ការបង្ហាញការគោរពចំពោះជីវិត
មូលហេតុដែលការបង្ហាញការគោរពចំពោះជីវិតគឺសំខាន់
ពេលយើងធ្វើអ្វីដែលប៉ះពាល់ដល់សុខភាពនិងសុវត្ថិភាពរបស់យើងនិងអ្នកឯទៀត នេះបញ្ជាក់ថាយើងមិនបង្ហាញការគោរពចំពោះជីវិតខ្លួននិងជីវិតអ្នកឯទៀតឡើយ។
-
ការជក់បារីមិនគ្រាន់តែបង្កឲ្យមានជំងឺមហារីកប៉ុណ្ណោះទេ តែក៏ធ្វើឲ្យរាងកាយរបស់យើងពិបាកទប់ទល់នឹងជំងឺមហារីកដែរ។ មនុស្សជាង៩០ភាគរយដែលបានស្លាប់ដោយសារជំងឺមហារីកសួត គឺបណ្ដាលមកពីការជក់បារី ឬស្រូបផ្សែងបារីពីអ្នកឯទៀត។
-
ការបាញ់រះគឺជាសោកនាដកម្មមួយដែលបន្សល់ទុកនូវការឈឺចាប់ដល់មនុស្សជាច្រើនជារៀងរាល់ឆ្នាំ។ សកលវិទ្យាល័យមួយ (Stanford University) បានរាយការណ៍ថា៖ «តាមការស្រាវជ្រាវបានបញ្ជាក់ថាក្រោយពីមានការបាញ់រះនៅសាលា អស់អ្នកដែលរួចរស់ជីវិតនៅតែមានបញ្ហាផ្លូវចិត្ត ទោះជារឿងនោះបានកន្លងទៅអស់ជាច្រើនឆ្នាំក៏ដោយ»។
-
អ្នកដែលបើកបរក្នុងអំឡុងពេលស្រវឹងស្រាឬក្រោយប្រើគ្រឿងញៀនអាចបង្កឲ្យមានគ្រោះថ្នាក់ដល់អ្នកដំណើរឯទៀត និងអ្នកធ្វើដំណើរថ្មើរជើង។ ពេលមនុស្សបង្ហាញថាពួកគេមិនអើពើនឹងជីវិតរបស់អ្នកឯទៀត នោះអាចនាំឲ្យមនុស្សក្នុងសហគមន៍របស់ពួកគេក្លាយទៅជាជនរងគ្រោះ។
អ្វីដែលអ្នកអាចធ្វើ
ការពារសុខភាពរបស់អ្នក។ គឺមិនយឺតពេលទេដើម្បីឲ្យអ្នកផ្ដាច់ទម្លាប់ដែលប៉ះពាល់ដល់សុខភាព ដូចជាការជក់បារី ការប្រើបារីអេឡិចត្រូនិក ការផឹកស្រាហួសប្រមាណ ឬការប្រើគ្រឿងញៀនជាដើម។ ទម្លាប់ទាំងនេះប៉ះពាល់ដល់ជីវិតរបស់អ្នកផ្ទាល់ ហើយមិនបង្ហាញការគោរពចំពោះជីវិតរបស់មនុស្សដែលនៅជុំវិញអ្នកទេ ដែលរួមបញ្ចូលសមាជិកក្រុមគ្រួសាររបស់អ្នក។
គិតអំពីសុវត្ថិភាពរបស់អ្នកនិងអ្នកឯទៀត។ ដើម្បីបង្ការកុំឲ្យមានគ្រោះថ្នាក់ផ្សេងៗ សូមថែទាំផ្ទះរបស់អ្នកឲ្យបានល្អ។ បើកបរដោយប្រុងប្រយ័ត្នហើយថែទាំយានជំនិះរបស់អ្នក។ កុំឲ្យអ្នកឯទៀតបង្ខិតបង្ខំអ្នកឲ្យធ្វើអ្វីដែលអាចបង្កឲ្យមានគ្រោះថ្នាក់ធ្ងន់ធ្ងរឬបណ្ដាលឲ្យស្លាប់ឡើយ។
បង្ហាញចិត្តសប្បុរសចំពោះអ្នកឯទៀត។ ការបង្ហាញការគោរពចំពោះជីវិតមានន័យថា យើងបង្ហាញចិត្តសប្បុរសចំពោះមនុស្សទាំងអស់ មិនថាពួកគេជាជនជាតិអ្វី មកពីប្រទេសណា ជាអ្នកមានឬក្រ ឬបានទទួលការអប់រំខ្ពស់ឬទាបក៏ដោយ។ ហេតុអ្វីការធ្វើដូច្នេះគឺសំខាន់? ដោយសារការរើសអើងនិងការស្អប់គ្នាគឺជាឫសគល់ដែលបង្កឲ្យមានអំពើហិង្សានិងសង្គ្រាមនៅលើពិភពលោក។
