ពិភពលោកថ្មី—តើអ្នកនឹងនៅទីនោះឬទេ?
ពិភពលោកថ្មី—តើអ្នកនឹងនៅទីនោះឬទេ?
«គ្មានអ្វីសំរាប់គេ ដែលវិសេសជាងមានចិត្តរីករាយ ហើយរកបានសេចក្ដីល្អដល់ខ្លួនអស់វេលាដែលមានជីវិតរស់នៅនោះទេ ហើយការដែលគ្រប់មនុស្សបានស៊ីហើយផឹក ព្រមទាំងរីករាយដោយផលល្អ ដែលកើតពីអស់ទាំងការនឿយហត់របស់ខ្លួន នោះហើយជាអំណោយទាននៃព្រះទេ»។—សាស្ដា ៣:១២, ១៣
១. ហេតុអ្វីក៏យើងអាចមានគំនិតសុទិដ្ឋិនិយមអំពីពេលអនាគត?
មនុស្សជាច្រើនគិតថាព្រះដ៏មានព្រះចេស្ដាបំផុត គឺជាព្រះដ៏តឹងរ៉ឹងនិងកាច។ ប៉ុន្តែ ខបទគម្ពីរនៅខាងលើនេះជាសេចក្ដីពិតមួយ ដែលអ្នកនឹងរកឃើញក្នុងបន្ទូលរបស់ទ្រង់ ដែលបានបណ្ដាលឲ្យតែងមក។ នេះគឺសមស្របនឹងសេចក្ដីដែលថា ទ្រង់ជា‹ព្រះដ៏សប្បាយ› ហើយដែលទ្រង់បានដាក់ឪពុកម្ដាយទីមួយរបស់យើងក្នុងទីមនោរម្យលើផែនដី។ (ធីម៉ូថេទី១ ១:១១; លោកុប្បត្តិ ២:៧-៩) នៅពេលដែលយើងស្វែងរកការយល់ធ្លុះជ្រៅអំពីអនាគតដែលព្រះសន្យាសំរាប់រាស្ត្រទ្រង់ នោះយើងមិនគួរភ្ញាក់ផ្អើលទេ ដោយរៀនដឹងអំពីស្ថានភាពដែលនឹងនាំឲ្យយើងមានការសប្បាយរីករាយជាស្ថាពរនោះ។
២. តើមានអ្វីខ្លះដែលអ្នកទន្ទឹងចាំនោះ?
២ នៅក្នុងអត្ថបទមុននេះយើងបានពិនិត្យមើលនូវឃ្លាទាំងបីហើយ ដែលក្នុងនោះព្រះគម្ពីរទាយប្រាប់ទៅដល់បួនដងអំពី«ផ្ទៃមេឃថ្មី ហើយនឹងផែនដីថ្មី»។ (អេសាយ ៦៥:១៧) ការទាយដ៏ទុកចិត្តមួយក្នុងចំណោមបួនដងនោះ គឺបានកត់ទុកក្នុងវិវរណៈ ២១:១។ ខជាបន្តបន្ទាប់ប្រាប់ពីគ្រាដែលព្រះនឹងកែប្រែយ៉ាងធំ នូវស្ថានភាពលើផែនដីឲ្យបានប្រសើរជាង។ ទ្រង់នឹងបំបាត់ចោលនូវការយំសោក។ មនុស្សនឹងលែងស្លាប់ដោយសារអាយុចាស់ជរា ជម្ងឺ ឬគ្រោះថ្នាក់។ ការកាន់ទុក្ខ ការយំសោក និងការឈឺចាប់នឹងកន្លងបាត់ទៅ។ នេះជាការទន្ទឹងចាំដ៏រីករាយមែនហ្ន៎! ប៉ុន្តែ តើយើងអាចដឹងប្រាកដក្នុងចិត្តថានេះនឹងកើតឡើងឬទេ ហើយការទន្ទឹងចាំនេះអាចមានអានុភាពលើយើងយ៉ាងណានៅសព្វថ្ងៃនេះ?
មូលហេតុសំរាប់ទំនុកចិត្ត
៣. ហេតុអ្វីក៏យើងអាចទុកចិត្តលើសេចក្ដីសន្យារបស់ព្រះអំពីពេលអនាគត?
៣ ចូរកត់សម្គាល់នូវរបៀបដែលវិវរណៈ ២១:៥ ចែងជាបន្ត។ នេះគឺបានស្រង់បន្ទូលរបស់ព្រះ ដែលគង់លើរាជ្យបល្ល័ង្កនៅស្ថានសួគ៌ ទ្រង់មានបន្ទូលថា៖ «មើល! អញធ្វើទាំងអស់ឡើងជាថ្មី»។ សេចក្ដីសន្យានេះរបស់ព្រះ គឺប្រសើរជាងសេចក្ដីប្រកាសឯណាទៀតស្តីអំពីឯករាជ្យ ហើយគឺល្អជាងកម្រងច្បាប់សិទ្ធិឯកត្តជនបច្ចុប្បន្ននេះ និងល្អជាងមនោគតិសំរាប់អនាគតរបស់មនុស្សណាក៏ដោយ។ នេះជាសេចក្ដីដែលអាចទុកចិត្តទាំងស្រុង ដោយព្រះគម្ពីរចែងថាព្រះ«មិនចេះភូត»។ (ទីតុស ១:២) គួរឲ្យយល់ហើយ ដែលអ្នកប្រហែលជាមានអារម្មណ៍ថា យើងអាចផ្អាកសិន ដើម្បីអរសប្បាយនឹងសេចក្ដីសង្ឃឹមដ៏រីករាយនេះ ទាំងទុកចិត្តលើព្រះ។ ប៉ុន្តែ យើងមិនចាំបាច់ផ្អាកទេ ព្រោះមានរបស់ច្រើនទៀតឲ្យយើងរៀនអំពីអនាគតរបស់យើង។
៤, ៥. តើទំនាយអ្វីខ្លះក្នុងព្រះគម្ពីរដែលបានពិចារណាមើល ហើយដែលអាចបង្កើនទំនុកចិត្តរបស់យើងលើអ្វីដែលមាននៅខាងមុខនេះ?
