«ព្រះអម្ចាស់ ទ្រង់មានព្រះជន្មរស់ឡើងវិញមែន!»
«ព្រះអម្ចាស់ ទ្រង់មានព្រះជន្មរស់ឡើងវិញមែន!»
សូមគិតទៅមើលថា ពេលដែលព្រះយេស៊ូបានត្រូវគេធ្វើគុតនោះ សិស្សរបស់ព្រះអង្គម្ចាស់មានចិត្តអន្ទះអន្ទែងយ៉ាងណាទៅ។ សេចក្ដីសង្ឃឹមរបស់គេគឺហាក់ដូចជារលាយសាបសូន្យអស់ ដូចជាសាកសពឥតមានជីវិត ដែលលោកយ៉ូសែបពីទីក្រុងអើរីម៉ាថេបានដាក់ក្នុងផ្នូរនោះអ៊ីចឹង។ សេចក្ដីសង្ឃឹមមួយដែលថា ព្រះយេស៊ូនឹងប្រោសពួកយូដាចេញពីនឹមរបស់ពួករ៉ូម ក៏បានរលត់អស់ទៅដែរ។
បើរឿងចប់តែប៉ុណ្ណេះ សិស្សរបស់ព្រះយេស៊ូប្រាកដជាត្រូវបាត់អស់ទៅដែរ ដូចជាពួកអ្នកដែលបានកាន់តាមមនុស្សទាំងប៉ុន្មានទៀត ដែលបានអះអាងថាខ្លួនជាព្រះមេស្ស៊ីនោះ។ ក៏ប៉ុន្តែ ព្រះយេស៊ូនៅមានព្រះជន្មរស់នៅឡើយ! យោងទៅតាមបទគម្ពីរនានា ព្រះយេស៊ូបានលេចអង្គទ្រង់ផ្ទាល់ឲ្យអ្នកកាន់តាមទ្រង់ឃើញប៉ុន្មានដង មិនយូរប៉ុន្មានក្រោយពីការសោយទិវង្គតរបស់ទ្រង់។ ហេតុនោះហើយបានជាអ្នកខ្លះបានត្រូវជំរុញឲ្យលាន់មាត់ថា៖ «ព្រះអម្ចាស់ ទ្រង់មានព្រះជន្មរស់ឡើងវិញមែន!»។—លូកា ២៤:៣៤
សិស្សរបស់ទ្រង់ត្រូវតែការពារជំនឿរបស់ខ្លួនទៅលើព្រះយេស៊ូជាព្រះមេស្ស៊ី។ ក្នុងការធ្វើអ៊ីចឹង គេបានចង្អុលបញ្ជាក់ជាពិសេសទៅលើដំណើររស់ឡើងវិញពីការអស់ព្រះជន្មរបស់ទ្រង់ ជាទីសំអាងជាក់លាក់ថា ទ្រង់ជាព្រះមេស្ស៊ីមែន។ យ៉ាងប្រាកដណាស់ «ពួកសាវកក៏ធ្វើបន្ទាល់ ដោយព្រះចេស្ដាដ៏ធំ ពីដំណើរដែលព្រះអម្ចាស់យេស៊ូវមានព្រះជន្មរស់ឡើងវិញ»ដែរ។—កិច្ចការ ៤:៣៣
បើមានអ្នកណាម្នាក់អាចបង្ហាញថា ដំណើររស់ឡើងវិញរបស់ទ្រង់នោះមិនពិតទេ ប្រហែលជាដោយឲ្យសិស្សម្នាក់របស់ទ្រង់សារភាពប្រាប់អ៊ីចឹង ឬដោយបង្ហាញថាសពរបស់ព្រះយេស៊ូនៅមានក្នុងផ្នូរនៅឡើយ បើដូចនេះនោះសាសនាគ្រីស្ទានត្រូវបរាជ័យតាំងតែពីដើមមកម្ល៉េះ។ តែមិនមែនអ៊ីចឹងទេ។ ដោយដឹងថាព្រះគ្រីស្ទមានព្រះជន្មរស់នៅឡើយ អ្នកកាន់តាមព្រះយេស៊ូបានដើរផ្សាយយ៉ាងសុសសាយទូទៅ ដោយប្រកាសប្រាប់ពីដំណើររស់ឡើងវិញរបស់ទ្រង់ និងមនុស្សទាំងហ្វូងៗបានក្លាយជាអ្នកជឿទៅលើព្រះគ្រីស្ទដែលបានរស់ឡើងវិញនោះ។
ហេតុអ្វីបានជាអ្នកអាចជឿដែរទៅលើដំណើររស់ឡើងវិញរបស់ព្រះយេស៊ូ? តើមានភស្តុតាងអ្វីខ្លះដែលថា ដំណើររស់ឡើងវិញនោះជាហេតុការណ៍ពិតមែន?
