ការកែប្រែពិភពលោក
ក្រោមរាជាណាចក្រព្រះ «សេចក្ដីសុខនឹងមានជាបរិបូរ»
យើងទន្ទឹងរង់ចាំរាជាណាចក្រព្រះមកដល់អស់រយៈពេលជាយូរ។ តែមិនយូរទៀតរដ្ឋាភិបាលដែលបានត្រូវស្ថាបនាដោយព្រះ ពោលគឺរាជាណាចក្រព្រះនឹងធ្វើឲ្យមនុស្សជាតិរស់នៅជាមួយគ្នាដោយសុខសាន្តនិងសាមគ្គីភាព។ ដូចនៅចម្រៀងសរសើរព្រះ ៧២:៧ បានសន្យាថា៖ «សេចក្ដីសុខនឹងមានជាបរិបូរ»។ ប៉ុន្តែ តើរាជាណាចក្រព្រះនឹងចាប់ផ្ដើមគ្រប់គ្រងមកលើផែនដីនៅពេលណា? តើនឹងកើតឡើងយ៉ាងដូចម្ដេច? ម្យ៉ាងទៀត តើអ្នកអាចទទួលប្រយោជន៍យ៉ាងណាពីការគ្រប់គ្រងនៃរាជាណាចក្រព្រះ?
តើរាជាណាចក្រព្រះនឹងចាប់ផ្ដើមគ្រប់គ្រងមកលើផែនដីនៅពេលណា?
គម្ពីរបានប្រាប់ទុកជាមុនអំពីព្រឹត្តិការណ៍ដ៏តក់ស្លុតជាច្រើនដែលបញ្ជាក់ថារាជាណាចក្ររបស់ព្រះជិតមកដល់ហើយ។ ព្រឹត្តិការណ៍ទាំងនោះគឺជា«សញ្ញាសម្គាល់»មួយ ដែលរួមមានសង្គ្រាមនៅទូទាំងពិភពលោក ការអត់ឃ្លាន រោគរាតត្បាត រញ្ជួយដីពីកន្លែងមួយទៅកន្លែងមួយ និងការប្រឆាំងច្បាប់កាន់តែច្រើន។—ម៉ាថាយ ២៤:៣, ៧, ១២; លូកា ២១:១១; ការបើកបង្ហាញ ៦:២-៨
ក្នុងគម្ពីរ ក៏ប្រាប់ទំនាយមួយទៀតដែរថា៖ «គ្រាចុងក្រោយបង្អស់នឹងលំបាកណាស់។ ព្រោះមនុស្សនឹងស្រឡាញ់តែខ្លួនឯង ស្រឡាញ់ប្រាក់ . . . មិនស្ដាប់បង្គាប់ឪពុកម្ដាយ រមិលគុណ គ្មានភក្ដីភាព គ្មានសេចក្ដីស្រឡាញ់តាមធម្មជាតិជាមនុស្ស មិនព្រមស្រុះស្រួលគ្នា ជាអ្នកបង្កាច់បង្ខូច មិនចេះទប់ចិត្ត កាចសាហាវ មិនស្រឡាញ់គុណធម៌ . . . មានមោទនភាពហួសហេតុពេក ស្រឡាញ់ការសប្បាយជាជាងស្រឡាញ់ព្រះ»។ (ធីម៉ូថេទី២ ៣:១-៤) តាំងពីយូរហើយ គឺតែងតែមានមនុស្សខ្លះដែលមានលក្ខណៈអាក្រក់ទាំងនេះ តែសព្វថ្ងៃមនុស្សភាគច្រើនមានលក្ខណៈបែបនេះ។
ទំនាយទាំងនោះចាប់ផ្ដើមក្លាយជាការពិតនៅឆ្នាំ១៩១៤។ ម្យ៉ាងវិញទៀត ប្រវត្ដិវិទូ អ្នកនយោបាយ និងអ្នកនិពន្ធបានរៀបរាប់អំពីការផ្លាស់ប្ដូររបស់ពិភពលោកបន្ទាប់ពីឆ្នាំនោះ។ ជាឧទាហរណ៍ ភីធើ ម៉ាងដែលជាប្រវត្ដិវិទូជនជាតិដាណឺម៉ាក បានសរសេរថា៖ «ការផ្ទុះសង្គ្រាមនៅឆ្នាំ១៩១៤ បានផ្លាស់ប្ដូរប្រវត្ដិសាស្ត្ររបស់មនុស្សជាតិយ៉ាងខ្លាំង។ មុនឆ្នាំនោះ មនុស្សគិតថាស្ថានភាពពិភពលោកនឹងល្អប្រសើរទៅៗ . . . តែបែរជាមានព្រឹត្តិការណ៍អាក្រក់ៗ ភាពតក់ស្លុត ការស្អប់គ្នា និងអសន្ដិសុខគ្រប់ទីកន្លែង»។