៤ ចូរគិតពីអ្វីដែលអត្ថបទមុននេះបានស្ថាបនាហើយ ស្តីអំពីសេចក្ដីសន្យាក្នុងព្រះគម្ពីរអំពីផ្ទៃមេឃថ្មីហើយនិងផែនដីថ្មី។ អេសាយបានទាយអំពីរបបថ្មីនេះ ហើយទំនាយរបស់គាត់បានសម្រេច នៅពេលដែលពួកយូដាបានត្រឡប់ទៅស្រុកកំណើតរបស់គេវិញ ហើយបានស្ដារឡើងវិញនូវការថ្វាយបង្គំពិត។ (អែសរ៉ា ១:១-៣; ២:១, ២; ៣:១២, ១៣) ប៉ុន្តែ តើទំនាយរបស់អេសាយចង្អុលប្រាប់តែប៉ុណ្ណឹងទេឬ? ប្រាកដជាមិនអ៊ីចឹងទេ! អ្វីដែលគាត់បានទាយ នឹងត្រូវសម្រេចតាមរបៀបដ៏ធំធេងទៀតនៅពេលអនាគត។ ហេតុអ្វីក៏យើងសន្និដ្ឋានបែបនេះ? នេះគឺដោយព្រោះអ្វីដែលយើងអាននៅឯពេត្រុសទី២ ៣:១៣ និងវិវរណៈ ២១:១-៥។ ខទាំងនោះចង្អុលទៅផ្ទៃមេឃថ្មីហើយនិងផែនដីថ្មី ដែលនឹងនាំឲ្យមានប្រយោជន៍ដល់ពួកគ្រីស្ទានទូទាំងពិភពលោក។
៥ ដូចជាបានកត់សម្គាល់មុននេះ ព្រះគម្ពីរប្រើឃ្លា«ផ្ទៃមេឃថ្មី ហើយនឹងផែនដីថ្មី»បួនដង។ យើងបានពិចារណាមើលសេចក្ដីបីនេះហើយ និងបានមកដល់សេចក្ដីសន្និដ្ឋានដែលគួរឲ្យលើកទឹកចិត្ត។ ដោយបញ្ជាក់យ៉ាងចំៗព្រះគម្ពីរទាយប្រាប់ថា ព្រះនឹងកំទេចចោលនូវអំពើអាក្រក់ជួជាតិ និងបុព្វហេតុឯទៀតដែលធ្វើឲ្យមានទុក្ខវេទនា ហើយថារួចមកទ្រង់នឹងប្រទានពរថែមទៀតឲ្យមនុស្សក្នុងរបបថ្មីរបស់ទ្រង់ដែលបានសន្យាមកនោះ។
៦. តើទំនាយទីបួនដែលរៀបរាប់អំពី«ផ្ទៃមេឃថ្មី ហើយនឹងផែនដីថ្មី» ទាយប្រាប់អំពីអ្វី?
៦ ឥឡូវសូមឲ្យយើងពិនិត្យមើលនូវចំណុចចុងក្រោយ ស្តីអំពីសេចក្ដីដែលថា«ផ្ទៃមេឃថ្មី ហើយនឹងផែនដីថ្មី» គឺនៅអេសាយ ៦៦:២២-២៤ ដែលចែងថា៖ «ដែលផ្ទៃមេឃថ្មី ហើយនឹងផែនដីថ្មី ដែលអញនឹងបង្កើតឡើងនោះ នឹងស្ថិតស្ថេរនៅចំពោះអញជាយ៉ាងណា ព្រះយេហូវ៉ាទ្រង់មានបន្ទូលថា ពូជពង្សរបស់ឯង នឹងឈ្មោះឯងរាល់គ្នា ក៏នឹងស្ថិតស្ថេរនៅយ៉ាងនោះដែរ គ្រានោះ នឹងកើតមានដូច្នេះថា ចាប់តាំងពីថ្ងៃចូលខែ១ ដរាបដល់ថ្ងៃចូលខែ១ទៀត ហើយពីថ្ងៃឈប់សំរាក១ ដរាបដល់ថ្ងៃឈប់សំរាក១ទៀត នោះគ្រប់មនុស្សទាំងអស់នឹង មកក្រាបថ្វាយបង្គំនៅចំពោះអញ នេះជាព្រះបន្ទូលនៃព្រះយេហូវ៉ា គេនឹងចេញទៅមើលសាកខ្មោចរបស់មនុស្សទាំងប៉ុន្មាន ដែលបានបះបោរនឹងអញ ដ្បិតដង្កូវនៃខ្មោចទាំងនោះនឹងមិនស្លាប់ឡើយ ហើយភ្លើងក៏មិនចេះរលត់ដែរ សាកខ្មោចទាំងនោះនឹងបានជាទីខ្ពើមឆ្អើម ដល់អស់ទាំងមនុស្ស»។
៧. ហេតុអ្វីក៏យើងគួរតែសន្និដ្ឋានថា អេសាយ ៦៦:២២-២៤ នឹងមានការសម្រេចនៅគ្រាខាងមុខនេះ?