ហេតុដែលគួរពិនិត្យមើលទីសំអាង
សៀវភៅដំណឹងល្អទាំងបួនក៏រាយការណ៍ប្រាប់អំពីដំណើររស់ឡើងវិញរបស់ព្រះយេស៊ូ។ (ម៉ាថាយ ២៨:១-១០; ម៉ាកុស ១៦:១-៨; លូកា ២៤:១-១២; យ៉ូហាន ២០:១-២៩) a ផ្នែកផ្សេងៗទៀតនៃបទគម្ពីរគ្រីស្ទានភាសាក្រិក ក៏ចែងយ៉ាងប្រាកដដែរអំពីការប្រោសព្រះគ្រីស្ទពីការសោយទិវង្គតឡើងវិញ។
អ៊ីចឹងយើងមិនងឿងឆ្ងល់ឡើយ ពីហេតុដែលអ្នកកាន់តាមព្រះយេស៊ូបានប្រកាសផ្សាយអំពីដំណើររស់ឡើងវិញរបស់ទ្រង់! បើព្រះប្រាកដជាបានប្រោសព្រះយេស៊ូឲ្យរស់ឡើងវិញមែន នេះគឺជាដំណឹងដ៏អស្ចារ្យជាទីបំផុតដែលលោកីយ៍ធ្លាប់បានឮហើយ។ នេះមានន័យថា មានព្រះមែន។ បន្ថែមទៅទៀតក៏មានន័យថា ព្រះយេស៊ូកំពុងតែមានព្រះជន្មរស់នៅនៅឡើយក្នុងពេលនេះ។
តើនេះមានឥទ្ធិពលយ៉ាងណាមកលើយើង? ព្រះយេស៊ូបានអធិស្ឋានថា៖ «នេះជាជីវិតដ៏នៅអស់កល្បជានិច្ច គឺឲ្យគេបាន[ចំណេះអំពី, ព.ថ.]ទ្រង់ដ៏ជាព្រះពិតតែ១ នឹងព្រះយេស៊ូវគ្រីស្ទដែលទ្រង់បានចាត់ឲ្យមកផង»។ (យ៉ូហាន ១៧:៣) មែនហើយ យើងអាចទទួលចំណេះអំពីព្រះយេស៊ូនិងព្រះវរបិតារបស់ទ្រង់ ជាចំណេះដែលប្រទានជីវិតបាន។ ដោយអនុវត្តតាមចំណេះបែបនេះ សូម្បីតែយើងស្លាប់ក៏ដោយ យើងអាចរស់ឡើងវិញបាន ដោយព្រោះព្រះយេស៊ូបានត្រូវប្រោសឲ្យរស់ឡើងវិញដែរ។ (យ៉ូហាន ៥:២៨, ២៩) យើងអាចសង្ឃឹមនឹងទទួលជីវិតជារៀងរហូតនៅលើផែនដីមនោរម្យ ក្រោមព្រះរាជាណាចក្ររបស់ព្រះនៅស្ថានសួគ៌ ដែលមានព្រះយេស៊ូគ្រីស្ទជាអ្នកកាន់កាប់ ជាព្រះរាជបុត្រាដែលបានត្រូវលើកឡើងជាស្តេចលើអស់ទាំងស្តេច។—អេសាយ ៩:៦, ៧; លូកា ២៣:៤៣; វិវរណៈ ១៧:១៤
ដូច្នេះហើយ មានសំនួរដែលត្រូវសួរថា តើព្រះយេស៊ូពិតជាមានព្រះជន្មរស់ឡើងវិញពីការសោយទិវង្គតឬក៏អត់? នេះជាសំនួរដ៏សំខាន់មួយមែន។ សំនួរនោះមានអានុភាពលើជីវិតយើងនៅពេលឥឡូវនេះ ព្រមទាំងលើសេចក្ដីសង្ឃឹមរបស់យើងចំពោះពេលអនាគតផងដែរ។ ហេតុនេះហើយបានជាយើងអញ្ជើញលោកអ្នកពិនិត្យមើលនៅទីសំអាងបួនយ៉ាងដែលបញ្ជាក់ថា ព្រះយេស៊ូបានសោយទិវង្គតនិងបានរស់ឡើងវិញមែន។
ព្រះយេស៊ូពិតជាបានសោយទិវង្គតនៅលើបង្គោលឈើមែន
