អត្ថបទសិក្សា ២៤
អ្នកអាចសម្រេចគោលដៅរបស់អ្នកក្នុងកិច្ចបម្រើព្រះ
«យើងមិនត្រូវឈប់ព្យាយាមធ្វើអ្វីដែលល្អប្រសើរឡើយ ព្រោះនៅពេលកំណត់យើងនឹងទទួលផល បើយើងមិនរសាយចិត្តទេ»។—កាឡ. ៦:៩
ចម្រៀងលេខ៨៤ ចូរខំព្យាយាម
សេចក្ដីសង្ខេប a
១. តើយើងជាច្រើននាក់ធ្លាប់មានការពិបាកអ្វី?
តើអ្នកធ្លាប់មានគោលដៅក្នុងកិច្ចបម្រើព្រះ b តែក្រោយមកពិបាកសម្រេចគោលដៅនោះឬទេ? បើដូច្នេះ មិនមានតែអ្នកទេ។ ជាឧទាហរណ៍ បងប្រុសហ្វីលីពចង់បង្កើនគុណភាពនៃសេចក្ដីអធិដ្ឋានរបស់គាត់និងអធិដ្ឋានឲ្យបានច្រើនជាង ប៉ុន្តែគាត់ពិបាករកពេលដើម្បីអធិដ្ឋាន។ បងស្រីអ៊ីរីខាមានគោលដៅមកកិច្ចប្រជុំផ្សព្វផ្សាយទាន់ពេល ប៉ុន្តែគាត់នៅតែមកយឺតស្ទើរតែរាល់កិច្ចប្រជុំ។ បងប្រុសតូម៉ាសព្យាយាមជាច្រើនដងដើម្បីអានគម្ពីរទាំងមូល។ គាត់និយាយថា៖ «ខ្ញុំមិនសូវចូលចិត្តអានគម្ពីរប៉ុន្មានទេ។ ខ្ញុំបានសាកល្បងបីដង ប៉ុន្តែរាល់លើកខ្ញុំឈប់ត្រឹមច្បាប់លេវី»។
២. ហេតុអ្វីយើងមិនគួរធ្លាក់ទឹកចិត្ត បើយើងមានគោលដៅខាងកិច្ចបម្រើព្រះដែលមិនទាន់សម្រេច?
២ បើអ្នកមានគោលដៅដែលអ្នកមិនទាន់សម្រេចទេ សូមកុំធ្លាក់ទឹកចិត្តឡើយ។ សូម្បីតែគោលដៅសាមញ្ញមួយ ក៏ច្រើនតែត្រូវការពេលនិងការខំប្រឹង។ ការដែលអ្នកនៅតែចង់សម្រេចគោលដៅរបស់អ្នក បង្ហាញថាអ្នកឲ្យតម្លៃចំពោះចំណងមិត្តភាពរបស់អ្នកជាមួយព្រះយេហូវ៉ា ហើយចង់ជូនលោកនូវអ្វីល្អបំផុត។ ព្រះយេហូវ៉ាឲ្យតម្លៃចំពោះការខំប្រឹងរបស់អ្នក។ ប៉ុន្តែ លោកមិនតម្រូវពីអ្នកច្រើនជាងអ្វីដែលអ្នកអាចឲ្យឡើយ។ (ចសព. ១០៣:១៤; មីកា ៦:៨) ដូច្នេះ អ្នកគួរមានគោលដៅដែលសមហេតុសមផលស្របតាមកាលៈទេសៈរបស់អ្នក។ ក្រោយពីអ្នកជ្រើសរើសគោលដៅណាមួយ តើអ្នកអាចធ្វើអ្វីដើម្បីសម្រេចគោលដៅនោះ? សូមពិចារណាយោបល់ខ្លះ។
ការមានបំណងចិត្តជាខ្លាំងគឺសំខាន់ចាំបាច់
ចូរអធិដ្ឋានឲ្យមានបំណងចិត្តកាន់តែខ្លាំងឡើង (សូមមើលវគ្គ៣-៤)
៣. ហេតុអ្វីការមានបំណងចិត្តជាខ្លាំងគឺសំខាន់?