៧ ទំនាយនេះគឺបានសម្រេចទាក់ទងនឹងពួកយូដាក្នុងស្រុកកំណើតរបស់គេ ដែលបានស្ថាបនាឡើងវិញ ក៏ប៉ុន្តែនឹងមានការសម្រេចមួយទៀត។ ការសម្រេចនេះនឹងមានក្នុងគ្រាក្រោយមក ហួសពីពេលដែលសំបុត្រទីពីររបស់ពេត្រុសនិងវិវរណៈ បានត្រូវសរសេរមក ព្រោះរបស់ទាំងនេះបានចង្អុលទៅ‹ផ្ទៃមេឃថ្មី ហើយនិងផែនដីថ្មី›នៅពេលអនាគត។ យើងអាចទន្ទឹងចាំនូវការសម្រេចដ៏ធំនេះក្នុងរបបថ្មី។ សូមគិតមើលពីស្ថានភាពខ្លះៗ ដែលយើងអាចទន្ទឹងចាំពិសោធនោះ។
៨, ៩. (ក) តើក្នុងន័យណាដែលរាស្ត្ររបស់ព្រះនឹង«ស្ថិតស្ថេរ»? (ខ) ដែលទំនាយនេះថា ពួកអ្នកបំរើរបស់ព្រះយេហូវ៉ានឹងថ្វាយបង្គំ «ពីថ្ងៃចូលខែ១ ដរាបដល់ថ្ងៃចូលខែ១ទៀត ហើយពីថ្ងៃឈប់សំរាក១ ដរាបដល់ថ្ងៃឈប់សំរាក១ទៀត» នោះមានន័យអ្វី?
៨ វិវរណៈ ២១:៤បានបញ្ជាក់ថា សេចក្ដីស្លាប់នឹងលែងមានទៀត។ ខបទគម្ពីរនៅអេសាយ ៦៦ជំពូក៦៦ ក៏ឯកភាពនឹងនេះដែរ។ យើងអាចឃើញពីខ២២ ដែលព្រះយេហូវ៉ាជ្រាបថា ផ្ទៃមេឃថ្មីហើយនិងផែនដីថ្មី គឺនឹងមិនមែនជាអ្វីដ៏បណ្ដោះអាសន្ន ដែលមានរយៈពេលដ៏ខ្លីនោះទេ។ ម្យ៉ាងវិញទៀត រាស្ត្ររបស់ទ្រង់នឹងស៊ូទ្រាំ ក៏នឹង«ស្ថិតស្ថេរ»នៅពីមុខទ្រង់។ អ្វីដែលព្រះធ្លាប់បានធ្វើរួចមកហើយសំរាប់រាស្ត្រដ៏រើសតាំងរបស់ទ្រង់ នោះផ្ដល់ឲ្យយើងនូវមូលហេតុឲ្យមានទំនុកចិត្ត។ ពួកគ្រីស្ទានពិតបានប្រឈមមុខការបៀតបៀនយ៉ាងឃោរឃៅ សូម្បីការខំប្រឹងដើម្បីកំទេចពួកគេចោលផង។ (យ៉ូហាន ១៦:២; កិច្ចការ ៨:១) ប៉ុន្តែ សូម្បីតែពួកសត្រូវដ៏ខ្លាំងពូកែ ដូចជាអធិរាជរ៉ូម៉ាំង នីរ៉ូនិង អាដុល ហិត្លើ ក៏មិនអាចកំទេចចោលរាស្ត្រដ៏ស្មោះត្រង់របស់ព្រះ ដែលកាន់ព្រះនាមទ្រង់នោះឡើយ។ ព្រះយេហូវ៉ាបានរក្សាទុកក្រុមជំនុំនៃរាស្ត្ររបស់ទ្រង់ ហើយយើងអាចប្រាកដក្នុងចិត្តថា ទ្រង់នឹងធ្វើយ៉ាងណាឲ្យពួកគេនៅស្ថិតស្ថេរជានិច្ច។
៩ ស្រដៀងគ្នាដែរ អស់អ្នកដែលមានចិត្តស្មោះត្រង់ដល់ព្រះ ដែលមានចំណែកខាងផែនដីថ្មី ដ៏ជាសង្គមនៃពួកអ្នកថ្វាយបង្គំពិតក្នុងពិភពលោកថ្មី នោះពួកគេនិមួយៗនឹងនៅស្ថិតស្ថេរ ពីព្រោះពួកគេនឹងបន្តក្នុងការថ្វាយបង្គំបរិសុទ្ធដល់ព្រះដ៏ជាអ្នកបង្កើតនៃរបស់សព្វសារពើ។ ការថ្វាយបង្គំនេះនឹងមិនធ្វើឡើងដោយយូរៗម្ដង ឬដោយគ្មានរបៀបនោះទេ។ ក្រិត្យវិន័យរបស់ព្រះ ដែលបានផ្ដល់ឲ្យអ៊ីស្រាអែលតាមរយៈម៉ូសេ បានតម្រូវឲ្យមានការប្រព្រឹត្តជាក់លាក់នៅរៀងរាល់ខែ ដូចបានសម្គាល់ដោយព្រះចន្ទខ្នើត និងរៀងរាល់សប្ដាហ៍ ដូចបានសម្គាល់ដោយថ្ងៃឈប់សំរាក។ (លេវីវិន័យ ២៤:៥-៩; ជនគណនា ១០:១០; ២៨:៩, ១០; របាក្សត្រទី២ ២:៤) ដូច្នេះអេសាយ ៦៦:២៣ ចង្អុលប្រាប់អំពីការថ្វាយបង្គំព្រះដោយទៀងទាត់ ដែលមានជាបន្ត ពីសប្ដាហ៍មួយទៅសប្ដាហ៍មួយ និងពីខែមួយទៅខែមួយ។ លទ្ធិបដិសេធព្រះនិងការលាក់ពុតខាងសាសនា នឹងលែងមានទៀតនៅគ្រានោះ។ «គ្រប់មនុស្សទាំងអស់នឹងមកក្រាបថ្វាយបង្គំនៅចំពោះ»ព្រះយេហូវ៉ា។
១០. ហេតុអ្វីក៏អ្នកអាចប្រាកដក្នុងចិត្តថា ពិភពលោកថ្មីនឹងមិនត្រូវបង្ខូចជាអចិន្ត្រៃយ៍ដោយមនុស្សអាក្រក់នោះទេ?
