សម្រាប់ប្ដីប្រពន្ធ
១ ការតាំងចិត្តរួមរស់ជាមួយគ្នា
តើមានន័យយ៉ាងណា?
ប្ដីប្រពន្ធដែលតាំងចិត្តរួមរស់ជាមួយគ្នា ចាត់ទុកចំណងអាពាហ៍ពិពាហ៍របស់ពួកគាត់ថាជាចំណងដ៏ស្ថិតស្ថេរ ហើយធ្វើឲ្យចំណងនោះពោរពេញទៅដោយភាពកក់ក្ដៅ។ ប្ដីឬប្រពន្ធមានទំនុកចិត្តថាគូរបស់គាត់នឹងស្មោះត្រង់ សូម្បីតែក្នុងពេលពិបាកក្ដី។
គូអាពាហ៍ពិពាហ៍ខ្លះបង្ខំចិត្តរួមរស់ជាមួយគ្នាគឺដោយសារតែបំពេញចិត្តអ្នកដទៃឬសាច់ញាតិ។ ប៉ុន្តែគឺល្អជាង បើការតាំងចិត្តរួមរស់ជាមួយគ្នាគឺមកពីប្ដីប្រពន្ធស្រឡាញ់និងគោរពគ្នាទៅវិញទៅមក។
គោលការណ៍គម្ពីរ៖ «ប្ដីមិនគួរចាកចោលប្រពន្ធឡើយ»។—កូរិនថូសទី១ ៧:១១
បុរសម្នាក់ឈ្មោះមីកានិយាយថា៖ «បើអ្នកតាំងចិត្តរួមរស់ជាមួយគ្នា នោះអ្នកនឹងមិនឆាប់ទើសចិត្តទេ។ តែអ្នកឆាប់អភ័យទោស ហើយឆាប់និយាយសុំទោស។ អ្នកចាត់ទុកបញ្ហាក្នុងចំណងអាពាហ៍ពិពាហ៍ជាឧបសគ្គ មិនមែនជាផ្លូវដែលនាំទៅដល់ការលែងលះគ្នានោះទេ»។
ហេតុអ្វីសំខាន់?
ពេលជួបប្រទះនឹងបញ្ហា គូដែលមិនតាំងចិត្តរួមរស់ជាមួយគ្នាទំនងជាឆាប់សន្មតថា ‹យើងមិនសាកសមនឹងគ្នាទេ› ហើយរកវិធីដើម្បីចែកផ្លូវគ្នា។
ស្ត្រីម្នាក់ឈ្មោះជីននិយាយថា៖ «គូជាច្រើនរៀបការជាមួយគ្នាដោយគិតថាបើពួកគេមិនអាចរស់នៅជាមួយគ្នាដោយមានសុភមង្គលទេ ពួកគេនឹងលែងលះគ្នា! ពេលប្ដីប្រពន្ធដែលរៀបការជាមួយគ្នាមានចិត្តគំនិតដូច្នេះ នោះមានន័យថាតាំងពីដំបូងពួកគេមិនបានតាំងចិត្តរួមរស់ជាមួយគ្នាទេ»។
អ្វីដែលអ្នកអាចធ្វើ
សូមពិសោធអំពីខ្លួនអ្នក
ពេលអ្នកកំពុងឈ្លោះប្រកែកជាមួយគូរបស់អ្នក . . .
-
តើអ្នកមានអារម្មណ៍ស្ដាយក្រោយដែលបានរៀបការជាមួយគូរបស់អ្នកឬទេ?
-
តើអ្នកស្រមើស្រមៃចង់នៅជាមួយអ្នកផ្សេងក្រៅពីគូឬទេ?
-
តើអ្នកប្រើពាក្យសម្ដីដូចជា «ខ្ញុំនឹងចុះចោល»ឬ«ខ្ញុំនឹងរកអ្នកថ្មីដែលស្រឡាញ់ខ្ញុំ»ឬទេ?
បើអ្នកឆ្លើយថាមែនចំពោះសំណួរមួយឬលើសពីនេះក្នុងចំណោមសំណួរទាំងនេះ នោះមានន័យថាអ្នកត្រូវពង្រឹងការតាំងចិត្តរបស់អ្នកដើម្បីបន្តរួមរស់ជាប្ដីប្រពន្ធ។
សូមពិភាក្សាជាមួយគូរបស់អ្នកអំពីសំណួរដូចតទៅនេះ
-
តើការតាំងចិត្តរបស់យើងក្នុងការរួមរស់ជាមួយគ្នាចុះខ្សោយឬទេ? បើមែន ហេតុអ្វី?
-
នៅឥឡូវនេះ តើយើងអាចធ្វើអ្វីខ្លះដើម្បីពង្រឹងការតាំងចិត្តរបស់យើងក្នុងការរួមរស់ជាប្ដីប្រពន្ធ?
យោបល់
-
ម្ដងម្កាល សរសេរសំបុត្រស្នេហាឲ្យគូរបស់អ្នក
-
បង្ហាញការតាំងចិត្តរបស់អ្នកដើម្បីរួមរស់ជាមួយគ្នាដោយដាក់តាំងរូបថតគូរបស់អ្នកនៅលើតុធ្វើការ
-
ទាក់ទងគូរបស់អ្នករាល់ថ្ងៃ ពេលអ្នកមិនធ្វើការជាមួយគ្នាឬមិននៅជាមួយគ្នា
គោលការណ៍គម្ពីរ៖ «កុំឲ្យអ្នកណាពង្រាត់គូដែលព្រះបានផ្សំផ្គុំឡើយ»។—ម៉ាថាយ ១៩:៦
