អត្ថបទសិក្សា ២៣
ចូរបន្តឲ្យ«អណ្ដាតភ្លើងដែលមកពីយ៉ា»ឆេះជានិច្ច
«សេចក្ដីស្រឡាញ់ប្រៀបបាននឹងអណ្ដាតភ្លើងដែលឆេះសន្ធោសន្ធៅ ដូចជាអណ្ដាតភ្លើងដែលមកពីយ៉ា»។—សាឡូ. ៨:៦
ចម្រៀងលេខ១៣១ «គូដែលព្រះបានផ្សំផ្គុំ»
សេចក្ដីសង្ខេប a
១. តើគម្ពីរពណ៌នាយ៉ាងណាអំពីសេចក្ដីស្រឡាញ់ពិត?
«សេចក្ដីស្រឡាញ់ប្រៀបបាននឹងអណ្ដាតភ្លើងដែលឆេះសន្ធោសន្ធៅ ដូចជាអណ្ដាតភ្លើងដែលមកពីយ៉ា។ រលកបោកបក់មិនអាចពន្លត់សេចក្ដីស្រឡាញ់បានទេ ហើយទឹកទន្លេក៏មិនអាចបំផ្លាញសេចក្ដីស្រឡាញ់បានដែរ»។ b (សាឡូ. ៨:៦, ៧) នេះជាការពណ៌នាដ៏ពីរោះអំពីសេចក្ដីស្រឡាញ់ពិត! ពាក្យទាំងនេះលើកទឹកចិត្តគូប្ដីប្រពន្ធថា អ្នកអាចមានសេចក្ដីស្រឡាញ់មិនចេះសាបសូន្យចំពោះគ្នាទៅវិញទៅមកបាន។
២. តើប្ដីប្រពន្ធត្រូវធ្វើអ្វីដើម្បីធ្វើឲ្យប្រាកដថាសេចក្ដីស្រឡាញ់របស់ពួកគេមិនរសាយទៅ?
២ គឺត្រូវការការខំព្យាយាមដើម្បីឲ្យប្ដីប្រពន្ធស្រឡាញ់គ្នាទៅវិញទៅមកពេញមួយជីវិត។ ជាឧទាហរណ៍ ភ្នក់ភ្លើងអាចនៅឆេះបាន លុះត្រាតែបុគ្គលណាម្នាក់បន្តដាក់អុស។ បើគ្មាននរណាធ្វើដូច្នេះទេ ភ្លើងនោះនឹងរលត់ទៅ។ ស្រដៀងគ្នាដែរ សេចក្ដីស្រឡាញ់រវាងប្ដីនិងប្រពន្ធអាចនៅគង់វង្សជានិច្ចបាន លុះត្រាតែពួកគេពង្រឹងចំណងអាពាហ៍ពិពាហ៍របស់ពួកគេ។ ជួនកាល ប្ដីប្រពន្ធប្រហែលជាមានអារម្មណ៍ថាសេចក្ដីស្រឡាញ់របស់ពួកគេកំពុងរសាយទៅ ជាពិសេសពេលពួកគេជួបបញ្ហាលុយកាក់ បញ្ហាសុខភាព ឬការពិបាកក្នុងការចិញ្ចឹមអប់រំកូន។ ដូច្នេះ បើអ្នកបានរៀបការហើយ តើអ្នកអាចធ្វើឲ្យ«អណ្ដាតភ្លើងដែលមកពីយ៉ា»បន្តឆេះក្នុងអាពាហ៍ពិពាហ៍របស់អ្នកយ៉ាងដូចម្ដេច? ក្នុងអត្ថបទនេះ យើងនឹងពិចារណារបៀបបីយ៉ាងដើម្បីរក្សាចំណងអាពាហ៍ពិពាហ៍ឲ្យនៅរឹងមាំនិងមានសុភមង្គល។ c
ចូរបន្តពង្រឹងចំណងមិត្តភាពរបស់អ្នកជាមួយព្រះយេហូវ៉ា
ដូចយ៉ូសែបនិងម៉ារៀ ប្ដីប្រពន្ធត្រូវមានចំណងមិត្តភាពរឹងមាំជាមួយព្រះយេហូវ៉ា (សូមមើលវគ្គ៣)
៣. តើចំណងមិត្តភាពរឹងមាំជាមួយព្រះយេហូវ៉ាជួយគូប្ដីប្រពន្ធឲ្យរក្សាសេចក្ដីស្រឡាញ់ជានិច្ចយ៉ាងដូចម្ដេច? (អ្នកទូន្មាន ៤:១២) (សូមមើលរូបភាពផងដែរ)
៣ ដើម្បីធ្វើឲ្យ«អណ្ដាតភ្លើងដែលមកពីយ៉ា»ឆេះជានិច្ច ទាំងប្ដីទាំងប្រពន្ធគួរខំឲ្យមានចំណងមិត្តភាពរឹងមាំជាមួយព្រះយេហូវ៉ា។ តើចំណងមិត្តភាពនេះជួយអាពាហ៍ពិពាហ៍របស់ពួកគេយ៉ាងដូចម្ដេច? ពេលគូប្ដីប្រពន្ធឲ្យតម្លៃចំពោះចំណងមិត្តភាពរបស់ពួកគេជាមួយបិតានៅស្ថានសួគ៌ ពួកគេចង់ធ្វើតាមយោបល់ពីលោក