១០ អេសាយ ៦៦:២៤ ធានារ៉ាប់រងយើងថា សន្ដិភាពនិងសេចក្ដីសុចរិតនៅផែនដីថ្មី នឹងគ្មានគ្រោះថ្នាក់ឡើយ។ មនុស្សអាក្រក់នឹងមិនធ្វើឲ្យខូចសេចក្ដីទាំងប៉ុន្មាននេះទេ។ សូមនឹកចាំថា ពេត្រុសទី២ ៣:៧ ចែងថានៅខាងមុខយើងនេះ គឺជា«ថ្ងៃជំនុំជំរះ . . . ហើយបំផ្លាញមនុស្សទមិលល្មើសចេញ»។ អស់អ្នកដែលនឹងស្លាប់គឺជាមនុស្សទមិលល្មើស។ មិនដូចសង្គ្រាមមនុស្សជាតិ ដែលមនុស្សគ្មានទោសទៅជាបានស្លាប់ច្រើនជាងពួកទាហានទៅវិញ នោះមនុស្សឥតទោសនឹងគ្មានគ្រោះថ្នាក់ឡើយ។ ចៅក្រមដ៏ឧត្តមធានារ៉ាប់រងយើងថា ថ្ងៃរបស់ទ្រង់នឹងជាថ្ងៃបំផ្លាញមនុស្សទមិលល្មើសចេញ។
១១. តើអេសាយបង្ហាញយ៉ាងណានូវអនាគតចំពោះអស់អ្នកដែលប្រឆាំងព្រះនិងការថ្វាយបង្គំរបស់ទ្រង់នោះ?
១១ ពួកអ្នកសុចរិតដែលនៅគង់វង្សនឹងឃើញថា ពាក្យទំនាយរបស់ព្រះនោះជាសេចក្ដីពិត។ ខ២៤ទាយប្រាប់ថា«សាកខ្មោចរបស់មនុស្សទាំងប៉ុន្មាន ដែលបានបះបោរនឹង»ព្រះយេហូវ៉ា នឹងធ្វើជាភស្តុតាងនៃការជំនុំជំរះរបស់ទ្រង់។ ពាក្យរបស់អេសាយដ៏ចំៗនេះ ប្រហែលជាគួរឲ្យភ្ញាក់ផ្អើល។ ប៉ុន្តែ នេះគឺសមតាមហេតុការណ៍ពិតក្នុងប្រវត្ដិសាស្ត្រ។ នៅខាងក្រៅកំផែងក្រុងយេរូសាឡិមពីបូរាណ គឺមានកន្លែងចាក់សំរាម ហើយយូរៗម្ដងនោះបោះសាកសពខ្មោចមនុស្សអាក្រក់ ដែលឥតសមទទួលនូវការកប់ក្នុងផ្នូរ។ * នៅទីនោះ ដង្កូវនិងភ្លើងដ៏ក្ដៅ មិនយូរប៉ុន្មានក៏នឹងកំទេចចោលនូវសំរាមនិងខ្មោចទាំងនោះ។ តាមមើលទៅ ពាក្យប្រៀបប្រដូចរបស់អេសាយ បង្ហាញនូវភាពផ្ដាច់ព្រ័ត្រនៃការជំនុំជំរះរបស់ព្រះយេហូវ៉ា លើពួកទមិលល្មើស។
អ្វីដែលទ្រង់បានសន្យា
១២. តើអេសាយបញ្ជាក់យ៉ាងណាទៀតស្តីអំពីជីវិតនៅក្នុងពិភពលោកថ្មី?
១២ វិវរណៈ ២១:៤ ប្រាប់យើងនូវអ្វីដែលនឹងលែងមានក្នុងរបបថ្មីខាងមុខ។ ប៉ុន្តែ តើនឹងមានអ្វីនៅពេលនោះ? តើជីវិតនឹងទៅជាយ៉ាងណា? តើយើងអាចមានពត៌មានណាដែលគួរឲ្យទុកចិត្តបានឬទេ? ត្រូវហើយ។ អេសាយ ៦៥ជំពូក៦៥ រៀបរាប់ជាទំនាយនូវស្ថានភាពដែលយើងនឹងមាន បើយើងមានការយល់ព្រមពីព្រះយេហូវ៉ាឲ្យរស់នៅក្នុងកាលដែលទ្រង់បង្កើតផ្ទៃមេឃថ្មីនិងផែនដីថ្មី ក្នុងន័យជាផ្ដាច់ព្រ័ត្រនោះ។ ពួកអ្នកដែលទទួលព្រះពរឲ្យមានចំណែកជាស្ថាពរក្នុងផែនដីថ្មី នឹងមិនទៅជាចាស់ ហើយក្រោយមកស្លាប់នោះទេ។ អេសាយ ៦៥:២០ ធានារ៉ាប់រងយើងថា៖ «ក៏នឹងលែងមានកូនតូចដែលរស់នៅតែប៉ុន្មានថ្ងៃ ឬមនុស្សចាស់ដែលមិនបានរស់នៅឲ្យពេញកំណត់អាយុ តទៅទៀត ដ្បិតអ្នកណាដែលស្លាប់ក្នុងអាយុ១០០ឆ្នាំ នោះគេនឹងរាប់ថា ជាក្មេងទេ ហើយមនុស្សបាបណាដែលរស់នៅត្រឹម១០០ឆ្នាំ នោះនឹងត្រូវបណ្ដាសាវិញ»។
១៣. តើអេសាយ ៦៥:២០ ធានារ៉ាប់រងយើងយ៉ាងណា ថារាស្ត្ររបស់ព្រះនឹងមានសុវត្ថិភាពនោះ?