៣ ការមានបំណងចិត្តជាខ្លាំងគឺសំខាន់ណាស់ដើម្បីសម្រេចគោលដៅក្នុងកិច្ចបម្រើព្រះ។ ពេលយើងមានបំណងចិត្តជាខ្លាំង យើងនឹងខំព្យាយាមដើម្បីសម្រេចគោលដៅនោះ។ យើងអាចប្រដូចបំណងចិត្តទៅនឹងខ្យល់ដែលរុញទូកក្ដោងឲ្យទៅដល់ទីដៅ។ បើខ្យល់បន្តបក់ នោះអ្នកបើកទូកទំនងជានឹងទៅដល់ទីដៅរបស់គាត់។ ម្យ៉ាងទៀត បើខ្យល់បក់ខ្លាំង នោះគាត់នឹងប្រហែលជាទៅដល់លឿនជាង។ ស្រដៀងគ្នាដែរ ពេលយើងកាន់តែមានបំណងចិត្ត យើងកាន់តែអាចសម្រេចគោលដៅរបស់យើង។ បងប្រុសឈ្មោះដាវីឌពីប្រទេសអែលសាល់វ៉ាឌ័រនិយាយថា៖ «ពេលយើងមានបំណងចិត្តចង់សម្រេចគោលដៅរបស់យើង យើងខំប្រឹងខ្លាំងជាង។ យើងនឹងព្យាយាមមិនឲ្យអ្វីណាក៏ដោយមករារាំងយើងពីការសម្រេចគោលដៅរបស់យើងទេ»។ ដូច្នេះ តើអ្នកអាចធ្វើអ្វីដើម្បីមានបំណងចិត្តកាន់តែខ្លាំង?
៤. តើយើងអាចអធិដ្ឋានអំពីអ្វី? (ភីលីព ២:១៣) (សូមមើលរូបភាពផងដែរ)
៤ សូមអធិដ្ឋានឲ្យមានបំណងចិត្តកាន់តែខ្លាំង។ តាមរយៈឫទ្ធានុភាពរបស់លោក ព្រះយេហូវ៉ាអាចជំរុញចិត្តអ្នកឲ្យសម្រេចគោលដៅរបស់អ្នក។ (សូមអាន ភីលីព ២:១៣) ជួនកាល យើងកំណត់គោលដៅណាមួយ ដោយសារយើងដឹងថាវាល្អ ហើយជាអ្វីដែលយើងគួរធ្វើ។ ប៉ុន្តែ យើងប្រហែលជាមិនសូវមានបំណងប្រាថ្នាឲ្យសម្រេចគោលដៅនោះទេ។ ជាឧទាហរណ៍ សូមគិតអំពីបងស្រីណូរីណានៅប្រទេសអ៊ូហ្គង់ដា។ គាត់បានកំណត់គោលដៅដឹកនាំការសិក្សាគម្ពីរ ប៉ុន្តែគាត់មិនសូវមានបំណងប្រាថ្នាខ្លាំងដើម្បីសម្រេចគោលដៅនេះទេ ដោយសារគាត់មានអារម្មណ៍ថាគាត់មិនពូកែបង្រៀន។ តើអ្វីបានជួយគាត់? គាត់និយាយថា៖ «ខ្ញុំបានចាប់ផ្ដើមសុំព្រះយេហូវ៉ារាល់ថ្ងៃឲ្យជួយខ្ញុំមានបំណងប្រាថ្នាកាន់តែខ្លាំងដើម្បីដឹកនាំការសិក្សាគម្ពីរ។ ទន្ទឹមនឹងនោះ ខ្ញុំព្យាយាមបង្កើនសមត្ថភាពបង្រៀនរបស់ខ្ញុំ។ ប៉ុន្មានខែក្រោយមក ខ្ញុំបានកត់សម្គាល់ឃើញថាខ្ញុំមានបំណងចិត្តកាន់តែខ្លាំងឡើង។ នៅឆ្នាំនោះ ខ្ញុំបានចាប់ផ្ដើមការសិក្សាពីរ»។
៥. តើយើងអាចគិតអំពីអ្វីដើម្បីជួយយើងមានបំណងចិត្តកាន់តែខ្លាំងឲ្យសម្រេចគោលដៅរបស់យើង?
៥ សូមរំពឹងគិតអំពីអ្វីដែលព្រះយេហូវ៉ាបានធ្វើសម្រាប់អ្នក។ (ចសព. ១៤៣:៥) សាវ័កប៉ូលបានរំពឹងគិតអំពីគុណដ៏វិសេសលើសលប់របស់ព្រះយេហូវ៉ាចំពោះគាត់ផ្ទាល់ ហើយនេះបានជំរុញចិត្តគាត់ឲ្យខំប្រឹងដើម្បីលោក។ (១កូ. ១៥:៩, ១០; ១ធី. ១:១២-១៤) ស្រដៀងគ្នាដែរ កាលដែលអ្នករំពឹងគិតកាន់តែច្រើនអំពីអ្វីដែលព្រះយេហូវ៉ាបានធ្វើសម្រាប់អ្នក នោះអ្នកនឹងមានបំណងចិត្តកាន់តែខ្លាំងដើម្បីសម្រេចគោលដៅរបស់អ្នក។ (ចសព. ១១៦:១២) សូមពិចារណាអំពីអ្វីដែលបានជួយបងស្រីម្នាក់នៅប្រទេសហុងឌូរ៉ាសឲ្យសម្រេចគោលដៅរបស់គាត់ដើម្បីទៅជាអ្នកត្រួសត្រាយពេញពេល។ គាត់និយាយថា៖ «ខ្ញុំបានរំពឹងគិតអំពីសេចក្ដីស្រឡាញ់ដ៏ជ្រាលជ្រៅរបស់ព្រះយេហូវ៉ាចំពោះខ្ញុំ។ លោកបានទាញនាំខ្ញុំឲ្យមករាស្ត្រលោក។ លោកយកចិត្តទុកដាក់ចំពោះខ្ញុំនិងការពារខ្ញុំ។ ការរំពឹងគិតបែបនេះបានពង្រឹងសេចក្ដីស្រឡាញ់របស់ខ្ញុំចំពោះព្រះយេហូវ៉ា ហើយធ្វើឲ្យខ្ញុំតាំងចិត្តកាន់តែខ្លាំងដើម្បីចាប់ផ្ដើមត្រួសត្រាយ»។
៦. តើអ្វីទៀតអាចជួយយើងឲ្យមានបំណងចិត្តកាន់តែខ្លាំង?