ហើយនេះជួយពួកគេឲ្យជៀសវាងនិងយកឈ្នះបញ្ហាដែលអាចនាំឲ្យសេចក្ដីស្រឡាញ់របស់ពួកគេចំពោះគ្នារសាយទៅ។ (សូមអាន អ្នកទូន្មាន ៤:១២) ពួកអ្នកដែលមានចំណងមិត្តភាពរឹងមាំជាមួយព្រះយេហូវ៉ាក៏ខំអស់ពីសមត្ថភាពដើម្បីយកតម្រាប់លោក។ ពួកគេព្យាយាមបណ្ដុះឲ្យមានគុណសម្បត្តិដូចលោកដូចជា សេចក្ដីសប្បុរស ចិត្តអត់ធ្មត់ និងការអភ័យទោស។ (អេភ. ៤:៣២–៥:១) ពេលគូប្ដីប្រពន្ធបង្ហាញគុណសម្បត្តិបែបនេះ គឺស្រួលឲ្យពួកគេមានសេចក្ដីស្រឡាញ់ចំពោះគ្នាកាន់តែខ្លាំងឡើង។ បងស្រីម្នាក់ឈ្មោះលេណាដែលបានរៀបការជាង២៥ឆ្នាំនិយាយថា៖ «យើងស្រួលស្រឡាញ់និងគោរពបុគ្គលដែលមានចំណងមិត្តភាពរឹងមាំជាមួយព្រះយេហូវ៉ា»។
៤. ហេតុអ្វីព្រះយេហូវ៉ាជ្រើសរើសយ៉ូសែបនិងម៉ារៀឲ្យធ្វើជាឪពុកម្ដាយរបស់អនាគតមេស្ស៊ី?
៤ សូមគិតអំពីគំរូមួយពីគម្ពីរ។ ពេលព្រះយេហូវ៉ាត្រូវជ្រើសរើសបុគ្គលមួយគូឲ្យធ្វើជាឪពុកម្ដាយរបស់អនាគតមេស្ស៊ី លោកបានជ្រើសរើសយ៉ូសែបនិងម៉ារៀពីចំណោមកូនចៅជាច្រើនរបស់ដាវីឌ។ ហេតុអ្វីលោកជ្រើសរើសពួកគាត់? ពីព្រោះពួកគាត់ទាំងពីរនាក់មានចំណងមិត្តភាពផ្ទាល់ជាមួយព្រះយេហូវ៉ា ហើយលោកដឹងថាពួកគាត់នឹងចាត់ទុកលោកថាសំខាន់បំផុតក្នុងចំណងអាពាហ៍ពិពាហ៍របស់ពួកគាត់។ គូអាពាហ៍ពិពាហ៍ទាំងឡាយ តើអ្នកអាចរៀនអ្វីពីយ៉ូសែបនិងពីម៉ារៀ?
៥. តើប្ដីអាចរៀនអ្វីពីយ៉ូសែប?
៥ យ៉ូសែបឆាប់ធ្វើតាមការណែនាំពីព្រះយេហូវ៉ា ហើយនោះបានជួយគាត់ឲ្យទៅជាប្ដីដ៏ល្អប្រសើរជាង។ យ៉ាងហោចណាស់អស់បីដង គាត់បានទទួលការណែនាំពីព្រះចំពោះក្រុមគ្រួសាររបស់គាត់។ រាល់ដង គាត់ឆាប់ធ្វើតាមការណែនាំនោះ ទោះជានៅពេលពិបាកចំពោះគាត់ក្ដី។ (ម៉ាថ. ១:២០, ២៤; ២:១៣-១៥, ១៩-២១) ដោយធ្វើតាមការណែនាំពីព្រះ យ៉ូសែបបានការពារម៉ារៀ ព្រមទាំងគាំទ្រនិងផ្គត់ផ្គង់នាង។ សូមស្រមៃគិតថាការប្រព្រឹត្តរបស់យ៉ូសែបច្បាស់ជាបានទាញចិត្តម៉ារៀឲ្យកាន់តែស្រឡាញ់និងគោរពគាត់យ៉ាងណាទៅ! ប្ដីទាំងឡាយ អ្នកអាចយកតម្រាប់យ៉ូសែបដោយស្វែងរកយោបល់ដែលមានមូលដ្ឋានលើគម្ពីរអំពីរបៀបថែរក្សាក្រុមគ្រួសារ។ d ពេលអ្នកធ្វើតាមយោបល់នេះ ទោះជានោះមានន័យថាអ្នកត្រូវធ្វើការផ្លាស់ប្ដូរក្ដី អ្នកបង្ហាញសេចក្ដីស្រឡាញ់ចំពោះប្រពន្ធ ហើយពង្រឹងចំណងអាពាហ៍ពិពាហ៍របស់អ្នក។ បងស្រីម្នាក់នៅកោះវ៉ានូទូដែលបានរៀបការជាង២០ឆ្នាំ និយាយថា៖ «ពេលប្ដីខ្ញុំស្វែងរកនិងធ្វើតាមការណែនាំពីព្រះយេហូវ៉ា ខ្ញុំកាន់តែគោរពគាត់។ ខ្ញុំមានអារម្មណ៍ថាខ្ញុំមានសុវត្ថិភាព ហើយខ្ញុំមានទំនុកចិត្តលើការសម្រេចចិត្តរបស់គាត់»។
៦. តើប្រពន្ធអាចរៀនអ្វីពីម៉ារៀ?