អ្វីដែលសាក្សីព្រះយេហូវ៉ាកំពុងធ្វើ
សាក្សីព្រះយេហូវ៉ាមានរបៀបរស់នៅដែលមានតុល្យភាព និងមិនធ្វើអ្វីដែលអាចបង្ខូចសុខភាព។ កម្មវិធីបង្រៀនគម្ពីររបស់យើងជួយមនុស្សឲ្យយកឈ្នះទម្លាប់អាក្រក់ផ្សេងៗដូចជាឆាប់ខឹង ប្រើប្រាស់គ្រឿងញៀន ឬជក់បារីជាដើម។
ក្នុងកិច្ចការសាងសង់របស់យើង យើងធ្វើតាមការណែនាំស្ដីអំពីសុវត្ថិភាពយ៉ាងដិតដល់។ អ្នកដែលស្ម័គ្រចិត្តជួយសាងសង់សាលប្រជុំ និងអគារផ្សេងៗដែលយើងប្រើដើម្បីជួយគាំទ្រកិច្ចការបង្រៀនគម្ពីរ បានត្រូវបង្ហាត់បង្រៀនឲ្យធ្វើការតាមរបៀបដែលមិននាំឲ្យមានគ្រោះថ្នាក់។ យើងពិនិត្យមើលអគាររបស់យើងជាទៀងទាត់ដើម្បីធ្វើឲ្យប្រាកដថាអគារនោះមានសុវត្ថិភាពស្របតាមច្បាប់ក្នុងតំបន់។
យើងផ្ដល់ជំនួយដល់អ្នកដែលជួបគ្រោះមហន្តរាយ។ ក្នុងអំឡុងពេល១២ខែថ្មីៗនេះ យើងផ្ដល់ជំនួយដល់ជនរងគ្រោះដោយសារគ្រោះមហន្តរាយដែលមានជាង២០០កន្លែងនៅទូទាំងពិភពលោក ហើយចំណាយលុយដែលយើងទទួលពីវិភាគទានស្ម័គ្រចិត្តអស់១២លានដុល្លារដើម្បីជួយពួកគាត់។
ពេលជំងឺអ៊ីបូឡាចាប់ផ្ដើមរីករាលដាលដល់ទ្វីបអាហ្វ្រិកខាងលិច (ឆ្នាំ២០១៤) និងដល់សាធារណរដ្ឋប្រជាធិបតេយ្យកុងហ្គោ (ឆ្នាំ២០១៨) យើងបានអប់រំប្រជាជនអំពីរបៀបទប់ស្កាត់ជំងឺរាតត្បាតដ៏គ្រោះថ្នាក់នេះ។ យើងចាត់អ្នកតំណាងឲ្យនិយាយទៅកាន់មនុស្សជាច្រើនអំពីប្រធានបទ«ការស្ដាប់បង្គាប់ជួយសង្គ្រោះជីវិត»។ យើងរៀបចំកន្លែងលាងដៃនៅខាងមុខច្រកចូលនៃកន្លែងគោរពប្រណិប័តន៍របស់យើង និងលើកបញ្ជាក់អំពីសារៈសំខាន់នៃការលាងដៃនិងវិធីបង្ការផ្សេងទៀត។
នៅប្រទេសសៀរ៉ាឡេអូន មានប៉ុស្តិ៍វិទ្យុមួយដែលបានផ្សាយសរសើរសាក្សីព្រះយេហូវ៉ាថាពួកគេជួយសាក្សីគ្នីគ្នា និងអ្នកដែលមិនមែនជាសាក្សីនៅក្នុងសហគមន៍ដើម្បីបង្ការកុំឲ្យឆ្លងវីរុសអ៊ីបូឡា។
កន្លែងលាងដៃនៅមុខសាលប្រជុំក្នុងអំឡុងពេលមានជំងឺអ៊ីបូឡានៅប្រទេសលីបេរីយ៉ាឆ្នាំ២០១៤។
a នៅមជ្ឈិមបូព៌ាសម័យបុរាណ តម្រូវការនេះបង្ហាញការយកចិត្តទុកដាក់ចំពោះសុវត្ថិភាពរបស់ក្រុមគ្រួសារនិងអ្នកឯទៀត។