១៣ នៅពេលដែលទំនាយនេះបានសម្រេចដំបូងលើពួកបណ្ដាជននៅសម័យអេសាយ នោះមានសេចក្ដីថាកូនង៉ានៅក្នុងស្រុកនឹងមានសុវត្ថិភាព។ គឺគ្មានពួកសត្រូវចូលមក ដូចជាពួកបាប៊ីឡូនធ្លាប់ធ្វើនោះទេ ដើម្បីហូតយកចេញនូវកូនក្មេងៗ ឬក៏ដើម្បីសម្លាប់ពួកបុរសពេញវ័យនោះ។ (របាក្សត្រទី២ ៣៦:១៧, ២០) នៅក្នុងពិភពលោកថ្មីខាងមុខនេះ មនុស្សនឹងមានសុវត្ថិភាព សន្ដិសុខ ហើយអាចកំសាន្តនឹងជីវិត។ បើបុគ្គលម្នាក់សម្រេចចិត្តទាស់នឹងព្រះ នោះគាត់នឹងមិនត្រូវឲ្យបន្តរស់នៅទេ។ ព្រះទ្រង់នឹងដកគាត់ចេញ។ ចុះយ៉ាងណាវិញ បើអ្នកមានបាបដ៏បះបោរនេះមានអាយុមួយរយឆ្នាំ? គាត់នឹងស្លាប់ដោយនៅ«ក្មេងទេ» បើប្រៀបធៀបនឹងជីវិតដ៏មិនចេះចប់នោះ។—ធីម៉ូថេទី១ ១:១៩, ២០; ធីម៉ូថេទី២ ២:១៦-១៩
១៤, ១៥. តើអ្នកអាចទន្ទឹងចាំនូវសកម្មភាពដ៏ល្អណា ដែលមានមូលដ្ឋានលើអេសាយ ៦៥:២១, ២២?
១៤ ជាជាងដៅបញ្ជាក់ពីរបៀបដែលពួកអ្នកធ្វើបាបដោយចេតនានឹងត្រូវដកចេញ នោះអេសាយបានរៀបរាប់ពីស្ថានភាពរស់នៅ ដែលនឹងមាននៅក្នុងពិភពលោកថ្មី។ ចូរអ្នកខំគិតថាខ្លួនអ្នកនៅក្នុងទស្សនីយភាពនេះ។ អ្វីដែលអ្នកប្រហែលជាឃើញដំបូង នោះគឺជារបស់ដែលត្រូវយកចិត្តទុកដាក់ជាធម្មតា។ អេសាយប្រាប់រឿងនោះក្នុងខ២១និង២២ ដែលថា៖ «មនុស្សនឹងសង់ផ្ទះ ហើយនឹងអាស្រ័យនៅផង ក៏នឹងដាំចំការទំពាំងបាយជូរ ហើយនឹងបរិភោគផលដែរ គេនឹងមិនសង់ រួចមានម្នាក់ទៀតអាស្រ័យនៅ ឬដាំ រួចមានម្នាក់ទៀតបរិភោគផលនោះឡើយ ដ្បិតអាយុរបស់រាស្ត្រអញនឹងបានវែងដូចជាអាយុនៃដើមឈើ ហើយពួករើសតាំងរបស់អញនឹងប្រើប្រាស់ការដែលដៃគេធ្វើជាយឺនយូរទៅ»។
១៥ បើអ្នកឥតមានបទពិសោធន៍ធ្វើការសាងសង់ឬមិនដែលថែរក្សាសួនច្បារទេ នោះទំនាយរបស់អេសាយបង្ហើបថា នឹងមានការអប់រំបង្ហាត់លោកអ្នក។ ប៉ុន្តែ តើអ្នកនឹងសុខចិត្តរៀនពីគ្រូដ៏មានសមត្ថភាព ប្រហែលជាអ្នកជិតខាងដ៏សប្បុរស ដែលសប្បាយចិត្តនឹងជួយអ្នកនោះទេ? អេសាយមិនបាននិយាយថា ផ្ទះរបស់អ្នកនឹងមានបង្អួចធំដែលគ្មានកញ្ចក់តែមានរបាំងពន្លឺ ដើម្បីឲ្យមានខ្យល់បក់ស្រួល ឬក៏បង្អួចដែលមានកញ្ចក់បិទជាប់ ដែលឲ្យអ្នកមើលឃើញនូវការផ្លាស់ប្ដូរខាងរដូវនោះទេ។ តើអ្នកនឹងសង់ផ្ទះរបស់អ្នកដោយមានដំបូលជ្រាល ដើម្បីបាំងភ្លៀងនិងទឹកកកឬ? ឬក៏តើធាតុអាកាសនាតំបន់នោះនាំឲ្យអ្នកសាងសង់ដំបូលរាប ដូចនៅឯបជ្ឈិមបូព៌ាប្រទេស ជាដំបូលដែលឲ្យអ្នករួបរួមជាមួយក្រុមគ្រួសាររបស់អ្នក ពេលទទួលអាហារនិងការសន្ទនាដ៏រីករាយនោះទេ?—ចោទិយកថា ២២:៨; នេហេមា ៨:១៦
១៦. ហេតុអ្វីក៏អ្នកអាចសង្ឃឹមថា ពិភពលោកថ្មីនឹងជាទីស្កប់ស្កល់ចិត្តជាអចិន្ត្រៃយ៍?
