រដ្ឋាភិបាលមួយដែលនឹងកែប្រែស្ថានភាព
«នឹងមានសេចក្ដីសុខសាន្តជានិច្ច»
អង្គការសហប្រជាជាតិកំពុងលើកទឹកចិត្តមនុស្សគ្រប់រូបឲ្យចេះសហការគ្នា គោរពសិទ្ធិគ្នា និងការពារបរិស្ថាន។ ហេតុអ្វី? តាមការរៀបរាប់របស់ម៉ាហឺ ណាសឺក្នុងកំណត់ហេតុរបស់អង្គការសហប្រជាជាតិ ថា៖ «បម្រែបម្រួលអាកាសធាតុ ក្រុមឧក្រិដ្ឋជន ការកើនឡើងនៃភាពអយុត្ដិធម៌ ជម្លោះ ការបង្ខំមនុស្សជាច្រើនឲ្យរើទៅកន្លែងផ្សេង ភេរវកម្មទូទាំងពិភពលោក រោគរាតត្បាត និងបញ្ហាស្រដៀងនឹងនេះ កំពុងមានឥទ្ធិពលមកលើមនុស្សនៅគ្រប់ប្រទេស» (UN Chronicle)។
អ្នកខ្លះទៀតកំពុងលើកស្ទួយឲ្យមានរដ្ឋាភិបាលមួយដែលគ្រប់គ្រងពិភពលោក។ ពួកគេទាំងនោះរួមមានដានធីដែលជាទស្សនវិទូជនជាតិអ៊ីតាលី ជាអ្នកនិពន្ធ និងជាអ្នកនយោបាយ (១២៦៥-១៣២១) ព្រមទាំងអាល់បឺត អែនស្តែនដែលជាអ្នកប្រាជ្ញខាងរូបវិទ្យា (១៨៧៩-១៩៥៥)។ ដានធីជឿថាសន្តិភាពមិនអាចស្ថិតស្ថេរក្នុងពិភពលោកដែលបែកបាក់ខាងនយោបាយឡើយ។ គាត់បាននិយាយដោយដកស្រង់ប្រសាសន៍របស់លោកយេស៊ូថា៖ «រាជាណាចក្រណាដែលបែកបាក់ទាស់ប្រឆាំងគ្នា នឹងវិនាសទៅ»។—លូកា ១១:១៧
មិនយូរក្រោយពីសង្គ្រាមលោកលើកទី២ ដែលគេបានប្រើគ្រាប់បែកនុយក្លេអ៊ែរពីរគ្រាប់ អាល់បឺត អែនស្តែនបានសរសេរសំបុត្រមួយជូនដល់ទីស្នាក់ការធំនៃអង្គការសហប្រជាជាតិដោយបើកចំហ។ គាត់បាននិយាយថា៖ «អង្គការសហប្រជាជាតិត្រូវតែប្រញាប់ចាត់វិធានការធ្វើអ្វីទាំងអស់ដែលចាំបាច់ ដើម្បីបង្កើតឲ្យមានរដ្ឋាភិបាលពិតប្រាកដមួយដែលគ្រប់គ្រងពិភពលោក»។
ក៏ប៉ុន្តែ តើយើងអាចប្រាកដថាអ្នកនយោបាយដែលជាសមាជិកនៃរដ្ឋាភិបាលដ៏ខ្លាំងក្លានេះនឹងមិនពុករលួយ អយុត្ដិធម៌ និងសង្កត់សង្កិនឬទេ? ឬ តើពួកគេក៏មិនល្អដូចអ្នកគ្រប់គ្រងឯទៀតពីមុនដែរ? សំណួរទាំងនេះរំលឹកយើងអំពីពាក្យសម្ដីរបស់ប្រវត្ដិវិទូជនជាតិអង់គ្លេសម្នាក់ដែលថា៖ «ការកាន់អំណាចច្រើនតែនាំឲ្យបុគ្គលម្នាក់ទៅជាខូចអាក្រក់ ហើយការមានគ្រប់ទាំងអំណាចនាំឲ្យខូចអាក្រក់ទាំងស្រុង»។