អ្នកខ្លះដែលជាអ្នកសង្ស័យនោះអះអាងថា ទោះជាគេបានដាក់ព្រះយេស៊ូលើបង្គោលឈើក៏ដោយ នោះទ្រង់មិនបានសោយទិវង្គតនៅទីនោះទេ។ គេថា ទ្រង់គ្រាន់ជិតផុតដង្ហើមទៅ ហើយបានមានស្មារតីឡើងវិញដោយព្រោះផ្នូរនោះត្រជាក់។ ក៏ប៉ុន្តែ ពត៌មានផ្សេងៗដែលមានស្រាប់ នោះបញ្ជាក់ថា គេបានដាក់រូបកាយដ៏ឥតមានជីវិតរបស់ព្រះយេស៊ូទៅក្នុងផ្នូរនោះឯង។
ដោយសារគេបានប្រហារជីវិតរបស់ព្រះយេស៊ូយ៉ាងសាធារណៈនោះ មានសាក្សីដែលអាចឲ្យទីសំអាងថា ទ្រង់ពិតជាបានសោយទិវង្គតនៅលើបង្គោលឈើនោះមែន។ មេទ័ពម្នាក់ដែលទទួលខុសត្រូវនឹងការប្រហារជីវិតគេ ក៏បានបញ្ជាក់ថាទ្រង់សោយទិវង្គតហើយ។ មេទ័ពម្នាក់ជាអ្នកជំនាញដែលមានកិច្ចការខាងនោះ ជាអ្នកដែលសម្រេចឲ្យដឹងថា តើព្រះយេស៊ូបានសោយទិវង្គតហើយឬយ៉ាងណា។ បន្ថែមទៅទៀតនោះ លោកប៉ុនទាសពីឡាត់ ដែលជាចៅហ្វាយខេត្តជនជាតិរ៉ូម ក៏បានយល់ព្រមប្រគល់សពព្រះយេស៊ូឲ្យលោកយ៉ូសែបពីក្រុងអើរីម៉ាថេ ដើម្បីយកទៅកប់នោះ ក្រោយពីលោកដឹងប្រាកដជាមុន ថាព្រះយេស៊ូសោយទិវង្គតហើយ។—ម៉ាកុស ១៥:៣៩-៤៦
គេបានមកឃើញផ្នូរនោះនៅទទេមែន
ផ្នូរនោះដែលនៅទទេ បានធ្វើជាភស្តុតាងដំបូងដែលសិស្សព្រះយេស៊ូមានអំពីដំណើររស់ឡើងវិញរបស់ទ្រង់ និងទីសំអាងនេះនៅតែជាអ្វីដែលគ្មានអ្នកណាជំទាស់ទេ។ គេបានកប់ព្រះយេស៊ូនៅក្នុងផ្នូរដ៏ថ្មីមួយ ជាផ្នូរដែលគ្មាននរណាដែលប្រើទេ។ ផ្នូរនោះនៅក្បែរទីកន្លែងដែលត្រូវគេធ្វើគុត និងនៅគ្រានោះស្រួលរកឃើញដែរ។ (យ៉ូហាន ១៩:៤១, ៤២) កំណត់ហេតុពីសៀវភៅដំណឹងល្អនិមួយៗ ក៏ឯកភាពថា នៅពេលដែលមិត្តសំឡាញ់របស់ព្រះយេស៊ូបានមកដល់ផ្នូរនោះ នៅពេលព្រលឹមថ្ងៃទីពីរក្រោយពីទ្រង់បានសោយទិវង្គតហើយ នោះបានបាត់សពរបស់ទ្រង់ទៅហើយ។—ម៉ាថាយ ២៨:១-៧; ម៉ាកុស ១៦:១-៧; លូកា ២៤:១-៣; យ៉ូហាន ២០:១-១០
ផ្នូរទទេនោះបានធ្វើឲ្យសត្រូវរបស់ព្រះយេស៊ូភាំងស្មារតី ដូចជាមិត្តទ្រង់ក៏បានភាំងស្មារតីដែរ។ បច្ចាមិត្តរបស់ទ្រង់ធ្លាប់ប្រឹងប្រែងជាយូរយារមកហើយ ដើម្បីធ្វើគុតនិងកប់ទ្រង់ចោល។ ដោយបានសម្រេចគោលដៅរបស់គេហើយ គេក៏បានចាត់វិធានការណ៍ចាត់តាំងអ្នកយាមម្នាក់ និងបានបិទផ្នូរនោះយ៉ាងជាប់ទៅ។ ទោះជាយ៉ាងណាក៏ដោយ នៅពេលព្រលឹមថ្ងៃទីមួយក្នុងកំឡុងសប្ដាហ៍នោះ ក៏ផ្នូរនោះនៅតែទទេដែរ។
