ចូរស្ដាប់តាមសេចក្ដីព្រមាន!
ចូរស្ដាប់តាមសេចក្ដីព្រមាន!
ប៊ូង! នៅថ្ងៃទី៣ខែមិថុនា ឆ្នាំ១៩៩១ ភ្នំហ្វូចិននៅប្រទេសជប៉ុនបានផ្ទុះចេញឧស្ម័នភ្នំភ្លើងនិងផេះដោយរំពងឮខ្ទរខ្ទារយ៉ាងខ្លាំង កំអែលចំរុះធាតុដ៏ក្ដៅក្រៃលែងបានហូរចុះតាមជម្រាលភ្នំ។ ការផ្ទុះនេះបានសម្លាប់អស់មនុស្ស៤៣នាក់។ មនុស្សដែលស្ទើរតែមិនរួចរស់ជីវិតជាច្រើននាក់បានរងរបួសយ៉ាងខ្លាំងដោយត្រូវរលាក។ អ្នកខ្លះទៀតបានស្រែកថា៖ «ទឹក ទឹក សូមទឹក»។ អ្នកពន្លត់អគ្គីភ័យនិងប៉ូលិសបានរត់ចុះឡើងយ៉ាងវក់វីដើម្បីជួយសង្គ្រោះពួកគេ។
ប្រមាណពីរសប្ដាហ៍មុននឹងភ្នំនេះផ្ទុះ គេបានឃើញកំអែលភ្នំភ្លើងមួយដែលមានរាងក្រឡូមនៅកំពូលភ្នំហ្វូចិន។ ដូច្នេះអាជ្ញាធរនិងអ្នកស្រុកនោះបានចាំមើលដោយប្រុងប្រយ័ត្ន។ អស់ជាងមួយអាទិត្យមុនមហន្តរាយនោះ មានការជូនយោបល់ថាគួរតែរើចេញពីតំបន់នេះ។ មួយថ្ងៃមុនការផ្ទុះ ពួកប៉ូលិសបានសូមពួកអ្នកកាសែតកុំទៅតំបន់ដែលត្រូវហាមមិនឲ្យចូលនោះ។ យ៉ាងណាក៏ដោយ នៅរសៀលដែលប្រកបដោយអន្តរាយនោះ មនុស្ស៤៣នាក់បាននៅត្រង់តំបន់គ្រោះថ្នាក់នោះ។
ហេតុអ្វីបានជាមនុស្សជាច្រើននាក់ ហ៊ានប្រថុយចូលក្នុងតំបន់នោះឬក៏នៅទីនោះ? កសិករខ្លះដែលបានរើចេញពីផ្ទះ បានត្រឡប់ទៅវិញដើម្បីមើលទ្រព្យសម្បត្ដិនិងវាលស្រែរបស់គេ។ អ្នកស្រាវជ្រាវភ្នំភ្លើងបានខិតខំទៅជិតភ្នំភ្លើងបំផុតដែលអាចធ្វើទៅបាន ដើម្បីឲ្យអស់ចំណាប់អារម្មណ៍ខាងការសិក្សារបស់គេ។ អ្នកកាសែតមួយចំនួននិងអ្នកថតរូប បានហ៊ានឆ្លងព្រំដែនតំបន់ហាមឃាត់ ពីព្រោះគេចង់យកពត៌មានមុនគេបង្អស់អំពីសកម្មភាពភ្នំភ្លើង។ អ្នកបើកបរឡានតាក់ស៊ីបីនាក់ដែលត្រូវជួលដោយអ្នកកាសែត ក៏បាននៅទីនោះដែរ។ ពួកប៉ូលិសនិងអ្នកពន្លត់អគ្គីភ័យស្ម័គ្រចិត្តទៅធ្វើការនៅកន្លែងនោះ។ គេម្នាក់ៗបានមានហេតុផ្ទាល់ខ្លួន ក្នុងការចូលក្នុងតំបន់គ្រោះថ្នាក់ ហើយជាលទ្ធផល ពួកគាត់បានបាត់បង់នូវជីវិតរបស់ខ្លួន។
តើអ្នកនៅក្នុងតំបន់គ្រោះថ្នាក់ទេ?