៦ សូមផ្ដោតអារម្មណ៍ទៅលើប្រយោជន៍ពីការសម្រេចគោលដៅរបស់អ្នក។ សូមកត់សម្គាល់អំពីអ្វីដែលបានជួយបងអ៊ីរីខាដែលបានត្រូវរៀបរាប់នៅខាងលើឲ្យសម្រេចគោលដៅរបស់គាត់ដើម្បីមកទាន់ពេល។ គាត់និយាយថា៖ «ខ្ញុំបានទទួលស្គាល់ថាខ្ញុំខកខានទទួលប្រយោជន៍យ៉ាងច្រើន ដោយសារខ្ញុំមកប្រជុំផ្សព្វផ្សាយយឺត។ ប៉ុន្តែពេលខ្ញុំមកលឿនជាង ខ្ញុំអាចស្វាគមន៍បងប្អូននិងចំណាយពេលជាមួយពួកគេ។ ខ្ញុំក៏អាចស្ដាប់យោបល់ល្អដែលនឹងជួយខ្ញុំឲ្យបង្កើនសមត្ថភាពរបស់ខ្ញុំ ហើយអរសប្បាយក្នុងកិច្ចបម្រើផ្សាយ»។ បងអ៊ីរីខាផ្ដោតអារម្មណ៍ទៅលើប្រយោជន៍ពីការមកទាន់ពេល ហើយគាត់បានសម្រេចគោលដៅនោះ។ តើអ្នកអាចផ្ដោតអារម្មណ៍ទៅលើប្រយោជន៍អ្វីខ្លះ? បើគោលដៅរបស់អ្នកគឺធ្វើឲ្យការអានគម្ពីរនិងការអធិដ្ឋានកាន់តែល្អប្រសើរឡើង សូមគិតអំពីរបៀបដែលនោះនឹងពង្រឹងចំណងមិត្តភាពរបស់អ្នកជាមួយព្រះយេហូវ៉ា។ (ចសព. ១៤៥:១៨, ១៩) បើគោលដៅរបស់អ្នកគឺបណ្ដុះឲ្យមានគុណសម្បត្តិណាមួយជាគ្រិស្តសាសនិក សូមផ្ដោតអារម្មណ៍ទៅលើរបៀបដែលគុណសម្បត្តិនោះនឹងធ្វើឲ្យអ្នកមានទំនាក់ទំនងល្អជាងជាមួយអ្នកឯទៀត។ (កូឡ. ៣:១៤) អ្នកអាចធ្វើបញ្ជីអំពីមូលហេតុទាំងអស់ដែលអ្នកចង់សម្រេចគោលដៅនោះ។ សូមពិនិត្យមើលបញ្ជីនោះជាទៀងទាត់។ បងតូម៉ាសដែលបានត្រូវរៀបរាប់នៅខាងលើនិយាយថា៖ «កាលដែលខ្ញុំមានមូលហេតុកាន់តែច្រើនឲ្យសម្រេចគោលដៅណាមួយ ខ្ញុំនឹងកាន់តែខំប្រឹងដើម្បីសម្រេចគោលដៅនោះ»។
៧. តើអ្វីបានជួយបងហ៊ូលីអូនិងប្រពន្ធរបស់គាត់ឲ្យសម្រេចគោលដៅរបស់ពួកគេ?