តើមិត្តៗរបស់ព្រះយេស៊ូបានយកព្រះសពទ្រង់ចេញពីផ្នូរឬ? ប្រាកដជាអត់ទេ! ដោយព្រោះសៀវភៅដំណឹងល្អនិមួយៗបង្ហាញថា គេមានចិត្តទុក្ខព្រួយជាខ្លាំងក្រោយពីការប្រហារព្រះជន្មទ្រង់មកនោះ។ ម្យ៉ាងទៀតដែរ សិស្សរបស់ទ្រង់ក៏ប្រាកដជានឹងមិនព្រមរងទុក្ខសេចក្ដីបៀតបៀននិងការស្លាប់ ដើម្បីអ្វីដែលគេដឹងថាជារឿងក្លែងក្លាយនោះឡើយ។
តើអ្នកណាគេបានដកយកសពទ្រង់ចេញនោះ? គ្មានទំនងថា ពួកសត្រូវរបស់ព្រះយេស៊ូយកសពចេញទេ។ តែបើអ៊ីចឹងមែន គេប្រាកដជានឹងចង់ប្រគល់ឲ្យសពនោះនៅក្រោយមក ដើម្បីបដិសេធនឹងការអះអាងរបស់សិស្សព្រះយេស៊ូដែលថា ទ្រង់មានព្រះជន្មរស់ឡើងវិញនោះ។ តែមិនមានអ្វីៗបែបនោះកើតឡើងទេ ដោយព្រោះព្រះយេហូវ៉ាជាអ្នកសម្រេចការនោះតែម្ដង។
ប៉ុន្មានសប្ដាហ៍ក្រោយមកទៀត ពួកសត្រូវរបស់ព្រះយេស៊ូមិនដែលតវ៉ាទាស់ទទែងដោយបដិសេធទេ កាលដែលពេត្រុសបានមានប្រសាសន៍ជាកសិណសាក្សីថា៖ «ឱពួកសាសន៍អ៊ីស្រាអែលអើយ! សូមស្ដាប់ពាក្យនេះចុះ! ព្រះយេស៊ូវ ជាអ្នកស្រុកណាសារ៉ែត ដែលព្រះបានសំដែងបង្ហាញមកអ្នករាល់គ្នា ដោយការឫទ្ធិបារមី ការអស្ចារ្យ នឹងទីសំគាល់ ដែលព្រះទ្រង់បានធ្វើ នៅកណ្ដាលអ្នករាល់គ្នា ដោយសារទ្រង់ ដូចជាអ្នករាល់គ្នាដឹងស្រាប់ហើយ ព្រះអង្គនោះទ្រង់ត្រូវបញ្ជូនទៅ តាមការសំរេច នឹងបព្វញាណនៃព្រះ ហើយអ្នករាល់គ្នាបានចាប់ទ្រង់ ដោយសារដៃមនុស្សទទឹងច្បាប់ ព្រមទាំងឆ្កាងសំឡាប់ទ្រង់ផង។ ប៉ុន្តែ ព្រះបានប្រោសទ្រង់ ឲ្យមានព្រះជន្មរស់ឡើងវិញ ដោយបានស្រាយចំណងនៃសេចក្ដីស្លាប់ចេញ ពីព្រោះសេចក្ដីស្លាប់ គ្មានអំណាចនឹងឃុំឃាំងទ្រង់ទុកបានឡើយ។ ដ្បិតហ្លួងដាវីឌមានបន្ទូលពីទ្រង់ថា៖ ‹ទូលបង្គំបានឃើញព្រះអម្ចាស់ នៅមុខទូលបង្គំជានិច្ច . . . ១ទៀត រូបសាច់ទូលបង្គំនឹងស្នាក់នៅ ដោយសេចក្ដីសង្ឃឹមដែរ។ ដ្បិតទ្រង់នឹងមិនទុកព្រលឹងទូលបង្គំ ឲ្យជាប់នៅក្នុងស្ថានឃុំព្រលឹងមនុស្សស្លាប់ទេ ក៏មិនឲ្យអ្នកបរិសុទ្ធរបស់ទ្រង់ឃើញសេចក្ដីពុករលួយដែរ›»។—កិច្ចការ ២:២២-២៧