១៦ អ្វីដែលសំខាន់ជាងការដឹងចំណុចល្អិតល្អន់បែបនេះ គឺការដឹងថាអ្នកនឹងមានលំនៅរបស់ខ្លួន។ លំនៅនោះនឹងជារបស់ផងអ្នក មិនដូចសព្វថ្ងៃនេះទេ ពេលដែលអ្នកប្រហែលជាបានសាងសង់ ប៉ុន្តែរួចមក មនុស្សឯទៀតទទួលផលប្រយោជន៍ទៅវិញ។ អេសាយ ៦៥:២១ ក៏ចែងថាអ្នកនឹងដាំដំណាំហើយបរិភោគផលផ្លែ។ យ៉ាងច្បាស់ណាស់ នេះគឺសង្ខេបនូវស្ថានការណ៍ដែលមានទូទៅ។ អ្នកនឹងស្កប់ចិត្តយ៉ាងពេញលេញដោយការខំប្រឹងរបស់អ្នក គឺពីផលផ្លែនៃកិច្ចការរបស់ខ្លួន។ អ្នកនឹងអាចធ្វើការនោះដោយមានអាយុយ៉ាងយូរ «ដូចជាអាយុនៃដើមឈើ»។ នេះប្រាកដជាសមត្រឹមត្រូវតាមការពិពណ៌នាថា«ទាំងអស់ឡើងជាថ្មី»ហើយ!—ទំនុកដំកើង ៩២:១២-១៤
១៧. តើសេចក្ដីសន្យាអ្វី ដែលពិតជាលើកទឹកចិត្តឪពុកម្ដាយនានានោះ?
១៧ ប្រសិនបើអ្នកជាឪពុកឬម្ដាយ ពាក្យទាំងនេះនឹងមានអានុភាពដល់ចិត្តរបស់អ្នក ដែលថា៖ «គេនឹងមិនខំធ្វើជាឥតប្រយោជន៍ ឬបង្កើតមកឲ្យតែបានត្រូវវិនាសទៅនោះឡើយ ដ្បិតគេជាពូជនៃពួកដ៏មានពររបស់ព្រះយេហូវ៉ា ព្រមទាំងកូនដែលគេបង្កើតតទៅផង គ្រានោះ មុនដែលគេអំពាវនាវ នោះអញនឹងតបឆ្លើយ ហើយកាលគេកំពុងតែចេញសំដីនៅឡើយ នោះអញនឹងស្ដាប់ដែរ»។ (អេសាយ ៦៥:២៣, ២៤) តើអ្នកយល់ដឹងដោយបានពិសោធនូវការឈឺចាប់នៃ‹ការបង្កើតមកឲ្យតែបានត្រូវវិនាសទៅ›ឬទេ? យើងមិនចាំបាច់រៀបរាប់នូវបញ្ហាទាំងឡាយដែលកូនក្មេងអាចមាន ដែលនាំឲ្យឪពុកម្ដាយនិងអ្នកដទៃមានអន្តរាយនោះទេ។ អ្វីដែលទាក់ទងនឹងរឿងនេះ យើងក៏បានសង្កេតឃើញនូវឪពុកម្ដាយដែលជក់ស្លុងនឹងមុខរបររកស៊ី សកម្មភាព និងការកំសាន្តចិត្តរបស់ខ្លួន ដែលគេចំណាយពេលតែបន្ដិចបន្តួចនឹងកូនចៅរបស់គេ។ ផ្ទុយទៅវិញ ព្រះយេហូវ៉ាធានារ៉ាប់រងយើងថា ទ្រង់នឹងឮហើយតបឆ្លើយនឹងសេចក្ដីត្រូវការរបស់យើង ព្រមទាំងនឹកគិតជាមុនដើម្បីជួយយើងទៀតផង។
១៨. ហេតុអ្វីក៏អ្នកសង្ឃឹមថានឹងអាចកំសាន្តជាមួយសត្វទាំងឡាយក្នុងពិភពលោកថ្មី?