ទោះជាយ៉ាងនេះក្ដី ដើម្បីឲ្យពិភពលោកមានសេចក្ដីសុខនិងសន្តិភាពពិតប្រាកដ យើងត្រូវតែមានសាមគ្គីភាព។ តែតើគោលដៅនេះអាចសម្រេចបានតាមរបៀបណា? តើនេះជាការសមហេតុផលទេ? គម្ពីរឆ្លើយថា មែន! គឺអាចសម្រេចបាន ហើយនឹងសម្រេច។ តើតាមរបៀបណា? គឺមិនមែនតាមរយៈរដ្ឋាភិបាលរបស់ពិភពលោកដែលជាអ្នកនយោបាយខូចអាក្រក់នោះទេ។ ផ្ទុយទៅវិញ គឺនឹងសម្រេចតាមរយៈរដ្ឋាភិបាលមួយដែលព្រះជាអ្នកស្ថាបនា។ បន្ថែមទៅទៀត រដ្ឋាភិបាលនោះនឹងបង្ហាញអំពីសិទ្ធិគ្រប់គ្រងរបស់ព្រះលើអ្វីៗទាំងអស់ដែលលោកបានបង្កើត។ តើរដ្ឋាភិបាលនោះជាអ្វី? គម្ពីរហៅថា៖ «រាជាណាចក្ររបស់ព្រះ»។—លូកា ៤:៤៣
«សូមឲ្យរាជាណាចក្ររបស់លោកបានមកដល់»
ពេលលោកយេស៊ូគ្រិស្តបានមានប្រសាសន៍ក្នុងសេចក្ដីអធិដ្ឋានគំរូរបស់លោក លោកបានគិតអំពីរាជាណាចក្រព្រះ ដោយពោលថា៖ «សូមឲ្យរាជាណាចក្ររបស់លោកបានមកដល់។ សូមឲ្យបំណងប្រាថ្នារបស់លោកបានសម្រេចនៅផែនដី»។ (ម៉ាថាយ ៦:៩, ១០) មែនហើយ រាជាណាចក្រព្រះនឹងធ្វើឲ្យប្រាកដថាបំណងប្រាថ្នារបស់ព្រះនឹងបានសម្រេចនៅផែនដី មិនមែនបំណងប្រាថ្នារបស់មនុស្សដែលលោភលន់ចង់បានអំណាច ឬគិតតែប្រយោជន៍ផ្ទាល់ខ្លួននោះទេ។
រាជាណាចក្ររបស់ព្រះក៏បានត្រូវហៅថា៖ «រាជាណាចក្រស្ថានសួគ៌»។ (ម៉ាថាយ ៥:៣) ហេតុអ្វី? រាជាណាចក្រព្រះនឹងគ្រប់គ្រងមកលើផែនដី មិនមែនគ្រប់គ្រងពីផែនដីទេ តែនឹងគ្រប់គ្រងពីស្ថានសួគ៌។ សូមគិតអំពីអត្ថន័យ។ រដ្ឋាភិបាលនេះនឹងមិនតម្រូវជាលុយឬទ្រព្យសម្បត្តិដើម្បីគាំទ្រឡើយ។ មនុស្សជាតិដែលនៅក្រោមការគ្រប់គ្រងរបស់រាជាណាចក្រព្រះនឹងធូរស្រាលក្នុងចិត្តយ៉ាងណាទៅ!