មនុស្សជាច្រើនបានឃើញព្រះយេស៊ូរស់ឡើងវិញ
នៅក្នុងសៀវភៅកិច្ចការ លោកលូកាដែលជាអ្នកសរសេរដំណឹងល្អមួយក្បាលដែរ បានមានប្រសាសន៍ថា៖ «កាល[ព្រះយេស៊ូ]បានរងទុក្ខរួចហើយ នោះក៏បានសំដែងអង្គទ្រង់មកទាំងរស់ ឲ្យពួកសាវកនោះឃើញដោយសារភស្តុតាងជាច្រើន ព្រមទាំងលេចមកឯគេ ក៏សំដែងពីអស់ទាំងសេចក្ដីខាងឯនគរព្រះ ក្នុងរវាង៤០ថ្ងៃ»។ (កិច្ចការ ១:២, ៣) សិស្សមួយចំនួនក៏បានឃើញព្រះយេស៊ូជាអ្នករស់ឡើងវិញនៅពេលផ្សេងៗពីគ្នា នៅក្នុងសួនច្បារមួយ តាមផ្លូវ ពេលបរិភោគអាហារ និងនៅក្បែរសមុទ្រទីបេរាសជាដើម។—ម៉ាថាយ ២៨:៨-១០; លូកា ២៤:១៣-៤៣; យ៉ូហាន ២១:១-២៣
ពួកអ្នករកកំហុសក៏ដេញដោលអំពីភាពត្រឹមត្រូវនៃការលេចអង្គទ្រង់ឡើងទាំងនេះ។ ពួកគេថា អ្នកសរសេរបានប្រឌិតដំណើររឿងនោះ ឬដោយបញ្ជាក់ពីអ្វីដែលទំនងជាការទាស់គំនិតនៅក្នុងហ្នឹងដែរ។ តាមការពិត ភាពខុសគ្នាបន្ដិចបន្តួចរវាងកំណត់ហេតុជាដំណឹងល្អនោះ ក៏បញ្ជាក់ថាគ្មានការផ្សំគំនិតគ្នាជាមុនទេ។ ចំណេះរបស់យើងអំពីព្រះយេស៊ូអាចកាន់តែទូលំទូលាយឡើង ដោយអ្នកសរសេរម្នាក់កត់ចំណុចល្អិតល្អន់ណាដែលបន្ថែមទៅលើកំណត់ហេតុឯទៀត ពីព្រឹត្ដិការណ៍ផ្សេងៗក្នុងព្រះជន្មរបស់ព្រះយេស៊ូនៅលើផែនដី។
តើការលេចខ្លួនឡើងដោយព្រះយេស៊ូក្រោយពីមានព្រះជន្មរស់ឡើងវិញនោះ គ្រាន់តែជាការមមើមមាយឬ? ការនិយាយអ៊ីចឹងក៏មិនគួរជឿដែរ ដោយព្រោះមានគ្នាច្រើននាក់ដែលបានឃើញទ្រង់។ ក្នុងចំណោមពួកអ្នកឃើញនោះ រួមទាំងអ្នកនេសាទត្រី ម្នាក់ដែលធ្វើការរដ្ឋ ព្រមទាំងសាវ័កថូម៉ាសដែលចេះតែសង្ស័យនោះ ដែលបានជឿជាក់ដោយឃើញនូវភស្តុតាងដែលបដិសេធមិនបាន បញ្ជាក់ថាព្រះយេស៊ូបានរស់ពីស្លាប់ឡើងវិញមែន។ (យ៉ូហាន ២០:២៤-២៩) ប៉ុន្មានដងនោះ សិស្សរបស់ព្រះយេស៊ូមិនបានស្គាល់ភ្លាមៗនូវមុខព្រះអង្គម្ចាស់របស់គេដែលបានរស់ឡើងវិញទេ។ មានម្ដងនោះដែលមនុស្សជាង៥០០នាក់បានឃើញទ្រង់ ដែលគេភាគច្រើននោះបាននៅរស់នៅឡើយ ពេលដែលសាវ័កប៉ុលបានសំដៅទៅលើព្រឹត្ដិការណ៍នោះ ជាទីសំអាងពីដំណើររស់ឡើងវិញ។—កូរិនថូសទី១ ១៥:៦