ប្រហែលជាយើងទាំងអស់គ្នាមិនមែនរស់នៅជិតនឹងភ្នំភ្លើង ដែលមានសកម្មភាពទេ។ ក៏ប៉ុន្តែ ចុះយ៉ាងណាវិញបើសិនជាយើងកំពុងតែប្រឈមមុខនឹងមហន្តរាយមួយទូទាំងផែនដី ដែលនាំឲ្យយើងទាំងអស់គ្នាស្ថិតនៅក្នុងតំបន់គ្រោះថ្នាក់ រួមបញ្ចូលផែនដីយើងទាំងមូលផងដែរនោះ? សៀវភៅមួយដែលបានទៅជាប្រភពនៃពត៌មានខាងទំនាយ ព្រមានយើងពីមហន្តរាយទូទាំងពិភពលោកមួយ ដែលកំពុងតែមកដល់និងពណ៌នាអំពីមហន្តរាយនោះ ដោយចែងថា៖ «ថ្ងៃនឹងទៅជាងងឹត ខែនឹងលែងភ្លឺ អស់ទាំងផ្កាយនឹងធ្លាក់ចុះពីលើមេឃ ហើយអស់ទាំងអំណាចនៅលើមេឃនឹងត្រូវកក្រើករំពើក . . . គ្រប់ទាំងពូជមនុស្សនៅផែនដីនឹងគក់យំ»។ (ម៉ាថាយ ២៤:២៩, ៣០) នៅទីនេះរៀបរាប់អំពីព្រឹត្ដិការណ៍នៅលើមេឃ ដែលមានឥទ្ធិពលទូទាំងសកលលោក ហើយត្រូវពណ៌នាថានឹងមានអានុភាពទៅលើ«គ្រប់ទាំងពូជមនុស្ស»ទៀតផង។ បើនិយាយជារួម ទំនាយនេះទាក់ទងនឹងមហន្តរាយមួយ ដែលនឹងមានអានុភាពទៅលើយើងម្នាក់ៗ។
សៀវភៅនៃទំនាយដែលគួរទុកចិត្តនេះគឺជាព្រះគម្ពីរ។ គួរឲ្យចាប់អារម្មណ៍ណាស់ ដែលបរិបទនៃខគម្ពីរខាងលើនេះ បានពិពណ៌នាដ៏ល្អិតល្អន់ពីអ្វីដែលនឹងកើតឡើង មុនមហន្តរាយទូទាំងផែនដីនោះ។ ដូចជាកំអែលភ្នំភ្លើងដែលមានរាងក្រឡូមនិងសញ្ញាផ្សេងទៀតនៃភ្នំភ្លើង បានឲ្យអ្នកទទួលបន្ទុកនៅទីក្រុងស៊ីម៉ាបារ៉ា មានហេតុកំណត់ថានេះជាតំបន់គ្រោះថ្នាក់ នោះព្រះគម្ពីរក៏ឲ្យយើងនូវមូលហេតុ ដើម្បីចាំយាមយ៉ាងប្រុងប្រយ័ត្នហើយរៀបចំខ្លួនយើងជាស្រេចដើម្បីឲ្យរួចរស់ជីវិត។ យើងអាចរៀនគោលការណ៍មួយពីរឿងដែលធ្វើឲ្យខ្លោចផ្សានៅភ្នំហ្វូចិន ហើយយល់ដឹងពីភាពធ្ងន់ធ្ងរនៃអ្វីដែលស្ថិតនៅខាងមុខ។
[អ្នកផ្ដល់សិទ្ធិឲ្យប្រើរូបភាពនៅទំព័រ៣]
Yomiuri/Orion Press/Sipa Press