៧ សូមចំណាយពេលជាមួយពួកអ្នកដែលនឹងជំរុញចិត្តអ្នក។ (សុភ. ១៣:២០) សូមគិតអំពីអ្វីដែលបានជួយបងប្រុសហ៊ូលីអូនិងប្រពន្ធរបស់គាត់ ឲ្យសម្រេចគោលដៅរបស់ពួកគេអំពីការបង្កើនកិច្ចបម្រើផ្សាយរបស់ពួកគេ។ គាត់និយាយថា៖ «យើងបានជ្រើសរើសមិត្តភក្តិដែលគាំទ្រគោលដៅរបស់យើង ហើយយើងពិគ្រោះគោលដៅនោះជាមួយពួកគេ។ ពួកគេជាច្រើននាក់បានសម្រេចគោលដៅស្រដៀងនឹងគោលដៅយើងរួចហើយ ដូច្នេះពួកគេអាចឲ្យយោបល់ល្អៗដល់យើង។ មិត្តភក្តិរបស់យើងបានសួរយើងថាតើគម្រោងរបស់យើងដំណើរការយ៉ាងណា ហើយពួកគេក៏លើកទឹកចិត្តយើងពេលដែលយើងត្រូវការ»។
ពេលយើងមិនសូវមានចិត្តចង់
ចូរខំព្យាយាមដើម្បីឈានទៅដល់ការសម្រេចគោលដៅរបស់អ្នក (សូមមើលវគ្គ៨)
៨. តើអ្វីអាចកើតឡើង បើយើងខំព្យាយាមសម្រេចគោលដៅតែពេលយើងចង់ធ្វើប៉ុណ្ណោះ? (សូមមើលរូបភាពផងដែរ)
៨ ប៉ុន្តែ មានថ្ងៃខ្លះដែលយើងទាំងអស់គ្នាមិនសូវមានចិត្តចង់សម្រេចគោលដៅរបស់យើង។ តើនេះមានន័យថាយើងមិនអាចខំព្យាយាមសម្រេចគោលដៅនោះឬទេ? មិនមែនទេ។ ជាឧទាហរណ៍ ខ្យល់អាចជាកម្លាំងដ៏ខ្លាំងដែលរុញទូកក្ដោងឲ្យទៅដល់ទីដៅរបស់វា។ ប៉ុន្តែខ្យល់មានកម្លាំងខុសៗគ្នាតាមពេលវេលា ហើយថ្ងៃខ្លះប្រហែលជាមិនមានខ្យល់ទាល់តែសោះ។ តើនេះមានន័យថាអ្នកបើកទូកមិនអាចបន្តដំណើរទៅមុខឬ? មិនតែងតែដូច្នេះទេ។ ជាឧទាហរណ៍ ទូកខ្លះមានម៉ាស៊ីន ទូកខ្លះទៀតមានចង្វា។ អ្នកបើកទូកអាចប្រើម៉ាស៊ីនឬចង្វាដើម្បីបន្តដំណើរទៅមុខឲ្យដល់ទីដៅរបស់គាត់។ បំណងចិត្តរបស់យើងអាចប្រៀបដូចជាខ្យល់។ ថ្ងៃខ្លះវាខ្លាំងជាងថ្ងៃផ្សេងទៀត ហើយថ្ងៃខ្លះយើងប្រហែលជាមិនចង់ខំព្យាយាមសម្រេចគោលដៅរបស់យើងទេ។ ដូច្នេះ បើសិនជាយើងព្យាយាមសម្រេចគោលដៅរបស់យើងតែពេលយើងមានបំណងចិត្តចង់ធ្វើប៉ុណ្ណោះ យើងប្រហែលជាមិនអាចសម្រេចគោលដៅនោះទេ។ ប៉ុន្តែដូចអ្នកបើកទូកព្យាយាមរកវិធីផ្សេងៗដើម្បីទៅដល់ទីដៅរបស់គាត់ យើងនៅតែអាចខំព្យាយាមសម្រេចគោលដៅរបស់យើង ទោះជាយើងមិនមានបំណងចិត្តធ្វើដូច្នេះក៏ដោយ។ ពិតមែន នេះប្រហែលជាមិនស្រួលទេ ប៉ុន្តែយើងនឹងសប្បាយរីករាយនៅពេលដែលយើងបានសម្រេចគោលដៅនោះ។ មុនយើងពិចារណាអំពីអ្វីដែលយើងអាចធ្វើដើម្បីសម្រេចគោលដៅ សូមយើងគិតពិចារណាអំពីសំណួរដែលយើងប្រហែលជាមាន។
៩. តើយើងគួរបន្តព្យាយាមសម្រេចគោលដៅណាមួយ ទោះជាយើងមិនមានចិត្តចង់ធ្វើដូច្នេះឬទេ? សូមពន្យល់។
៩ ព្រះយេហូវ៉ាចង់ឲ្យយើងបម្រើលោកដោយចិត្តសប្បាយនិងដោយស្ម័គ្រពីចិត្ត។ (ចសព. ១០០:២; ២កូ. ៩:៧) ដូច្នេះ តើយើងគួរបន្តខំឈានទៅដល់គោលដៅខាងកិច្ចបម្រើព្រះ បើយើងមិនមានបំណងប្រាថ្នាធ្វើដូច្នេះឬទេ? សូមគិតអំពីគំរូរបស់សាវ័កប៉ូល។ គាត់និយាយថា៖ «ខ្ញុំដាក់ទោសរូបកាយរបស់ខ្ញុំ ហើយបង្ខំឲ្យចុះចូលដូចខ្ញុំបម្រើ»។ (១កូ. ៩:២៥-២៧) ប៉ូលបានលត់ដំខ្លួនឲ្យធ្វើអ្វីដែលត្រឹមត្រូវ ទោះជាពេលគាត់ប្រហែលជាមិនមានចិត្តចង់ធ្វើដូច្នេះក្ដី។ តើព្រះយេហូវ៉ាពេញចិត្តនឹងកិច្ចបម្រើរបស់ប៉ូលឬទេ? ព្រះយេហូវ៉ាពេញចិត្តមែន ហើយលោកបានឲ្យរង្វាន់គាត់ចំពោះការខំប្រឹងរបស់គាត់។—២ធី. ៤:៧, ៨
១០. តើការព្យាយាមសម្រេចគោលដៅទោះជាយើងមិនសូវចង់ធ្វើក្ដី មានប្រយោជន៍អ្វីខ្លះ?