ព្រះយេស៊ូដែលមានព្រះជន្មរស់ ទ្រង់មានអានុភាពទៅលើមនុស្សជាតិ
ដំណើររស់ឡើងវិញរបស់ព្រះយេស៊ូមិនមែនជារឿងចង់ឮចង់ដឹង ឬរឿងដេញដោលប៉ុណ្ណោះទេ។ ហេតុដែលទ្រង់មានព្រះជន្មរស់នោះ បានមានឥទ្ធិពលដ៏ល្អលើមនុស្សជាតិទូទៅ។ តាំងពីសតវត្សទីមួយមកម្ល៉េះ មនុស្សច្រើនរាប់ពុំអស់បានបែរចេញពីភាពកន្តើយ ឬការប្រឆាំងសាសនាគ្រីស្ទានទាំងស្រុង ទៅជាមានចិត្តដឹងប្រាកដប្រជាថា ជាសាសនាពិតទៅវិញ។ អ្វីទៅដែលបានកែប្រែគំនិតគេ? គឺជាការសិក្សាបទគម្ពីរនានាដែលបានធ្វើជាទីសំអាងបញ្ជាក់ថា ព្រះបានប្រោសឲ្យព្រះយេស៊ូរស់ឡើងវិញមានព្រះជន្មជាបុគ្គលវិញ្ញាណដ៏មានសិរីរុងរឿងនៅស្ថានសួគ៌។ (ភីលីព ២:៨-១១) គេបានអនុវត្តជំនឿទៅលើព្រះយេស៊ូ ព្រមទាំងលើសំវិធានការពីព្រះយេហូវ៉ា ដើម្បីឲ្យបានសេចក្ដីសង្គ្រោះតាមរយៈយញ្ញបូជាលោះរបស់ព្រះគ្រីស្ទ។ (រ៉ូម ៥:៨) បុគ្គលម្នាក់ៗបែបនេះបានរកសុភមង្គលពិតឃើញ ដោយធ្វើតាមបំណងព្រះហឫទ័យរបស់ព្រះ និងដោយរស់សមស្របទៅតាមការបង្រៀនរបស់ព្រះយេស៊ូ។
សូមគិតទៅមើលថា ការធ្វើជាគ្រីស្ទានម្នាក់នៅសតវត្សទីមួយនោះ បានរួមបញ្ចូលអ្វីខ្លះ។ គ្មានការទទួលកិត្យានុភាព អំណាច ឬវត្ថុទ្រព្យបានឡើយ។ ផ្ទុយទៅវិញ គ្រីស្ទានដើមភាគច្រើននោះ បាន‹ទ្រាំដោយអំណរឲ្យមនុស្សប្លន់យករបស់ទ្រព្យខ្លួន› ប្រយោជន៍ដល់ជំនឿរបស់ខ្លួន។ (ហេព្រើរ ១០:៣៤) ការកាន់តាមសាសនាគ្រីស្ទាន បានតម្រូវឲ្យគេចេះពលីខ្លួននិងទទួលការបៀតបៀន ដែលជាច្រើនដងនោះក៏នាំឲ្យស្លាប់ដោយព្រោះជំនឿដែរ។
មុននឹងក្លាយជាអ្នកកាន់តាមព្រះយេស៊ូ អ្នកខ្លះអាចទទួលកិត្យានុភាពនិងវត្ថុទ្រព្យជាច្រើនដែរ។ លោកសូលពីទីក្រុងតើសុសបានរៀនពីលោកគ្រូដ៏ល្បីម្នាក់ខាងក្រិត្យវិន័យ ឈ្មោះកាម៉ាលាល ហើយក៏បានចាប់ផ្ដើមបង្កើតឈ្មោះល្បីពីមុខពួកសាសន៍យូដាដែរ។ (កិច្ចការ ៩:១, ២; ២២:៣; កាឡាទី ១:១៤) ក៏ប៉ុន្តែ សូលបានទៅជាសាវ័កប៉ុលវិញ។ គាត់និងមនុស្សច្រើននាក់ទៀតបានបែរខ្នងបដិសេធនឹងកិត្យានុភាពនិងអំណាចដែលលោកីយ៍នេះប្រទានឲ្យ។ ហេតុអ្វី? ដើម្បីផ្សព្វផ្សាយសារពីសេចក្ដីសង្ឃឹមពិត ដែលមានមូលដ្ឋានលើសេចក្ដីសន្យារបស់ព្រះ និងលើហេតុការណ៍ពិតដែលថា ព្រះយេស៊ូគ្រីស្ទបានត្រូវប្រោសពីស្លាប់ឲ្យរស់ឡើងវិញ។ (កូល៉ុស ១:២៨) គេបានសុខចិត្តរងទុក្ខប្រយោជន៍ឲ្យអ្វីដែលគេដឹងថា មានមូលដ្ឋានទៅលើសេចក្ដីពិតមែន។
សព្វថ្ងៃនេះក៏មានរាប់លាននាក់ដែលធ្វើអ៊ីចឹងដែរ។ លោកអ្នកអាចរកពួកគេឃើញនៅក្នុងក្រុមជំនុំនានានៃស្មរបន្ទាល់ព្រះយេហូវ៉ាទូទាំងផែនដី។ ស្មរបន្ទាល់ទាំងឡាយ សូមអញ្ជើញលោកអ្នកដោយកក់ក្ដៅ មករួមចំណែកធ្វើពិធីបុណ្យរំឭកពីការសោយទិវង្គតរបស់ព្រះយេស៊ូដែលធ្វើឡើងជាប្រចាំឆ្នាំ។ ពួកគេនឹងសប្បាយចិត្តបើលោកអ្នកមានវត្តមាននៅពិធីនោះ និងនៅឯកិច្ចប្រជុំនានានៅសាលព្រះរាជាណាចក្ររបស់ពួកគេ ដើម្បីសិក្សាព្រះគម្ពីរ។
សូមអញ្ជើញរៀនបន្ថែមទៀត មិនគ្រាន់តែអំពីការសោយទិវង្គត និងដំណើររស់ឡើងវិញរបស់ព្រះយេស៊ូប៉ុណ្ណោះទេ តែអំពីព្រះជន្មនិងការបង្រៀនរបស់ទ្រង់ផងដែរ។ ទ្រង់អញ្ជើញយើងមកឯទ្រង់។ (ម៉ាថាយ ១១:២៨-៣០) ចូរសម្រេចការនៅពេលឥឡូវនេះចុះ ដើម្បីទទួលបាននូវចំណេះត្រឹមត្រូវអំពីព្រះយេហូវ៉ានិងព្រះយេស៊ូគ្រីស្ទ។ ការធ្វើដូច្នេះក៏អាចនាំឲ្យមានជីវិតជានិរន្តរ៍ ក្រោមព្រះរាជាណាចក្ររបស់ព្រះ ដែលស្ថិតក្នុងព្រះហស្តនៃព្រះរាជបុត្រាដ៏ស្ងួនភ្ងារបស់ទ្រង់។
[កំណត់សម្គាល់]
a ដើម្បីឃើញទីសំអាងអំពីភាពត្រឹមត្រូវនៃសៀវភៅដំណឹងល្អទាំងប៉ុន្មាន សូមមើលអត្ថបទជាភាសាអង់គ្លេស ដែលមានប្រធាន «តើសៀវភៅដំណឹងល្អនានាជាប្រវត្ដិសាស្ត្រមែនទែន ឬជារឿងប្រពៃណីប៉ុណ្ណោះ?» ក្នុងទស្សនាវដ្ដីប៉មយាម ពីថ្ងៃទី១៥ ខែឧសភា ឆ្នាំ២០០០។
[រូបភាពនៅទំព័រ៧]
មនុស្សរាប់លាននាក់រកសុភមង្គលពិតឃើញ ដោយធ្វើជាអ្នកកាន់តាមព្រះយេស៊ូគ្រីស្ទ
[អ្នកផ្ដល់សិទ្ធិឲ្យប្រើរូបភាពនៅទំព័រ៦]
From the Self-Pronouncing Edition of the Holy Bible, containing the King James and the Revised versions