៦ ម៉ារៀមានចំណងមិត្តភាពផ្ទាល់ជាមួយព្រះយេហូវ៉ា។ ជំនឿរបស់គាត់មិនពឹងលើអ្វីដែលយ៉ូសែបធ្វើឡើយ។ ម៉ារៀស្គាល់បទគម្ពីរយ៉ាងច្បាស់។ គាត់ក៏បានលៃទុកពេលដើម្បីរំពឹងគិតដែរ។ (លូក. ២:១៩, ៥១) យើងអាចប្រាកដថាចំណងមិត្តភាពរបស់ម៉ារៀជាមួយព្រះយេហូវ៉ាបាននាំឲ្យគាត់ទៅជាប្រពន្ធដ៏ល្អប្រសើរ។ សព្វថ្ងៃនេះ ប្រពន្ធជាច្រើនខំយកតម្រាប់ម៉ារៀ។ ជាឧទាហរណ៍ បងស្រីម្នាក់ឈ្មោះអេមីកូនិយាយថា៖ «ពេលខ្ញុំនៅលីវ ខ្ញុំមានកាលវិភាគគោរពប្រណិប័តន៍ដោយខ្លួនឯង។ ប៉ុន្តែក្រោយពីរៀបការ ខ្ញុំបានទទួលស្គាល់ថា ដោយសារប្ដីខ្ញុំអធិដ្ឋានឲ្យយើងពីរនាក់ ហើយនាំមុខក្នុងការគោរពប្រណិប័តន៍ ជំនឿរបស់ខ្ញុំពឹងទៅលើអ្វីដែលគាត់ធ្វើ។ ខ្ញុំចាប់ផ្ដើមឃើញថាខ្ញុំផ្ទាល់ត្រូវរក្សាចំណងមិត្តភាពជាមួយព្រះយេហូវ៉ាឲ្យរឹងមាំ។ ដូច្នេះឥឡូវ ខ្ញុំលៃទុកពេលនៅជាមួយព្រះយេហូវ៉ាម្នាក់ឯងដោយអធិដ្ឋាន អានបទគម្ពីរ និងរំពឹងគិតអំពីគំនិតរបស់លោក»។ (កាឡ. ៦:៥) ប្រពន្ធទាំងឡាយ កាលដែលអ្នកបន្តពង្រឹងចំណងមិត្តភាពជាមួយព្រះយេហូវ៉ា ប្ដីអ្នកនឹងកាន់តែមានហេតុសរសើរនិងស្រឡាញ់អ្នក។—សុភ. ៣១:៣០
៧. តើប្ដីប្រពន្ធអាចរៀនអ្វីពីយ៉ូសែបនិងម៉ារៀអំពីការគោរពប្រណិប័តន៍ព្រះជាមួយគ្នា?
៧ យ៉ូសែបនិងម៉ារៀក៏បានសហការគ្នាដើម្បីរក្សាចំណងមិត្តភាពរបស់ពួកគាត់ជាមួយព្រះយេហូវ៉ាឲ្យរឹងមាំ។ ពួកគាត់បានយល់ថាការគោរពប្រណិប័តន៍ជាក្រុមគ្រួសារគឺសំខាន់។ (លូក. ២:២២-២៤, ៤១; ៤:១៦) គឺប្រហែលជាពិបាកឲ្យធ្វើដូច្នេះ ជាពិសេសពេលដែលពួកគាត់មានកូនកាន់តែច្រើន ប៉ុន្តែពួកគាត់នៅតែធ្វើបាន។ នេះពិតជាគំរូដ៏ល្អប្រសើរចំពោះគូអាពាហ៍ពិពាហ៍នៅសព្វថ្ងៃនេះមែន! ដូចយ៉ូសែបនិងម៉ារៀ បើអ្នកមានកូន អ្នកប្រហែលជាមិនតែងតែស្រួលឲ្យចូលរួមកិច្ចប្រជុំ ឬមានកាលវិភាគសម្រាប់គោរពប្រណិប័តន៍ជាក្រុមគ្រួសារទេ។ ប្រហែលជារឹតតែពិបាករកពេលសិក្សា ឬអធិដ្ឋានតែពីរនាក់ប្ដីប្រពន្ធ។ ប៉ុន្តែ សូមចាំថាពេលអ្នកគោរពប្រណិប័តន៍ព្រះយេហូវ៉ាជាមួយគ្នា អ្នកកាន់តែចូលទៅជិតលោក ហើយជិតស្និទ្ធនឹងគ្នា។ ដូច្នេះ សូមចាត់ទុកការគោរពប្រណិប័តន៍ថាសំខាន់បំផុត។
៨. តើគូប្ដីប្រពន្ធដែលរកាំរកូសនឹងគ្នាអាចធ្វើអ្វីដើម្បីទទួលប្រយោជន៍ច្រើនជាងពីការគោរពប្រណិប័តន៍ជាក្រុមគ្រួសារ?