១០ ស្រដៀងគ្នាដែរ ព្រះយេហូវ៉ាពេញចិត្តពេលលោកឃើញយើងខំព្យាយាមសម្រេចគោលដៅរបស់យើង ទោះជាយើងមិនមានចិត្តចង់ធ្វើក៏ដោយ។ លោកពេញចិត្តដោយសារលោកដឹងថា ទោះជាយើងប្រហែលជាមិនតែងតែចូលចិត្តធ្វើកិច្ចការនោះក្ដី យើងធ្វើដោយសារយើងស្រឡាញ់លោក។ ដូចព្រះយេហូវ៉ាឲ្យពរដល់ប៉ូល លោកក៏នឹងឲ្យពរយើងចំពោះការខំប្រឹងរបស់យើងដែរ។ (ចសព. ១២៦:៥) ពេលយើងទទួលពរពីព្រះយេហូវ៉ា យើងប្រហែលជាអាចចាប់ផ្ដើមមានបំណងចិត្តកាន់តែខ្លាំងឡើង។ បងស្រីម្នាក់ឈ្មោះលូស៊ីណាពីប្រទេសប៉ូឡូញនិយាយថា៖ «ពេលខ្លះ ខ្ញុំមិនចង់ចេញទៅផ្សព្វផ្សាយទេ ជាពិសេសពេលខ្ញុំអស់កម្លាំង។ ប៉ុន្តែ អំណរដែលខ្ញុំទទួលក្រោយពីទៅផ្សព្វផ្សាយគឺជាអំណោយដ៏អស្ចារ្យ»។ សូមយើងពិចារណាអំពីអ្វីដែលយើងអាចធ្វើនៅពេលដែលយើងមិនសូវមានចិត្តចង់សម្រេចគោលដៅរបស់យើង។
១១. តើព្រះយេហូវ៉ាអាចជួយយើងឲ្យកាន់តែចេះទប់ចិត្តយ៉ាងដូចម្ដេច?
១១ ចូរអធិដ្ឋានឲ្យចេះទប់ចិត្ត។ ការចេះទប់ចិត្តគឺជាសមត្ថភាពគ្រប់គ្រងអារម្មណ៍និងការប្រព្រឹត្តរបស់ខ្លួន។ ពាក្យនេះច្រើនតែធ្វើឲ្យនឹកឃើញអំពីការឃាត់ខ្លួនឯងមិនឲ្យធ្វើអ្វីអាក្រក់។ ប៉ុន្តែយើងក៏ត្រូវចេះទប់ចិត្តដើម្បីធ្វើល្អដែរ ជាពិសេសបើកិច្ចការដែលយើងធ្វើគឺពិបាក ឬបើយើងមិនមានចិត្តចង់ធ្វើនោះ។ សូមចាំថាការចេះទប់ចិត្តជាលក្ខណៈមួយនៃផលដែលបង្កើតដោយឫទ្ធានុភាពរបស់ព្រះ ដូច្នេះសូមសុំឫទ្ធានុភាពពីព្រះយេហូវ៉ាដើម្បីជួយអ្នកបណ្ដុះឲ្យមានគុណសម្បត្តិដ៏សំខាន់នេះ។ (លូក. ១១:១៣; កាឡ. ៥:២២, ២៣) បងដាវីឌដែលបានត្រូវរៀបរាប់នៅខាងលើ ពន្យល់អំពីរបៀបដែលការអធិដ្ឋានបានជួយគាត់។ គាត់ចង់សិក្សាផ្ទាល់ខ្លួនឲ្យបានទៀងទាត់ជាង។ គាត់និយាយថា៖ «ខ្ញុំសុំព្រះយេហូវ៉ាជួយខ្ញុំបណ្ដុះឲ្យមានការចេះទប់ចិត្ត។ ដោយមានជំនួយពីលោក ខ្ញុំអាចចាប់ផ្ដើមមានកាលវិភាគសិក្សាល្អនិងជាទៀងទាត់»។
១២. តើតាមរបៀបណាអ្នកទូន្មាន ១១:៤ជួយយើងឲ្យសម្រេចគោលដៅរបស់យើង?
