមដ៏ឧត្ដមរបស់លោក គឺយេហូវ៉ា។—ចសព. ២៣:៣; ៣១:៣; ៧៩:៩; ១០៦:៨; ១៤៣:១១