៨ ចុះយ៉ាងណាបើចំណងអាពាហ៍ពិពាហ៍របស់អ្នកកំពុងរកាំរកូស? ការគិតអំពីការជួបជុំគ្នាដើម្បីគោរពប្រណិប័តន៍ជាក្រុមគ្រួសារ ប្រហែលជាស្ដាប់ទៅមិនសូវគួរឲ្យសប្បាយរីករាយទេ។ បើដូច្នេះ សូមចាប់ផ្ដើមដោយពិចារណាអំពីអ្វីដ៏ខ្លីៗនិងសប្បាយៗ ដែលអ្នកទាំងពីរយល់ស្របចង់ពិគ្រោះជាមួយគ្នា។ នេះអាចជួយអ្នកឲ្យស្រឡាញ់គ្នាកាន់តែខ្លាំង ហើយចង់គោរពប្រណិប័តន៍ព្រះយេហូវ៉ាជាមួយគ្នា។
ចូរចំណាយពេលជាមួយគ្នា
៩. ហេតុអ្វីប្ដីប្រពន្ធត្រូវចំណាយពេលជាមួយគ្នា?
៩ ប្ដីប្រពន្ធ អ្នកក៏អាចបន្តស្រឡាញ់គ្នាជានិច្ចដោយចំណាយពេលជាមួយគ្នា។ ពេលអ្នកធ្វើដូច្នេះ នោះនឹងជួយអ្នកឲ្យបន្តដឹងអំពីគំនិតនិងអារម្មណ៍របស់គូខ្លួន។ (ដក. ២:២៤) បងស្រីលីលីយ៉ានិងបងប្រុសរ៉ូសស្លែនបានរៀបការ១៥ឆ្នាំជាង។ សូមកត់សម្គាល់អំពីអ្វីដែលពួកគាត់បានឃើញមិនយូរក្រោយពីពួកគាត់បានរៀបការ។ បងស្រីនោះនិយាយថា៖ «យើងទទួលស្គាល់ថាយើងនឹងមិនមានពេលច្រើនជាមួយគ្នាដូចដែលយើងធ្លាប់គិតទេ។ មួយថ្ងៃៗ យើងជាប់រវល់ធ្វើការ ធ្វើការងារផ្ទះ ហើយក្រោយមករវល់ជាមួយនឹងកូនៗ។ យើងឃើញថា បើយើងមិនលៃទុកពេលតែពីរនាក់ទេ យើងអាចអស់ចិត្តពីគ្នាបន្តិចម្ដងៗ»។
១០. តើប្ដីប្រពន្ធអាចធ្វើតាមគោលការណ៍នៅអេភេសូរ ៥:១៥, ១៦យ៉ាងដូចម្ដេច?
១០ តើប្ដីប្រពន្ធអាចធ្វើអ្វីដើម្បីធ្វើឲ្យប្រាកដថាពួកគេចំណាយពេលជាមួយគ្នា? អ្នកប្រហែលជាត្រូវលៃទុកពេលឬរៀបកាលវិភាគដើម្បីមានពេលជាមួយគ្នា។ (សូមអាន អេភេសូរ ៥:១៥, ១៦) បងប្រុសម្នាក់ឈ្មោះអ៊ូហ្សុនឌូនៅប្រទេសនីហ្សេរីយ៉ា និយាយថា៖ «ពេលខ្ញុំរៀបកាលវិភាគ ខ្ញុំដាក់បញ្ចូលពេលដែលខ្ញុំនិងប្រពន្ធខ្ញុំនឹងចំណាយតែពីរនាក់ ហើយខ្ញុំចាត់ទុកពេលវេលានោះថាសំខាន់ណាស់»។ (ភី. ១:១០) សូមពិចារណាអំពីរបៀបដែលបងអាណាស្តាស៊ីយ៉ាដែលជាប្រពន្ធរបស់អ្នកត្រួតពិនិត្យប្រចាំមណ្ឌលនៅប្រទេសម៉ុលដាវី ប្រើពេលវេលារបស់គាត់ឲ្យកើតប្រយោជន៍ច្រើនបំផុត។ គាត់និយាយថា៖ «ខ្ញុំព្យាយាមធ្វើកិច្ចការផ្ទាល់ខ្លួន កាលដែលប្ដីខ្ញុំជាប់រវល់បំពេញភារកិច្ចរបស់គាត់។ យ៉ាងនេះ យើងអាចចំណាយពេលជាមួយគ្នាក្រោយមក»។ ប៉ុន្តែ ចុះយ៉ាងណាបើអ្នកទាំងពីរពិបាករកពេលសម្រាប់តែពីរនាក់?