១២ ចូរកុំរង់ចាំឲ្យមានស្ថានភាពល្អឥតខ្ចោះឡើយ។ ក្នុងពិភពលោកនេះ យើងទំនងជានឹងគ្មានស្ថានភាពល្អឥតខ្ចោះទេ។ បើយើងរង់ចាំទាល់តែមានស្ថានភាពបែបនោះ យើងប្រហែលជានឹងមិនសម្រេចគោលដៅរបស់យើងទេ។ (សូមអាន អ្នកទូន្មាន ១១:៤) បងប្រុសម្នាក់ឈ្មោះដីនីយ៉ែលនិយាយថា៖ «គ្មានស្ថានភាពល្អឥតខ្ចោះទេ។ យើងបង្កើតស្ថានភាពល្អបំផុតពេលយើងចាប់ផ្ដើម»។ បងប្រុសម្នាក់ឈ្មោះផលនៅប្រទេសអ៊ូហ្គង់ដារៀបរាប់អំពីមូលហេតុផ្សេងទៀតដែលយើងមិនគួរបង្អែបង្អង់។ គាត់និយាយថា៖ «ពេលយើងចាប់ផ្ដើមទោះជាស្ថានភាពពិបាកក្ដី យើងបើកឱកាសឲ្យព្រះយេហូវ៉ាផ្ដល់ពរយើង»។—ម៉ាឡ. ៣:១០
១៣. តើការមានគោលដៅតូចៗនៅដើមដំបូងមានប្រយោជន៍អ្វីខ្លះ?
១៣ ជាដំបូង ចូរកំណត់គោលដៅតូចៗ។ យើងប្រហែលជាមិនសូវមានចិត្តចង់សម្រេចគោលដៅណាមួយទេ ដោយសារនោះមើលទៅពិបាកសម្រេចណាស់។ បើនេះជាបញ្ហារបស់អ្នក តើអ្នកអាចបែងចែកគោលដៅនោះឲ្យទៅជាគោលដៅតូចៗឬទេ? បើគោលដៅរបស់អ្នកគឺបណ្ដុះឲ្យមានគុណសម្បត្តិណាមួយ ប្រហែលជាដំបូងអ្នកអាចខំប្រឹងបង្ហាញគុណសម្បត្តិនោះតាមរយៈការប្រព្រឹត្តតូចតាច។ បើគោលដៅរបស់អ្នកគឺអានគម្ពីរទាំងមូល តើអ្នកអាចចាប់ផ្ដើមដោយកំណត់ពេលខ្លីៗដើម្បីអានគម្ពីរឬទេ? បងតូម៉ាសដែលបានត្រូវរៀបរាប់នៅដើមដំបូង ពិបាកសម្រេចគោលដៅរបស់គាត់អំពីការអានគម្ពីរទាំងមូលក្នុងមួយឆ្នាំ។ គាត់និយាយថា៖ «ខ្ញុំទទួលស្គាល់ថាខ្ញុំបានកំណត់គោលដៅដែលតម្រូវឲ្យខ្ញុំអានលឿនពេក។ ដូច្នេះ ខ្ញុំតាំងចិត្តព្យាយាមម្ដងទៀត ប៉ុន្តែលើកនេះខ្ញុំបានរៀបគម្រោងអានតែប៉ុន្មានវគ្គប៉ុណ្ណោះរាល់ថ្ងៃ និងរំពឹងគិតអំពីអ្វីទាំងនោះ។ ជាលទ្ធផល ខ្ញុំចាប់ផ្ដើមចូលចិត្តអានគម្ពីរ»។ កាលដែលបងតូម៉ាសកាន់តែចូលចិត្តអានគម្ពីរ គាត់កាន់តែចង់អានយូរជាង។ នៅទីបំផុត គាត់អានគម្ពីរចប់ទាំងមូល។ c
សូមកុំធ្លាក់ទឹកចិត្តបើមានឧបសគ្គ
១៤. តើយើងប្រហែលជាមានឧបសគ្គអ្វីខ្លះ?