មានពាក្យស្លោកមួយថាក្រោយភ្លៀងមេឃស្រឡះ។ ដូចគ្នាដែរ ព្រឹត្តិការណ៍ផ្សេងៗដែលបានកើតឡើងបង្ហាញថារាជាណាចក្រព្រះជិតគ្រប់គ្រងលើផែនដី ហើយនឹងធ្វើឲ្យមានស្ថានភាពសុខសាន្តលើផែនដី។ តាមពិត លោកយេស៊ូក៏មានប្រសាសន៍អំពីសញ្ញាសម្គាល់មួយទៀតនៃទីបញ្ចប់ដែរ ដោយថា៖ «ដំណឹងល្អនេះអំពីរាជាណាចក្រនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ រួចទីបញ្ចប់នឹងមកដល់»។—ម៉ាថាយ ២៤:១៤
ដំណឹងល្អនោះគឺជាប្រធានបទសំខាន់ដែលសាក្សីព្រះយេហូវ៉ាកំពុងផ្សព្វផ្សាយ។ តាមការពិត សៀវភៅសំខាន់ជាងគេរបស់ពួកគេគឺមានចំណងជើងថាទស្សនាវដ្ដីប៉មយាម ប្រកាសអំពីរាជាណាចក្ររបស់ព្រះយេហូវ៉ា។ ទស្សនាវដ្ដីនេះរៀបរាប់ជាច្រើនអំពីអ្វីៗដ៏អស្ចារ្យដែលរាជាណាចក្រព្រះនឹងធ្វើសម្រាប់មនុស្សជាតិនិងផែនដី។
តើរាជាណាចក្រព្រះនឹងគ្រប់គ្រងយ៉ាងដូចម្ដេច?
ដើម្បីឆ្លើយសំណួរនេះ សូមគិតអំពីកត្ដាសំខាន់ៗបួនយ៉ាងគឺ៖
-
១. រាជាណាចក្រព្រះនឹងមិនប្រើអ្នកដឹកនាំនយោបាយណាម្នាក់ក្នុងពិភពលោកនេះឡើយ។
-
២. អ្នកដឹកនាំនយោបាយក្នុងពិភពលោកនឹងមិនចង់បោះបង់អំណាចរបស់ខ្លួននោះទេ។ ពួកគេនឹងព្យាយាមប្រឆាំងនឹងរាជាណាចក្រព្រះ។ ការសម្រេចចិត្តនេះគឺមិនឈ្លាសវៃទេ។—ចម្រៀងសរសើរព្រះ ២:២-៩
-
៣. រាជាណាចក្រព្រះត្រូវតែបំផ្លាញនគរឬរដ្ឋាភិបាលដែលចង់បន្តមានអំណាចលើមនុស្សជាតិ។ (ដានីយ៉ែល ២:៤៤; ការបើកបង្ហាញ ១៩:១៧-២១) ចុងក្រោយ នឹងមានសង្គ្រាមនៅទូទាំងពិភពលោកដែលបានត្រូវហៅថាអាម៉ាគេដូន។—ការបើកបង្ហាញ ១៦:១៤, ១៦
-
៤. អស់អ្នកដែលសុខចិត្តចុះចូលក្រោមរាជាណាចក្រព្រះនឹងត្រូវសង្គ្រោះពីអាម៉ាគេដូន រួចចូលពិភពលោកថ្មីដ៏សុខសាន្ត។ គម្ពីរហៅពួកគេថា៖ «មនុស្សមួយក្រុមធំ» ដែលទំនងជាមានចំនួនរាប់លាននាក់។—ការបើកបង្ហាញ ៧:៩, ១០, ១៣, ១៤
តើអ្នកអាចទទួលប្រយោជន៍យ៉ាងណាពីការគ្រប់គ្រងនៃរាជាណាចក្រព្រះ?