តើអ្នកអាចធ្វើអ្វីខ្លះជាមួយគ្នាជាប្ដីប្រពន្ធ? (សូមមើលវគ្គ១១-១២)
១១. តើអាគីឡានិងព្រីស៊ីលបានធ្វើអ្វីខ្លះជាមួយគ្នា?
១១ ប្ដីប្រពន្ធអាចរៀនពីគំរូរបស់អាគីឡានិងព្រីស៊ីល ជាប្ដីប្រពន្ធដែលទទួលការគោរពស្រឡាញ់ពីគ្រិស្តសាសនិកជាច្រើននៅសម័យដើម។ (រ៉ូម ១៦:៣, ៤) គម្ពីរមិនផ្ដល់ព័ត៌មានជាច្រើនអំពីអាពាហ៍ពិពាហ៍របស់ពួកគាត់ទេ តែគម្ពីរប្រាប់ថាពួកគាត់បានរួមការងារ ផ្សព្វផ្សាយ និងជួយអ្នកឯទៀតជាមួយគ្នា។ (សកម្ម. ១៨:២, ៣, ២៤-២៦) តាមពិត ពេលណាដែលគម្ពីររៀបរាប់អំពីអាគីឡានិងព្រីស៊ីល នោះតែងតែលើកឡើងពួកគាត់ជាមួយគ្នា។
១២. តើប្ដីប្រពន្ធអាចធ្វើអ្វីដើម្បីចំណាយពេលជាមួយគ្នាច្រើនជាង? (សូមមើលរូបភាពផងដែរ)
១២ តើប្ដីប្រពន្ធអាចយកតម្រាប់អាគីឡានិងព្រីស៊ីលយ៉ាងដូចម្ដេច? សូមគិតអំពីអ្វីជាច្រើនដែលអ្នកនិងគូរបស់អ្នកត្រូវធ្វើ។ តើអ្នកអាចធ្វើអ្វីទាំងនេះខ្លះជាមួយគ្នា ជាជាងធ្វើរៀងៗខ្លួនឬទេ? ជាឧទាហរណ៍ អាគីឡានិងព្រីស៊ីលបានផ្សព្វផ្សាយជាមួយគ្នា។ តើអ្នកមានគម្រោងធ្វើដូច្នេះជាទៀងទាត់ឬទេ? មួយវិញទៀត អាគីឡានិងព្រីស៊ីលរួមការងារជាមួយគ្នា។ អ្នកនិងគូរបស់អ្នកប្រហែលជាមិនមានការងារដូចគ្នាទេ ប៉ុន្តែតើអ្នកអាចធ្វើការងារផ្ទះជាមួយគ្នាឬទេ? (អទ. ៤:៩) ពេលអ្នកជួយគ្នាធ្វើកិច្ចការណាមួយ អ្នកទាំងពីរកំពុងសហការគ្នា និងមានឱកាសនិយាយគ្នា។ បងប្រុសរ៉ូបឺតនិងបងស្រីលីនដាបានរៀបការជាង៥០ឆ្នាំ។ បងរ៉ូបឺតនិយាយថា៖ «និយាយឲ្យត្រង់ យើងពីរនាក់មិនសូវមានពេលច្រើនដើម្បីធ្វើការកម្សាន្តជាមួយគ្នាទេ។ ប៉ុន្តែ ពេលខ្ញុំលាងចាន ប្រពន្ធខ្ញុំជាអ្នកជូតចាន ឬពេលខ្ញុំទៅធ្វើសួន គាត់ចេញមកជួយខ្ញុំ។ នេះធ្វើឲ្យខ្ញុំសប្បាយចិត្តណាស់។ ការធ្វើកិច្ចការផ្សេងៗជាមួយគ្នានាំឲ្យយើងកាន់តែជិតស្និទ្ធគ្នា ហើយសេចក្ដីស្រឡាញ់របស់យើងបន្តកើនឡើង»។
១៣. តើប្ដីប្រពន្ធគួរធ្វើអ្វី?
១៣ ប៉ុន្តែ សូមចាំថាការគ្រាន់តែនៅជាមួយគ្នាប៉ុណ្ណោះមិនតែងតែមានន័យថាប្ដីប្រពន្ធនឹងកាន់តែជិតស្និទ្ធគ្នាឡើយ។ ប្រពន្ធម្នាក់នៅប្រទេសប្រេស៊ីលនិយាយថា៖ «សព្វថ្ងៃនេះ ជីវិតរបស់យើងគឺរវល់ខ្លាំងដល់ម្ល៉េះបានជាយើងងាយគិតថាយើងចំណាយពេលជាមួយគ្នា ដោយសារតែយើងរស់នៅក្រោមដំបូលផ្ទះតែមួយ។ ដូច្នេះ ខ្ញុំយល់ថាគឺត្រូវធ្វើលើសពីការនៅជាមួយគ្នា។ ខ្ញុំក៏ត្រូវផ្ដល់ការយកចិត្តទុកដាក់ដែលប្ដីខ្ញុំត្រូវការដែរ»។ សូមកត់សម្គាល់អំពីរបៀបដែលបងប្រុសប្រូណូនិងប្រពន្ធរបស់គាត់ថេអ៊ីស ធ្វើឲ្យប្រាកដថាពួកគាត់យកចិត្តទុកដាក់ចំពោះគ្នា។ បងប្រូណូនិយាយថា៖ «ក្នុងអំឡុងពេលយើងពីរនាក់ទំនេរ យើងទុកទូរស័ព្ទមួយឡែក ហើយចំណាយពេលជាមួយគ្នាយ៉ាងសប្បាយរីករាយ»។
១៤. បើប្ដីប្រពន្ធមិនចូលចិត្តចំណាយពេលជាមួយគ្នា តើពួកគេអាចធ្វើអ្វី?
