ចូរស្វែងរកជំនួយ
ចូរស្វែងរកជំនួយ
«បើមានខ្មាំងណាមក ដែលមានកំឡាំងជាង នោះ២នាក់នឹងអាចទប់ទល់បាន»។—សាស្ដា ៤:១២
ពេលយើងមានជំនួយពីអ្នកឯទៀត យើងអាចយកឈ្នះសត្រូវបាន មិនថាសត្រូវនោះជាអ្នកណា ឬជាអ្វីក៏ដោយ។ ដូច្នេះ បើអ្នកចង់ផ្ដាច់បារីអ្នកគួរតែសុំជំនួយពីក្រុមគ្រួសារនិងមិត្តភក្តិ ឬពីអ្នកឯទៀតដែលមានចិត្តអត់ធ្មត់ហើយចង់ជួយអ្នកយ៉ាងស្មោះ។
សូមស្វែងរកជំនួយពីអ្នកដែលបានផ្ដាច់បារីដោយជោគជ័យ ព្រោះពួកគេមិនគ្រាន់តែយល់អារម្មណ៍របស់អ្នកប៉ុណ្ណោះទេ ប៉ុន្តែពួកគេថែមទាំងអាចជួយអ្នកបានទៀតផង។ បងថូបេនដែលជាគ្រិស្តសាសនិកម្នាក់នៅប្រទេសដាណឺម៉ាកបាននិយាយថា៖«ជំនួយពីអ្នកឯទៀតពិតជាមានតម្លៃណាស់សម្រាប់ខ្ញុំ»។ អាប្រាហាំដែលរស់នៅប្រទេសឥណ្ឌាបានរៀបរាប់ថា៖«សេចក្ដីស្រឡាញ់យ៉ាងស្មោះពីក្រុមគ្រួសារនិងបងប្អូនរួមជំនឿ បានជួយខ្ញុំក្នុងការផ្ដាច់បារី»។ ប៉ុន្តែ ជួនកាលជំនួយពីក្រុមគ្រួសារនិងមិត្តភក្តិប៉ុណ្ណោះគឺមិនគ្រប់គ្រាន់ទេ។
បងប្រុសម្នាក់ឈ្មោះ បេកវ៉ាន់ដា ដែល«ធ្លាប់ជក់បារីអស់រយ:ពេល២៧ឆ្នាំ»បាននិយាយថា៖«ខ្ញុំសម្រេចចិត្តឈប់ជក់បារី ដោយសារខ្ញុំបានរៀនអ្វីដែលគម្ពីរប្រាប់អំពីទម្លាប់ស្មោកគ្រោក ហើយខ្ញុំក៏ឈប់ទាក់ទងជាមួយនឹងអ្នកដែលខ្ញុំធ្លាប់សេពគប់ដែរ។ ខ្ញុំបានទៅពិគ្រោះយោបល់ជាមួយនឹងអ្នកជំនាញ ប៉ុន្តែនៅតែគ្មានប្រសិទ្ធភាព។ ទីបំផុតនៅយប់មួយ ខ្ញុំបានអធិដ្ឋានទៅព្រះយេហូវ៉ាយ៉ាងអស់ពីចិត្ត អង្វរលោកឲ្យជួយខ្ញុំដើម្បីផ្ដាច់បារី ជាលទ្ធផលខ្ញុំអាចផ្ដាច់បារីបាន»។
អ្វីដ៏សំខាន់មួយទៀតដែលអ្នកត្រូវធ្វើ គឺត្រៀមខ្លួនសម្រាប់ឧបសគ្គដែលអ្នកប្រហែលជានឹងជួបប្រទះ។ តើឧបសគ្គទាំងនោះជាអ្វី? អត្ថបទបន្ទាប់នឹងពន្យល់អំពីរឿងនេះ។
[ប្រអប់]
តើអ្នកគួរប្រើថ្នាំជំនួយដើម្បីផ្ដាច់បារីទេ?
មនុស្សជាច្រើនប្រើថ្នាំជំនួយដើម្បីផ្ដាច់បារីដូចជា ថ្នាំនីកូទីនប្រភេទបិទលើស្បែកជាដើម។ មុនអ្នកសម្រេចចិត្តប្រើថ្នាំជំនួយ សូមពិចារណាសំណួរខាងក្រោមនេះ៖
តើវាផ្ដល់ប្រយោជន៍អ្វីខ្លះ? ការព្យាបាលជាច្រើនបានបង្ហាញថា វាអាចជួយកាត់បន្ថយចំណង់នៃការជក់បាន។ ប៉ុន្តែ នៅតែមានការជជែកវែកញែកខ្លះស្ដីពីផលប៉ះពាល់ដែលអាចមាននៅថ្ងៃអនាគត។
តើអាចមានគ្រោះថ្នាក់អ្វីខ្លះ? ថ្នាំខ្លះអាចមានផលប៉ះពាល់ដូចជា៖ក្អួតចង្អោរ មានជំងឺធ្លាក់ទឹកចិត្ត និងការចង់សម្លាប់ខ្លួនជាដើម។ សូមចាំថា ការប្រើថ្នាំជំនួយដើម្បីផ្ដាច់បារី គឺគ្រាន់តែជាវិធីផ្សេងប៉ុណ្ណោះ ក្នុងការស្រូបយកជាតិនីកូទីនចូលក្នុងរាងកាយ។ ដូច្នេះ បុគ្គលដែលប្រើថ្នាំទាំងនេះនៅតែញៀន។
តើមានវិធីផ្សេងដើម្បីជួយឲ្យផ្ដាច់បារីទេ? យោងតាមការស្ទង់មតិមួយ ៨៨%អ្នកដែលបានផ្ដាច់បារីដោយជោគជ័យ ពួកគេបាននិយាយថា ពួកគេអាចផ្ដាច់បារីបានយ៉ាងលឿនដោយមិនត្រូវការជំនួយពីថ្នាំនោះទេ។