១៨ កាលដែលអ្នកកំពុងតែគិតអំពីអ្វីដែលអ្នកនឹងពិសោធក្នុងពិភពលោកថ្មី ចូរគិតអំពីទស្សនីយភាពនេះដែលពាក្យទំនាយរបស់ព្រះចែងថា៖ «ឯឆ្កែព្រៃ នឹងកូនចៀម វានឹងរកស៊ីជាមួយគ្នា ហើយសិង្ហនឹងស៊ីចំបើងដូចជាគោ ចំណែកពស់ វានឹងមានធូលីដីជាអាហារ សត្វទាំងឡាយនឹងមិនបៀតបៀន ឬបំផ្លាញអ្វីនៅគ្រប់ក្នុងស្រុកភ្នំបរិសុទ្ធរបស់អញទៀតឡើយ នេះជាព្រះបន្ទូលនៃព្រះយេហូវ៉ា»។ (អេសាយ ៦៥:២៥) ពួកវិចិត្រករបានខំប្រឹងគូរទស្សនីយភាពនេះ ប៉ុន្តែនេះមិនមែនជាការពិពណ៌នាមួយតាមមនោគតិ ដែលបង្កើតមកតាមតែចិត្តរបស់អ្នកវិចិត្រករប៉ុណ្ណោះនោះឡើយ។ ទស្សនីយភាពនេះនឹងទៅជាពិតប្រាកដ។ សន្ដិភាពនឹងមានជាបរិបូរក្នុងចំណោមមនុស្សលោក ហើយក៏នឹងមានភាពសុខសាន្តជាមួយសត្វផងដែរ។ ពួកអ្នកជីវសាស្ត្រជាច្រើននិងពួកអ្នកដែលស្រឡាញ់សត្វ ចំណាយពេលច្រើនឆ្នាំដើម្បីរៀនអំពីសត្វខ្លះៗ ឬពូជសត្វណាមួយតែម្ដង។ ផ្ទុយទៅវិញ សូមគិតពីអ្វីដែលអ្នកអាចរៀន ពេលដែលសត្វមិនត្រូវខ្លាចមនុស្សទៀត។ ពេលនោះអ្នកនឹងអាចទៅជិតបក្សាបក្សី និងសត្វល្អិតៗ ដែលមានទីលំនៅក្នុងព្រៃ ត្រូវហើយ អាចមើល អាចរៀនពីវាព្រមទាំងគាប់ចិត្តនឹងវា។ (យ៉ូប ១២:៧-៩) អ្នកនឹងអាចធ្វើអ៊ីចឹងដោយសុខសាន្ត ដោយឥតខ្លាចមានគ្រោះថ្នាក់ពីមនុស្សឬសត្វណាឡើយ។ ព្រះយេហូវ៉ាមានបន្ទូលថា៖ «សត្វទាំងឡាយនឹងមិនបៀតបៀន ឬបំផ្លាញអ្វីនៅគ្រប់ក្នុងស្រុកភ្នំបរិសុទ្ធរបស់អញទៀតឡើយ»។ នេះនឹងជាការផ្លាស់ប្ដូរយ៉ាងណាទៅហ្ន៎ ពីអ្វីដែលយើងឃើញនិងពិសោធនៅសព្វថ្ងៃនេះ!
១៩, ២០. ហេតុអ្វីក៏រាស្ត្ររបស់ព្រះគឺខុសប្លែកឆ្ងាយពីមនុស្សភាគច្រើននៅសព្វថ្ងៃនេះ?
១៩ ដូចបានរៀបរាប់មុននេះ មនុស្សមិនអាចទាយប្រាប់អំពីអនាគតដោយត្រឹមត្រូវទេ ថ្វីបើមានការខ្វល់ខ្វាយទូទៅ ដែលទាក់ទងនឹងសហស្សវត្សរ៍ថ្មីនេះ។ នេះធ្វើឲ្យមនុស្សមានចិត្តមួម៉ៅ វង្វេង ឬនៅក្នុងភាពអស់សង្ឃឹម។ ភីធើ អិមបឺលី ដែលជាចាងហ្វាងនៅឯមហាវិទ្យាល័យមួយនៅប្រទេសកាណាដា បានសរសេរថា៖ «[មនុស្សពេញវ័យ]ជាច្រើន ពេលឥឡូវនេះកំពុងតែប្រឈមមុខនឹងសំនួរដ៏សំខាន់អំពីអត្ថិភាព។ តើខ្ញុំជាអ្នកណា? តើខ្ញុំពិតជាកំពុងខំប្រឹងធ្វើអ្វី? តើអ្វីទៅជាកេរ្ដិ៍ដំណែល ដែលខ្ញុំចង់ទុកសំរាប់តំណក្រោយ? មកដល់មធ្យមត្រឹមអាយុនោះ ពួកគេពិបាកនឹងរកបានសេចក្ដីសុខសាន្ត ឬក៏អត្ថន័យក្នុងជីវិតរបស់គេណាស់»។
២០ អ្នកអាចយល់នូវហេតុអ្វីក៏ជាអ៊ីចឹងចំពោះមនុស្សជាច្រើន។ ពួកគេប្រហែលជាស្វែងរកតែសប្បាយនឹងជីវិត តាមរយៈការកំសាន្តឬការលំហែចិត្តកាយដ៏រំភើបណាមួយ។ ប៉ុន្តែ ពួកគេមិនដឹងថាមានអនាគតអ្វីទេ ដូច្នេះជីវិតទំនងជាគ្មានសារៈសំខាន់ សណ្ដាប់ធ្នាប់ ឬក៏អត្ថន័យដ៏ពិតនោះទេ។ ឥឡូវ សូមប្រៀបធៀបរឿងនោះនឹងទស្សនៈរបស់អ្នកអំពីជីវិត ដោយមានមូលដ្ឋានលើអ្វីដែលយើងបានពិនិត្យមើលនេះ។ អ្នកដឹងថា នៅក្នុងផ្ទៃមេឃថ្មីហើយនិងផែនដីថ្មីដែលព្រះយេហូវ៉ាបានសន្យាមកនេះ នោះយើងនឹងអាចមើលជុំវិញខ្លួន ហើយនិយាយចេញពីចិត្តយើងថា ‹ប្រាកដណាស់ ព្រះបានធ្វើទាំងអស់ឡើងជាថ្មីមែន!›។ យើងនឹងសប្បាយចិត្តណាស់ហ្ន៎ ដោយធ្វើអ៊ីចឹង!
២១. តើយើងអាចឃើញនូវភាពស្មើគ្នាអ្វី នៅអេសាយ ៦៥:២៥ និងអេសាយ ១១:៩?