១៤ ប៉ុន្តែ ចុះយ៉ាងណាបើអ្នកនិងគូរបស់អ្នកមិនចូលចិត្តចំណាយពេលជាមួយគ្នា? ប្រហែលជាពួកអ្នកមានអ្វីដែលចូលចិត្តធ្វើខុសគ្នា ឬប្រហែលជាពួកអ្នកឆាប់ទើសចិត្តនឹងគ្នា។ តើអ្នកអាចធ្វើអ្វី? សូមគិតអំពីភ្នក់ភ្លើងដែលបានត្រូវរៀបរាប់នៅខាងលើ។ ពេលទើបតែបង្កាត់ភ្លើង វាមិនឆេះសន្ធោសន្ធៅភ្លាមៗទេ។ អ្នកត្រូវបន្តដាក់អុសធំទៅៗបន្តិចម្ដងៗ។ ស្រដៀងគ្នាដែរ អ្នកអាចចាប់ផ្ដើមចំណាយពេលតែប៉ុន្មាននាទីជាមួយគ្នារាល់ថ្ងៃ។ សូមធ្វើឲ្យប្រាកដថាពួកអ្នកធ្វើអ្វីដែលទាំងពីរនាក់ចូលចិត្ត មិនមែនធ្វើអ្វីដែលអាចបង្កឲ្យមានជម្លោះនោះទេ។ (យ៉ា. ៣:១៨) ដោយចាប់ផ្ដើមពីបន្តិចម្ដងៗ អ្នកប្រហែលជាឃើញថាសេចក្ដីស្រឡាញ់របស់អ្នកចំពោះគ្នាកាន់តែខ្លាំងឡើងម្ដងទៀត។
ចូរប្រព្រឹត្តចំពោះគ្នាដោយការគោរព
១៥. ហេតុអ្វីការគោរពគឺសំខាន់ចាំបាច់ដើម្បីរក្សាសេចក្ដីស្រឡាញ់ចំពោះគូឲ្យនៅខ្លាំងជានិច្ច?
១៥ ការគោរពគឺសំខាន់ចាំបាច់ក្នុងចំណងអាពាហ៍ពិពាហ៍។ ការគោរពប្រៀបដូចជាអុកស៊ីហ្ស៊ែនដែលអាចជួយឲ្យភ្នក់ភ្លើងបន្តឆេះសន្ធោសន្ធៅ។ បើគ្មានអុកស៊ីហ្ស៊ែនទេ ភ្លើងនឹងឆាប់រលត់។ ស្រដៀងគ្នាដែរ បើគ្មានការគោរព សេចក្ដីស្រឡាញ់របស់ប្ដីប្រពន្ធនឹងឆាប់រសាយទៅ។ ផ្ទុយទៅវិញ ប្ដីប្រពន្ធដែលព្យាយាមបង្ហាញការគោរពចំពោះគ្នាទៅវិញទៅមក កំពុងរក្សាសេចក្ដីស្រឡាញ់របស់ពួកគេឲ្យនៅខ្លាំង។ ប៉ុន្តែ សូមចាំថាគឺមិនគ្រាន់តែអ្នកដែលគួរគិតថាអ្នកបង្ហាញការគោរពចំពោះគូនោះទេ តែសំខាន់គឺគូរបស់អ្នកគិតថាគាត់ទទួលការគោរព។ បងស្រីផេននីនិងបងប្រុសអេរេតបានរៀបការជាង២៥ឆ្នាំ។ បងផេននីនិយាយថា៖ «ដោយសារយើងបង្ហាញការគោរពចំពោះគ្នាទៅវិញទៅមក នោះធ្វើឲ្យបរិយាកាសក្នុងផ្ទះយើងពោរពេញទៅដោយសេចក្ដីស្រឡាញ់។ យើងអាចនិយាយអំពីអារម្មណ៍របស់យើងដោយឥតលាក់លៀម ព្រោះយើងដឹងថាយើងឲ្យតម្លៃចំពោះទស្សនៈរបស់គ្នា»។ ដូច្នេះ តើអ្នកអាចធ្វើអ្វីដើម្បីជួយឲ្យគូរបស់អ្នកមានអារម្មណ៍ថាគាត់ទទួលការគោរព? សូមពិចារណាអំពីគំរូរបស់អាប្រាហាំនិងសារ៉ា។
ប្ដីដែលជាគ្រិស្តសាសនិកត្រូវឲ្យតម្លៃចំពោះអារម្មណ៍របស់ប្រពន្ធ ដោយយកចិត្តទុកដាក់ស្ដាប់នាង (សូមមើលវគ្គ១៦)
១៦. តើប្ដីអាចរៀនអ្វីពីគំរូរបស់អាប្រាហាំ? (ពេត្រុសទី១ ៣:៧) (សូមមើលរូបភាពផងដែរ)