ជំហានដំបូងដើម្បីចុះចូលក្រោមរាជាណាចក្រព្រះគឺការអប់រំ។ ម្យ៉ាងទៀត លោកយេស៊ូបានអធិដ្ឋានទៅព្រះ ដោយពោលថា៖ «អស់អ្នកដែលនឹងទទួលជីវិតដែលគ្មានទីបញ្ចប់ ត្រូវស្គាល់លោកដែលជាព្រះពិតតែមួយឲ្យបានច្បាស់ និងត្រូវស្គាល់យេស៊ូគ្រិស្តដែលលោកបានចាត់ឲ្យមក»។—យ៉ូហាន ១៧:៣
ពេលមនុស្សស្គាល់ច្បាស់ថាព្រះយេហូវ៉ាជាព្រះបែបណា ពួកគេនឹងទទួលប្រយោជន៍តាមរបៀបជាច្រើន។ សូមពិចារណាប្រយោជន៍ពីរ៖ ទី១ ពួកគេបណ្ដុះជំនឿមាំមួនទៅលើលោក។ ពួកគេមានជំនឿដោយមានទីសំអាង។ ជំនឿនោះធ្វើឲ្យពួកគេទុកចិត្តថារាជាណាចក្ររបស់ព្រះគឺពិតប្រាកដ ហើយថាការគ្រប់គ្រងនៃរាជាណាចក្រនោះគឺជិតមកដល់ហើយ។ (ហេប្រឺ ១១:១) ទី២ ពួកគេកាន់តែស្រឡាញ់ព្រះនិងអ្នកជិតខាង។ សេចក្ដីស្រឡាញ់ចំពោះព្រះជំរុញចិត្តពួកគេឲ្យស្ដាប់បង្គាប់លោកដោយស្ម័គ្រពីចិត្ត។ សេចក្ដីស្រឡាញ់ចំពោះអ្នកជិតខាងជំរុញចិត្តពួកគេឲ្យធ្វើតាមប្រសាសន៍របស់លោកយេស៊ូដែលច្រើនតែហៅថាគោលការណ៍ដ៏ល្បីល្បាញ។ គោលការណ៍នោះចែងថា៖ «ចូរប្រព្រឹត្តទៅលើអ្នកឯទៀត ដូចដែលអ្នកចង់ឲ្យពួកគេប្រព្រឹត្តមកលើអ្នកដែរ»។—លូកា ៦:៣១
ដូចឪពុកដែលប្រកបដោយសេចក្ដីស្រឡាញ់ អ្នកបង្កើតយើងតែងតែគិតពីប្រយោជន៍របស់យើង។ លោកចង់ឲ្យយើងទទួល«ជីវិតដ៏ពិតប្រាកដ» ជាអ្វីដែលគម្ពីរបានប្រាប់។ (ធីម៉ូថេទី១ ៦:១៩) ជីវិតសព្វថ្ងៃនេះមិនមែនជា«ជីវិតដ៏ពិតប្រាកដ»ទេ។ មនុស្សជាច្រើនលាននាក់មានជីវិតពិបាក ខំរស់ទាំងត្រដរ។ ដើម្បីសង្ខេបអំពី«ជីវិតដ៏ពិតប្រាកដ» សូមពិចារណាអំពីអ្វីដ៏អស្ចារ្យខ្លះដែលរាជាណាចក្រព្រះនឹងធ្វើសម្រាប់រាស្ត្រលោក។
ក្រោមការគ្រប់គ្រងនៃរាជាណាចក្រព្រះ មនុស្សនឹងមានសេចក្ដីសុខនិងសន្តិភាព ហើយពួកគេនឹងមានអាហារជាបរិបូរ
លោកអ្នកក៏ប្រហែលជាចូលចិត្តដែរ
សំណួរនិងចម្លើយពីគម្ពីរ
តើអ្វីជាសញ្ញាសម្គាល់នៃ«គ្រាចុងក្រោយបង្អស់» ឬ«ទីបញ្ចប់ពិភពលោក»?
គម្ពីរបានប្រាប់ទុកជាមុនអំពីព្រឹត្តិការណ៍ផ្សេងៗដែលរួមគ្នាជាសញ្ញាសម្គាល់នៃគ្រាចុងក្រោយបង្អស់។
សំណួរនិងចម្លើយពីគម្ពីរ
តើសង្គ្រាមអាម៉ាគេដូនជាអ្វី?
ពាក្យអាម៉ាគេដូនមានតែម្ដងគត់ក្នុងគម្ពីរ តែសង្គ្រាមនេះបានត្រូវលើកឡើងទាក់ទងនឹងសាច់រឿងទាំងមូលក្នុងគម្ពីរ។