២១ គឺមិនមែនជាការសន្មតជាមុន ដោយស្រមៃគិតអំពីការរស់នៅក្នុងពិភពលោកថ្មីរបស់ព្រះទេ។ ព្រះទ្រង់អញ្ជើញយើង ក៏ដាស់តឿនយើងផង ឲ្យថ្វាយបង្គំទ្រង់ដោយសេចក្ដីពិតពីឥឡូវនេះ ហើយមានលក្ខណៈចាំបាច់ឲ្យបានជីវិតនៅពេលដែល‹គេនឹងមិនបៀតបៀនឬបំផ្លាញអ្វីនៅគ្រប់ក្នុងស្រុកភ្នំបរិសុទ្ធរបស់ទ្រង់ទៀតឡើយ›។ (អេសាយ ៦៥:២៥) ប៉ុន្តែ តើអ្នកដឹងទេថា អេសាយបាននិយាយស្រដៀងនេះមុនទៅទៀត ហើយបានបន្ថែមនូវកត្ដាមួយដែលជាសារៈសំខាន់ ដើម្បីឲ្យយើងសប្បាយយ៉ាងពិតក្នុងពិភពលោកថ្មី? អេសាយ ១១:៩ ចែងថា៖ «វារាល់គ្នានឹងមិនធ្វើទុក្ខ ឬបំផ្លាញគ្នា នៅគ្រប់លើភ្នំបរិសុទ្ធរបស់អញ ដ្បិតគ្រប់ទាំងអស់នឹងស្គាល់ព្រះយេហូវ៉ា នៅពេញពាសលើផែនដី ដូចជាទឹកនៅពេញពាសក្នុងសមុទ្រដែរ»។
២២. ការពិនិត្យមើលនូវទំនាយបួនក្នុងព្រះគម្ពីរ គួរតែពង្រឹងយើងឲ្យប្ដេជ្ញាចិត្តធ្វើអ្វី?
២២ ‹ចំណេះអំពីព្រះយេហូវ៉ា›។ នៅពេលដែលព្រះធ្វើទាំងអស់ឡើងជាថ្មី នោះពួកអ្នកដែលរស់នៅលើផែនដីនឹងមានចំណេះត្រឹមត្រូវអំពីទ្រង់ និងអំពីព្រះហឫទ័យរបស់ទ្រង់ដែរ។ នោះគឺទាក់ទងច្រើនទៀត មិនគ្រាន់តែពីការរៀនអំពីសត្វនោះទេ។ នេះគឺទាក់ទងនឹងព្រះបន្ទូលដែលទ្រង់បានបណ្ដាលឲ្យតែងមក។ ជាឧទាហរណ៍ សូមគិតអំពីរបស់ទាំងប៉ុន្មានដែលយើងបានឃើញដោយពិនិត្យមើលតែទំនាយបួន ដែលរៀបរាប់អំពី«ផ្ទៃមេឃថ្មី ហើយនឹងផែនដីថ្មី»នោះ។ (អេសាយ ៦៥:១៧; ៦៦:២២; ពេត្រុសទី២ ៣:១៣; វិវរណៈ ២១:១) អ្នកមានមូលហេតុល្អណាស់ ចំពោះការអានព្រះគម្ពីរជារៀងរាល់ថ្ងៃ។ តើនេះជារបស់ដ៏សំខាន់ក្នុងទម្រង់ការរបស់អ្នកឬទេ? បើមិនអ៊ីចឹងទេ តើអ្នកអាចធ្វើការកែសម្រួលអ្វីខ្លះ ដើម្បីឲ្យអ្នកអាចអាននូវបន្ទូលរបស់ព្រះជារៀងរាល់ថ្ងៃនោះ? អ្នកនឹងឃើញថា ក្រៅពីការទន្ទឹងចាំដ៏សប្បាយនឹងពិភពលោកថ្មី នោះអ្នកនឹងទទួលនូវការសប្បាយបានច្រើនឡើងនៅឥឡូវនេះ ដូចជាអ្នកតែងបទទំនុកដំកើងបានដែរ។—ទំនុកដំកើង ១:១, ២
[កំណត់សម្គាល់]
^ សូមមើលសៀវភៅ ការយល់ធ្លុះជ្រៅនឹងបទគម្ពីរ ក្បាលទី១ ទំព័រ ៩០៦ (ភាសាអង់គ្លេស) ដែលបានបោះពុម្ពដោយសមាគមប៉មយាមនិងខិត្តប័ណ្ណនៃរដ្ឋញូវយ៉ក។
តើអ្នកនឹងឆ្លើយយ៉ាងណា?
• ហេតុអ្វីក៏យើងអាចសន្និដ្ឋានថា អេសាយ ៦៦:២២-២៤ ទាយប្រាប់អំពីអ្វីដែលនៅនាខាងមុខនោះ?
• តើអ្នកទន្ទឹងចាំអ្វីជាពិសេស ដូចបានរៀបរាប់ក្នុងទំនាយទាំងប៉ុន្មាន ដែលបានកត់ទុកនៅអេសាយ ៦៦:២២-២៤ និងអេសាយ ៦៥:២០-២៥?
• តើអ្នកមានមូលហេតុអ្វីខ្លះ ដោយមានការទុកចិត្តលើអនាគតរបស់អ្នកនោះ?
[សំណួរសម្រាប់អត្ថបទសិក្សា]
[រូបភាពនៅទំព័រ២៦]
លោកអេសាយ ពេត្រុស និងយ៉ូហាន បានទាយប្រាប់នូវលក្ខណៈនៃ «ផ្ទៃមេឃថ្មី ហើយនឹងផែនដីថ្មី»