១៦ អាប្រាហាំបានប្រព្រឹត្តចំពោះសារ៉ាដោយការគោរព។ គាត់បានយកទស្សនៈរបស់សារ៉ាមកពិចារណា ហើយឲ្យតម្លៃចំពោះអារម្មណ៍របស់នាង។ នៅពេលមួយ សារ៉ាមានការតានតឹងចិត្ត ហើយនាងបានប្រាប់អាប្រាហាំអំពីអារម្មណ៍របស់នាង ហើយថែមទាំងបន្ទោសគាត់ចំពោះបញ្ហានោះ។ តើអាប្រាហាំបានខឹងនិងនិយាយដោយមិនសប្បុរសឬទេ? គាត់មិនបានធ្វើដូច្នេះទេ។ គាត់ដឹងថាសារ៉ាជាប្រពន្ធដែលចុះចូលនិងគាំទ្រការសម្រេចចិត្តរបស់គាត់។ អាប្រាហាំបានស្ដាប់នាង ហើយព្យាយាមដោះស្រាយបញ្ហានោះ។ (ដក. ១៦:៥, ៦) តើយើងអាចរៀនអ្វី? ប្ដីទាំងឡាយ អ្នកមានសិទ្ធិធ្វើការសម្រេចចិត្តឲ្យក្រុមគ្រួសាររបស់អ្នក។ (១កូ. ១១:៣) ប៉ុន្តែ ទង្វើដែលប្រកបដោយសេចក្ដីស្រឡាញ់គឺគិតអំពីទស្សនៈរបស់ប្រពន្ធមុនធ្វើការសម្រេចចិត្ត ជាពិសេសបើការសម្រេចចិត្តនោះនឹងមានឥទ្ធិពលលើនាង។ (១កូ. ១៣:៤, ៥) នៅពេលផ្សេងទៀត ប្រពន្ធរបស់អ្នកប្រហែលជាមានអារម្មណ៍តានតឹងចិត្ត ហើយប្រហែលជាត្រូវប្រាប់អំពីអារម្មណ៍របស់នាង។ តើអ្នកឲ្យតម្លៃចំពោះអារម្មណ៍របស់នាងដោយស្ដាប់នាងយ៉ាងយកចិត្តទុកដាក់ឬទេ? (សូមអាន ពេត្រុសទី១ ៣:៧) បងស្រីអេនចឺឡានិងបងប្រុសឌីមិទ្រីបានរៀបការជិត៣០ឆ្នាំ។ បងអេនចឺឡាពន្យល់អំពីរបៀបដែលប្ដីគាត់ធ្វើឲ្យគាត់មានអារម្មណ៍ថាគាត់ទទួលការគោរព។ គាត់និយាយថា៖ «បងឌីមិទ្រីតែងតែប្រុងស្ដាប់ខ្ញុំពេលខ្ញុំចង់និយាយ ឬពេលខ្ញុំពិបាកចិត្ត។ គាត់អត់ធ្មត់នឹងខ្ញុំ ទោះជាពេលដែលខ្ញុំមិននិយាយតាមសម្រួលក្ដី»។
១៧. តើប្រពន្ធអាចរៀនអ្វីពីគំរូរបស់សារ៉ា? (ពេត្រុសទី១ ៣:៥, ៦)
១៧ សារ៉ាគោរពអាប្រាហាំដោយគាំទ្រការសម្រេចចិត្តរបស់គាត់។ (ដក. ១២:៥) នៅពេលមួយ អាប្រាហាំបានសម្រេចចិត្តទទួលភ្ញៀវដែលស្រាប់តែមកយ៉ាងរាក់ទាក់។ គាត់បានសុំសារ៉ាឲ្យឈប់ធ្វើអ្វីដែលនាងកំពុងធ្វើ ហើយធ្វើនំប៉័ងច្រើន។ (ដក. ១៨:៦) សារ៉ាបានធ្វើតាមភ្លាមៗ ហើយគាំទ្រការសម្រេចចិត្តរបស់អាប្រាហាំ។ ប្រពន្ធទាំងឡាយ អ្នកអាចយកតម្រាប់សារ៉ាដោយគាំទ្រការសម្រេចចិត្តរបស់ប្ដី។ ពេលអ្នកធ្វើដូច្នេះ អ្នកពង្រឹងចំណងអាពាហ៍ពិពាហ៍របស់អ្នក។ (សូមអាន ពេត្រុសទី១ ៣:៥, ៦) បងឌីមិទ្រីដែលបានត្រូវរៀបរាប់នៅវគ្គមុនបានពន្យល់អំពីរបៀបដែលប្រពន្ធរបស់គាត់ធ្វើឲ្យគាត់មានអារម្មណ៍ថាគាត់ទទួលការគោរព។ គាត់និយាយថា៖ «ខ្ញុំឲ្យតម្លៃការខំប្រឹងរបស់អេនចឺឡាដើម្បីគាំទ្រការសម្រេចចិត្តរបស់ខ្ញុំ ទោះជានាងមិនយល់ស្របក៏ដោយ។ បើលទ្ធផលចេញមកមិនល្អ នាងមិនរិះគន់ខ្ញុំទេ»។ គឺស្រួលឲ្យស្រឡាញ់បុគ្គលដែលគោរពយើង!