១៤ គួរឲ្យស្ដាយណាស់ មិនថាយើងមានបំណងចិត្តយ៉ាងខ្លាំងឬបានអប់រំខ្លួនយ៉ាងល្អក្ដី យើងប្រហែលជានៅតែមានឧបសគ្គ។ ជាឧទាហរណ៍ «ហេតុការណ៍ដែលមិនបានរំពឹងទុក»ប្រហែលជាឆក់យកពេលវេលាដែលយើងត្រូវការដើម្បីសម្រេចគោលដៅរបស់យើង។ (អទ. ៩:១១) យើងប្រហែលជាជួបការពិបាកដែលធ្វើឲ្យយើងធ្លាក់ទឹកចិត្តនិងអស់កម្លាំង។ (សុភ. ២៤:១០) ដោយសារយើងជាមនុស្សមិនល្អឥតខ្ចោះ យើងប្រហែលជាធ្វើខុស ហើយនោះនាំឲ្យយើងកាន់តែពិបាកសម្រេចគោលដៅរបស់យើង។ (រ៉ូម ៧:២៣) ឬយើងប្រហែលជាល្វើយ។ (ម៉ាថ. ២៦:៤៣) តើអ្វីអាចជួយយើងឲ្យយកឈ្នះឧបសគ្គ?
១៥. ហេតុអ្វីអ្នកមិនគួរឈប់ព្យាយាម បើមានអ្វីកើតឡើងដែលធ្វើឲ្យអ្នកពិបាកសម្រេចគោលដៅរបស់អ្នក? (ចម្រៀងសរសើរព្រះ ១៤៥:១៤)
១៥ សូមចាំថាឧបសគ្គមិនមែនមានន័យថាអ្នកបានបរាជ័យទេ។ គម្ពីរចែងថាយើងប្រហែលជាជួបបញ្ហាឬការពិបាកម្ដងហើយម្ដងទៀត។ ប៉ុន្តែ គម្ពីរក៏បញ្ជាក់ដែរថាយើងអាចក្រោកឡើង ជាពិសេសដោយមានជំនួយពីព្រះយេហូវ៉ា។ (សូមអាន ចម្រៀងសរសើរព្រះ ១៤៥:១៤) បងហ្វីលីពដែលបានត្រូវរៀបរាប់នៅខាងលើនិយាយថា៖ «ខ្ញុំមិនផ្ដោតថាខ្ញុំដួលប៉ុន្មានដងទេ តែខ្ញុំផ្ដោតថាខ្ញុំបន្តខំប្រឹងទៅមុខប៉ុន្មានដងវិញ»។ បងដាវីឌដែលបានត្រូវរៀបរាប់នៅខាងលើនិយាយថា៖ «ខ្ញុំព្យាយាមចាត់ទុកឧបសគ្គថាជាឱកាសបង្ហាញព្រះយេហូវ៉ាថាខ្ញុំស្រឡាញ់លោកខ្លាំងណាស់ មិនមែនជាការបរាជ័យទេ»។ មែនហើយ ដោយបន្តព្យាយាមសម្រេចគោលដៅរបស់អ្នកទោះជាមិនស្រួលក្ដី អ្នកបង្ហាញព្រះយេហូវ៉ាថាអ្នកចង់ធ្វើឲ្យលោកពេញចិត្ត។ ព្រះយេហូវ៉ាច្បាស់ជាសប្បាយចិត្ត ពេលលោកឃើញអ្នកបន្តព្យាយាមសម្រេចគោលដៅរបស់អ្នក!
១៦. តើយើងអាចរៀនអ្វីពីឧបសគ្គ?
១៦ ចូរចាត់ទុកឧបសគ្គនោះថាជាមេរៀន។ សូមគិតអំពីអ្វីដែលបានកើតឡើង ហើយសួរខ្លួនថា ‹តើខ្ញុំអាចធ្វើអ្វីដើម្បីកុំឲ្យរឿងនោះកើតឡើងម្ដងទៀត?›។ (សុភ. ២៧:១២) តែជួនកាល ឧបសគ្គអាចបង្ហាញថាគោលដៅណាមួយគឺមិនសមហេតុសមផលដូចការគិតរបស់យើងទេ។ បើអ្នកគិតថាអ្នកប្រហែលជាស្ថិតនៅក្នុងកាលៈទេសៈនេះ សូមគិតឡើងវិញអំពីគោលដៅនោះដើម្បីដឹងថា តើនោះនៅតែសមហេតុសមផលចំពោះអ្នកឬយ៉ាងណា។ d ព្រះយេហូវ៉ានឹងមិនចាត់ទុកអ្នកថាបរាជ័យទេ បើអ្នកមិនសម្រេចគោលដៅដែលហួសពីសមត្ថភាពរបស់អ្នក។—២កូ. ៨:១២
១៧. ហេតុអ្វីយើងគួរចាំអំពីអ្វីដែលយើងបានសម្រេចរួចហើយ?