ពាក្យ«រាជាណាចក្រ»បញ្ជាក់ថា រាជាណាចក្ររបស់ព្រះគឺជារាជរដ្ឋាភិបាល។ រាជាណាចក្រនោះមានស្ដេច ពោលគឺលោកយេស៊ូគ្រិស្តដែលបានទទួលអំណាចពីព្រះ។ ស្ដីអំពីលោកយេស៊ូ គម្ពីរចែងថា៖
- «អំណាចគ្រប់គ្រងនឹងនៅលើស្មាគាត់។ . . . ចាប់ពីពេលនោះទៅ អំណាចគ្រប់គ្រងរបស់គាត់នឹងថ្កុំថ្កើងជារៀងរហូត ហើយ . . . នឹងមានសេចក្ដីសុខសាន្តជានិច្ច»។—
-
«គាត់បានទទួលអំណាចគ្រប់គ្រង កិត្តិយស និងរាជាណាចក្រមួយ។ ហេតុនេះ មនុស្សទាំងអស់ដែលមកពីគ្រប់ជាតិសាសន៍គ្រប់ភាសាត្រូវបម្រើគាត់។ អំណាចគ្រប់គ្រងរបស់គាត់នឹងមិនសាបសូន្យទេ»។—ដានីយ៉ែល ៧:១៤
-
«រាជាណាចក្រនៃពិភពលោកនេះបានក្លាយទៅជារាជាណាចក្រនៃម្ចាស់របស់យើង[ព្រះ]និងគ្រិស្តរបស់លោក»។—ការបើកបង្ហាញ ១១:១៥
ដូចក្នុងសេចក្ដីអធិដ្ឋានគំរូរបស់លោកយេស៊ូ រាជាណាចក្រព្រះនឹងសម្រេចគោលបំណងរបស់ព្រះទាំងស្រុងនៅផែនដី។ ក្រោមរាជាណាចក្រនោះ មនុស្សគ្រប់រូបនឹងរៀនអំពីរបៀបថែរក្សាផែនដីឲ្យល្អឡើងវិញម្ដងទៀតនិងពេញទៅដោយអ្វីៗដែលមានជីវិត។
សំខាន់បំផុត រាជាណាចក្រព្រះនឹងអប់រំរាស្ត្រដែលនៅក្រោមការគ្រប់គ្រង។ ពួកគេទាំងអស់នឹងរៀនអំពីខ្នាតតម្រាដូចគ្នា។ គ្មានការមិនចុះសម្រុង ឬការបែកបាក់គ្នាឡើយ។ អេសាយ ១១:៩ ចែងថា៖ «ពួកវានឹងមិនធ្វើទុក្ខ ឬបង្កគ្រោះថ្នាក់អ្វី . . . ព្រោះផែនដីនឹងពេញទៅដោយចំណេះរបស់ព្រះយេហូវ៉ា ដូចជាទឹកពេញពាសសមុទ្រដែរ»។
មនុស្សទាំងអស់នៅលើផែនដីនឹងមានសាមគ្គីភាព ហើយរស់នៅដោយសុខសាន្តជាមួយគ្នា ដូចអ្វីដែលអង្គការសហប្រជាជាតិខំសម្រេច។ ចម្រៀងសរសើរព្រះ ៣៧:១១ ប្រាប់ថា៖ «ពួកគេនឹងសប្បាយរីករាយយ៉ាងខ្លាំង ដោយសារមានសេចក្ដីសុខសាន្តជាបរិបូរ»។ ក្រោយមក យើងនឹងលែងឮពាក្យដូចជា«ឧក្រិដ្ឋកម្ម» «ការបំពុល» «ភាពក្រីក្រ» និង«សង្គ្រាម»ទៀត។ ប៉ុន្តែ តើនេះនឹងកើតឡើងនៅពេលណា? តើរាជាណាចក្ររបស់ព្រះនឹងចាប់ផ្ដើមគ្រប់គ្រងមកលើផែនដីទាំងមូលនៅពេលណា? តើនឹងកើតឡើងយ៉ាងដូចម្ដេច? ម្យ៉ាងទៀត តើតាមរបៀបណាយើងអាចទទួលប្រយោជន៍ពីការគ្រប់គ្រងនៃរាជាណាចក្រព្រះ? សូមពិចារណាជាមួយគ្នា។