១៨. តើប្ដីប្រពន្ធទទួលប្រយោជន៍យ៉ាងណាពីការខំប្រឹងរក្សាសេចក្ដីស្រឡាញ់របស់ពួកគេឲ្យខ្លាំងជានិច្ច?
១៨ សព្វថ្ងៃនេះ សាថានចង់ពន្លត់សេចក្ដីស្រឡាញ់ដែលមានក្នុងអាពាហ៍ពិពាហ៍របស់គ្រិស្តសាសនិក។ វាដឹងថាបើប្ដីប្រពន្ធលែងស្រឡាញ់គ្នា ពួកគេប្រហែលជាចាប់ផ្ដើមឃ្លាតចេញពីព្រះយេហូវ៉ា។ ប៉ុន្តែ សេចក្ដីស្រឡាញ់ពិតមិនអាចពន្លត់បានឡើយ! ដូច្នេះ សូមឲ្យសេចក្ដីស្រឡាញ់ក្នុងអាពាហ៍ពិពាហ៍របស់អ្នកប្រៀបដូចជាសេចក្ដីស្រឡាញ់ដែលបានត្រូវរៀបរាប់ក្នុងបទចម្រៀងសាឡូម៉ូន។ ចូរតាំងចិត្តចាត់ទុកព្រះយេហូវ៉ាថាសំខាន់បំផុតក្នុងអាពាហ៍ពិពាហ៍របស់អ្នក លៃទុកពេលឲ្យគ្នា ហើយគិតអំពីសេចក្ដីត្រូវការនិងឲ្យតម្លៃចំពោះអារម្មណ៍របស់គ្នាទៅវិញទៅមក។ កាលដែលអ្នកធ្វើដូច្នេះ អាពាហ៍ពិពាហ៍របស់អ្នកនឹងនាំឲ្យព្រះយេហូវ៉ាដែលជាប្រភពនៃសេចក្ដីស្រឡាញ់ពិតទទួលការសរសើរតម្កើង ហើយដូចភ្នក់ភ្លើងដែលគេបន្ថែមអុសជានិច្ច សេចក្ដីស្រឡាញ់របស់អ្នកនឹងឆេះសន្ធោសន្ធៅជាដរាប។
ចម្រៀងលេខ១៣២ យើងជាសាច់ឈាមតែមួយ
a អាពាហ៍ពិពាហ៍ជាអំណោយពីព្រះយេហូវ៉ាចំពោះមនុស្សជាតិ។ ក្នុងចំណងអាពាហ៍ពិពាហ៍ ប្ដីនិងប្រពន្ធអាចបង្ហាញសេចក្ដីស្រឡាញ់ដ៏ខ្លាំងចំពោះគ្នា។ ប៉ុន្តែ ជួនកាលសេចក្ដីស្រឡាញ់នោះអាចរសាយទៅ។ បើអ្នកបានរៀបការរួចហើយ អត្ថបទនេះនឹងជួយអ្នកឲ្យបន្តស្រឡាញ់គូរបស់អ្នក ហើយមានសុភមង្គលក្នុងចំណងអាពាហ៍ពិពាហ៍។
b សេចក្ដីស្រឡាញ់ពិតដែលមិនប្រែប្រួលនិងគង់វង្ស បានត្រូវហៅថា«អណ្ដាតភ្លើងដែលមកពីយ៉ា» ដោយសារព្រះយេហូវ៉ាគឺជាអ្នកបង្កើតសេចក្ដីស្រឡាញ់បែបនេះ។
c ទោះជាគូរបស់អ្នកមិនមែនជាសាក្សីព្រះយេហូវ៉ាក្ដី អ្នកប្រហែលជាឃើញថាយោបល់ក្នុងអត្ថបទនេះនឹងជួយអ្នកឲ្យពង្រឹងចំណងអាពាហ៍ពិពាហ៍របស់អ្នក។—១កូ. ៧:១២-១៤; ១ពេ. ៣:១, ២
d ជាឧទាហរណ៍ សូមគិតអំពីយោបល់ក្នុងអត្ថបទតភាគ«ជំនួយសម្រាប់ក្រុមគ្រួសារ» ដែលមាននៅក្នុងគេហទំព័រjw.org/km និងក្នុងកម្មវិធីJWបណ្ណាល័យ។