១៧ សូមចាំអំពីអ្វីដែលអ្នកបានសម្រេចរួចហើយ។ គម្ពីរចែងថា៖ «ព្រះមិនប្រព្រឹត្តដោយអយុត្ដិធម៌ ដោយបំភ្លេចការដែលអ្នករាល់គ្នាបានធ្វើ»ឡើយ។ (ហេ. ៦:១០) ដូច្នេះ អ្នកក៏មិនគួរភ្លេចដែរ។ សូមគិតអំពីអ្វីដែលអ្នកបានសម្រេចរួចហើយ។ ប្រហែលជាអ្នកបានបណ្ដុះឲ្យមានចំណងមិត្តភាពជាមួយព្រះយេហូវ៉ា ប្រាប់អ្នកឯទៀតអំពីលោក ឬបានទទួលការជ្រមុជទឹកជាដើម។ ដូចដែលអ្នកបានរីកចម្រើន ហើយបានសម្រេចគោលដៅក្នុងកិច្ចបម្រើព្រះនៅអតីតកាល អ្នកក៏អាចបន្តឈានទៅដល់ការសម្រេចគោលដៅរបស់អ្នកនៅឥឡូវនេះផងដែរ។—ភី. ៣:១៦
សូមអរសប្បាយកាលដែលអ្នកខំព្យាយាមសម្រេចគោលដៅ (សូមមើលវគ្គ១៨)
១៨. តើយើងគួរធ្វើអ្វីកាលដែលយើងឈានទៅដល់ការសម្រេចគោលដៅរបស់យើង? (សូមមើលរូបភាពផងដែរ)
១៨ ដោយមានជំនួយពីព្រះយេហូវ៉ា អ្នកអាចសម្រេចគោលដៅរបស់អ្នក ដូចអ្នកបើកទូកដែលសប្បាយចិត្តពេលទៅដល់ទីដៅរបស់គាត់។ ប៉ុន្តែ សូមចាំថាអ្នកបើកទូកជាច្រើននាក់ក៏សប្បាយនៅតាមផ្លូវកាលដែលធ្វើដំណើរឆ្ពោះទៅដល់ទីដៅនោះដែរ។ ស្រដៀងគ្នាដែរ សូមកុំភ្លេចអរសប្បាយពេលឃើញរបៀបដែលព្រះយេហូវ៉ាជួយនិងឲ្យពរអ្នក កាលដែលអ្នកបន្តខំឈានទៅរកគោលដៅរបស់អ្នកខាងកិច្ចបម្រើព្រះ។ (២កូ. ៤:៧) បើអ្នកមិនឈប់ព្យាយាម អ្នកនឹងទទួលពរដ៏វិសេសជាងនេះទៅទៀត។—កាឡ. ៦:៩
ចម្រៀងលេខ១២៦ ត្រូវដឹងខ្លួន រឹងមាំ ហើយខ្លាំងក្លា
a ជាញឹកញាប់ អង្គការព្រះយេហូវ៉ាលើកទឹកចិត្តយើងឲ្យកំណត់គោលដៅក្នុងកិច្ចបម្រើព្រះ។ ប៉ុន្តែចុះយ៉ាងណា បើយើងបានកំណត់គោលដៅល្អមួយរួចហើយ តែយើងពិបាកសម្រេចគោលដៅនោះ? អត្ថបទនេះនឹងមានយោបល់ខ្លះអំពីរបៀបដែលយើងអាចសម្រេចគោលដៅរបស់យើង។
b ការពន្យល់ពាក្យ៖ គោលដៅក្នុងកិច្ចបម្រើព្រះអាចរួមបញ្ចូលអ្វីណាក៏ដោយដែលអ្នកខំព្យាយាមសម្រេចឬធ្វើឲ្យបានល្អប្រសើរជាង ដើម្បីអ្នកអាចបម្រើព្រះយេហូវ៉ាបានច្រើនជាងនិងធ្វើឲ្យលោកពេញចិត្ត។ ជាឧទាហរណ៍ អ្នកប្រហែលជាកំណត់គោលដៅបណ្ដុះគុណសម្បត្តិជាគ្រិស្តសាសនិក ឬរីកចម្រើនក្នុងផ្នែកណាមួយនៃការគោរពប្រណិប័តន៍ព្រះ ដូចជាការអានគម្ពីរ ការសិក្សាផ្ទាល់ខ្លួន ឬកិច្ចបម្រើផ្សាយ។
c សូមមើលអត្ថបទដែលមានចំណងជើងថា «តើអ្វីខ្លះនឹងធ្វើឲ្យលោកអ្នកចូលចិត្តអានគម្ពីរ?»ក្នុងទស្សនាវដ្ដីប៉មយាម លេខ១ ឆ្នាំ២០១៧។
d ដើម្បីបានព័ត៌មានថែមទៀត សូមមើលអត្ថបទដែលមានចំណងជើងថា «ចូរបំពេញតាមគោលដៅរបស់អ្នក ដើម្បីលើកតម្កើងព្រះដែលជាអ្នកបង្កើត» ក្នុងទស្សនាវដ្ដីប៉មយាម ថ្ងៃទី១៥ ខែកក្កដា ឆ្នាំ២០០៤។
