តើព្រះគម្ពីរអាចជួយយើងសព្វថ្ងៃនេះឬទេ?
តើព្រះគម្ពីរអាចជួយយើងសព្វថ្ងៃនេះឬទេ?
យុវបុរសម្នាក់បាននិយាយថា៖ «បើគិតអំពីព្រះគម្ពីរទាំងមូល ប្រហែលជា១ភាគរយគឺសមគួរនឹងអាន ប៉ុន្តែទាំងប៉ុន្មានទៀត គឺឥតទាក់ទងហើយហួសសម័យទៀតផង»។ មនុស្សជាច្រើនមុខជានឹងយល់ស្របជាមួយនឹងគាត់។ ថ្វីបើព្រះគម្ពីរបន្តលក់ដាច់ច្រើនជាងគេនៅទូទាំងពិភពលោក តែមនុស្សជាច្រើនលាននាក់មិនសូវយកចិត្តទុកដាក់នឹងព្រះគម្ពីរ ហើយឥតស្គាល់នឹងសេចក្ដីបង្រៀនព្រះគម្ពីរនោះទេ។
កាសែតអាល្លឺម៉ង់ឈ្មោះ ស៊ូតដូច្ឆេស ត្សែទុង ក្នុងការបោះពុម្ពផ្សាយនៅបុណ្យណូអែលនៅក្នុងឆ្នាំ១៩៩៦ នោះបានចែងថាព្រះគម្ពីរ«មានពួកអ្នកអានកាន់តែតិចឡើងៗ។ នៅក្នុងសម័យ‹ទំនើបនៃវិទ្យាសាស្ត្រ› និងការឥតទាក់ទងខាងសាសនាកាន់តែមានច្រើនឡើងៗ នោះចំពោះមនុស្សជាច្រើន ដំណើររឿងក្នុងព្រះគម្ពីរហាក់ដូចជាអ្វីដែលចម្លែកនិងពិបាកយល់ទៀតផង»។ ការស្ទង់មតិជាច្រើនបញ្ជាក់នូវសេចក្ដីរាយការណ៍នេះ។ ការស្រាវជ្រាវខ្លះបញ្ចេញឲ្យឃើញថាកូនក្មេងភាគច្រើន មិនទាំងដឹងច្បាស់ថាតើព្រះយេស៊ូជាអ្នកណាផង។ ក្នុងការស្ទង់មតិមួយ នោះមានមនុស្សតិចជាងពាក់កណ្ដាលនៃពួកដែលបានត្រូវសម្ភាសន៍ អាចរៀបរាប់នូវរឿងក្នុងព្រះគម្ពីរអំពីកូនបង្ហិនទ្រព្យ និងបុរសសាសន៍សាម៉ារីដ៏ជាអ្នកជិតខាងនោះ។
ប្រកាសនវត្ថុរបស់សាសនាប្រូតេស្តង់នៅប្រទេសស្វីសឈ្មោះ រេហ្វមាធើ ហ្វូរឹម ថ្លែងថានៅក្នុងប្រទេសស្វីសសេចក្ដីត្រូវការព្រះគម្ពីរ គឺមិនដូចពីមុនៗនោះទេ។ សូម្បីតែនៅក្នុងចំណោមពួកអ្នកដែលមានព្រះគម្ពីរក៏ដោយ ក៏ច្រើនតែទុកចោលនៅលើធ្នើរដែលប្រឡាក់សុទ្ធតែធូលីដីដែរ។ នៅក្នុងប្រទេសអង់គ្លេសស្ថានការណ៍នេះក៏មិនខុសគ្នាឡើយ។ យោងទៅតាមការស្ទង់មតិមួយ ទោះជាមនុស្សភាគច្រើនមានព្រះគម្ពីរមួយក្បាលក៏ដោយ តែមនុស្សភាគច្រើនមិនដែលអានទាល់តែសោះ។
ផ្ទុយទៅវិញ មនុស្សរាប់លាននាក់នៅទូទាំងពិភពលោក មានអារម្មណ៍ផ្សេងពីនោះអំពីព្រះគម្ពីរ។ ពួកគេចាត់ទុកព្រះគម្ពីរជាបន្ទូលរបស់ព្រះ ហើយរាប់ទុកជាមានតម្លៃហើយមានប្រយោជន៍ទៀតផង។ ហេតុដូច្នេះហើយ ពួកគេអានព្រះគម្ពីរជារឿយៗ។ យុវនារីម្នាក់បានសរសេរថា៖ «ខ្ញុំខំអានព្រះគម្ពីរមួយឬពីរជំពូកជារៀងរាល់ថ្ងៃ។ ខ្ញុំពេញចិត្តនឹងអានព្រះគម្ពីរណាស់»។ ពួកបុគ្គលបែបនេះយកចិត្តទុកដាក់នឹងអ្វីដែលព្រះគម្ពីរបង្រៀន ហើយគេខំប្រឹងអនុវត្តតាមឱវាទក្នុងព្រះគម្ពីរនៅក្នុងជីវិតរបស់គេ។ ពួកគេជឿថា ព្រះគម្ពីរអាចជួយពួកគេក្នុងពិភពលោកដ៏មានបញ្ហាសព្វថ្ងៃនេះ។
តើអ្នកមានមតិយ៉ាងណាដែរ? តើព្រះគម្ពីរមិនទាក់ទងនឹងសម័យទំនើបនេះឬ? ឬក៏តើព្រះគម្ពីរមានតម្លៃហើយមានប្រយោជន៍ទៅវិញនោះ? តើព្រះគម្ពីរអាចជួយយើងសព្វថ្ងៃនេះឬទេ?